Febuare

Easa nyitipu Iehova ngöne la easa thele troa trotrohnine la itre trejin. Nyipiewekë tro sa atrepengöne hnyawa la itre trejin. Loi e tro sa ithanata me angatr qëmeken me e thupene la itre icasikeu. Ijije fe hi troa ce cainöj maine ce xeni pena me angatr. Tro sa sesëkötr ke, ame lo trejin hne së hna mekun ka hape, ka calogitr ke, ka lapa thaup pe hi angeic. Nge ame lo trejin hne së hna mekun laka, ka aja mo ke, ka ham catre angeic. Nge ame pena lo fami ka traqa hmitr ngöne la icasikeu ke, kola icilekeu me angatr hnei kem. (Iobu 6:29) Nyipici laka, tha tro kö sa “lö hnine la itre ifekë jolen.” (1 Tim. 5:13) Ngo ame pe, nyipiewekë troa atrepengöne hnyawa la itre trejin memine la itre hnei angatr hna melën, matre trotrohni angatr. Ketre, loi e tro fe sa atrepengöne hnyawa la trejin hne së hna wesitre kow. E cili, tro ha patre trootro la wesitre së, nge tro pena sa utipin me trotrohni angeic. Nyipici, loi e tro palahi sa atrepengöne hnyawa la itre trejin. Maine tro sa trongëne la itre eamo ne la Tusi Hmitrötr me qaja la aliene la hni së, tro hë sa nyitipu Iehova ka hnime la “nöjei pengön atr.”—1 Tim. 2:3, 4; 2 Kor. 6:11-13. w20.04 16-17 par. 10-12

Ame ngöne la jidr qëmekene troa humuthi Iesu, hnei nyidrëti hna qaja kowe la itretre dreng troa ihnimikeu. Atre hi Iesu laka, maine tro angatr a ihnimi tui nyidrë, tro hë angatr a caas me atreine thipetrije la imethinë. Hanawang la tulu ne la ekalesia ne Thesalonika. Ame ngöne lo xötrei, hna icilekeu memine la itre trejin. Ngo hnei angatr hna catre mele nyipici me ihnim. (1 Thes. 1:3, 6, 7) Hnei Paulo hna iele angatr troa ihnimikeu. (1 Thes. 4:9, 10) Celë hi matre hnei angatr hna xatuane la itre ka kucakuca me hace hni. (1 Thes. 5:14) Eje hi, hnei angatr hna drengethenge Paulo. Celë hi matre, thupene la caa macatre, hnei Paulo hna cinyihane ngöne la hnaaluene tusi nyidrë, ka hape: “Kolo pala hi a kökötre la lapaune i nyipunie, me ihnimikeu i nyipunie.” (2 Thes. 1:3-5) Hnene la ihnimi ne la itre Keresiano hna aijijë angatr troa cile kowe la nöjei pengöne jol. w21.03 22 par. 11

Maine easa ajane troa kapa la mel ka pë pun, loi e tro sa nyenyape ngöne la gojenyi ne mel. (Itre hu. 20:24; 1 Pet. 2:21) Eje hi, tha aja i Satana kö me itre sine xöle i angeic, tro sa lapa ngöne la gojenyi cili. Aja i angatre pe tro sa “ce nyinyape” me angatr. (1 Pet. 4:4) Celë hi matre, angatr a hnyimasai së me aqane mele së, me qaja ka hape, ka loi kö la mele i angatr ke, pëkö ka hnöthi angatr. Ngo itre trengathoi pe. (2 Pet. 2:19) Nyipiewekë tro sa iëne la nyipi gojeny! Ame la aja i Satana ke, tha tro hmaca kö sa nyenyape ngöne la gojeny ka ilitr ke, “jë ne tro kowe la mel.” Angeice pe a ajane tro sa nyenyape ngöne la gojeny ka isaisa laka, alanyimu la ka xötrën. Tha jole kö troa nyenyape ngöne la gojenyi cili. Ngo “jë ne tro kowe la mec.” (Mat. 7:13, 14) Maine easa ajane tro palahi a nyenyape ngöne la nyipi gojeny me iananyi memine la itre xan, loi e tro sa catre lapaune koi Iehova me drengethenge Nyidrë. w20.04 26 par. 1; 27 par. 5, 7

