Maac

Eje hi, tha ajane kö së troa qanangazo së me humuthi së. Ngo hnauëne laka, easa madrin ngacama kola methinë së? Hane hi la köni kepin. Ame la hnapan ke, ngacama kola methinë së, ngo easa catre huliwa koi Iehova, matre Nyidrëti a kepe së. (1 Pet. 4:13, 14) Ame la hnaaluen ke, kola acatrene la lapaune së. (1 Pet. 1:7) Nge ame la hnaakönin ke, xecie koi së laka, tro sa kapa la ketre manathith ka tru, ene la mel ka pë pun. (Rom. 2:6, 7) Tru la madrinene la itre aposetolo thupene la melehmaca i Iesu. Eje hi, ame la ketre ijin, hnene la itre hene ne hmi hna thaucë angatr me wathebo angatr troa cainöj. Ame pe, madrine palahi la itre aposetolo. Pine nemen? Pine laka, ame koi angatr, ahnahna la “troa ahmahmanyi angatr pine la ëje i [Iesu].” (Itre hu. 5:40-42) Hnene laka, tru la ihnimi angatr kowe la Maseta i angatr, matre tha xou kö angatr e troa methinë angatr. Ketre, hnei angatr hna amamane la ihnimi angatr ngöne la angatr a “catre cainöjëne la maca ka loi.” Ame enehila, nyimutre la itre trejin ka catre nyihlue i Iehova, ngacama angatr a cile kowe la itre jol. Xecie koi angatr laka, thatreine kö Iehova troa thëthëhmine la itre huliwa me ihnimi hnei angatr hna amamane kowe la ëje i Nyidrë. w21.03 25 par. 18-19

Ame la itre Keresiano hna iën, tha hna hnaho angatr kö memine la mejiune troa mel e hnengödrai. Akötresieti la ka hamë angatr la mejiune cili. Angatr a lapa mekun me thithi fë la mejiune i angatr. Ketre, angatr a lapa treqene la ijine tro angatr a kapa la ahnahna cili. Eje hi, thatreine kö angatr mekun la pengöne ngönetrei angatr elany. (Fil. 3:20, 21; 1 Ioane 3:2) Ame pe, angatr a trengeneune la ijine troa xome la hnëqa i angatr ngöne la Baselaia e hnengödrai. Ame la itre xaa mamoe, angatr a ajane troa mele palua e celë fen. Hnei Iehova hna amë la aja cili e kuhu hni angatr. Angatr a lapa treqene la ijine troa aparadraisone la fen. Angatre fe a ajane troa xupi uma i angatr, me eëny, me hnaho nekönatr ka pë mec. (Is. 65:21-23) Angatr a ajane troa kanothe la fene hnengödrai, me elëne la itre wetr, me ngenu ngöne la itre hnaxulu me itre hnagejë. Aja i angatr troa atrepengöne la nöjei ewekë hna xup hnei Iehova. Ngo ame la ka sisitria, tre, troa easenyi catre koi Nyidrë. w21.01 18-19 par. 17-18

Thupene la hna lepe la nöj hnei angetre Babulona, önine la itre atr: “Pë hë wen, nge pë fe kö ate me öni; nge hna nue kowe la ime i angete Kaledaia.” (Iere. 32:43) Ame hë e thupene la 200 lao macatre ne perofeta Ioela, hnei Iehova hna upi Ieremia troa thingehnaeane la ketre ewekë ka troa traqa göne la isi cili. Kola qaja ka hape, tro la ithupëjia a thele hnyawa la Itretre Isaraela ka kuca la itre ewekë ka ngazo me othi angatr. “ ‘Hana wang, tro ni a upe la itete nyi thö ka ala nyimu, öni Iehova, mate nyi thö angat; nge thupene lai tro ni a upe la itete weji öni ka ala nyimu mate weji angate qa ngöne la ite wete asë, me ite shashala asë, me qa ngöne la ite kaqa ne git. . . . Tro ni a lu a nyi thupene la thina ka menu i angate memine la ngazo i angat.’ ” Eje hi, tune la hna perofetane hnei Iehova, thatreine kö la itre hnagejë me itre hnaxulu troa juetrëne la Itretre Isaraela ka tha ietra, ngöne la ijine kola troa lepi angatr hnei angetre Babulona.—Iere. 16:16, 18. w20.04 5 par. 12-13

Ame ngöne la mele i Lota, hnei angeic hna hmitr troa drengethenge la itre hna amekötin hnei Iehova. Maine jë tro sa mekun ka hape, ka tha idrei lae Lota. Ame pe, tha hnei Iehova kö hna nuaxöji Lota. Hnei Nyidrëti pe hna thele troa amele angeic. Hnene laka “Iehova a hnimi angeic,” matre hnene la lue angela hna ea la itre ime ne la fami angeic me kötre sai angatr tröne la traon. (Gen. 19:15, 16) Nyimu kepin matre Iehova a hnimi Lota. Eje hi, tha canga kötre kö Lota ke, angeic a xouene la itre atrene la traon. Ketre, atre hi Lota la lue joxu ka mala e hnine la hnaop e Hemara, ngöne la hnathup. (Gen. 14:8-12) Ngo nyipiewekë tro Lota a mekun la fami angeic ke, angeice la trahmany me kem. Ketre, ka trenamo angeic, matre ka tru me mingöming la hnalapa i angeic e Sodroma. (Gen. 13:5, 6) Ame pe, tha celë kö lai ka sewe Lota troa canga drengethenge Iehova. Celë hi matre, tha hnei Iehova kö hna wangatrune la tria i Lota. Hnei Nyidrëti hna goeë angeic ceitu me ketre “ate thina ka meköt.”—2 Pet. 2:7, 8. w20.04 18 par. 13-14

