Maac

Ame la easa e la mekene 1 me 2 ne la tusi Genese, easa trotrohnine laka, lolo catr la mel hnei Iehova hna hamën koi Adamu me Eva. Nge, celë hi mele lai hna ajan hnene la itre atr enehila. Pëkö ka pë thei nyidro, pëkö hna xouen, nge pëkö atr ka iakötrë. Tha hnehengazo kö nyidro göi xen, me huliwa, me sine mec, me mec. (Gen. 1:27-29; 2:8, 9, 15) Tha tro pi kö sa thëthëhmine laka, Iehova hmekuje hi la ka pë ifego. Nyidrëti la Atre Xupe la nöjei ewekë, me Atre Musi Ka Sisitria. (1 Tim. 1:17; Hna ama. 4:11) Ngo, hnei Nyidrëti hna ami ifegone la itre hna xup asë. Haawe, easa trotrohnine laka, meköti e tro Nyidrëti a acili ifego thatraqai së. Qaane lo xötrei, hnei Iehova hna ami ifegone la itre hnei Nyidrëti hna xup. w18.04 4 par. 4, 6

Jëne la ixatua i Iehova, ijije hi tro sa xomihnine la itre jol ka traqa ngöne la fene celë. (2 Kor. 4:7, 8) Celë hi matre, loi e tro sa mekune la itre atr ka thatre Iehova. Pëkö ixatua koi angatr. Nge tha ka hmaloi kö la mele i angatr ngöne la fene celë. Eje hi, easa utipine la itre atr tui Iesu, matre easa madrine troa “tro fë la loi” koi angatr. Haawe, loi e tro sa thele troa trotrohnine la itre hnainin. Eje hi laka, thatre hnyawa kö angatr la itre xaa nyipici qa hnine la Tusi Hmitrötr. Ame itre xan, thatreine kö angatr canga nue la itre ini hnei angatr hna mejiune kow ekö. Ame koi angatr, ka nyipiewekë catre la hmi ke, celë hi ka acasine la hnepe lapa, me qenenöj, me nöj. Tha tro kö sa canga upe la itre ka ini tusi me easë troa nuetrije la itre ini hnapan. Loi e tro sa pane xatua angatr, troa inine hnyawa me hniin la itre nyipici qa hnine la Tusi Hmitrötr. Tro ha hmaloi koi angatr troa nuetrije la itre ini hnapan. Nyipiewekë tro sa nue ijine koi angatr, matre troa kapa la itre ini ka hnyipixe.—Rom. 12:2. w19.03 23 par. 10, 12; 24 par. 13

Iehova a amamai tulu ngöne la Nyidrëti a qaja la ihnim me madrine i Nyidrë. Loi e tro fe sa thele troa ithuecatre koi itre xan. (Ioane 5:20) Easa madrin la kola qaja aloine la itre hne së hna kuca, hnene la ketre atr hne së hna hnim. Ketre tune fe, loi e tro sa ihnim me ithuecatre kowe la itre trejin maine itre atrene la hnepe lapa së. Ame la easa qaja aloinyi angatr, kola acatrene la lapaune i angatr, me xatua angatr troa catre mele nyipici koi Iehova. Nyipiewekë tro la itre kem me thin a ithuecatre kowe la itre nekönatr. Ame la angatr a hnim me qaja aloinyi nyudren, kola xatua nyudren troa mele ka loi, tune la feja ka cia lolo. Kola amamane hnene lo hna hape: “Eni a madri hmunë,” laka, Iehova a mejiune koi Iesu. Xecie hnyawa koi Nyidrë laka, Iesu a troa kuca la aja i Nyidrë. Haawe, loi e tro fe a xecie koi së laka, tro kö Iesu a eatrëne la itre hna thingehnaeane hnei Iehova. (2 Kor. 1:20) Ame la easa lapa mekun la tulu i Iesu, kola acatrene la aja së troa atrepengöi nyidrëti hnyawa, me xötrethenge la tulu i nyidrë.—1 Pet. 2:21. w19.03 8 par. 3; 9-10 par. 5-6

Ame la easa kapa la ketre ahnahna, hetre hni ne ole së kowe la atre hamëne ej. Ngo, tha hna hane kö olene koi Iehova hnei angetre Isaraela, la hna thepe angatr. Itre treu thupene la hnei Nyidrëti hna thepe angatr qa Aigupito, hnei angatr hna piine hmaca lo itre xen e cili. Hnei Iehova hna ithua i angatr mana, ngo angatr a eetr. Angatr a pi bëeke hmaca a tro Aigupito! Ka tru catre kö koi angatr la ‘itre ie, itre kokuma, me itre wanathim, me itre liki, me itre salatr, me itre galika,’ hune la hnei Iehova hna kuca koi angatr, ene la hna thepe angatr me aijijë angatr troa nyihlue i Nyidrë. Ame hnei Iehova hna elëhni koi angatr. (Num. 11:5, 6, 10; 14:3, 4) Hetre ini nyine tro sa xom! Hnei Paulo hna hmekëne la itre keresiano matre tro palahi angatr a amamane la hni ne ole i angatr koi Iehova. Ase hë Iehova lo thepe së qa ngöne la ngazo jëne Iesu Keriso.—2 Kor. 6:1. w18.04 10-11 par. 6-7

