Mei

Ame lo nekönatr palakö Iesu, hnei nyidrëti hna drengethenge la kem me thine i nyidrë. Tha hnei nyidrëti kö hna nuetrije la itre eamo i nyidro, maine nyi ka atre hui nyidro. Ketre, hnei Iesu hna xom hnyawa la hnëqa nyidrë ngöne la fami ke, nyidrëti la ka tru. Hnei nyidrëti hna inine la huliwa i Iosefa, keme i nyidrë, matre thupëne la fami nyidrë. Maine jë, hnene la kem me thine i Iesu hna qaja koi nyidrë la aqane traqa nyidrëti e celë fen memine lo hna qaja hnene la itre qeneqaja i Akötresie göi nyidrë. (Luka 2:8-19, 25-38) Ame pe, hnei Iesu fe hna ketre sipu inine la Itre Hna Cinyihan. Nemene la ka amamane lai? Hnene la itre atre hamë ini e Ierusalema hna “haine la inamacane i nyën, me aqane sa i nyën” nge nekönatr petre kö nyidrë. (Luka 2:46, 47) Ame lo kola 12 lao macatre i Iesu ke, xecie hnyawa ha koi nyidrë laka, Iehova la Keme i nyidrë.—Luka 2:42, 43, 49. w20.10 29-30 par. 13-14

Melehmaca i Iesu la ka nyitrepene la mejiune së. Ame lo Paulo aposetolo a nyiqane qejepengöne la melehmaca, hnei angeic hna qaja la köni mekun ka tru. (1) “Hnei Keriso hna meci pine la itre ngazo së.” (2) Hna “kelemi nyidrë.” (3) “Hna amele nyidrëti hmaca tune lo hna Cinyihan.” (1 Kor. 15:3, 4) Nemene la hne së hna kapa qa ngöne la köni mekun celë? Hnei Isaia hna perofetan ka hape, tro ha “thupa tiji la [Mesia] qa ngöne la nöje ne la ite ka mel,” nge troa ‘hnëkëne la hua i nyidrë thene la itre ka ngazo.’ Öni Isaia ka hape, tro la Mesia a “ajöne la ngazo ne la ka ala nyimu.” Celë hi la hna kuca hnei Iesu, jëne la thupene mel. (Is. 53:8, 9, 12; Mat. 20:28; Rom. 5:8) Kola acatrene la mejiune së hnene la meci Iesu, me aqane kelemi nyidrë, me aqane amele nyidrëti hmaca. Kola amamane koi së laka, ijije hi troa thepe së qa ngöne la ngazo me mec. Nge ijije fe tro sa iöhnyi hmaca memine la itre sinee së ka mec. w20.12 2-3 par. 4-6; 5 par. 11

Hnei Paulo aposetolo hna majemine cainöj ngöne la itre sunago. Ame ngöne la sunago e Thesalonika, hnei angeic hna “ini [angetre Iudra] la itre hna Cinyihan ngöne la köni Sabath.” (Itre hu. 17:1, 2) Tha jole kö koi Paulo troa cainöj e hnine la sunago ke, hna hetru angeic ngöne la qenenöje i angetre Iudra. (Itre hu. 26:4, 5) Atre hnyawa hi Paulo aposetolo la angetre Iudra, matre tha xou i angeice kö troa cainöj koi angatr. (Fil. 3:5) Thupene la hna upi Paulo hnene la itre ka icilekeu qa Thesalonika me Berea, hnei angeic hna traqa e Athenai. Nge e cili, “hnei angeic hna nyiqaane xatuane la angetre Iudra me itre xa atr e hnine la sunago troa trotrohnine la itre hna Cinyihan.” (Itre hu. 17:17) Ngo tha celë kö lai aqane cainöje i Paulo ngöne la hna maketr e Athenai. Pine laka hetrenyi la itre ka inamacan, nge ame itre xan, tha angetre Iudra kö angatr. Ame koi angatr, Paulo a tro fë “ini ka hnyipixe.” Celë hi matre, öni angatr: “Ka ketrepengöne kö la itre ini hnei eö hna ithanatan.”—Itre hu. 17:18-20. w20.04 9 par. 5-6

Maine tro sa kei kowe la ngazo, tha tro pi kö sa kucakuca me mekun laka, ka luzi hë së. Itre atr ka tha pexeje kö së. Celë hi matre, nyipiewekë koi së asë la ihnimi gufa i Akötresie, jëne la thupene mel. (Efe. 1:7; 1 Ioane 4:10) Ketre, ijije hi troa xatua së hnene la itre trejin ne la ekalesia. Ame la easa fe la itre aliene hni së, angatr a drei së hnyawa me qaja la itre trengewekë ka lolo nge ka akeukawane la hni së. (Ite Edomë 12:25; 1 Thes. 5:14) Celë hi lai hna melën hnei Joy, ketre trejine föe ka kucakuca. Öni angeic: “Eloine pe, hna xatua ni hnene la itre trejin. Mama hnyawa koi ni laka, Iehova a sa la itre thithing. Hnei angatr hna amamai ni la aqane troa ithuecatre kowe la itre ka kucakuca.” Ngo ame itre xaa ijin, thatre kö la itre trejin laka, easa aja ixatua. Celë hi matre, loi e tro sa ithanata memine la ketre trejin hne së hna mejiune kow. w20.12 23-24 par. 7-8

