Diseba

Maine tha xomehnöthe kö së la thineme së, tro ha hetre ethan. Maine jë, easa iöhnyi memine la ketre trejin ka mel ngöne la ketre nöj hna wathebon. Hapeu, easë kö a pi atre la pengöne la huliwa ne cainöj e cili? Easa hnime la itre trejin, matre easa ajane troa atre la aqane mele i angatr, me thithi sai angatr. Ngo loi e tro sa xomehnöthe la thineme së me lapa thaup. Maine tro sa iele angatr troa qaja la itre ithuemacany tha nyine tro kö a qaja, tha easë kö lai a hnimi angatr memine la itre trejin ka mejiune koi angatr. Tha ajane kö së troa traqa la itre jol koi angatr me kowe la itre xaa trejin, me kowe fe la huliwa i Iehova. Ketre tui angatre fe, tha tro kö angatr a qaja la aqane trongene la huliwa i Akötresie ngöne la nöje i angatr. w20.03 21 par. 11-12

Tha aja i Akötresieti kö ekö, tro la itre atr a mec. Maine aja i Adramu me Eva troa mel epine palua, nyipiewekë tro nyidroti a drengethenge la hna amekötin hnei Iehova, ka hape: “The tro kö eö a xeni qa ngöne la sinöe ne ate hmekune la loi me ngazo; ke tro eö a meci ngöne la drai ne xeni eö qa ngön’ ej.” (Gen. 2:16, 17) Ngo hnei Satana hna iaö nyidro, matre ngazo la pune koi nyidro. Hnei angeic hna iaö Eva jëne la un, me qaja la aliene la topik ne la drai celë. Hnei Eva hna mejiune koi Satana. Hnei angeice hna xeni la wene sinöe me hamën koi Adramu. (Gen. 3:6) Ame hë la pun, ngazo me meci kowe la itre atr. (Rom. 5:12) Meci hë Adramu me Eva, tune lo hna qaja hnei Akötresie. Ngo tha celë hmekuje kö la trengathoi hna qaja hnei Satana göne la mec. Öni angeic mina fe ka hape, e troa meci la atr, ngo mele pe kö la u. Kola amenune la itre atr, hnene la itre trengathoi hna sil göne la mec.—1 Tim. 4:1. w19.04 14-15 par. 3-4

Thatreine palakö la itre nekönatr troa sipu axecië mekun, me wangatrehmekune la ngazo me neën. Celë hi matre, tha jole kö kowe la itre ka iangazo troa iaöne me angazone la itre nekönatr. Angatr a silitrengathoi kowe la itre nekönatr. Öni angatr, zöi nyudren la kola angazo nyudren, nge pë fe kö ka troa drei nyudren e traqa ju nyudreni ithanata. Ketre öni angatr ka hape, ketre hatrene ihnim la troa ce meköl, matre tha nyipi ngazo kö. Hnene la itre trengathoi cili, matre thatreine hë nyudreni atre la ka loi me ka ngazo. Tru jë hi nyudreni a mekun ka hape, pëkö eloine thei nyudren, nge pëkö ka hnim me utipi nyudren. Haawe, trotrohnine hë së la kepin, matre itre macatre ne akötre me hleuhleu la hni ne la itre hna angazon. Easa melëne la itre drai ne la pun. Ame itre xan, “tha hnimi atr” kö, nge “tro la itre atre ka ngazo me ka iaö a ngazo catre hmaca kö.”—2 Tim. 3:1-5, 13. w19.05 15 par. 7-8

Nemene la aqane hamë ini Iesu? Hnei Iesu hna inine la itre atr jëne la hna ithanata. Ka hetre thangane catr la itre hnei nyidrëti hna qaja ke, nyidrëti a qaja la nyipici göi Akötresie, me amamane la nyipi aliene la mel. Öni nyidrëti fe ka hape, Baselaia i Akötresieti hmekuje hi la nyin la itre akötre së. (Luka 24:19) Ketre, hnei Iesu hna amamai tulu koi itre xan. Jëne la aqane mele i nyidrë, hnei nyidrëti hna amamai tulu kowe la itretre drei nyidrë. (Ioane 13:15) Eu la ijine Iesu a hamë ini? Hnei nyidrëti hna hamë ini lo nyidrëti e celë fen. (Mat. 4:23) Thupene lo kola amele Iesu hmaca, hnei nyidrëti hna hamë ini kowe la itretre drei nyidrë. Hnei nyidrëti hna iamamany kowe la 500 lao atr ka drei nyidrë, me upi angatr troa “inine la nöjei atr.” (Mat. 28:19, 20; 1 Kor. 15:6) Iesu hi la tane la ekalesia. Celë hi matre, ngacama nyidrëti hë e hnengödrai, ngo tha cile kö nyidrëti troa hamë ini kowe la itretre dreng. Ame lo 96 M.K., hnei Iesu hna upi Ioane aposetolo troa thuecatrene me hamë eamo kowe la itre Keresiano hna iën.—Kol. 1:18; Hna ama. 1:1. w19.05 3 par. 4-5