Itre trejin nekötrahmany, maine jë, itre xan palakö a mekun laka, nekönatr petre kö epun. Ngo atrepengöi epuni hnyawa hi hnei Iehova. Nge atre hi Nyidrëti la itre hnei epuni hna atreine kuca. (1 Sam. 16:7) Haawe, acatrene jë la aqane imelekeu i epun me Iehova. Celë hi lai hna kuca hnei Dravita. Hnei angeic hna goeëne me lapa mekun la itre ewekë hnei Iehova hna xup. (Sal. 8:3, 4; 139:14; Rom. 1:20) Nyipiewekë mina fe troa sipo trengecatre koi Iehova. Maine jë, kola hnyimasai epun e koilo hna ini ke, ketre Temoë Iehova epun. Sipo ixatua jë koi Iehova. Nge thele jë la itre eamo e hnine la Tusi Hmitrötr, me itre itusi së, me itre video. Ame la epuni a öhne laka, Iehova a xatua epun, tro hë epuni lai a catre mejiune koi Nyidrë. Nge ame la itre trejin a öhne laka, epuni a mejiune koi Iehova, tro fe hë angatre lai a mejiune koi epun. w21.03 4 par. 7

Ame la ketre ahnahna ka tha mama kö, tre, ene la thith. Ame la itre nyipi sinee, angatr a iqajakeune la itre mekuna i angatr me ifekeune la itre aliene hni angatr. Hapeu, hne së kö hna tun me Iehova? Eje hi! Iehova a ithanata koi së jëne la Tusi Hmitrötr. Nyidrëti a qaja la itre mekun me itre aliene hni Nyidrë. Nge easa ithanata koi Nyidrë jëne la thith, me qaja la itre mekun me itre aliene hni së. Pine laka, itre sinee i Iehova së, Nyidrëti a drenge me sa la itre thithi së. Ame itre xaa ijin, canga sa hi Nyidrë. Ngo e tha canga sa kö Nyidrë, tro palahi sa thithi fë la itre jol ka traqa koi së. Ngo ame pe, ka xecie koi së laka, tro kö Iehova a sa la itre thithi së ngöne la nyipi ijin. Ame itre xaa ijin, hnei Iehova hna sa la itre thithi së, ngo tha celë kö la hne së hna mekun. Maine jë, tha hnei Nyidrëti kö hna apatrene la itre jol ka traqa, ngo hnei Iehova pe hna hamë së la trengecatr me inamacan matre atreine xomihni.” (1 Kor. 10:13) Nemene la aqane tro sa amamane laka, ahnahna ka sisitria la thith? Loi e tro sa trongëne la eamo i Akötresie lo kola hape: “The mano kö thith.”—1 Thes. 5:17. w20.05 27-28 par. 7-8

Ame la itre ka iwaja, angatr a goe qëmeke i angatr me thupëne matre tha tro kö angatr a kei. Ame la angatr a kei, angatr a canga mejë me nyenyape hmaca. Tha angatre kö a lapa mekun la itre ewekë ka akeinyi angatr. Angatre pe a goeëne la hna ie memine la thupen hna troa kapa. Ame la easa iwaja, ijije hi tro sa anyimua kei me tria ngöne la hne së hna qaja maine kuca. Maine jë, hna akötrë së hnene la itre ka ce iwaja me easë. Ngo tha tro pi kö sa sesëkötr. Itre atr ka tha pexeje kö së, nge easa ce nyinyape ngöne la gojenyi ka ilitr. Easa ce nyihlue i Iehova memine la itre trejin, matre ame itre xaa ijin, kola hetre iwesitrë. Öni Paulo, ame itre xaa ijin, easa thele kepin ngöne la “kola ngazo” koi së hnei ketre. (Kol. 3:13) Ngo tha tro pi kö sa lapa mekun la ewekë ka akeinyi së. Loi e tro pe sa lapa mekun la thupen me nyenyape hmaca. Maine tro sa elëhni me nuetrije la huliwa i Iehova, tha tro hë sa traqa kowe la hna ie me kapa la thupen. Ketre, tro fe hë së lai a akeine la itre xan. w20.04 26 par. 1; 28 par. 8-9

