Nofeba

Ame enehila, alanyimu la itre atr, tune la itre ka inamacan, ka jelehmone la itre ka trongëne la itre eamo qa hnine la Tusi Hmitrötr. Ame koi angatr, maine tro sa atrune la itre xan, tro hë angatre lai a wajahuji së me iaö së. Ngo nemene la thangane ka ngazo lai kowe la itre atr? Hapeu, ka madrine kö la itre ka pi mama? Ka madrine kö la itre atrene la fami angatr, nge hetre sinee i angatre kö? Ka lolo kö la aqane imelekeu i angatr me Akötresie? Thenge la itre hne së hna öhn, inamacane i drei la ka loi, inamacane i fen maine inamacane i Akötresie? (1 Kor. 3:19) Hna aceitunëne la itre ka trongëne la inamacane i fen memine la ketre atr ka voyage, nge ka hnyingë gojeny kowe la ketre atr ka voyage fe. Eje hi, tro nyidroti lai a paatr ke, lue trenyiwa nyidro ngöne la nöj. Celë hi lai hna qaja hnei Iesu ekö göne la “inamacane” ne la itre atr. Öni nyidrë: “Itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.” (Mat. 15:14) Eje hi, tha ka ihmeku kö la inamacane i fen, memine la inamacane i Akötresie. w19.05 24-25 par. 14-16

Ame enehila, kolo pala hi a elë trootro la etrune la itre hna iën. Hapeu, tro kö sa seseu? Waea. “Atre kö Iehova la itre atr i nyidrë.” (2 Tim. 2:19) Tha ceitui Iehova kö memine la itre trejin hna iën. Thatre kö angatr la itre hnei Iehova hna iën. Ame thene la itre ka xen me ije la waina ngöne la Drai Ne Amekunën, hetre itre xan hna tha iëne kö. Ame la itre xan e angatr, tha xome hmaca kö angatr la falawa me waina. Ame itre xan, tru catre la itre jole i angatr matre angatre ha mekun laka, angatr a troa ce musi me Keriso e hnengödrai. Eje hi, thatre kö së la etrune la itre hna iën ka mele palakö. Iesu a troa acasine la itre hna iën ka mel e cailo fen asë. Tha hnei Tusi Hmitrötre kö hna qaja ka hape, ame ngöne la itre drai hnapin, ala xalaithe pe hi la itre hna iën e celë fen. (Hna ama. 12:17) Tha hna qaja fe la etrune la itre hna iën ka mel e celë fen, ngöne la kola troa nyiqane la akötr atraqatr. w20.01 29-30 par. 11-13

Hnei Iesu hna amamane la etrune la ihnimi Iehova kowe la itre nekö i Nyidrë, jëne la ceitune ne la nekön. (Luka 15:11-32) Ame ngöne la ceitune celë, ka mejiune palahi la kem troa bëeke hnene la nekö i nyidrë. Ame la angeic a bëek, kem a kepe angeice hnyawa. Maine hne së hna tria me iananyi me Iehova ngo hne së pe hna ietra, tha tro kö sa luelu laka, aja i Nyidrëti troa kepe së hmaca. Tro kö la Keme së a apatrene la itre ethane la aqane ujë i Adramu. Thupene la Adramu a tria, hnei Iehova hna iëne la 144 000 lao atr, matre troa joxu me atre huuj e hnengödrai me Iesu, Nekö i Nyidrë. Ame ngöne la fene ka hnyipixe, Iesu me itre ka ce musi me nyidrë a troa xatuane la itre atr ka drengethenge troa pexeje trootro. Thupene la itupath tixenuë, Akötresieti a troa hamë angatr la mel ka pë pun. Tro la Keme së a madrin elany ke, tiqa ha la fen hnene la itre nekö i Nyidrëti ka pexej. Drei la ketre ijine ka lolo! w20.02 6-7 par. 17-19

Loi e tro sa isa hnying, ka hape: ‘Hapeu la itre hnenge hna saze ngöne la meleng, eni kö a kuca matre troa pi mama? Eni kö a saze la nöjei mekunang me itre ewekë ka ej e kuhu hning? Hnei Iesu hna qaja la nyine troa kuca ngöne Mataio 12:43-45. Hetre ini ka tru koi së. Tha tro kö sa xometrije hi la itre mekun ka ngazo; ngo nyipiewekë mina fe tro sa nyihnane itre ej, hnene la itre mekuna qaathei Akötresie. Hapeu, ijije kö tro sa saze la itre aliene hni së me itre mekuna së? Öni Tusi Hmitrötr: “Heetrëne [jë] la thiina ka hnyipixe, hna eköth thenge la aja i Akötresie, ngöne la thiina ka nyipi meköt me lapaun.” (Efe. 4:24) Ijije hi troa saze la itre aliene hni së, ngo ame pe, tha ka hmaloi kö. Tha ene hmekuje kö la troa isi memine la itre aja ka ngazo me xometrije la itre mekun ka ngazo. Loi e tro fe sa saze me ahnyipixene “la itre aqane waiewekë së.” Celë hi matre, nyipiewekë troa saze la itre aja së me aqane ujë së. Tro fe a neëne la itre ewekë ka upi së troa kuca la itre ewekë ka ngazo. Tha tro kö aca kuca, ngo loi e tro palahi a kuca lapan. w19.06 9-10 par. 6-7