Jole catr enehila troa huliwa matre hetre mele ka loi. Nyimutre la itre trejin ka catre huliwa, matre tro la hnepe lapa i angatr a hetrenyi la ka ijij. Ame itre xan, nanyi catre la hnë huliwa qa ngöne la hnalapa. Itre hawa ne tro angatr kowe la huliwa me bëeke hmaca. Ame pena itre xan, ngacama ka jole catre la huliwa, ngo angatre pe a kuca thatraqane la hnepe lapa i angatr. Celë hi matre, ame e jidr, kucakuca catre angatr! Göi pë fe trengecatre i angatr troa ini tus. Loi e tro sa ami ijin, matre troa inine la Tusi Hmitrötr memine la itre itusi së. Ka nyipiewekë catr, e ajane së troa imelekeu hnyawa me Iehova me hetrenyi la mel ka tha ase palua kö! (1 Tim. 4:15) Ame itre xan, angatr a canga hlë e hmakany, matre troa ini tus ke, pëkö mejen e hnine la uma. Ketre, angatr a ase hlë, matre hmaloi troa mekun me ithel. Ame itre xan, angatr a xomi hnepe menetr e hej, matre troa ini tus me lapa mekun. w19.05 26 par. 1-2

Nyipici laka, tha ka hmaloi kö troa canga saze. Loi e tro sa catre huliwa, matre troa saze la itre aliene hni së. (2 Pet. 1:5) Nyipiewekë tro sa kuca la hne së hna atrein, matre troa saze la itre aliene hni së. Ame la nyine troa pane kuca, tre, troa thith. Nyipiewekë tro sa thith, tune la atre cinyihane la Salamo, lo angeic a hape: “Akötesieti fe, xupejë koi ni la hni ka wië; nge kuca hmaca jë la u ka cile huti e kuhu hning.” (Sal. 51:10) Eje hi, loi e troa pane atrehmekune laka, nyipiewekë tro sa sipo ixatua koi Iehova, matre troa saze la aqane waiewekë së. Ame la hnaaluene nyine tro sa kuca, tre, troa lapa mekun. Ame ngöne la easa e la Tusi Hmitrötr e nöjei drai, nyipiewekë tro sa xomi ijin, matre troa lapa mekune la itre hne së hna e. Tro hë sa atrehmekune hnyawa la itre mekun memine la itre ewekë ka ej e kuhu hni së nyine troa saze. (Sal. 119:59; Heb. 4:12; Iako. 1:25) Eje hi, loi e tro sa pane atrehmekun, laka, hna angazone la itre mekuna së me itre aliene hni së, hnene la itre mekuna i fen. Celë hi matre, tha canga paatre kö la itre thiina së ka ngazo. Ngo nyipiewekë tro sa catre thele troa xometrije itre ej. w19.06 8 par. 1; 10 par. 10; 12 par. 11-12

Qëmekene troa axecië mekun, loi e tro sa canga ami traem göne la itre huliwa hne së hna ajan troa kuca, nge tha tro pi kö sa saze. Tha tro kö sa treqene la ijine loi, matre troa nyiqane kuca la huliwa së. Maine jë pëkö troa hetre ijine loi. (Ate cai. 11:4) Ketre, tha tro pi kö sa nue la itre huliwa ka tha nyipiewekë kö troa xome la traeme së me trengecatre së. (Fil. 1:10) Nyipiewekë tro sa iëne hnyawa la nyipi ijin, matre tha tro kö a sewe së troa kuca hnyawa la huliwa së. Loi e tro fe sa qaja koi itre xan ka hape, tha tro kö a ajolë së. Loi e tro sa thing la telefone së me wange la itre mail së e thupen. Ame la thangan la huliwa së, tre, hna aceitunëne memine la ketre götran hna traqa kow ngöne la easa ihamë. Maine easa ajan troa traqa, nyipiewekë tro sa xome la nöjei gojenyi ka troa tro sai së a tro e cili. Eje hi, maine tro sa pane lapa mekun la itre eloin la hne së hna axecië mekun, tha tro hë sa kucakuca ngöne la itre ijine jol.—Gal. 6:9. w19.11 30 par. 17-18

Nemene la ka nyitrepene la mekuna së troa xomi bapataiso? Ame la easa inine la Tusi Hmitrötr ke, easa atrepengöi Iehova hnyawa, tune la itre thiina me aqane ujë i Nyidrë. Celë hi lai ka akeukawane la hni së me acatrene la ihnimi së koi Nyidrë. Eje hi, ihnimi së koi Iehova la ka troa upi së troa xomi bapataiso. Ketre, easa mekun troa xomi bapataiso, pine laka, hne së hna inine la nyipici e hnine la Tusi Hmitrötr me mejiune kow. Hane hi la hna amekötin hnei Iesu lo nyidrëti a qaja ka hape, troa inine la itre atr. (Mat. 28:19, 20) Ame koi Iesu, hnëqa ne la itre ka bapataiso troa kuca lai, “ngöne la ëje i Kaka, me ngöne la ëje ne la Nekön, memine la uati hmitrötr.” Nemene la aliene lai? Loi e tro sa catre lapaune kowe la itre nyipici e hnine la Tusi Hmitrötr, göi Iehova me Iesu Nekö i Nyidrë, me uati hmitrötr. Itre nyipici lai ka hetre menen nge ka troa ketr la hni së. w20.03 9 par. 8-9

