Diseba

Kola akeukawane la hni së ke, trotrohnine hi Iesu la itre jol hne së hna cile kow, easë itre atr ka ngazo. Celë hi matre, ame ngöne lo Iesu e celë fen, hnei nyidrëti hna ‘Ce madrine memine la itre ka madrin, nge ce treije memine la itre ka treij.’ (Rom. 12:15) Hanawang la ijine kola bëeke hnene lo 70 lao itretre drei Iesu. Tru catre la madrine i angatr ke, hetre thangane la huliwa ne cainöje i angatr. “Hnene la uati hmitrötr hna amadrinë nyidrëti catr.” (Luka 10:17-21) Ketre, trotrohnine hi Iesu la itre atr. Ame ngöne lo kola meci hnei Lazaro, öhne hnyawa hi nyidrëti la akötre ka eje thene la itre sinee i Lazaro. Celë hi matre, hnei nyidrëti hna “treij, hleuhleu pi fe hi la hni i nyidrë.” (Ioane 11:33) Ketre atr ka pexeje Iesu, ngo hnei nyidrëti hna wangatrun me utipine la itre atr ka ngazo. Pine nemene matre nyidrëti a ujë tune lai? Pine laka, ka hnime nyidrëti la itre atr. Öni Iesu: “Hanyinge la ite nekö i at.” (Ite edomë 8:31) Celë hi kepin matre, hnei nyidrëti hna thele troa atrepengöne hnyawa la itre atr. Öni Ioane aposetolo: “Atre hnyawa hi nyidrë la aliene hni ne la atr.”—Ioane 2:25. w19.03 20 par. 1-2

Hnei Satana hna lep apatrene la nöjei ewekë i Iobu asë, me humuthe la itre hlue i angeic. Hnei Satana fe hna thaipië Iobu, me humuth asë lo 10 lao nekö i angeic, me lepi angeic hnene la ketre mec hna hëne ka hape, piagotre ka ngazo, qane la lue hnatrapaca utihë la he. Tru catre fe la akötre ne la föe i Iobu, matre hnei eahlo hna upi Iobu troa nuetriji Akötresie, me jelengazo Nyidrë, me mec. Ngacama hnei Iobu hna ajane troa mec, ngo hnei angeic hna catre mele nyipici koi Iehova. Thupene lai, hnei Satana hna thele la ketre aqane troa tupathi Iobu. Hnei Satana hna upe koi Iobu la köni sinee i angeic koi nyimu drai. Tha hnei angatre kö hna ithuecatre koi Iobu. Hnei angatre pe hna jelengazo Iobu me akötrë angeic. Öni angatr, Akötresieti la qaane la itre akötre cili, nge tha Nyidrëti kö a wangatrune la aqane mele nyipici Iobu. Ame koi angatr, meköt troa traqa koi Iobu la itre jole cili ke, atr ka ngazo angeic!—Iobu 1:13-22; 2:7-11; 15:4, 5; 22:3-6; 25:4-6. w19.02 4-5 par. 7-8

Ame la nyipi xou, tre, ene la easa xou troa akötrëne la hni Iehova. Maine hetrenyi ju Adamu me Eva la xou cili, tha tro jë kö nyidroti a icilekeu me Iehova. Ngo hnei nyidroti hna tha idrei. Ame hna maca la lue meke i nyidro, nge nyidroti a wangatrehmekune laka, lue atr ka ngazo hë nyidro. Ngazo me meci pe hi la pune kowe la itre matra i nyidro. Hnei nyidroti hna zae ke, hmahma ha nyidro. Trotrohnine hë nyidroti laka, ase hë nyidroti ena la wathebo i Akötresie. (Gen. 3:7, 21) Loi e tro sa xou troa akötrëne la hni Iehova, ngo tha ene kö la troa xouene la mec. Hnei Iehova hna aijijë së troa hetrenyi la mel ka tha ase palua kö. Ame ngöne la easa tria, loi e tro sa ietra qa kuhu hni së. Tro Iehova a köletrije la ngazo së. Hnene la lapaune së kowe la mel hna huujëne hnei Iesu, matre Iehova a troa nue la itre ngazo së. Easa amamane la lapaune së, ngöne la easa sa xepu me xomi bapataiso.—1 Pet. 3:21. w19.03 5-6 par. 12-13

Nyimu kepin matre nyipiewekë tro angetre Isaraela a amamane la hni ne ole i angatr koi Iehova. Hnei Nyidrëti hna thepe angatr qa Aigupito thupene lo kola lepe la nöje cili hnene lo treene lao akötr. Hnei Iehova fe hna apatrene la trongene isi Farao ngöne lo Hnagejë Ka Palulu. Atraqatr la hni ne ole i angetre Isaraela, matre hnei angatr hna thinge la nyima nyine atrunyi Iehova. Ngo hapeu, hnei angatre palahi hna olene koi Iehova? Ame ngöne lo kola traqa hmaca la itre jol, hnei angetre Isaraela hna canga thëthëhmine la itre ewekë ka lolo hna kuca hnei Iehova thatraqai angatr. Hnei angatr hna ketre sipu amamane laka, pëkö hni ne ole i angatr koi Iehova. (Sal. 106:7) Tune kaa? ‘Hnene la icasikeu asë itre nekö i Isaraela hna nyiulil koi Mose me Arona.’ Thatre kö angatr ka hape, angatr a nyiulil koi Iehova. (Eso. 16:2, 8) Tha madrine kö Iehova kowe la thiina ka ngazo ne la nöje i Nyidrë. Hnei Nyidrëti hna qaja e thupene laka, tro la angetre Isaraela cili a meci ngöne la hnapapa, nge troa mele pe hnei Iosua me Kaleba.—Num. 14:22-24. w19.02 17 par. 12-13

