Eiperem

Hapeu, epuni kö a cile kowe la ketre jol? Maine jë, hna akötrë epun hnene la ketre trejin. (Iako. 3:2) Maine jë, kola hnyimasai epun ngöne la hna huliwa maine hna ini ke, epuni a nyihlue i Iehova. (1 Pet. 4:3, 4) Maine pena, itre sinee i epuni a sewe epun troa sine la itre icasikeu me cainöj. (Mat. 10:35, 36) Pine laka, thatreine hë epuni xomihni, epuni ha mekun troa nue Iehova. Ngo the thëthëhmine kö laka, tro palahi Iehova a hamën la inamacan me trengecatr, matre xatua epun troa cile hut ngöne la itre jol. Hnauëne laka Iehova a amë e hnine la Tusi Hmitrötr, la tulu ne la itre atr ka xomihnine la itre jol? Öni Paulo, matre tro sa xomi ini qa ngön. (Rom. 15:4) Maine tro sa e la itre tulu cili, tro ha ithuecatre së me hamë mejiune koi së. Ngo tha tro hmekuje kö sa e. Loi e tro fe sa nue itre ej troa saze la aqane mekune së me itre aliene hni së. w21.03 14 par. 1-2

Easë kö a goeëne la itre atr ne la teritoar tune la itre qitr nyine tro ha menuën? Maine eje hi, hane hi la thangan. Ame la hnapan, tro sa canga cainöj ke, hna tuluthe hi la ijine menu. Tha tro kö a hmitr me aluzi traem. Ame la hnaaluen, tro sa madrin ke, itre atr a kapa la maca ka loi. Öni Tusi Hmitrötr: “Angat’ a madine xajawa i cilie tune la madine ne menue.” (Is. 9:3) Ame la hnaakönin, easa goeëne la atr ceitu me ketre ka troa xötrethenge Iesu elany. E cili, easa ithanatane la itre tane mekun hnei angeic hna ajan. Tha ceitune kö la aqane goeëne Iesu la itre atr memine la itretre drei nyidrë. Tha hnei nyidrëti kö hna canga mekun laka, tro la angetre Samaria a thipetrije la maca ka loi. Hnei Iesu pe hna goeë angatr ceitu me itre ka troa xötrethenge nyidrë. Tui Iesu, loi e tro sa goeëne la itre atr ceitu me itre ka troa hane cainöj elany me xötrethenge Keriso. Celë fe hi hna kuca hnei Paulo aposetolo. Hnei Paulo hna thele troa atre la itre hna mejiune kow hnene la itre atr, me atre la itre hnei angatr hna ajan troa ithanatan, me goeë angatr ceitu me itre ka xötrethenge Iesu. w20.04 8-9 par. 3-4

Tha tro kö sa canga amekötine la hna kuca hnei ketre, maine qeje gele angeice pena. Loi e tro pe sa thele troa trotrohni angeic. Nyipici laka, Iehova hmekuje hi la ka trotrohni së. Celë hi matre, loi e tro sa sipo Nyidrëti troa xatua së, matre troa goeë itre xan tui Nyidrë. Tro fe sa sipo Nyidrë, troa xatua së troa utipi angatr. Tha tro kö sa iëne la itre trejin hne së hna troa hnim. Hnei angatr asë hna cile kowe la itre jol tui Iona, Elia, Hagara me Lota. Nge ketre tui easë fe e itre xaa ijin. Celë hi kepin matre Iehova a ithuecatre koi së, troa trotrohni itre xan me hnimi angatr. (1 Pet. 3:8) Maine tro sa drengethenge Iehova, tro hë sa acatrene la caasi e hnine la nöje i Nyidrë. Haawe, catre jë së isa ala caasi troa idrengethenge me inin me amamane la hni ne utipine kowe la itre trejin me hnimi angatr. w20.04 18-19 par. 15-17

Hnei Iesu hna amamai tulu ka lolo göne la aqane troa drengethenge Akötresie. Maine easa ajane troa drengethenge Iehova, loi e tro sa xötrethenge hnyawa la tulu i Iesu. (Ioane 8:29) Maine easa ajane troa catre trongëne la nyipici, loi e xecie koi së laka, Iehova la Akötresie ka nyipici, nge ka nyipici la itre hnei Nyidrëti hna qaja e hnine la Tusi Hmitrötr. Loi e tro fe a xecie koi së laka, Iesu hi la Mesia. Alanyimu la itre atr enehila ka thatre laka, Iesu la Joxu ne la Baselaia i Akötresie. Hnei Ioane hna amamane kowe la itre pane Keresiano laka, “ala nyimu la itretre iamenumenu” e hnine la ekalesia. Nge angatre hi la ka troa ajojezine la itre trejin ka tha maca palakö troa isigöline la nyipici göi Iehova me Iesu. (2 Ioane 7-11) Öni Ioane: “Drei la atre thoi? Hapeu, tha ene kö lo atre xelene ka hape, Iesu la Keriso?” (1 Ioane 2:22) Nyipiewekë tro sa catre inine la Tusi Hmitrötr, matre tha tro kö a ajojezi së. Celë hi aqane tro sa atrepengöi Iehova me Iesu. (Ioane 17:3) Nge e cili, tro ha xecie koi së laka, easë hnyawa hi a trongëne la nyipici. w20.07 21 par. 4-5