Maine easa ajane troa nyisineene la ketre atr, loi e troa lapa ce tro me angeic. Ame la easa iqajakeune la itre aliene hni së me itre hne së hna melën, easë hi lai a easenyi trootro uti hë lue nyipi sinee hë së. Ngo maine jë, nango jole troa nyisinee i Iesu. Ame la ketre jol ke, tha hne së kö hna iöhnyi me nyidrë. Ame ngöne lo hneijine i ange aposetolo, nyimutre la itre Keresiano ka tha hane kö öhnyi Iesu. Ngo öni Peteru aposetolo: “Nge maine tha öhnyi Keriso kö nyipunie, ngo nyipunieti a hnimi nyidrë. Nge ngacama tha öhnyi nyidrëti kö enehila, ngo nyipunieti pe a lapaune koi nyidrë.” (1 Pet. 1:8) Ngacama tha iöhnyi kö së me Iesu, ngo ijije hi tro sa acatrene la aqane imelekeu së me nyidrë me nyisinee i nyidrë. Ketre, thatreine kö së troa ithanata koi Iesu. Ame la easa thith, easa ithanata koi Iehova. Nyipici laka, easa nyi jëne Iesu la thithi së. Ngo tha easë kö a ithanata meköti koi nyidrë. Tha aja i Iesu kö tro sa thithi koi nyidrë. Pine nemen? Pine laka, ame la thith ke, ketre igötranene la hmi. Iehova hmekuje hi la nyine tro sa thili kow me atrun. (Mat. 4:10) Ngo ijije fe hi tro sa amamane la ihnimi së koi Iesu. w20.04 20 par. 1-3

Tru la itre jol ka traqa kowe la itre ka iwaja e Geres ekö. Itre xan a akötr me kucakuca, ngo pëkö ka xatua angatr. Angatr a mejiune kowe la sipu trengecatre i angatr me hnëkë hnyawa. Ketre tu së fe enehila, easa kapa la itre ini ka hnëkë së matre tro palahi sa nyenyap. Ngo hetre ewekë hne së hna hetreny, nge ka pë thene la itre ka nyipi iwaja. Easa kapa la trengecatr qaathei Iehova, nge pëkö ifegone la trengecatre i Nyidrë. Maine tro sa catre mejiune koi Iehova, tro hë Nyidrëti a hnëkë së me aegöcatrenyi së! Nyimutre la itre jol hna cile kow hnei Paulo aposetolo. Hna qaqa Paulo me icilekeu me nyidrë. Ketre, hnei nyidrëti fe hna hane kucakuca, me isi memine la “ka ithinyi ngöne la ngönetrei.” (2 Kor. 12:7) Ngo tha hnei Paulo kö hna nue la huliwa i Iehova. Hnei nyidrëti pe hna catre qale koi Iehova. (2 Kor. 12:9, 10) Celë hi matre, hnei Iehova hna xatua nyidrë ngöne la nöjei pengöne jol. w20.04 29 par. 13-14

Easa madrine troa “ce huliwa” me Iehova memine la organizasio i Nyidrë e hnengödrai. (2 Kor. 6:1) Easa ce huliwa me angatr ngöne la easa catre cainöj. Öni Paulo göne la itre ka cainöj ka hape: “Easë la itre ka ce huliwa me Akötresie.” (1 Kor. 3:9) Ketre, easë fe a ce huliwa me Iesu. Thupene la nyidrëti a upe la itretre dreng troa inine la itre atr qa ngöne la nöjei nöj, öni nyidrë: “Tro pala hi ni a ce me nyipunie.” (Mat. 28:19, 20) Nge tune kaa la itre angela? Angatr a xatua së troa tro fë la “maca ka loi nge ka epine palua . . . kowe la itre ka lapa e celë fen”! (Hna ama. 14:6) Nemene la huliwa hna eatrëne jëne la ixatua i Iehova, me Iesu memine la itre angela? Ame la easa jume la itre itine ne la maca ne la Baselaia ke, kola mala me cia ngöne la itre hni ne la itre ka kapa lai maca. (Mat. 13:18, 23) Drei la ka aciane la itre itine cili matre troa wa wen? Celë hi hna qaja hnei Iesu ngöne la topik ne la drai celë. w20.05 30 par. 14-15

Ame enehila, nyimutre la itre trefën ka seihnacil. Nyipici laka, tha easë kö a ajane troa ceitu memine la itre atr enehila ka pë ihnimin. Easë pe a amamane la ihnimi së kowe la itre sinee së me itre trejin ngöne la nyipici. (Rom. 12:10) Ame la hnaewekë “ihnimikeu” tre, kola qaja la ihnimi e hnine la hnepe lapa. Celë hi lai ihnimi hne së troa amamane kowe la itre trejin e hnine la ekalesia. Eje hi, maine tro sa ihnimikeu, tro hë sa caasi me xatuane la itre xan troa madrin troa catre nyihlue i Iehova e hnine la ekalesia.—Mika 2:12. w21.01 20 par. 1-2