Tha hnei Iesu kö hna hnëkëne la ketre pui ne xeni ka tru, thatraqane la meci nyidrë. Hnei nyidrëti hna qaja kowe la itretre drei nyidrë, ka hape, troa amekunëne la drai cili e nöjei macatre, me hnëkëne la ketre pui ne xen ka co hi. (Ioane 13:15; 1 Kor. 11:23-25) Nyine tro hi a amamane ka hape, tha ka pi mama kö nyidrë. Easa madrine laka, ka hni ka ipië la joxu së e koho hnengödrai. (Fil. 2:5-8) Nemene la aqane tro sa hni ka ipië tui Iesu? Nyipiewekë tro sa pane wangatrune la itre xan. (Fil. 2:3, 4) Pane mekune jë së lo jidri tixenuë i Iesu. Atre hnyawa hi Iesu laka, tro nyidrëti a akötr. Tru la hnei nyidrëti hna hnehengazone la itre aposetolo i nyidrë ke, easenyi hë tro nyidrëti a mec. Celë hi matre, hnei nyidrëti hna inine la itre aposetolo, me ithuecatre koi angatr, me akeukawane la hni angatr. (Ioane 14:25-31) Ka tru koi Iesu la itre xan, nge pine pë hë la itre aja i nyidrë. Drei la ketre tulu ka lolo koi së! w19.01 21 par. 5-6

Hapeu, hnei epuni fe hna hane xou troa liim ngöne la hna icasikeu? Maine eje hi, tha epuni caasi kö. Ame la easa hane hamë mekun, ke, easa xou. Hetre eloine la easa xou. Kola amamane laka, hetre hni ne ipië së. Ketre, ka sisitria catre kö itre xan hu së. Iehova a wangatrune la itre ka hetre hni ne ipië. (Sal. 138:6; Fil. 2:3) Ngo Nyidrëti fe a ajane tro sa atrunyi Nyidrë, me hane hamë ithuecatre kowe la itre trejin ngöne la hna icasikeu. (1 Thes. 5:11) Iehova a hnimi së, nge tro kö Nyidrëti a thue trengecatre koi së. Hanawang la itre xaa mekun qa hnine la Tusi Hmitrötr. Ej a qaja ka hape, itre ka tria asë hi së ngöne la aqane ithanata së. (Iako. 3:2) Atre hnyawa hi Iehova laka, tha ka pexeje kö së, easë me itre trejin me easë e hnine la ekalesia. (Sal. 103:12-14) Itre trejine ka hnimi Iehova me ka hnimi së. (Mar. 10:29, 30; Ioane 13:35) Trotrohnine hi angatr laka, ka tria e itre xaa ijin la itre hne së hna qaja. w19.01 8 par. 3; 10-11 par. 10-11

Tru catre la itre jol ngöne la fen enehila, matre tha ka hmaloi kö. Ame pe, ijije hi tro Akötresieti a xatua epuni troa mele ka loi, ngöne la epuni a thöth me thupëtresij elany. Nyidrëti a ajane tro epuni a mele ka loi. Maine easa ajane troa trotrohnine lai, tro sa pane ce wang la ka xatua angetre Isaraela troa tro kowe la Nöje Hna Thingehnaean. Nemene la itre hna amekötine hnei Iehova koi angetre Isaraela, qëmekene tro angatr a tro kowe la Nöje Hna Thingehnaean? Hapeu, hnei Nyidrëti kö hna upi angatr troa hnëkë, matre troa hune ngöne la isi? Ohea! (Deu. 28:1, 2) Hnei Iehova hna upi angatr troa drengethenge Nyidrë me mejiune koi Nyidrë. (Ios. 1:7-9) Maine jë, ka gufa la eamo celë kowe la itre atr. Ngo emele i angetre Isaraela hi lai. Hnei Iehova hna xatuane la nöje i Nyidrëti troa lepe la angetre Kanana. (Ios. 24:11-13) Ka nyipiewekë troa catre lapaun, matre troa drengethenge Akötresie. E cili, tro palahi sa hetrenyi la mele ka loi. Ka hetre thangane lai ekö, me enehila mina fe. w18.12 22 par. 3-4