Easë asë hi a ajane troa hnimi së hnene la itre xan. Nge troa hnime ceitu së me itre xan. Eje hi laka, maine pëkö ka hnimi së me thiina ka meköti koi së, haawe, tro hë sa mekune ka hape, tha ka nyipiewekë kö së nge pëkö pengö së. Atre hnyawa hi Iehova laka, easa ajane troa hnimi së me thiina ka meköt koi së. (Sal. 33:5) Iehova a hnimi së, nge tha ajane kö Nyidrë troa qanangazo së. Celë hi ka mama ngöne lo Wathebo hna hamën ekö hnei Iehova, kowe la nöje Isaraela jëne Mose. Ame la easa inine la Wathebo i Mose, tre, easa öhne la ejuine la ihnimi Iehova, Akötresi së. (Rom. 13:8-10) Hna nyitrepene la Wathebo i Mose hnei ihnim. Akötresieti ka ihnimi Iehova, matre hnei Nyidrëti hna kuca la nöjei ewekë. (1 Ioane 4:8) Hnei Iehova hna eköthe la Wathebo i Mose, hnene la lue wathebo ka tru. Kola qaja la troa hnimi Akötresie me hnime la atre lapa easenyi së. (Lev. 19:18; Deu. 6:5; Mat. 22:36-40) Celë hi matre, ame la Wathebo i Mose, ene lo 600 lao wathebo nge hetre munën, tre, kola qaja la ihnimi Iehova. w19.02 20-21 par. 1-4

Hnei Iobu palahi hna metrötrëne la itre föe. (Iobu 31:1) Atre hnyawa hi angeic laka, tha tro kö a meciune la ketre föe. Ame enehila, kola huli së hnene la fene troa kuca la itre huliwa ka sis. Hapeu, atreine kö së nyitipu Iobu laka, tha tro kö a meciune la ketre föe maine ketre trahmany pena? Tro kö sa thipetrij la itre film me itre iatr ka sis? (Mat. 5:28) Maine tro sa catre cil kowe la nöjei aja cili, haawe, tro hë lai a acatrene la aja së troa mele nyipici koi Iehova. Hnei Iobu mina fe hna drengethenge Iehova, göne la aqane troa goeëne la itre mo. Atre hnyawa hi Iobu laka, e tro angeic a hni kowe la itre mo ke, troa hetre pune ka ngazo koi angeic. (Iobu 31:24, 25, 28) Pine laka kola elë la aja mo enehila, haawe, nyipiewekë tro sa drengethenge la itre hnei Iehova hna amekötin. Celë hi ka troa xatua së troa catre mele nyipici.—Ite edomë 30:8, 9; Mat. 6:19, 20. w19.02 6-7 par. 13-14

Hnei Iesu hna nyitipune la ihnimi Iehova, ngöne la nöjei ewekë hnei nyidrëti hna kuca. (1 Ioane 4:8-10) Ej e kuhu hni Iesu la aja troa huujëne la mele i nyidrë thatraqai së. Jëne la huuje celë, easë asë hi, itre hna iën me “ite xa mamoe,” a kepe manathith qa ngöne la ihnimi Iehova me nekö i Nyidrë. (Ioane 10:16; 1 Ioane 2:2) Pane mekune jë fe la lue ewekë hna xom ngöne la Drai Ne Amekunën. Lue ej a amamane la ihnimi Iesu kowe la itretre drei nyidrë. Tune kaa? Hnei Iesu hna amamane la ihnimi nyidrëti kowe la itre hna iën. Hnei nyidrëti hna upi angatr troa atrune la pui ne xen, nge tha ka jole kö. Ame fe enehila, itre hna iën a atrune la Drai Ne Amekunën e nöjei macatre, ngacama nyimutre la itre jol, tune la kalabus. (Hna ama. 2:10) Hnei angatre kö hna drengethenge Iesu? Eje hi! Qaane hë ekö, hnene la itre Keresiano hna atrune la drai ne meci Iesu. w19.01 24 par. 13-15

Hnei Iehova hna ini së, me thepe së qa ngöne la hmi ka thoi memine la xoue haze. Easa trengeneune la ijine kola troa “nuamacanyi angatr tune la itre nekö i Akötresie.” (Rom. 8:21) Ijije hi tro sa melëne lai enehila, ngöne la easa kapa me trongëne la itre ini qaathei Keriso. (Ioane 8:31) Maine tro sa inine me melën itre ej, tro hë sa “atre la nyipici”! Ame ngöne la fene celë, tha ka cile huti kö la madrinene la itre atr. Pëkö ka atre la itre ewekë ka troa traqa elany. (Iako. 4:13, 14) Celë hi matre, nyipiewekë tro epuni a iëne hnyawa la itre mekun ka troa xatua epuni troa xölehuje la “nyipi mel,” mele ka tha ase palua kö ngöne la fene ka hnyipixe i Akötresie. (1 Tim. 6:19) Tha Iehova kö a musinëne la itre atr troa nyihlue i Nyidrë. Isa qanyi së kö iëne la nyine troa kuca. Haawe, epi tro Iehova a “edö” i epun. (Sal. 16:5) Loi e tro epuni a thele troa acatrene la aqane imelekeu i epun me Iehova, me wangatrune “la loi” hnei Nyidrëti hna hamën. (Sal. 103:5) Tro kö Iehova a amadrinë epun, ene la madrin ka epine palua!—Sal. 16:11. w18.12 26 par. 19, 21

