Okotropa

Mama hi enehila laka, Iehova palahi a thupëne la nöje i Nyidrë. Easa cainöj me inine la itre atr ngöne la nöjei götran ne la fen asë. (Mat. 28:19, 20) Easa qaja amamane la itre nyinyithina i Satana. Maine ijiji Satana ju troa acilëne la huliwa ne cainöj, tre, troa pë huliwa ne cainöj enehila. Ngo ame pe, thatreine kö angeic. Haawe, tha tro pi kö sa xouene la itre dremoni. Maine tro sa nyipici koi Iehova, tha tro kö la itre dremoni a amenu së. Ngo loi e tro palahi sa cile kowe la itre dremoni, me catre mejiune koi Iehova. E cili, tro hë sa kapa la itre manathith ka nyimutre. Nge tha tro kö sa kei kowe la itre nyinyithina i Satana. Ketre, tha tro kö sa xouene la itre dremoni me nue angatr troa sewe së troa nyihlue i Iehova. Loi e tro pe sa acatrene la aqane imelekeu së me Iehova. Hnei Iakobo hna cinyihane ka hape: “Icilekeu ju me Diabolo, nge tro hë angeic a ananyi nyipunie. Easenyi Akötresieti jë, nge tro nyidrëti a easenyi koi nyipunie.”—Iako. 4:7, 8. w19.04 24 par. 15; 25 par. 18

Itre ahnahna qaathei Akötresieti la itre nekönatr. Öni Tusi Hmitrötr, itre “edö qa thei Iehova.” Hnei Iehova hna ahnithi nyudren koi nyipunie, itre keme me thin. Celë hi matre, hnëqa i nyipunie troa thupë nyudreni hnyawa. Nemene la aqane troa thupëne hnyawa la itre nekönatr qa ngöne la iangazo? Ame la hnapan, tre, troa pane atrepengöne la itre ka angazone la itre nekönatr. Nyipiewekë tro sa atrepengöne hnyawa la itre atr cili, memine la itre nyinyithiina i angatr ka iaö. Loi e tro palahi a hmek. (Ite edomë 22:3; 24:3) Tha tro kö sa thëthëhmine laka, tha ketre trenyiwa kö la atr ka angazone la nekönatr. Ketre atr hi hnei nyën hna mejiune kow. Ame la hnaaluen, tre, troa ifekeune la itre mekun memine la itre nekö së. (Deu. 6:6, 7; Iako. 1:19) Tha tro kö sa thëthëhmine laka, jole catr kowe la itre nekönatr hna angazon, troa ithanata. Maine jë, nyudreni a xou ka hape, tha tro kö sa mejiune kowe la itre hnei nyudreni hna qaja. Maine pena, hnene la ka angazo nyudreni hna upi nyudreni troa lapa thaup. Ngo maine hetre ewekë hne së hna öhn, loi e tro sa easenyi nyudren me drei nyudreni hnyawa. Ame la hnaakönin, tre, troa hnëkën me inine la itre nekö së. Loi e tro sa ini nyudreni la aqane troa sa me nyine troa kuca, e traqa ju thele troa angazo nyudren. w19.05 13 par. 19-22

Pine nemene matre xele Iehova ma wang la itre ka pi mama me pi draië? Pine laka, itre aqane ujë lai ka hetre thangane ka ngazo catr. Tro lai a kökötr e kuhu hni së e tha canga lepetrije kö së, nge tro fe a angazone la mele së, tui Satana. Hnei Iehova me Iesu ekö hna ce huliwa me xupe la nöjei ewekë asë. Ngo pane mekune jë ka hape, Satana a mejiune laka, tro Iesu a thili me atrunyi angeic! (Mat. 4:8, 9; Kol. 1:15, 16) Eje hi, ame la itre ka sipu wangatrunyi angatre kö, tre, angatr a jelehmone la itre ka trongëne la inamacane i Akötresie. (1 Kor. 3:19) Ngo Tusi Hmitrötr a xatua së troa atreine waiewekë hnyawa. Ej a qaja ka hape, loi e tro sa madrin kowe la itre ewekë hne së hna sipu kuca maine qaja pena. Ngo ame pe, tha tro kö a sasaithi tulu ngöne la aqane waiewekë së. Öni Iesu: “Qa i eö troa hnime la atre lapa easenyi eö tui eö hi.” Kola amamane hnyawa e celë laka, tha tro kö sa wangatrune catrëne la itre aja së. (Mat. 19:19) Tusi Hmitrötr a ini së troa wangatrune la itre hna ajan hnei itre xan, nge pine pë hë la itre sipu aja së. Ej a hape: “The kuca kö la ketre ewekë matre thele iwesitrë maine pi draië, ngo ipië ju nge mekune ju ka hape, sisitria kö itre xane hui nyipunie.”—Fil. 2:3; Roma 12:3. w19.05 24 par. 13-14