Hnei Iehova hna utipi Lota. Hnei Nyidrëti hna upe la itre angela, matre troa kötre sai Lota memine la fami angeic. Ngo tha hnei angatre kö hna canga kötr. Hnene la lue angela hna ea la wanakoime i angeic me ifënekö i angeic, memine la lue nekö i angeic jajiny. (Gen. 19:15, 16) Hnene la lue angela hna qaja koi Lota troa kötr kowe la itre wetr. Ngo tha hnei angeice kö hna canga drei Iehova, hnei angeice pe hna sipone troa kötr a tro Zoara, ketre nöj ezin. (Gen. 19:17-20) Hnei Iehova hna xomihni aqeany me drei Lota me nue angeic troa tro cili e Zoara. Ame hë e thupen, hnei Lota hna xou me tro qa Zoara me elë hune la wetr. Angeice hmaca a kötr kowe lo götrane hnei Iehova hna qaja koi angeic ngöne lo xötrei. (Gen. 19:30) Eje hi, easa haine la aqane xomihni aqeanyi Iehova! Maine jë, troa tria la aqane axecië mekun hnene la ketre sinee së ka nyihlue i Iehova, tui Lota ekö. Nge tro hë lai a hetre thangane koi angeic. Nemene la nyine tro sa kuca? Maine jë, easa pi qaja koi angeic, ka hape: ‘Eö kö a xeni pune la aqane axecië mekune i eö.’ (Gal. 6:7) Ngo tha aqane tro kö së lai a ujë. Loi e tro sa xatua angeic tune lo aqane xatua Lota ekö hnei Iehova. w19.06 20 par. 3; 21 par. 4-5

Ame la itre ka wathebone la hmi së ke, angatr a thele troa axouenyi së, matre tha tro hmaca kö sa nyihlue i Iehova. Angatre fe a silitrengathoi së, me iutisai, me upe la polis troa ithel e hnine la itre hnalapa së, me akalabusi së. Aja i angatr troa axouenyi së. Ngo maine tro sa xoue angatr me xouene la itre hnei angatr hna troa kuca, tro hë së lai a nanazij me nuetriji Iehova. Tha aja së kö troa tune la itre atr hna qaja ngöne Levitiko 26:36, 37. Tha tro pi kö sa nue la xoue atr troa ananazijë së me upi së troa nuetrije la huliwa i Iehova. Tro pe sa catre mejiune koi Nyidrë me triji xou. (Is. 28:16) Loi e tro sa thithi koi Iehova. Tro kö Nyidrëti a xatua së me ceme easë. Haawe, xecie hnyawa koi së laka, pëkö musi ka tru ka atreine troa ajolë së troa nyihlue i Iehova. Ame ngöne la ijine icilekeu, kola acatrene la aja së troa nyihlue i Iehova. Pëkö xou the së. w19.07 9-10 par. 6-7

Ngacama pëkö ka ini tusi me easë, ngo loi e tro palahi sa catre cainöj. Hnei Iesu hna aceitunëne la itre ka cainöj memine la itre ka nyi ie. Ame la itre ka nyi ie ke, itre hawa ne angatr a thiny, matre troa hetre ie. Ame itre xaa ijin, angatr a nyi ie ngöne la jidri ka pexej, maine ilë pena e sine hmakany. Ketre, nanyi catre la hnei angatr hna nyi ie. (Luka 5:5) Ka ceitu hi memine la itre Keresiano. Angatr a catre cainöj, e nöjei hawa, e nöjei drai me ngöne la nöjei götran. Pine nemen? Pine laka, angatr a ajane troa cainöj kowe la nöjei atr. Hetre thangane catr la aqane cainöje i angatr ke, angatr a iöhnyi memine la itre atr ka kapa la maca. Hapeu, easë kö a thele troa cainöj ngöne la itre hawa me götran laka, tro sa iöhnyi memine la itre atr? Pine nemene matre troa xomihni aqeany, ngöne la easa inine la itre atr? Pine laka, easa xatuane la itre ka ini tus, troa hniin la itre ini qa hnine la Tusi Hmitrötr. Easë fe a xatua angatr troa atrepengöi Iehova hnyawa me hnimi Nyidrë, Atrekë Ewekëne la Tusi Hmitrötr. w19.07 18-19 par. 14-15