Ame la ketre nyine tro sa kuca matre tha tro kö a athixötrëne la itre trejin ke, tro sa nue angatr troa kuca la itre ewekë thenge la mekuna i angatr, ngo tha thenge kö la aja së. (Rom. 14:19-21; 1 Kor. 8:9, 13) Tha tro kö sa tune la itre ka nyipi iwaja laka, angatr a isine troa kapa la thupen. Angatr a ukune la itre xan matre troa tro pa. Ngo tha celë kö aqane tro sa ujë ke, easa ce nyenyape kowe la mel. (Gal. 5:26; 6:4) Easa ajane troa xatuane la nöjei atr, troa hane mel epine palua ngöne la fen ka hnyipixe. Celë hi matre, easa trongëne la eamo i Paulo ka hape, “the thele ewekë thatraqai nyipunieti hmekuj, ngo thele jë fe la ka loi koi itre xan.” (Fil. 2:4) Ame pena easë, easa lapa treqene la thupen hnei Iehova hna hnëkën thatraqane la itre ka troa traqa kowe la hna ie. Kola qaja la mel ka pë pun e koho hnengödrai maine e celë fen. w20.04 28 par. 10; 29 par. 12

Itre milio la itre hlue i Iehova ka troa mele pe “qa ngöne la akötr atraqatr” me lö kowe la fene ka hnyipixe. E cili, tro hë angatr a öhne la itre miliar lao atr hna troa amelene hmaca. Drei la ketre madrin ka tru ke, ase hë ngaane la mec! (Itre hu. 24:15) Ketre, tro fe la itre ka mele nyipici koi Iehova a hune kowe la mec. Eje hi, tro fe angatr a hane mele palua. Haawe, loi e tro së isa ala caasi a wangatrune la hna qaja hnei Paulo koi angetre Korinito, göne la mejiune kowe la melehmaca. Tro lai a xatua së “tro pala hi a tru hnei huliwa . . . koi Joxu.” (1 Kor. 15:58) Eje hi, maine tro sa catre eatrëne la huliwa cili, tro hë sa madrin. Pane mekune jë së la mele ka lolo elany ngöne la fene ka hnyipixe! E cili, tro ha mama koi së laka, tha ka gufa kö “la itre trengecatre [së] koi Joxu.” w20.12 13 par. 16-17

Maine casi hi la aliene la itre hna perofetan ngöne Ezekiela 38:10-23; Daniela 2:43-45; 11:44–12:1; me Hna Amaman 16:13-16, 21, tro hë sa öhne la itre ewekë hna troa qaja e cahu. Thupene la kola nyiqaane la akötr atraqatr, troa casi la “itre joxu ne fen.” (Hna ama. 16:13, 14) Kola hëne la gurupe cili hnei Tusi Hmitrötr, ka hape “Gog ate kë zin’ e Magog.” (Ezek. 38:2) Tro la gurupe cili a thele troa lep apatrene la nöje i Akötresie. Ame ngöne la hna meköl goeëne hnei Ioane, hnei angeic hna öhne la kola trotro la itre wene manie ka catr me lep la itre ithupëjia me Akötresie. Maine jë, kola nyihatrene la maca ne iameköti hna troa tro fë hnene la itre hlue i Iehova, nge ka troa upi Gog atre Magog troa thele troa lep apatrene la nöje i Iehova.—Hna ama. 16:21. w20.05 15 par. 13-14

Ketre ahnahna la uati hmitrötre i Akötresie, nge loi e tro sa wangatrune ej. Ame la ketre nyine tro sa kuca ke, troa lapa mekun la itre eloine hne së hna kapa qa ngön enehila. Qëmekene troa elë e hnengödrai, öni Iesu kowe la itretre dreng: “Tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni . . . ngöne la nöjei götrane gaa nany ne la fene hnengödrai.” (Itre hu. 1:8) Traqa koi 8,5 milio lao hlue i Iehova ka qa ngöne la nöjei nöj asë. Eje hi, hetre thangane la uati hmitrötr. Ketre, easa sine la nöje i Akötresie ka mele tingeting me caas. Uati hmitrötr a xatua së troa ihnim, me madrin, me tingeting, me atreine itreqe, me loi hni, me lolo thiina, me lapaun, me menyik, me xomehnöth. Itre igötranene hi la “wene ne la ua.” (Gal. 5:22, 23) Ketre ahnahna ka sisitria catr la uati hmitrötr! w20.05 28 par. 10; 29 par. 13