Ame ngöne lo easa atre hnyawa la nyipici qa hnine la Tusi Hmitrötr, tru la itre ewekë hne së hna saze. Eje hi laka, tru la itre ewekë ka ngazo ekö hne së hna kuca. Ngo pine laka easa ajane troa nyihlue i Iehova, haawe easa nuetrije itre ej. (1 Kor. 6:9-11) Ketre madrine lai me hni ne ole së koi Iehova, pine laka ase hë së nuetrije la itre ewekë ka ngazo hna kuca ekö! Ngo ame pe, tha tro pi kö sa mekun ka hape, pë hmaca kö ewekë nyine tro sa saze. Ngacama tha easë hmaca kö a kuca la itre ewekë ka ngazo tune ekö, ngo loi e tro palahi sa catre hmek, matre troa atreine neëne la itre nyinyithiina i Satana. Maine tha thupëne kö së, tro hë sa kei hmaca kowe la ngazo. Lue ewekë nyine tro sa kuca. Ame la hnapan, tre, tha tro hmaca kö sa “mele thenge” la itre thiina ne la fene celë ka ngazo. Nge ame la hnaaluen, tre, nyipiewekë tro sa “saze” la itre mekuna së me aqane ujë së. Tha kolo hmekuje kö a qaja la itre ewekë hne së hna goeën. Kolo fe a qaja la itre ewekë hna tha öhn hnei lue mek. Loi e tro sa saze asë la itre mekuna së me itre aliene hni së, tune la itre ewekë ka ej e kuhu hni së. w19.06 9 par. 4-6

Ame la easa kucakuca, ijije hi tro sa xomi trengecatr, ngöne la hna icasikeu. Ame la easa traqa e cili, tre, kösë easa qaja koi Iehova ka hape, Nyidrëti hi la ka troa “xatua ni me akeukawanyi ni.” E cili, tro hë Iehova a thue trengecatre së jëne la uati hmitrötr, me Tusi Hmitrötr, me jëne la itre hlue i Nyidrë. Ame fe e cili, easa ‘ce akeukawanyi së me itre xan.” (Rom. 1:11, 12) Öni Sophia, ketre trejin föe: “Hnei Iehova memine la itre trejin hna xatua ni troa xomihnine la itre akötreng. Nge ka nyipiewekë catre koi ni la itre icasikeu. Eni a öhn laka, ame la eni a catre cainöj me ce memine la itre trejin, kösë atreine hë ni cile kowe la itre jol.” Tha tro pi kö sa thëthëhmine ngöne la itre ijine easa kucakuca me akötr, laka tro kö Iehova a xatua së troa xomihni. Ketre, tro Nyidrëti a xatua së enehila troa atreine cile kowe la itre jol. Tro Nyidrëti a hamë së la “aja me trengecatr,” matre xometrije la itre mekune ka ngazo ka troa thapa la mejiune së.—Fil. 2:13. w19.06 19 par. 17-18

Ame la pane ewekë hnei Iesu hna kuca thupene la hna amele nyidrëti hmaca, tre, ene la troa icasikeu memine la itretre drei nyidrë. Maine jë, nyipiewekë catre la itre hna amekötin hnei nyidrëti hna troa hamën koi angatr! Ame ngöne la icasikeu cili, hnei Iesu hna qaja la huliwa hna troa eatrën hnene la itretre drei nyidrë, ene la huliwa hne së hna hane kuca enehila. Öni Iesu: “Qa ngöne lai, tro jë nyipunie, nge inine jë la nöjei atr qa ngöne la nöjei nöj . . . Ini angatre jë troa trongëne lo nöjei ewekë hnenge hna amekötine koi nyipunie.” Iesu a ajane tro la itretre drei nyidrëti a cainöj. Tha hnei nyidrëti kö hna hamën la huliwa celë koi ange aposetolo hmekuje hi. Nemene la ka anyipicine lai? Hapeu, ange aposetolo hi la ka sine lo icasikeu hune la wetr e Galilaia, lo Iesu a hamën la hna amekötine celë? Önine lo angela kowe la itre föe: “Tro nyipunieti a iöhnyi me nyidëti [e Galilaia].” Haawe, kolo lai a amamane laka, hnene fe la itre föe hna sine la icasikeu cili. w20.01 2-3 par. 1-4

Hnei Iesu hna qaja la kepin, matre kola icilekeu me easë. Öni nyidrë ka hape, troa xele ma wai së ke, tha hane fe kö së sine la fen. Ame ngöne la kola icilekeu, tha kolo kö lai a hape, tha Iehova kö a amanathithi së. Kolo pe a amamane laka, easa kuca la loi! Thatreine kö la itre atr troa sawa me wathebone la huliwa i Iehova, Akötresieti Ka Tru Trenge Men. Nyimutre la itre ka thele troa thë la nyipi hmi, ngo tha hune kö angatr. Goeëne la ka traqa ekö ngöne lo Hnaaluene Isi Ka Tru. Ame ngöne la itre xaa nöj, hnene la itre mus hna icilekeu me akötrëne la nöje i Iehova. Hnene la itre Nazi hna wathebone la huliwa ne la itre Temoë Iehova e Alema, Australie, Canada, me itre xaa nöje ju kö. Ame lo kola nyiqane la isi lo 1939, hna e la 72 475 lao trejin ka cainöj e cailo fen. Ngo ame hë la kola nyipune la isi lo 1945, hetrenyi la 156 299 lao trejin ka cainöj. Hnei Iehova hna amanathithine la nöje i Nyidrë. Easa haine la aqane kökötre la nöje i Iehova! w19.07 9 par. 4-5