Tune kaa la aqane tro sa nyitipu Paulo me “thëthëhmine la itre ewekë [hna amë pe] e hutrö”? Maine jë, hace me jol koi së pine la itre ewekë hne së hna kuca ekö. Ngo loi e tro sa inine me lapa mekune la mel hna huujën hnei Keriso. Maine tro sa inine la Tusi Hmitrötr me lapa mekune la itre hne së hna e, me catre thith thatraqane lai, tha tro hmaca kö sa hnehengazo menu pine la itre ngazo hna kuca ekö. Troa xecie koi së laka, ase hë Iehova köletrije la itre ngazo së ekö. Hanawang la ketre ini hna xom qaathei Paulo. Maine jë, hne së hna nue la ketre huliwa hna nyithupene hnyawa, matre tro pena a catre huliwa koi Iehova. Ngo hapeu, easë palakö a mekun la itre ewekë hne së hna troa hetreny, e hne së palahi hna huliwa i maseta? (Num. 11:4-6; Ate cai. 7:10) Ketre, ame “la itre ewekë [hna amë pe] e hutrö,” tre, kolo fe a qaja la itre hne së hna kuca ngöne la huliwa i Iehova, me itre jol hne së hna cile kow ekö. Ngo ame la easa lapa mekun la aqane xatua së ekö hnei Iehova, tre, kola acatrene la aqane imelekeu së me Nyidrë. Celë hi matre, tru palahi la aja së troa cile catr, me kuca la huliwa i Iehova.—1 Kor. 15:58. w19.08 3 par. 5-6

Ijije hi tro sa thithi koi Akötresie e nöjei ijin, ngacama easë ngöne la ketre götran. Tha hace kö koi Nyidrë troa dreng la itre thith; aja i Nyidrëti pe troa dreng la itre thithi së. Ame la easa öhn laka, Iehova a dreng la itre thithi së, easë a easenyi catr koi Nyidrë. Önine la ketre atre cinyihan la Salamo: “Ini a hni Iehova qa ngöne la hnei nyidëti hna [drenge] la aqane ewekëng.” (Sal. 116:1) Iehova a dreng me sa la itre thithi së. Öni Ioane aposetolo: “E hetre ewekë hne së hna sipon thenge la aja i [Akötresie], tro kö nyidrëti a drei së.” (1 Ioane 5:14, 15) Eje hi, thatre kö së la aqane tro Iehova a sa la itre thithi së. Atre hi Nyidrëti la ka loi koi së. Celë hi matre ame itre xaa ijin, Nyidrëti a thipëne la itre sipo së, maine upi së pena troa pane treqen. (2 Kor. 12:7-9) Eje hi, Iehova a thupë së. Nyidrëti a kuca la itre nyine tro la itre kem a kuca. (1 Tim. 5:8) Nyidrëti a hamëne la ka nyipiewekë kowe la mele ne la itre nekö i Nyidrë. Xele kö Nyidrëti tro sa hnehengazon la nyine xen, me iheetr, maine uma. (Mat. 6:32, 33; 7:11) Pine laka Iehova la Keme së ka ihnim, matre Nyidrëti a thupëne tro sa hetrenyi la ka ijij göi elany. w20.02 5 par. 10-12

Tha itre hna iën asë hi la ka sine la “hlue ka nyipici me ka inamacan.” (Mat. 24:45-47) Ame enehila, Iehova me Iesu a upe la itre xaa trejin troa hamë xen, maine inine la ka alanyim. Ketre tune fe ngöne la hneijine la itre pane Keresiano, hnene la itre trejin hna iën, hna cinyihane la Itre Hna Cinyihan Qene Geres. Ala xalaithe hi la itre hna iën ka “hamë xeni ngöne la nyipi ijin” kowe la nöje i Akötresieti enehila. Hnei Iehova hna amekötin ka hape, alanyimu kö la itre hlue i Nyidrëti ka troa mel epine palua e celë fen. Nge ala xalaithe pe hi la itre ka troa mel e hnengödrai me ce musi me Iesu. Iehova a amanathithine la nöjei hlue i Nyidrë, itre hna nyihatren hnene lo “atre Iudra” memine lo itre hna nyihatren hnene la ka ‘ala treen.’ Ketre, Nyidrëti a ajane tro asë hi angatr a trongëne la itre wathebo i Nyidrë me mele nyipici. (Zaka. 8:23) Nyipiewekë tro asë hi sa hetre hni ne ipië, me ce nyihlue i Nyidrë me caas. Loi e tro fe sa thele tingeting e hnine la ekalesia. Easenyi hë la pun, matre catre pi së nyihlue i Iehova me xötrethenge Keriso, tune la “ca hna axö mamoe.” w20.01 31 par. 15-16

Tha tro kö sa musinëne la itre fami së troa kapa la nyipici, matre troa hane mel epine palua. Ngo ijije hi tro sa ithuecatre koi angatr troa inine me lapa mekune la hna qaja hnei Tusi Hmitrötr. (2 Tim. 3:14, 15) Loi e troa amamai tulu ka loi. Nyipici laka, ame la itre atrene la fami së ke, angatr a haine la itre hne së hna kuca, hune la itre hne së hna qaja. Loi e tro sa catre xatuane la itre fami së. Iehova la tulu ka sisitria. Hnei Nyidrëti hna aijijëne la itre atr troa kapa la nyipici, me hetrenyi la mel. (Iere. 44:4) Hnei Paulo aposetolo fe hna ithuecatre koi Timoteo troa xatuane la itre xan. Pine nemen? Pine laka, jëne mele i angeice hi lai me itre ka drei angeic. (1 Tim. 4:16) Easa hnime la itre fami së, matre easa ajane tro angatr a hane atre la nyipici qa hnine la itre trengewekë i Akötresie. w19.08 14 par. 2; 16-17 par. 8-9

