Semitrepa

Eje hi laka, hnei Iehova me Iesu hna catre huliwa. Ngo hapeu, kolo kö lai a hape, tha ka nyipiewekë kö troa mano? Waea. Tha ka kucakuca kö Iehova, matre tha nyipiewekë kö tro Nyidrëti a hane mano. Ngo öni Tusi Hmitrötr ka hape, thupene la hnei Iehova hna xupe la hnengödrai me ihnadro, hnei Nyidrëti hna “lapa me mano.” (Eso. 31:17) Hnei Iehova hna pane mano me madrine la itre hnei Nyidrëti hna xup. Hnei Iesu mina fe hna catre huliwa e celë fen. Ngo hnei nyidrëti hna xomi ijine mano, me ce xen memine la itre sinee i nyidrë. (Mat. 14:13; Luka 7:34) Tusi Hmitrötr a ithuecatre kowe la itre hlue i Akötresie troa catre huliwa, ngo tha tro kö a geny. (Ite edomë 15:19) Maine jë, easa huliwa matre troa hetrenyi la ka ijij kowe la fami së. Ketre, hnëqa së troa catre cainöjëne la maca ka loi. Celë hi matre, loi e tro fe sa xomi ijine mano. w19.12 2 par. 2; 3 par. 4-5

Tha tro pi kö a ithanatane la itre huliwa ne la itre dremoni. Loi e tro sa nyitipu Iesu. Qëmekene tro Iesu a traqa e celë fen, hnei nyidrëti hna mel e hnengödrai. Celë hi matre, atre hnyawa hi nyidrëti la pengö i Satana me itre dremoni. Ngo ame pe, tha hnei Iesu kö hna lapa qeje angatr, memine la itre hnei angatr hna kuca. Ame la aja i Iesu, tre, troa qeje Iehova kowe la itre atr. Tui Iesu, loi e tro sa thupëne la itre hne së hna qaja. Tha tro pi kö sa qaja la itre hna kuca hnene la itre dremoni. Loi e tro pe sa qaja la nyipici ‘qa ngöne la hni së.’ (Sal. 45:1) Tha tro kö sa xouene la itre u ka ngazo. Ame enehila, ijije hi troa hane traqa koi së la itre ewekë ka ngazo. Maine jë, troa hnai së ngöne loto, maine tithi së hnei mec, maine tro pena sa mec. Ngo tha tro pi kö sa canga mekuhnine ka hape, hnene la itre dremoni. Tusi Hmitrötr a qaja ka hape, “ame la ijine memine la ewekë ka xulu,” tre, kola traqa koi së asë. (Ate cai. 9:11) Hnei Iehova hna amamane laka, ka catre kö Nyidrëti hune la itre dremoni. w19.04 23-24 par. 13-14

Hapeu, itre qatre thupe kö a trongëne la itre wathebo i mus me uti sane la itre ka angazone la itre nekönatr? Eje hi. Ame ngöne la itre xaa nöj, hna amekötin ka hape, troa canga thuemacane la itre mus, e hetre nekönatr hna angazon. Itre hna amekötine lai hna trongëne hnyawa hnene la itre qatre thup. Tha ka isazikeu kö la itre wathebo cili memine la wathebo i Akötresie. (Itre hu. 5:28, 29) Celë hi matre, maine ketre trejin a qajaqaja kowe la itre qatre thup ka hape, hna angazone la ketre nekönatr, loi e tro angatr a canga thuemacane la filial, matre troa xatua angatr troa trongëne hnyawa la itre wathebo i mus. Itre qatre thup a ithuecatre kowe la itre hna angazon, me itre kem me thine i nyudren, me itre xan ka atre la jol ka hape, ijije hi tro angatr a iuti sai. Ngo tune kaa e ketre trejin hi ne la ekalesia, nge atre hë hnei nöjei atr la ngazo hna kuca? Maine easë hi la ka öhne lai jol me qajaqaja, hapeu, zö së kö la kola adrone la ëje i Iehova? Waea, tha zö së kö. Ame la atrekë zön, tre, kolo atr ka kuca la ngazo. w19.05 10 par. 13-14

Tusi Hmitrötr a upe la lue trefën troa imetrötrekeu me wangatrune la faipoipo. Ej a ithuecatre koi nyidro tro palahi a ce mele nyipici, me hape: “Tro la trahmanyi a nue la keme i angeice me thine i angeic, me fede kowe la fö’ i angeic; nge tro nyidoti a ca ngönetei.” (Gen. 2:24) Tha celë kö lai hna qaja ngöne la fen. Ame la lue trefën ke, nyidroti a isa wangatrune la itre sipu aja i nyidro. Önine la ketre itusi ka qeje seihnacil ka hape, “Ame ngöne la itre xaa nöj, lue atr ka faipoipo a isisinyikeu me qaja catrën ka hape, ‘Epi troa cile huti la faipoipo i nyiso utihë mec.’ Ngo ame hë enehila, nyidroti pena a hape, ‘Epi troa cile huti la faipoipo, e tru palahi la ihnimi nyiso.’ ” Ka hetre thangane ka ngazo catre la aqane waiewekë celë. Nyimutre la itre faipoipo hna thë, nge akötr me hleuhleu la pune kowe la itre fami. Eje hi, ka hmo la itre ka xötrethenge la inamacane i fen, göne la faipoipo. w19.05 23 par. 12