Ame ngöne la hneijine së, hnene la musi Russie me itre sine xöle ne ej hna tro kowe “la nöje ka lolo.” (Dan. 11:41) Tune kaa? Ame lo 2017, hnene la joxu ne kolopi hna wathebone la huliwa ne la itre Temoë Iehova me akalabusine la itre xan. Hna wathebone fe la itre itusi angatr, tune la Tusi Hmitrötr hna hape, Fene Ka Hnyipixe Hna Ujën. Ketre, hnei angeic hna thinge la Bethela e Russie memine la itre uma ne Baselaia, me itre hnë asabele. Ame lo 2018, kola mama kowe la Lapa Ne Xomi Meköt laka, musi Russie me itre sine xöle ne ej la joxu ne kolopi. Ngo tha hnene kö la itre hlue i Iehova hna hane icilekeu memine la mus, ngacama kola qanangazo angatr. Angatre pe a trongëne la eamo ne la Tusi Hmitrötr ka hape, troa thithi sane la “itre trene hnëqa ka tru,” ngöne la angatr a axecië mekun göi hmi. w20.05 14 par. 9

Itre kem me thin, loi e tro la itre nekö i epuni a acatrene la aqane imelekeu i nyudren me Akötresie, me mejiun laka, ka nyipici la itre ini qa hnine la Tusi Hmitrötr. Maine epuni a ajane troa inine la nyipici kowe la itre nekönatr, loi e tro epuni a amamai tulu. Loi e tro epuni a xomi ijin matre troa ini Tusi Hmitrötr me lapa mekun la itre hnei epuni hna inin. Tro hë la itre nekönatr a nyitipu epun. Tro fe a ini nyudren troa ithel ngöne la itre itusi së, tune la aqane kuca kowe la ketre hnainin. Celë hi aqane troa xatua nyudren troa hnimi Iehova, me amamane la hni ne ole i nyudren kowe “la hlue ka nyipici me ka inamacan” lo hna acil, matre troa hamë xen ngöne la götrane u.” (Mat. 24:45-47) Tha tro hi a ini Tusi Hmitrötr memine la itre nekönatr. Loi e tro fe a xatua nyudren troa acatrene la lapaune i nyudren, me ini nyudren “la itre ewekë ka jui i Akötresie” thenge la macatre i nyudren me itre hnei nyudren hna atre.—1 Kor. 2:10. w20.07 11 par. 10, 12-13

Ala ije la itre atr ka imelekeu hnyawa me Akötresie enehila? Traqa koi itre milio. Hnei angatr hna lapaune kowe la thupene mel, matre itre nyipi sinee i Akötresie angatr. Ketre, jëne la thupene mel, Iehova a aijijë së troa nue la mele së koi Nyidrë me xomi bapataiso, matre ce easë fe hë memine la itre milio lao nyipi sinee i Akötresie, lo Ka Draië Catr! Tro sa amamane tune kaa ka hape, ka tru koi së la aqane imelekeu së me Iehova? Loi e tro sa mele nyipici tui Aberahama me Iobu, ngacama ka hekö catre hë së nyihlue i Iehova. Nyimu macatre ne mele nyipici nyidroti koi Iehova. Tro fe sa tui Daniela. Tro kö a tru koi së la aqane imelekeu së me Akötresie hune la itre sipu aja së. (Dan. 6:7, 10, 16, 22) Eje hi, jëne la ixatua i Iehova, ijije hi tro sa cile catr ngöne la nöjei itupath me lapa qale koi Nyidrë.—Fil. 4:13. w20.05 27 par. 5-6

Hnei Dravita joxu hna öhne la kola si hnene la ketre föe. Atre hnyawa hi Dravita la wathebo i Iehova ka hape: “The tro kö eö a meciune la fö’ i kete ate.” (Eso. 20:17) Ame pe, hnei Dravita palahi hna goeë Batheseba. Tha pexeje hë la hni Dravita koi Iehova ke, nyidrëti ha hnimi Batheseba. Ngacama hnei Dravita hna hnim me xoue Iehova, ngo hnei nyidrëti hna kei kowe la ngazo me adrone la ëje i Iehova. Nge zöi Dravita matre hna akötrëne la itre atrene la hnepe lapa i nyidrë. (2 Sam. 11:1-5, 14-17; 12:7-12) Hnei Iehova hna haji Dravita, matre lolo hmaca ha la aqane imelekeu i nyidro. (2 Sam. 12:13; Sal. 51:2-4, 17) Ngo tha thëthëhmine kö Dravita la akötr qa ngöne la ngazo hna kuca. Atre hi Dravita laka, nyidrëti a tria ke, tha pexeje hë la hni nyidrë koi Iehova. Ijije hi tro sa saze la itre trengewekë i Dravita ngöne Salamo 86:11 me hape: “Hamë ni pi la hni ka pexej.” Hapeu, hnei Iehova kö hna sa la thithi nyidrë? Eje hi. Öni Tusi Hmitrötr ka hape, ‘ka pexeje la hni’ Dravita koi Iehova Akötresie.—1 Ite jo. 11:4; 15:3. w20.06 11 par. 12-13