Tha tro kö sa thëthëhmine laka, kola haji së ke, hne së hna tria. Ngo ame itre xaa ijin, canga tro hi sa nuetrije la eamo hna hamën. Maine pena, tro sa xöjetrije la atr ka eamo së me qaja angazone la aqane hamën angeic la eamo. Maine tro sa hni ka ipië, tro ha lolo la aqane ujë së. Ame la atr ka hni ka ipië, tre, hetre hni ne ole i angeic kowe la itre eamo hna hamën. Hane hi la ketre ceitun. Pane mekune jë laka, easa ithanata memine la itre trejin ngöne la hna icasikeu. Thupene lai, ketre trejin a qaja ka hape, hetre mutine xen ka fedr ngöne la itre nyö së. Ngacama easa hmahma, ngo easa olene kowe lai trejin. Maine ju, tro fe la itre xaa trejin a canga qaja koi easë. Ketre tune fe, loi e tro sa olen me hetre ipië, ngöne la kola hamë eamo hnene la ketre trejin. Loi e tro sa goeë angeic ceitu me ketre sinee së, ngo tha ketre ithupëjia kö me easë.—Ite edomë 27:6; Gal. 4:16. w19.09 5 par. 11-12

Hnei Iehova hna hamë hnëqa kowe la itre thin, troa thupëne la itre nekönatr. Nyipici laka, hetre eloine la hna kuca me qaja hnei thin. (Ite edomë 22:6) Hane hi la itre ini hna troa xom hnene la itre thin qa ngöne la tulu i Maria, thine i Iesu. Atrepengöne hnyawa hi Maria la Itre Hna Cinyihan. Hnei eahlo palahi hna metrötrë Iehova me acatrene la aqane imelekeu i nyidro. Aja i Maria troa kuca hi la aja i Iehova, ngacama kola saze la mele i eahlo. (Luka 1:35-38, 46-55) Nemene la itre ini hna xom hnene la itre thin qa ngöne la tulu i Maria? Ame la hnapan, nyipiewekë troa inine la Tusi Hmitrötr me catre thith, matre acatrene la aqane imelekeu me Iehova. Ame la hnaaluen, loi e troa canga saze aqane mel, matre kuca la aja i Iehova. w19.09 18 par. 17-19

Hnei Akötresieti hna aijijë Ioane aposetolo troa meköl goeëne la drai elany. Hnei Ioane hna öhne la ketre angela kola upe la foa lao angela troa cilaxome la foa lao enyi ka catr ne la akötr atraqatr, utihë pexeje hë la gurup ne la itre hlu. (Hna ama. 7:1-3) Kola qaja lo ala 144 000 ka troa ce musi me Iesu e hnengödrai. (Luka 12:32; Hna ama. 7:4) Thupene lai, hnei Ioane hna öhne la ketre gurup. Hnei nyidrëti hna hain ke, alanyimu catr angatr. Nemene la hnei nyidrëti hna öhn? “Ala nyimu atraqatr, lo hna thatreine e, nge angatr a isa xulu qa ngöne la nöjei nöj, me nöjei tribu, me nöjei hane ngönetrei, me nöjei qene hlapa. Angatr a cile qëmekene la theron me qëmekene la Neköi Mamoe.” (Hna ama. 7:9-14) Drei la etrune la madrine i Ioane ngöne lo nyidrëti a öhne laka, troa elë la etrune la itre hlue i Akötresieti elany! Eje hi laka, hna acatrene la lapaune i Ioane hnene la hnei nyidrëti hna meköle goeën. Nge kolo fe a acatrene la lapaune së ke, easa melëne la itre drai ne la pun. Ame enehila, kola traqa koi itre milio lao atr ka hane nyihlue i Iehova, me mejiune troa amele angatr ngöne la akötr atraqatr, me mel epine palua e celë fen. Qaane ekö, Iehova a amamane la pengöne la ka alanyimu atraqatr. w19.09 26 par. 2-3

Pane mekune jë laka, itre musi ne fen a qaja ka hape, “tingetinge hë nge pë hë hna mecin.” Angatr a amenu së me hape, angatre hi la ka troa apatrene la nöjei jol. Ngo thatreine kö angatr troa saze la ewekë ka troa traqa e thupen. Troa lep apatrenyi “Babulona Atraqatr”! (Hna ama. 17:5, 15-18) “Tro Akötresie a amë hnine la itre hni angatr la aja troa sajuëne la mekuna i nyidrë.” Nemene la mekuna i Nyidrë? Troa lep apatrene la nöjei hmi ka thoi asë, tune la itre hmi ka qaja ka hape, itre hmi Keresiano. Akötresieti a troa amë la mekuna i Nyidrë e kuhu hni ne “la treene lao jian” ne la “öni ka ses ka madra palulu.” Ame la treene lao jian, tre, kola nyihatrene la nöjei mus ka isigöline la “öni ka ses,” ene lo Nations Unies. (Hna ama. 17:3, 11-13; 18:8) Ame la itre musi ne fen a lep apatrene la itre hmi ka thoi, tre, kolo lai a nyiqane la akötr atraqatr. Ketre jol ka tru kowe la nöjei atr asë! w19.10 14 par. 1, 3