Loi e tro la itre Keresiano a wangatrune la faipoipo, tui Iehova me Iesu. Ngo ame itre xaa ijin, jole troa wangatrune la faipoipo ke, itre ka tha pexeje kö së. (Rom. 7:18-23) Haawe, tha sesëkötre kö së laka, hna traqa la itre jol kowe la mele ne faipoipo ne la itre pane Keresiano ekö. Hnei Paulo hna cinyihan ka hape, “tha tro pi kö la föe a isa lapa me föi angeic.” Ngo tha hna metrötrëne kö. (1 Kor. 7:10) Tha hnei Paulo kö hna qaja la itre kepin, matre kola isa lapa la lue trefën. Ngo maine jë tha hnene kö laka, hna nyixetë hnene la trahmany. Maine ju tro hi la föe a seihnacil me faipoipo hmaca me ketre. Hnei Paulo hna qaja, ka hape, ame la föe ka isa lapa memine la föi eahlo, tre, loi e tro eahlo a ‘lapa cas, maine iloi me trahmany.’ Ka faipoipo palahi nyidro xajawa i Akötresie. Öni Paulo ka hape, nyimutre la itre jol ka traqa kowe la lue trefën. Ngo maine pëkö ka kuci ngazo e nyidro, loi e tro nyidroti a thele troa iloi me ce lapa. Loi e tro nyidroti a sipo ixatua thene la itre qatre thup. w18.12 13 par. 14-15

Ame enehila, Akötresieti a ajane tro sa nyisinee i Nyidrë, me catre cainöjëne la itre maca ka lolo. (Mat. 28:19, 20; Iako. 4:8) Ngo hetre itre xan ka troa sewe së. Drei la ketre ceitun. Tune kaa e traqa ju la maseta i epun thele troa aelëne la thupe i epun, ngo kola ha troa xome la traeme ne tro epuni a icasikeu me cainöje trootro? Maine epuni palakö a ini, maine jë tro la itre porofesör a upi epuni troa trotrije la hnalapa, matre troa kuca la itre ini ka tru. Qëmekene troa axecië mekun, hapeu, epuni kö a thele troa pane thith? Epuni kö a ithel me thele ixatua thei itre xan? Loi e tro sa catre thel enehila la mekuna i Iehova göne la itre ewekë cili, matre troa ce mekun me Nyidrë. Tha tro ha jole koi së troa thipetrij itre ej, nge tro fe lai a acatrene la aja së troa nyihlue i Iehova. w18.11 31 par. 18

Hna acili Solomona troa joxu ne Isaraela ngöne lo thöth petre kö angeic. Hnei Iehova hna mama koi angeic ngöne pu, me qaja ka hape: “Siponejë eö la ewekë tro ni a hamë eö.” Sa jë hi Solomona, ka hape: “Tha ’te kö ni la aqane löpi me löjë. . . . Epi hamë ni hlue i enëtilai la hni ka inamacane troa amekötine kowe la nöje i enëtilai.” (1 Ite jo. 3:5-10) Hnei Solomona hna sipo Iehova la “hni ka inamacan.” Drei la ketre sipo ka lolo! Celë hi matre, ka tru Solomona koi Iehova! (2 Sam. 12:24) Madrine catre Akötresie la aqane sa ne la joxu. Celë hi matre, Nyidrëti a hamëne koi Solomona “la hni ka inamacane me wangate hmekun.” (1 Ite jo. 3:12) Ame ngöne la Solomona a mele nyipici koi Iehova ke, nyimutre la itre manathith hnei angeic hna kapa. Hnei angeic hna kapa la ketre hnëqa ka tru, ene la troa xupe la ēnē, “thatraqane la atesiwa i Iehova Akötesi angete Isaraela.” (1 Ite jo. 8:20) Hna atre angeice hnyawa jëne inamacane hna hamëne hnei Akötresie. Celë hi matre, ame la nöjei ewekë hnei angeice hna qaja, tre, hna cinyihan e hnine la köni tusi ne la Tusi Hmitrötr. Tusi Ite Edomë la ketre. w19.01 14 par. 1-2

Ame itre xan, tha ajane kö angatr troa xome la aqane mekune la itre xan. Öni angatr, “pëkö ka troa musinë ni.” Ame koi angatr, pëkö ka troa qeje angatr. Tha ajane kö angatr troa musinë angatr maine upi angatr pena troa xome la aqane mekune la itre xan. Easa madrine laka, maine nyipici laka tro sa ce mekune me Iehova, ngo ijije hi tro sa hane sipu ië mekun. Kola qaja ngöne 2 Korinito 3:17, ka hape: “Iehova la ketre U, nge ame la itretre kapa la uati i Iehova, itre hna nuamacane lai.” Iehova a nue së troa ketre sipu axecië mekun. Hetre itre ewekë hne së hna isa ajan. Aqane xupi së hi lai hnei Iehova. Ngo hetre ifego së ngöne la easa axecië mekun. (1 Pet. 2:16) Maine easa ajane troa wangatrehmekune la loi memine la ngazo, nyipiewekë tro sa xome la Wesi Ula i Akötresie. w18.11 22 par. 5-6