Hnei Iehova hna upe la lue angela, matre troa thuemacanyi Lota me xatua angeic troa kötr qa Sodroma. (Gen. 19:12-14, 17) Ka ceitu hi lai me easë. Nyipiewekë tro sa canga thuemacane lai trejin ka hape, troa hetre thangane koi angeic e ka ngazo la aqane axecië mekune i angeic. Ngo maine tha canga drenge kö angeic la eamo qa hnine la Tusi Hmitrötr, loi e tro sa xomihni ahoeany, tune lo lue angela. Tha tro pi kö sa kucakuca me canga nuetrije lai trejine me easë. Loi e tro sa catre xatua angeic, jëne la itre hne së hna qaja me kuca. (1 Ioane 3:18) Maine jë, tro sa ee angeic, matre troa xatua angeic troa trongëne la itre eamo hna hamën qa hnine la Tusi Hmitrötr. Maine ju, tro Iehova a goeëne la itre tria i Lota. Ngo hnei Nyidrëti pe hna qeje Lota, jëne Peteru aposetolo, ka hape, ketre atr ka meköt. (Sal. 130:3) Hapeu, ijije hi tro sa nyitipune la aqane goeë Lota hnei Iehova? Maine tro hi sa goeëne la itre thiina ka lolo ne la itre trejin, tro hë së lai a atreine xomihni. Nge e cili, tro ha hmaloi koi angatr troa kapa la ixatua së. w19.06 21 par. 6-7

Pane mekune jë laka, easa mele ngöne la ketre nöj hna wathebon. Maine jë, easa mekun troa tro kowe la ketre nöj tha hna wathebone kö. Eje hi laka, isa qanyi së kö mekun. Ngo qëmekene troa axecië mekun, loi e tro sa pane wang lo hna kuca hnene la itre pane Keresiano, ngöne la kola icilekeu. Hnene la itre Keresiano ne Ierusalema hna kötr a tro Iudra me Samaria, me Foinike, me Kupero, me Anetioka. (Mat. 10:23; Itre hu. 8:1; 11:19) Loi e tro fe sa wang lo hna kuca hnei Paulo, ngöne la kola icilekeu. Hnei Paulo hna lapa ngöne la itre nöje ne la itre ka icilekeu. (Itre hu. 14:19-23) Nemene la ini hne së hna xom qa ngöne la itre ceitune celë? Itre hene la fami la ka iën troa lapa maine tro kowe la ketre nöj. Qëmekene troa axecië mekun, loi e tro angatr a pane thith me lapa mekun la pengöne la fami, memine la thangan e tro angatr la troa tro. Tha tro kö sa qaja angazone la aqane axecië mekun ne la itre xan. w19.07 10 par. 8-9

Öni Iesu: “Tro jë nyipunie, nge inine jë la nöjei atr qa ngöne la nöjei nöj troa xötrethenge ni.” (Mat. 28:19) Tha easë kö a ini angatr la itre hna amekötin hnei Iesu kowe la itretre drei nyidrë. Easë mina fe a ini angatr la aqane troa drengethenge la itre hna amekötin. Loi e tro sa xomihni aqean me xatua angatr, ngöne la angatr a thele troa trongëne la itre trepene meköti ne la Tusi Hmitrötr. Ame la itre xaa ka ini tus ke, itre treu ne saze hi angatr la itre mekuna i angatr me itre hna majemin. Ngo hmitre me jol koi itre xan. Hnene la ketre trejin ka mesinare e Pérou hna öhne la thangan e troa xomihni aqeany. Öni nyidrë: “Ase hë ni inine la lue itusi me Raúl. Ngo nyimutre la itre jol ka traqa ngöne la mele i Raúl. Hetre jol e hnine la faipoipo i angeic. Tha eatrëne kö angeic la hnei angeic hna qaja kowe la itre nekö i angeic, matre tha metrötrë angeice hë hnei nyudren. Ngo ame pe, Raúl palahi a sine la itre icasikeu. Celë hi matre, hnenge palahi hna tro troa wai angeic, me xatua angeic me fami angeic. Köni macatre thupen, kola bapataiso angeic.” w19.07 15 par. 3; 19 par. 15-17

Pane mekune jë la itre hna kuca hnei Paulo ngöne lo nyidrëti a cinyany koi angetre Filipi. Hna akalabusi Paulo ngöne la ketre uma e Roma, matre thatreine kö nyidrëti troa cainöj trootro ngöne la traon. Ame pe, hnei nyidrëti hna cainöj kowe la itre ka traqa troa wai nyidrë, me cinyanyi kowe la itre ekalesia. Atre hi Paulo laka, nyipiewekë tro nyidrëti a catr tui Keriso. Celë hi matre, hnei nyidrëti hna aceitunëne la mele ne Keresiano memine la ketre iwaja. (1 Kor. 9:24-27) Ame la ka nyenyap ke, pëkö itre xaa ewekë hnei angeic hna goeën. Angeice hi a goeëne la hna ie. Ngo hetre itre ewekë ka troa ajolë angeic, tune la itre magazë. Hapeu, tro kö angeic a pane cile ngöne magazë? Waea ke, aja i angeic troa traqa pa kowe la hna ie! Haawe, loi e tro sa ananyine la itre ewekë ka troa ajolë së qa ngöne la gojenyi ne mel. Maine tro palahi sa nyitipune la aqane catre huliwa i Paulo koi Iehova, tro ha amanathithi së! w19.08 3 par. 4; 4 par. 7