Ame ngöne lo hneijine la itre pane Keresiano, hnei Dioterefe hna zalu kowe la itre ka elemekene la ekalesia. Pine laka, angeic a ajane troa “lapane la göhnë ka sisitria,” matre hnei angeic hna qaja angazo Ioane aposetolo me itre xaa trejin. (3 Ioane 10) Eje hi laka, tha tro kö sa nyitipu Dioterefe. Loi e tro sa thupën, wanga tro sa zalu kowe la ketre trejin ka hetre hnëqa. Tha tro pi kö sa mekun ka hape, tha ijiji angeice kö la hnëqa cili, ngo easë pe. Hna aceitunëne la troa meciu ewekë memine la ketre feja poizin. Ame la kola cia e kuhu hni së, jole hë troa fejetrij. Ame la atr ka meciun ke, hetrenyi thei angeic la itre thiina ka ngazo, tune la izalukeu, me pi tru, me pi mama. Ketre, kola sewe angeic troa eënyine la itre thiina ka lolo, tune la ihnim, utipin, me loi hni. Loi e tro sa canga xometrije la meciun me izalukeu qa kuhu hni së. w20.02 15 par. 6-7

Paulo aposetolo a qaja ka hape, hetre jol hnei nyidrëti hna cile kow, nge ka akötrë nyidrë. Öni nyidrë ka hape, ame la jol cili ke, kösë ‘ketre angela i Satana ka xe nyidrëti lapa’ (maine “ka lep,” ftn.) Tha Satana kö me itre dremoni la qaane la itre akötre i Paulo, ene lo ka ithinyi ngöne la ngönetrei nyidrë. Ngo angatr a nyixane la akötre i nyidrë me huje catrëne la ka ithiny. Nemene la hna kuca hnei Paulo? Ame ngöne lo xötrei, hnei Paulo hna sipo Iehova troa xometrije la “ka ithiny.” Öni nyidrë: “Akönia sipone ielene ni koi [Iehova] Joxu . . . troa xometrije qaatheng.” Ngacama hnei Paulo hna sipone ielen, ngo tha hna apatrene kö la ka ithiny. Hapeu, kolo kö lai a hape, tha hnei Iehova kö hna dreng la itre thithi Paulo? Waea, hnei Nyidrëti pe hna sa la thith. Nyipici laka, tha hnei Iehova kö hna xometrije la akötr, ngo hnei Nyidrëti pe hna hamëne la trengecatr, matre tro Paulo a atreine xomihnin. Öni Iehova: “Kola pexeje la meneng ngöne la kucakuca.” (2 Kor. 12:8, 9) Hnene la ixatua i Iehova matre madrin me tingeting la mele i Paulo!—Fil. 4:4-7. w19.11 9 par. 4-5

Iehova hi la nyine tro sa atrun ke, Nyidrëti la ka xupi së me hamë mele koi së. (Hna ama. 4:11) Ngo loi e tro sa hmek. Easa hnim me metrötrë Iehova, ngo ijije hi troa thapa la ihnimi cili hnene la itre xaa ewekë, me sewe së troa atrunyi Nyidrë. Öni Tusi Hmitrötr ka hape, maine ka jui la ihnimi së koi Iehova, tro hë sa nyihlue i Nyidrëti hmekuje hi ngöne la mele së. Tha tro hë sa nue la ketre atr maine ketre ewekë pena, troa xome la göhne i Iehova e kuhu hni së. (Eso. 34:14) Tha easë kö a hnime menu Iehova. Easa hnimi Nyidrë ke, hnene la itre ewekë hne së hna atre göi Nyidrë, tune la itre thiina i Nyidrë. Atre hi së la itre ewekë hna ajan me hna sisin hnei Iehova, nge easa nyitipu Nyidrë. Ketre, easa trotrohnin me sajuëne la aja i Nyidrëti kowe la itre atr. Tru la hni ne ole së ke, Iehova a aijijë së troa nyisinee i Nyidrë. (Sal. 25:14) Ame asë hi la itre ewekë hne së hna atre göne la Atre Xupi së, tre, kola easenyi së koi Nyidrë.—Iako. 4:8. w19.10 26 par. 1-3

Ame enehila, nyimutre la itre jol hna cile kow hnene la itre trejin. Alanyimu la itre hna lepe hnei hulö me itre ka mel ngöne la itre nöj gaa hetre isi. Ijije hi tro sa hë angatr troa ce lapa me easë. Itre xan a xatua angatr göi manie. Nge ijiji së asë hi troa sipo Iehova troa xatua angatr. Ame la kola kucakuca hnene la ketre trejin, maine jë, thatre kö së la nyine troa qaja maine kuca. Ngo ijiji së asë hi troa hane ixatua. Maine jë, tro sa nango ce lapa me angeic me drei angeice hnyawa. Nge loi e tro fe sa hamë angeic la ketre xötr ka ithuecatr. (Is. 50:4) Ame la ka sisitria, tre, tro sa xatuane la itre sinee së ngöne la angatr a aja ixatua. Loi e tro sa canga acatrene la aqane imelekeu së memine la itre trejin. Troa cile hut la aqane imelekeu së me angatr uti hë la pune la fene celë, me epine palua. w19.11 7 par. 18-19