Pane mekune jë së la ketre ekip ne feni balo. Maine ka itrotrohni me caasi la ekip, tro hë angatr a ngaan la itre xaa ekip. Eje hi, maine tro sa nue asë la mele së kowe la huliwa i Akötresie, tro hë sa cile catr tune la ekip ka hun. Tha tro kö sa thëthëhmine laka, madrine catre Satana e tha pexeje hë la hni së koi Iehova. Ame la aja i angeic, tre, troa aciane the së la itre aja ka ngazo, ka icilekeu memine la aja i Iehova. Ngo loi e troa pexeje la hni së matre troa nyihlue i Iehova. (Mat. 22:36-38) Tha tro pi kö sa nue jë i Satana! Tui Dravita, sipone jë koi Iehova ka hape: ‘Apexejene ju la hning matre tro ni a xouene la ëje i nyipë.’ Nge loi e tro sa ujë thenge la thithi së. Loi e tro la itre mekun hne së hna axeciën a amamane laka, easa metrötrëne la ëje i Iehova ka hmitrötr! Celë hi aqane tro sa atrune la ëje i Nyidrë, easë itre hlue i Iehova. (Ite Edomë 27:11) Maine tro sa ujë tune lai, tro hë sa qaja tui Mika ka hape: “Tro pe kö sha tro ngöne la atesiwa [ëje] i Iehova Akötesi shë epine palua.”—Mika 4:5. w20.06 13 par. 17-18

Ame ngöne la ijine tro la joxu ne kolopi me itre xaa mus ne fen a cile kowe la nöje i Iehova, tro ha atraqatre la elëhni Iehova, Akötresie ka Tru Trene Men, nge tro ha nyiqaane la isi Amagedro. (Hna ama. 16:14, 16) Eje hi, tro ha lep apatrene la joxu ne kolopi memine la itre xaa nöj ka sine la Gog atre Magog, nge “pëkö ate troa xatua angeic.” (Dan. 11:45) Ame ngöne la xötr e thupen, kola qaja la itre ithuemacanyi göne la aqane troa lep apatrene la joxu ne kolopi me itre sine xöle i angeic, me göne la aqane troa amele së. (Dan. 12:1) Nemene la aliene la xötr celë? Mikaela la ketre ëje i Iesu Keriso joxu. Nge nyidrëti a ‘cilëgöline’ la nöje i Akötresie qane lo kola acile la musi nyidrë e hnengödrai lo 1914. Ngo easenyi hë matre tro nyidrëti a “cil” me lep apatrene la itre ithupëjia me nyidrë, ngöne la isi Amagedro. Celë hi isi tixenuë hna hën hnei Daniela, ka hape, “ijine akötr.” Ame ngöne la tusi Hna Amaman, hnei Ioane aposetolo hna qaja la ijine qëmekene la isi cili, ka hape, “akötr atraqatr.”—Hna ama. 6:2; 7:14. w20.05 15-16 par. 15-17

Thatreine kö Iosefa troa apatrene la itre jol. Ngo nemene la ka xatua angeic? Tha hnei Iosefa kö hna mekun lapane la itre ewekë hnei angeic hna thatreine kuca. Hnei angeice pe hna catre kuca la hnëqa hna ahnithe koi angeic. Eje hi, hnei angeic palahi hna thele troa amadrinë Iehova. Nge hnei Iehova hna amanathithine la nöjei huliwa i angeic. (Gen. 39:21-23) Kola amamane hnene la tulu i Iosefa laka, ka ngazo catre la fen nge ijije hi troa qanangazo së. Ijije fe troa akötrë së hnene la ketre trejin. Ngo maine Iehova la Giti së me Hnapo së, tha tro kö sa kucakuca me nuetriji Nyidrë. (Sal. 62:6, 7; 1 Pet. 5:10) Eje hi, 17 hi lao macatre i Iosefa ngöne la Iehova a hamë angeic la itre pu. Kola amamane laka, Iehova a mejiune kowe la itre thöth ka nyihlue i Nyidrë. Alanyimu enehila la itre nekötrahmany me neköjajiny ka tui Iosefa me catre lapaune koi Iehova. Ame la itre xan, hna akalabusi angatr ke, angatr a mele nyipici koi Akötresie.—Sal. 110:3. w20.12 16 par. 3; 17 par. 5, 7