Nyimutre enehila la itre ka tha trotrohnine kö la ketre xötre ne la Tusi Hmitrötr. Ame itre xan, angatr a drenge lo itre hna qaja hnene la itre ka iamenumenu, me itre ka silitrengathoi së. Celë hi itre xaa kepin matre itre xan a iananyi me Iehova memine la ekalesia. (Heb. 3:12-14) Ka lolo catr la tulu i Peteru, hnei angeic hna mejiune koi Iesu. Ame itre xan, tha öhne kö angatr laka, angatr a iananyi trootro memine la nyipici. Ceitui angatre hi memine la he ka kötr qa ngöne la hna qale hnei he. Tusi Hmitrötr a hmekë së, “wanga nanyi pi së qa ngöne la lapaun.” (Heb. 2:1) Eje hi laka, tha aja i angatre kö troa iananyi memine la nyipici. Ngo hnei angatre hna nue troa nanazij la lapaune i angatr, utihë la angatr a trotriji Iehova. w18.11 10-11 par. 5-6

Hapeu, aja i epuni kö troa hane sine la itre ini ka troa hnëkë epuni troa catre huliwa i Iehova? Maine jë, tro epuni a sipone troa sine la Ini Koi Itre Ka Cainöj. Hna hnëkëne la ini cili thatraqane la itre trejin ka macaj, me ka huliwa i Iehova ngöne la drai ka pexej. Ej a xatua angatr troa kökötre ngöne la huliwa ne cainöj. Loi e tro la itre trejin a isa hnëkë, ke, thupene la ini cili, kola troa upi angatr kowe la itre xa götran. Hapeu, ijiji epuni kö troa hane sine la ini cili, matre akökötrene la huliwa i epun koi Iehova? (1 Kor. 9:23) Pine laka itre hlue i Iehova së, matre easa ham, me menyik, me loi thiina, me ihnim. Easa nyipiewekëne la itre xan. Nge celë hi ka hamë madrine me tingeting koi së. (Gal. 5:22, 23) Ngacama jole ju hë la mele së, ngo ijije hi tro sa madrin, e hne së hna nyitipune la itre thiina ka lolo i Iehova, me catre ce huliwa me Nyidrë!—Ite edomë 3:9, 10. w18.08 26 par. 16-18

Hetre itre ka hnying ka hape, ‘Ijije kö tro la ketre trejin a seihnacil matre tro hmaca angeic a faipoipo?’ Hanawang la hna qaja hnei Iesu. Öni nyidrë: “Ame la atr sei hna cil me föe hmunë, me xome hmaca la ketre föe, angeice hi lai a nyixetë triji eahlo. Nge maine tro la ketre föe a sei hna cil me föi eahlo, me ikötresai pena me ketre, eahlo hi lai a nyixetë.” (Mar. 10:11, 12; Luka 16:18) Eje hi, ka tru koi Iesu la faipoipo, nge aja i nyidrë tro la itre xan a waiewekë tui nyidrë. Maine ketre atr a trotrij la föi angeic ka mele nyipici me xome pena la ketre föe, angeice hi lai a nyixetë. Ceitune hi lai memine la föe ka seihnacil. Haawe, ame la troa seihnacil nge pëkö nyipi kepin, tre, tha celë kö la ka nyipune la faipoipo. Aja i Iehova palahi tro la lue trefën a “ca ngönetei.” Ketre, öni Iesu, maine ketre atr a seihnacil nge pë pe nyipi kepin, kösë angeice hi lai a upe la föi angeic troa nyixetë. Tune kaa? Maine jë, tro la föe i angeic a thele troa faipoipo memine la ketre trahmany göi manie. Angeice hi lai a nyixetë. w18.12 11 par. 8-9

Kola tingeting la mekuna i Habakuka ngöne la angeic a ce ithanata me Iehova. Kola ithuecatre koi angeic troa treqe Iehova. Öni Habakuka: “Loi pe tro ni a mano ngöne la drai ne aköt.” (Hab. 3:16) Nemene la ini hne së hna xom qa ngöne la tulu i Habakuka? Ame la hnapan, tre, ngacama tru catre la itre jole ka traqa koi së, ngo tha tro kö sa cil troa thithi koi Iehova. Ame la hnaaluen, loi e tro sa drei Nyidrëti ithanata jëne la Wesi Ula i Nyidrë me organizasio i Nyidrë. Nge ame la hnaakönin, loi e tro sa treqene la hnei Iehova hna troa kuca me mejiune laka, tro kö Nyidrëti a axapone la akötre së. Maine tro sa nyitipu Habakuka, tro ha tingeting la mekuna së, nge tro hë sa atreine xomihni. Tro la mejiune së a xatua së troa xomihni me madrin ngacama kola traqa la itre jol. Xecie hnyawa koi së laka, tro kö la Keme së e koho hnengödrai a xatua së.—Rom. 12:12. w18.11 18 par. 11-12

