Januare

Hna nyitrepene la lapaune i Timoteo, hnene la itre ini ka acatrene la aqane imelekeu i angeic me Iehova. Ketre tu së fe, loi e tro sa catre ini Tusi Hmitrötr me xomi ini göi Iehova. Loi e tro sa pane mejiune kowe la köni ini celë. Ame la hnapan, Iehova la Atre Xup la nöjei ewekë asë. (Eso. 3:14, 15; Heb. 3:4; Hna ama. 4:11) Ame la hnaaluen, Tusi Hmitrötr la maca qaathei Iehova kowe la itre atr. (2 Tim. 3:16, 17) Nge ame la hnaakönin, hetre organizasio i Iehova hna elemeken hnei Keriso, nge itre Temoë Iehova hi la itre atren. (Is. 43:10-12; Ioane 14:6; Itre hu. 15:14) Tha nyipiewekë kö troa atre asë la aliene la Tusi Hmitrötr. Ame la ka sisitria, tre, troa huliwane la “mekune” së matre xecie koi së laka, easë hi ngöne la nyipici.—Rom. 12:1. w20.07 10 par. 8-9

Kola qaja lo iume sipa laka, ame la iqëmeken itre ej ke, ceitu me iqëmekene atr. Nge itre ej a ‘petrëne la ketre ewekë kösë korona gool.’ (Hna ama. 9:7) Hna aijijëne la iume sipa troa “akötrëne la itre atr [itre ithupëjia me Akötresie] ka pë hatre i Akötresie hune la itre göpadri angatr” koi faifi lao treu. Pine laka, celë hi eqeane la mele ne la itre sipa. (Hna ama. 9:4) Eje hi, kola qejepengöne hnyawa e celë la itre hlue i Iehova hna iën. Angatr a catre tro fë la maca ne iameköti Iehova kowe la fene ka ngazo. Celë hi matre, kola hmahma la itre atr ka sine la fene celë. Hapeu, ka isapengöne kö la iume sipa ngöne la tusi Ioela 2:7-9 me ngöne la tusi Hna Amaman? Eje hi. Ijije hi troa xom e hnine la Tusi Hmitrötr la ketre ceitun. Ngo pine laka, nyimu aqane huliwan easë lai ceitun, haawe, nyimu alien maine nyimu ewekë hna nyihatrene hnene ej. Hanawang la ketre ceitun. Ame ngöne Hna Amaman 5:5, tre, hna hë Iesu ka hape, “Liona ne la lapa i Iudra.” Ngo ame ngöne 1 Peteru 5:8, Diabolo la hna aceitunën me “liona ka ho.” w20.04 3 par. 8; 5 par. 10

Hagara la hlue i Sarai. Thupene la Hagara a faipoipo me Aberahama, ngazo la aqane ujë i angeic koi Sarai. Hnei Hagara hna hnaho, matre pëhë metrötre i angeic koi Sarai ke, ka safëj eahlo. Ngazo catre palaha la thiina i Hagara, matre hnei Sarai hna helë angeic. (Gen. 16:4-6) Pine laka, itre atr ka ngazo së, matre tro sa mekun ka hape, Hagara a xeni pun la aqane ujë i angeic. Ngo tha celë kö la mekuna i Iehova. Hnei Nyidrëti hna upe la ketre angela koi angeic. Hnene la angela hna xatua Hagara troa saze la aqane ujë i angeic me amanathithi angeic. Hagara a trotrohnin laka, öhne hi Iehova la ka traqa koi angeic. Angeic a haine la aqane ujë i Iehova me hë Nyidrëti ka hape, “Akötesie ate xajawatin.” (Gen. 16:7-13) Nemene la hnei Iehova hna öhn thei Hagara? Atre hi Nyidrëti la ka traqa ngöne la mele i Hagara. Atre fe Iehova laka, ngazo la aqane ujë Hagara koi Sarai. Ngo trotrohnine hi Nyidrëti la itre aliene hni Hagara me itre hnei angeic hna melën. w20.04 16 par. 8-9

Hnei Paulo aposetolo hna qaja ka hape, itre nyipi Keresiano a sine la ketre iwaja. (Heb. 12:1) Nyipiewekë tro së isa ala caas, itre qatr me thöth, itre ka egöcatr me itre ka kucakuca, a catre xomihni uti hë la pun, matre kapa la thupen qaathei Iehova. (Mat. 24:13) Ijije hi tro Paulo a hamë eamo koi së ke, hnei nyidrëti hna “sine la iwaja uti hë la hna ie.” (2 Tim. 4:7, 8) Ngo nemene la iwaja hna qaja hnei Paulo? Hnei Paulo hna qaja la itre hna kuca ekö ngöne la itre elo e Geres, matre troa hamë ini. (1 Kor. 9:25-27; 2 Tim. 2:5) Hnei nyidrëti hna anyimua aceitunëne la mele ne Keresiano memine la ketre iwaja. (1 Kor. 9:24; Gal. 2:2; Fil. 2:16) Ketre atr a nyiqaane la “iwaja” ngöne la angeic a sa xepu koi Iehova me xomi bapataiso. (1 Pet. 3:21) Nge tro angeic a nyipune la iwaja ngöne la Iehova a troa hamë angeic la thupen, ene la mel ka pë pun.—Mat. 25:31-34, 46; 2 Tim. 4:8. w20.04 26 par. 1-3