Hnei Daniela perofeta hna qaja la itre musi atr ka hetre ethane kowe la mele ne la itre hlue i Iehova. Hna nyihatrene la itre musi cili hnene la hnasaatr ka tru hna xup hnei nyimu ewekë. Ame la musi tixenuë ne la atr, tre, hna nyihatrene hnene la lue waca hna kuca hnei fao hna ithuenyikön me dro ka fedr. Kola nyihatrene la Musi Agele me Amerika. Eje hi, kola amamane hnyawa hnene la hna perofetan hnei Daniela laka, eje palahi a mus uti hë la troa lepe apatrene la nöjei musi atr hnene la musi ne la Baselaia i Akötresie. Hnei Ioane aposetolo fe hna qaja la itre musi atr ka hetre ethane kowe la nöje i Iehova. Angeic a aceitunë angatr me öni ka ses ka sevene lao he. Ame la hnaasevene he, tre kola nyihatrene la Musi Agele me Amerika. Ka nyipiewekë catr la ithuemacany celë ke, pëkö hnaaeitrene lao he. Tro palahi a musi hnene la hnaasevene he, uti hë la troa lep apatrene ej memine la itre xaa mus, hnei Iesu Keriso memine la itre angela i nyidrë.—Hna ama. 13:1, 2; 17:13, 14. w20.05 14 par. 11-12

Kolo lai a amekunë së la ketre nyipici: Akötresieti la Qaane la mel, nge Nyidrëti fe la Qaane la ihnim. Iehova a hnimi së! Ihnimi Nyidrëti a hamë madrine me tingeting koi së. Hnei Iesu hna upe la itre Keresiano troa ihnim. (Mat. 22:37-40) Pine laka, atre Iehova hnyawa hi hne së, matre hmaloi koi së troa trongëne la pane wathebo. Eje hi, ka pexeje Iehova nge Nyidrëti a hnimi së. Ngo maine jë, jole koi së troa trongëne la hnaaluene wathebo. Pine nemen? Pine laka, tha ka pexeje kö la itre trejin me easë. Ame itre xaa ijin, angatr a qaja me kuca la itre ewekë ka akötrë së. Atre hi Iehova laka, troa traqa la itre jole cili koi së. Celë hi matre hnei Nyidrëti hna upe la itre ka cinyihane la Tusi Hmitrötr, tui Ioane aposetolo, troa amamane la enyipiewekëne la troa ihnimikeu memine la aqane tro sa melën.—1 Ioane 3:11, 12. w21.01 8 par. 1-2

Ngacama ekö ju hë së nyihlue i Iehova, ngo loi e tro sa isa hnying ka hape: ‘Eni kö a cile catr ngöne la itre itupath ka ajolë ni troa hni ka pexej?’ Nemene la hne së hna kuca ngöne la easa öhn la ketre iatr ngöne tele maine ngöne Ëternet ka aciane la aja ka ngazo? Canga tro hi sa mekun ka hape, tha iatr ka sisi kö. Ngo hapeu, tha ketre nyinyithina i Satana kö lai, matre tha tro kö a pexeje la hni së? Drei la ketre ceitun. Ketre atr a sa la sinöe ka tru hnei ze. Thupene la hna anyimua hna la ze, kei pi hi lai sinöe. Ceitune hi la itre iatr memine la ze. Maine jë ame koi së, tha ka nyipiewekë kö, ngo ka hetre ethane pe. Tha tro hmaca kö a pexeje la hni së koi Iehova, nge tro hë sa kei kowe la ngazo. Celë hi matre, loi e tro sa thupën me xometrije qa kuhu hni së la nöjei ewekë ka sis. Loi e tro palahi a pexeje la hni së me xouene la ëje i Akötresie! w20.06 11-12 par. 14-15

Thupene la hne së hna wang la itre trejin ka nanazij, loi e tro palahi sa xatua angatr. Maine jë, tru la akötre i angatr tune lo nekön ka tro ngöne la ceitune i Iesu. (Luka 15:17-24) Hnene laka hna ajolë angatr hnene la fene i Satana, matre angatr a nanazij. Celë hi matre loi e tro sa xatua angatr troa acatrene hmaca la lapaune i angatre koi Iehova. Ame ngöne la ceitune i Iesu ne la mamoe ka paatr, hnene la atre thupë mamoe hna xep acone la neköi mamoe me bëeke sane ej kowe la hnënge mamoe. Hnei angeic hna nue traem me trengecatr matre troa ithel. Trotrohnine hi angeic laka, pëhë trengecatre ne la neköi mamoe, matre nyipiewekë troa xepe ej. (Luka 15:4, 5) Loi e tro sa nue traem me trengecatr matre troa xatuane la ketre trejin ka nanazij. Easa xatua angeic troa atreine cile kowe la nöjei jol ka sewe angeic troa nyihlue i Iehova. Ngo jëne la uati hmitrötre i Akötresie, me Tusi Hmitrötr, memine la itre itus hna hnëkën hnene la organizasio i Iehova, ijije hi tro sa xatua angeic troa acatrene la lapaune i angeic. Maine kola sipo së troa xatuane la ketre trejin ka nanazij, loi e tro sa kapa madrin. w20.06 28 par. 14-15

Loi e tro sa ihnim ke, celë hi hatrene la itre nyipi Keresiano. Ketre, loi e tro fe sa hetrenyi la “nyipi inamacan, me atrehmekun.” (Fil. 1:9) Maine tha hmeke kö së, tro ha ajojezi së hnene la “nöjei ini thenge la nyinyithiina i atr,” tune la itre ka iamenumenu. (Efe. 4:14) Ame ekö, alanyimu la itretre dreng ka nuetriji Iesu. Ngo hnei Peteru aposetolo hna amamane la lapaune i angeic me hape, “thei [Iesu] la itre trengewekë ne mele ka pë pun.” (Ioane 6:67, 68) Tha trotrohnine kö Peteru la itre trengewekë celë. Ngo hnei angeic hna mele nyipici ke, mama ha koi angeic la nyipici göi Keriso. Ketre tu së fe, loi e tro sa mejiune kowe la hna qaja hnei Tusi Hmitrötr. E cili, tro ha catre la lapaune së ngacama kola traqa la itre itupath. Nge tro hë sa xatuane la itre xan troa acatrene la lapaune i angatr.—2 Ioane 1, 2. w20.07 8 par. 2; 13 par. 18

