Okotropa

Trene inamacan Iehova, nge Nyidrëti a hamëne gufane la inamacane kowe la itre atr asë. Ame la ketre aqane tro sa kapa la inamacan tre, troa dreng la ihaji Iehova. Celë hi ka sewe së troa kuca la itre ewekë ka ngazo, me xatua së troa qale koi Iehova. (Ite edomë 2:10-12) Tro hë sa hetrenyi la ketre mejiune ka lolo, ene la troa mele epine palua. (Iuda 21) Hnene laka, itre atr ka tha pexeje kö së, nge isa aqane hia së kö, jole koi së e itre xa ijin troa kapa la ihaji, maine öhnyi eloine pena. Ngo, ame pe la easa öhne la itre thangane la ihaji Iehova ngöne la mele së, easa trotrohnin e cili la etrune la ihnimi Nyidrëti koi së. Kola qaja ngöne Ite Edomë 3:11, 12 ka hape: “Neköng, the sixelene kö la eamo i Iehova ke ame lo hnei Iehova hna pune hnim, te, nyidëti a hajin.” Tha sihngödri kö koi së laka, Iehova a ajane la ka sisitria kowe la mele së. (Heb. 12:5-11) Pine laka, atrepengö së hnyawa hi hnei Nyidrë, ame la ihaji hnei Nyidrëti hna hamën, ka ihmeku hnyawa hi memine la jol ka eje the së. w18.03 28 par. 1-2

Hnei Peteru aposetolo hna cinyihane kowe la itre trejine ka traqa qa ngöne la itre nöj gaa nany. Hnei angatr hna qëmeke kowe “la itupathi kösë eë.” Nemene la ka troa xatuane la itre keresiano ngöne la itre macatre ne akötre cili? (1 Pet. 1:1; 4:4, 7, 12) Hnei Peteru hna upe la itre trejin troa ikep, ngacama ka iatre hë angatr, nge ka majemine hë angatr ce huliwa. Nemene la aqane tro lai a xatua angatr? Ame la troa ikep, tre celë hi lai ka troa aeasenyi ketre koi ketre. Tune kaa epun? Mekune pala kö epuni lo kola hë epun hnei ketre? Tha ijine madrine kö lo koi epun? Nge, ame la epuni a ikönë, hapeu, tha hna acatrene kö la aqane imelekeu i epun memine la itre trejin? Ame la aqane tro sa atrepengöne hnyawa la itre trejin tre, ene la troa kepe angatr. Ame la itre keresiano ka mel ngöne la hneijine i Peteru, nyipiewekë tro angatr a acatrene la aqane imelekeu i angatr ke, kolo palahi a ngazo catre la itre ijine cili. Ketre tune mina fe, loi e tro sa nyitipu angatr ke, easa melëne “la ite drai hnapin,” ene la itre drai tixenuë ne la fene celë.​—2 Tim. 3:1. w18.03 14-15 par. 1-3

Tusi Hmitrötr a amamane laka madrine palahi la atre ce mekun me Iehova. Kola mama ngöne Roma 8:6 la eloine troa ce mekun me Iehova, kola hape: “E hnine la ngönetei, meci hë ; ngo e hnine la u, melë hë me tingeting.” Matre, e tro sa ce mekun me Iehova, tro hë së enehila a mele tingeting me Nyidrë, me tingeting la hni së, me hetrenyi la mejiun troa mel epine palua. Ngo, ngazo catre la fene celë ke, isazikeu catr la aqane waiewekë ne la itre atr memine la aqane waiewekë i Iehova. Matre, nyipiewekë tro sa thupëne hnyawa la itre mekune së. E tha nyialiene kö së la he së hnene la itre mekune i Iehova, tro pena ha fene lai a nyialiene hnene la itre mekun me thiina ne ej. Öni Iuda, ame la atre ka ujë tune lai, thatreine kö tro la uati hmitrötre i Iehova a xatua angeic.​—Iuda 18, 19. w18.02 19 par. 5, 7; 20 par. 8

Itre droketre me infirmier a nyinyine la mec ne la itre atr, itre mec ka ixötrekeu ke, hetre aja i angatr troa xatua nyudren. Ngo, nyipiewekë tro angatr a thupëne hnyawa wanga xötre pi fe koi angatr la itre mec cili. Ceitune hi lai memine la Itretre Anyipici Iehova. Easë fe a mel me ce huliwa memine la itre atr laka, ka isazikeu catr la itre thiina i angatr memine la itre thiina i Akötresie. Matre, tha ka hmaloi kö koi së. Ame ngöne la itre drai tixenuë celë, thatre kö la itre atr la loi me ngazo. Paulo aposetolo a qejepengöne la itre thiina i angatr ngöne la tusi angeic koi Timoteo. (2 Tim. 3:1-5) Maine nyipici laka, easa hokötre hnene la itre thiina cili, ngo ijije fe hi troa hane xötre koi së la itre aqane mekun, me aqane ithanata, me aqane ujë ne la itre atr. (Ite edomë 13:20) Ngo, hetre nyine tro sa kuca matre tha tro kö a hane löthi së hnene la itre thiina ka ngazo ne la itre atr hne së hna ini Tusi memin. w18.01 27 par. 1-2