Ame la easa drengethenge Akötresie, kola saze la mele së memine la itre hne së hna mejiune kow. Jole kowe la itre fami së troa canga kapa la aqane saze së. Tha easë hmaca kö a sine la itre feete ne hmi, maine lö hnine pena la kuci politik. Maine jë, tro angatr a elëhni e xötrei. (Mat. 10:35, 36) Ngo tha tro kö sa mekun ka hape, mekuna i angatr hë lai. Tro pe sa thel la aqane troa xatua angatr troa trotrohnine la itre ini hne së hna mejiune kow. Maine tha xatua angatre kö hne së, kösë easë hi lai a sipu amekötin ka hape, tha ijiji angatre kö troa hane hetrenyi la mel ka epine palua. Ngo tha hnëqa së kö lai. Iesu hi la ka troa iameköti ke, hnëqa i nyidrëti lai qaathei Iehova. (Ioane 5:22) Eje hi, maine tro palahi sa catre xomihni, tro hë la itre fami së a hmala troa drenge la maca. Loi e tro palahi sa catr. Ngacama easa cile kowe la itre jol ka tru, ngo tha tro pi kö sa nue la ketre ewekë troa ajolë së. (1 Kor. 4:12b) Loi e troa pane nue ijin kowe la itre kem me thin, troa trotrohnine la kepin matre, ka nyipiewekë koi së troa nyihlue i Iehova. w19.08 17 par. 10, 13; 18 par. 14

Ame la easa cile kowe la ketre jol ka tru, maine jë easa mekun ka hape: “Thatreine kö ni troa xomihnine la jol celë hnene la sipu trengecatreng.” Alanyimu la itre ka mekun tun. Maine jë, hna tithi së hnei mec maine pena hna meci la ketre sinee së. Ame la easa mekun hmaca la jol cili, mama pi hi koi së laka, hnene la uati hmitrötre i Iehova hna hamë së la “men atraqatr,” matre atreine jë së xomihnine lai jol. (2 Kor. 4:7-9) Ketre, kola xatua së hnene la uati hmitrötr matre tro sa atreine cile catre kowe la iajojezi ne la fene celë ka ngazo. (1 Ioane 5:19) Easë mina fe a isi memine la “itre u ka ngazo.” (Efe. 6:12) Kola hamë trengecatre së hnene la uati hmitrötr i Iehova, matre troa kuca la nöjei huliwa së ngacama tru catre ju hë la itre jol. Atre hi Paulo aposetolo laka, ngacama nyimutre la itre jol, ngo atreine hi nyidrëti catre huliwa i Iehova me catre cainöj ke, nyidrëti a mejiune kowe la “mene i Keriso.”—2 Kor. 12:9. w19.11 8 par. 1-3

Tusi Hmitrötre hi la ka qaja hnyawane la hna kuca hnei Iesu thatraqai së. Loi e troa hnimi Iesu, matre troa acatrene la ihnimi së koi Iehova. Pine nemen? Pine laka, hnei Iesu hna xom la itre thiina ne la Keme i nyidrë. Maine tro sa atrepengöi Iesu hnyawa, tro hë sa trotrohnine me hnimi Iehova. Pane mekune jë la aqane utipine Iesu la itre hna wangacone hnei itre xan, tune la itre ka pë ewekë, me ka wezipo, me itre ka kucakuca. Pane mekune jë la aqane xatua së hnene la itre eamo ka lolo hnei nyidrëti hna hamën, matre lolo hë la mele së enehila. (Mat. 5:1-11; 7:24-27) Troa acatrene la ihnimi së koi Iesu, e hne së hna lapa mekun la mel hnei nyidrëti hna huujën, matre troa nue la itre ngazo së. (Mat. 20:28) Ame la easa atre laka, hnei Iesu hna mec thatraqai së, kola upi së troa ietra me thele tro Iehova a nue la ngazo së. (Itre hu. 3:19, 20; 1 Ioane 1:9) Pine laka, easa hnimi Iesu me Iehova, matre easë fe a easenyi catr kowe la itre xan ka hane ujë tun. w20.03 5-6 par. 10-12

Maine jë, tro sa mekun ka hape, easë hi la ka ijij troa xome la ketre hnëqa e hnine la ekalesia. Maine pena, tro la ketre trejine föe a qaja ka hape, ‘Föeng hi la ka ijij troa xome la hnëqa celë!’ Ngo maine hetre ipië së, tha tro kö sa mekune tune lai. Goeëne la aqane ujë i Mose, ngöne lo kola kapa ekö hnei itre xan la ketre hnëqa. Nyipici laka, ka tru koi Mose troa elemekene hnyawa la nöje Isaraela. Ngo tune kaa la aqane ujë i Mose ngöne lo Iehova a aijijëne la itre xan, troa hane kuca la hnëqa i angeic? Tha hnei angeice kö hna akötr me wesitr. (Num. 11:24-29) Hnei Mose hetreny la ipië me nue la itre xan troa hane amekötine la nöj. (Eso. 18:13-24) Haawe, ijije hë troa canga nyinyine la itre jol ke, tru catre hë hnei atr ka iameköti. Eje hi, ame la ka nyipiewekë koi Mose, tre, troa xatuane la nöje Isaraela, ngo tha ene kö la troa hetre hnëqa ka tru. Drei la ketre tulu ka lolo koi së enehila! Tha tro kö sa thëthëhmine laka, Iehova a wangatrune la itre ka hni ka ipië. w19.09 5-6 par. 13-14