Nemene la aqane goeëne Iehova la atr ka athixötrëne la itre xan? Öni Iesu: “Ame la atre akeine la ketre ka co nge ka lapaune koi ni, loi e troa athipe ngöne la nyinawa i angeic la ketre ietë ka tru nyine amudron hna hule hnei boliko, nge troa kuië angeice fë e kuhu hnagejë.” (Mar. 9:42) Drei la itre trengewekë ka sisitria catr koi së! Ka meköti Iesu tui Iehova, Keme i nyidrë. Celë hi matre, kola akötrë Iehova hnene la atr ka athixötrëne la ketre atre drei Iesu. (Ioane 14:9) Hapeu, caasi hi la mekuna së me Iehova me Iesu, ngöne la götrane cili? Nemene la ka mama ngöne la itre huliwa së? Maine jë tro sa iëne la ketre aqane heetr maine aqane iseji pena. Ngo hapeu, tro kö sa saze mekun, e atre hi së laka, kola athixötrëne la itre xan e hnine la ekalesia maine aciane pena thei angatr la itre mekune ka ngazo? Hapeu, tro kö xomehnöthe la itre aja së hnene la ihnimi së kowe la itre trejin? w18.11 29 par. 9-10

Pine nemene matre nyipiewekë tro sa mele nyipici? Pine laka hnei Satana hna icilekeu me Iehova, me tupathi së. Hnei Satana hna qaja angazone la ëje i Iehova me sili ithanata ka hape, ka ngazo me ka pi tru Nyidrë, nge tha ka loi kö la aqane musi Nyidrë. Hnei Adamu me Eva hna drei Satana me icilekeu me Iehova. (Gen. 3:1-6) Maine ju, ijiji nyidroti hi ekö e Edena, troa acatrene la ihnimi nyidroti koi Iehova. Ngo ame pe, tha ka pexeje kö la ihnimi nyidro, ngöne lo kola icilekeu hnei Satana. Hapeu, ijije kö troa upe la atr hnene la ihnim, troa mele nyipici koi Iehova? Celë hi lo hnying hna amejën ekö göi Iobu. (Iobu 1:8-11) Ketre, tha ka pexeje kö Iobu, nge ka tria fe angeic. Ngo hnene laka, ka mele nyipici angeic, matre tru la ihnimi Iehova koi angeic. w19.02 3-4 par. 6-7

Hnei Iesu hna hamëne la ceitune ne la atre itö, kola thele la itre penina ka lolo. Ame la angeic a öhne la ketre penina ka tru alameken, angeic a salemën asë la itre hnei angeic hna hetreny, matre troa itöne la penina. Ceitune hi la penina cili memine la nyipici göne la Baselaia i Akötresie. Iesu a amamane la enyipiewekëne la nyipici kowe la angetre thel ej. (Mat. 13:45, 46) Ame lo easa xötrei atre la nyipici qa hnine la Tusi Hmitrötr, tune la nyipici göne la Baselaia i Akötresie, hne së fe hna nuetrij la itre xaa ewekë matre troa kapa la nyipici. Maine tro palahi sa wangatrune la nyipici, thatreine jë kö tro sa trotrije la nyipici. (Ite edomë 23:23) Ame pe, hetre itre xaa hlue i Akötresie ka wangacone la nyipici me trotrij. Tha aja së kö troa tui angatr! Loi e tro sa trongëne la eamo hna hamën hnei Tusi Hmitrötr ka hape, troa “tro ngöne la nyipici.” (3 Ioane 2-4) Kola qaja ka hape, tro sa amë panëne la nyipici, nge loi e troa mama ngöne la mele së. w18.11 10 par. 3

Hnene la angela hna qaja koi Iosua ka hape, tha tro kö angetre Isaraela a lepe Ieriko. Ame ngöne la sikisi lao drai, tro angatr a aca kanothe la traon. Nge ame ngöne la hna sevenene drai, tro angatr a asevene lao kanoth la traon. Maine jë hnene la itre sooc hna qaja ka hape, ‘Easë lai a ae drai me aluzi trengecatr!’ Ngo atre hi la angela ka elemekene la nöje Isaraela, la hnei angeic hna kuca! Kola acatrene la lapaune ne la angetre Isaraela la angatr a trongëne la itre hna amekötin. Tha hnei angatre ju kö hna isi memine la itre sooc e Ieriko. (Ios. 6:2-5) Nemene la ini koi së? Ame e itre xaa ijin, kola saze la aqane kuca la itre ewekë hnene la organizasio i Iehova, nge tha trotrohnine kö së. Ame ekö, ka ngazo troa huliwane la itre mobilis me itre tablet, matre troa ini tus maine cainöj maine hnëkëne la itre icasikeu. Ngo easa öhn enehila laka, tha ka ngazo kö troa huliwan itre ej. Ame la easa öhn la eloine la itre ewekë ka saze, kola acatrene la lapaune së me aqane imelekeu së memine la itre trejin. w18.10 24 par. 8-9