Ame ngöne la macatre 33, thupene lo kola amele Iesu, hetre hnei nyidrëti hna amekötine kowe la ala 500 lao atr, itre trahmany, me föe, me itre nekönatr. Nge nyidrëti a qaja koi angatre la trenge ewekë caha hun. (1 Kor. 15:6) Hnei Iesu hna upe la itretre drei nyidrë troa inine la itre atr troa xötrethenge nyidrë. Nyipiewekë troa bapataisone la atr ka kapa la ini qaathei nyidrë. (Mat. 11:29, 30) Maine hetre aja ne la atr troa nyihlue i Iehova thenge la aqane amekötine Nyidrë, loi e tro angeic a atrehmekune me kapa la hnëqa i Keriso laka, tro Iehova a eatrëne la aja i Nyidrë jëne Iesu. Ame hë e cili, ijije hë troa bapataiso angeic. Celë hi bapataiso hna kapa hnei Akötresie. Nyimu aqane anyipicine e hnine la Tusi Hmitrötr ka amamane ka hape, trotrohnine hnyawa hi la itretre drei Iesu la enyipiewekëne troa xomi bapataiso. Ame koi angatr, tha tro kö a hmitre troa xome la bapataiso.​—Ite hu. 2:41; 9:18; 16:14, 15, 32, 33. w18.03 5 par. 8

Ame enehila, ka tiqa la fen hnei kuci ngazo me hmi thoi. Kola ajojezine la itre atr hnei Babulona Atraqatr, ene la itre hmi ka thoi asë e cailo fen. Nge, hna qeje ej hnei Tusi Hmitrötr ka hape, “hnalapa ne la nöjei demoni.” (Hna ama. 18:2) Ngo, isapengö së memine la itre atrene fen, matre angatr a thaipië së. (Mar. 13:13) Haawe, loi e tro sa easenyi catr koi Iehova, Akötresi së, tui Daniela. Ame la easa mejiun koi Iehova, me idrengethenge, me hetre thiina ka ipië tre, Nyidrëti a wangatrunyi së. (Hag. 2:7) Hetre ini hna kapa hnene la itre keme me thine qa ngöne la tulu ne la keme me thine i Daniela. Ame lo ijine nekönatr petre kö Daniela, ngazo catre la thiina ne la nöj. Ngo, hnei Daniela hna tru trootro, me hnimi Iehova. Hnene la keme me thine i angeic hna ini angeic la pengöi Iehova. (Ite edomë 22:6) Nge, kolo fe a mama laka, tru la ihnimi nyidro koi Iehova ke, ame la aliene la ëje i Daniela tre, kola hape, “Akötresie La Atre Ameköti Ni.” (Dan. 1:6) Matre keme me thine fe, loi e hetrenyi thei epon la xomihni ngöne la epon a xatuane la nekönatr troa atre Iehova. Nge, the hmaca kö. (Efe. 6:4) Ce thithi jë me nyën, nge thithi sai nyëne jë. Isine jë troa amë e kuhu hni nyëne la itre mekuna i Iehova, nge tro kö Iehova a amanathithi epon.​—Sal. 37:5. w18.02 5 par. 12; 6 par. 14-15

Ame la easa hamë ahnahna koi Iehova, easë hi lai a atrunyi Nyidrë. Hnei Ioane aposetolo hna meköle goeëne la itre hlue i Iehova e hnengödrai, kola hape: “Ijiji enëtilai Joxu Akötesi hun, troa kapa la nyine atrun, me nyine adraiën, me men ; ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.” (Hna ama. 4:11) Eje hi laka, thatraqai Iehova la nyine atrun, me nyine adraiën, celë hi kepin matre easa kuca asë la hne së hna atrein troa hamën koi Nyidrë la ka sisitria. Jëne Mose, hnei Iehova hna upe la angetre Isaraela troa atrune la köni feet ngöne la macatre. Ame ngöne la köni feete cili, “tha tro kö [la nöj] a mama xajawa i Iehova nge pë ewekë.” (Deu. 16:16) Ame enehila, ketre igötranene ka tru ne la hmi së la troa ham. Easë e cili a amamane laka, easa wangatrun me sajuëne la organizasio i Iehova. w18.01 18 par. 4-5

Öni Iesu: “Xome jë la hokeng hui nyipunie . . . Ke ka puje la hokeng, nge ka hmaloi la ehnefeng.” (Mat. 11:29, 30, MN) Nyipici hi lai! Ame itre xa ijin, kucakuca catre së la easa tro kowe la itre icasikeu, maine kowe la hna cainöje trootro. Ngo, tune kaa së la easa bëek hmaca? Egöcatre hmaca ha së, nge ka hnëkë hnyawa ha së troa cile kowe la itre jol. Eje hi laka, ka puje la hoke i Iesu. Pane mekune jë la ewekë ka traqa kowe la ketre trejin föe. Ka kucakuca palahi angeic, nge hetre itre mekun ka ngazo palahi ka ajolëne la hni angeic. Matre, ame itre xa ijin, jole catr koi angeic troa tro kowe la hna icasikeu. Ngo, ame la ketre drai, hnei angeic hna isin matre troa sine la icasikeu. Öni angeic: “Hnene la cainöj hna qeje kucakuca. Nge, hnene la trejin ka cile fë hna amamane la utipine i angeic, ame hnenge hna treij. Mama hnyawa hi e cili laka, nyipiewekë koi ni troa sine la itre icasikeu.” Atraqatre palaha la madrine i angeic, ame hnei angeic hna isine troa sine la itre icasikeu! w18.01 8-9 par. 6-7