“Ka mele nyipici Joxu, tro kö nyidrëti a aegöcatrenyi nyipunie, me thupë nyipunie qa ngöne la atre ka ngazo.” (2 Thes. 3:3) Nemene la aqane thupë së hnei Iehova? Hnei Iehova hna hamë së la iheetre ne isi, matre thupë së qa ngöne la itre hnö i Satana. (Efe. 6:13-17) Eje hi laka, ka catre la iheetre ne isi cili, ngo tro ej a thupë së, e hne së hna heetrën asë la nöjei götranene lai iheetr. Ame la beletr ne la nyipici, kola nyihatrene la itre nyipici ka ej e hnine la Trengewekë i Akötresie, ene la Tusi Hmitrötr. Pine nemene matre loi e tro sa othe hnyawa lai beletr? Pine laka, Satana la “keme ne la thoi.” (Ioane 8:44) Itre macatre ne angeic a thoi me “amenune la fen asë.” (Hna ama. 12:9) Ame pe, itre nyipici qa hnine la Tusi Hmitrötr a thupë së qa ngöne la itre trengathoi Satana. Maine easa ajane troa othe hnyawa la beletr, loi e tro sa atre la nyipici göi Iehova, me nyihlue i Nyidrë “thenge la uati hmitrötr me nyipici,” me amamai tulu ngöne la mele së.—Ioane 4:24; Efe. 4:25; Heb. 13:18. w21.03 26-27 par. 3-5

Ka lolo la nöje celë ke, kolo hnë atrunyi Iehova. Qane hi lo Penetekos 33 M.K., tha hna qaja hmaca kö ka hape, ketre “götran,” pine laka, hetrenyi la itre hlue i Iehova ngöne la nöjei götrane la fen. Ame “la nöje ka lolo” enehila, kola qaja la itre huliwa hna kuca hnene la itre hlue i Akötresie, tune la itre icasikeu memine la huliwa ne cainöj. Ame ngöne la ijine la pun, hna anyimua tro kowe “la nöje ka lolo” hnene la joxu ne kolopi. Ame ngöne lo Hnaaluene Isi Ka Tru ke, musi Alema la joxu ne kolopi. Hnene ej hna tro kowe “la nöje ka lolo” me qanangazone me humuthe la itre hlue i Akötresie. Nge thupene lo Hnaaluene Isi Ka Tru, musi URSS la joxu ne kolopi. Hnene ej hna tro kowe “la nöje ka lolo” me akötrëne la nöje i Akötresie me upi angatr kowe la itre xaa nöj. w20.05 13 par. 7-8

Tro sa pane ce wang la tulu ne la itre sinee i Akötresie, qëmekene tro Keriso a traqa e celë fen. Aberahama la ketre ka catre lapaun. Thupene la 1 000 lao macatre ne nyidrëti a mec, hnei Iehova hna hë nyidrë ka hape, “hniminang.” (Is. 41:8) Eje hi, thatreine kö la mec troa iananyi Akötresie memine la itre sinee i Nyidrë. Ame koi Akötresie, ka mele palahi Aberahama. (Luka 20:37, 38) Tro fe sa wange la tulu i Iobu. Hnei Iehova hna qaja kowe la nöjei angela ka hape, Nyidrëti a mejiune koi Iobu. Öni Nyidrë: “Ka nyipi loi thina me meköt, nge ate qoue Akötesie me iananyi memine la ngazo.” (Iobu 1:6-8) Nemene fe la mekuna i Iehova göi Daniela, hlue i Nyidrëti ka mele nyipici koi 80 lao macatre ngöne la ketre nöj ka thili koi idrola? Hnene la ketre angela hna akönia qaja koi Daniela ka hape, ketre “ate hna hanyin” hnei Akötresie. (Dan. 9:23; 10:11, 19) Eje hi, ka tru koi Iehova la itre sinee i Nyidrë, nge aja i Nyidrë troa amele angatre hmaca.—Iobu 14:15. w20.05 26-27 par. 3-4

Loi e tro la itre ka ini tusi me easë a atre la itre wathebo i Akötresie me wangatrune itre ej. Ngo hapeu, tro kö la ihnim me itre hnei angeic hna atre göi Iehova a upi angeic troa drengethenge Nyidrë? Atre hi Eva la wathebo i Akötresie, ngo pëkö ihnimi angeic koi Nyidrë, nge ketre tui Adramu. (Gen. 3:1-6) Haawe, tha tro hmekuje kö sa inine la itre atr la itre trepene meköti Akötresie. Ame koi së, ka lolo nge ka sisitria la itre trepene meköti Iehova. (Sal. 119:97, 111, 112) Ngo tha celë kö mekuna ne la hnainin. Maine jë, tha trotrohnine kö angeic laka, hnei Iehova hna acile la itre wathebo pine laka, Nyidrëti a hnimi së. Celë hi matre, loi e tro sa hnyingë angeic ka hape: “Pine nemene matre Iehova a upi së troa kuca la ketre ewekë maine wathebo së pena? Nemene la hna amamane göi Nyidrë?” Maine tro sa xatua angeic troa lapa mekun la itre thiina i Iehova me acatrene la ihnimi angeic kowe la ëje i Nyidrë, tro hë sa ketr la hni angeic. Tro hë angeic a hniin la itre trepene meköti ne la Tusi Hmitrötr, me hnime la Atre acile itre ej. Ketre, tro lai a acatrene la lapaune i angeic, me xatua angeic troa cile kowe la itre jol elany.—1 Kor. 3:12-15. w20.06 10 par. 10-11