Ngacama pëkö ka ini Tusi Hmitrötr me easë, ngo ame pe, ijije hi tro sa hane ixatua. Ame la easa öhne la ketre atr ka xötrei traqa ngöne la Uma Ne Baselaia, loi e tro sa kepe angeic hnyawa me xatua angeic. Celë hi aqane tro sa amamane la ihnimi së. Tro hë angeic a wangatrehmekun laka, itre nyipi Keresiano së. Ketre, ngacama hopatre hi la itre mekun hne së hna hamën ngöne la hna icasikeu, ngo ame pe, easa ithuecatr kowe la itre ka xötrei traqa, troa hamë mekun qa kuhu hni angatr. Ijije fe tro sa ce cainöj memine la itre ka xötrei xome la huliwa ne cainöj. Loi e tro sa amamane koi angatr la aqane troa hamë ini jëne la Tusi Hmitrötr. Celë hi aqane tro sa xatua angatr troa nyitipu Keriso. (Luka 10:25-28) Ame la itre xaa Keresiano ke, tru catr hnei huliwa i angatr. Ngo angatr a thele ijine matre troa ini Tusi Hmitrötr memine la itre atr. Celë hi matre, tru catre la madrine i angatr. w19.07 17 par. 11, 13

Tha hnei Paulo kö hna nue la itre ewekë ka loi maine ka ngazo hnei nyidrëti hna kuca ekö, troa sewe nyidrëti troa nyihlue i Iehova. Ame koi nyidrë, nyipiewekë troa thëthëhmine “la itre ewekë [hna amë pe] e hutrö” me tro kowe la ‘itre ewekë hna qëmeke kow.’ Nemene la itre ewekë ka troa ajolë Paulo qa ngöne la gojenyi ne tro kowe la mel? Ame la hnapan, tre, ketre Paulo la ketre atr hna atre hna atre thei angetre Iudra. Ngo hnei nyidrëti hna goeëne lai, “ceitu me itre hnasany.” (Fil. 3:3-8) Ame la hnaaluen, tre, hace catre nyidrë pine la hna akötrën ekö la itre Keresiano. Ngo ame pe, hnei nyidrëti palahi hna catre nyihlue i Iehova. Nge ame la hnaakönin, tre, ekö hë nyidrëti catre kuca la loi. Ngo tha hnei nyidrëti kö hna mekun troa nue la huliwa i Iehova. Nyimutre la itre jol hna cile kow hnei Paulo. Hna akalabusin me qanangazo nyidrë, me tranyi nyidrëti hnei etë, nge hna lö la he, me mecijin me pë iheetr. Ngo hnei Paulo palahi hna catre cainöj. (2 Kor. 11:23-27) Tru ju hë la itre jol me akötr, ngo hnei Paulo palahi hna catre nyihlue i Iehova. Haawe, loi e tro sa nyitipu nyidrë. w19.08 3 par. 5

Nyimutre la itre trejin enehila ka catr, tui Paulo. Angatr a mel ngöne la itre nöj, hna wathebone troa cainöj ngöne la itre hnalapa trootro me ngöne la gaa tru atr. Celë hi matre, angatr a thele la itre xaa aqane troa cainöj. (Mat. 10:17-20) Ame ngöne la ketre nöj, hnene la ketre atre thupëne la sirkoskripsio hna qaja kowe la itre trejin troa cainöj kowe la itre sinee i angatr, me itre ka lapa ezi angatr, me itre sine ini me sine huliwa me itre xaa hnei angatr hna atre. Lue macatre hi e thupen, nge kola acile la itre ekalesia ngöne la götrane cili. Maine jë, ame ngöne la nöje së ke, tha hna wathebone kö. Ngo hetre ini hne së hna xom, qa ngöne la hna melën hnene la itre trejin. Maine tro sa kuca la hne së hna atrein, matre troa tro fë la maca ka loi koi itre xan, haawe, tro kö Iehova a xatua së troa cainöj ngacama jol. (Fil. 2:13) Loi e tro sa atre enehila la ka nyipiewekë. Ketre tha tro kö sa akeine la itre xan. Nge loi e tro fe sa hetrenyi la thiina ka meköt. Celë hi lai ka troa acatrene la ihnimi së me atrune la ëje i Iehova, Keme së. w19.08 13 par. 17-18

Tha ajane kö së troa ce tro memine la itre atr ka imusinë, maine ka catre fë mekun, nge tha hane kö kapa la mekuna itre xan. Ngo madrine së troa ce tro memine la itre ka “ce akötr, me ihnimikeu tune la itre trejin, me iutipinekeun, me ipië.” (1 Pet. 3:8) Celë hi aqane ujë ne la itre atr ka ipië. Drei la madrine ka tru e tro sa amamane la thiina cili! Maine tro sa ipië, tro ha lolo la mele së. Ame itre xaa ijin, tha ka meköti kö la aqane ujë ne la itre xan koi së. Maine pena, tha hna wangatrune kö la itre ka huliwa hnyawa, ngo kolo pena a qaja aloine la itre xan. Ngo Solomona a ithuecatre koi së troa xomehnöthe la elëhni, me kapa la itre ewekë ka traqa ngöne la mele së. (Ate cai. 6:9) Maine tro palahi sa hni ka ipië, tro ha hmaloi koi së troa xomihnine la itre jol hne së hna cile kow ngöne la mele së. w19.09 4-5 par. 9-10