Ame lo easa atre la nyipici, hne së hna inin laka, ka sisitria catre kö la troa huliwa i Iehova, hune la troa thele mo. Tru la madrine së troa nuetrije la itre ewekë cili thatraqane la nyipici. Ngo kola tro la itre drai, nge easa öhne la madrinene la itre ka itö ewekë. Maine jë, tro sa mekune laka, hetre ewekë ka pë the së. Tha mejihnine hë së la itre hna hetreny, ngo easë pena a wangatrune la itre mo hune la huliwa i Iehova. Ceitune hi memine lo ka traqa koi Dema. “Angeic a hnine la fen,” matre hnei angeic hna nue la hnëqa i angeic me Paulo aposetolo. Maine jë, ka tru koi Dema la itre ewekë ne fen, nge co pë hë la huliwa i Akötresie. Celë hi matre, xele hë angeic ma ce huliwa me Paulo. Nemene la hna ini së? Maine jë, hne së fe hna hane aja mo ekö. Maine tha hmeke kö së, troa kökötre hmaca la aja cili e kuhu hni së, nge troa nanazij la ihnimi së kowe la nyipici. w18.11 12 par. 9

Hnei Satana hna thele troa iaö Eva. Atre hi Satana laka, maine tro Eva a drei angeic me xeni la wene sinöe, tro hë Eva a mec. Nge celë hi ewekë ka traqa. Tha hnei Adamu kö me Eva hna trongëne la hna amekötin hnei Iehova, matre meci la pun koi nyidro. (Gen. 3:6; 5:5) Ketre, hnene la ngazo i Adamu, matre “traqa pi la meci kowe la nöjei atr asë.” Eje hi, “qaane Adramu uti hë Mose meci la ka mus, nge hna ketre fe la itre atr ka tha hane eni wathebo tui Adramu.” (Rom. 5:12, 14) Haawe, easa mec, ke, tha ka pexeje kö së, tune lo hna qaja ekö hnei Iehova. Easë pe hi a mele koi “[70] la o macate . . . ; nge maine egöcate kö, te, [80] la o macate.” Ketre, ka “ngazo me aköte la emingömingön” la mele së. (Sal. 90:10) Celë hi thangane la hna silitrengathoi hnei Satana! Öni Iesu göi Satana: “Tha cile huti kö angeic ngöne la nyipici, ke pëkö nyipici thei angeic.” (Ioane 8:44) Tha saze kö Satana. Angeic la “atre amenune la fen asë” hnene la itre trengathoi. (Hna ama. 12:9) Tha ajane kö së troa iaö së hnei Satana. w18.10 3-4 par. 1-4

Maine tro sa thel troa iloi memine la itre xan, tro hë sa madrin. Öni Iakobo: “Ame la itin ne la wene ne la meköt, tre, hna tran ngöne la tingeting koi angetre melëne la tingeting.” (Iako. 3:18) Maine jole koi së troa iloi memine la ketre trejin ne la ekalesia maine ketre sinee së, loi e tro sa sipo Iehova troa xatua së troa thele la tingeting. Tro Iehova a hamë së la uati hmitrötr, matre xatua së troa hetrenyi la itre thiina ka loi, me madrin. Hnei Iesu hna amamane la enyipiewekëne troa thele la tingeting. Öni nyidrë: “Haawe, maine eö a tro fë la ahnahna i eö kowe la ita ne huuj, nge e cili, mekune hmaca jë hi eö laka, jole hë la trejin hnei eö, pane amë ju la ahnahna i eö qëmekene la ita ne huuj, nge tro jë troa pane iloi memine la trejine me eö. Nge e bëeke hë eö, tro fë jë la ahnahna i eö.”—Mat. 5:23, 24. w18.09 19 par. 17

Ame ngöne la jidri tixenuë i Iesu memine la itretre drei nyidrë, tre, a 30 lao qaja nyidrëti la ihnim. Öni nyidrë kowe la itretre drei nyidrë, “tro nyipunieti a ihnimikeu.” (Ioane 15:12, 17) Pine laka, ka pexej me nyipici la ihnimi angatr, matre mama hnyawa ha kowe la nöjei atr laka, itre nyipi hlue i Keriso hi angatr. (Ioane 13:35) Tha Iesu kö e celë a qaja la troa hnime hi la ketre atr. Ngo nyidrëti pe a qaja la ketre thiina ka upi së troa xatuane la itre xan. Öni Iesu: “Pëkö ihnim ka tru catre hune la: ene la tro ketre a meci pine la sinee i angeic. Nge itre sineenge nyipunie, e tro nyipunie a drengethenge la hnenge hna amekötin.” (Ioane 15:13, 14) Ame fe enehila, kola canga wangatrehmekune la itre hlue i Iehova qa ngöne la ihnimi nyipici angatr, memine la aqane caasi angatr. (1 Ioane 3:10, 11) Tha ka nyipiewekë kö la nöj maine tribu, maine qene hlapa, maine aqane hetru së pena. Eje hi, nyipi ihnimi la hna melëne hnene la itre hlue i Iehova e cailo fen. w18.09 8 par. 1-2