Pëkö ka imusinë troa tro fë la huuje cili. Ketre atr a kuca la huuj qa kuhu hni ke, tru la ihnimi angeic koi Iehova. Tro la atre tro fë la huuj me fami angeic me itretre huuj, a öni la mitr hna huujën. Ngo hetre itre götranene kö la öni laka, thatraqai Iehova hmekuje hi. Nemen? Ame koi Iehova, ka nyipiewekë la giris ne la öni. Nge nyipiewekë mina fe la itre xaa götranene la öni, tune la wenethuluhmath. (Lev. 3:6, 12, 14-16) Madrine catre Iehova ngöne la kola huujëne la itre götrane cili, hnene la ketre atre ne Isaraela. Angeice hi a amamane la aja i angeic troa hamëne la ka sisitria koi Iehova. Ketre tune fe, tru catre la ihnimi Iesu koi Iehova, matre hnei Iesu hna hamëne la ka sisitria koi Nyidrë, me kuca asë la hna atreine matre troa nyihlue i Nyidrë. (Ioane 14:31) Madrine catre Iesu troa kuca la aja i Iehova. (Sal. 40:8) Drei la madrine i Iehova ngöne la Iesu a nue la mele i nyidrëti ka pexej troa nyihlue i Iehova! w19.11 22-23 par. 9-10

Tusi Hmitrötr a qaja ka hape, hnei Akötresieti hna umuthe la huliwa ne xupi ewekë e celë fen, thupene la hnaasikisine “drai.” (Gen. 2:2) Ngo aja i Iehova troa huliwa. Hnei Nyidrëti palahi “hna huliwa uti hë enehila.” (Ioane 5:17) Ame la troa metrötrëne la Sabath e nöjei wiik, tre, ceitune hi memine la Iehova a huliwa sikisi lao “drai.” Nge Nyidrëti a mano ngöne la hnaasevenene “drai.” Celë hi matre, hnei Iehova hna qaja koi angetre Isaraela troa mano ngöne la hnaasevenene drai. Ketre drai ka sisitria la Sabath koi Iehova me kowe la nöje Isaraela. (Eso. 31:12-14) Hna wathebone kowe la itre nekönatr me itre hlue me itre öni troa huliwa. (Eso. 20:10) Kola aijijën ekö la nöje Isaraela, troa pane wangatrune la itre huliwa i Iehova. Ame ngöne la hneijine i Iesu, hnene la itre hene ne hmi hna acile menune la itre wathebo, göne la aqane troa metrötrëne la Sabath. Hnei angatr hna qaja ka hape, tha tro pi kö a hule la itre wene qitr e Sabath, maine nyinyine pena la meci ne la atr ka wezipo. (Mar. 2:23-27; 3:2-5) Ngo tha celë kö la mekuna i Iehova. Celë hi matre, hnei Iesu hna qaja amamane la nyipici kowe la itre ka ajane troa drei nyidrë. w19.12 3-4 par. 8-9

Maine tro sa thele troa atrepengöne hnyawa la itre thiina i Iehova, tro hë sa atreine nyitipu Nyidrë. Atre hnyawa hi Dravita ekö la pengöi Iehova, Keme i nyidrëti e hnengödrai. Celë hi matre, hnei Dravita hna nyitipu Iehova ngöne la nyidrëti a nyihnyawane la mele ne la itre xan. Catrecatre la aqane imelekeu i Dravita me Iehova. Celë hi matre, nyidrëti hi la ketre Joxu hna hnime hnei angetre Isaraela. Nge hnei Iehova hna upe la itre xaa joxu troa xötrethenge la tulu i Dravita. (1 Ite jo. 15:11; 2 Ite jo. 14:1-3) Nemene la ini koi së? Loi e tro sa “nyitipu Akötresie.” Ame la easa eënyine la itre thiina i Nyidrë, easa amamane laka, easë la itre nekö i Akötresie. (Efe. 4:24) Loi e tro palakö sa thele troa atre Iehova hnyawa. (Ate cai. 3:11) Ame la ka nyipiewekë ke, tha ene hmekuje kö la hne së hna atre göi Iehova, ngo ene la hne së hna kuca matre troa atrepengöi Nyidrëti hnyawa. Maine tro sa trongëne la itre hne së hna inin, me thele troa nyitipu Iehova, Keme së ka tru ihnimin, tro hë Nyidrëti a easenyi catre koi së. (Iako. 4:8) Jëne la itre trengewekë i Nyidrë, Iehova a qaja kowe la itre ka thele Nyidrëti ka hape, tha tro jë kö Nyidrëti a nuetriji angatr. w19.12 20 par. 20; 21 par. 21, 23