Ijije hi tro sa qaja ka hape, tro sa wangatrehmekune la itre sinee së hna troa amelene hmaca elany. Pane mekune jë lo itre atr hna amelene hmaca ekö hnei Iehova. Tha hna saze kö la iqëmeke i angatr, nge caasi palahi la aqane ithanata me mekuna i angatr. Ketre, hnei Iesu lo hna aceitunëne la mec memine la easa meköl, nge ceitu la melehmaca memine la easa hlë. (Mat. 9:18, 24; Ioane 11:11-13) Ame la easa hlë qa hna meköl, caasi palahi la iqëmeke së me aqane ithanata së. Nge tha thëthëhmine kö së la itre hne së hna melën. Celë hi la ka traqa koi Lazaro ekö. Traqa koi foa lao drai ne meci angeic, nge punepune hë la ngönetrei angeic. Ngo ame la Iesu a amele Lazaro hmaca, canga wangatrehmekunyi angeice hi hnei Maretha me Maria. Ketre, tha hna thëthëhmi nyidroti kö hnei angeic.—Ioane 11:38-44; 12:1, 2. w20.08 14 par. 3; 16 par. 8

Caasi hi la aqane goeëne Iehova la itre Keresiano hna iën me itre xaa mamoe. Nyidrëti a wangatrune me hnimi angatr. Celë hi matre, hnei Nyidrëti hna upe la Nekö i Nyidrë matre troa meci pine la lue gurupe cili. Ngacama isapengöne kö la mejiune la itre hna iën me itre xaa mamoe, ngo nyipiewekë tro angatr asë a mele nyipici koi Akötresie me Keriso. (Sal. 31:23) Ketre, caasi hi la aqane xatua së hnene la uati hmitrötr. Iehova a nunuëne la uati hmitrötre i Nyidrëti koi së thenge la itre hne së hna ajan. Iehova a hamë mejiune kowe la nöjei hlue i Nyidrë. (Iere. 29:11) Nemene la aqane tro asë hi sa amamane la hni ne ole së koi Iehova me Iesu? Loi e tro sa atrune la Drai Ne Amekunën la meci Keriso. Celë hi drai ka sisitria kowe la itre nyipi Keresiano. w21.01 18 par. 16; 19 par. 19

Ame thene la itre ka sine la Drai Ne Amekunën, alanyimu catre kö la itre ka mejiune troa mel e celë fen. Pine nemene matre angatr a sine la icasikeu cili? Hanawang la ketre ceitun. Easa sine la faipoipo ne la sinee së ke, easa ajane troa amamane kowe la lue trefën la ihnimi së me ce madrine me nyidro. Ketre tune fe, itre xaa mamoe a atrune la Drai Ne Amekunën, matre amamane la ihnimi angatr koi Keriso me kowe la itre hna iën. Angatre fe a amamane la hni ne ole i angatr kowe la thupene mel, ka aijijë angatr troa mele palua e celë fen. Ketre, angatre fe a sine la Drai Ne Amekunën ke, angatr a drengethenge la hna amekötin hnei Iesu. Ame lo Iesu a acile la Xeni Heji Ne La Joxu memine la itre aposetolo, öni nyidrë: “Tro pala pë hë nyipunie a kuca la, nyine mekune koi ni.” (1 Kor. 11:23-26) Eje hi, maine hetre itre xaa hna iën palakö e celë fen, loi e tro la itre xaa mamoe a atrune la Xeni Heji Ne La Joxu me hëne la itre xan troa hane ce atrune me angatr la drai cili. w21.01 17-18 par. 13-14

Nyimutre la itre ka mekun laka, ame la nyipi ihnim ke, troa ithanata amenyikenyi kowe la ketre atr. Ngo ame pe, troa mama la ihnimi ngöne la itre huliwa. (Wange ju fe la Iakobo 2:17, 26.) Hanawang la tulu i Iehova. Nyidrëti a amamane la ihnimi Nyidrëti koi së, jëne la itre trengewekë ka iakeukawany e hnine la Tusi Hmitrötr. (Sal. 25:10; Rom. 8:38, 39; 1 Ioane 4:19) Ngo Nyidrëti fe a amamane la ihnimi Nyidrë jëne la itre huliwa i Nyidrë. Hnei Iehova hna nue la Nekö hnimina i Nyidrë troa akötr me mec thatraqai së. (Ioane 3:16) Eje hi, atraqatr la ihnimi Nyidrëti koi së! Easa amamane la ihnimi së koi Iehova me Iesu ngöne la easa drengethenge nyidro. (Ioane 14:15; 1 Ioane 5:3) Ketre, hnei Iesu hna upi së troa ihnimikeu. (Ioane 13:34, 35) Maine easa ajane troa amamane la ihnimi së kowe la itre trejin, tha tro hi qaja ngo loi e tro fe sa amamane koi angatr.—1 Ioane 3:18. w21.01 9 par. 6; 10 par. 8