Iehova a ajane tro sa thupëne la hnepe lapa së. Celë hi matre, easa huliwa manie matre hetreny la ka ijij thatraqai angatr. Ketre, nyimutre la itre thin ka lapa hnalapa matre thupëne la itre nekönatr. Nge ame la kola qatre trootro la kem me thin, easa thupë nyidro. Itre ewekë lai ka sisitria. Hnene la itre ewekë cili matre tha ijiji së kö troa huliwa catr koi Iehova, thenge la aja së. Ngo the kucakuca kö! Iehova a madrine la easa thupëne la hnepe lapa së. (1 Kor. 10:31) Maine co hi la hnëqa së ngöne la hnepe lapa, hapeu, ijije kö tro sa xatuane la itre trejin ka wezipo maine ka qatre hë? Maine xatuane pena la itre ka thupë angatr? Thele jë e hnine la ekalesia la itre trejin ka aja ixatua. Celë hi itre aqane tro sa ce huliwa me Iehova. Nge jëne lai, Nyidrëti a sa la thithi ne la itre trejin ka aja ixatua.—1 Kor. 10:24. w18.08 22 par. 3, 5

Pane mekune jë la tulu i Iosefa. Iosefa la neköne hnimina i Iakobo. Celë hi matre, ka zalu catr la itre trejin me angeic. Ame lo Iosefa a 17 lao macatre, hnei angatr hna salemë angeic matre troa nyi hlu. (Gen. 37:2-4, 23-28) Kola traqa koi 13 lao macatre ne angeic a akötre e Aigupito. Hnei angeic hna nyi hlu, nge hna akalabusi angeic e thupen. Nanyi catre Iosefa qaathene la keme i angeic, ka hnimi angeic. Maine ju, tro angeic a elëhni me kucakuca, pine la itre hnei angeic hna melën. Nemene la ka xatua Iosefa? Ame la Iosefa e hnine la kalabus, maine jë, hnei angeice hna lapa mekune la ixatua i Iehova. (Gen. 39:21; Sal. 105:17-19) Ketre, maine jë hnei angeic hna mekun lo itre hnei angeic hna meköl goeën ekö, lo thöthi petre kö angeic. Celë hi ka akeukawane la hni angeic laka, ce Iehova me angeic. (Gen. 37:5-11) Hnei angeice fe hna catre thith me fe la hni angeic koi Iehova. (Sal. 145:18) Nge hnei Iehova hna sa la itre thithi Iosefa. Eje hi, hnei Nyidrëti hna akeukawane la hni Iosefa laka, tro kö Nyidrëti a ‘ceme angeic.’ w18.10 23 par. 3-4

Ame itre xa ijin, easa goeëne la itre xan thenge la etrune la manie i angatr. Nemene la aqane tro la etrune la manie ne la ketre atr a ajolëne la aqane goeë angeice hne së? Hnene la uati hmitrötre i Akötresieti hna upi Solomona troa cinyihane la xötr ka nyi taane la topik enehila. Nemene la hna ini së e celë? Maine tha hmeke kö së, canga tro hi sa nyi sineene la itre trejine ka trenamo, me wangacone la itre ka puafala. Nemene la thangan e tro sa goeëne la atr thenge la hnei angeic hna hetreny? Hnene la aqane ujë cili matre tro ha gomegom e hnine la ekalesia. Celë hi ewekë ka traqa ngöne lo hneijine i Iesu, matre hnei Iakobo hna hmekëne la itre keresiano. (Iako. 2:1-4) Eje hi, tha tro pi kö sa aciane la gomegom e hnine la ekalesia, me goeëne la atr thenge la hnei angeic hna hetreny. w18.08 11-12 par. 8-10

Easa amamane la ecatrene la aqane imelekeu së me Iehova, ngöne la aqane hnime së la itre trejin me easë trahmanyi me föe. Itre atre i Iehova mina fe angatr. Maine tro sa mekune hnyawa lai, tro palahi sa thiina ka menyik me hnimi angatr. (1 Thes. 5:15) Pine nemene matre ka nyipiewekë lai? Öni Iesu kowe la itretre drei nyidrë: “Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:35) Hnei Malaki hna qaja ka hape, Iehova palahi a “qatixenyëne me shamatin” la aqane iwangatrunyi ne la itre atrene nöj. (Mal. 3:16) Öni Tusi Hmitrötr: “Atre kö Iehova la itre atr i nyidrë.” (2 Tim. 2:19) Eje hi, öhn asë hi Iehova la itre hne së hna kuca me qaja. (Heb. 4:13) Öhne hi Iehova la easa thiina ka ngazo kowe la itre trejin me easë. Ngo öhne fe hi Nyidrëti la easa ikep, me hetre hni ne ham, me nue la ngazo hna kuca, me thiina ka menyik.—Heb. 13:16. w18.07 24-25 par. 15, 17