Maine easa ajane tro la itre trejin a cile catre ngöne la nyipici, loi e tro sa utipi angatr. (1 Ioane 3:10, 11, 16, 17) Loi e tro palahi sa ihnimikeu ngöne la itre ijine loi me ngöne fe la itre ijine jol. Hapeu, hetre trejine kö ka meci sineen nge ka aja ixatua? Tune kaa la itre trejin hna lep hnei hulö, angatre kö a aja ixatua troa xupe hmaca la Uma Ne Baselaia memine la uma i angatr? Nyipici, ijije hi tro sa amamane qa ngöne la aqane ithanata së memine la nöjei huliwa së laka, easa utipin me hnime la itre trejin. Easa nyitipu Iehova, Keme së ka tru ihnimin, ngöne la easa hnime la itre xan. (1 Ioane 4:7, 8) Nemene la aqane troa amamane la ihnimi së? Loi e tro sa thele troa iloi me qejemenu. Pane mekune jë së laka, kola akötrë së hnene la ketre atr, nge ame hë e thupen, angeic a qejemenu. Easa amamane la ihnimi së, ngöne la easa nue la ngazo i angeic me thëthëhmin la hnei angeice hna kuca.—Kol. 3:13. w20.07 24 par. 14-15

Hapeu, tro kö sa isa ini tusi memine la itre hna troa amelene hmaca elany? Tro kö angatr a sine la ketre ekalesia me inine troa hamë ini kowe la itre xaa atr hna amelen? Thatre kö së. Ngo atre hi së laka, “troa tiqa la fene hnengödrai hnene la ate hmekunyi Iehova” ngöne la pune la musi Iesu. (Is. 11:9) Drei la madrine së troa huliwa fene la musi Keriso ka 1 000 lao macatre! Ame fene la musi Keriso, hetre nyine tro palakö la itre hlue i Iehova a saze, matre hane kepe angatr hnei Nyidrë. Celë hi matre, loi e tro angatr a utipin la itre hna amelene hmaca. Loi e troa xatua angatr troa xomehnöthe la itre aja ka ngazo me trongëne hnyawa la itre trepene meköti Akötresie. (1 Pet. 3:8) Tro ha canga mama kowe la itre hna amelene hmaca, la hni ne ipië i angatr me aqane ‘huliwa catre angatr thatraqane la mele i angatr.’—Fil. 2:12. w20.08 16 par. 6-7

Maine tro sa trongëne la eamo i Paulo aposetolo me isa waipengö së hnyawa, tro hë sa öhn laka, hetre itre ewekë hne së hna atreine kuca. Drei la ketre ceitun. Maine jë, tha ka maca hnyawa kö la ketre qatre thup troa cile fë cainöj. Ngo hetre thangane la huliwa ne cainöje i nyidrë. Atreine hi nyidrë troa xatuane la ketre atr uti hë la angeice a xomi bapataiso. Maine pena, thatreine hnyawa kö nyidrëti troa eköthe la huliwa ne la ekalesia, tune la itre xaa qatre thup. Ame pe, ka hnime nyidrëti la itre mamoe, matre tha xou i angatre kö troa ithanata me nyidrë. Ketre, ka maca nyidrëti troa hamë eamo, nge ka ikep me ham. (Heb. 13:2, 16) Maine tro sa wangatrune la itre hne së hna atreine kuca, tro hë sa madrin troa huliwa kowe la ekalesia. Ketre, tha tro hë sa piine la hna atreine kuca hnene la itre xaa trejin ka maca. Nyipici laka, isa hetre hnëqa së e hnine la ekalesia. Ngo loi e tro palahi sa thele troa maca hnyawa ngöne la huliwa i Akötresie. w20.08 24 par. 16-18

Ame lo 1935, hnei Joseph Rutherford hna cile fë la cainöj hna hape, “Ka Alanyimu,” ngöne la asabele e Washington (Etazini). Hnei nyidrëti hna amamane la itre ka troa sine la ka “ala nyimu atraqatr” hna qaja ngöne Hna Amamane 7:9. Ame ekö, easa mekun laka, kolo itre ka tha mele nyipici kö koi Akötresie ngo ka troa mele fe e hnengödrai, tune la itre hna iën. Ngo jëne la Tusi Hmitrötr, hnei trejine Rutherford hna amamane laka, ame la ka alanyimu atraqatr, tre, kolo itre xaa mamoe i Keriso ka xulu qa ngöne la “akötr atraqatr.” Tha tro kö angatr a elë e hnengödrai, ngo tro pe angatr a mele palua e celë fen. (Hna ama. 7:14) Öni Iesu: “Hetre itre xa mamoenge kö, ngo tha sine kö nyudreni la hnë axö mamoe celë; ngo loi e tro fe ni a alö nyudren, nge tro nyudreni a drenge la aqane ewekëng, nge tro hë nyudren a ca hna axö mamoe, nge tro hi a ca atre thup.” (Ioane 10:16) Eje hi, kola qaja la Itretre Anyipici Iehova ka mejiune troa mele palua ngöne la Paradraiso e celë fen.—Mat. 25:31-33, 46. w21.01 14 par. 1-2