Ijije hi tro la itre ka cilë hnëqa, tune la itre kem, a xatuane la itre xan. Hnei Iehova hna ahnith kowe la itre kem, itre he ne la fami, troa inine me iujine me hajine la itre nekönatr. (1 Kor. 11:3) Ngo tha kolo kö lai a hape, tro angatr a sipu kuca la mekuna i angatr. Iehova la ka acile la fami. Celë hi matre, itre kem a thupën me nyihnyawane la fami angatr. (Efe. 3:14, 15) Ame la itre kem ka drengethenge me amadrinë Iehova, angatr a xome hnyawa la hnëqa i angatr. Tha tro kö angatr a huliwane menune la aqane musi angatr. Loi e tro angatr a atrehmekune la itre tria i angatr, me kapa la itre eamo hna hamën hnei itre xan. Tro ha metrötrë angatr ke, ka ipië. Ame la epuni a ce thith memine la fami epun, loi e troa fe la aliene hni epun. Tro ha mama koi angatr laka, epuni palahi a thele ixatua thei Iehova. Ngo ame la ka sisitria, tre, troa amë panëne la huliwa i Iehova ngöne la mele i epun. (Deu. 6:6-9) Tro hë epuni a amamai tulu kowe la fami epun! w19.09 15 par. 8; 17 par. 14; 18 par. 16

Madrine catre Mareko troa huliwa koi itre xan. Hnei angeice hna xatua Paulo aposetolo me Peteru aposetolo troa kuca la hnëqa i nyidro. Maine jë, hnei Mareko hna hamën la ka nyipiewekë kowe la mele i nyidro. (Itre hu. 13:2-5; 1 Pet. 5:13) Öni Paulo göi Mareko ka hape, angeic la ketre ‘sine huliwa göne la Baselaia i Akötresie,’ me ketre atr ka ithuecatr. (Kol. 4:11) Mareko la ketre nyipi sinee i Paulo. Ame lo 65 M.K., hna akönia akalabusi Paulo e Roma. Hnei nyidrëti hna cinyihane la hnaaluene tusi nyidrë koi Timoteo. Hnei Paulo hna sipo Timoteo troa ce tro me Mareko e Roma. (2 Tim. 4:11) Madrine catre Paulo la huliwa hna kuca hnei Mareko ekö. Celë hi matre, hnei nyidrëti hna sipo Mareko troa ce me nyidrë ngöne la ijine cili. Hnei Mareko hna xatua Paulo. Maine jë, hnei angeic hna hamë xen koi nyidrë, me hamë nyine cinyanyi tus. Hnene la ixatua hna kapa hnei Paulo, matre hna xatua nyidrë troa xomihnine la itre drai qëmekene troa humuthi nyidrë. w20.01 11 par. 12-13

Hne së hna iëne la huliwa celë, ngacama jole catr. Ase hë Iesu qaja ka hape, troa qajangazo së. Ngo tha luelu kö së laka, tro Iehova a hamë trengecatre së, matre tro sa atreine cile kowe la itre jol cili. Maine tro sa xomihni, tro hë sa atreine cile catr. (Iako. 1:2-4) Ketre, tro Iehova a xatua së, nge tro Iesu a eatrongë së, nge tro la itre trejin a thue trengecatre së. (Mat. 6:31-33; Ioane 10:14; 1 Thes. 5:11) Ame lo föe “ka neni hni” nge hna aloin hnei Iesu, tre, egöcatre hnyawa hi eahlo e thupen. (Luka 8:43-48) Ngo maine aja i eahlo troa kapa la itre manathith ka epine palua, loi e tro eahlo a xötrethenge Keriso. Nemene la hnei eahlo hna kuca? Pane mekune jë la itre manathith hnei eahlo hna troa kapa, e hnei eahlo hna xome la nyine isilikeune i Iesu. Eahlo a troa ceme Iesu e hnengödrai! Tha ka gufa kö la itre trengecatre hnei eahlo hna nue, matre troa xötrethenge Iesu. Maine easa mejiune troa mel e hnengödrai maine e celë fen pena, ngo caasi hi la mekuna së. Easa madrine troa drenge la ihë i Iesu, lo nyidrëti a hape: “Trohemi koi ni!” w19.09 25 par. 21-22

Hnene la itre sooce i Dravita hna thele ixatua me sipo xen koi Nabala, ketre atr trenamo. Meköti hi tro angatr a sipone koi Nabala ke, angatr lo ka thupëne la itre mamoe i nyidrë ngöne lo kola hnötr. Ngo hnei Nabala hna pi tru me thipëne la sipo i angatr. E cili, hnei Dravita hna elëhni me thele troa humuthi Nabala me itre atrene la hnalapa i angeic. (1 Sam. 25:3-13, 22) Eloine pe, ka inamacane Abigaila, föe i Nabala. Hnei eahlo hna catr me sipo ielene koi Dravita ka hape, tha tro kö a humuthi Nabala me itre hlue i angeic. Hnei Abigaila hna ithuecatre koi Dravita troa sipo ixatua thei Iehova. Hna ketr la hni Dravita hnene la aqane ujë i Abigaila. Öhne hi Dravita laka, Iehova la ka upi Abigaila. (1 Sam. 25:23-28, 32-34) Hnei Abigaila hna thiina ka lolo, matre hnei Iehova hna ië eahlo troa kuca la aja i Nyidrë. Ketre tune enehila, maine tro la itre trejine föe a catr me atreine waiewekë, tro hë Iehova a ië angatr matre troa ithuecatre kowe la fami angatr me kowe la ekalesia.—Tito 2:3-5. w19.10 23 par. 10