Kucakuca catre Paulo pine laka, hna angazone la itre xaa Keresiano hnene la itre ini ka ngazo ne la fene i Satana. (Efe. 4:17-19) Troa hane traqa tune lai koi së. Satana la atre musinëne la fene celë ka ngazo, nge nyimutre la itre nyinyithiina i angeic. Eje hi, hnei Satana palahi hna thele troa ananyine la itre Keresiano qaathei Iehova. Maine jë, easa piine la ketre göhnë ka draië, maine troa atr së hnene la nöjei atr pena. Tro hë Satana a huliwane la aja cili, matre troa tupathi së. Ijije fe hi tro angeic a tupathi së, jëne la itre hne së hna inine ngöne la hnalapa me hnaini me jëne la itre atr ka lapa xötreithi së. Angeic a ajane tro sa nyitipune la aqane mekune i angeic. Hapeu, ijije hi tro sa ‘atreine akeine’ me xometrije qa hnine la he së, la itre ini hna kapa ekö? (2 Kor. 10:4) Hane hi la aqane sa i Paulo, lo kola hape: “Easë a lepetrije la nöjei mekun, me nöjei ewekë asë ka draië, nge ka cil kowe la atrehmekune qaathei Akötresie. Nge easë a xomacone la nöjei mekun asë troa drengethenge Keriso.” (2 Kor. 10:5) Nyipici, jëne la ixatua i Iehova, ijije hi tro sa xometrije la itre mekune ka ngazo qa hnine la he së. w19.06 8 par. 1-3

Eje hi laka, kucakuca catre Hana me Dravita, memine la atre cinyihane la Salamo. Ngo ame pe, hnei angatr hna catre qale me mejiune koi Nyidrë. Hnei angatr hna qaja koi Iehova la itre ewekë hna hnehengazon memine la itre kepin. Hnei angatr palahi hna catre nyihlue i Iehova me tro kowe la uma ne hmi Nyidrë. (1 Sam. 1:9, 10; Sal. 55:22; 73:17; 122:1) Hnei Iehova hna sa hnyawa la itre thithi angatr. Tingetinge hë la mekuna i Hana, tha hnehengazo hë eahlo. (1 Sam. 1:18) Hnei Dravita hna cinyihan, ka hape: “Nyimu aköte ne la ate ka meköt; ngo hna amele angeice qa ngön’ it’ eje asë hnei Iehova.” (Sal. 34:19) Hnene la atr cinyihane la Salamo hna qaja, ka hape, hnei Iehova ‘hna xölehuje la ime maca i angeic,’ me eatrongë angeice hnene la itre eamo hna nyitrepen hnei ihnim. (Sal. 73:23, 24) Nemene la ini hne së hna kapa qa ngöne la köni tulu celë? Ame itre xaa ijin, easa cile kowe la itre jole ka tru, matre easa hnehengazo me akötr. Ngo ijije hi tro sa cile kowe la nöjei pengöne jol. Loi e tro palahi sa lapa mekune la aqane ixatua i Iehova, me catre mejiune koi Nyidrë ngöne la thith, me drengethenge la itre hnei Nyidrëti hna amekötin.—Sal. 143:1, 4-8. w19.06 17 par. 14-15

Tha tro kö sa nue la itre xan troa ajolë së troa nyihlue i Iehova. Tha tro pi kö sa hmahma troa Temoë Iehova. (Mika 4:5) Goeëne la tulu ne la itre aposetolo thupene la kola humuthi Iesu. Atre hi angatr laka, hna xele ma wai angatr hnene la itre hene ne hmi. (Itre hu. 5:17, 18, 27, 28) Ngo hnei angatre palahi hna amamane ka hape, itretre drei Iesu angatr. Hnei angatr hna tro kowe la uma ne hmi me catre cainöj. (Itre hu. 5:42) Tha hnei angatre kö hna xoue atr. Ketre tu së fe. Tha tro kö sa xou troa qaja ka hape, Itre Temoë Iehova së. Loi e troa mama ngöne la nöjei götrane la mele së, tune la hna huliwa, hna ini, me kowe fe la itre ka lapa easenyi së. (Itre hu. 4:29; Rom. 1:16) Pine nemene matre ka madrine la itre aposetolo ekö? Atre hi angatre la kepin matre kola xele ma wai angatr. Ame koi angatr, ketre manathith ka tru troa akötre pi Iehova. (Luka 6:23; Itre hu. 5:41; 1 Pet. 2:19-21) Maine ka xecie fe koi së la mekune celë, haawe, tro hë sa catre huliwa i Iehova. w19.07 7 par. 19-20