Loi e tro sa xomehnöth la itre xaa aja së, matre atreine së cile catr me eatrëne la hnëqa hna ahnithe koi së. (Mat. 28:19, 20) Loi e tro sa nue trengecatr, matre troa xomehnöthe la itre aja së. Ame itre xaa ijin, jole koi së troa eatrëne la huliwa, matre easa thele la ka hmaloi koi së. Ngo loi e tro sa atreine xomehnöthe la itre sipu aja së. Tro kö Iehova a xatua së jëne la uati hmitrötr. (Gal. 5:22, 23) Hnei Paulo aposetolo hna xomehnöthe la itre aja i nyidrë. Hnei nyidrëti hna ‘jenge la ngönetrei nyidrë’ matre troa kuca la loi. (1 Kor. 9:25-27) Celë hi matre, hnei nyidrëti hna ithuecatr kowe la itre Keresiano troa “kuca hnyawane la nöjei ewekë asë, nge tha tro kö a hetre zikoziko.” (1 Kor. 14:40) Eje hi, loi e tro sa xomehnöthe la itre sipu aja së, matre tro palahi sa eatrëne la itre huliwa hna ahnithe koi së, tune la troa cainöj.—Itre hu. 2:46. w20.09 6-7 par. 15-17

Ame ngöne la itre xaa nöj, tha hna wathebone kö la huliwa ne cainöj. Hapeu, tha celë kö ka traqa ngöne la nöje i epun? Maine eje hi, isa hnyingëne jë ka hape: ‘Nemene la nyine tro ni a kuca ngöne la itre ijine loi?’ Tha tro kö sa thëthëhmine laka, easa melën la itre drai ne la pun. Hnene la organizasio i Iehova hna eköth la huliwa ne cainöj e cailo fen. Eje hi, nyimutre la itre nyine troa kuca hnene la itre hlue i Iehova. Nemene la nyine tro sa kuca ngöne la itre ijine loi? (2 Tim. 4:2) Loi e tro sa isa waipengö së me hnying ka hape, hapeu, ijijinge kö maine ketre sineeng pena, troa catre cainöj me hane pionie? Ame enehila, tha ijine tro hmaca kö sa thele mo pine laka, tha ka nyipiewekë kö itre ej ngöne la akötr atraqatr. (Ite Edomë 11:4; Mat. 6:31-33; 1 Ioane 2:15-17) Alanyimu la itre trejin ka inine la ketre qene hlapa matre troa cainöj me inine la itre atr. Celë hi matre kola xatua angatr hnene la organizasio i Akötresie. Kola elë la etrune la itre itus hna ujëne ngöne la nöjei qene hlapa. Ame lo 2010, hna ujëne la itre itusi së koi 500 lao qene hlapa. Ame enehila, traqa koi 1 000 lao qene hlapa! w20.09 16 par. 9-11

Ame la sooc ka nyipici ke, angeic a isi matre troa thupëne la itre atr hna hnim maine itre ewekë ka tru alamekene koi angeic. Hnei Paulo hna ithuecatre koi Timoteo troa catre nyipici koi Akötresie. (1 Tim. 4:7) Eje hi, maine tro palahi sa hnimi Akötresie me nyipici koi Nyidrë, tro hë sa thupëne hnyawa la nyipici. (1 Tim. 4:8-10; 6:6) Ketre, maine itre sooc a ajane troa cile catr ngöne la hna isi, nyipiewekë tro angatr a xomehnöth la itre sipu aja i angatr. Hnei Timoteo hna mele nyipici koi Akötresie ke, hnei angeic hna trongëne la itre eamo i Paulo, me kötrene la itre aja ka ngazo. Hnei angeice fe hna eënyine la itre thiina ka loi me cememine la itre trejin. (2 Tim. 2:22) Hnei Timoteo hna cile catr pine laka, hnei angeic hna xomehnöth la itre sipu aja i angeic. Celë hi matre, loi e tro fe sa xomehnöth la itre sipu aja së, matre troa kötrene la itre aja ka ngazo. (Rom. 7:21-25) Ketre, tro fe lai a xatua së troa heetrëne la thiina ka hnyipixe me unatrije lo thiina hnapan. (Efe. 4:22, 24) Eje hi laka, ngacama easa nango kucakuca thupene la hna huliwa, ngo easa nue trengecatr matre troa sine la icasikeu.—Heb. 10:24, 25. w20.09 28 par. 9-11