Tha tro pi kö la itre nyipi Keresiano a sine la hmi ka thoi. Maine jë, hnene la ketre ka ini Tusi Hmitrötr hna hane sine la hmi ka thoi ekö. Hnei angeic hna hane kuca la itre huliwa i hmi me kuië manie. Qëmekene tro la ketre hnainin a nyiqane cainöj, nyipiewekë tro angeic a pane nuetrije la hmi ka thoi. Loi e tro angeic a cinyanyi tus kowe la hene ne hmi me qaja ka hape, troa köletrije la ëje i angeic. Tha tro kö la nyipi Keresiano a xome la ketre huliwa ka isigöline la hmi ka thoi. (2 Kor. 6:14-17) Pine nemen? Pine laka tha aja së kö troa lö hnine la itre huliwa me itre tria ne la hmi ka thoi, hna sisine hnei Akötresie.—Is. 52:11. w19.10 12 par. 16-17

Hnei Ieremia hna cinyihane la tusi Ieremia, memine fe la lue tusi 1 me 2 Ite Joxu. Hnene la huliwa celë hna xatua angeic troa öhne la aqane utipine Iehova la itre atr ka ngazo. Drei la ketre ceitun. Ame lo Ahaba joxu a ietra ke, tha hnei Iehova kö hna humuthe la itre sinee i angeic qëmeke i angeic. (1 Ite jo. 21:27-29) Atre fe hi Ieremia laka, tru catre kö la itre tria i Manase qëmeke i Iehova hui Ahaba. Ame pe, hnei Iehova hna nue la ngazo i Manase ngöne la angeic a ietra. (2 Ite jo. 21:16, 17; 2 A. l. ite jo. 33:10-13) Hnene la itre ceitune celë hna xatua Ieremia troa nyitipune la aqane xomihni aqeany me aqane utipine i Akötresie. Hanawang la aqane xatua Baruka hnei Ieremia ngöne lo angeic a nue la huliwa i angeic. Tha hnei Ieremia kö hna mekun laka, tha tro kö Baruka a saze. Hnei angeice pe hna xatua Baruka, me qaja mekötine koi angeic la maca i Akötresie ka menyik.—Iere. 45:1-5. w19.11 6 par. 14-15

Kola qaja ngöne la tusi Levitiko laka, ijije hi tro la ketre atr ne Isaraela a tro fë la “nyine huje ne hedö.” (Lev. 7:11-13, 16-18) Pëkö ka musinë angeic troa tro fë la huuje cili, ngo angeic a kuca qa kuhu hni. Hna aceitunëne la huliwa i Iehova memine la huuje ne ole ke, easa amamane la aliene hni së koi Nyidrë. Pine laka tru la ihnimi së koi Iehova, matre easa hamëne la ka sisitria koi Nyidrë. Drei la madrine i Iehova troa goeëne la itre milio lao Keresiano ka hnimi Nyidrë me hniin la itre wathebo i Nyidrë! Öhne hi Iehova la itre hne së hna kuca thatraqai Nyidrë, memine la kepin matre easa kuca. Drei la ketre ceitun. Maine qatre hë së nge thatreine hë së catre huliwa i Iehova, ngo trotrohni së hi hnei Nyidrë. Maine jë tro sa mekun laka, co hi la hne së hna hamën koi Iehova. Ngo ame pe, öhne hi Nyidrëti la etrune la ihnimi së. Ihnim la ka upi së troa kuca la itre hne së hna atrein. Madrine catre Iehova troa kapa la itre hne së hna hamën ka sisitria. w19.11 22 par. 9; 23 par. 11-12

Nyipiewekë troa atreine waiewekë göi huliwa. Öni Solomona joxu ka hape: “Hete pui ne la . . . nöjei huliwa asë.” Solomona a qaja la kola tra feja, me xupi uma, me treij, me hnyima, me fia, me itre xane ju kö. (Ate cai. 3:1-8) Ngo ame la lue ewekë ka sisitria ngöne la mele së, tre, troa huliwa me mano. Ka atreine waiewekë Iesu göne la troa huliwa me xomi ijine mano. Ame lo ange aposetolo a bëeke qa hna cainöj, “pëkö ijine i [angatr] troa pane xen.” Hnei Iesu hna qaja koi angatr la topik ne la drai celë. (Mar. 6:30-34) Ame itre xaa ijin, jole koi Iesu me itretre drei nyidrë troa xomi ijine mano. Ngo atre hi Iesu laka, nyipiewekë tro angatr a pane mano. Ame itre xaa ijin, easa ajane troa pane mano maine saze aqane mele pena. Celë hi matre, hnei Iehova hna amekötin kowe la nöje i Nyidrëti ekö troa metrötrëne la Sabath. Tha easë hmaca kö fene la Wathebo i Mose, ngo hetre ini hne së hna xom qa ngöne la Sabath. w19.12 3 par. 6-7