Tha ka hmaloi kö troa canga bëeke koi Iehova. Celë hi matre loi e tro sa atreine itreqe memine la itre trejin ka nanazij. Önine la itre trejin ka nanazij ka hape, hna anyimua wai angatr hnene la itre qatre thup memine la itre xaa trejin ne la ekalesia. Öni Nancy, ketre trejin qa Asie du Sud-Est: “Hnene la ketre sineeng e hnine la ekalesia hna xatua ni me hnimi ni, matre kösë mamang angeic. Hnei angeic hna amekunë ni lo itre hnei nyio hna kuca. Nge hnei angeic hna drei eni hnyawa me hamë eamo koi ni. Ketre nyipi sinee angeic ka canga xatua ni.” Ame la atr ka utipin, tre, angeic a trotrohnine la itre xan. Ceitune hi la utipine së memine la trepe ka menyik. Ijije hi troa xatuane la ketre atr ka akötr, me akeukawane la hni angeic. Ame la itre xaa trejin ka nanazij ke, hna akötrë angatr ekö hnene la itre xaa trejin. Angatre palahi a elëhni kowe la itre ka akötrë angatr, matre kola sewe angatr troa canga bëeke koi Iehova. Ame kowe la itre ka nanazij, tha ka meköti kö la hna kuca koi angatr. Celë hi matre, nyipiewekë troa drei angatre hnyawa me trotrohni angatr. w20.06 26 par. 10-11

Maine tro sa cile catr kowe la itre jol, tro ha hmaloi koi së troa kuca la itre ewekë ka loi. Ketre, qaathei Satana la itre mekuna i fen, göne la troa kuci ngazo. Nge tha itre mekune kö lai ka nyipici. Eje hi, maine tro sa thipetrije la aqane mekuna i fen, tro hë sa “ngaane la atre ka ngazo.” Atre hi së laka, Iehova hmekuje hi la ka ijije troa qaja la ka ngazo. Nge easa kuca la hne së hna atrein matre tha tro kö sa kei kowe la ngazo. Ngo ame la easa tria, easa canga ietra me qaja koi Iehova ngöne la thith. (1 Ioane 1:9) Maine hne së hna kuca la ketre ewekë ka ngazo catr, loi e tro sa thele ixatua thene la itre qatre thup hna acile hnei Iehova matre troa xatua së. (Iako. 5:14-16) Ngo tha tro pi kö sa mekune hmaca la itre ewekë ka ngazo hne së hna kuca ekö. Pine nemen? Pine laka, hnene la Keme së ka tru ihnimin hna upe la Nekö i Nyidrë troa mec, matre troa nue la itre ngazo së. Ame la Iehova a qaja ka hape, tro Nyidrëti a nue la ngazo hna kuca hnene la atr ka ietra me ka qeje menu, haawe tro hë Nyidrëti lai a kuca. E cili, tha tro hmaca kö a huliwa la mekuthetheu së ngöne la easa nyihlue i Iehova.—1 Ioane 2:1, 2, 12; 3:19, 20. w20.07 22-23 par. 9-10

Ngacama Iehova caasi ekö ngöne la qaan, ngo ka madrine Nyidrë. Ame pe, hnei Nyidrëti hna xupe la itre xan me aijijë angatr troa hane mele madrin. Eje hi, hnene la ihnimi Iehova matre hnei Nyidrëti hna xup la nöjei ewekë asë. (1 Ioane 4:19) Hnei Iehova hna pane xupi Iesu, nge hnei nyidroti hna ce “xup la nöjei ewekë asë,” tune la itre milio lao angela. (Kol. 1:16) Ka madrine palahi Iesu troa ce huliwa memine la Keme i nyidrë. (Ite Edomë 8:30) Ketre, madrine catre la itre angela. Hnei angatr hna öhne la Iehova me Iesu a xupe la hnengödrai me ihnadro. Nemene la aqane ujë i angatr? Hnei angatr hna ‘ce sue madrin.’ Angatr a madrin me haine la aqane xupi ewekë i Iehova, tune lo Nyidrëti a xup la pane atr. (Iobu 38:7; Ite Edomë 8:31) Tha sihngödri kö koi së la ihnim me inamacane i Iehova ngöne la nöjei ewekë hna xup.—Sal. 104:24; Rom. 1:20. w20.08 14 par. 1-2

Hnei Iehova hna xupi së memine la aja troa ihnimikeu. Celë hi matre, easa akötr me xou ngöne la kola methinë së hnei itre xan. Önine la ketre trejin: “Hna lepi ni me qaqa ni hnene la itre sooc pine laka, ketre hlue i Iehova ni. Celë hi matre, eni a xou me hmahma.” Eje hi, ame la kola methinë së, easa akötr. Ame pe, tha sesëkötre kö së ke, ase hë Iesu qaja ekö ka hape, troa methinë së. Hnauëne laka, itre atrene fen a methinëne la itre ka xötrethenge Iesu? Pine laka, tui Iesu, itre ‘trenyiwa së kowe la fen.’ (Ioane 15:17-19) Easa metrötrëne la itre mus, ngo tha easë kö a sine la kuci politik, me sali koi darapo, me nyimane la nyima ne nöj. Ame koi easë, Iehova hi la nyine atrun, nge Nyidrëti hi la ka ijij troa musi e celë fen. Ngo tha Satana kö me “matra i angeic” ka icilekeu me Nyidrë. (Gen. 3:1-5, 15) Ketre, easa cainöj ka hape, Baselaia i Akötresieti la ka troa amelene la itre atr, me apatrene la itre ka icilekeu memine la musi Nyidrë. (Dan. 2:44; Hna ama. 19:19-21) Celë hi maca ne iamele kowe la itre ka hetre hni ne ipië, nge maca ne iameköti kowe la itre ka ngazo. w21.03 20 par. 1-2