Nyipiewekë tro sa atreine xomihni aqean ngöne la easa xatuane la hnainin. Ngo loi e tro fe sa thele troa atre laka, hetre aja i angeic troa nyihlue i Iehova. Hapeu, angeice kö a thele troa trongëne la itre hna amekötin hnei Iesu? Maine angeice hi a ajane troa atre la itre mekun qa hnine la Tusi Hmitrötr?” Loi e tro palahi sa waipengöne la aqane kökötre la hnainin ngöne la nyipici. Hapeu, angeice kö a fe la hni angeic koi Iehova me thith? (Sal. 116:1, 2) Angeice kö a e Tusi Hmitrötr? (Sal. 119:97) Angeice kö a sine la itre icasikeu? (Sal. 22:22) Angeice fe kö a thele troa saze la mele i angeic? Hapeu, angeice kö a qaja kowe la fami angeic me itre sinee, la itre hnei angeic hna inin? (Sal. 9:1) Aja i angeice kö troa ketre atre Anyipici Iehova? (Sal. 40:8) Maine easa öhn laka, pëkö hnei angeic hna kuca matre troa kökötre ngöne la nyipici, loi e tro sa hnying me ithanata hnyawa me angeic. w20.10 18 par. 14-15

Ka lolo palahi la itre mekun hna xom hnene la Keme i Iesu e hnengödrai, nge ketre tune fe la kem me thine i nyidrë e celë fen. Ame hë kola tru hnei Iesu, hnei nyidrëti fe hna ketre sipu axecië mekun. (Gal. 6:5) Tui easë enehila, hna nue Iesu ekö troa ketre sipu axecië mekun thatraqane la mele i nyidrë. Maine ju, ijije hi tro nyidrëti a kuca la sipu aja i nyidrë. Ngo tha celë kö lai hna kuca hnei Iesu. Hnei nyidrëti palahi hna amë panëne la huliwa i Iehova Ame lo Iesu a trotrohnine la aja i Akötresie göi nyidrë, hnei nyidrëti hna kapa la hnëqa i nyidrë. (Ioane 6:38) Atre hi nyidrë laka, alanyimu la itre ka troa methinë nyidrë, matre hnei nyidrëti hna pane mekune hnyawa qëmekene troa axecië mekun. Ngo hnei nyidrëti hna iën troa drengethenge Iehova. Qaane lo kola bapataiso nyidrë lo macatre 29, aja i Iesu troa eatrëne la aja i Iehova. (Heb. 10:5-7) Ame fe lo kola axösisi nyidrëti hune la sinöe, hnei Iesu hna catre kuca la aja ne la Keme i nyidrë.—Ioane 19:30. w20.10 29 par. 12; 30 par. 15

Hapeu, hetrenyi kö e hnine la ekalesia la itre trejin hna tithi hnei mec maine ka cile kowe la itre jol? Hetre itre xane kö ka meci sineen? Maine easa öhne laka, kola aja ixatua hnene la ketre trejin, loi e tro sa sipo Iehova troa xatua së troa atreine hamë ithuecatre koi angeic. E cili, tro hë sa akeukawane la hni angeic jëne la itre hne së hna qaja me kuca. (1 Pet. 4:10) Easa cile kowe la itre jol ka tru ceitu me wene ka catr. Ngo ijiji së hi troa xomihnine itre ej ke, ce Iehova me easë. Nyidrëti a xatua së jëne Iesu me itre angela. Nyidrëti fe a upe la itre ka trene hnëqa ka tru troa eatrëne la aja i Nyidrë. Jëne la uati hmitrötr, Iehova a upe la itre hlue i Nyidrë troa xatuane la itre trejin. Celë hi matre, tui Paulo aposetolo, easa qaja ka hape: “Iehova la ixatuang, tha tro kö ni a xou. Nemene la hna troa kuca koi ni hnei atr?”—Heb. 13:6. w20.11 17 par. 19-20

Hnei Iehova hna aijijëne la itre aposetolo troa kuca la itre iamamanyikeu. Kolo lai a amamane laka, ce Nyidrëti me angatr. (Itre hu. 5:12-16; 6:8) Eje hi laka, tha hna aijijë së kö troa tui angatr. Ame pe, jëne la Tusi Hmitrötr, Iehova a amamane laka, Nyidrëti a madrine ngöne la easa “akötr pine la meköt,” nge thei ‘easë la ua i Nyidrë.’ (1 Pet. 3:14; 4:14) Haawe, tha tro kö sa hnehengazone la aqane tro sa ujë elany ngöne la iakötrë. Loi e tro pe sa acatrene la mejiune së koi Iehova laka, atreine hi Nyidrëti troa xatua së. Loi e tro sa mejiune kowe la hna thingehnaean hnei Iesu ka hape: “Tro kö ni a hamëne koi nyipunie la itre trengewekë, me inamacan, matre tha tro kö la itre ithupëjia me nyipunie a atreine sa.” Öni nyidrëti fe: “Pine la hnei nyipunieti hna cile hut, tro hë nyipunieti a mel.” (Luka 21:12-19) Ketre, tha tro kö sa thëthëhmine laka, ijije hi tro Iehova a amelene la itre hlue i Nyidrë ka mele nyipici ke, atrepengöi angatre hnyawa hi hnei Nyidrë. w21.01 4 par. 12