Nemene la nyine tro epuni a kuca, e luelue hë la hni ne la nekö i epun thupene la bapataiso? Maine jë, tro la nekö i epun a nyiqaane ajane la itre ewekë ne fen. Ame e cili, tha xecie hë koi nyën ka hape, nyine loi la troa mele thenge la itre trepene meköti ne la Tusi Hmitrötr. (Sal. 73:1-3, 12, 13) Jëne la aqane ujë i epun, tro palahi angeice lai a nyihlue i Iehova, maine hmaca pena. Nekönatre ju hë maine thöth, ngo the isi ithanata pi kö me nyën. Ngo, amamane jë pe la ihnimi epun koi nyën, memine la aja i epun troa xatua nyën. Ame la nekönatr hna bapataison, hnei angeice hë hna sa xepu koi Iehova. Hnei angeic e cili hna sisinyi koi Iehova ka hape, Nyidrëti hi la hna troa hnim me nyihluen, nge pine pë hë la itre xa ewekë. (Mar. 12:30) Ka nyipiewekë catre koi Iehova la hna sisiny, matre loi e tro fe sa nyipiewekëne lai.​—Ate cai. 5:4, 5. w17.12 22 par. 16-17

Tui Maretha, hetre hlue i Iehova ekö ka hane fe mejiune kowe la melehmaca. Pane mekune jë la ewekë hnei Iehova hna upi Aberahama troa kuca. Öni Iehova: “Xomejë la nekö i ’ö, nekö i ’ö ka cas, ene Isaaka hnimina i ’ö, nge tro fë jë kowe la nöje Moria ; nge hujë nyëne jë e cili nyine huje ne deuth.” (Gen. 22:2) Nemene la pengöi Aberahama la kola drenge lai? Hnei Iehova lo hna sisinyi koi angeic ka hape, troa nöj atraqatre la matra i angeic, nge troa amanathithi angatr. (Gen. 13:14-16; 18:18; Rom. 4:17, 18) Ketre, troa traqa la matran “qa thei Isaaka.” (Gen. 21:12) Ngo, hapeu, tro kö lai a eatr e huujë Isaaka jë hnei Aberahama? Öni Paulo, ka mejiune Aberahama laka, atreine Akötresie amele Isaaka hmaca qa hna mec. (Heb. 11:17-19) Thatre kö Aberahama la ijine troa amelene hmaca la nekö i angeic. Ngo, ame la ka xecie koi angeic, tre, ene la tro Iehova a amele Isaaka hmaca. w17.12 5-6 par. 12-14

Loi e tro sa nyitipu Paulo, me goeëne la mel ceitu me aqane goeëne Iehova. Aja i Nyidrë tro la itre atr asë a ietra matre troa hetrenyi la mel. (2 Pet. 3:9) E aja së troa nyitipu Nyidrë, loi e tro fe sa hnim la itre atr. E tro sa amamane la utipine së, tro lai a xatua së troa catre cainöj, me hetre madrin ngöne la huliwa cili. E aja së troa goeëne la mel ceitu memine la aqane goeëne Iehova, loi e tro sa thupëne wanga eatre pi së. Loi e tro sa hmeke hnyawa ngöne la easa xomi loto me huliwa, ene mina fe la easa tro kowe la Uma Ne Baselaia, maine ngöne la easa xup me nyihnyawane ej. Nyimutre la itre atr ka thel troa canga afenesine la huliwa i angatr, maine thel matre troa co la manie nyine huliwan. Ngo ka hetre ethanyine lai kowe la mele i angatr. Matre, ka sisitria catre kö la mele hune la mani, me traem. Ame la Akötresie së, ka kuca palahi la meköt, nge aja i Nyidrë tro sa nyitipu Nyidrë. Loi e tro la itre qatre thup a thupëne hnyawa wanga eatre pi angatr maine itre trejine pena. (Ite edomë 22:3) E tro la qatre thup a amexeje koi epuni la ketre ewekë nyine troa hmekën wanga eatre pi, drengethenge ju. (Gal. 6:1) Goeëne jë la mel tune la aqane goeëne Iehova ‘wanga tithi ’ö jë hnene la madra.’​—Deu. 19:10. w17.11 16 par. 11-12

Ka lolo catre la mejiune ne la itre keresiano hna iën. Angatr a trengeneune troa mel e hnengödrai. Hnei Paulo aposetolo hna hëne la mejiune cili ka hape, “thupene,” kolo hnei Akötresie hna hë angatre kow. (Fil. 3:14) Tro angatr a ce musi me Iesu ngöne la Baselaia i nyidrë e hnengödrai, matre troa eatrongëne la itre atr kowe la pexej. (Hna ama. 20:6) Drei la ketre mejiune ka lolo catr! Ame pena la itre xa mamoe, hetre ketre mejiune i angatre kö. Angatr a trengeneune troa mele palua ngöne la fen hna aparadraison, nge celë hi ka thue madrine i angatr! (2 Pet. 3:13) Hetre aja i Paulo troa xatuane la itre hna iëne troa mele nyipici, me kapa la thupe i angatr, maine edrö i angatr. Öni angeic koi angatr: “Hninejë nyipunie la nöjei ewekë e koho.” (Kol. 3:2) Matre nyipiewekë tro angatr a wangatrune la mejiune i angatr, ene la troa mel e hnengödrai. (Kol. 1:4, 5) E tro sa mekune catrëne la itre manathithi qaathei Iehova, tro së lai a wangatrune la edrö së.​—1 Kor. 9:24. w17.11 25 par. 1-2