Thatre kö së la itre kepin matre tro la itre mus a lep apatrenyi Babulona Atraqatr. Maine jë, tro angatr a qaja ka hape, hnene la itre hmi matre pëkö tingeting, nge angatr a musinëne la itre huliwa i mus. Maine pena, tro la itre musi a qaja ka hape, ka trenamo la itre hmi. (Hna ama. 18:3, 7) Ame ngöne la kola troa apatrene elanyi la itre hmi, tre, tha kolo kö lai a hape, kola troa lep asë la itre ka hmi. Ngo kolo pe a troa lep la itre organizasio i hmi asë. Ame hë e cili, tro la itre ka hmi a öhn laka, ka thoi la itre hna qaja hnene la itre hene ne hmi. Maine jë, tro la itre xaa ka hmi a qaja ka hape, tha hane fe kö angatr sine la itre hmi cili. Ka nyimenyime la aqane troa lep apatrenyi Babulona Atraqatr. (Hna ama. 18:10, 21) Hnei Iehova hna thingehnaean ka hape, tro Nyidrëti a “ahopatrene la itre drai” ne la akötr atraqatr, matre troa mel la “itre hnei nyidrëti hna iën” nge troa cile huti la hmi ka wië.—Mar. 13:19, 20. w19.10 15 par. 4-5

Itre thine fe, maine jë, hnene la kem me thine i epun hna wesitrë epuni ekö me ithanata akökötreny. Celë hi matre, epuni ha mekun laka, aqane tro hi lai a hetrune la itre nekönatr. Ketre, ngacama hnei Iehova hna ini epun la aqane troa hiane la itre nekönatr, ngo jol palahi troa thele tingeting me trotrohni nyudren, ngöne la nyudreni a tha idrei. (Efe. 4:31) Maine celë hi hnei epuni hna melën, sipo ixatua jë koi Iehova. (Sal. 37:5) Jol kowe la itre xaa thin troa amamane la ihnimi angatr kowe la itre nekönatr. Maine jë, tha hna nyihnyawane kö la mele i angatr ekö, me hnimi angatr hnei kem me thin. Ame pe, tha tro kö a nyitipu nyidro. Ame la thin ka drengethenge Iehova ke, angeic a hnime la itre nekönatr. Eje hi, tha ka hmaloi kö troa saze, ngo ijije hi. E cili, troa hetre madrin e hnine la fami. w19.09 18-19 par. 19-20

Ame la hlue i Iehova ka huliwa catr matre troa trenamo, tre, angeice hi lai a nyihluene la lue maseta. Tha ka pexeje kö la ihnimi angeic koi Iehova. Ame la itre atrene la traon e Laodikea ekö, tre, hnei angatr hna pi mama me hape: “Ka trenamo ni, nge eni pala hi a kepe mo, matre pë hmaca kö ketre ewekë hnenge hna ajan.” Ngo mama hnyawa hi koi Iehova me Iesu laka, itre ka “pë ewekë [angatr], me timek, me cile xöe.” Tha hnei Iesu kö hna eamo angatr pine laka, itre ka trenamo. Ngo hnene laka, angatr a hni koi manie, matre hna thë la aqane imelekeu i angatr me Iehova. (Hna ama. 3:14-17) Maine easa öhne laka, kola cia e kuhu hni së la aja troa hni koi manie, loi e tro sa canga lepetrij me amekötine la mekuna së. (1 Tim. 6:7, 8) Loi e tro sa thupën wanga tro sa hnime la itre xaa ewekë. E cili, tha tro kö Iehova a kapa la aqane hmi së. Iehova la “Akötresieti ka zalu.”—Deu. 4:24, MN. w19.10 27 par. 5-6

Ame la aliene la hnaewekë qene Geres, “ithanata jëne” tre, kola hape “hna ukun maine hna up.” Hnei Luka, atre cinyihane la tusi Itre Huliwa, hna qaja la ketre hnaewekë qene Geres ka ceitu memine la hna qaja hnei Peteru. Hnei nyidrëti hna qaja la he hna “ufe” hnei eny. (Itre hu. 27:15) Önine la ketre ka inamacan: “Ame la Peteru aposetolo a qaja ka hape, itre atre cinyihane la Tusi Hmitrötr a ‘ithanata jëne la uati hmitrötr’ ke, hnei nyidrëti hna xome la hnaewekë ka ihmeku memine la itre ka ea hune la he. Öni Peteru ka hape, tune la eny a ufe trongëne la he uti hë la hna ie, hnene la uati hmitrötr hna upe la itre ka cinyihane la Tusi Hmitrötr, troa kuca hnyawane la hnëqa i angatr. Önine lo ka inamacan: “Ame la itre ka cinyihane la Tusi Hmitrötr, tre, angatr a fe la itre sinyeu. Kola qaja ka hape, ka hnëkë hë angatr troa kuca la hna upi angatr hnei uati hmitrötr.” Hnei Iehova hna hamëne “la eny,” ene la uati hmitrötr. Nge hnene la itre ka cinyihane la Tusi Hmitrötr hna eatrën hnyawa la hnëqa i angatr. Hnei angatr hna nue la uati hmitrötr troa eatrongë angatr. Ceitune hi la uati hmitrötr memine la eny ngöne la kola enij la hnagejë. Traqa ju hë la nöjei pengöne jol, ngo uati hmitrötr a xatua së troa traqa kowe la fen ka hnyipixe hna thingehnaean hnei Akötresie. w19.11 9 par. 7-9