Tha Paulo aposetolo hmekuje kö la ka qaja la melehmaca. Hnei Iobu mina fe hna hane qaja lai. Xecie hnyawa koi Paulo laka, tha tro kö a thëthëhmi angeic hnei Akötresie, nge tro kö Nyidrëti a amele angeic hmaca. (Iobu 14:7-10, 12-15) “Ame la melehmaca” tre, ketre ini ka “nyitrepene” la lapaune së. (Heb. 6:1, 2) Ame ngöne 1 Korinito mekene 15, Paulo a qejepengöne hnyawa la ini cili me ithuecatre kowe la itre pane Keresiano. Nge ketre tu së fe enehila, kola ithuecatre koi së. Ngacama ekö hë së ngöne la nyipici, ngo kolo palahi a acatrene la mejiune së hnene la itre trengewekë i Paulo. Xecie hnyawa koi së laka, jëne la melehmaca i Iesu, tro sa iöhnyi hmaca memine la itre sinee së ka mec. Celë hi ketre “maca ka loi” hna tro fë hnei Paulo koi angetre Korinito. (1 Kor. 15:1, 2) Öni Paulo, ame la Keresiano ka tha mejiune kö kowe la melehmaca, tre, ka gufa la lapaune i angeic.—1 Kor. 15:17. w20.12 2 par. 2-4

Nemene la ka xatua Peteru aposetolo troa catr? Hnei Peteru hna lapa mekun lo kola thithi sai angeic hnei Iesu, matre tha tro kö a nanazij la lapaune i angeic. Nge hnei Iehova hna kapa la thithi Iesu. Ketre, hnei Iesu hna mama koi Peteru me hamë ithuecatre koi angeic. (Luka 22:32; 24:33, 34; 1 Kor. 15:5) Ame ngöne la ketre ijin, hnene la itre aposetolo hna nyi ie ngöne la jidri ka pexej, ngo pëkö ie hna ea. E cili, hnei Iesu hna mama koi angatr me aijijë Peteru troa amamane la ihnimi angeic koi nyidrë. Eje hi, hnei Iesu hna nue la ngazo i Peteru me hamë huliwa koi angeic. (Ioane 21:15-17) Hnei Iesu hna nyitipu Iehova ngöne la nyidrëti a hnim me utipi Peteru. Matre ame la easa tria, tha tro kö sa mekun laka, tha tro kö Iehova a nue la ngazo së. Celë hi lai hna ajane hnei Satana. Ngo loi e tro pe sa sipu goeë së kö me itre xane fe, tune la aqane goeë së hnei Iehova, Keme së ka tru ihnimin.—Sal. 103:13, 14. w20.12 20-21 par. 17-19

Loi e tro sa xomi ini qa ngöne la itre ka tha mejiune kö koi Iehova. Celë hi ka troa xatua së matre tha tro kö sa tui angatr. Hanawang la tulu i Asa, joxu ne Iudra. Ame lo xötrei, hnei Asa hna thele ixatua thei Iehova ngöne la kola traqa la itre jol. Ngo ame hë e thupen, hnei angeic hna mejiune kowe la sipu trengecatre i angeic. (2 A. l. ite jo. 16:1-3, 12) Hnei angeic hna sipo ixatua koi angetre Asuria. Ngo ka tria la aqane mekuna i angeic. Jëne la ketre perofeta, öni Iehova koi Asa: “Hnei nyipëti hna qale kowe la joxu ne Suria, nge tha lapa qale koi Iehova Akötesi nyipë, qa ngöne lai utetë hë qa thei nyipëti la hnënge ishi ne la joxu ne Suria.” (2 A. l. ite jo. 16:7) Eje hi, loi e tro sa thupën matre tha tro kö sa mejiune kowe la sipu trengecatre së, me nuetrije la ixatua qaathei Iehova ngöne la Tusi Hmitrötr. Ngacama kola upi së troa canga axecië mekun göne la ketre jol, ngo loi e tro sa mejiune koi Iehova. Tro kö Nyidrëti a xatua së troa inamacan. w21.01 6 par. 13-15

Alanyimu enehila la itre hlue i Iehova ka mecijin ke, angatr a mel ngöne la itre nöj gaa pë mo maine gaa isi. Ame itre xan, hna akalabusine pine la lapaune i angatr. Ame pe, tru la madrinene la ka alanyimu atraqatr ke, atre hi angatr laka, thupene la kola apatrene la fene celë ka ngazo, troa mana la xen ngöne la götrane u me götrane ngönetrei. Ketre, tha tro kö angatr a “drenge la idreuth” ne la elëhni Iehova ngöne la kola troa nue kowe la fene i Satana la itre enyi ne apatren. Thupene la akötr atraqatr, tro Iesu a eatrongë angatr “kowe la itre qeqe ne timi ne mel” ka pë pun. (Hna ama. 7:17) Pane mekune jë: Tha ceitu i angatre kö memine la itre milio lao atr ka mel enehila. Maine jë, tha tro kö angatr a hane mec! (Ioane 11:26) Tru la hni ne ole ne la itre xaa mamoe ke, hetre mejiune i angatr qaathei Iehova me Iesu! w21.01 16-17 par. 11-12