Ka nyipiewekë la itre trejine föe e hnine la ekalesia. Nyudreni la itre tulu ne lapaun, me inamacan, me catr, me ihnim, me ham me catre huliwa i Akötresie. (Luka 8:2, 3; Itre hu. 16:14, 15; Rom. 16:3, 6; Fil. 4:3; Heb. 11:11, 31, 35) Easa madrin ke, alanyimu la itre trejin ka qatre hë e hnine la ekalesia. Pine laka angatr a uti ipië trootro, matre kola tithi angatr hnei mec. Ame pe, angatr a kuca la hnei angatr hna atrein matre troa cainöj me hamë ithuecatre me inine la itre xan. Ijije hi tro sa xomi ini qaathei angatr! Ka mingöming catre angatr koi Iehova me koi së fe! (Ite Edomë 16:31) Tune kaa fe la itre thöth? Tha ka hmaloi kö koi nyudren ke, nyudreni a tru ngöne la fene ka ngazo hna musinën hnei Satana. Kola ithuecatre koi së ngöne la itre thöth a hamë mekun ngöne la hna icasikeu, me catre cainöj me cilëgöline la lapaune i nyudren! Itre thöth, ka nyipiewekë epun e hnine la ekalesia!—Sal. 8:2. w20.08 21-22 par. 9-11

Nyimutre la itre jol ka traqa ngöne la easa nyiqane cainöj me amamane laka, ketre Temoë Iehova së. Maine jë, kola icilekeu la fami, me ihnyimasai, maine pena pëkö ka kapa la maca hne së hna tro fë. Ngo tha sesëkötre kö së pine laka, ase hë perofetan ekö hnei Iesu kowe la itretre drei nyidrë. Nemene la ka thue trengecatre së? Loi e troa xecie koi së laka, Iesu la ka xomiujine la huliwa ne cainöj. (Ioane 16:33; Hna ama. 14:14-16) Loi e tro fe sa acatrene la lapaune së koi Iehova, Atre thupë së. (Mat. 6:32-34) Maine ka catr la lapaune së, tro hë sa cile catr. Hnei epuni hna catre lapaun me qaja kowe la itre sinee i epun laka, epuni ha ini tus me sine la itre icasikeu. Ketre, hnei epuni hna catr me lapaun. Hnei epuni hna saze aqane mel me trongëne la itre trepene meköti Iehova. Maine tro epuni a catr, tro kö ‘Iehova Akötresie a ce me epun ngöne la hnei epuni hna tro kow.’—Iosua 1:7-9. w20.09 5 par. 11-12

Hnei Asa joxu hna inamacan me mejiune koi Iehova. Hnei nyidrëti hna nyihlue i Iehova ngöne la itre ijine jol me ijine loi. “Ka pexeje la hni Asa koi Iehova” ngöne la mele i nyidrë. (1 Ite jo. 15:14) Hnei Asa hna apatrene la itre hmi ka thoi ngöne la nöje i nyidrë. Öni Tusi Hmitrötr: “Hnei nyidëti hna apatene la ite ita ne huje tenyiwa, me ite ga draië, me axeciëne la ite idola, me sha tije la ite Aseira.” (2 A. l. ite jo. 14:3, 5) Ketre, hnei Asa hna xome la hnëqa qaathene la qaaqa i nyidrë, matre “tha ishola hmaca kö” eahlo. Pine nemen? Pine laka, eahlo a upe la nöj troa thil kowe la ketre idrola. (1 Ite jo. 15:11-13) Tha hnei Asa hmekuje kö hna apatrene la itre hmi ka thoi. Hnei nyidrëti fe hna ithuecatr kowe la nöj troa bëek koi Iehova. Hnei Iehova hna amanathithi nyidrë memine la nöj, me aijijë angatr troa mele tingeting. Ame fene la musi Asa, “hna lapa hnyawa la nöje . . . [10] la o macate.”—2 A. l. ite jo. 14:1, 4, 6. w20.09 14 par. 2-3

Ame itre xaa ijin, easa ahnith koi itre xan la itre ewekë ka tru alameken. Maine jë, hne së hna ami manie ngöne baak ke, atre hi së laka, tha tro kö a paatr maine atrekënö pena. Hnei Paulo hna amekunë Timoteo ka hape, hnei angeic hna kapa la ketre ewekë ka sisitria, ene la troa atre la aja i Akötresie kowe la itre atr. Nge hetre ketre hnëqa ka tru hna ahnith koi Timoteo, ene la troa “cainöjëne la trengewekë i Akötresie” me “cainöjëne la maca ka loi.” (2 Tim. 4:2, 5) Hnei Paulo hna ithuecatre koi Timoteo troa thupëne hnyawa la itre hna ahnith koi angeic. Ketre tu së fe, hetre hnëqa ka tru hna ahnith koi së hnei Iehova. Ka tru la ihnimi Iehova koi së, matre hnei Nyidrëti hna aijijë së troa kapa la itre nyipici qa hnine la Tusi Hmitrötr. Ka sisitria catre itre ej ke, easa atre la aqane troa nyisinee i Iehova me mele madrin. Celë hi matre, maine tro sa wangatrune me trongëne la itre nyipici cili, tro ha thepe së qa ngöne la itre ini ka thoi me itre huliwa ka sis.—1 Kor. 6:9-11. w20.09 26 par. 1-3