Ka hnime Iakobo la itre nekö i nyidrë, ngo Iosefa la nekö hnimina i nyidrë, ka 17 lao macatre. Nemene la hna kuca hnene la itre trejin me Iosefa? Hnei angatr hna zalu koi Iosefa me methinë angeic, ngacama pëkö hnei angeice hna kuca. Hnei angatr hna salemë Iosefa matre troa nyi hlu. Hnei angatre fe hna thoi kowe la keme i angatr ka hape, hna humuthi angeic hnene la ketre öni ka ses. Hnene la hnei angatr hna zalu, matre pëhë tingeting e hnine la fami angatr, nge hna akötrëne la keme i angatr. (Gen. 37:3, 4, 27-34) Ame ngöne la Tusi Hmitrötr, “huliwa ne ngönetrei” la troa piin me meciu ewekë. Tha tro kö a sine la Baselaia i Akötresie hnene la atre xome la thiina cili. (Gal. 5:19-21) Ame la meciun ke, celë hi ka aciane la iwesitrë me elëhni. Kola amamane hnene la tulu ne la itre trejin me Iosefa laka, ka hetre ethan e tro sa piin la ifekë ewekën. Kola thë la aqane imelekeu ne la fami nge pëhë tingeting. Tha aja së kö troa hane tui angatr. Ngo ame pe, loi e tro sa thupën la hni së ka iaö ke, itre atr ka tha pexeje kö së. Ame itre xaa ijin, tro së lai a piin la itre ewekë i ketre. w20.02 14 par. 1-3

Hnei Iehova hna xome la uati hmitrötr qaathei Mose, matre tro pena a hamëne kowe la itre qatr ne Isaraela, ka cil ezine la itat ne icasikeu. Thupene lai, hnei Mose hna dreng laka, hnene la lue qatr hna kapa la uati hmitrötr ngacama tha ce nyidroti kö me angatr. Hnei nyidroti fe hna ujë tune la itre perofeta. Nemene la hnei Mose hna kuca ngöne lo Iosua a upi nyidrë troa haji nyidro? Tha hnei Mose kö hna zalu ke, hnei Iehova hna wangatrunyi nyidro. Hnei nyidrëti pe hna madrin koi nyidro. (Num. 11:24-29) Nemene la hna ini së hnene la tulu i Mose? Maine jë, epuni la ketre qatre thup. Hapeu, hna hane fe kö sipo epun troa xatuane la ketre trejin, matre troa cilëne la hnëqa hnei epuni hna ajan? Maine jë, tro epuni a tui Mose me hetre hni ne ipië, tha tro kö epuni a mekun laka, kola wangaconyi epun. Tro pe epuni a madrine troa xatua angeic troa xome hnyawa la hnëqa cili. w20.02 15 par. 9; 17 par. 10-11

Ame la easa wezipo, kola hetre ethane kowe la itre aliene hni së. Ketre, easa hmahma pine laka, itre xan a öhne la jol ka eje the së nge easa aja ixatua. Ame itre xan, thatre kö angatr laka, easa wezipo. Ngo easa hmahma ke, thatreine hë së kuca la itre xaa ewekë. Ame ngöne la itre ijine jol, Iehova a ithuecatre koi së. Tune kaa? Ame ngöne la Tusi Hmitrötr, Iehova a amamane laka, Nyidrëti a wangatrunyi së ngacama easa wezipo. (Sal. 31:19; 41:3) Nge jëne la itre trengewekë i Nyidrë, tro hë Iehova a xatua së troa thipetrij la itre mekun ka ngazo. Tha tro kö sa thëthëhmine laka, trotrohnine hi Iehova la jole së. Sipone jë koi Nyidrë troa xatua së troa saze la itre mekuna së me madrin. Thele jë e hnine la Tusi Hmitrötr la itre mekune i Iehova ka ithuecatr. Lapa mekune jë la itre xötr ka amamane la etrune la ihnimi Iehova kowe la itre hlue i Nyidrë. Tro hë sa öhn laka, Iehova a hnime la itre ka mele nyipici.—Sal. 84:11. w20.01 15-16 par. 9-10; 17 par. 12

Hnei angetre Filisiti hna zalu pi Isaka ke, ka trenamo angeic. (Gen. 26:12-14) Hnei angatre hna thinge la itre hnaope ne tim thatraqane la itre mamoe i Isaka. (Gen. 26:15, 16, 27) Hetre itre atr enehila ka tui angetre Filisiti. Angatr a zalu pine la itre mo ne la itre xan. Tha angatre hmekuje kö a meciune la ifekë ewekën, ngo angatre fe a ajane troa thapa itre ej. Hnene fe la itre he ne hmi Iudra hna zalu koi Iesu, ke, alanyimu la itre atr ka hnimi Iesu. (Mat. 7:28, 29) Iesu la qeneqaja i Akötresie, nge hnei nyidrëti hna inine la nyipici koi itre xan. Ngo hnene la itre hene ne hmi hna silitrengathoi Iesu matre troa adrone la ëje i nyidrë. (Mar. 15:10; Ioane 11:47, 48; 12:12, 13, 19) Nemene la ini koi së? Tha tro pi kö sa zalu kowe la ketre trejin hna hnim e hnine la ekalesia. Loi e tro pe sa nyitipune la itre thiina ka lolo i angeic.—1 Kor. 11:1. w20.02 15 par. 4-5