Ame itre xaa ijin, easa kucakuca. Ngo tha tro kö sa lapa mekune la itre jol, wanga tro sa thëthëhmine la itre hna thingehnaean hnei Iehova. (Hna ama. 21:3, 4) Ame itre xaa ijin, kucakuca catre palaha së, matre pëhë aja së troa nyihlue i Iehova. Hanawang la aqane acatren hnene la ketre trejin föe ne Etazini la lapaune i eahlo, ngacama kola hace catre la meci ne la föi eahlo. Hnei eahlo hna cinyanyi ka hape: “Ngacama akötre la mele hun, ngo hetre mejiun hun, matre eahuni a catr. Tru la hni ne oleng koi Iehova ke, hnei Nyidrëti hna hamëne la nöjei ewekë, matre troa acatrene la lapaune nyio me aegöcatrenyi nyio. Ka nyipiewekë catre koi nyio la itre eamo hna hamën. Kola xatua nyio troa catre nyihlue i Iehova.” Ijije hi tro sa cile catr ngacama easa kucakuca! Tune kaa? The thëthëhmine kö laka, qaathei Satana la itre jole së. Loi e tro palahi sa mejiun laka, tro kö Iehova a aegöcatrenyi së. Ketre, wangatrune jë la itre göxeni qaathei Iehova. w19.11 16 par. 9-10

Loi e tro la itre qatre thup a trongëne la hna amekötine celë. Tha tro kö angatr a kötre fë ithanata. Maine tro angeic a kuca tune lai, tha tro hë a mejiune koi angeic, nge tro ha qaja angazo angeic. Thatreine kö tro la itre ka trene hnëqa a “lue hna ithanata,” maine iaö pena. (1 Tim. 3:8, ftn.) Kola hape, tha tro kö angatr a iqej me kötre fë ithanata. Maine ka hnime la qatre thup la föi angeic, tro hë angeic a thupën matre tha tro kö a qaja la itre ithuemacany ka sihngödr. Ijije hi tro la itre föe a kuca, matre tro palahi a qaja aloinyi la itre föi nyudren. Nyudren a thupën matre tha tro kö a hnyingëne la itre ithuemacany ka sihngödr. Celë hi aqane tro nyudreni a sajuëne la huliwa ne la itre föi nyudren, me wangatrune la itre trejin hna xatuan. Ketre, nyudreni a amadrinë Iehova, me thele troa tingeting me caas la ekalesia.—Rom. 14:19. w20.03 22 par. 13-14

Ame lo 1512 M.P.K., hna acile la uma mano fene la wetre Sinai. Nge Mose la ka elemekene la icasikeu, ngöne la kola acili Arona me itre nekö i angeic troa itretre huuj. (Eso. 40:17; Lev. 9:1-5) Nemene la aqane amamane Iehova laka, Nyidrëti a kapa la itretre huuj hna hnyipi acil? Ame la Arona me Mose a ase amanathithine la nöj, tro pi hi qa hnengödrai la eë i Iehova, troa dreuth asë la itre huuj. (Lev. 9:23, 24) Nemene la aliene la kola tro pi la eë qa hnengödrai? Iehova a amamane laka, Nyidrëti a kapa me sajuë Arona me itre nekö i angeic, itre hna acil matre troa itretre huuj ne la nöj. Trotrohnine hë la nöj laka, ka loi e troa sajuë angatr. Hapeu, ka nyipiewekë kö lai koi së enehila? Eje hi! Pine nemen? Pine laka, kola nyihatrene la ketre musi ka sisitria catre kö, ene lo ala 144 000 ka troa ce musi me Keriso e hnengödrai. (Heb. 4:14; 8:3-5; 10:1) Eje hi, Iehova a xomiujine me amanathithine la organizasio i Nyidrëti enehila. w19.11 23 par. 13; 24 par. 14, 16