Hnei Iesu memine la itretre drei nyidrë hna pane mano ngöne la Sabath. Angatr a metrötrëne lo wathebo i Mose ekö thatraqane la nöje Isaraela. Ngo hnei Iesu hna qaja me amamane laka, tha ka ngazo kö troa kuca la itre ewekë ka loi me xatua itre xan ngöne la Sabath. (Mat. 12:9-11) Eje hi, ame koi Iesu, ijije hi tro sa kuca la loi e Sabath. Hnei Iesu hna amamane ngöne la nöjei huliwa i nyidrë laka, trotrohnine hi nyidrëti la kepin matre Akötresieti a upe la nöj troa pane mano e Sabath. Angatr a mano ngöne la Sabath, matre troa atrunyi Akötresie. Ame la fami Iesu, tre, hnei angatr hna metrötrëne la Sabath. Hane hi la hna qaja göi Iesu lo nyidrëti e Nazareta, kola hape: “Hna hetru [Iesu] ngön, nge nyidrëti a lö jë hnine la sunago tune lo hnei nyidrëti hna majemine e drai Sabath, me cile troa e la itre hna cinyihan.” (Luka 4:15-19) Ketre, hnene la itretre drei Iesu hna metrötrëne la wathebo göne la Sabath. Celë hi matre, hnei angatr hna pane nue lo hna majemine ngöne lo kola kelemi Iesu. Angatr a pane mano ngöne la Sabath.—Luka 23:55, 56. w19.12 4 par. 10

Hnëqa ne la nöjei Keresiano troa thele la itre atr ka hetre aja troa inine la Tusi Hmitrötr. Ceitune hi la hnëqa së memine la itre ka thele la nekönatr ka paatr. Pane mekune jë laka, kola paatre la ketre nekönatr ka köni macatre. Kola e la 500 lao atr ka ithel. Thupene la 20 lao hawa, hnene la ketre atr hna öhnyi nyën ngöne la ketre hlapa. Xele kö la atr troa atrunyi angeic. Öni angeic: “Öhne hmaca ha së la nekönatr ke, hne së hna ce ithel.” Nyimutre la itre atr ka tune la nekönatr ka paatr. Pëkö mejiune i angatr, matre angatr a aja ixatua. Kola e la 8 milio nge hetre munën la itre atr ka ce huliwa, matre troa thele angatr. Maine jë, pëkö atr hne së hna öhn ka ajan troa ini Tusi Hmitrötr. Ngo ame la itre xaa trejin ka cainöj ngöne la teritoare së, hetre atr hnei angatr hna öhn, ka ajane troa inine la Tusi Hmitrötr. Easa ce madrin me angatr ke, hetre thangane la hne së hna ce huliwa. w19.07 16-17 par. 9-10

Hnei Paulo aposetolo hna upe la itre Keresiano ne Filipi troa catr. Qaane lo kola acile la pane ekalesia, hnei angetre Filipi hna qajangazone la itre nyipi Keresiano. Hna nyiqane la icilekeu ngöne lo macatre 50, lo kola tro hnei Paulo me Sila troa cainöj e Filipi. Hnei nyidroti hna drengethenge Iehova, lo Nyidrëti a qaja ka hape: “Traqa pi e Makedonia.” (Itre hu. 16:9) E cili, hnei nyidroti hna cainöj koi Lidia. Hnei eahlo “hna drenge hnyawa, nge Iehova a fe la hni eahlo.” (Itre hu. 16:14) Maine ju, Lidia me itre sine lapa i eahlo a troa xomi bapataiso. Ngo hnei Diabolo hna icilekeu me angatr. Hnei Satana hna upe la itre atrene la nöj troa utisai Paulo me Sila, me silitrengathoi nyidro. Ame la pun, hna lep me akalabusi nyidro. Thupene lai, hna helë nyidro qa ngöne la traon. (Itre hu. 16:16-40) Hapeu, hnei nyidroti kö hna drei angatr? Waea! Nge nemene la hna kuca hnene la itre pane Keresiano? Hnei angatr hna cile catr me xomihni! Eje hi, hna xatua angatr hnene la tulu i Paulo me Sila. w19.08 2 par. 1-2

Ame la kola qaja la “wene ne la [thiina ka] meköt,” tre, kola qaja la ihnimi së koi Iehova, me kowe la nöje i Nyidrë. Kolo mina fe a qaja la huliwa ne cainöj, ngöne la easa qaja la lapaune së koi Iesu, memine la mejiune së. Easa hetrenyi la “wene ne la [thiina ka] meköt,” ngöne la easa catre kuca la huliwa hna ahnithe koi së hnei Iesu, ene la troa inine la itre atr. (Mat. 28:18-20) Ijije hi tro sa ahudrumene la lai së, ngöne la nöjei götrane la mele së. Ame itre xaa ijin, ngacama kola ajolë së troa cainöj, ngo ijije hi tro sa qaja la nyipici koi itre xan. Ame ngöne lo Paulo aposetolo a cinyanyi koi angetre Filipi ke, kolo ijine kola othi nyidrë. Ngacama hna akalabusi nyidrë, ngo hnei nyidrëti palahi hna catre cainöj kowe la itre atre thup me itre ka iwai. Pëkö ewekë ka ajolë Paulo troa cainöj. Celë hi ka thue trengecatr me mejiun kowe la itre trejin ekö, “troa catre cainöjëne la trengewekë i Akötresie.”—Fil. 1:12-14; 4:22. w19.08 12 par. 15-16