Tusi Hmitrötr a aceitunëne la ihnimi Iehova memine la ketre otretr. Pine nemen? Pane mekune jë laka, easa troa nunucil. Ngo easa madrin ke, kola kuiën koi së la ketre ewekë. Ame pe, tha celë kö lai ka troa amele së. Kola hnötr me lepanyi la tim, matre nyipiewekë tro sa të hune la ketre he. Easa ajane tro la ketre a huli së qa kuhu hnagejë. Tune la hnei Iehova hna qaja ngöne la topik enehila, Nyidrëti a “e” la angetre Isaraela ka trotriji Nyidrë. Ame fe enehila, Iehova a xatuane la itre trejin ka nanazij me ka akötr hnene la itre jol. Aja i Iehova tro angatr a atre la etrune la ihnimi Nyidrëti koi angatr. Iehova fe a ajane tro angatr a bëeke koi Nyidrë. Nge tro Iehova a upi së troa amamane la ihnimi Nyidrëti koi angatr. Nyipiewekë tro sa amamane kowe la itre ka nanazij laka, Iehova a hnimi angatr nge ketre tu së fe. w20.06 27 par. 12-13

Thupene la hna humuthi Setefano, hnene la itre Keresiano hna kötr qa Ierusalema “kowe la itre nöj ne Iudra me Samaria,” uti hë e Kupero me Anetioka. (Itre hu. 7:58–8:1; 11:19) Drei la ketre jol ka tru koi angatr! Ame pe, hnei angatr palahi hna catre cainöj, matre nyimutre la itre ekalesia hna acil ngöne la itre nöje cili hna musinëne hnei Roma. (1 Pet. 1:1) Ngo hetre itre xaa jol palakö ka troa traqa. Ame lo 50 M.K., hnei Kalaudio, joxu ne Roma, hna helëne la angetre Iudra qa Roma. Celë hi matre hnei angatr hna nue la itre hnalapa i angatr matre troa mel ngöne la ketre nöj. (Itre hu. 18:1-3) Ame lo 61 M.K., hnei Paulo aposetolo hna cinyihane ka hape, alanyimu la itretre dreng hna qanangazone me akalabusin, nge hna thapa la itre mo i angatr. (Heb. 10:32-34) Ketre, ame la itre xaa Keresiano ke, hna tithi angatr hnei mec maine pena pëkö ewekë i angatr.—Rom. 15:26; Fil. 2:25-27. w21.02 26-27 par. 2-4

Eje hi, thatreine jë kö tro Satana me itre sine xöle i angeic a ajojezine la ketre trejin ka catre lapaun. (2 Ioane 8, 9) Ame enehila, nyimutre la itre atr ka methinë së. (1 Ioane 3:13) Hnei Ioane hna qaja ka hape, “fene hnengödrai asë a lapa fene la musi ne la atre ka ngazo.” (1 Ioane 5:19) Easenyi hë troa paatre la fene celë, matre tru catre la elëhni Satana. Angeic a thele troa iaö së, jëne la itre huliwa ka sis me itre trengathoi ne la itre ka iamenumenu. Angeice fe a akötrëne la itre hlue i Akötresie. Atre hnyawa hi Satana laka, easenyi hë la troa apatrenyi angeic. Celë hi matre, angeice palahi a thele troa sewe së troa cainöj me ajojezine la lapaune së. Eje hi, tha sesëkötre kö së laka, kola wathebone la itre huliwa së ngöne la itre xaa nöj. Ame ngöne la itre nöje cili, kola catre xomihni hnene la itre trejin. Kola amamane koi së laka, ijije hi tro sa cile catr ngöne la nyipici, ngacama nyimutre la itre nyinyithiina i Satana! w20.07 24 par. 12-13

Iehova a ajane tro la itre atr a mel epine palua ngöne la ihnadro ka mingöming. Ngo hnei Adramu me Eva hna icilekeu memine la Keme i nyidro. Celë hi matre, tha ijiji nyidroti hë me itre matra i nyidro troa mel epine palua. (Rom. 5:12) Nemene la hna kuca hnei Iehova? Hnei Nyidrëti hna amamane la aqane tro Nyidrëti a amelene hmaca la itre atr. (Gen. 3:15) Jëne la thupene mel, tro Nyidrëti a thapa la itre matra i Adramu me Eva qa ngöne la ngazo me mec. Ketre, tro Nyidrëti a hamëne la mel ka pë pun kowe la itre ka thel troa nyihlue i Nyidrë. (Ioane 3:16; 1 Kor. 15:21, 22) Jëne la Nekö i Nyidrë, Iehova a troa amelene hmaca la itre miliar lao atr. Ngo hapeu, tro kö Nyidrëti a aca tro amele angatr asë? Waea. Pine nemen? Maine tru palaha la itre atr hna amelen, tro ha jol troa eköth la huliwa. Iehova a ajane troa eköthe hnyawa la huliwa i Nyidrë, matre tro palahi a tingeting.—1 Kor. 14:33. w20.08 14 par. 3; 15 par. 5