Ame lo Paulo aposetolo e Korinito, hnei nyidrëti hna lapa thei Akula me Perisila, me “ce huliwa me nyidro, ke itre ka cai itat.” Ketre, hnei Paulo hna huliwa “lai me jidr.” Ngo tha kolo kö lai a qaja ka hape, hnei nyidrëti hna ca itat utihë e Sabath. Ngo hnei nyidrëti pe hna cainöj koi angetre Iudra ka tha huliwa kö e Sabath. (Itre hu. 13:14-16, 42-44; 16:13; 18:1-4) Hnei Paulo hna huliwa thatraqane la mele i nyidrë, me catre sine la “huliwa ka hmitrötr troa tro fë la maca ka loi i Akötresie.” (Rom. 15:16; 2 Kor. 11:23) Hnei nyidrëti palahi hna ithuecatre troa catre cainöj. Eje hi, hnei Akula me Perisila hna ce huliwa me Paulo ke, itre “sine huliwa [i nyidrë] thei Iesu Keriso.” (Rom. 12:11; 16:3) Hnei Paulo fe hna ithuecatre koi angetre Korinito, “tro pala hi a tru hnei huliwa i [angatr] koi Joxu.” (1 Kor. 15:58; 2 Kor. 9:8) Ketre, hnei Iehova hna upi Paulo aposetolo troa cinyihan, ka hape: “Maine ketre a xele ma huliwa, tha tro kö angeic a xen.”—2 Thes. 3:10. w19.12 5 par. 12-13

Hnei Iehova hna xupe la lue pane atr memine la aja troa hetre nekönatr. Ngo drei la ka troa axeciën la ijine troa hnaho? Ame ngöne la itre xaa nöj, kola ajane tro la itre ka xötrei faipoipo a canga hnaho. Kola iele angatr hnei itre fami me itre sinee. Öni Jethro, trejine me easë qa Asia: “Ame ngöne la ekalesia, itre trejin ka trene kuku a ielene la itre trefën ka pë nekön troa hane hnaho.” Öni Jeffrey qa Asia: “Ame itre xan, angatr a qaja kowe la itre ka pë nekönatr ka hape, pëkö ka troa hane thupë angatr elany, ngöne la angatr a troa qatr trootro.” Ngo isa qanyine kö la itre trefën troa iën. Sipu hnëqa i angatr kö lai. (Gal. 6:5) Nyipici laka, itre sinee me itre fami a ajane tro la lue trefën ka xötrei faipoipo a mele madrin. Ngo ame pe, loi e tro kö la lue trefën a isa axecië mekun göne lai.—1 Thes. 4:11. w19.12 22 par. 1-3

Hapeu, jole kö koi së troa goeë Akötresie tune la Keme së? Ame koi itre xan, draië catre palaha Iehova matre, tha tro kö Nyidrëti a nyipiewekë së. Ame koi angatr, tha semesine angatre kö hnene la Akötresie Ka Tru Trenge Men. Ngo tha ajane kö Iehova tro sa hane mekun tun. Nyidrëti la ka xupi së nge aja i Nyidrëti tro sa imelekeu hnyawa me Nyidrë. Celë hi la hna qaja hnei Paulo aposetolo. Öni nyidrë kowe la itre atre Athenai ka hape, “tha ka nanyi kö [Iehova] koi së.” (Itre hu. 17:24-29) Akötresieti a ajane tro sa ithanata koi Nyidrë, tune la nekönatr a ithanata kowe la keme i nyën. Ame koi itre xan, jole catr troa goeë Iehova tune la ketre Kem ke, tha hna hnimi angatre kö hnene la sipu keme i angatr. Önine la ketre trejine föe: “Ka calogitr catre kaka. Ame lo eni a nyiqane ini tus, jole catre koi ni troa easenyi koi Iehova, Keme së e hnengödrai.” Hapeu, celë fe kö la mekuna i epun? Maine eje hi, catre pi. Ijiji epuni fe troa hane easenyi catre koi Iehova me öhn laka, Nyidrëti la Keme së ka ihnim. w20.02 3 par. 4-5

Öni Iesu ka hape, ngacama co hi la itre hne së hna atreine kuca, ngo ka nyipiewekë asë hi la itre hne së hna kuca koi Iehova. (Sal. 92:12-15; Luka 21:2-4) Haawe, loi e tro sa kuca asë la hne së hna atrein. Maine jë, tro sa qeje Iehova, me thithi sane la itre trejin, me ithuecatre kowe la itre xan troa mele nyipici. Ame koi Iehova, easë hi lai a catre huliwa, tha hnene kö la etrune la itre hne së hna kuca, ngo hnene pe la aja së troa drengethenge Nyidrë. (1 Kor. 3:5-9) Madrine catre së troa nyihlue i Iehova, Akötresie ka wangatrune la itre hlue i Nyidrë! Hnei Nyidrëti hna xupi së matre troa kuca la aja i Nyidrë. Nge easa mele madrin ngöne la easa nyihlue i Nyidrë. (Hna ama. 4:11) Ngacama kola wangaconyi së hnene la fen, ngo tha celë kö la aqane goeë së hnei Iehova. (Heb. 11:16, 38) Ame itre xaa ijin, easa kucakuca ke, hna tithi së hnei mec, maine hetre jole së göi manie, maine pena easa uti ipië trootro. Ngo tha tro kö sa thëthëhmin laka, pëkö ka atreine thepe së qa ngöne la ihnimi ne la Keme së e hnengödrai.—Rom. 8:38, 39. w20.01 18 par. 16; 19 par. 18-19