Ame la pane kepin matre easa hetreny la ipië, tre, matre troa amadrinëne la hni Iehova. Celë hi la hna qaja hnei Peteru aposetolo ngöne la topik ne la drai celë. Hnene la itus, “Viens, suis-moi” ngöne la mekene 3 paragarafe 23, hna qejepengöne la itre hnei Peteru hna qaja. Kola hape: “Poizin la troa pi mama, nge ka hetre ethane catr. Ketre, wanamamike la atr ka pi mama xajawa i Iehova Akötresie. Ngo ame la atr ka ipië, tre, ka sisitria angeic koi Iehova, ngacama tha ka hlemu kö angeic koi itre xan. . . . Maine tro sa hni ka ipië, tro hë [Iehova] a amanathithi së.” Pëkö ketre ewekë ka sisitria hune la troa amadrinëne la hni Iehova! (Ite edomë 23:15) Nyipici laka, easa amadrinë Iehova ngöne la easa hetre ipië. Ngo hetre itre xaa manathith hne së hna kapa qa ngön. Maine jë tro la itre xan a easenyi koi së. Pane mekune jë la itre atr hne së hna ajane troa ce tro memin.—Mat. 7:12. w19.09 4 par. 8-9

Itre qatre thup a catre huliwa, matre troa xatuane la itre trejin. Ketre, tha angatre kö a pi draië me pi mama fë la hnëqa i angatr. Angatre pe a thiina ka menyik kowe la ekalesia. (1 Thes. 2:7, 8) Angatr a ithanata amenyikeny ke, ka metrötre angatr me hnime la itre xan. Öni Andrew, ketre qatre thup laka, nyimu macatre hë enehila: “Maine tro la ketre qatre thup a loi thiina me menyik, tro ha hetre thangane kowe la itre trejin. Troa hetre aja i angatr troa ce huliwa memine la itre qatre thup.” Öni Tony, ketre qatre thup: “Hnenge palahi hna thel troa trongëne la hna qaja ngöne Filipi 2:3, me wangatrune la itre xan. Celë hi ka xatua ni, matre tha tro kö ni a musinëne la itre trejin troa drei ni.” Loi e tro la itre qatre thup a hetre ipië tui Iehova. Ngacama Iehova la Atre Musi e hnengödrai me e celë fen, ngo hnei Nyidrëti hna “aconyi nyidëti kö,” matre troa adraiëne la itre “ka pë mo qa ngöne la xaxau.” (Sal. 18:35; 113:6, 7) Xele Iehova ma wang la itre atr ka pi tru. w19.09 16-17 par. 11-12

Troa aegöcatrenyi së hnene la nyine isilikeune i Iesu, e ka lolo la aqane waiewekë së. Maine easa kuca la huliwa i Iehova, loi e tro sa kuca thenge la aja i Nyidrë. Easa ce huliwa me Iehova, nge Nyidrëti hi la Maseta. (Luka 17:10) Maine tro sa kuca la huliwa i Iehova thenge la mekuna së, tro ha jole koi së troa eatrën la huliwa. Ngo maine tro sa kuca la huliwa i Iehova thenge la aja i Nyidrë, tro hë sa kuca la itre ewekë hne së hna tha mekun troa kuca, me cile kowe la itre jol. Tha tro kö sa thëthëhmin laka, tro kö Iehova a eatrëne la aja i Nyidrë! (Rom. 8:31; 1 Ioane 4:4) Easa ajane troa atrunyi Iehova, Keme së e hnengödrai. Ame ngöne lo hneijine i Iesu, hnene la itre atr ka huliwa thoi me huliwa qene atrekënö hna canga nuetrije la nyine isilikeune i nyidrë. (Ioane 6:25-27, 51, 60, 66; Fil. 3:18, 19) Ngo ame la itre ka hnimi Akötresie memine la itre xaa atr ke, angatr a madrine troa xome la nyine isilikeune i Iesu ngöne la mele i angatr, utihë la tro angatr a kapa la mel e hnengödrai. Ijije hi tro sa tui angatr me madrin troa xome la nyine isilikeune i Iesu ke, hetre nyipi kepin. w19.09 20 par. 1; 24-25 par. 19-20