Loi e tro sa amamane kowe la hnainin laka, easa ini tusi me angeic matre xatua angeic troa ketre Temoë Iehova. Hetre nyine tro la hnainin a kuca qëmekene troa xomi bapataiso. Loi e tro angeic a pane atrepengöi Iehova hnyawa, me acatrene la ihnim me lapaune i angeic koi Nyidrë. (Ioane 3:16; 17:3) Celë hi aqane tro angeic a acatrene la aqane imelekeu i angeic me Iehova me hetre nyipi sinee e hnine la ekalesia. (Heb. 10:24, 25; Iako. 4:8) Thupene lai, loi e tro la hnainin a nuetrije la itre hna majemine kuca ka ngazo me ietra. (Itre hu. 3:19) Nge pine laka, catrecatre la lapaune i angeic, tro hë angeic a tro fë la nyipici koi itre xan. (2 Kor. 4:13) E cili, tro hë angeice a sa xepu koi Iehova me xomi bapataiso. (1 Pet. 3:21; 4:2) Drei la madrine ka tru kowe la ekalesia! Loi e tro palahi sa qaja aloine me ithuecatre kowe la hnainin ngöne la angeic a kuca la itre ewekë celë. w20.10 17-18 par. 12-13

Maine tro palahi sa goeëne la itre xaa trejin, tro hë sa mekun laka, tha nyipiewekë kö së e hnine la ekalesia. Ame la itre xan, ka maca angatr troa cile fë cainöj, me eköthe la huliwa maine thupëne hnyawa la itre trejin. Maine jë, epuni a mekun laka, ka sisitria catre kö angatr hui epun. Kolo lai a amamane laka, itre ka ipië epun. (Fil. 2:3) Ngo loi e tro sa thupën. Maine tro palahi sa goeëne la itre trejin ka maca, tro hë sa kucakuca. Nge tune lo hna qaja hnei Paulo aposetolo, tro hë sa mekun laka, tha nyipiewekë kö së ngöne la ekalesia. Hnei Iehova lo hna isa hamë ahnahna kowe la itre pane Keresiano ekö. (1 Kor. 12:4-11) Ngacama isapengöne kö la itre ahnahna i angatr, ngo ka nyipiewekë asë hi angatr koi Iehova. Eje hi laka, ame enehila, tha uati hmitrötre hmaca kö a upi së troa kuca la itre iamamanyikeu. Ame pe tha tro kö sa thëthëhmine laka, hetre itre ewekë hne së hna isa atreine kuca, nge itre ka nyipiewekë së koi Iehova. w20.08 23 par. 13-15

Ame la easa sipo ixatua me trengecatr jëne la thith, Iehova a sa la itre thithi së me xatua së, nge tha tro kö Nyidrëti a nuaxöji së. (Itre hu. 4:29, 31) Ce Nyidrëti palahi me easë. Pane mekune jë la aqane xatua së hnei Iehova ngöne la easa cile kowe la itre jol me saze aqane mel. Hnei Iehova ekö hna amelene la nöje i Nyidrë ngöne la Hnagejë Ka Palulu. Ijije hi tro Nyidrëti a xatua së troa xötrethenge Keriso. (Eso. 14:13) Epi ceitu la lapaune së memine la atre cinyihane la Salamo ka nyi tane la topik ne la drai. Tro kö Iehova a xatuane la itre ka xötrei cainöj troa catr. Hanawang la tulu i Tomoyo, ketre trejine föe. Ame la angeic a kuca la pane qënehlö, önine lai atr: “Temoë Iehova epon? Tro pi qa la!” nge eahlo a hna la qënehlö. Tha hnei Tomoyo kö hna xou. Öni angeic: “Eni a madrin ke, atre hë eahlo ka hape, Temoë Iehova ni.” Ame enehila, ketre pionie lapa ha Tomoyo. w20.09 6 par. 13-14