Atre hi Peteru me Ioane aposetolo laka, troa qanangazo angatr ke, angatr a xötrethenge Iesu me tro fë la itre ini nyidrë. Angatr a madrin ngöne la kola icilekeu. (Itre hu. 4:18-21; 5:27-29, 41, 42) Tha hnei angatre kö hna hmahma. Nge hetre thangane la huliwa i angatr. Eje hi, ame lo itre tusi hnei angatr hna cinyihan ekö jëne la uati hmitrötr, tre, kolo palahi a xatua së me hamë mejiune së enehila. Ketre, cile hë la Baselaia hnei angatr hna cainöjën, nge easenyi hë matre tro ej a musi e cailo fen. (Mat. 24:14) Ame pena lo musi angetre Roma ka akötrëne la itre Keresiano ke, paatre hë enehila. Ketre, itre Keresiano ka mele nyipici a musi e hnengödrai, nge meci hë lo itre ka icilekeu. Maine troa amelene hmaca lo itre ka icilekeu, tro angatr a mel e celë fen, fene la Baselaia hna cainöjën ekö hnene la itre Keresiano, lo hnei angatr hna akötrën.—Hna ama. 5:10. w20.07 15 par. 4

Hnei Aberahama hna catre lapaun kowe la hna thingehnaean hnei Iehova, matre kösë öhne hi angeic la Mesia, ene la joxu ne la Baselaia. Celë hi matre öni Iesu koi angetre Iudra: “Hnei Aberahama, keme i nyipunie hna lapa treqene la drai ne tro ni a traqa. Nge öhne hë angeice lai me madrin.” (Ioane 8:56) Eje hi, atre hi Aberahama laka, tro la matra i angeic a sine la Baselaia hna acile hnei Iehova. Nge angeic pë hë a treqene tro Akötresieti a eatrëne la hna thingehnaean. Nemene la aqane amamane Aberahama laka, angeic a lapa treqene la “traon” ene la Baselaia hna acile hnei Akötresie? Ame la hnapan ke, tha hnei angeice kö hna sine la ketre baselaia. Hnei angeic palahi hna feke trootro. Tha hnei angeice kö hna lapa hut ngöne la ketre götran, me nyihluene la ketre joxu. Ketre, tha hnei angeice kö hna thel troa joxu. Hnei angeic hna drengethenge Iehova me lapa treqen la tro Nyidrëti a eatrëne la itre hna thingehnaean. Celë hi aqane amamane Aberahama la lapaune i angeic koi Akötresie. w20.08 3 par. 4-5

Hnei Iehova hna perofetan laka, ame fene la musi Keriso, pëhë ka troa qaja ka hape, “Ini a mec.” (Is. 33:24) Eje hi, tro ha lolo la ngönetrei ne la itre hna troa amelene hmaca. Ngo tha pexeje palakö angatr, wanga tha tro kö a canga wangatrehmekunyi angatr hnene la itre sinee i angatr. Ketre, ame fene la musi Iesu, tro la itre atr a isa kökötre trootro utihë la pexeje angatr. Thupene la 1 000 lao macatre, tro hmaca Iesu a nue la Baselaia kowe la Keme i nyidrë. E cili, tro ha pexeje la huliwa ne la Baselaia, nge tro fe a pexeje la itre atr. (1 Kor. 15:24-28; Hna ama. 20:1-3) Pane mekune jë së laka, easa kapa la itre sinee së hna amelene hmaca. Hapeu, tro kö sa madrin maine treij? Tro kö sa thinge la itre nyima nyine olene koi Iehova? Xecie hnyawa koi së laka, tro sa amamane la etrune la ihnimi së koi Iehova me Iesu. Hnei nyidroti hna hamëne koi së la ketre ahnahna ka tru, ene la melehmaca. w20.08 16-17 par. 9-10

Hnei Paulo aposetolo hna ithuecatre kowe la itre Keresiano ka hape, maine ijiji angatre hi, tha tro kö a faipoipo matre tro angatr a catre nyihlue i Iehova. (1 Kor. 7:8-9) Tha hnei Paulo kö hna wangacone la itre Keresiano ka tha faipoipo kö. Hnei nyidrëti hna hamë hnëqa koi Timoteo, ketre trejin ka tha faipoipo kö. (Fil. 2:19-22) Eje hi, tha hnene kö laka, tha ka faipoipo kö la ketre trejin matre thatreine kö angeic eatrëne la hnëqa i angeic. (1 Kor. 7:32-35, 38) Tha hnei Paulo kö me Iesu hna qaja ka hape, tro la itre Keresiano a faipoipo maine tha faipoipo. Nemene la aqane tro sa goeëne la itre trejine ka tha faipoipo kö? Kola qaja ngöne la Ita Ne Thup ne 1 Okotropa 2012: “Ame la troa faipoipo me lapa caas, tre, lue ahnahna lai qaathei Akötresie. Ngo ame koi Iehova, tha nyine hmahmane kö la troa lapa caas. Ketre, tha tro kö la itre ka lapa caas a akötr.” Haawe, loi e tro sa metrötrëne la itre trejin ka tha faipoipo kö. w20.08 28 par. 8-9