Loi e tro palahi sa mekune la itre manathith pine laka, kola thepe së qa ngöne la itre ini ka thoi. Drei la madrine së, pine laka, hna amele së! Easenyi hë troa amele së. Iesu a troa apatrene la hmi ka thoi memine la itre musi ka kuca la itre ewekë ka tha meköti kö. Ketre, tro Iehova Akötresieti a thupëne la ka “ala nyimu atraqatr” ka nyihlue i Nyidrë, nge tro angatr a kapa la itre manathithi ngöne la paradraiso e celë fen. (Hna ama. 7:9, 14) Ketre, alanyimu la itre atr hna troa amelene hmaca, nge troa thepe angatr qa ngöne la ngazo i Adramu. (Itre hu. 24:15) Ame ngöne la Musi Iesu Ka Caa Thauzane Lao Macatre, tro nyidrë memine la itre ka ce musi me nyidrë a xatuane la itre atr, matre tro angatr a pexej me acatrene la aqane imelekeu i angatr me Iehova. Ame la ijine cili ke, kösë tune lo Iubeli ekö e Isaraela. Kolo lai a hape, troa pexeje la nöjei hlue i Iehova ka mele nyipici, nge tha tro kö angatr a kuca la ketre ewekë ka ngazo. w19.12 12-13 par. 14-16

Ame ngöne lo ijine la itre pane Keresiano, hnei Iosefa, ketre atre ham (hna hën ekö ka hape, Banaba), hna huliwa i Iehova. (Itre hu. 4:36, 37) Ame lo Saulo a Keresiano, alanyimu la itre trejin ka xoue angeic ke, hnei angeic hna qanangazone la itre ekalesia. Ngo hnei Banaba hna ithuecatre koi Saulo. (Itre hu. 9:21, 26-28) Thupene lai, hnene la itre qatre thup ne Ierusalema hna ithuecatre kowe la itre trejin ka lapa e Anetioka e Suria. Drei la hnei angatr hna up? Banaba! Lolo la mekuna i angatr. Eje hi, hna “thuecatre i angatr troa lapa qale koi Joxu hnene la hni angatr ka pexej.” (Itre hu. 11:22-24) Ketre tune fe enehila, ijije hi tro Iehova a upi së troa aegöcatrene la itre trejin. Maine jë, tro sa akeukawane la hni ne la itre ka meci sineen, maine wange pena la ketre trejin ka kucakuca. Hapeu, tha aja së kö troa hane upi së hnei Iehova, tui Banaba ekö?—1 Thes. 5:14. w19.10 22 par. 8

Ame la easa ce cainöj memine la itre trejin, öhne hi së la itre thiina ka lolo i angatr. Ngo öhne fe hi së la itre tria i angatr. Nemene la ka troa xatua së tro palahi a nyisinee i angatr? Tro sa mekun laka, tha ka pexeje kö la itre trejin. Loi e tro sa thel matre tro palahi a catre la aqane imelekeu së me angatr. Maine hna tria hnene la ketre sinee së, loi e tro sa hamë eamo koi angeic jëne la Tusi Hmitrötr, ngo cememine la menyik. (Sal. 141:5) Nge maine hnei angeic hna akötrë së, loi e tro sa nue la ngazo i angeic, nge tha tro kö sa amexeje la itre hnei angeic hna kuca. Ame ngöne la itre drai ne la pun, nyipiewekë tro sa goeëne la itre trengecatr hna kuca hnene la itre trejin, ngo tha itre tria i angatre kö! Aqane tro hi së lai a acatrene la aqane imelekeu së me angatr, nge nyipiewekë troa hetre nyipi sinee ngöne la akötr atraqatr. w19.11 6 par. 13, 16

Loi e tro sa kuca asë la hne së hna atrein, matre troa “inine la nöjei atr . . ., troa trongëne lo nöjei ewekë [hnei Iesu] hna amekötin.” Loi e tro sa xatuane la itre atr troa trotrohnine la enyipiewekëne tro angatr a nyihlue i Iehova, me isigöline la Baselaia i Nyidrë. Nyipiewekë tro sa xatua angatr troa trongëne la itre hnei angatr hna inin, me nue la mele i angatr koi Iehova me xomi bapataiso. Celë hi ka troa amele angatr ngöne la drai Iehova. (1 Pet. 3:21) Easenyi hë la pune la fene celë. Celë hi kepin matre, tha tro kö sa ini tusi aqeany memine la itre atr ka tha saze kö, nge pëkö aja i angatr troa nyihlue i Iehova. (1 Kor. 9:26) Ka nyipiewekë catre la huliwa së! Nyimutre palakö la itre atr ka ajane troa dreng la itre maca ka lolo ne la Baselaia, qëmekene troa nyipune la huliwa. w19.10 11-12 par. 14-15