Öni Asa kowe la nöj ka hape, hnei Iehova “hna amanonyi shë xöteith.” (2 A. l. ite jo. 14:6, 7) Ame pe, tha hnei nyidrëti kö hna mekun laka, pëkö hnei angatr hna troa kuca ke, lolo la mele i angatr. Ngo hnei nyidrëti hna xup la itre traon, me itre hag, me itre qanahag. Öni nyidrëti kowe la nöje Iudra: “Eje kö la nöje qëmeke shë.” Ame koi nyidrë, tha tro kö la itre ithupëjia a sawa la nöje Iudra troa kuca la hnei angatr hna ajan, tune la troa xupi uma. Nyidrëti hi lai a ithuecatre kowe la nöj troa inamacan ngöne la itre ijine loi. Ame ngöne la itre ijine loi cili, hnei Asa hna acatrene la trongene isi nyidrë. (2 A. l. ite jo. 14:8) Hapeu, pëkö mejiune i Asa koi Iehova? Waea. Atre hi Asa joxu laka, nyipiewekë tro nyidrëti a hnëkëne la nöj troa cile kowe la ithupëjia. Ame koi nyidrë, tha tro kö a cile hut la itre ijine loi cili. Nge celë hi lai ka traqa. w20.09 15 par. 4-5

Maine jë, tro la ketre qatre thup a mekun laka, loi e troa acili wathebo, matre thupëne la itre mamoe i Akötresie. Hetre itre ewekë ka isapengöne ngöne la hnëqa ne la itre qatre thup me hnëqa ne la itre he ne fami. Hnei Iehova hna acile la itre qatre thup matre troa amekötin me upetröneë la itre ka tha ietra kö. (1 Kor. 5:11-13) Ame ngöne la ketre götran, hnei Iehova hna ahnith kowe la itre he ne fami la ketre hnëqa ka tha eje kö thene la itre qatre thup. Hnei Iehova hna nue la itre kem troa acili wathebo me xatuane la fami angatr troa trongëne itre ej. (Rom. 7:2) Celë hi matre, ijije hi tro la kem a axeciëne la hawa ne tro la itre nekönatr a bëek e hej koi hnalapa. Nge ijije hi tro nyidrëti a ameköti nyudren ngöne la nyudreni a tha idrei. (Efe. 6:1) Ngo loi e tro angeic a pane ce ithanatane la itre wathebo cili memine la föe i angeic ke, “ca ngönetrei hë nyidro.”—Mat. 19:6. w21.02 16-18 par. 10-13

Ka sisitria catre la itre nyipici qa hnine la Tusi Hmitrötr pine laka, Iehova hmekuje hi a amamane itre ej kowe la itre atr “ka hmalahnin.” (Itre hu. 13:48) Atre hi angatr laka, Iehova la ka acile la hlue ka nyipici me ka inamacan matre troa inine la itre atr. (Mat. 11:25; 24:45) Eje hi, ka sisitria catre la itre nyipici cili, ngo nyipiewekë troa xatua së troa trotrohnine itre ej. (Ite Edomë 3:13) Hnei Iehova hna ahnith koi së la ketre hnëqa ka tru, ene la troa inine la itre atr la nyipici göi Nyidrë me itre aja i Nyidrë. (Mat. 24:14) Eje hi, ka sisitria catre la maca cili. Pine nemen? Pine laka, kola aijijëne la nöjei atr troa hane sine la lapa ka cahae i Iehova me hetrenyi la mele ka pë pun. (1 Tim. 4:16) Ngacama tha tru kö la hne së hna cainöj, ngo loi e tro palahi sa kuca la huliwa cili ka sisitria. (1 Tim. 2:3, 4) Drei la ketre manathith ka tru la troa ce huliwa me Akötresie!—1 Kor. 3:9. w20.09 26-27 par. 4-5

Ame lo Paulo aposetolo a tro Roma, hnei Iehova hna upe la itre xaa Keresiano troa xatua angeic. Eje hi, hnei Aritako me Luka, lue sinee i Paulo, hna ce tro me angeic a tro Roma. Hnei nyidroti hna nue mel koi Paulo. Tha hnei Iesu kö hna hane qaja koi nyidro ka hape, troa pë ejolene la tronge i nyidro. Nyidroti pë hë a atre e thupen laka, tha tro kö nyidroti a mec. Celë hi matre, hnei Paulo hna olene koi Iehova la hna hamë angeic la lue sinee ka catr matre troa ce tro me angeic e Kaisaria. Ame hë e thupen, trotrohnine hi angatr laka, tha tro kö angatr a mec. (Itre hu. 27:1, 2, 20-25) Ame la angatr a traqa e Sidona, hnei Iulio hna “nue Paulo . . . troa tro kowe la itre sinee i angeic, nge e cili, tro angatr a pane kepe angeice hnyawa.” Thupene lai e Potioli, hnei Paulo me itre sinatronge i angeic ‘hna iöhnyi memine la itre trejin, nge hnei angatr hna upi angeic troa lapa thei angatr koi sevene lao drai.’ Hnene la itre Keresiano e cili hna nyihnyawane la mele i Paulo me itre sinatronge i angeic. Jëne la itre hnei Paulo hna melën, hnei angeic hna ithuecatre me hamë madrine koi angatr.—Wange ju fe la Itre Huliwa 15:2, 3. w20.11 15-16 par. 15-17