Ame la itre hna iën hnei uati hmitrötr ke, angatr a mejiune troa ce me Iesu uti hë epine palua, me ce musi me nyidrë ngöne la Baselaia i Akötresie. Tro angatr a öhnyi Iesu, me ithanata koi nyidrë, me ce mel me nyidrë. (Ioane 14:2, 3) Ame la itre ka mejiune troa mel e celë fen, tre, tro fe Iesu a hane thupë angatr me hnimi angatr. Nyipici laka, tha öhnyi Iesu kö hnei angatr, ngo ijije hi tro angatr a hane nyisinee i nyidrë. Tro fe angatr elanyi a kapa la mel hna hnëkëne hnei Iehova me Iesu. (Is. 9:6, 7) Nyimutre la itre manathithi hne së hna kapa, ngöne la easa thele troa nyisinee i Iesu. Iesu a hnimi së me xatua së. Ketre, ijije hi tro sa mel epine palua. Ngo ame la ka sisitria catr, tre, ene la troa nyisinee i Iesu me Iehova Keme i nyidrë. Drei la ketre manathith ka tru, ene la troa ketre sinee i Iesu! w20.04 25 par. 15-16

Paulo aposetolo e celë a ithanata kowe la itre Keresiano hna iën e Korinito, itre hna troa amelen e hnengödrai. Angatr la “itre hna ahmitrötrën me ka casi me Iesu Keriso, itre hna ce iëne troa hmitrötr.” Nge hnei Paulo hna qaja la “itre Keresiano ka meci hë.” (1 Kor. 1:2; 15:18; 2 Kor. 5:17) Ame ngöne la ketre tus, hnei Paulo hna qaja ka hape, tro la itre ka “meci tui [Iesu]” a “hane melehmaca tui nyidrë.” (Rom. 6:3-5) Eje hi, hna amele Iesu hmaca nge ketre u hë nyidrëti e hnengödrai. Celë hi lai ka troa traqa elany kowe la itre ka “casi me Keriso,” ene la itre Keresiano hna iën. Hnei Paulo hna cinyihan ka hape, hna amele Keriso hmaca qa hna mec, nge nyidrëti la “pane wene ne la itre ka meköl ngöne la mec.” (1 Kor. 15:20) Nyipici laka, hna amelene hmaca la itre xan e celë fen tui Lazaro. Ngo Iesu la hna pane amelene matre troa mele palua e hnengödrai. w20.12 5-6 par. 15-16

Ame la itre Keresiano hna iën ka mec enehila ke, troa canga amele angatr hmaca e hnengödrai. Celë hi lai hna qaja hnei Paulo aposetolo ngöne 1 Korinito 15:51, 52: “Tha tro kö së asë a meköl aqeanyi ngöne la mec, ngo tro pe së asë a ketrepengön, nge tro ha traqa lai kösë samek. Nge tro lai a traqa ngöne la kola ufi trutru tixenuë.” Kola eatr enehila la itre trengewekë i Paulo. Eje hi, madrine la itre trejin me Keriso ngöne la kola troa amelene angatr hmaca. Nemene la hnëqa hna troa ahnithe kowe la itre hna saze “kösë samek”? Öni Iesu: “Ame kowe la atre ka huun, me nyixölene la itre huliwang uti hë la pun, tro hë ni a aijijë angeic troa mus kowe la itre nöj, nge tro angeic a musinëne la itre atr hnene la sine tö kopa, matre troa lep anyilanyilanyi angatr, kösë ewekë hna xup hnei dro ka fedr, nge musi lai hnenge hna kapa qaathei Kaka.” (Hna ama. 2:26, 27) Haawe, tro Iesu me itre hna iën a musinëne la itre nöj hnene la sine tö kopa.—Hna ama. 19:11-15. w20.12 12 par. 14-15

Ijije hi troa aceitunë Iesu me itre pane wene sinöe hna huujëne hnei angetre Isaraela koi Akötresie. Ketre, ame la Paulo aposetolo a qaja ka hape, Iesu la “pane wene,” angeice hi lai a amamane laka, hetre itre xane thupei nyidrë hna troa amelen e hnengödrai. Celë hi lai ka traqa koi itretre aposetolo me itre xan ka “casi me Keriso.” (1 Kor. 15:18) Tro fe a hane amele angatr tui Iesu. Ame ngöne la Paulo a cinyanyi koi angetre Korinito, tha hna amelene palakö la itre ka “casi me Keriso.” Ngo hnei angeice hna qaja ka hape, troa traqa lai e thupen. Öni angeic: “Hane hi la aqane trongen: Keriso la hna pane amelen, nge thupene lai, tro ha amelene la itre atre i nyidrë ngöne la ijine laka, celë hë nyidrë.” (1 Kor. 15:23; 1 Thes. 4:15, 16) Eje hi, easa melëne “la ijine laka, celë hë” Keriso. Celë hi matre, ame la itre aposetolo me itre hna iën ka mec qëmekene la ijine cili, tha angatre kö a canga kapa la edrö i angatr e hnengödrai. Angatre pe a treqen qëmekene troa “amele angatr hmaca tui [Iesu].”—Rom. 6:5. w20.12 5 par. 12; 6 par. 16-17