Hnei Iehova hna qaja ka hape, tro Nyidrëti a xatuane la itre hlue i Nyidrë ka mele nyipici. Thatreine kö tro Nyidrëti a triane la hnei Nyidrëti hna qaja. (Sal. 31:1-3) Ketre, atre hi Iehova laka, tro së lai a hleuhleu e pëkö ixatua i Nyidrëti kowe la itre sipu atrene la fami Nyidrë. Öni Nyidrë ka hape, tro Nyidrëti a thupë së me hamë së la ka nyipiewekë, me xatua së troa mele nyipici. Pëkö ka atreine sewe Nyidrë troa eatrëne la aja i Nyidrë! (Mat. 6:30-33; 24:45) Loi e tro sa mekun la itre kepin matre Iehova a eatrëne la itre hnei Nyidrëti hna qaja. Tro hë lai a xecie koi së laka, tro kö Nyidrëti a xatua së ngöne la easa cile kowe la itre jol göi manie. Hanawang la tulu ne la itre pane Keresiano. Ame lo kola icilekeu memine la ekalesia e Ierusalema, “hnene la nöjei keresiano, ngo tha itre aposetolo fe kö, hna kötr.” (Itre hu. 8:1) Hnei angatr hna cile kow la itre jol göi manie! Hna thapa la itre uma me itre huliwa ne la itre Keresiano. Ngo tha hnei Iehova kö hna nuaxöji angatr, ngacama pë hë madrine i angatr. (Itre hu. 8:4; Heb. 13:5, 6; Iako. 1:2, 3) Hnei Iehova hna xatuane la itre pane Keresiano ekö, nge tro fe Nyidrëti a xatua së enehila.—Sal. 37:18, 19. w20.01 17-18 par. 14-15

Atre hi Dravita laka, Iehova la ka xatua nyidrë troa humuth la liona me bea ka thel troa öni la itre mamoe. Ketre, öhne fe hi Dravita laka, ce Iehova me nyidrë ngöne lo nyidrëti a ngaa Goliatha. (1 Sam. 17:37) Nge atre hi Dravita laka, ce Iehova me nyidrë ngöne lo nyidrëti a kötre Saulo joxu. (Sal. 18, texte de présentation du Psaume) Maine ka pi tru ju Dravita, tro nyidrëti a qaja ka hape, nyidrëti a kuca la itre ewekë cili jëne la sipu trengecatre i nyidrë. Ngo pine laka ka hni ka ipië Dravita, atre hi nyidrëti laka, Iehova la ka thupëne la mele i nyidrë. Nemene la ini koi së? Tha tro hmekuje kö sa sipo ixatua koi Iehova. Loi e tro fe sa atrehmekune la ijin me aqane xatua së hnei Nyidrë. Maine tro sa hni ka ipië, tro hë sa trotrohnin laka, Iehova la ka xatua së. Thatreine kö së troa kuca la nöjei huliwa asë ke, hna nyi ifegone la hne së hna atrein. Eje hi, ame la nöjei ijin, easa öhn la ixatua i Iehova, tro hë lai a acatrene la aqane imelekeu së me Nyidrë. w19.12 20 par. 18-19

Nyimutre la itre ewekë ka amamane laka, ka nyipiewekë së koi Iehova. Nyidrëti la ka ee së koi Nyidrë, nge öhne hi Nyidrëti la aqane kapa së la maca ka lolo. (Ioane 6:44) Ame la easa easenyi koi Iehova, Nyidrëti a easenyi koi së. (Iako. 4:8) Ketre, Iehova a nue ijin me trengecatr matre troa ini së. Atre hi Nyidrëti la pengö së enehila, nge atre hi Nyidrëti laka, ijiji së hi troa macaje trootro. Nyidrëti a ameköti së ke, Nyidrëti a hnimi së. Eje hi, Iehova a wangatrunyi së! Alanyimu la itre ka wangaconyi Dravita Joxu. Ame pe, xecie hnyawa koi angeic laka, tro kö Iehova a hnimi angeic me xatua angeic. Ngo hetre ethane koi angeic la aqane mekun ne la itre xan. (2 Sam. 16:5-7) Ngacama easa kucakuca me cile kowe la itre jol, ngo tro kö Iehova a xatua së troa saze aqane mekun, me elë hune la itre jol. (Sal. 18:27-29) Maine tro Iehova a xatua së, pëkö ka atreine troa thapa la madrine së troa nyihlue i Nyidrë.—Rom. 8:31. w20.01 15 par. 7-8

Nyiqane jë la ini tus jëne la thith. Loi e tro sa nyiqane me nyipune la ini tusi hnene la thith. Tro sa amamane kowe la hnainin laka, tro sa trotrohnine la Tusi Hmitrötr, e hna xatua së hnene la uati hmitrötre i Akötresie. Ame la itre trejin, angatr a xom la Iakobo 1:5, matre troa amamane la enyipiewekëne la thith. Kola hape: “Maine ketre thei nyipunie a aja inamacan, loi e tro pala hi angeic a sipo Akötresie.” Thupene lai, angatr a hnyingëne kowe la hnainin ka hape, “Nemene la aqane tro sa sipo inamacane koi Akötresie?” Tro hë angeice lai a trotrohnine la enyipiewekëne la thith. Ketre, inine jë la hnainin troa thith. Tro sa amamane koi angeic ka hape, Iehova a ajane troa dreng la itre thith hna kuca qa kuhu hni. Ame la easa thithi caas, ijije hi tro sa fe la hni së koi Iehova, me qaja koi Nyidrëti la itre mekun hne së hna xouene troa qaja kowe la ketre atr. Atre kö Iehova la itre aliene hni së.—Sal. 139:2-4. w20.01 2 par. 3; 5 par. 11-12