Emele së la troa lapa qale catre koi Iehova. Pëkö ka trene men me ka trene ihnim tui Nyidrë! Celë hi matre, atraqatre la aja së troa mele nyipici me ce xöle me Nyidrë. (Sal. 96:4-6) Ngo hetre itre xa hlue i Iehova ekö ka kuca la itre ewekë ka ngazo. Hanawang la tulu i Kaina. Ngacama tha ka thili kö angeic koi idrola, ngo tha hnei Iehova kö hna kapa la huuje i angeic. Pine nemen? Pine laka hnei Iehova hna öhne la itre itine ka ngazo e kuhu hni Kaina. (1 Ioane 3:12) Celë hi matre, hnei Iehova hna hmekë Kaina ka hape: “Hape u, maine eö a kuca la loi, tha tro kö a kepe eö? nge e tha kuca kö eö la loi, hawe, mekölë hë la hulö ngöne la qëhnelö. Nge tro ha fei ’ö la aja i angeic, nge tro eö a musinë angeic?” (Gen. 4:6, 7) Iehova a amamane hnyawa koi Kaina laka, maine tro angeic a ietra me iëne troa ce xöle me Nyidrë, haawe tro fe Nyidrëti a hane ce xöle me angeic. Ngazo pe, tha hnei Kaina kö hna drei Iehova. w18.07 15-16 par. 1, 3-4

Ame la easa cainöj me inine la itre atr, easë hi lai a ahudrumene la lai së. (Mat. 28:19, 20) Ketre, easa atrunyi Iehova hnene la aqane ujë së ngöne la hna cainöj. Ame la itre atr a öhnyi së e hnyimahnyima, angatre hi lai a qaja aloinyi së memine la Akötresi së. Öni Iesu kowe la itretre drei nyidrë: “Ame la nyipunie a lö kowe la ketre hnalapa, pane ibozu jë memine la itre atren.” (Mat. 10:12) Ame ngöne la itre götrane hnei Iesu hna cainöj, hna majemine kapa la itre trenyiwa. Ngo ame hë enehila, xalaithe pe hi la itre atr ka hnimi trenyiwa. Itre xan a elëhni la kola fenafena la qëhnelö i angatr hnene la ketre trenyiwa. Ngo maine tro sa hni ka menyik me loi thiina, tro angatr a kepe së hnyawa. Ame la easa hnyimahnyima me ibozu ngöne la easa cainöj me cainöje fë présentoir, tha xou kö la itre atr troa jea me xomi itus me ithanata! w18.06 22 par. 4-5

Qëmekene la ijine cili, angetre Iuda hmekuje hi la hnei Peteru hna ce tro memin. Ngo thupene la Akötresie a amaman laka, tha tro kö la itre Keresiano a iwangatrehmekunyi atr, hnei Peteru hna cainöj koi Konelio, ketre sooc ne Roma. (Itre hu. 10:28, 35) E cili, kolo ha ce xeni me ce tro hnei Peteru memine la itre Keresiano trehnyiwa. Ngo, itre macatre thupen, tha hnei angeice hmaca kö hna ce xen memine la itre Keresiano ne Anetioka. (Gal. 2:11-14) Hnei Paulo hna haji angeic. Nge hnei Peteru hna kapa la ihaji. Celë hi ka mama ngöne lo pane tusi angeic kowe la angetre Iuda me itre Keresiano trehnyiwa ne Asia. Hnei angeic hna qaja la enyipiewekëne la troa hnime la nöjei trejin asë. (1 Pet. 1:1; 2:17) Jëne la tulu i Iesu, trotrohnine hë la itre aposetolo laka, nyipiewekë troa hnime la “nöjei pengöne atr.” (Ioane 12:32; 1 Tim. 4:10) Ngacama hmitr, ngo hnei angatre hna saze la aqane goeëne angatre la itre atr. Hnei angatre hna hetrëne “la itre thiina ka hnyipixe,” matre angatre ha goeëne la itre atr tui Akötresie.—Kol. 3:10, 11. w18.06 13 par. 15-16

Ame la ka heetrëne la imano ne la sooce ne Roma tre, kola qaja la itre sine fao ka qea hna wenë matre ijij troa kanoth la imano. Loi e tro palahi angeic a thupën, matre tha tro kö a uke la ixetr ke, celë hi ka thupëne la wenethëhmi, memine la itre xa hnepe götrane la ngönetrei. Ceitune hi la ka heetrëne la imano së memine la itre trepene meköti Iehova ke, kola thupëne la “hni” së, ene la sipu pengö së. (Ite edomë 4:23) Tha tro kö la sooce a nyihnane la fao ka heetrëne la imano i angeic memine la ketre fao ka tha catre kö. Ketre tune mina fe, tha tro pi kö sa nue la itre trepene meköti Iehova, matre trongëne pena ha la itre sipu mekuna së göi loi me ngazo. Ka hetre ifegone hi la inamacane së, matre thatreine kö së troa sipu thupëne la hni së. (Ite edomë 3:5, 6) Celë hi kepin matre, loi e tro palahi sa thel ka hape, kolo pala kö a heetrëne la mano së hnene la ixetr qaathei Iehova. Nge maine troa kökötr la aja së kowe la itre nyipici cili, tro ha hmaloi koi së troa mel thenge la itre trepene meköti Akötresie.—Sal. 111:7, 8; 1 Ioane 5:3. w18.05 22-23 par. 3-4, 6-7