Maine hetre nekö i epun, nemene la aqane tro epuni a nyitipu Iosefa me Maria? Ame la hnapan, jëne la aqane ithanata me aqane ujë i epun, loi e troa mama kowe la itre nekönatr la ihnimi epun koi Iehova. Ame la ahnahna ka tru thatraqai nyudren ke, ene la troa ini nyudreni troa hnimi Iehova. Nyipiewekë catre fe troa ini nyudreni troa catre ini tus me thith, me sine la itre icasikeu me cainöj. (1 Tim. 6:6) Eje hi laka, loi e troa huliwa thatraqai nyudren me thupëne la mele i nyudren. (1 Tim. 5:8) Ngo the thëthëhmine kö laka, ame la ka troa aijijëne la itre nekönatr elany troa mel ngöne la fene ka hnyipixe, tre, tha ene kö la troa trenamo ngo aqane imelekeu i nyudren me Iehova. (Ezek. 7:19) Easa madrin ngöne la kola axecië mekun hnyawa hnene la itre kem me thin, matre tro la itre nekönatr a easenyi catre koi Iehova! Ame la itre nekönatr ka tru ngöne la itre fami cili ke, nyudreni palahi a easenyi catr koi Iehova, nge madrine catre nyudren!—Ite Edomë 10:22. w20.10 28-29 par. 10-11

Ame itre xaa ijin, Peteru aposetolo a canga qaja me kuca la ketre ewekë, ngo tha pane mekune pe. Celë hi ka traqa ngöne lo Iesu a qaja kowe la itre aposetolo ka hape, troa akötrë nyidrë me humuthi nyidrë. Hnei Peteru hna canga sa me qaja la topik ne la drai celë. E cili, hnei Iesu hna ameköti angeic. Nge ame lo kola othi Iesu, hnei Peteru hna uthe la taua me thupa la hnangenyë ne la hlue ne la atre huuje ka sisitria. (Ioane 18:10, 11) Hnei Iesu hmaca hna ameköti angeic. Ketre, öni Peteru ka hape, maine tro itre xan a kei me nuetriji Iesu, tha tro kö angeic a nuetriji nyidrë! (Mat. 26:33) Hnei Peteru hna mejiune kowe la sipu trengecatre i angeic. Ame la pun, hnei angeic hna kei kowe la xoue atr me akönia qaja ka hape, thatre Iesu kö hnei angeic. Celë hi matre, hnei angeic hna kucakuca me “treije latresi.” (Mat. 26:69-75) Maine jë, hnei Peteru hna hnying ka hape, tro jë kö Iesu elanyi a nue la ngazo i angeic. Ngacama hnei Peteru hna kei kowe la jol, ngo tha hnei angeice kö hna nuetriji Iehova. Hnei angeice pe hna catr me ce tro hmaca memine la itre xaa aposetolo.—Ioane 21:1-3; Itre hu. 1:15, 16. w20.12 20 par. 17-18

Nyimutre la itre aqane tro la he ne fami a hetre hni ne ipië. Tha tro kö angeic a mekun laka, tro la föe i angeic me itre nekönatr a pexej. Nge loi e tro angeic a drenge hnyawa la angatr a hane qeje mekun. Ketre, ame la trahmanyi ka hetre hni ne ipië ke, angeic a hane ixatua ngöne la hnalapa. Tha ka hmaloi kö ke, ame koi itre xan, itre huliwa i föe lai. Öni Rachel: “Ame ngöne la nöjeng, maine tro la trahmanyi a xatuane la föe i angeic troa wasi peleitr me nyidrawane la hnalapa, tro hë itre xan a mekun laka, tha trahmanyi kö angeic nge hna musinë angeic hnei föe.” Maine ceitu hi ngöne la nöje i epun, tha tro kö a thëthëhmine la tulu i Iesu. Hnei nyidrëti hna wasine la itre waca ne la itretre dreng, ngacama hnëqa ne la ketre hlue. Ame kowe la he ne la fami, sisitria catre kö la föe i angeic me itre nekönatr hune la troa pi mama koi itre xan. w21.02 2 par. 3; 4 par. 11