Iehova la ka sa ijine troa iëne la itre hna iën. (Rom. 8:28-30) Hnei Iehova hna nyiqane iën la itre hna iën, thupene la kola bapataiso Iesu. Ame ngöne la hneijine la itre pane Keresiano, hna iën asë la itre Keresiano. Itre macatre thupen, hnene la itre xan hna qaja ka hape, itre Keresiano angatr ngo tha xötrethenge Iesu pe. Ame pe, hnei Iehova kö hna iëne la itre nyipi Keresiano. Tune lo hna qaja hnei Iesu, angatre hi la qitr ka cia nyipine la haö. (Mat. 13:24-30) Ame ngöne la itre drai hnapin, hnei Iehova palahi hna iëne la itre atr ka troa sine la ala 144 000. Haawe, maine tro Akötresieti a iëne la itre xan qëmekene la pun, tha tro kö sa luelu. (Rom. 9:11) Tha tro kö sa ujë tune la itre hlu ngöne la ceitune hna hamën hnei Iesu. Hnei angatr hna eetr pine la aqane ujë ne la maseta kowe la itre ka nyiqane huliwa ngöne la hawa tixenuë.—Mat. 20:8-15. w20.01 30 par. 14

Iehova a ajane tro la lapa ka cahae i Nyidrë a madrin. Nyimutre la itre kepin matre ijije hi tro sa mele madrin enehila, ngacama easa cile kowe la itre jol. Xecie hnyawa koi së laka, Iehova a hnimi së. Ketre, atre hi së la hna qaja hnei Tusi Hmitrötr. (Iere. 15:16) Easë mina fe a sine la lapa ka cahae i Iehova, itre ka hnimi Nyidrë, me hnin la itre wathebo i Nyidrë, me ihnimikeu. (Sal. 106:4, 5) Easa madrin ke, atre hi së laka, troa tingeting me lolo la mele së elany. Easenyi hë matre tro Iehova a apatrene la itre atr ka ngazo. Tro la Baselaia i Nyidrëti a aparadraisone la ihnadro. Ketre, easa mejiune la ijine troa amelene hmaca la itre sinee së hna hnim. (Ioane 5:28, 29) Drei la ketre manathith ka tru! Easa madrin ke, easenyi hë la ijine tro la itre ka mel e hnengödrai me e celë fen a ce atrunyi Iehova, Keme së. w20.02 13 par. 15-16

Maine hetre ewekë ka ngazo hne së hna kuca, tha tro pi kö sa juetrën. Loi e tro pe sa ietra me qaja asë koi Iehova jëne la thith. Tro ha nango tingeting la hni së me lolo la mekuthetheu së. Ngo maine easa ajane troa acatrene hmaca la aqane imelekeu së me Iehova, hetre nyine tro palakö sa kuca. Loi e tro sa kapa la ihaji. Ame lo Iehova a upi Nathana perofeta troa qaja amamane koi Dravita Joxu la ngazo i nyidrë me Batheseba, tha hnei nyidrëti kö hna wangacone maine thele kepin. Hnei Dravita pe hna wangatrehmekune laka, hnei nyidrëti hna ngazo kowe la föi Batheseba, me ngazo koi Iehova. Hnei Dravita hna kapa la ihaji qaathei Iehova, nge hnei Iehova hna nue la ngazo i nyidrë. (2 Sam. 12:10-14) Maine hne së hna tria, loi e tro sa ithanata kowe la itre trejin hnei Iehova hna acil matre troa xatua së. (Iako. 5:14, 15) Tha tro kö sa thele kepine la ngazo së. Loi e tro pe sa canga kapa la ihaji, matre canga madrin me tingeting la hni së. w20.02 24-25 par. 17-18

Ame ‘la ala treen,’ tre, angatr a nyihatrene la itre ka mejiune troa mel epine palua e celë fen. Atre hi angatr laka, Iehova la ka iëne la itre trejin hna hën, hna nyihatrene hnene la “atre Iudra,” nge angatr a madrin troa ce nyihlue i Akötresie me angatr. Eje hi laka, thatre kö së la ëjene la nöjei trejin hna iën enehila, ngo ijije hi tro la itre ka mejiune troa mel e celë fen, a ‘ce tro’ me angatr. Tune kaa? Kola sa hnene la topik së. Nge Tusi Hmitrötr a qaja la ketre atre Iudra. Ngo ame la “nyipunie” tre, kola qaja la nyimu atr. Haawe, ame la atre Iudra cili, tre, angeic a nyihatrene la gurup ne la itre hna iën asë. Ame la itre xan tha hna iëne kö, tre, angatr a ce nyihlue i Iehova memine la itre hna iën. Ngo, atre hi angatr laka, tha hna musinë angatre kö hnene la itre hna iën ke, Iesu la Joxu së.—Mat. 23:10. w20.01 26 par. 1-2