Tha Paulo kö a qaja la itre hna amelene hmaca e celë fen, tune lo itre atr hna amelen hnei Elia me Elisaia me Iesu. Nyidrëti pe a qaja la itre hna amelene hmaca ngöne la “ngönetrei thatraqane la hnengödrai.” (1 Kor. 15:43, 44) Ame lo Iesu e celë fen, hetrenyi nyidrë la ngönetrei ne atr. Ngo ame lo kola amele nyidrëti hmaca, “nyidrëti hi la u ne iamele,” nge hnei nyidrëti hna bëek a tro hnengödrai. Tune la itre Keresiano hna iën, troa amele angatre hmaca ngöne la ngönetrei thatraqane la hnengödrai. Öni Paulo: “Pine laka, hna hnaho së hnaijine lo atr hna xupe hnei dro, ketre tun, tro fe së elanyi lai a tune lo atr ka uti qaa hnengödrai.” (1 Kor. 15:45-49.) Tha hna amele Iesu kö ngöne la ngönetrei ne atr. Pine nemen? Öni Paulo göne la melehmaca: “Tha tro kö a sine la Baselaia i Akötresie hnei madra me ijön.” (1 Kor. 15:50) Eje hi, tha tro kö a amelen la itre aposetolo me itre hna iën ngöne la ngönetrei ne madra me ijön ka troa hnyiqetr. w20.12 10-11 par. 10-12

Jëne la uati hmitrötr, hnei Akötresieti hna upe la itre ka cinyihane la Tusi Hmitrötr, troa qaja la melehmaca e hnengödrai. Öni Ioane aposetolo: “Easë enehila la itre nekö i Akötresie, ngo tha mama pala kö la pengö së elany. Ngo atre hi së ka hape, e mama ha nyidrë, tro sa tui nyidrë.” (1 Ioane 3:2) Ame la itre Keresiano hna iën, thatre kö angatr la pengöne la itre u. Ngo xecie koi angatr laka, ame la angatr a kapa la edrö i angatr, tro hë angatre a öhnyi Iehova. Nyipici laka, tha hnei Tusi Hmitrötr kö hna qaja hnyawane la mel ne la itre hna iën thupene la kola amele angatr hmaca. Ame pe, öni Paulo aposetolo ka hape, tro la itre hna iën a ceme Keriso ngöne la kola troa “lepe apatrene la nöjei mus, me nöjei trene mus,” memine “la mec, lo ithupëjia tixenuë.” Thupene lai, tro Iesu memine la itre hna iën a nue hmaca la musi koi Iehova. Nge tro Iesu a nue la nöjei ewekë asë kowe la Keme i nyidrë. (1 Kor. 15:24-28) Celë hi itre ewekë ka lolo hne së hna lapa treqen! w20.12 8 par. 2

Tro fe a hane amelene hmaca la itre xaa Keresiano ka tha mejiune kö troa mel e hnengödrai. Kola qaja hnei Tusi Hmitrötr ka hape, ame la itre ka troa mel e hnengödrai, tro angatr a “sine la pane mele hmaca.” (Fil. 3:11) Kolo hi lai a hape, hetre ketre melehmaca. Nge celë hi lai hna qaja hnei Iobu. (Iobu 14:15) Ketre, ame la “itre atre i [Keriso] ngöne la ijine laka, celë hë nyidrë,” tro angatr a ceme Iesu a hnengödrai, ngöne la nyidrëti a troa lepe apatrene la itre mus me trene mus. Nge tro ha apatrene “la mec, lo ithupëjia tixenuë.” Eje hi, ame la itre hna troa amelene hmaca e hnengödrai ke, tha tro hmaca kö angatr a mec. (1 Kor. 15:23-26) Ame pena la itre ka mejiune troa mel e celë fen, Paulo a hamë mejiune fe koi angatr ngöne la topik ne la drai celë. Nyipici, tha ijije kö tro la itre atr ka tha meköti kö a elë e hnengödrai. Kolo lai a amamane laka, hetre melehmaca e celë fen. w20.12 6-7 par. 18-19