Ketre ahnahna qaathei Iehova la troa mekune la itre ewekë ekö. Eje hi, ka madrine la mele së ekö. Ngo the qaja palaha la itre manathith hne së hna troa kapa elany. Maine kola akötrë së hnei itre xan, loi e tro sa nue la ngazo hna kuca koi së. Celë hi ka troa xatua së troa catre huliwa i Iehova. Ketre, maine tro palahi sa mekun la itre tria së ekö, tro hë lai a ajolë së troa nyihlue i Iehova. Haawe, tui Paulo aposetolo, loi e xecie koi së laka, tro Iehova a nue la itre ngazo së. (1 Tim. 1:12-15) Easa mejiune troa mel epine palua. Ame ngöne la fene ka hnyipixe, tha tro hmaca kö sa mekun la itre tria së ekö. Öni Tusi Hmitrötr: “Tha tro hmaca kö a mekune la hnapan.” (Is. 65:17) Pane mekune jë la itre trejin ka nyihlue i Iehova koi itre macatre. Ame ngöne la fene ka hnyipixe, tro hmaca angatr a thupëtresij! (Iobu 33:25) Haawe, the mekune hmaca kö la itre drai hnapan. Goeëne jë la mel elany memine la itre manathith hne së hna lapa treqen! w20.11 24 par. 4; 29 par. 18-19

Nemene la hne së hna lapa treqen? Ame ngöne la akötr atraqatr, tro Iehova a thupë së ngöne la lue götran. Ame la hnapan, tro Iehova a thupë së ngöne la itre joxu ne la fen a troa lepi Babulona Atraqatr, ene la itre hmi ka thoi. (Hna ama. 17:16-18; 18:2, 4) Nge ame la hnaaluen, tro Nyidrëti a thupë së ngöne la kola troa apatrene la fene i Satana e Amagedro. (Hna ama. 16:14, 16) Maine tro sa qale catre koi Iehova, thatreine kö tro Satana a apatrenyi së. Eje hi, angeice la hna troa apatren. (Rom. 16:20) Haawe, heetrëne jë la iheetre ne isi, nge the unatrije pi kö! Ketre, the isi caasi pi kö. Xatuane jë la itre trejin, nge trongëne jë la itre hna amekötin hnei Iehova. E cili, tro la Keme së ka tru ihnimin a xatua së me thupë së.—Is. 41:10. w21.03 30 par. 16-17

Nemene la aqane tro sa amamane la lapaune së koi Iehova? Troa trongëne la itre hna amekötin hnei Iehova. Nyimutre la itre tulu e hnine la Tusi Hmitrötr ka amamane la enyipiewekëne troa lapaune koi Iehova. Ame la easa inine la tulu ne la itre hlue i Iehova ekö, loi e tro sa thele la ka xatua angatr troa mejiune koi Nyidrë. Ame lo Hnakotre Ka Tru i Angetre Iudra a wathebone kowe la itre aposetolo troa cainöj, tha hnei angatre kö hna xou. Öni angatr: “Hnëqa huni la troa drengethenge Akötresie hune la atr.” (Itre hu. 5:29) Ketre, tha hnei angatre kö hna xou ngöne la kola thaucë angatr. Pine nemen? Pine laka atre hi angatr laka, tro kö Iehova a ceme angatr nge Nyidrëti a madrine koi angatr. Celë hi matre hnei angatr palahi hna catre cainöjëne la maca ka loi. (Itre hu. 5:40-42) Celë fe hi la ka traqa koi Setefano. Ame la kola troa humuthi angeic hnene la itre ithupëjia, tha hnei angeice kö hna xou. Ame la qëmeke i angeic, kösë “iqëmeke ne angela.” (Itre hu. 6:12-15) Pine nemen? Pine laka, xecie koi angeic laka, Iehova a kepe angeic. w21.01 4 par. 10-11

Kola amamane laka, ka lolo la mekuthetheu i angatr qëmeke i Iehova nge hnei Nyidrëti hna kepe angatr. (Is. 1:18) Hnei angatr hna nue mel koi Iehova me xomi bapataiso. Angatr a catre lapaune kowe la mel hna huujën hnei Iesu nge catrecatre la aqane imelekeu i angatr me Iehova. (Ioane 3:36; 1 Pet. 3:21) Ijiji angatre hi troa cil qëmekene la therone i Akötresie me “kuca la huliwa ka hmitrötr e lai me jidr hnine la uma ne hmi i Nyidrë.” (Hna ama. 7:15) Eje hi, angatr a catre cainöjëne la Baselaia me amë panëne la huliwa i Iehova ngöne la mele i angatr, nge pine pë hë la itre sipu aja i angatr. (Mat. 6:33; 24:14; 28:19, 20) Loi e xecie kowe la ka alanyimu atraqatr laka, tro Akötresieti a thupë angatr thupene la akötr atraqatr. Öni Tusi Hmitrötr: “Ame lo Atre lapane la theron, nyidrëti a hnëkë itat koi angatr matre thupë angatr.” Tro hë angatr a öhne la kola eatr la hna thingehnaean celë: “Tro [Akötresieti] a köletrije la itre trenge timidra qa ngöne la itre lue meke i angatr.”—Hna ama. 21:3, 4. w21.01 16 par. 9-10