Ame itre xa nyima ngöne la itus “Nyima Madrine Jë” Koi Iehova, tre, itre thith. Jëne itre ej, epuni a qaja amamane la aliene hni epuni koi Iehova. Nge, ame itre xan, kola thuecatrenyi së troa “ihnimi me [kuca la] ite huliwa ka loi.” (Heb. 10:24) Matre loi e tro sa majem kowe la miuzik, me aqane nyiman, me trengewekën. Ketre, loi e tro sa dreng la aqane nyima ne la itre trejin ngöne la site së. Ame la epuni a nyima ngöne la hnalapa i epun, thele jë troa nyima catr, me nyima qa kuhu hni epun. The thëthëhmine kö laka, ame la troa nyima tre, ketre igötranene la hmi së. Nge, aqane tro hi së lai a amamane la ihnimi së koi Iehova, memine la hni ne ole së kowe la itre ewekë hnei Nyidrëti hna kuca. (Is. 12:5) Ame la easa nyima cememine la madrin, easë hi lai a thuecatre kowe la itre xan troa hane nyima catr. Loi e tro la ekalesia asë, ene la itre thöth, me itre qatr, memine fe la itre ka xötrei bapataiso a atrunyi Iehova jëne la nyima. Haawe, the cile kö troa nyima qa kuhu hni nyipunie. Nyima madrine jë! w17.11 7 par. 18-19

Ala nyimu la itre ka po enehila ka traqa qa ngöne la itre nöj ka wathebone la huliwa ne cainöj. Matre, jëne la itre trejin ka catre cainöj, hnene la itre thauzane lao itre ka po hna xötrei hane drenge “la tenge ewekë ne la baselaia.” (Mat. 13:19, 23) Ala nyimu la itre ka “hace,” nge ka öhnyi ixatua, me keukawa ngöne la itre icasikeu, ame hnei angatr hna qaja ka hape: “Nyipici, thei nyipunieti la Akötesie.” (Mat. 11:28-30; 1 Kor. 14:25) Nyipiewekë tro sa ‘inamacane’ ngöne la easa cainöj kowe la itre ka po. (Ite edomë 22:3) Loi e tro sa drei angatre hnyawa la angatr a ithanata, nge tha tro pi kö sa porotrikë politik. Loi e tro sa xötrethenge la itre hna amekötine qaathei Filial, me qaathei mus matre tha tro kö a hetre ngazo ka traqa koi së, me itre xane fe. Pine laka, ka hetre hmine kö la itre ka po, me isa hetre qenenöje i angatr, haawe, nyipiewekë tro sa thel troa atre la mekuna i angatr, me aliene hni angatr, me wangatrune itre ej. Ame itre xa nöj, hetre mekunane hë la itre atr göi aqane tro la itre föe a heetr. Haawe, e cainöje jë së koi angatr, loi e tro sa thupën la aqane tro sa heetr matre tha tro kö sa athixötrë angatr. w17.05 7 par. 17-18

Sipo Iehova jë la uati hmitrötr matre tro palahi sa menyik memine la itre sinee së ka tha hmi kö. The isi ithanata kö me angatr göne la itre ini hnei angatr hna lapaune kow. Maine hna akötrë epuni hnene la aqane ithanata, maine aqane ujë i angatr, loi e tro sa nyitipune la itre aposetolo. Öni Paulo: “Kola qaqa hun, nge eëhuni a ewekë aloin; kola axösisi hun, nge eëhuni a xomi hnine ju; kola jelë hun; nge eëhuni a sipo.” (1 Kor. 4:12, 13) Maine nyipici laka, nyipiewekë troa menyik la aqane ithanata së, ngo ka hetre thangane catre kö la aqane ujë së. (1 Pet. 3:1, 2, 16) Tro lai a ketr la itre sinee së. Nge jëne la aqane ujë së, troa mama koi angatr ka hape, ka tingeting la faipoipo ne la Itretre Anyipici Iehova, nge angatr a thupën hnyawan la itre nekö i angatr, me mele thenge la itre trepene meköti ne la Tusi Hmitrötr, nge ka hetre aliene la mele i angatr. Ngacama tha kapa kö la nyipici hnene la itre sinee së, ngo ame la ka tru koi së, tre, ene la tro sa amadrinë Iehova hnene la aqane mele nyipici së koi Nyidrë. w17.10 15 par. 13-14

Tha sesëkötre kö së laka, alanyimu la itre atr ka saze ngöne la angatr a atre la nyipici. Ame la itre pane keresiano ekö ka mejiune kowe la mel e koho hnengödrai, hnei angatr hna saze la mele i angatr. (1 Kor. 6:9-11) Hnei Paulo hna qaja koi angatr la pengöne atr ka tha tro kö a hane sine la Baselaia i Akötresie. Öni angeice hmaca jë: “Hna tune lai ite xan’ e nyipunie.” Hnene la Wesi Ula i Akötresie memine la uati hmitrötre i Nyidrë hna xatua angatr troa saze. Ngo, thupene hë la hna xomi bapataiso, hnei itre xan e angatr hna kei hmaca kowe la ngazo, matre hna ananyi angatr qaathei Iehova. Hnene la Tusi Hmitrötr hna qaja la hna melën hnene la ketre trejin hna iën, nge hna upetröneën. Ame hë e thupen, hnei angeic hna saze, ame hna kepe angeice hmaca hnene la ekalesia. (1 Kor. 5:1-5; 2 Kor. 2:5-8) Kola thuecatre së la easa goeën la kola saze la itre trejin hnene la menen la Wesi Ula i Akötresie, me xatua së troa huliwan hnyawan ej. w17.09 23-24 par. 2-3

