Julai

Loi e tro sa acatrene la aqane imelekeu së me Iesu, matre troa sa la itre thithi së. Tha tro hi sa qaja ka hape, “jëne Iesu” ngöne la easa nyipun la thithi së. Loi e tro fe sa trotrohnine la hnëqa i Iesu qaathei Iehova, matre troa sa la itre thithi së. Öni Iesu kowe la itre aposetolo: “Ame la nöjei ewekë hnei nyipunieti hna troa sipon ngöne la ëjeng, tro ni a eatrën.” (Ioane 14:13) Iehova la ka dreng me sa la itre thithi së. Ngo hnei Nyidrëti hna nue koi Iesu troa eatrëne la itre mekuna i Nyidrë. Qëmekene tro Akötresieti a sa la itre thithi së, Nyidrëti a pane goeën e hne së hna trongëne lo eamo hna hamën hnei Iesu. Öni Iesu: “Maine nyipunieti a nue la ngazo hna kuca koi nyipunie, tro la Keme i nyipunie e koho hnengödrai a hane nue la ngazo i nyipunie. Ngo maine tha hnei nyipunieti kö hna nue la ngazo hna kuca koi nyipunie, ketre tha tro kö la Keme i nyipunie a nue la ngazo i nyipunie.” (Mat. 6:14, 15) Celë hi matre, loi e tro sa thiina ka loi koi itre xan, tui Iehova me Iesu! w20.04 22 par. 6

Hnei Paulo aposetolo hna pane thele la itre mekun hna ajan troa ithanatane hnene la itre atr, me nyiqaane porotrik me angatr. Ame lo Paulo e Lusetara, atre hi angeic laka, thatre hnyawa kö la itre atr la Itre Hna Cinyihan. Celë hi matre, hnei Paulo hna eköthe hnyawa la aqane ithanata i angeic, matre troa ketr la hni angatr. Hnei Paulo hna qaja la aqane mana la xen, me nyine troa kuca matre troa mele madrin. Hnei angeic hna xome la itre hnaewekë me itre ceitun hna atre me hna trotrohnin hnene la itre atr. Nyipiewekë troa thele la itre hna ajan hnene la itre atr, matre troa ihmeku la aqane nyiqaane ithanata së. Ame la easa goeëne la ketre atr maine hnalapa i angeic, ka mama kö la itre ewekë hnei angeic hna ajan? Nyipiewekë tro sa atreine goe. Maine jë, ka tra iengen lai atr, maine e tus, maine ka kuci loto, maine itre xaa huliwa ju kö. Maine ijije hi, loi e tro sa huliwane la itre ithuemacanyi cili, matre troa eköth la aqane nyiqaane ithanata së. (Ioane 4:7) Ketre, ijije hi tro sa atrepengöne la atr jëne la aqane heetre i angeic. Tro sa atre la nöje i angeic, maine huliwa i angeic maine elo pena hna ajan. Öni Gustavo: “Hnene la ketre thöth ka 19 lao macatre hna heetrëne la ketre inunu. Ame hune la inunu, hetrenyi la ifoto ne la ketre atr ka nyima nge ka hlemu. Hnenge hna nyiqaane qaja lai atr cili, nge hnei angeic hna qaja la kepin matre ka tru koi angeic la atr cili. Thupene lai, hnei nyio hna ini tus, nge ketre trejine hë angeic enehila.” w20.04 11 par. 11-12

Ame la itre xaa trejin ke angatr a hnehengazo, matre angatr a xou me hmahma. Maine jë, jol koi angatr troa tro ngöne la gaa tru atr. Ame pe, angatr palahi a sine la itre icasikeu me itre asabele. Ketre, jol koi angatr troa ithanata memine la itre trenyiwa. Ngo angatr palahi a catre cainöj. Maine celë hi ka traqa koi epun, tha epuni caasi kö. Hna hane fe traqa lai koi itre xan. The thëthëhmine kö laka, madrine catre Iehova la itre trengecatre hnei epuni hna nue. Epuni a cile catr ngöne la itre jol. Hatrene hi laka, Iehova a amanathithi epun me hamë epuni la trengecatr ka ijij. (Fil. 4:6, ) Maine jë easa cile catre ngöne la huliwa i Iehova ngacama hna tithi së hnei mec. Ngo xecie hnyawa koi së laka, easa amadrinë Iehova. Alanyimu the së la itre ka kucakuca, ngo ame pe, angatr a cile catr. (2 Kor. 4:16) Eje hi, jëne la ixatua i Iehova, ijiji së asë hi troa traqa kowe la hna ie! w20.04 31 par. 20-21