Nyimutre ekö la itre hna mekun hnene la itre atr göne la Mesia. Ame kowe la angetre Iuda, Mesia la ka troa nyinyine la itre jol. Celë hi matre, angetre Galilaia a ajane troa acili joxu Iesu. Ame koi angatr, Iesu hi la ka ijij troa joxu, ke, ka atreine ithanata nyidrë, nge nyidrëti a aloine la itre mec, me ithuane la itre ka mecijin. Kola hain hnene la nöj la Iesu a ithuane la 5 000 lao atr. Canga trotrohnine ju hi nyidrëti la aja i angatr. Öni Tusi Hmitrötr: “Wangatrehmekune jë hi Iesu laka, tro angatr a xomi nyidrë me acili joxu nyidrë, matre nyidrëti a canga kötre pi me lapa casi hune la wetr.” (Ioane 6:10-15) Ame hë la kola paatre trootro la aja ne la nöj troa acili joxu nyidrë, Iesu a amekötine jë la mekuna i angatr, me qejepengöne koi angatr la huliwa i nyidrë. Tha hnei nyidrëti kö hna traqa troa kapa la aja i angatr ngöne la götrane ngönetrei, ngo göne tro pe a cainöjëne la Baselaia i Akötresie. Öni nyidrë: “The huliwa kö thatraqane la falawa ka canga patr, ngo thatraqane la xeni ka hamëne la mele ka pë pun.”—Ioane 6:25-27. w18.06 4 par. 4-5

Hnene la ihnimi Iesu kowe la itre atr, matre nyidrëti a utipi angatr. Trotrohnine hi nyidrë la mekuna ne la itre ka kucakuca, hna aceitunëne memine “la hainyi ka pej” maine “eunyine kola enuk.” Hnei nyidrëti hna thiina ka menyik koi angatr. (Mar. 10:14) Eje hi laka, thatreine kö tro sa trotrohnin me inine la itre atr tui Iesu! Ngo ijije hi tro sa wangatrune la itre atr ne la teritoare së, hnene la aqane ithanata së memine la ijine me traeme ne porotrik. Itre milio lao atr enehila ka “kucakuca me isa ije” hnene la aqane huliwa thoi ne la itre entreprise, me atre kuci politik, me itre hene ne hmi. (Mat. 9:36) Ame la pun, tre, kola imekuhni la itre atr, nge pëhë inyipicikeu. Celë hi matre, loi e troa mama ngöne la itre hne së hna qaja me aqane qaja së laka, easa thiina ka menyik me wangatrunyi angatr! Nyimutre la itre atr ka drei së, ngo tha hnene kö laka, ka maca së troa huliwane la Tusi Hmitrötr. Angatr a drei së, ke, easa metrötrën me wangatrunyi angatr. w18.09 31 par. 13-14

Maine tro sa atrehmekune laka, itre ka pë ewekë së ngöne la u, tro hë sa öhne la enyipiewekëne troa atre Akötresie, me thele ixatua thei Nyidrë. Tro sa tune kaa? Tro sa inine la Tusi Hmitrötr, me drengethenge Akötresie, me amë panëne la huliwa i Nyidrë ngöne la mele së. Celë hi ka troa hamë madrine së me acatrene la lapaune së laka, tro kö a eatr la itre hna thingehnaean hnei Akötresie. (Tito 2:13) Maine easa ajane troa madrin ngöne la kola traqa la itre jol, nyipiewekë tro sa acatrene la aqane imelekeu së me Iehova. Öni Paulo aposetolo: “Madrine jë thei Joxu. Nge eni hmaca a amexej, Madrine jë!” (Fil. 4:4) Maine easa ajane troa imelekeu hnyawa me Iehova, nyipiewekë tro sa hetrenyi la inamacane qaathei Nyidrë. (Ite edomë 3:13, 18) Maine easa ajane troa madrin, nyipiewekë tro sa trongëne la itre ini hna hamën hnei Tusi Hmitrötr. Celë hi hna qaja hnei Iesu, lo kola hape: “Maine atre hë nyipunieti lai, tro hë nyipunie a madrin e tro nyipunie a kuca.” (Ioane 13:17; Iako. 1:25) Eje hi, nyipiewekë tro sa xötrethenge la hna qaja hnei Tusi Hmitrötr, matre imelekeu hnyawa me Akötresie me madrin. w18.09 16 par. 4-6

Atre hnyawa hi Epafera la itre trejin, nge ka tru angatre koi angeic. Öni Paulo göi angeic ka hape, “lo hna ce akalabusin me eni.” Eje hi, hetre jole fe hna melën hnei Epafera. (Filem. 23) Ngo hnei angeic palahi hna wangatrun la itre aja ne la itre xan, me thele troa xatua angatr. Hnei Epafera hna thithi sane la itre trejin, me qaja fe la itre ëje i angatr. Ketre tulu ka lolo koi së. Ka hetre emenene la itre thithi cili. (2 Kor. 1:11; Iako. 5:16) Loi e tro sa mekune la ketre trejin hne së hna troa thithi san. Maine jë, tro sa thithi sane la itre trejin ne la ekalesia maine itre sinee së ka cile kow la itre jol. Maine jë, jol koi angatr troa axecië mekun, maine pena kola traqa la itre itupath. Loi e tro fe sa thithi sane la itre ka meci sineen, me itre ka melëne la itre hulö me itre isi, me itre ka hetre jol göi mani. Nyimutre la itre trejin hne së hna troa thithi san. w18.09 5-6 par. 12-13