Ame ngöne la itre xaa nöj, alanyimu la itre atr ka ajane troa atre la maca ka loi. Angatr a thele troa atre la aliene la Tusi Hmitrötr! Ame pena ngöne la itre xaa nöj, tha lapaune kö la itre atr koi Akötresie, nge xele kö angatr ma drenge la maca ne la Tusi Hmitrötr. Tune kaa ngöne la nöje së? Ngacama tha ajane kö la itre atr troa drei së, ngo Iehova a sipo së troa catre cainöj uti hë la Nyidrëti a umuthe la huliwa. Ame ngöne la ijine hna sa hnei Iehova, tro hë Nyidrëti a umuthe la huliwa ne cainöj, “ame hna traqa pi la pun.” (Mat. 24:14) Hnei Iesu hna perofetane la itre ewekë ka troa traqa ngöne la itre drai ne la pun. Atre hi nyidrë laka, tro la itre ewekë cili a ajolë së troa catre cainöj. Celë hi matre öni nyidrë, “hmeke jë.” (Mat. 24:42) Ame lo ijine Iwë Atraqatr, tha hna drei Noa kö hnene la itre atr ke, tru catre palaha la itre huliwa i angatr. Ketre tu së fe enehila, ijije hi troa ajolë së troa cainöj hnene la itre huliwa së. (Mat. 24:37-39; 2 Pet. 2:5) Celë hi matre, loi e tro palahi sa amë panëne la huliwa hna ahnithe koi së hnei Iehova. w20.09 8 par. 1-2, 4

“Atraqatr la trenge elëhni” Satana. Celë hi matre, easa akötr nge tha tingetinge kö la mele së. (Hna ama. 12:12) Easenyi hë la ijine troa tupathe la lapaune së. Nyipici laka, kola troa traqa la “akötr atraqatr, ewekë ka tha hane kö traqa qaane lo Akötresie a nyiqaane xupe la fene hnengödrai.” (Mat. 24:21) Maine jë, troa icilekeu hnene la itre fami së, nge tro fe a wathebone la huliwa ne cainöj. (Mat. 10:35, 36) Hapeu, tro kö sa mejiune tui Asa laka, tro Iehova a xatua së me thupë së? (2 A. l. ite jo. 14:11) Iehova a hnëkë së kowe la itre drai ne la pun. Jëne la “hlue ka nyipici me ka inamacan,” Iehova a “hamë xeni ngöne la nyipi ijin” matre hamë trengecatre së troa cilëgöline la nyipi hmi. (Mat. 24:45) Haawe, nyipiewekë tro sa acatrene la lapaune së koi Iehova e ijine loi palakö.—Heb. 10:38, 39. w20.09 18 par. 16-18

Jëne la uati hmitrötr, Iehova a upe la itre atr ka hetre hnëqa ka tru matre troa eatrëne la aja i Nyidrë. Ame itre xan, angatr a ajeane la tim qa ngöne la hneopegejë, matre troa fie la itre hlapa i angatr. Ketre tui Iehova, jëne la uati hmitrötr, Nyidrëti a saze la mekuna ne la itre ka hetre hnëqa ka tru, matre troa eatrëne la aja i Nyidrë. E cili, angatr a axecië mekun thatraqane la nöje i Iehova. (Wange ju fe la Ezera 7:21, 25, 26.) Nemene la nyine tro sa kuca? Ijije hi tro sa thith “thatraqane la itre joxu, me itre trene hnëqa ka tru” ngöne la angatr a axecië mekun thatraqane la huliwa i Akötresie. (1 Tim. 2:1, 2, ftn.; Neh. 1:11) Tune la itre pane Keresiano, easa thith thatraqane la itre trejin hna akalabusin.—Itre hu. 12:5; Heb. 13:3. w20.11 15 par. 13-14

Nemene la mekuna i epun ngöne la kola xomi bapataiso hnene la ketre hnainin? Nyipici, madrine catre së! (1 Thes. 2:19, 20) Ame la itre ka xötrei xomi bapataiso ke, angatr la itre ‘tus nyine qaja aloine’ la atre hamë ini me ekalesia fe. (2 Kor. 3:1-3) Easa madrin ke, ame ngöne la foa lao macatre ka ase hë, traqa koi 10 000 000 lao atr e cailo fen ka ini tus e nöjei treu. Drei la ketre madrin ka tru! Ketre, ame e nöjei macatre, hna sasaithe la 280 000 lao atr ka xomi bapataiso. Nemene la aqane tro sa xatuane la itre ka ini tus troa hane xomi bapataiso? Iehova palakö a aijijëne la itre atr troa xötrethenge Iesu, matre loi e tro sa xatua angatr troa canga xomi bapataiso. Eje hi, easenyi hë la pun.—1 Kor. 7:29a; 1 Pet. 4:7. w20.10 6 par. 1-2

Tha hnei Saulo joxu kö hna drengethenge Iehova. Nge ame la kola wenë ameköti angeic hnei Samuela perofeta, tha hnei angeice kö hna kapa la ihaji. Hnei angeic hna wangacone la ngazo hna kuca me upezö itre xan. (1 Sam. 15:13-24) Hnei angeic palahi hna majemine kuca tun. (1 Sam. 13:10-14) Tha hnei angeice kö hna saze la thiina i angeic ka pi tru. Pine laka tha canga wenë amekötine kö Saulo la itre mekuna i angeic, matre hnei Iehova hna haji angeic me nuetriji angeic. Loi e tro sa xomi ini qa ngöne la tulu i Saulo, me hnying ka hape: “Hapeu, eni a kö a thele kepin matre tha tro kö a trongëne la itre trepene meköti ne la Tusi Hmitrötr? Eni kö a wangacone la ngazo hnenge hna kuca, maine upezö itre xan pena?” Maine eje hi, loi e troa saze la itre mekuna së me aqane ujë së. Maine tha thupëne kö së, tro hë sa pi tru nge tro ha nuetriji së hnei Iehova. w20.11 20 par. 4-5