Iehova la qaane la ihnim. (1 Ioane 4:7) Ame la pengöne ihnim ka sisitria catr tre, hna nyitrepene hnene la itre trepene meköt. Kola mama la ihnim cili e hnine la Tusi Hmitrötr jëne la hnaewekë qene Heleni, a·gaʹpe. Maine nyipici laka, ka keukawa la ihnimi cili, ngo tro lai a mama hnene la itre huliwa hne së hna kuca koi ketre, nge nyine loi koi angeic. Tha easë kö a sipu meku së kö. Celë hi ihnimi lai ka upi së troa kuca la loi koi ketre. Ame la easa melëne la ihnimi cili tre, hetre madrine së, me aliene la mele së. Hnei Iehova hna amamane tune kaa la ihnimi Nyidrë kowe la itre atr? Qëmekene troa xupi Adamu me Eva, hnei Nyidrëti hna xup lai ihnadro matre tro la atr a lapan epine palua. Hetrenyi asë hi la nöjei ewekë göi troa mele madrin. Nyidrëti a xupe jë la atr, me hamë angeic la mel ka tha ase palua kö ngöne la paradraiso e celë fen. Tha hnei Nyidrëti kö hna kuca la itre ewekë cili thatraqai Nyidrë, ngo hnei Nyidrëti pe hna kuca thatraqane la atr. w17.10 7 par. 1-2

Öni Iakobo hmaca jë hi: “Maine nyipunie a iwangate hmekunyi ate [maine ië hna hnim], nyipunie a kuca la ngazo.” (Iako. 2:9) Maine ka hnime së la itre atr, tha tro pi kö së lai a ië hna hnim, ngacama isa ini ju hë hne së hna kapa qaathei mus, maine isa hane ngönetrei së pena, maine isa aqane mele së ju hë. Tha tro pi kö sa ië hna hnim, nge loi e troa ej e kuhu hni së la thiina cili. Nge ketre, “ihnimi la atre xomihnin me thiina ka loi” nge “tha atre pi tru kö.” (1 Kor. 13:4, MN) Nyipiewekë tro sa atreine xomihni, me thiina ka loi, me thiina ka ipië, matre tro palahi sa catre cainöjëne la maca ka loi kowe la itre atr. (Mat. 28:19) Ketre, jëne la itre thiina cili, lolo catr la aqane imelekeu së memine la itre trejin asë ne la ekalesia. E ka mama the së la ihnimi celë, tro hë la ekalesia a cas, nge tro lai a atrunyi Iehova. Nge tro fe a mama la casi cili kowe la itre xa atr me hane e angatr kowe la nyipici. Haawe, trotrohnine hi së la kepine matre qaja jë Tusi Hmitrötr, ka hape: “Ihnimi e hune la nöjei ewekë celë asë, celë hi otene ka nyipi loi.”​—Kol. 3:14. w17.08 26 par. 18-19

Tune mina fe, loi e tro sa utipine la itre atr ka thatre Iehova, ke, ijine petre kö la koi angatre troa ietra me nyisinee Iehova. Tha ajane kö Iehova troa mec la ketre atr ngöne la iameköti Nyidrë elany. (2 Pet. 3:9) Haawe, catre jë së thuemacane la nöjei atr hne së hna iöhnyi memin, me xatua angatr troa hane kepe thangane la utipine i Iehova, e ijine petre kö. Iesu la ketre tulu ka tru göi utipin. Tru la utipine i nyidrë kowe la itre atr, ke, nyidrëti a öhne laka, “kucakuca ha angat, me isa ije hë, tune la nöjei mamoe ka pa ate thupën.” Matre, nemene hë la hnei nyidrëti hna kuca? “Ame hnei nyidëti hna qane troa ini angate la nöjei ewekë ka nyimute.” (Mat. 9:36; Mar. 6:34) Ame pena ha la itre Faresaio, pëkö ca utipine i angatr, nge pëkö aja i angatr troa xatuane la itre atr. (Mat. 12:9-14; 23:4; Ioane 7:49) Hapeu, hetre aja i epuni kö tui Iesu, troa xatuane la itre atr troa atre Iehova? w17.09 9 par. 6; 10 par. 9