Loi e tro sa isa hnying ka hape: ‘Tro ni a atre tune kaa laka, ase hë nue la ngazong hnei Iehova?’ Kolo hi lai a amamane laka, ijije hi tro Iehova a nue la itre ngazo së. Önine la ketre Ita Ne Thup: “Ame itre xaa ijin, easa tria me anyimua kei pine la itre ewekë ka ngazo hne së hna majemine kuca ekö. . . . Tha tro kö sa akötr me hleuhleu, me mekun laka, tha ijije kö troa nue la itre ngazo së. Satana a ajane tro sa mekun tun. Maine kola huliwa la mekuthetheu së nge easa akötr, kolo hi lai a amamane laka, tha ka ngazo kö së. Loi e tro palahi sa hetre hni ne ipië me catre thith me sipone troa nue la itre ngazo së. Tune la nekönatr koi kem, loi e troa easenyi koi Iehova ngöne la easa akötr, nge tro kö Nyidrëti a xatua së.” Qëmekene tro Paulo aposetolo a ketre Keresiano, hnei nyidrëti hna kuca la itre ewekë ka ngazo. Tha thëthëhmine kö nyidrë la itre tria i nyidrë. (1 Tim. 1:12-15) Ngo ame koi Paulo, ketre ahnahna qaathei Iehova la thupene mel. Celë hi ka xatua nyidrë matre tha tro kö a lapa mekun la itre ngazo hna kuca ekö, ngo tro pe a catre huliwa i Iehova. w20.11 27 par. 14; 29 par. 17

Jëne la itre iatr ka aciane la aja ka ngazo, Satana a thele tro sa kei kowe la ngazo. Nemene la aqane ujë së ngöne la kola tupathi së? Canga tro hi sa thele kepin. Maine jë tro sa qaja ka hape: ‘Maine tro ni a kuca la ewekë celë, tha tro kö a upetröneë ni. Kola amamane laka, tha ka ngazo kö la hnenge hna kuca.’ Ka ngazo la aqane mekun celë. Loi e tro sa isa hnying ka hape: ‘Hapeu, Satana kö a tupathi ni matre tha tro kö a pexeje la hning koi Iehova? Maine tro ni a kei kowe la ngazo, tro kö ni a adrone la ëje i Akötresie? Tro kö lai a aiananyi ni maine easenyi ni koi Akötresie?’ Nyipiewekë tro sa lapa mekun la itre hnying celë. Loi e tro sa sipo inamacane koi Iehova matre xatua së troa atreine sa hnyawa la itre hnying celë. Celë hi ka troa thupë së me xatua së troa cile catr ngöne la itupath. Tui Iesu, tro hë sa qaja ka hape: “Tro pi Satana!” (Mat. 4:10) Eje hi, maine tha ka pexeje kö la hni së koi Iehova, tro lai a hetre ethane kowe la mele së. w20.06 12-13 par. 16-17

Easa trongëne la itre trepene meköti Iehova ke, atre hi Nyidrëti la ka loi koi së. (Efe. 4:22-24) Maine tro sa ipië, tro hë sa amë panëne la aja i Iehova hune la sipu aja së, me wangatrune la itre xan. Ketre, tro fe hë sa imelekeu hnyawa me Iehova memine la itre trejin. (Fil. 2:3) Ame ngöne la fene i Satana, alanyimu la itre atr ka pi tru nge ka sipu meku angatre kö. Celë hi matre e tha hmeke kö së, tro hë sa ixomithiina. Celë hi ka traqa kowe lo itre pane Keresiano ekö. Öni Paulo kowe la ekalesia ne Roma: “The tro kö nyipunieti a sipu wangatrunyi nyipunie, ngo tuluthe ju la aqane troa sipu waipengöi nyipunie.” Atre hi Paulo laka, ijije hi tro sa sipu wangatrunyi së. Ngo loi e tro sa ipië, matre atreine waiewekë hnyawa nge tha tro kö sa sipu wangatrunyi së. w20.07 2 par. 1-2

Ame ngöne lo ijine i Asa, tha hna cile huti kö la ijine loi. Hna traqa la trongene isi angetre Aithiope. Xecie koi Zera, tane la trongene isi angetre Aithiope laka, tro angeic memine la 1 milio lao sooc a lep la nöje Iudra. Ngo tha celë kö mekuna i Asa. Hnei nyidrëti hna mejiune koi Iehova Akötresi nyidrë, me thith ka hape: “Iehova fe, Akötresi hun, xatua huni jë ke, eahuni a lapaune koi nyipë; nge eahuni a cile kow la ithupëjia ngöne la ëje i nyipë.” (2 A. l. ite jo. 14:11, MN) Alanyimu catre kö la trongene isi angetre Aithiope hune la trongene isi Asa. Ngo xecie koi Asa laka, pëkö sai Iehova nge tro kö Nyidrëti a amelene la nöje i Nyidrë. Celë hi lai hna kuca hnei Iehova. Hnei Nyidrëti hna lep la trongene isi angetre Aithiope. (2 A. l. ite jo. 14:8-13) Nyipici laka, thatre kö së la itre ewekë ka troa traqa koi së elany. Ngo atre hi së laka, tha tro kö a cile hut la itre ijine loi. Hnei Iesu hna perofetan ka hape, ame ngöne la itre drai ne la pun, “tro la nöjei nöj” a methinëne la itretre drei nyidrë.”—Mat. 24:9. w20.09 17-18 par. 14-16