Itre nekötrahmany me neköjajiny, iëne jë la hnei epun hna troa nyihluen. Loi e troa isa hnying ka hape: ‘Drei lae Iehova? Nemene la aja i Nyidrë? Nge nemene la aja i Nyidrëti koi eö?’ (Rom. 12:2) Celë hi ka troa xatua epun troa axecië mekune hnyawa me nyihlue i Iehova. (Ios. 24:15) Maine tro epuni a catre e me inine la Tusi Hmitrötr, tro ha kökötre la ihnimi epuni koi Akötresie, nge tro ha catrecatre la lapaune i epun. Troa pane kuca la aja i Iehova ngöne la mele i epun. Ame ngöne la fene i Satana, tro sa madrin e hne së hna kuca la hne së hna atreine thatraqai së hi. Ngo ame la itre ka pi aja mo, tre, “angatr a sipu jaqa angatr hnei itre akötr.” (1 Tim. 6:9, 10) Maine tro sa drengethenge Iehova me amë panëne la aja i Nyidrë ngöne la mele së, tro hë sa ‘loi xölene ngöne la jë së, me manathith.’—Ios. 1:8. w20.10 30-31 par. 17-18

Ame ngöne la hneijine la itre pane Keresiano, hnei Iesu hna tro fë la maca ne mejiun. Celë hi matre, hnei nyidrëti hna upe la itretre drei nyidrë troa sisedrëne la huliwa cili “uti hë la cane la fene hnengödrai.” (Itre hu. 1:8) Eje hi, tha tro kö angatr a eatrëne la huliwa cili hnene la sipu trengecatre i angatr. Loi e tro angatr a sipone la uati hmitrötr, ene la “ixatua” hna thingehnaean hnei Iesu. (Ioane 14:26; Zaka. 4:6) Hnene la itretre drei Iesu hna kapa la uati hmitrötr ngöne lo Penetekos macatre 33. Jëne la ixatua cili, hnei angatr hna catre cainöj nge alanyimu la itre atr ka kapa la maca ka loi. (Itre hu. 2:41; 4:4) Ketre, tha hnei angatre kö hna xou ngöne la kola icilekeu. Hnei angatre pe hna sipo ixatua koi Iehova, me hape: “Aijijëne jë la itre hlue i nyipë troa catre cainöjëne la itre trengewekë i nyipë.” Eje hi, hnene la uati hmitrötre i Akötresie hna upi angatr troa “catre cainöjëne la trengewekë i Akötresie.”—Itre hu. 4:18-20, 29, 31. w20.10 21 par. 4-5

Nemene la ka anyipicine laka, hnei Iehova hna amele Iesu hmaca? Alanyimu la itre ka öhnyi Iesu thupene la kola amele nyidrëti hmaca. (1 Kor. 15:5-7) Hnei Paulo aposetolo hna qaja ka hape, Peteru (Kepa) la ka pane öhnyi Iesu. Nge hna jelenyipicine lai hnei itre xan. (Luka 24:33, 34) Ketre, hnene la ala “Truelof” lao aposetolo hna öhnyi Iesu thupene la kola amele nyidrëti hmaca. Nge tune la hna qaja ngöne Mataio 28:16-20, hnei Keriso hna “mama kowe la ala 500 nge hetre munëne lao trejin” e Galilaia. Ketre, hnei Iesu hna “mama koi Iakobo,” jini nyidrë, ngacama tha mejiune kö angeic laka, Iesu la Mesia. (Ioane 7:5) Ame hë e thupen, hnei Iakobo hna lapaune koi Iesu. Ame la Paulo a cinyihane la hnaaluene tusi angeic koi angetre Korinito ngöne la macatre 55 M.K. ke, mele palakö la itre ka öhnyi Iesu thupene lo kola amele nyidrëti hmaca. Celë hi matre, maine itre xan a luelu göne la melehmaca, ijije hi tro angatr a hnying kowe la itre ka öhnyi Iesu. w20.12 3 par. 5, 7-8