Hnei Iehova hna aijijë Mose troa kuca la nöjei iamamanyikeu. Hna hamëne fe la trengecatre koi Mose troa eatrongë angetre Isaraela ngöne la hnapapa. Ngo ame pe, hnei angatre palahi hna eetr me hape, zö i Mose la kola pë tim. (Num. 20:1-5, 9-11) Hnei Mose hna elëhni, matre patre hë thei angeic la thiina ka menyik. Tha hnei angeice kö hna ithanata kowe la etë, tune lo hna amekötine hnei Iehova. Hnei Mose pe hna ithanata akökötrene kowe la nöj, me qaja ka hape, tro angeic a kuca la ketre iamamanyikeu. Angeice hë a alua lepe la etë, matre kaca pi hi la tim. Hna tria hnei Mose, pine laka, hnei angeic hna pi mama me canga elëhni. (Sal. 106:32, 33) Ame hë la pun, tha hnei Mose kö hna lö kowe la Nöje Hna Thingehnaean. (Num. 20:12) Hetre ini hne së hna xom. Ame la hnapan, tre, loi e troa kuca la hne së hna atrein, matre tro palahi sa thiina ka menyik. Maine tha thupëne kö së, tro hë sa pi mama me ithanata menu, maine kuca pena la ketre ewekë ka ngazo. Ame la hnaaluen, tre, jole koi së troa thiina ka menyik ngöne la easa hnehengazo. Celë hi matre, loi e tro palahi sa catre thiina ka menyik, ngacama easa elëhni. w19.02 12-13 par. 19-21

Hapeu, ketre ehnefe kö la troa cainöj? Ohea. Thupene la hnei Iesu hna qaja lo ceitun göi vine, öni nyidrë, tro sa madrine tui nyidrë e hne së hna catre cainöj. (Ioane 15:11) Kola hapeue lai? Ame ngöne lo ceitune i Iesu, hnei nyidrëti hna aceitunë nyidrëti memine la vin, nge itretre drei nyidrë memine la itre umen. (Ioane 15:5) Tro la itre umen a hetrenyi palahi la tim memine la ka ijij troa cia lolo, e tro itre ej a xöle hnyawa ngöne la vin. Ketre tune mina fe, tro sa madrin tui Iesu, e tro sa cas me nyidrë me xötrethenge la itre thupaca i nyidrë. Tro hë sa hetrenyi la madrine i nyidrë, kola qaja la madrin ka xulu qa ngöne la hna kuca la aja i Akötresie. (Ioane 4:34; 17:13; 1 Pet. 2:21) Öni Hanne, ketre trejin ka 40 lao macatre ne pionie, ka hape: “Ka madrine palahi ni thupene la hna cainöj, nge celë hi ka upi ni troa catre huliwa koi Iehova.” Hnene la madrine së matre hetre trengecatre së troa catre cainöj, ngacama tha pi drei së kö hnene la itre atr.—Mat. 5:10-12. w18.05 9-10 par. 2; 12-13 par. 14

Paulo aposetolo la ketre tulu göi troa ithuecatre kowe la itre trejin. Hnene la uati hmitrötr hna upi Paulo troa cainöje koi angetre Heleni, me angetre Roma, me kowe la itre xan ka mejiune kowe la nyimu akötresie. (Gal. 2:7-9) Hnei Paulo hna trongëne la itre nöje hna hëne enehila, ka hape, Turquie, me Grèce me Italie. Hnei angeic hna cainöje kowe la angetre ethen ka mel ngöne la itre götrane cili, me acile la itre ekalesia i keresiano. Jole catre la mele ne la itre keresiano ke, kola akötrë angatr hnene la itre atrene la nöje i angatr. Matre, angatr a aja ithuecatr. (1 Thes. 2:14) Ame lo macatre 50, hnei Paulo hna cinyihane la itre tus nyine thuecatrene la ekalesia ka hnyipixe e Thesalonika. Öni angeic: “Tha mano kö huni ole koi Akötresie la eahuni a thithi sai nyipunie, ke qëmeke i Akötresie Keme së, tha thëthëhmine kö huni lo itre huliwa ne lapaune me huliwa ne ihnim, me aqane cile huti nyipunie.” (1 Thes. 1:2, 3) Hnei angeice fe hna upi angatr troa itö ithuecatr, me hape: “The mano kö ithuecatrekeu me itö ixatua.”—1 Thes. 5:11. w18.04 18-19 par. 16-17