Pane mekune jë laka, easë e Peresi nge 2 500 hë lao macatre enehila nge easa ajane troa ithanata koi joxu. Ngo qëmekene troa ithanata me nyidrë, loi e troa pane sipon wanga troa humuthi së! Easa madrin ke, tha ceitui Iehova kö memine la joxu ne Peresi! Ka draië catre kö Iehova hune la itre atre mus. Ngo, Nyidrëti a ajane tro sa ithanata koi Nyidrë o drai. Nyipici laka, Iehova la Atre Xupi Së, Akötresie Ka Tru Trene Men, nge Joxu Ka Sisitria. Ngo aja i Nyidrëti tro sa hë Nyidrë ka hape, “Kaka.” (Mat. 6:9) Easa madrin ke, Iehova a ajane tro sa easenyi catre koi Nyidrë! Meköti tro sa hë Iehova ka hape, “Kaka” ke, Nyidrëti la Qeqe ne mel. (Sal. 36:9) Iehova la Keme së, matre nyipiewekë tro sa drengethenge Nyidrë. Nyimutre la itre manathith hne së hna troa kapa qa ngön. (Heb. 12:9) Kola qaja la mel ka pë pun e hnengödrai maine e celë fen. w20.02 2 par. 1-3

Easë asë hi a ajane troa xatuane la hnainin troa kökötr. (Efe. 4:13) Ame la ketre atr a nyiqane ini tusi me easë, maine jë angeic a mekun la itre manathith. Ngo ame hë la kola kökötr la ihnimi angeic koi Iehova, angeice fe hë a mekun la aqane troa xatuane la itre xan, tune fe la itre trejin ne la ekalesia. (Mat. 22:37-39) Maine ijij, loi e troa qaja kowe la hnainin la enyipiewekëne troa sajuëne la huliwa ne la Baselaia, me kuië ahnahna. Amamane jë kowe la hnainin la nyine troa kuca e traqa jë la ketre jol. Pane mekune jë laka, tro la ketre atr ka ini tusi me easë a qaja ka hape, hna akötrë angeic hnene la ketre trejin ne la ekalesia. E cili, tha tro kö sa ce xöle me ketre. Loi e tro pe sa amamane koi angeic la hna qaja hnei Tusi Hmitrötr. Maine jë tro angeic a canga nue la ngazo ne lai trejin. Ngo maine thatreine kö angeic, loi e tro sa ithuecatre koi angeic troa ithanata amenyikeny kowe la trejin, me thele troa ‘mele la trejin.’ (Mat. 18:15) Loi e tro fe sa xatuane la hnainin troa hnëkëne la nyine troa qaja. w20.01 5-6 par. 14-15

Easa amamane la hni ne ole së koi Iehova, ngöne la easa thith me qaja la itre ngazo së, me kapa la ihaji, me thel matre tha tro kö a kei kowe la ngazo hna kuca ekö. E cili, troa tingeting la hni së. Easa madrin troa atre laka, “eashenyi Iehova koi angete thë fë hni; nge kola amele ange aköte u”! (Sal. 34:18) Easa melëne la pune la fene celë, matre tro palakö sa hnehengazo. Ngo loi e tro sa canga thith me sipo ixatua koi Iehova. Loi e tro fe sa catre ini Tusi Hmitrötr, me xomi ini qa ngöne la tulu i Hana me Paulo aposetolo me Dravita Joxu. Ketre, loi e tro sa sipo Iehova troa xatua së troa öhn la kepin matre easa hnehengazo. (Sal. 139:23) Tro sa nue Iehova troa xatua së ngöne la itre jol hne së hna thatreine nyinyin. E cili, tro hë sa mekun tune lo atre cinyihane la Salamo, ka hape: “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei [Akötresie].”—Sal. 94:19. w20.02 24 par. 17; 25 par. 20-21

Jëne la uati hmitrötr, hnei Iehova hna amë la itre mekuna i Nyidrë ngöne la he ne la itre ka cinyihane la Tusi Hmitrötr. Ame la easa e me lapa mekune la hna qaja hnei Tusi Hmitrötr, kola lapa ngöne la he së me ketr la hni së hnene la itre hna amekötin hnei Iehova. E cili, easa saze la aqane mel matre troa amadrinë Iehova. (Heb. 4:12) Ngo maine easa ajane troa kepe thangane qaathene la uati hmitrötr, loi e tro sa xomi ijin troa inine la Tusi Hmitrötr me lapa mekun. Tro hë lai a hetre thangane ngöne la aqane ithanata së me itre huliwa së. Ketre, loi e tro sa ce atrunyi Akötresie. (Sal. 22:22) Easa kapa la uati hmitrötr ngöne la hna icasikeu. (Hna ama. 2:29) Ame la easa icasikeu memine la itre trejin, easa sipo uati hmitrötr ngöne la thith, me thinge la itre nyima hna nyitrepen hnei Tusi Hmitrötr, nge easa kepe ini qaathene la itre trejin hna acile hnei uati hmitrötr. Ngo maine easa ajane troa kepe thangane qaathene la uati hmitrötr, loi tro sa hnëkëne hnyawa la itre icasikeu me hamë mekun. w19.11 11 par. 13-14