Ame la Iosefa a lapa hnine la hnahage ne la kalabus, tha mekune pi kö angeic laka, tro angeic e ketre drai, a cilëne la ketre hnëqa ka tru, thupe i Farao. Nge goi tha mekune fe angeic laka, tro Iehova a nyijëne angeic, matre troa amelene la hnepe lapa i angeic qa ngöne la jiin. (Gen. 40:15; 41:39-43; 50:20) Eje hi laka, hna hain hnei Iosefa la aqane huliwa i Iehova. Maine jë, tha mekune kö eahlo laka, tro Iehova elanyi a aijiji eahlo troa hnahone la sipu nekö i eahlo. Ame hë la kola hnaho Isaaka, ketre ewekë lai laka, tha hna mekune kö hnei Sara. (Gen. 21:1-3, 6, 7) Tha easa kö a treqene tro Iehova a kuca la ketre iamamanyikeu matre patre pi la nöjei akötre së qëmekene troa mel ngöne la fen ka hnyipixe. Nge tha easa kö a musinë Iehova matre tro Nyidrëti a kuca la itre ewekë ka tru thatraqai së ngöne la mele së. Ngo, atre hnyawa hi së la aqane mama Nyidrëti ekö kowe la itre hlue i Nyidrë. Tha saze kö Nyidrë. (Is. 43:10-12) Tha luelue kö së laka, tro Nyidrëti a hamëne la trengecatre ka ijij koi së matre tro sa kuca la aja i Nyidrë. (2 Kor. 4:7-9) Tro kö Iehova lai a xatua së ngacama traqa ju hë koi së la itre jole ka tru. Ngo eje hi laka, loi e tro sa mele nyipici koi Nyidrë. w17.08 11-12 par. 13-14

Tro la huliwa i Akötresie o drai a aijijë eö troa macaj, me atreine ce huliwa memine la itre xa ka ce huliwa me Akötresie o drai. Ketre, alanyimu la ka öhne laka, hnene la hna huliwa i Akötresie o drai lo angatr a thöth, hna xatua angatr e thupen ngöne la mele ne trefën. Kola mama laka, ame lo itre ka pionie qëmekene troa faipoipo tre, angatr pala hi a ce pionie e thupen memine la föi angatr. (Rom. 16:3, 4) Öni Salamo 20:4 göi Iehova: “Epi hamëne koi [eö] thenge la hni [eö], me aeaten’ asë la mekune i [eö].” Matre, ame la eö a hnëkë eö kö koi elany, mekune hnyawa ju la hnei eö hna ajan troa kuca ngöne la mele i eö. Mekune ju la itre hnei Iehova hna kuca enehila, me nyine tro eö a kuca ngöne la huliwa i Nyidrë. Thupene lai, hnëkëne amë jë la nyine kuca ka troa amadrinë Nyidrë. E tro eö a nyihlue i Iehova hnyawa ngöne la mele i eö, me atrunyi Nyidrë, tro hë eö lai a hetre madrin. Nge tro ha eatr koi eö la hna qaja ka hape, “Madinejë eö koi Iehova, nge tro nyidëti a hamë eö la ite hna sipone hnene la hni ’ö.”​—Sal. 37:4. w17.07 26 par. 15-18

Hne së hna majemine atrune la ketre atr hnene la itre ithanata maine itre huliwa i angeic. Haawe, sisitria catre kö tro sa atrunyi Iehova Akötresie! Easa atrunyi Nyidrë ke, atraqatre la mene i Nyidrë. Kola mama lai ngöne la itre ewekë ka mingöming hnei Nyidrëti hna xup. Easë mina fe a atrunyi Nyidrë ke, atraqatre la ihnimi Nyidrë koi së. Kola mama jëne la thupene mel, ene la mel hna huujën hnene la sipu nekö i Nyidrë. Kola mama hnyawa ngöne Salamo 147 la trenge aja ne la atr cinyihane ej troa atrunyi Iehova. Angeice fe a thuecatrene la itre xan troa ce atrunyi Iehova me angeic. (Sal. 147:7, 12) Thatre kö së la atre cinyihan la Salamo 147. Ngo, eje hi laka, ka mel angeic ngöne la ijine kola bëeke a tro Ierusalema hnene la angetre Isaraela, lo kola thepe angatr hnei Iehova qa Babulona. (Sal. 147:2) Hnene la atre cinyihane la Salamo hna atrunyi Iehova, ke, tro hmaca ha la nöj a nyihlue i Nyidrë ngöne la sipu nöje i angatr. Nge nemene la ka aijijë së troa qaja catrëne ka hape: “Atrunyi Ia jë” ngöne la mele së?​—Sal. 147:1. w17.07 17 par. 1-3

Atre hnyawa hi Iesu laka, tune la hlue, tro fe a jole kowe la itretre drei nyidrë troa huliwa thupene a i angatr ngöne la fene ka ngazo celë. Tha hnei Iesu kö hna qaja la kepin matre hëne jë nyidrë la itre mo ka hape, “itre ka tha meköti kö.” Ngo eje hi laka, Tusi Hmitrötr a amamane hnyawa ka hape, tha aja i Iehova fe kö la huliwa ne salem. Hnei Iehova lo hna hamëne gufane la nöjei ewekë hnei Adamu me Eva hna ajan ngöne la hlapa e Edena, nge munë ju pe kö. (Gen. 2:15, 16) Ame hë e thupen, lo Iehova a nenge la uati hmitrötre i Nyidrë kowe la itre hna iën, “tha qaja kö hnei kete e angat, ka hape, ewekë i angeice kö la hnei angeice hna heten ; ngo ce ewekë i angate hi.” (Ite hu. 4:32) Öni Isaia perofeta, troa hetre ijin tro la nöjei atr a madrin qa ngöne la kola mana me ham la ihnadro. (Is. 25:6-9; 65:21, 22) Ngo, qëmekene troa traqa kowe la ijine cili, nyipiewekë troa hetrenyi la “inamacan” thene la itretre drei Iesu. Tro angatre a huliwane la itre mo ne la fene celë matre troa hetre thupene a i angatr, ngo tro fe angatr e cili a thele troa amadrinë Iehova.​—Luka 16:8. w17.07 8 par. 4-6