Ame la ketre thöth a amë panën la itre ewekë ka troa amadrinë Iehova ngöne la mele i angeic tre, kola cia thei angeic la aja troa qeje Nyidrë koi itre xan. Pine laka, ka nyipiewekë catr la huliwa ne cainöj, matre loi e tro sa amë panëne ej ngöne la mele së. Ijije kö tro eö a akökötrene la aqane tro eö a cainöj? Tro kö eö a hane pionie? Ngo, tune kaa e pëkö ajane thei eö troa catre cainöj? Nge, nemene la aqane tro eö a qejepengöne hnyawa la itre ini? Lue ewekë ka troa xatua eö: Hnëkë hnyawa jë, nge the cile kö troa qeje Iehova kowe la itre atr. Tro kö eö a öhne elanyi la madrin hnei eö hna troa kapa qa ngöne la hna catre cainöj. Pane hnëkëne jë la hnei eö hna troa qaja kowe la sine ce ini me eö. Maine tro angeic a hnying ka hape, “Hnauëne la eö a mejiune koi Akötresie?” Hetre tane mekun ka mama ngöne jw.org, nge ka troa xatua eö troa sa la hnyinge cili. Troa mama la ketre fiche hna hape, “Pine nemene matre eni a mejiune koi Akötresie?” Nyialien trongëne jë lai fiche matre tro eö a atreine sa hnyawa lai hnying. w18.04 27 par. 10-11

Ngacama ijiji Adamu me Eva troa isa axecië mekun, ngo hnei Iehova hna amë la itre ifego thatraqai nyidro. Kola qaja la itre ewekë ka tha jole kö koi nyidro troa trongën. Maine aja i nyidro troa mel, loi e tro nyidroti a mano, me xen, me meköl. Hapeu, itre ifego lai ka hnöthe la mele i nyidro? Ohea. Hnei Iehova hna amekötine la itre ewekë cili, matre nyine loi koi nyidro. (Sal. 104:14, 15; Ate cai. 3:12, 13) Hnei Iehova hna upi Adamu me Eva troa hnaho, me nyihnyawane la ihnadro. Hapeu, kolo kö a hnöthe la mele i nyidro hnene la hna amekötine cili? Ohea! Kolo pe a aijijë nyidro troa kuca matre troa paradraiso la ihnadro, nge hnë tro nyidroti a mele madrin memine la itre nekö i nyidro. Celë hi lo aja i Akötresieti lai. (Sal. 127:3; Is. 45:18) Maine drei Iehova ju hnei Adamu me Eva, tro nyidroti a madrin epine palua ngöne la mele i nyidro lue trefën, memine fe la hnepe lapa i nyidro. w18.04 4-5 par. 7-8

Nyipiewekë tro sa atreine xomihni ahoeane ngöne la hna cainöj ke, tha tro kö la itre atr a canga kapa me trongëne la itre ini qa hnine la Tusi Hmitrötr. Drei la ketre ceitun. Ala xalaithe hi la itre atr ka trotrohnine la aliene la mel ka tha ase palua kö, ngöne la Paradraiso e celë fen. Itre xan a mekun laka, meci la pun kowe la atr nge pëkö melehmaca. Ame pena koi itre xan, tro hmekuje hi la itre atr ka loi a lö hnine la Paradraiso. Hanawang la hna kuca hnene la ketre trejin, matre troa xatuane la itre atr troa trotrohnine la aliene la mel ka tha ase palua kö e celë fen. Angeic a pane e la Genese 1:28. Thupene lai, angeic a hnyingëne la götrane hnei Akötresieti hna hnëkën kowe la itre atr, memine la pengöne mel hnei Nyidrëti hna ajane koi angatr. Alanyimu la ka sa ka hape, “Hnei Akötresieti hna hnëkëne la ihnadro, matre tro sa mele madrin.” E cili, hnei angeice hna xome la Isaia 55:11, me hnyingëne ka hape, hnei Akötresieti kö hna saze la mekuna i Nyidrë. Nyimutre la itre atr ka qaja, ka hape, caasi palahi la mekuna i Nyidrë. Angeice hë e cili a e la Salamo 37:10, 11 me hnyingëne la pengöne la mele elany. Eje hi, nyipiewekë troa huliwane hnyawa la Tusi Hmitrötr. Celë hi ka troa amamane kowe la itre atr laka, tha saze kö la aja i Akötresieti koi së. Nyidrëti a ajane tro la itre atr ka meköt a mele madrin e celë fen, enehila nge utihë epine palua. w19.03 24 par. 14-15; 25 par. 19

Kola amamane laka, aja i Iehova tro sa drengethenge Iesu. Hnei Iesu hna inine la itretre dreng la aqane troa cainöjëne la maca ka loi, me aqane troa catre hmek. (Mat. 24:42; 28:19, 20) Hnei nyidrëti fe hna ithuecatre koi angatr tro palahi a catr. (Luka 13:24) Hnei Iesu hna amamane kowe la itretre dreng, la enyipiewekëne troa ihnimikeu me caas, me trongëne la itre hna amekötin. (Ioane 15:10, 12, 13) Itre eamo lai nyine thatraqai së mina fe enehila. Öni Iesu: “Ame asë hi la nöjei atr ka sajuëne la nyipici, angatr a drenge la aqane ewekëng.” (Ioane 18:37) Easa drengethenge Iesu la easa “ixomihnikeu me inualoinekeun.” (Kol. 3:13; Luka 17:3, 4) Easë fe a drengethenge nyidrë la easa catre cainöjëne la itre maca ka lolo “e ijine loi me ijine jol.”—2 Tim. 4:2. w19.03 10 par. 9-10