Tha Paulo hmekuje kö a qaja la itre mo. Ijije fe tro sa ithuecatre kowe la itre xan, me hamë eamo qa hnine la Tusi Hmitrötr, me xatua angatr. (Itre hu. 20:31-35) Hnei Paulo hna amamane la enyipiewekëne la troa ham, jëne la aqane ithanata me aqane ujë i nyidrë. Nyipiewekë tro sa hamën maine nue la traem me trengecatre së, me ihnimi së koi itre xan. Hnene la itre ka inamacan hna öhne la ka amadrinëne la itre atr. Öni angatr ka hape, thupene la hna kuca la loi me xatua itre xan, easa madrin, ke, kösë hetre aliene hë la mele së. Celë hi matre, nyimutre la itre ka saen troa kuca la itre xa huliwa. Eje hi, ase hë Iehova qaja ka hape, ka madrin la atre ham.—2 Tim. 3:16, 17. w18.08 20 par. 17-18

Kola ithuecatr me hamë mejiune së hnene la hna perofetan hnei Isaia, göi Iesu Keriso. Öni Isaia göi Iesu ka hape, “tha tro kö nyidëti a ishenyine thenge la hna öhne hnei lue mek, nge tha tro kö a amekötine thenge la hna denge hnei lue hnangenyë,” me “ishenyine amekötine kowe la ite ka pë ewekë.” (Is. 11:3, 4) Pine nemene matre kola ithuecatre koi së? Pine laka, easa mel nyipine la ixöjetrij me iwangatrehmekunyi atr, nge itre atr a kapa la itre xan thenge la hna goeën. Celë hi matre easa treqe Iesu, la Atre Amekötine Ka Pexej ke, tha tro kö nyidrëti a ameköti së thenge la hna goeën! Ame e nöjei drai, easa mekuhnine la itre xan. Ngo tha ka pexeje kö së tui Iesu, matre tha pexeje fe la itre mekuna së. Canga tro hi a ajojezi së hnene la hne së hna goeën. Celë hi matre, öni Iesu ka hape, tha tro kö sa amekötine la itre xan thenge la hna goeën hnei lue ‘mek,’ ngo tro pe a ‘meköti’ la aqane goeë angatre hne së. Haawe, Iesu a ajane tro sa nyitipu nyidrë. Tha tro kö sa kapa la itre xan thenge la hna goeën. w18.08 9 par. 1-2

Nyipici laka, tha Nyidrëti kö a ithanata meköti koi së qa hnengödrai. Ngo ame pe, hnei Nyidrëti hna hamë së la itre trepene meköti e hnine la Tusi Hmitrötr. Ketre, hnene la uati hmitrötre i Iehova hna upe la “atre thupë hnalapa ka nyipici,” troa hamëne o drai la göxeni ne la u, thatraqane la itre hlue i Nyidrë. (Luka 12:42) Nyimutre la itre itusi hna fejan, me itre video me itre nyine dreng hna hnëkën. Itre ej a xatua së troa acatrene la lapaune së! Epi tro la itre trengewekë i Iehova a acatrene la mejiune së laka, tro kö Nyidrëti a iujine la huliwa i Nyidrë. Ketre, Iehova a troa apatrene la nöjei akötr laka, Satana me fene la qaane itre ej. Epi tro palahi sa drengethenge la itre hnei Iehova hna qaja! Eje hi, maine tro sa kuca la aja i Iehova, tro hë sa atreine cile kowe la itre jol. Öni Tusi Hmitrötr: “Nyipiewekë koi nyipunie troa atreine cile hut, matre, e ase jë nyipunieti kuca la aja i Akötresie, tro hë nyipunieti a kapa lo hna thingehnaean.”—Heb. 10:36. w19.03 13 par. 17-18

Nyimu macatre ne eatrongëne Mose la nöje Isaraela. Iosua pë hë la ka troa nyihna i Mose. Maine jë hnei angeic hna mekun ka hape, tha tro kö a kepe angeic hnene la nöje Isaraela. (Deu. 34:8, 10-12) Tune la hna qaja ngöne Iosua 1:1, 2, ketre jol ka tru la kola nyihnan ekö la atre elemekene la nöj, nge tune mina fe enehila. Hetre nyipi kepine matre kola hnehengazo hnei Iosua. Ngo ame pe, hnei angeic hna catre lapaune koi Iehova, me canga trongëne la itre hna amekötin. (Ios. 1:9-11) Celë hi matre, hnei Iehova Akötresie hna amanathithi Iosua. Hnei Nyidrëti hna upe la ketre angela, matre troa eatrongë Iosua me angetre Isaraela. Maine jë, Nekö i Akötresie la angela cili, ene la Logo. (Eso. 23:20-23; Ioane 1:1) Hnei Iehova hna xatua angetre Isaraela, matre troa kapa hnyawa la itre ewekë ka saze me kepe Iosua hnyawa, lo atre elemeken. w18.10 22-23 par. 1-4