Maine jë easa wezipo maine pena hna tithi së hnene la ketre mec hna thatreine xomihnin, matre tha madrine kö së. E cili, loi e tro sa thele ixatua thei Iehova. Tha tro kö Nyidrëti a kuca la ketre iamamanyikeu me aloine la meci së. Ngo tro Nyidrëti a akeukawane la hni së me hamë trengecatre së troa atreine xomihnine la akötr. (Sal. 94:19) Maine jë, tro Nyidrëti a upe la itre trejin troa xatua së me nyidrawane la hnalapa, maine komisio, maine ce thithi pena me easë. Maine pena, tro Nyidrëti a amekunë së la itre mekun ka ithuecatr qa hnine la Trengewekë i Nyidrë, tune la mejiune së troa mel ngöne la fene ka hnyipixe nge pë hmaca kö mec me akötr. (Rom. 15:4) Ngo maine jë, easa kucakuca ke, thatreine hë së cainöj tune ekö. Ame e Etazini, 37 lao macatre ne mel Laurel memine la ketre idrefitre fao! Hna tithi eahlo hnei mec ka pë nyin, matre hna anyimua xöji eahlo. Nge hna lapane la ngönetrei eahlo hnene lai mec. Ame pe, tha celë kö lai ka sewe Laurel troa qaja la lapaune i eahlo. Hnei eahlo hna cainöj kowe la itre droketre ka traqa ngöne la hnalapa i eahlo, nge traqa koi 17 la itre atr hnei eahlo hna xatuane troa atre Iehova! w20.12 24 par. 9; 25 par. 12

Hnei Paulo aposetolo hna cile kowe la ketre jol. Ame lo 56 M.K., hnene la itre atr hna huli Paulo tröne la uma ne hmi e Ierusalema, matre troa humuthi angeic. Ame la drai thupen, hna utisai Paulo kowe la Hnakotre Ka Tru i Angetre Iudra me thele troa humuthi angeic. (Itre hu. 21:30-32; 22:30; 23:6-10) Maine jë hnei angeic hna mekun ka hape, ‘Uti hë eu la tro ni a xomihnine la itre jol celë?’ Nemene la ixatua hna kapa hnei Paulo? Ame ngöne la jidr thupene la hna othi Paulo, hnei Iesu hna ceme angeic me qaja ka hape: “Catre pi! Ke tune la aqane anyipici ni hnei eö e Ierusalema, tro fe eö a hane anyipici ni e Roma.” (Itre hu. 23:11) Drei la ketre ixatua ka tru koi Paulo! Hnei Iesu hna qaja aloinyi angeic ke, hnei angeic hna catre cainöj e Ierusalema. Nge hnei nyidrëti fe hna qaja ka hape, pëkö ewekë ka troa ajolëne la tronge i angeic uti hë la kola traqa e Roma, matre troa cainöj. E cili, tingeting me lolo la mele i Paulo tune la ketre nekönatr hna xepe hnei kem. w20.11 12 par. 1, 3; 13 par. 4

Ame la mejiune së, tre, “kösë iuhni kowe la mele së.” Ej a xatua së troa catr ngacama kola traqa la nöjei pengöne jol. Pane mekune jë së la mele hna thingehnaean hnei Iehova ngöne la fene ka hnyipixe! Patre hë la itre ewekë ka akötrë së, nge tha tro hmaca kö sa hnehengazo. (Is. 65:17; Mika 4:4) Ketre, ame la easa cainöj, easë hi lai a acatrene la mejiune së. Haawe, catre jë së cainöj me inine la itre atr. E cili, tro ha ‘xecie hnyawa la mejiune së uti hë la pun.’ (Heb. 6:11) Easenyi hë la pune la fene celë, matre nyimutre la itre jol ka troa traqa. Nge tro hë së lai a hnehengazo me kucakuca. Ngo ijije hi tro sa elë hune la itre jol cili, me mejiune koi Iehova ngo tha kowe kö la sipu trengecatre së. Loi e tro sa amamane ngöne la aqane ujë së laka, easa lapaune kowe la hna qaja hnei Iehova, ka hape: “Tro nyipunie a egöcate hnene la tingetinge me lapaun.”—Is. 30:15. w21.01 7 par. 17-18

Ame ngöne Iakobo 5:11, kola qaja la ketre thiina ka lolo i Iehova, ene la aqane utipine i Nyidrë. (Eso. 34:6) Iehova a utipi së ngöne la Nyidrëti a nue la itre ngazo së. (Sal. 51:1) Ame pe, ame e hnine la Tusi Hmitrötr, tha kolo hmekuje kö a qaja la troa nue la ngazo i ketre. Kolo fe a qaja la aliene hni së ngöne la easa öhne la ketre atr ka akötr nge ka aja ixatua. Öni Iehova ka hape, tha ceitu i Nyidrëti kö memine la ketre thin; catrecatre kö la trenge aja i Nyidrë troa xatua së. (Is. 49:15) Celë hi matre, ame la easa cile kowe la itre jol, Iehova a canga xatua së. (Sal. 37:39; 1 Kor. 10:13) Easa utipine la itre trejin, ngöne la easa nue la ngazo hnei angatr hna kuca koi së me thele troa iloi. (Efe. 4:32) Ngo easa amamane la hni ne utipine së ngöne la angatr a cile kowe la itre jol. Easa nyitipu Iehova, ene la tulu ne ihnim.—Efe. 5:1. w21.01 21 par. 5