Nyipici laka, tha madrine kö së ngöne la kola qaqa së. Maine tro sa wangatrune la itre hna qaja hnene la itre ithupëjia, tro hë sa kucakuca. (Ite Edomë 24:10) Nemene la aqane tro sa cile kowe la jole cili? Ijije hi tro sa “madrine” tui Paulo, ngacama kola ‘qaqa’ së. Pine nemen? Ame la kola icilekeu me qaqa së ke, kolo lai a amamane laka, easa xötrethenge Iesu. (1 Pet. 4:14) Öni Iesu kowe la itretre drei nyidrë ka hape, tro fe a hane qanangazo angatr. (Ioane 15:18-20) Celë hi ka traqa kowe la itre pane Keresiano. Ame kowe lo itre hna ajojezin hnene la ini angetre Geres, pëkö inamacane la itre Keresiano nge itre ka kucakuca angatr. Ame pena koi angetre Iudra, itre “ka thatre tusi” la itre Keresiano, tui Peteru me Ioane aposetolo. (Itre hu. 4:13) Ame kowe la itre atr, ka kucakuca me pë trengecatre la itre Keresiano ke, tha sine kö angatr la kuci politik me isi. Ketre, hna wangaconyi angatr hnei mus. Hapeu, hnene kö la itre pane Keresiano hna kucakuca ngöne la kola icilekeu? Waea. w20.07 14-15 par. 3-4

Tru catre la ihnimi Ioane kowe la itre trejin, nge aja i angeic tro angatr a catre lapaun. Celë hi ka mama ngöne la köni tusi angeic. Drei la madrine së ngöne la easa atre laka, hnene la uati hmitrötr hna iëne la itre atr ka ceitu me Ioane, matre troa ce musi me Keriso e hnengödrai! (1 Ioane 2:27) Tha tro pi kö sa wangacone la itre eamo hna hamën ngöne la tane mekun celë. Catre pi së trongëne la nyipici, me drengethenge Iehova ngöne la mele së. Loi e tro sa inine la Tusi Hmitrötr, matre troa xecie koi së laka, ka nyipici hnyawa ej. Loi e tro fe sa acatrene la mejiune së koi Iesu. Ketre, loi e tro sa thipetrije la itre mekuna i atr me itre ini ne la itre ka iamenumenu. Tha tro kö sa juetrë thiina me mele thoi me kuca la ngazo, tune la itre atr ne fen. Loi e tro pe sa trongëne la itre trepene meköti Iehova. Ketre, nyipiewekë tro sa thele troa iloi me qeje menu matre troa xatuane la itre trejin troa acatrene la lapaune i angatr. Haawe, ngacama nyimutre la itre jol hne së hna cile kow, ngo loi e tro palahi sa cile catre ngöne la nyipici. w20.07 24-25 par. 15-17

Ihnim la ka upi Iehova troa hamë hnëqa kowe la itre hlue i Nyidrë e hnine la ekalesia. Ngacama isapengöne kö la itre hnëqa së, ngo nyipiewekë asë hi së koi Iehova me koi itre trejin. Hnei Paulo aposetolo hna amamane laka, thatreine kö tro sa qaja kowe la ketre trejin, ka hape: “Tha nyipiewekë kö eö koi ni.” (1 Kor. 12:21) Maine aja së troa tingetinge la ekalesia, loi e tro sa wangatrune la itre trejin me ce huliwa me angatr. (Efe. 4:16) Maine tro palahi la itre trejin a caas, tro hë angatre lai a ithuecatrekeu me ihnimikeu. Ame la itre qatre thup ke, hna ië angatr hnei uati hmitrötr, ngo tha ceitu i angatre asë kö. (1 Kor. 12:17) Ame itre xan, hna xötrei acil matre tha maca hnyawa palakö angatr troa xome la hnëqa. Ame pena itre xan, jole koi angatr ke, angatr a wezipo maine qatre hë angatr. Ngo tha tro kö la itre xaa qatre thup a wangaconyi angatr ke, kösë angatre hi lai a hape: “Tha nyipiewekë kö eö koi ni.” Loi e tro la itre qatre thup a trongëne la eamo i Paulo ngöne Roma 12:10. w20.08 26 par. 1-2; 27 par. 4

Jëne la organizasio i Nyidrë e celë fen, Iehova a eatrongë së ngöne la gojenyi ne mel. Celë hi matre, easa canga kapa la itre ini ka hnyipixe me itre hna amekötin hnei organizasio göi aqane mel. Ngo tune kaa e kola saze la itre xaa ewekë nge ka hetre thangane koi së, tune la troa salemën la Uma Ne Baselaia së? Maine tro sa lapa mekun laka, easa huliwa koi Iehova, nge Nyidrëti la ka xomiujine la huliwa ne la organizasio i Nyidrë, tro hë sa madrin. (Kol. 3:23, 24) Ame ngöne la Dravita joxu a hnëkë manie thatraqane la ene, tre lolo la aqane waiewekë i nyidrë. Ame la nyidrë a thithi koi Iehova, öni nyidrë: “Drei ni? Nge drei la nöjeng matre tro huni a hamëne la itre ahnahna ka tune la? Ke, qaathei nyipë nge qaathene la ime i nyipë la itre hne huni hna hamën.” (1 A. l. ite jo. 29:14) Ketre tu së fe, ame la easa kuië ahnahna, easë hmaca a hamëne koi Iehova la hnei Nyidrëti hna hamë së. Ame pe, ka tru koi Nyidrë la traem me trengecatr me itre mo hne së hna nue kowe la huliwa i Nyidrë.—2 Kor. 9:7. w20.11 22-23 par. 14-16