Atre hi Iehova la itre ka ajane troa nyihlue i Nyidrë. Hnei Nyidrëti hna cinyihane la itre ëje i angatr e hnine la “tusi ne amekunën.” Hetre nyine tro sa kuca, maine easa ajane troa cile huti la ëje së e hnine la “tusi ne amekunën.” Hnei Malaki hna qaja ka hape, loi e tro sa xoue Iehova me mekun ajuine la ëje i Nyidrë. Ngo, maine tro sa nyihluene la ketre atr maine ketre ewekë pena, tro ha köletrije la ëje së qa hnine la itusi Iehova! (Eso. 32:33; Sal. 69:28) Celë hi matre, tha tro hmekuje kö sa nue mele me xomi bapataiso. Lue ewekë lai hne së hna aca kuca ngöne la mele së. Ngo loi e tro sa mele nyipici koi Iehova, ngöne la nöjei drai ne la mele së. Nge nyipiewekë troa mama ngöne la nöjei huliwa së laka, easa kuca la aja i Iehova.—1 Pet. 4:1, 2. w18.07 22-23 par. 7-9

Tha hnene kö laka, itre macatre ne melëne hë së la nyipici, ke, itre Keresiano ka macaje hë së. Loi e tro sa nue la trengecatre së matre tro sa macaj. Loi e tro palahi sa akökötrene la atrehmekune së me trotrohnin. Celë hi matre nyipiewekë tro sa e la Tusi Hmitrötr e nöjei drai. (Sal. 1:1-3) Maine tro sa e lapane la Tusi Hmitrötr, tro hë sa trotrohnine hnyawa la itre wathebo me itre trepene meköti Iehova. Nemene la wathebo ka sisitria catr kowe la itre Keresiano? Kola qaja la wathebo göi ihnim. Hnei Iesu hna qaja kowe la itretre drei nyidrëti ka hape: “Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:35) Ihnim la hna hëne ka hape, “wathebo ka tru” me “eatrëne la wathebo.” (Iako. 2:8; Rom. 13:10) Tha sesëkötre kö së laka, ka sisitria la ihnim. Tusi Hmitrötr a qaja ka hape, “Akötresieti la ihnim.”—1 Ioane 4:8. w18.06 18-19 par. 14-15

Eje hi, ngacama itretre Isaraela la ka icilekeu me Iehova, ngo Mose la ka akötr me elëhni. Tha hnei angeice kö hna xomihni ahoean me pane mekune la ethanyine la troa tha idrei. Eje hi laka, tha hnei Mose hmaca kö hna thele Iehova. Hnei angeice pe hna nue la aqane ujë itre xan, troa athixötrë angeic. Ame lo pane ijine kola eetr hnene la nöj pine pë tim, ke, hnei Mose hna trongëne hnyawa la itre hna amekötin. (Eso. 7:6) Ngo maine jë, angeic a kucakuca me hnehengazo pine laka, itre macatre ne icilekeu hë la nöje Isaraela me Iehova. Maine jë, hnei Mose hna mekun menune la jol ka eje thei angeic, matre thëthëhmine pë hë angeice troa atrunyi Iehova. Maine hna ajojezine me tria hnene la ketre perofeta tui Mose, haawe tro fe lai a hane traqa koi së. Kolo ha troa traqa hnei Mose kowe la Nöje Hna Thingehnaean. Ketre tu së fe, easenyi hë tro sa traqa kowe la fene ka hnyipixe. (2 Pet. 3:13) Eje hi laka, tha ajane kö së troa thapa qaathe së la manathithi cili. Maine easa ajane troa traqa kowe la fene ka hnyipixe, loi e tro sa catre thele Iehova me kuca la aja i Nyidrë.—1 Ioane 2:17. w18.07 12 par. 14; 13 par. 16

Thatreine kö Satana musinë së troa kuca la ketre ewekë, nge tha ajane kö së. (Iako. 1:14) Thatre kö la itre atr enehila laka, angatr a xötrethenge Satana. Celë hi matre, ame la kola atre la nyipici hnei ketre, nyipiewekë tro angeic a iën la hnei angeic hna troa ce xöl memin, Iehova maine Satana. (Itre hu. 3:17; 17:30) E tro sa isine troa drengethenge Akötresie, thatreine kö Satana troa thë la lapaune së. (Iobu 2:3; 27:5) Hetre ketre ewekë hna thatreine kuca hnei Satana, memine la itre dremoni. Tha hnei Tusi Hmitrötre kö hna qaja ka hape, ijiji angatr troa atre la aliene hni së, maine mekuna së. Iehova me Iesu hmekuje hi la ka atrein. (1 Sam. 16:7; Mar. 2:8) Maine tro sa isine troa ithanata, me ujë thenge la aja i Iehova, haawe, tha tro pi kö Nyidrëti lai a nue Diabolo troa akötrë së. (Sal. 34:7) Nyipiewekë tro sa atrepengöne la ithupëjia me easë, ngo tha tro pi kö sa xoue angeic. Nyipici laka, itre atr ka tha pexeje kö së, ngo jëne la ixatua i Iehova, ijiji së hi troa ngaa Satana! Maine tro sa cile koi Satana, tro angeic a kötre ananyi së.—Iako. 4:7; 1 Pet. 5:9. w18.05 20 par. 15-17