Öni Iesu ka hape, maine tro la itretre drei nyidrë a nyitipune la aqane ihnimi nyidrë, tro hë la itre atr a canga wangatrehmekune la itre nyipi Keresiano. Celë hi ka mama ngöne lo ijine la itre pane Keresiano, nge ketre tune fe enehila. Nyipiewekë tro sa cile kowe la itre jol ka sewe së troa ihnimikeu! Isa hnyinge jë ka hape: ‘Nemene la ini hnenge hna xom qa ngöne la tulu ne la itre trejin ka catre ihnimikeu, ngacama tru la itre jol?’ Nge pine laka, itre atr ka tha pexeje kö së, nango jol itre xa ijin troa amamane la ihnimi së koi itre xan. Ngo tro sa thele troa nyitipu Keriso. Hnei Iesu hna amamane la enyipiewekëne la troa thele tingeting memine la ketre trejin ka wesitr koi së. (Mat. 5:23, 24) Öni nyidrë ka hape, maine easa ajane troa amadrinë Akötresie, loi e tro sa mele tingeting me itre xan. Iehova a madrin ngöne la easa thele tingeting, me iloi memine la itre trejin. Tha tro kö Nyidrëti a kapa la hmi së, e hne së palahi hna wesitr kowe la ketre trejin, nge tha thele tingetinge pena kö së.—1 Ioane 4:20. w20.03 24 par. 1-4

Satana la “keme ne la thoi.” Qaane lo hneijine i Adramu me Eva, angeic a amenune la itre atr. (Ioane 8:44) Hnei angeic hna sili trengathoi göne la mec memine la itre ewekë ka traqa thupene la kola meci la atr. Ame la itre xaa hna majemine kuca thatraqane la itre ka mec ke, hna nyitrepene hnene la itre ini ka thoi Satana. Pine nemene matre alanyimu la itre atr hna iaöne hnei Satana? Atre hi Satana la mekuna ne la itre atr göne la mec, matre hmaloi koi angeic troa iaö angatr. Eje hi laka, pëkö ka ajane easë troa mec. Hna xupi së hnei Akötresie troa mel. (Ate cai. 3:11) Celë hi matre, hna aceitunëne la mec me ketre ithupëjia. (1 Kor. 15:26) Tha hune ju kö Satana. Mama hnyawa ha la nyipici göne la mec. Alanyimu hë la ka atre me ka qaja amamane la itre ini qa hnine la Tusi Hmitrötr, göne la mec. Nge atre fe hë angatre la mejiune thatraqane la itre ka meci hë. (Ate cai. 9:5, 10; Itre hu. 24:15) Kola akeukawane la itre hni së me xatua së hnene la itre ini cili. Tha easë hmaca kö a xou me luelue ngöne la kola meci la ketre atr. w19.04 14 par. 1; 15 par. 5-6

Iehova Akötresieti a hnime la itre hlue i Nyidrë. Qaane ekö utihë enehila, hnei Nyidrëti palahi hna amamane la ihnimi Nyidrë. Ketre, Iehova a ajane la thiina ka meköt. (Sal. 33:5) Celë hi matre, xecie hnyawa koi së laka: (1) Iehova a akötr ngöne la kola qanangazone la itre hlue i Nyidrë. (2) Nyidrëti a troa amekötine la itre ka qanangazone la nöje i Nyidrë. Ihnim la ka nyitrepene lo Wathebo hnei Akötresieti hna hamën koi angetre Isaraela, jëne Mose. Ej a ithuecatre koi së troa thiina ka meköt kowe la nöjei atr asë, tune lo itre hna wangacon. (Deu. 10:18) Kola amamane hnene la Wathebo celë laka, Iehova a hnime la itre hlue i Nyidrë. Hna nyipune la Wathebo i Mose lo 33 M.K., ngöne lo kola acile la ekalesia ne la itre pane Keresiano. Hapeu, kolo lai a hape, tha tro hë la itre Keresiano a kapa la itre manathith, qa ngöne la Wathebo hna nyitrepene hnei ihnim me thiina ka meköt? Waea! Hna acile la ketre wathebo ka hnyipixe, ene la “wathebo i Keriso.” Tha hnei Iesu kö hna e wengëne la itre wathebo kowe la itretre drei nyidrë. Hnei nyidrëti pe hna hamëne la itre hna amekötin me itre trepene meköt me itre ithuemacany, nyine tro angatr a trongën. Hna qatreng e hnine la “wathebo i Keriso,” la nöjei ini hnei nyidrëti hna hamën. w19.05 2 par. 1-3

Ajan asë hi së troa akeukawane la hni së. Ketre, atreine së fe ithuecatre kowe la itre xan. Ame la nekönatr a kei me eatr ngöne la nyën a elo ke, nyën a treij me canga nyinyape koi kaka me nenë. Thatreine kö nyidroti troa aloine la eatre i nyën, ngo ijiji nyidroti hi troa aupune la akötre i nyën. Tro nyidroti lai a pane xepi nyën, me hnyingëne la kepin matre nyën a treij, me köle la itre trenge timidra i nyën, me ithanata amenyikeny, me paseman la eatre i nyën. E cili, tha treije hë nyën nge nyëne hmaca a elo. Itre drai thupen, loi hmaca ha la eatre i nyën. Ngo ame itre xaa ijin, ngazo catre palaha la akötre ne la itre nekönatr. Ngacama hna aca angazo nyudren, maine itre macatre ne qanangazo nyudren, ngo troa hetre ethane ngöne la mele i nyudreni asë. Ngacama othe ju hë la atr ka akötrë nyudren, ngo tha celë kö la ka troa apatrene la akötre ne la nekönatr. Tro pë hë nyën a akötr utihë la nyën a tru elany. w19.05 14 par. 1-2