Ame ngöne la tusi Iobu, ketre tusi ne la Tusi Hmitrötr hna pane cinyihan, öni Satana, e tro Iobu a akötre catr, tro angeice lai a nuetriji Iehova. Hnei angeice fe hna upi Iehova troa akötrë Iobu. Eje hi laka, tha tro jë kö Iehova a ujë tune lai, ngo hnei Nyidrëti pe hna nue Satana troa tupathi Iobu. Tha qea ju kö, nge meci pi hi la itre hlue i Iobu nge pë fe hë ewekë i angeic. Thupene lai, angeic a dreng ka hape, meci asë hë lo treen lao nekö i angeic. Satana a thele jëne matre troa upezö Akötresie la itre hulö ka traqa koi angeic. (Iobu 1:13-19) Ame hë e thupen, hnei Satana hna lepi Iobu hnene la ketre mec hna sisin. (Iobu 2:7) Nge ngazo catre jë kö la kola qaja hnene la sipu föi angeic, memine lo köni sinee i angeic la itre ithanata ka akötr. (Iobu 2:9; 3:11; 16:2) Nyipici laka, hna akötrë Iobu hnene la itre hulö ka traqa koi angeic, ngo tha hnei angeice pi kö hna nuetriji Iehova. Ame e cili, mama ju hi laka ka thoi Satana.​—Iobu 27:5. w17.06 24 par. 9-10

Ame enehila, hna kapa fe hnene la itre he ne la hnepe lapa la hnëqa qaathei Iehova troa huliwa thatraqane la lapa i angatr. Nyipiewekë tro angatr a isine troa eatrëne lai. Ngo, ame ngöne la hneijine celë, tru pi hë la itre ejolene la hna huliwa i maseta. Ala nyimu catr enehila la itre atr ka isin troa hetre huliwa ke, tru catr hnei itre ka thel, nge co hi la huliwa. Ame koi itre xan, loi e tro angatr a huliwa atruny, ngacama tha nyithupei angatr hnyawa kö. Nge, ame itre société, itre ej a thele pala hi troa kuca atrun la itre mo, nge xalaithe hi la itre ka huliwa. Matre kola ajolëne la mele ne la itre ka huliwa; angatr a kucakuca, me wezipo. Ketre, ala nyimu la itre ka kapa pala hi la hna ajane hnene la maseta ke, angatr a xouene wanga pë pi huliwa i angatr. Ame easë itre keresiano, ka tru koi së troa nyipici koi Iehova hune la troa nyipici koi ketre, tune mina fe la maseta së. (Luka 10:27) Ame la huliwa i maseta tre, jëne tro së lai a thupëne la mele së, me xatua së troa cainöje trootro. Ngo, e tha hmeke kö së, tro lai a hetre ethane kowe la aqane nyihlue i Iehova së. w17.05 23 par. 5-7

Ame itre xa ijin, tro la itre ka hnyipi lö kowe la hmi a sipo së troa xatua angatr troa qejepengöne la Tusi Hmitrötr kowe la itre nekö i angatr. Maine sipo së jë hnene la kem troa ini Tus memine la nekö i angeic, tha tro kö sa thel troa xome la hnëqa i kem. (Efe. 6:1-4) Ame itre xa ijin, easa ini Tus memine la nekönatr, nge tha ka hmi kö la keme me thin. Matre, ame la easa ini Tus me nyën, loi e troa hnen ngöne la hnalapa i nyën, nge loi e troa cememine la keme me thin, maine ketre Atre Anyipici Iehova ka macaj. Maine pena, loi e troa ini Tus ngöne la ketre götrane gaa tru atr. E tro sa ujë tune lai, tha tro kö a mekune menune koilo hnene la itre atr. Nge, ame e ketre ijin, maine jë, tro hë la keme me thin a ketre sipu ini Tus memine la nekö i nyidro. w17.06 8 par. 15-16

E patre hë la aqane mele ne la nöj thene la itre nekönatr, haawe, tha thele hë nyudreni lai troa atre la qene hlapa me hmi ne la kem me thine i nyudren. Itre kem me thin keresiano a amë panëne la aja ne la itre nekönatr, nge pine pë hë la itre sipu aja i angatr. (1 Kor. 10:24) Önine la ketre trejin, Samuel ka hape: “Hnenge me föeng hna pane thele la qene hlapa ka troa ketr la hni ne la köni nekö i nyio, me thith matre troa hetreny la inamacan. Ame hë la nyio a öhne laka, pëkö thangane thei angatr la hna sine la itre icasikeu ngöne la qene hlapa i nyio, mekune jë hi nyio troa fek kowe la ekalesia ka qaja la qene hlapa ne la nöj. Tha ka ihmeku kö lai memine lo aja i nyio, ngo ame hë la eahuni a sine lapane la itre icasikeu me ce cainöj, me ce xen me ce ngenu memine la itre sinee hun, hetre thangane pi hë. Nyudreni hë e cili a hane atre la itre trejin me atre Iehova Akötresie, lo Kem me Sinee i nyudren. Ame koi nyio, ka nyipiewekë catre kö la hnei nyio hna kuca hune la troa ini nyudren troa ithanatan la qene hlapa i nyio.” w17.05 10 par. 11-13