Itretre Anyipici Iehova së, matre tha easë kö a goeëne la etrune la itre atr hne së hna xatuane troa atre la nyipici. (Luka 8:11-15) Maine tro palahi sa catre cainöj me inine la itre atr, tro Iehova a wangatrune la itre hne së hna kuca. Pine nemen? Pine laka, easa drengethenge Nyidrë me Iesu. (Mar. 13:10; Itre hu. 5:28, 29) Nyipiewekë tro sa catre cainöj pine laka, easenyi hë la pune la fen celë! Nge xoxopatre pe hi la ijine troa cainöj. Haawe, loi e tro sa canga xome la huliwa ne cainöj, ngo tha tro kö sa uth me treqene la ijine haodrai. Eje hi, loi e tro sa catre cainöj, me inine la Tusi Hmitrötr matre troa maca. Nge loi e tro fe sa catr me xomehnöthe la itre sipu aja së. Maine tro sa catre cainöj memine la ala 8 milio lao trejin ka thele la itre atr, tro hë sa öhne la nyipi madrin qaathei Iehova. (Neh. 8:10; Luka 5:10) Haawe, catre jë së cainöj uti hë la Iehova a umuthe la huliwa. w20.09 7 par. 18-20

Tha tro kö sa thëthëhmine la ka nyipiewekë. Loi e tro pe sa thupën la “trenge iaö ne la mani” ke, tro lai a thapa la ihnimi së koi Iehova me sewe së troa amamane la hni ne ole së kowe la Tusi Hmitrötr. Nge tro fe lai a upi së troa nuetrije la huliwa ne cainöj. (Mat. 13:22) Ketre, loi e tro sa canga hnëkë matre troa atreine thupëne la itre ewekë ka sisitria qaathei Iehova ngöne la itre ijine jol. Qëmekene tro sa fe la Ëternet maine wai tele, loi e tro sa canga mekun la nyine tro sa kuca. Tro hë lai a thupë së ngöne la kola mama la itre iatr ka sis, me isi, me itre trengathoi ne la itre ka iamenumenu. Maine tro sa canga hnëkë, tro hë së lai a atre la nyine troa kuca. Ketre, tro lai a acatrene la aqane imelekeu së me Iehova, nge tro hë sa itre atr ka thiina ka wië koi Nyidrë. (Sal. 101:3; 1 Tim. 4:12) Hnei Iehova hna ahnithe koi së la itre nyipici qa hnine la Tusi Hmitrötr me upi së troa cainöj. Maine tro sa thupëne la itre ewekë cili ka sisitria, tro ha lolo la mekuthetheu së, nge tro hë sa mele madrin. Ketre, tro lai a acatrene la aja së troa xatuane la itre xan troa hane atre Iehova. w20.09 30 par. 16-19

Hapeu, ka bapataiso hë epun? Maine eje hi, hnei epuni hna amamane koi nöjei atr la lapaun me aja i epun troa nyihlue i Iehova me sajuëne la organizasio i Nyidrë. Ame enehila, Iehova a eatrongëne la organizasio i Nyidrë thenge la itre thiina i Nyidrë me mekuna i Nyidrë me itre trepene meköti Nyidrë. Hanawang la köni thiina i Iehova ka mama ngöne la organizasio i Nyidrë. Ame la hnapan, “tha ka ië hna hnime kö Akötresie.” (Itre hu. 10:34) Hnei Iehova hna hnimi së, matre hnei Nyidrëti hna nue la Neköi Nyidrë troa ‘nyine thupene mele thatraqane la nöjei atr asë.’ (1 Tim. 2:6; Ioane 3:16) Ketre, Iehova a upe la itre hlue i Nyidrë troa cainöj koi nöjei atr, matre tro fe angatr a hane kepe thangane qa ngöne la thupene mel. Ame la hnaaluen, tha Akötresie ne zikoziko kö Iehova ngo Akötresie ne tingeting. (1 Kor. 14:33, 40) Celë hi matre, tha ka zikoziko kö la itre hlue i Nyidrë, ngo angatre pe a thele tingeting. Ame la hnaakönin ke, Iehova la “Atre Ini Ka Tru.” (Is. 30:21) Celë hi matre, kola nue trengecatr hnene la organizasio i Iehova matre troa inine la Trengewekë i Nyidrë, e hnine la ekalesia me ngöne la hna cainöj. w20.10 20 par. 1-3