Loi e tro sa amamane kowe la hnainin la madrine së me mejiune së ngöne la easa ini tus me angeic. Tro hë angeice lai a wangatrune la itre hnei angeic hna inin. Loi e tro fe sa qaja koi angeic la itre eloin hne së hna kapa qa ngöne la hna trongëne la itre trepene meköti ne la Tusi Hmitrötr. Tro hë angeic a öhne laka, hetrenyi e hnine la Tusi Hmitrötr la itre eamo ka lolo thatraqane la mele i angeic. Loi e tro sa qaja kowe la hnainin la itre jol hna melën hnene la itre xaa trejin, memine la aqane cile angatr kowe la itre jole cili. Ijije hi tro sa könëne la itre trejine cili troa sine la ini tusi së, matre xatuane la hnainin. Nge amamane jë kowe la hnainin la enyipiewekëne la itre trepene meköti ne la Tusi Hmitrötr. Tune kaa e ka faipoipo la hnainin? Ka ini tusi kö la föi angeic? Maine waea, loi e troa hane hë angeic troa sine la ini tus. Loi e tro fe sa ithuecatre kowe la hnainin troa ce thawa la itre hnei angeic hna inin kowe la fami angeic me itre sinee.—Ioane 1:40-45. w20.10 16 par. 7-9

Hnei Iosefa me Maria hna ini Iesu hnyawa. Celë hi matre, ame hë la nyidrëti a tru, hna kepe nyidrëti hnei Akötresie. Hnei nyidroti hna trongëne la itre eamo hna hamën hnei Iehova, thatraqane la itre kem me thin. (Deu. 6:6, 7) Eje hi, tru la ihnimi nyidro koi Iehova, nge nyidroti fe a ajane tro la itre nekö i nyidroti a hane hnimi Nyidrë. Hnei Iosefa me Maria hna catre nyihlue i Iehova memine la fami nyidro. Hnei angatr hna sine la itre icasikeu e nöjei wiik ngöne la sunago e Nazareta. Ketre, ame e nöjei macatre, hnei angatr hna sine la Paseka e Ierusalema. (Luka 2:41; 4:16) Celë hi itre ijine nyidroti a qaja koi Iesu me itre trejin me nyidrë, la itre ewekë ka traqa ekö kowe la nöje i Iehova, me hane tro kowe la itre götrane hna qaja hnei Tusi Hmitrötr. Ame pe, kola tru trootro la fami Iosefa me Maria, matre jole koi angatr troa catre nyihlue i Iehova. Ngo pane mekune jë së la itre eloine hnei nyidroti hna kapa! Hnei nyidroti palahi hna amë panëne la huliwa i Iehova ngöne la mele i nyidro, matre kola easenyi catre la fami nyidro koi Nyidrë. w20.10 28 par. 8-9

Qëmekene troa sine la ketre ini tus, loi e troa pane hnëkëne la ini hna troa wang. Öni Dorin, ketre pionie hut: “Eni a madrin ngöne la kola hnëkë hnyawa hnene la trejin ka ce tro me eni. Atre hi ni laka, tro angeic a ithuecatre kowe la ka ini tus.” Ketre, maine troa hnëkë hnyawa hnene la ka hamë ini memine lai ketre trejin, tro hë lai a ithuecatre kowe la ka ini tus troa hane hnëkë hnyawa. Ngo maine tha ijiji së kö troa hnëkë, loi e tro sa pane goeëne la itre mekun ka tru ne la ini. Ame la easa ini tus, nyipiewekë troa thith. Celë hi matre, loi e tro sa canga mekun la nyine tro sa qaja, e traqa ju sipo së troa thith. E cili, tro ha ketr la hni ne la ka ini tus. (Sal. 141:2) Celë hi hna melën hnei Hanae qa Zapo. Mekune hi angeic la thithi ne la ketre trejin ka sine la ini tusi angeic. Öni Hanae: “Öhne hi ni laka, catrecatre la aqane imelekeu i angeic me Iehova, nge celë fe hi hnenge hna ajan. Ketre, kola ketr la hning la angeic a qaja la ëjeng ngöne la thith.” w21.03 9-10 par. 7-8