Ame e nöjei macatre ngöne lo Drai Ne Nyithupene Mel, angetre Isaraela a icasikeu matre troa huujëne la itre öni koi Iehova. Celë hi ka troa amekunë angatr laka, loi e troa ietrane la itre ngazo i angatr! Ngo nyipiewekë tro la atre huuj ka sisitria a pane nenge la ka pui loi hune la itre wanalepe ka mel, matre pui loi la hnahag. Nemene la ini koi së? Öni Tusi Hmitrötr ka hape, Iehova a kapa la itre thithi ne la itre hlue i Nyidrë, ceitu me itre ewekë ka pui loi. (Sal. 141:2; Hna ama. 5:8) Ketre, hnene la atre huuj ka sisitria hna tro fë la itre ka pui loi cememine la metrötr qëmeke i Iehova. Ketre tune fe, easa thithi koi Iehova cememine la metrötr. Tru la hni ne ole së koi Iehova, Atre Xupe ke, Nyidrëti a aijijë së troa easenyi koi Nyidrë, tune la nekönatr koi kem. (Iako. 4:8) Ketre, Iehova a kepe së tune la itre sinee i Nyidrë! (Sal. 25:14) Epi tro sa wangatrune la itre manathithi cili, matre tha tro kö sa akötrëne la hni Iehova. w19.11 20-21 par. 3-5

Nemene la aqane goeëne la huliwa hnene la itre atr enehila? Ame ngöne la itre xaa nöj, itre atr a huliwa mec, matre pëhë ijine tro angatr a mano, me cememine la itre fami angatr, me thele troa atre Akötresie. (Ate cai. 2:23) Ame pena itre xan, xele kö angatr ma huliwa. Angatr a thele kepin matre tha tro kö a huliwa. (Ite edomë 26:13, 14) Isapengöne kö la aqane goeëne la huliwa hnene la itre atr, memine la aqane goeëne Iehova me Iesu. Ka catre huliwa Iehova. Öni Iesu: “Hnene pala hi la Kemeng hna huliwa uti hë enehila, nge tro pala hi ni a huliwa.” (Ioane 5:17) Pane mekune jë la itre hnei Iehova hna xup e celë fen me e hnengödrai, tune la itre angela me itre wëtresij me itre planètes. w19.12 2 par. 1-2

Pine nemene matre catrecatre la aqane imelekeu i Iehova me Dravita? Hnei Dravita hna thel troa atrepengöi Iehova, jëne la itre hna xup. Ame lo Dravita a thöth, nyidrëti palahi ngöne la hnapapa matre troa thupëne la itre mamoe ne la keme i nyidrë. Maine jë, hnei nyidrëti e cili hna lapa mekun la itre ewekë hna xup hnei Iehova. Ame la Dravita a gala draië, nyidrëti a goeëne la itre thauzane lao wëtresij, me öhne la itre thiina ne la Atre Xup. (Sal. 19:1, 2) Ame la Dravita a goeëne la aqane xupe la atr, nyidrëti a öhn la inamacane i Iehova. (Sal. 139:14) Ketre, nyidrëti fe a öhn laka, ka draië catre kö Iehova hui nyidrë. (Sal. 139:6) Nemene la ini koi së? Tro sa thele troa atrepengöi Iehova jëne la itre hna xup, tune la itre feja me itre öni me itre atr. Tro hë sa atre me easenyi catre trootro koi Iehova. (Rom. 1:20) Nge tro fe ha kökötre la ihnimi së koi Iehova. w19.12 19-20 par. 15-17

Hnei Mose hna iën troa nyihlue i Iehova Akötresie. Ame ngöne lo nyidrëti a 40 lao macatre, hnei Mose hna ce xöle me angetre Isaraela, nöje i Iehova, hune la troa hë nyidrë, “nekö i Farao jajiny.” Hnei Mose hna nuetrije la ketre göhnë ka tru me nyixöle i angetre Isaraela. Kola elëhni hnei Farao. Ketre Joxu ka catr Farao, nge ketre akötresie angeic koi angetre Aigupito. Ngo catrecatre kö la lapaune i Mose koi Iehova! Celë hi matre, ka catrecatre la aqane imelekeu i Mose me Iehova. (Ite edomë 3:5) Nemene la ini koi së? Tui Mose, nyipiewekë tro sa isa axecië mekune hnyawa tune la: Hapeu, tro kö sa nyihlue i Iehova me ce xöl memine la nöje i Nyidrë? Maine jë, tru la trengecatre hne së hna kuca koi Iehova, maine tro pena a icilekeu me easë hnene la itre ka thatre Iehova. Ngo tha tro pi kö sa luelu, tro kö Nyidrëti a ceme së! w19.12 17 par. 5-6

Ngacama hna xupi së hnei dro, ngo sisitria catre kö së hune la dro. Hane hi la itre ewekë ka amamane laka, Iehova a wangatrunyi së. Hnei Nyidrë hna xup la atr hnaiji Nyidrë, matre ijije hi tro sa xom la itre thiina i Nyidrë. (Gen. 1:27) Celë hi matre, sisitria catre kö la atr hune la itre xaa ewekë hna xup. Ketre, hnei Iehova hna upi së troa thupëne la ihnadro memine la itre öni. (Sal. 8:4-8) Ngacama hna tria hnei Adramu, ngo Iehova palahi a wangatrune la itre atr. Hnei Nyidrëti hna upi Iesu, Nekö Hnimina i Nyidrë, troa meci pi së. (1 Ioane 4:9, 10) Jëne la thupene mel, Iehova a troa amelene hmaca la itre ka mec, “itre atre ka meköt, me ka tha meköti kö.” (Itre hu. 24:15) Tusi Hmitrötr a amamane laka, ngacama tha tru kö hnei mo së, maine easa kucakuca, maine pena easa uti ipië trootro, ngo Iehova palahi a wangatrunyi së.—Itre hu. 10:34, 35. w20.01 15 par. 5-6