Pane mekune jë laka, epuni a hnëkë troa tro kowe la ketre traon gaa nany matre troa hane sine la ketre icasikeu ka tru. Tro epuni lai a xomi kar, matre traqa e cili. Ngo ame ngöne la hnë xomi kar, nyimutre la itre kar. Nyipiewekë tro epuni a xome la kar ka troa ami epuni ngöne la hnei epuni hna ajan! Tha tro jë kö epuni lai a xom menune la ketre kar, wanga troa nyinyape sai epuni menu. Ceitune hi lai memine la itre thöth enehila. Ame itre xa ijin, tha mama hnyawa kö koi eö la nyine troa axeciën ke, nyimutre palaha hnei mekun ngöne la mel. Ngo, maine atre hnyawa hi eö la hnei eö hna ajan troa traqa kow, tha jole hë lai koi eö troa iën la itre mekun ka loi. Tro jë kö eö a amë panën la itre ewekë ka troa amadrinë Iehova, ngöne la mele i eö? Kolo lai a hape, troa trongëne la itre eamo i Iehova ngöne la itre mekun hnei eö hna troa xom, tune la troa ini maine huliwa, maine troa faipoipo me hetre nekönatr pena. Ketre, troa catr huliwa matre eatrëne la itre hna mekune troa kuca ngöne la huliwa i Akötresie. Itre huliwa lai ka troa aeasenyi eö koi Iehova. Maine tro eö a amë panën la huliwa i Iehova ngöne la mele i eö, tro hë Iehova lai a amanathithi eö me xatua eö troa hetre mele ka loi. w18.04 27 par. 1-3

Hnei Iefetha hna eatrëne lo hna sisiny, me upe la nekö i nyidrëti jajinyi troa nyihlue i Iehova o drai ngöne la uma ne heta. (A. ame. 11:30-35) Nyipici, tha ka hmaloi kö koi Iefetha. Ngo tro kö a jole catre kowe la nekö i nyidrë jajinyi ke, nyëne la ka kapa la hna sisinyi hnei kem. (A. ame. 11:36, 37) Tha tro pë hë nyëne a hane faipoipo me hetre nekönatr. Pëkö matra i Iefetha. Celë hi matre, nyën a aja ithuecatr. Öni Tusi Hmitrötr: “Celë hi [hna majemine kuca] e Isaraela, laka tro la ite nekö i angete Isaraela jajinyi o macate a teije pine la nekö i Iefetha jajinyi ate Gileada eke drai ne la macate.” (A. ame. 11:39, 40) Easë fe a mekune la tulu ne la itre trejin, itre ka lapa casi enehila, matre troa catre huliwa i Iehova. Hapeu, ijije kö tro sa qaja aloinyi angatr, me ithuecatre koi angatr?—1 Kor. 7:32-35. w18.04 17 par. 10-11

Alanyimu la itre angela ka xötrethenge Satana ngöne la angeic a icilekeu me Akötresie. Qëmekene troa traqa la Iwë, hnei Satana hna ajojezine la itre xan e angatr matre troa ce meköl memine la itre föe. Tusi Hmitrötr a qejepengöne lai, ngöne lo kola qeje drakona, e trotro qa hnengödrai, me hule trongëne “la sine la itre wëtresij ne hnengödrai.” (Gen. 6:1-4; Hna ama. 12:3, 4) Ame la kola trotrije la lapa i Akötresie hnene la itre angela cili tre, angatre hë lai a lapa fene la musi Satana. Tha tro pi kö sa mekun laka, ka zikoziko la aqane huliwa i angatr. Ame ngöne la gaa sihngödr, hnei Satana hna acile la musi angeic, me nyitipune la aqane trongene la Baselaia i Akötresie. Hnei angeic hna acili angeice kö troa joxu, me hamë hnëqane la itre dremoni, me thue mene i angatr, matre tro angatr a musinëne la fen. (Efe. 6:12) Hnei Satana hna nyijëne la organizasio i angeic matre troa musinëne la itre musi ne la fen. w18.05 16-17 par. 5-6

Ame e itre xaa ijin, Akötresieti a amamane la ihnimi Nyidrëti koi së ngöne la kola haji së, ceitu me kem ka hnime la kuku. Tru la madrine i Dravita lo kola haji angeic. Hnei Dravita hna lapa mekune la itre mekuna i Iehova. Hnei angeice palahi hna kuca la itre ewekë thenge la hna amekötin hnei Iehova. Ketre atr ka lolo Dravita xajawa i Iehova. Eje hi, maine tro sa tui Dravita, tro ha kökötre la ihnim me aja së koi Iehova. Tro hë sa ketre Keresiano ka macaj. Öni Christine, ketre trejin föe, ka hape, hnei eahlo hna ithel ngöne la itre itus me lapa mekune la itre hnei eahlo hna e. Öni eahlo jë hi, “Hnei Iehova hna cinyihane la itre ithuemacany celë koi ni!” Ame fe la atr ka lapaun, tre, loi e tro angeic a goeëne la fene me mel elany, tui Akötresie. Hnei Iehova hna hamë së la atrehmekun me atreine waiewekë. Pine nemen? Nyidrëti a ajane tro sa atre la ka nyipiewekë ngöne la mel, matre tha tro kö sa xouene la mel elany!—Is. 26:3. w18.12 26 par. 9-10