Hnei Iesu hna qaja koi Paulo aposetolo ka hape, tro kö angeic a traqa e Roma. Ngo hnene la itre xaa atre Iudra hna thele troa humuthi Paulo. E cili, hnei Kalaudio Lusia, tane isi angetre Roma, hna xatua angeic. Hnei nyidrëti hna upe la itre sooc troa xomi Paulo a tro Kaisaria (105 km qa Ierusalema). Ame e cili, hnei Filiki gavena hna iup “troa tro sai Paulo hnine la hnalapa i Herodra, me thupë angeic e cili.” Eje hi, pëkö jole ka traqa koi Paulo. (Itre hu. 23:12-35) Ngazo pe, hna nyihnai Filiki hnei Feso matre troa gavena. Nge hnei Feso hna thele “troa wangaloinyi angeic hnei angetre Iudra.” Öni nyidrë koi Paulo: “Eö kö a hane pi tro Ierusalema matre tro ni a kotrë eö pine la itre ewekë hna upe zö eö?” Atre hnyawa hi Paulo laka, maine tro angeic a tro Ierusalema, tro ha humuthi angeic. Öni Paulo: “Eni a hë koi Kaisara!” E cili, hnei Feso hna ithanata me ange atresi, me hape: “Hnei eö hna hë koi Kaisara, tro ha tro sai eö koi Kaisara.” Hnei Paulo hna tro Roma eë matre iananyi memine la itre ithupëjia me angeic.—Itre hu. 25:6-12. w20.11 13 par. 4; 14 par. 8-10

Easë asë hi a mekune hmaca la itre tria hna kuca ekö. (Rom. 3:23) Ame la itre xan, angatr a mekun la itre ngazo hna kuca qëmekene troa atre la nyipici. Ame pena itre xan, angatr a mekun la itre ngazo hna kuca thupene la hna xomi bapataiso. Celë hi matre, ngacama easa thele troa kuca la loi, ngo “itre ka tria pala hi së.” (Iako. 3:2; Rom. 7:21-23) Eje hi, tha madrine kö së ngöne la easa mekun la itre tria së, ngo ame pe, hetre thangane ka loi. Pine nemen? Pine laka, celë hi ka troa xatua së troa saze me nuetrije la itre aqane ujë ka ngazo. (Heb. 12:12, 13) Ketre, maine jë ase hë së ietrane la itre ngazo së, nge hna nue fe itre eje hnei Iehova, ngo easë palahi a mekun la itre tria së ekö. Celë hi matre easa hnehengazo me hleuhleu. (Sal. 31:10; 38:3, 4) Önine la ketre trejine föe ka mekun la itre tria i angeic ekö: “Ame koi ni, tha nyipiewekë kö troa huliwa i Iehova ke, tha tro kö ni a hane mel ngöne la Paradraiso.” Celë fe hi hna mekun hnene la itre xaa Keresiano. Ngo tha tro kö sa thëthëhmine laka, ketre hnö i Satana lai. Angeic a madrine ngöne la easa mekun laka, ka luzi hë së, ngo hna nue pe la itre ngazo së hnei Iehova!—Wange ju fe la 2 Korinito 2:5-7, 11. w20.11 27 par. 12-13

Hnene la atre Levi ka cinyihane la tusi Salamo hna piine la mele ne la itre atr ka ngazo. (Sal. 73:2-9, 11-14) Eje hi, lolo me tingeting la mele ne la itre ka trenamo. Hnene la atre Levi hna saze aqane mekun me catre thele la aqane waiewekë i Iehova. E cili, madrin me tingeting hmaca angeic. Öni angeic: “Pëkö kete hnenge hna ajan’ e celë fen, nga [Iehova] hmekuje hi.” Ketre tu së fe, tha tro kö sa piine la mele ne la itre ka ngazo. Tha ka cile huti kö la madrine i angatr. (Ate cai. 8:12, 13) Maine tro sa piine la mele ne la itre ka ngazo, tro hë sa kucakuca me thë la aqane imelekeu së me Iehova. Maine traqa ju së cile kowe la jole cili, loi e tro sa nyitipune la atre Levi. Loi e tro sa trongëne la itre eamo ka lolo nge ka amamane la etrune la ihnimi Iehova. Loi e tro fe sa nyisineene la itre ka kuca la aja i Nyidrë. Maine tro sa thele troa acatrene la ihnimi së koi Iehova hune la itre xaa ewekë, tro hë sa madrin me lapa ngöne la gojeny ka tro kowe “la nyipi mel.”—1 Tim. 6:19. w20.12 19 par. 14-16

Ame la easa nue asë koi Iehova la itre jole së ngöne la thith, loi e tro fe sa qaja la hni ne ole së koi Nyidrë. Loi e tro sa lapa mekun la itre manathith hne së hna kapa qaathei Nyidrë ke, celë hi ka troa xatua së ngöne la easa cile kowe la itre jol. The hnehengazo kö e thatreine kö epuni qaja la itre aliene hni epun koi Iehova. Maine tro hi sa qaja ka hape, “Xatua ni jë!” ke, Nyidrëti hi lai a dreng. (2 A. l. ite jo. 18:31) Tha tro kö a mejiune kowe la sipu inamacane së, ngo kowe la inamacane i Iehova. Ame ngöne lo itre macatre 700 M.P.K., hnene la nöje i Iudra hna xou wanga troa lepi angatr hnei angetre Asuria. Celë hi matre hnei angatr hna sipo ixatua koi angetre Aigupito, ketre nöje trenyiwa. (Is. 30:1, 2) E cili, hnei Iehova hna hmekë angatr ka hape, tro lai a hetre ethane kowe la nöj. (Is. 30:7, 12, 13) Jëne Isaia, hnei Iehova hna xatua angatr. Öni Nyidrë: “Tro nyipunie a egöcate hnene la tingetinge me lapaun [i nyipunieti koi ni].”—Is. 30:15b. w21.01 3-4 par. 8-9