Tha hna iëne kö la ketre atr hnene la fami angeic. Ngo ketre ahnahna lai qaathei Akötresie. (1 Thes. 2:12) Ketre, tro sa thupëne la aqane tro sa hnying, matre tha tro kö a akötrëne la itre xan. Tha tro kö sa hnyingëne kowe la föe ne la ketre hna iën, la pengöne la mele i eahlo elany ngöne la fene ka hnyipixe, nge paatre hë föi eahlo. Xecie hnyawa koi së laka, ame ngöne la fen ka hnyipixe, tro kö Iehova a “amejine la ite ewekë ka mele asëjëihë.” (Sal. 145:16) Tro fe sa kepe thangan qa ngöne laka, tha hne së kö hna atrune palaha la ketre hna iën. Tune kaa? Öni Tusi Hmitrötr ka hape, hetre itre xaa trejin hna iën ka troa kei. (Mat. 25:10-12; 2 Pet. 2:20, 21) Maine tha tro kö sa “haine la pengö i ketre,” tha tro hë sa xötrethenge la itre atr, ngacama itre hna iën, maine itre trejin hna atre hnyawa, maine itre ka hekö hë nyihlue i Iehova. (Iuda 16) Maine tro angatr a tria me nuetrij la ekalesia, ngo tro palahi a catre la lapaune së koi Iehova, nge tro palahi sa catre nyihlue i Nyidrë. w20.01 29 par. 9-10

Easë la “itre nekö hnimina” i Iehova, matre easa nyitipu Nyidrë. Easa thel troa nyitipune la aqane ihnimi Nyidrë, me thiina ka menyik, me nue la ngazo. Ame la itre xan a öhn la itre thiina cili, angatr a ajane troa hane atrepengöi Iehova hnyawa. (1 Pet. 2:12) Ketre, loi e tro la itre kem me thin Keresiano a thupën hnyawane la itre nekönatr tui Iehova. Tro lai a thue aja koi nyudren troa hane nyi sinee i Iehova. Easa madrine troa qeje Iehova koi itre xan ke, easa ajane tro angatr a hane atre Nyidrë. Caasi hi la mekuna së me Dravita joxu. Öni nyidrë: “Tro ha la ung’ a selë Iehova.” (Sal. 34:2) Ngo tune kaa e xou së troa qeje Iehova? Nemene la ka troa xatua së? Loi e tro sa lapa mekun la madrine i Iehova memine la itre manathith hna troa kapa hnei itre xan, e tro angatr a atre Nyidrë. Ketre, tro kö Iehova a hamë së la trengecatr ka ijij. Hnei Nyidrëti hna xatuane la itre Keresiano ekö troa catr, nge tro fe Nyidrëti lai a hane xatua së.—1 Thes. 2:2. w20.02 11 par. 12-13

Alanyimu la itre hnainin ka kökötre trootro uti hë la angatr a xomi bapataiso. Ngo hetre itre xan ka xou troa hane cainöj. Angatr a madrin troa ini tus, ngo tha kökötre kö angatr uti hë la xomi bapataiso. Easë asë hi a ajane tro la itre ka ini tusi me easë a trongëne la itre hnei angatr hna inin, me xötrethenge Keriso. Iehova a ajane tro sa hnimi Nyidrë me nyihlue i Nyidrë. Hnëqa së troa xatuane la itre hnainin troa trotrohnine laka, Iehova a wangatrun me hnimi së, easë isa ala caas. Tro sa xatua angatr troa goeë Iehova tune la “[Kem] ne la nöjei neköeng, me ate amekötine la nöjei sine fö.” (Sal. 68:5) Maine tro angatr a öhn la etrune la ihnimi Akötresieti koi angatr, tro lai a ketr la itre hni angatr me acatrene la ihnimi angatr koi Akötresie. Matre, loi e tro sa xatuane la itre hnainin troa trotrohnine laka, Iehova a ajane tro angatr a mel epine palua. Nge Nyidrëti a ajane troa xatua angatr troa kapa la mele cili. w20.01 3 par. 7-8