Calemi hë la ijine tro la itre atr a mele madrine fene la musi Iehova hmekuj. Easa trengeneune catrëne la ijine cili! Casi hi la mekuna së me Debora me Baraka lo nyidroti a nyima, me hape: “Iehova fe, tro ha [patre] asë tune lai la ite ithupëjia me enëtilai ; ngo tro la itete hni nyidë a tune la jö a xulujë memine la cate ne ej.” (A. ame. 5:31) Celë hi ewekë lai ka troa traqa ngöne la ijine tro Iehova a apatrenyi Satana me fene i angeic. Ame la kola nyiqaane la isi Amagedo, tha Iehova kö a aja atr troa xatua Nyidrë ngöne la ijine cili. Ame e cili, tro pe sa ‘cile’ me ‘öhne la iamele i Iehova.’ (2 A. l. ite jo. 20:17) Ngo, ame enehila, loi e tro sa catre sajuëne la musi Nyidrë. Hna nyiqaane la nyima i Debora me Baraka hnene la iatruny, tha koi atre kö ngo, koi Iehova. Öni nyidro: “Atrunyi Iehova jë . . . hna nue xanë angate hnene la nöj.” (A. ame. 5:1, 2) Ketre tune mina fe, ame la easa nue xanë së kö e aja ixatua jë ngöne la huliwa i Iehova, easë hi lai a xatuane la itre trejin troa “atrunyi Iehova!” w17.04 32 par. 17-18

Ngacama tha thëthëhmine kö Iosefa la ewekë hna kuca koi angeic ngöne lo 13 lao macatre ne mele ne akötre angeic, ngo pëkö elëhni thei angeic. (Gen. 45:5-8) Nge ame la ka nyipiewekë, tre, tha hnei angeice kö hna nue la itre tria me aqane ujë i itre xan troa ananyi angeic qaathei Iehova. Hnene laka, hnei angeic hna nyipici koi Iehova, haawe, mama hnyawa koi angeic la aqane ameköti ewekë i Iehova, me aqane amanathithi angeic me hnepe lapa i angeic hnei Nyidrë. Ketre tune mina fe, nyipiewekë tro sa isigöline la aqane imelekeu së me Iehova. Tha tro pi kö sa nue la itre tria ne la itre trejin troa ananyi së qaathei Iehova, lo Atre hne së hna hnim, me nyihluen. (Rom. 8:38, 39) E hetre ewekë ka tha meköti kö hna kuca koi së e hnine la ekalesia, loi e tro sa nyitipu Iosefa, me qale catre koi Iehova. Thele jë troa goeëne la itre jol tune la aqane goeëne Iehova. E hne së hna trongëne la itre trepene meköti Nyidrë me kuca asë la ka ijij matre troa nyinyin lai jol, ame hë e cili, nue asë pi hë koi Iehova. Tha luelue kö së laka, tro Nyidrëti a amekötine lai thenge la aja i Nyidrë, me ngöne la nyipi ijin. w17.04 20 par. 12; 22 par. 15-16

Hana ha eatrëne lo hnei angeic hna sisinyi koi Iehova. Hnei angeic hna tro sai Samuela koi Eli, atre huuj ka sisitria ngöne la uma i Akötresie e Silo, kolo uma mano. Öni angeic: “Hnenge hna sipone la nekönate celë ; nge hnei Iehova hna hamëne koi ni lo hnenge hna sipone qa thei nyidë. Nge kete hnenge hna nue nyëne koi Iehova ; hna nue nyëne koi Iehova ngöne la nöjei drai ne mele nyën’ asë.” (1 Sam. 1:24-28) Qaane ju hi lai, hnei Samuela hna mel hnine la uma mano. Öni Tusi Hmitrötr, “Kola tru trotro la nekönate Samuela xajawa i Iehova.” (1 Sam. 2:21) Tha ka hmaloi kö koi Hana troa eatrëne la hnei angeic hna sisiny. Tha tro hë angeic a ce lapa memine la nekö hnimina i angeic ngöne la nöjei drai, me öhne la nyën a tru trootro. Ngo, hnei Hana hna nyipiewekëne la hnei angeic hna sisinyi koi Iehova. Hetre aja i angeic troa nue pe la itre xa ewekë ka tru koi angeic matre troa eatrëne la hnei angeic hna sisinyi koi Akötresie.​—1 Sam. 2:1, 2; Sal. 61:1, 5, 8. w17.04 5 par. 7-8

Öni Paulo aposetolo ka hape, ame ngöne la itre drai ne la pun “tro ha traqa la nöjei ijine ka aköte.” Thupene lai, öni angeice hmaca jë: “Ame la nöjei ate thina ka ngazo me itete iaö, tro pala kö angat’ a ngazo.” (2 Tim. 3:2-5, 13) Hna ketri epuni kö hnene lai? Alanyimu the së la itre hna akötrëne hnene la itre atr ka iangazo, maine hnene la itre ka ihumuth, maine hna akötrë së pena pine la hane ngönetrei së. Ame itre xan, kola kuca amamane la itre ewekë ka ngazo. Nge, ame itre xan, angatr a qaja ka hape, kola ixatua, ngo itre ka iaö pe. Ngacama tha hna sipu ketri së kö hnene lai, ngo akötre pi hë la hni së la kola qanangazone la itre nekönatr, me itre qatr, memine la itre ka kucakuca. Itre atr ka ngazo a ujë ceitu me itre öni, me itre dremoni. (Iako. 3:15) Eloine pe, hnene la Wesi Ula i Iehova hna thue mejiune së. w17.04 10 par. 4