Kola troa acile la ala 144 000 troa joxu me itretre huuje me Keriso e hnengödrai. (Hna ama. 20:6) Tru la madrine la itre atrene la lapa ka cahae i Akötresie, ngöne la kola kapa hnene la itre hna iën cili la edrö i angatr e hnengödrai. Thupene la Ioane aposetolo a qaja la ala 144 000 lao joxu me itretre huuj, hnei angeic hna meköl goeëne la ka “alanyimu atraqatr” ka mele pe ngöne la isi Amagedro. Alanyimu catre kö angatr hune lo pane gurup, nge pëkö ka atreine e la etru i angatr. (Hna ama. 7:9, 10) Eje hi, “angatr a heetrë iheetre ka qea ka wië” ke, hnei angatr hna “thupën matre tha tro kö a adronyi” angatr hnene la fene i Satana. Hnei angatr hna mele nyipici koi Iehova Akötresie me Keriso. (Iako. 1:27) Angatr a sue ka hape, Iehova me Iesu Neköi Mamoe la ka amele angatr. Ketre, angatr a xome la itre dröne pama nyine amamane laka, ame koi angatr, Iesu la Joxu hna iën hnei Iehova.—Wange ju la Ioane 12:12, 13. w21.01 15-16 par. 6-7

Loi e tro la itre trahmanyi a xomi ini qa ngöne la tulu i Iehova me Iesu, matre xatua angatr troa xome hnyawa la hnëqa ne la he ne fami. Loi e tro angatr a hetre hni ne ipië. Ngacama ka sisitria catre la inamacane i Iehova, ngo Nyidrëti a dreng la itre mekuna ne la itre hlue i Nyidrë. (Gen. 18:23, 24, 32) Ngacama Akötresieti ka pexeje Iehova, ngo tha Nyidrëti kö a upi së troa pexej. Nyidrëti pe a xatuane la itre hlue i Nyidrë troa mele madrin. (Sal. 113:6, 7) Öni Tusi Hmitrötr ka hape, Iehova la ‘ixatua.’ (Sal. 27:9; Heb. 13:6) Ketre, hnei Dravita joxu hna qaja ka hape, hnene laka, ka hni ne ipië Iehova, matre hnei angeic hna atreine xome hnyawa la itre hnëqa i angeic. Pane mekune jë së la tulu i Iesu. Ngacama nyidrëti la Maseta me Joxu, ngo hnei nyidrëti hna wasine la itre waca ne la itretre drei nyidrë. Öni Iesu: “Eni hi lai a amamai tulu koi nyipunie, matre ame la hnenge hna kuca koi nyipunie, hane jë fe kuca tun.” (Ioane 13:12-17) Ngacama ka draië catre kö la hnëqa i Iesu, ngo tha aja i nyidrëti kö tro la itre xan a nyihlue i nyidrë. Nyidrëti pe la ka huliwa koi itre xan.—Mat. 20:28. w21.02 3-4 par. 8-10

Itre trejin nekötrahmany, ka nyipiewekë epuni e hnine la ekalesia. Eje hi, hetre trengecatre i epun. Maine jë, epuni a ajane troa xome la hnëqa ne atre ixatua. Ngo epuni a mekun laka, tha ajane kö itre xan troa hamë hnëqa i epun pine laka, co petre kö epun maine pëkö hnei epuni hna atreine pena. Ame pe, hetre nyine tro epuni a kuca, matre tro la itre atrene la ekalesia a mejiune me metrötrë epun. Haawe itre trejin nekötrahmany, hetre hnei epuni kö hna atreine kuca? Ijiji epuni kö troa huliwane itre ej thatraqane la itre trejin? Maine jë, tro epuni a amamane kowe la itre trejin ka qatre hë, la aqane troa ini tus me hnëkëne la itre icasikeu jëne la tablet me mobilis. Celë hi ketre aqane tro epuni a huliwane la itre hnei epuni hna atrein. Maine epuni a kuca la ketre ewekë, thele catrëne jë troa amadrinëne la Keme i epun e hnengödrai. w21.03 2 par. 1, 3; 7 par. 18

Ngacama tru catre kö la hna ini hnene la föe hune la trahmany, ngo hnëqa i trahmanyi troa eköthe la hmi ne la fami, me acatrene la lapaune i angatr. (Efe. 6:4) Eje hi laka, itre föe a drengethenge la itre föi angatr. Ngo ame pe, nyipiewekë tro angatr a sipu acatrene la aqane imelekeu i angatr me Iehova. Loi e tro la itre föe a xomi ijine matre troa e me lapa mekun la itre ini qa hnine la Tusi Hmitrötr. Celë hi lai ka troa acatrene la ihnim me metrötre i angeic koi Iehova, me hamë madrine i angeic troa metrötrëne la föi angeic. Eje hi, tru catre kö la madrinene la itre föe ka hnimi Iehova me drengethenge la itre föi angatr, hune la itre ka tha metrötrëne kö la itre föi angatr. Angatr a amamai tulu kowe la itre nekötrahmanyi me itre neköjajiny. Ketre, jëne la aqane ujë i angatr, kola hetre tingeting ngöne la fami me ngöne la ekalesia. (Tito 2:3-5) Ame enehila, alanyimu la itre föe ka nyihlue i Iehova.—Sal. 68:11. w21.02 13 par. 21-23