Ka hni ka ipië Paulo. Atre hi nyidrëti laka, nyipiewekë la ixatua hna hamën hnene la itre sinee i nyidrë. Tha hnei nyidrëti kö hna hmahma e tro itre xan a öhn laka, nyidrëti a kucakuca ngone la itre ijine jol. (Kol. 4:7-11) Maine tro sa atrehmekun laka easa aja ixatua, troa ithuecatre koi së hnene la itre trejin. Atre hi Paulo laka, troa akeukawane la hni nyidrë hnene la Itre Hna Cinyihan. (Rom. 15:4) Celë fe hi la ka troa hamë inamacane koi nyidrë, matre elë hun la itre jol. (2 Tim. 3:15, 16) Ame ngöne lo hnaaluene ijine kola akalabusi Paulo, hnei nyidrëti hna mekun laka, tro hë nyidrëti a mec. Hnei nyidrëti hna upi Timoteo troa canga wai nyidrë, me xome la “itre tusi hna ewath.” (2 Tim. 4:6, 7, 9, 13) Pine nemen? Kolo Itre Hna Cinyihan Qene Heberu hnei Paulo hna xom matre troa ini tusi caas. Maine tro sa tui Paulo me catre ini Tusi Hmitrötr, tro hë Iehova a hamë tingeting koi së ngöne la itre ijine jol. w20.02 23-24 par. 14-15

Tha hnei Elifaza, Biledad, me Zofar hna thele la aqane troa xatua Iobu. Hnei angatre pe hna thele la aqane troa upezö Iobu, pine la itre akötr ka traqa koi nyidrë. Eje hi laka, ka nyipici hi la itre xaa mekun hna qaja, ngo hnei angatre fe hna qaja angazon me silitrengathoi Iobu me Iehova. Öni angatr ka hape, ketre atr ka ngazo Iobu. (Iobu 32:1-3) Nemene la hna kuca hnei Iehova? Hnei Nyidrëti hna elëhni ke, hnei angatr hna “qene hmo.” Hnei Nyidrëti hna upi angatr troa sipo Iobu troa thithi sai angatr. (Iobu 42:7-9) Nyimutre la itre ini hne së hna xom qa ngöne la tulu i Elifaza, Biledad, me Zofar. Ame la hnapan, tha tro kö sa qeje gelene la ketre trejin. (Mat. 7:2-5) Loi e tro pe sa drei angatr hnyawa me hmitr troa ithanata. Tro hë sa trotrohnine la jol ka eje thei angatr. (1 Pet. 3:8) Ame la hnaaluen, loi e tro sa ithanata cememine la menyik, me qaja palahi la itre trenge nyipici. (Efe. 4:25) Nge ame la hnaakönin ke, Iehova a drenge la itre hne së hna iqajakeun. w20.03 22-23 par. 15-16

Ame la easa inine la pengöi Iehova kowe la itre xan ke, easë hi lai a atrepengöi Nyidrëti hnyawa. Easa öhne la aqane utipine Iehova, ngöne la Nyidrëti a upi së kowe la itre ka thele Nyidrë. (Ioane 6:44; Itre hu. 13:48) Ketre, ka hetre menene la Tusi Hmitrötr ke, ej a xatuane la itre ka ini tus troa xometrije la itre thiina ka ngazo me saze. (Kol. 3:9, 10) Ketre, Iehova a xomihni aqeane la itre atr ne la teritoare së. Nyidrëti palahi a upi së troa xatua angatr troa atrepengöi Nyidrëti hnyawa, me amele angatr. (Rom. 10:13-15) Ngacama ekö hë së nyihlue i Iehova, ngo tha tro pi kö sa mekun ka hape, atrepengöi Iehova hnyawa ha së. Ame la ketre aqane tro sa wangatrune la aqane imelekeu së me Iehova, tre, ene la troa catre ithanata me Nyidrë ngöne la thith. Maine easa ajane troa nyisineene la ketre atr, nyipiewekë tro palahi sa ithanata me angeic. Celë hi matre, easa acatrene la aqane imelekeu së me Iehova ngöne la easa catre thith. Easa qaja asë la itre mekuna së me itre aliene hni së. w19.12 19 par. 11, 13-14

Hapeu, tha kolo kö lai a akeukawane la itre hni së? Iesu la Joxu ne la Baselaia i Akötresie, nge nyidrëti a troa apatrene la nöjei akötre hna kuca hnei Satana memine la fene i angeic. (Is. 65:17; 1 Ioane 3:8; Hna ama. 21:3, 4) Drei la ketre mejiune ka mingöming elany! Eje hi laka, tha ka hmaloi kö la huliwa hnei Iesu hna ahnithe koi së. Ngo ame pe, ce nyidrëti palahi me easë, nyidrëti a xatua së ngöne la itre drai hnapin. (Mat. 28:19, 20) Celë hi ka thue trengecatre së me aegöcatrenyi së! Maine easa ajane troa mele tingeting, nyipiewekë tro sa catre mejiun. Haawe, nemene la aqane tro sa mele tingeting ngacama kola traqa la itre jol? Loi e tro sa nyitipu Iesu. Ame la hnapan, thithi jë nge the mano kö. Ame la hnaaluen, drengethenge Iehova jë me catre cainöj, ngacama tha ka hmaloi kö. Nge ame la hnaakönin, sipo ixatua jë thene la itre nyipi sinee. E cili, tro la tingeting qaathei Akötresie a thupëne la itre hni së me itre mekuna së. (Fil. 4:6, 7) Nge tui Iesu, tro hë sa atreine xomihnine la nöjei pengöne jol.—Ioane 16:33. w19.04 13 par. 16-17