Maine easa ajane troa thipetrij la meciun me izalukeu, loi e tro sa hetre hni ne ipië me mejihnin. Maine tro sa eënyine la itre thiina cili, troa paatre la meciun qa kuhu hni së. Nge maine tro sa hetre hni ne ipië, tha tro hë sa wangatrunyi së palaha. Tha tro hë sa mekun laka, ka sisitria catre kö së hui itre xan. (Gal. 6:3, 4) Ame la atr ka mejihnin ke, angeic a madrine la itre ewekë hna hetreny, nge tha angeice kö a goeë itre xan. (1 Tim. 6:7, 8) Ame la atr ka ipië nge ka mejihnin, tre, angeic a madrin kowe la itre xan ngöne la angatr a madrin. Matre, nyipiewekë tro sa sipone la uati hmitrötr i Iehova matre tha tro kö sa meciun la ifekë ewekën. Ngo tro pe sa amamane la hni ne ipië së me mejihnin la hna hetreny. (Gal. 5:16; Fil. 2:3, 4) Jëne la ua i Akötresie, ijije hi tro sa nyihnane la itre mekune ka ngazo, hnene la itre mekune ka loi.—Sal. 26:2. w20.02 15 par. 8-9

Ame la easa sa xepu, easë hi lai a sisinyi koi Iehova, nge nyidrëti a ajane tro sa metrötrëne lai. Loi e tro sa easenyi catr kowe la ekalesia së. Ke easa ce nyihlue i Iehova memine la itre trejin me easë. Ketre, maine tro sa catre sine la itre icasikeu, tro hë sa acatrene la aqane imelekeu së me angatr. Loi e tro palahi sa e me lapa mekun la itre Trengewekë i Akötresie o drai. (Sal. 1:1, 2) Nge xomi ijine jë troa lapa mekun itre ej. Tro hë lai a ketr la hni së. Ketre, “catre jë thith.” (Mat. 26:41) Maine tro sa catre thith, tro ha acatrene la aqane imelekeu së me Iehova. Loi e tro fe sa “thele panëne . . . la Baselaia.” (Mat. 6:33) Ijije hi, tro sa amë panëne la huliwa ne cainöj ngöne la mele së. Maine tro pala hi sa catre cainöj, tro ha acatrene la lapaune së. Ame la itre itupath me akötr ne la fen celë, tre, “tha cile palua kö nge ka hmaloi hi” troa thu. (2 Kor. 4:17) Ngo ame la easa xomi bapataiso, tre, kola eatrongë së enehila kowe la mele ka loi, me kowe la “nyipi mel” elany. Pi tro kö epuni a kapa la itre manathithi cili? Eje hi!—1 Tim. 6:19. w20.03 13 par. 19-21

Maine pëkö ewekë ka saze ngöne la mele ne la hnainin, loi e tro sa isa hnying ka hape, ‘Tro kö ni a nue la ini tusi celë?’ Qëmekene troa axecië mekun, loi e tro sa isa hnyinge ka hape: ‘Hapeu, ka lolo kö la aqane kökötre ne la hnainin?’ ‘Angeice kö a nyiqane “trongëne” la itre hnei angeic hna inin?’ (Mat. 28:20) Ame la itre xaa hnainin, tre, ceitui angatre hi memine la angetre Isaraela ngöne la hneijine i Ezekiela. Hnei Iehova hna qeje angatr koi Ezekiela, ka hape: “Hana wang, eö a tune koi angate la nyima ka lolo ne la ate ka loi nine, nge ateine hnyawa la inyima; ke angat’ a denge la ite tenge ewekë i ’ö, ngo tha kuca pe it’ ej.” (Ezek. 33:32) Maine jë, jole koi së troa qaja kowe la ketre atr ka hape, easa troa nue la ini tusi angeic. Ngo, “hohopatre pe hi la ijin.” Tha tro kö sa aluzi traem memine la itre atr ka wangacone la ini tusi angatr. Loi e tro pe sa thele la “itre ka hmalahnine troa kapa la mele ka pë pun.”—Itre hu. 13:48. w20.01 6 par. 17; 7 par. 20

Tha hnene kö la itre hmi ka thoi hna inine la itre atr laka, troa mel epine palua la itre ka drengethenge Akötresie. (2 Kor. 4:3, 4) Angatr a inine laka, maine troa meci la ketre atr ka lolo, tre, tro angeic a elë a tro hnengödrai. Ngo tha celë kö mekuna ne la neköi gurupe ne la Itretre Ini Tusi Hmitrötr ka nyiqane fejane lo zonal, hna hape, Ita Ne Thup, lo macatre 1879. Trotrohnine hi angatr laka, tro Akötresieti a acile hmaca la Paradraiso. E cili, tro la itre milio lao atr ka drei Akötresieti a mel e celë fen, ngo tha e koho kö hnengödrai. Ngo eje hi, hnei angatr hna pane thel troa atre hnyawa la pengöne la itre atr cili ka drengethenge Akötresie. Ketre, kolo fe a trotrohnine hnene la Itretre Ini Tusi Hmitrötr, laka, hetrenyi la itre atr “hna itön qaa la fen,” matre troa ce musi me Iesu e hnengödrai. (Hna ama. 14:3) Eje hi, 144 000 lao atr ka catre mele nyipici, me nyihlue i Akötresieti ekö lo angatr e celë fen. w19.09 27 par. 4-5