Hnei Paulo hna amamai tulu göne la aqane troa catr me cile hut. Eje hi laka, hnei angeic hna hane kucakuca. Ngo pine laka, hnei angeic palahi hna sipo trengecatre koi Iehova, matre hnei angeic hna cile hut ngöne la itre itupath. (2 Kor. 12:8-10; Fil. 4:13) Ijije hi tro sa hane catr me cile hut tui Paulo, e hne së hna thele ixatua thei Iehova. (Iako. 4:10) Tha tro kö sa mekun laka, kola traqa la itre jol ke Akötresieti a ameköti së me haji së. Ngo öni Iakobo aposetolo: “Hnine la itupath, the tro pi kö ketre a qaja ka hape: “Kola tupathi ni hnei Akötresie.” Ke thatreine kö troa tupathi Akötresie hnene la itre ewekë ka ngazo, nge thatreine kö nyidrë tupathi ketre tune lai.” (Iako. 1:13) Maine xecie koi së la itre trengewekë celë, tro hë sa easenyi catre koi Iehova, Keme së ka tru ihnimin. Ame Iehova ke, “tha ka saze kö nyidrë.” (Iako. 1:17) Hnei Nyidrëti ekö hna xatuane la itre pane Keresiano, haawe, tro fe Nyidrëti lai a xatua së enehila. Loi e tro sa sipo Nyidrëti troa hamëne la inamacan, me lapaune me catr. Nge tro Nyidrëti a sa la thithi së. w21.02 31 par. 19-21

Loi e tro sa nyisineene la ka ini tusi me easë. Nyipiewekë tro sa wangatrune la itre ka ini tus me ka sine la itre icasikeu. (Fil. 2:4) Maine jë, tro sa qaja aloine la itre trengecatre hnei angatr hna kuca, me hnyingë pengöne la ini tusi angatr, me fami angatr, me huliwa i angatr. Tro hë lai a acatrene la aqane imelekeu së me angatr. Maine tro sa nyisinee i angatr, tro hë angatr a kökötr ngöne la nyipici. Maine ketre ka ini tusi a kökötr ngöne la nyipici, loi e tro sa amamane laka, ka nyipiewekë angeic e hnine la ekalesia. Maine jë, tro sa hë angeic kowe la hnalapa së. (Heb. 13:2) Nge ame hë la kola nyiqane cainöj hnene la ka ini tus, ijije hi tro sa ce cainöj me angeic. Öni Diego qa Brésil: “Alanyimu la itre trejin ka sipone troa ce cainöj me eni. Celë hi ka aijijë ni troa atrepengöi angatre hnyawa me xomi ini qa ngöne la tulu i angatr. Ketre, hna acatrene la aqane imelekeung me Iehova me Iesu.” w21.03 12 par. 15-16

Hnei Iesu hna upe la itretre dreng troa hnime la itre ithupëjia me angatr. (Mat. 5:44, 45) Hapeu, ka hmaloi kö? Waea. Ngo ijije hi troa xatua së hnene la uati hmitrötre i Akötresie. Ame la wene ne la ua, tre, ihnim, me atreine itreqe, me loi hni, me menyik, me xomehnöth. (Gal. 5:22, 23) Itre thiina lai ka xatua së troa xomihni ngacama kola methinë së. Hnei itre xan hna saze pine laka, hnene la itre föi angatr, me itre nekö i angatr, me itre ka lapa ezi angatr, hna amamane la itre thiina cili. Nge itre hlue i Iehova hë angatr enehila. Celë hi matre, maine jole koi së troa hnime la itre ka methinë së, loi e tro sa thith me sipo Iehova la uati hmitrötre i Nyidrë. (Luka 11:13) Ketre, loi e xecie koi së laka, sisitria catre kö troa drengethenge Akötresie. (Ite Edomë 3:5-7) Eje hi, ame la easa methinëne la ketre atr ke, hace me hleuhleu la mele i angeic. Ngo loi e tro pe sa ihnim matre tro angeic a saze. E cili, tro hë sa amadrinë Iehova. w21.03 23 par. 13; 24 par. 15, 17

Ioela a perofetane la ketre isi. (Ioela 2:1, 8, 11) Öni Iehova ka hape, tro Nyidrëti a upe la ‘hnënge isi’ (lo trongene isi angetre Babulona) matre troa lepe la angetre Isaraela ka tha idrei. (Ioela 2:25) Ketre, kola xulu qa “kolopi” la trongene isi angetre Babulona pine laka, ej a lepe la götrane kolopi ne la nöje Isaraela. (Ioela 2:20) Hna aceitunëne la trongene isi cili me iume sipa hna eatrongëne hnyawa. Öni Ioela: “Tro [la sooc] a isa trongëne la ite jë i [angeic]. . . . Tro nyudeni a fina agö ngöne la lapa . . . tro nyudeni a elë hune la ite uma, me Iöjë ngöne la ite mamalama kösë ite ate kë ’nö.” (Ioela 2:8, 9) Nemene la ka mama ngöne la ceitun? Kola mama la itre sooc, nge pëkö hnë zae. Ketre, pëkö ka atreine troa kötrene la trongene isi angetre Babulona! Eje hi, tune la iume sipa, kola isi me lep hnei angetre Babulona (maine angetre Kaledaia) la traon e Ierusalema lo 607 M.P.K. Öni Tusi Hmitrötr: “Hnei joxu ne Kaledaia . . . [hna] tha hnime kö la thupëtesiji me jajiny, me qat, me ka qia.”—2 A. l. ite jo. 36:17. w20.04 5 par. 11-12