Ame ngöne lo jidri tixenuë i Iesu e celë fen, hnei nyidrëti hna thithi sane la itretre drei nyidrë. Atre hi nyidrëti laka, tro angatr a ixelë memine la itre jol. Tru la ihnimi Iesu kowe la itre sinee i nyidrë, matre hnei nyidrëti hna sipone la Keme i nyidrë troa “thupë angatr pine la atre ka ngazo.” (Ioane 17:14, 15) Ketre, atre hi Iesu laka, ame hë la nyidrëti a elë e hnengödrai ke, tro palahi Satana a isi memine la itre hlue i Iehova. Celë hi matre, nyipiewekë troa thupë angatr. Nyipiewekë catr enehila tro Iehova a thupë së. Eje hi, ase hë helë Satana qa hnengödrai nge “atraqatr la trenge elëhni i angeic.” (Hna ama. 12:12) Hnei Satana hna thoi koi itre xan, matre tro angatr a qanangazo së me mekun ka hape, “angatr a huliwa koi Akötresie.” (Ioane 16:2) Ame pena la itre xan ka tha lapaune kö koi Akötresie, angatr a qanangazo së ke, tha ceitu së kö me angatr. Ngo tha tro kö sa xou. Pine nemen? Kola sa hnene la topik ne la drai celë. w21.03 26 par. 1, 3

Ame la nöjei ewekë hna kuca hnei Iehova, tre, hna nyitrepen hnei ihnim. Nyidrëti a thupë së ngöne la nöjei götrane la mele së. Hnene la ihnim matre hnei Iehova hna hamëne la thupene mel. Ketre tui Iesu, tru la ihnimi nyidrëti koi së, matre hnei nyidrëti hna meci pi së. (Ioane 3:16; 15:13) Haawe, pëkö ka atreine troa thepe së qa ngöne la ihnimi Iehova me Iesu. (Ioane 13:1; Rom. 8:35, 38, 39) Ketre tune fe, loi e troa nyitrepen hnei ihnim la itre hna kuca hnene la he ne fami. Pine nemen? Öni Ioane aposetolo: “Ame la ka tha hnime la trejin me angeic [maine fami], lo hnei angeic hna öhn, thatreine kö troa hnimi Akötresie, lo hna tha öhn.” (1 Ioane 4:11, 20) Ame la trahmanyi ka hnime la fami angeic ke, angeic a nyitipu Iehova me Iesu, me thupë angatr ngöne la nöjei götrane la mel. (1 Tim. 5:8) Angeic a inin me hajine la itre nekö i angeic. Angeice fe a axecië mekune hnyawa thatraqane la fami angeic, nge thenge palahi la aja i Iehova. w21.02 5 par. 12-13

Iehova la Keme së ka tru ihnimin, nge atre hi Nyidrëti la mele së ekö. Atre hi Nyidrëti laka, ijije hi tro sa hnehengazo pine la itre ewekë cili. Ngo ame pe, Nyidrëti a goeëne la ka loi the së. Öhne hi Nyidrëti la itre thina së ka lolo, ngacama tha öhne kö së. (1 Ioane 3:19, 20) Ijije hi tro sa kei hmaca kowe la ketre ewekë hne së hna majemine kuca ka ngazo. Ngo tha tro kö sa kucakuca. Maine jë, tro sa elëhni me upezö së kö. (2 Kor. 7:10) Ngo tha tro kö sa mekun ka hape: ‘Tha ka nyipiewekë kö ni. Tha tro kö Iehova a nue la ngazong.’ Itre mekune lai ka thoi nge maine tro sa mekun tun, tro hë sa nue Iehova. Celë hi matre, loi e tro sa catre thithi koi Iehova me sipo Nyidrëti troa nue la itre ngazo së. (Is. 1:18) Maine öhne hi Iehova laka, easa ietra hnyawa qa kuhu hni së, tro hë Nyidrëti a nue la itre ngazo së. Ketre, loi e tro sa wang la itre qatre thup. Tro angatre lai a thele troa xatua së.—Iako. 5:14, 15. w20.12 23 par. 5-6

Hnei Iesu hna wangatrun me metrötrëne la itre föe. Tha hnei nyidrëti kö hna tune la itre Faresaio, itre ka methinëne la itre föe. Tha hnei angatre kö hna hane porotrik memine la itre föe qëmekei itre xan, me ithanatane la Itre Hna Cinyihan. Ngo ame Iesu, hnei nyidrëti hna hëne la itre föe troa ce ithanatane la itre hna qaja e hnine la Tusi Hmitrötr memine itretre drei nyidrë. (Luka 10:38, 39, 42) Hnei Iesu fe hna aijijëne la itre föe troa ce cainöj me nyidrë. (Luka 8:1-3) Nge hnei nyidrëti hna upe la itre föe troa thuemacanyine la itre aposetolo ka hape, hna amele nyidrëti hmaca. (Ioane 20:16-18) Hnei Paulo aposetolo hna qaja koi Timoteo la enyipiewekëne troa metrötrëne la itre föe. Atre hi Paulo laka, thine i Timoteo me qaaqa i angeic la ka xatua angeic troa atre la itre hna cinyihane ka hmitrötr. (2 Tim. 1:5; 3:14, 15) Ame ngöne la tusi Paulo koi angetre Roma, hnei nyidrëti hna qaja la ëje ne la itre xaa trejine föe, me ibozu me angatr, me amamane la hni ne ole i nyidrë kowe la hnei angatre hna kuca.—Rom. 16:1-4, 6, 12; Fil. 4:3. w21.02 15 par. 5-6