Easa madrine troa sine la lapa i Iehova, nge easa kuca asë la hne së hna atrein matre troa metrötrëne la itre hnei Iehova hna acile troa mus. Tusi Hmitrötr a amamane laka, Iehova a wangatrune la itre föe tune la itre trahmany. Ame ngöne lo hneijine la itre pane Keresiano, hnei Iehova hna nunuëne la uati hmitrötre i Nyidrëti kowe la itre trahmany me kowe fe la itre föe. Hnei Nyidrëti hna aijijëne la itre föe troa kuca la itre ewekë ka tru, tune la troa qaja la itre xaa qene hlapa. (Itre hu. 2:1-4, 15-18) Jëne la uati hmitrötr, hnei Nyidrëti hna iëne la itre trahmanyi me föe matre troa ce musi me Keriso e hnengödrai. (Gal. 3:26-29) Nge itre trahmanyi me itre föe la ka mejiune troa mele palua e celë fen. (Hna ama. 7:9, 10, 13-15) Ketre, hnëqa ne la itre trahmanyi me itre föe troa cainöjëne la maca ka loi me inine la itre atr. (Mat. 28:19, 20) Kola qaja ngöne la tusi Itre Huliwa ka hape, hnei Perisila, ketre trejine föe me Akula, föi angeic, hna xatua Apolo, ketre atre inamacan, troa trotrohnine la nyipici.—Itre hu. 18:24-26. w21.02 14 par. 1; 15 par. 4

Itre qatre thup, hnëqa i epun troa xatuane la itre trejin troa maca troa inine la itre atr. (Itre hu. 20:28) Maine ketre trejin a xou troa hamë ini qëmekei epun, sipone jë troa iujine la ini tus. Eje hi, hetre eloin e tro la itre qatre thup a ithuecatre kowe la itre trejin. (1 Thes. 5:11) Ngacama pëkö ka ini tusi me easë, ngo ijije hi tro sa xatuane la ketre atr troa kökötr ngöne la nyipici. Qëmekene troa sine la ketre ini tus, loi e tro sa hnëkë hnyawa matre troa ce huliwa memine la ka hamë ini, me hamë ithuecatr. Loi e tro fe sa nyisineene me amamai tulu kowe la ka ini tus me sine la itre icasikeu. Nge ame la itre qatre thup, loi e tro angatr a xomi ijine matre xatuane la itre ka ini tus. Ketre, nyipiewekë tro angatr a inin, me qaja aloin, me ithuecatre kowe la itre trejin ka hamë ini. Drei la ketre madrin ka tru e troa xatuane la ketre atr troa atrepengöi Iehova hnyawa, me hnim, me nyihlue i Nyidrë! w21.03 13 par. 18-19

Ngacama ketre nekötrahmanyi Dravita, ngo alanyimu la itre ka mejiune koi angeic. Ketre, hnei angeic hna thupëne hnyawa la itre mamoe ne la keme i angeic, ngacama hetre ejolene la huliwa cili. Öni angeic koi Saulo joxu: “Hnenge hlue i cilie hna thupëne la ite mamoe i kaka, nge xulu hë la liona me bea, me xome la nekö i mamoe qa ngöne la hna axö öni; ame hnenge hna weji nyën, me lep, me amelen’ eje qa ngöne la qe i nyën.” (1 Sam. 17:34, 35) Atre hi Dravita laka, ketre hnëqa ka tru la troa thupëne la itre mamoe ne la keme i angeic. Itre trejin nekötrahmany, tui Dravita, loi e tro epuni a eatrëne hnyawa la itre hnëqa i epun. Hnei Dravita palahi hna acatrene la aqane imelekeu i angeic me Iehova. Celë hi ka sisitria catre koi Dravita hune la trengecatre i angeic me atreine elo miuzik. Eje hi laka, Iehova la Akötresi Dravita, ngo Nyidrëti fe la Sinee i angeic. Haawe itre trejin nekötrahmany, nyipiewekë catr tro epuni a acatrene la aqane imelekeu i epuni me Iehova. w21.03 3 par. 4-5