Loi e tro la itre he ne fami a huliwa thatraqane la fami angatr. Ngo loi e tro angatr a atreine waiewekë hnyawa. Tha tro kö angatr a nue asë la traeme i angatr göne lai. Loi e tro fe angatr ami ijine troa ini tusi memine la fami. Iehova a ini së me haji së, nge nyine loi koi së. (Heb. 12:7-9) Tui Iehova, Iesu a inine la itre ka lapa fene la musi nyidrë cememine la ihnim. (Ioane 15:14, 15) Ketre, ngacama catre la eamo, ngo hnei Iesu palahi hna hamën cememine la hni ka menyik. (Mat. 20:24-28) Atre hi Iesu laka, tha ka pexeje kö së matre easa tria e itre xaa ijin. (Mat. 26:41) Tui Iehova me Iesu, loi e tro la he ne fami a lapa mekun laka, tha ka pexeje kö la föe i angeic me itre nekönatr. Celë hi matre, tha angeice kö a “ngazo thiina” koi nyudren. (Kol. 3:19) Angeice pe a trongëne la hna qaja ngöne Galatia 6:1, me ‘thele troa wenë ameköti nyudren, cememine la hni ka menyik.’ Ketre, atre hi angeic laka, tha ka pexeje kö angeic, matre angeic a hamë ini me amamai tulu, tui Iesu. w21.02 6-7 par. 16-18

Jëne la thupene mel, hnei Iehova hna itöne la mele ne la nöjei trejine la ekalesia me itre xan ka mejiune koi Iesu. (Mar. 10:45; Itre hu. 20:28; 1 Kor. 15:21, 22) Celë hi matre, hnei Iehova hna ië Iesu troa he ne la ekalesia. Pine laka, Iesu la tane së, ijije hi tro nyidrëti a acili wathebo kowe la itre hlue i Akötresie, itre fami, me kowe la ekalesia. Nge ijije fe tro nyidrëti a upi angatr troa drengethenge. (Gal. 6:2) Ngo tha Iesu hmekuje kö a acile la itre wathebo, nyidrëti fe a hamë göxeni koi së me thupë së. (Efe. 5:29) Itre trejine föe a metrötrë Keriso ngöne la angatr a drengethenge la itre trahmanyi hna acil. Ame la itre trejin trahmanyi ka trotrohnine la mekuna i Iehova göne la troa mus, tre, angatr a metrötrën me wangatrune la itre trejine föe. Eje hi, maine tro la itre atrene la ekalesia a trotrohnine la kepin matre hna acile la itre xan troa mus, me isa metrötrë angatr, tro ha tingeting me caasi la ekalesia. Ame la ka sisitria, tro hë së lai a atrunyi Iehova, Keme së ka tru ihnimin. w21.02 18-19 par. 14-17

Ame la ketre ijin, hnei Dravita me itre sooce i angeic hna tro troa isi. Hnei angatre hna nue la itre fami angatr. E cili, hnene la itre ithupëjia hna lepe la traon, me thapa la itre fami angatr. Eje hi, ketre atre isi Dravita. Maine ju, tro angeic a thele aqane troa amelene la itre fami angatr. Ngo hnei angeice pe hna sipo ixatua koi Iehova. Hnei Dravita hna hnyingë Iehova ka hape: “Tro ni a weje la ishi cili?” Hnei Iehova hna upi Dravita troa weji angatr me qaja ka hape, tro kö angeic a amelene la itre fami angatr. (1 Sam. 30:7-10) Nemene la ini hne së hna xom e celë? Haawe itre trejin nekötrahmany, qëmekene troa axecië mekun, loi e troa pane sipo ixatua. Koi drei? Kowe la itre kem me thin. Ketre, ijije hi tro la itre qatre thup a xatua epun. Iehova a mejiune koi angatr ke, itre “ahnahna” angatr e hnine la ekalesia. Ijije fe tro epuni a mejiune koi angatr. (Efe. 4:8) Eje hi, maine tro epuni a nyitipune la aqane lapaune i angatr, me drengethenge la itre eamo hna hamën, tro hë epuni a axecië mekune hnyawa. w21.03 4-5 par. 10-11

Hnei Iesu hna qaja ka hape, maine tha trongëne kö së la itre hne së hna inin ke, kösë easa xupi uma ngöne la ngöni. Ngacama tru la trengecatre hna nue, ngo ka gufa la huliwa. Pine nemen? Pine laka, maine troa manie me di, tro ha kei uma. (Mat. 7:24-27) Ketre tune fe, maine tha trongëne kö së la hne së hna inin, tro ha gufa la itre trengecatre së. E cili, tro hë sa canga kei kowe la itre jol me itupath ke, tha catrecatre kö la lapaune së. Ngo maine tro sa trongëne la itre hna inin e hnine la Tusi Hmitrötr, tro hë sa axecië mekun hnyawa, me mele tingeting, me catre lapaun. (Is. 48:17, 18) Maine easa ajane troa cile hut, loi e tro sa thithi koi Iehova, me mejiune koi Nyidrë, me catre inine la Tusi Hmitrötr. Tha tro kö sa thëthëhmine la ka sisitria, ene la troa atrunyi Iehova. Loi e xecie koi së laka, tha tro jë kö Iehova a nuaxöji së. Nge pëkö ewekë ka atreine troa thapa la ihnimi Nyidrë koi së.—Heb. 13:5, 6. w21.03 15 par. 6; 18 par. 20