Kola mama la inamacane i Akötresie jëne la aqane xupe Nyidrëti la ihnadro. (Heb. 3:4) Alanyimu catre la itre planètes, ngo ihnadro caasi hi la götrane ka ijij troa mele ngön hnene la itre atr. Ijije hi tro sa aceitunëne la ihnadro memine la ketre he hune la hnagejë. Ngo isapengöne kö la ketre he ka tiqa hnei atr memine la ihnadro. Ame la itre atrene la he, tre, tro angatr a sipu thele enyi ka lolo me xen me tim. Ketre, tha tro kö angatr a trije menun e kuhu hnagejë la itre salite. Tro kö angatr a mel aqeany? Waea. Ngo ame hune la ihnadro, ijije hi troa mele la itre miliar lao atr me öni. Hetrenyi la enyi ka lolo me itre xen me tim thatraqane la mele së, nge tha tro kö a hane pë. Tha eje kö a trije menun la itre salite. Ngo ame pe, ka lolo palahi me mingöming la ihnadro. Pine nemen? Hnei Iehova hna xupe la ihnadro memine la atreine troa sipu nyidrawan ej. w20.05 20 par. 3-4

Satana ha qaja amamane la mekuna i angeic, me adrone la ëje i Akötresie me qaja ka hape, ka thoi Nyidrë. E cili hi la angeic a nyi Diabolo me atre iaö. Eje hi, hna iaö Eva nge hnei angeic hna drei Satana. (1 Tim. 2:14) Hnei angeic hna mejiune koi Satana hui Iehova. Celë hi matre ka ngazo la aqane axecië mekune i angeic. Hnei Eva hna tha drei Iehova. Hnei angeic hna xen la wene sinöe hna wathebon, me hamën koi Adramu. (Gen. 3:6) Pane mekune jë la nyine tro Eva a qaja koi Satana, ka hape: “Iehova casi hi la Kemeng hnenge hna hnim, nge thatre eö fe kö ni. Eni a mejiune koi Nyidrë. Qaathei Nyidrëti asë hi la nöjei ewekëng me Adramu. Hnauëne pena la eö a qaja angazo Nyidrë? Tro pi!” Drei la madrine i Iehova troa dreng la nekö i Nyidrëti e qaja amamane la ihnimi angeic, me mele nyipici koi Nyidrë! (Ite Edomë 27:11) Ngo tha celë kö la mekuna i Eva me Adramu! Pine laka, pëkö ihnimi nyidroti kowe la Keme i nyidro, matre tha hnei nyidroti kö hna cilëgöline la ëje i Iehova qa ngöne la itre trengathoi Satana. w20.06 4 par. 10-11

Loi e tro sa amamane la hni ne ole së kowe la itre trejine föe ka catre huliwa koi Iehova. Angatr a saen troa xom la Huliwa Ne Xupi Uma Ne Baselaia, me sine la itre ekalesia ka qaja la ketre qene hlapa, maine huliwa ngöne la Bethela. Angatre fe a xatuane la itre hna lepe hnei hulö, maine xom la huliwa ne ujë qene hlapa, maine pionie me mesinare. Ketre, angatr a xatuane la itre föi angatr ka hetre hnëqa e hnine la ekalesia maine e hnine la organizasio i Iehova. Eje hi, maine tha xatua angatre kö hnene la itre föe i angatr, thatreine kö angatr troa “itre ahnahna” qaathei Akötresie. (Efe. 4:8) Itre qatre thup a wangatrehmekune laka, “trongene isi ka alanyimu” la itre trejine föe nge itre ka catre cainöj. Ketre, atre hnyawa hi la itre qatre thup laka, ijije hi tro la itre trejine föe ka macaj a xatuane la itre trejine föe ka co ngöne la itre ijine jol. (Tito 2:3-5) Epi tro sa hnim me amamane la hni ne ole së kowe la itre trejine föe! w20.09 23-24 par. 13-14

Tha thëthëhmine kö Iehova la itre trejin ka nanazij, nge ka trotrije la nöje i Nyidrë. Ketre tha thëthëhmine kö Nyidrë la itre huliwa hnei angatr hna kuca koi Nyidrë. (Heb. 6:10) Hnei Isaia perofeta hna hamën la ketre ceitun ka amamane la aqane thupëne Akötresieti la itre hlue i Nyidrë. Öni Isaia: “Tro nyidëti a hiane la hnënge mamoe i nyidë tune la ate thupë mamoe; tro nyidëti a hatupe la ite nekö i mamoe i nyidë ngöne la lue ime i nyidë, me xepi nyudeni ngöne la imano i nyidë.” (Is. 40:11) Nemene la mekuna ne la Atre thupë mamoe ka tru ngöne la kola paatre la ketre mamoe? Öni Iesu kowe la itretre drei nyidrë: “Tune kaa la mekuna i nyipunie, e tro la ketre atr a hetrenyi la 100 lao mamoe, nge paatre ju hi la ketre, hapeu, tha tro kö angeice lai a pane nue lai ala 99 ngöne la wetr, matre thele la ka paatr? Nge e öhne hë angeic, eni a qaja hnyawa koi nyipunie laka, tru catre hmaca kö la madrine i angeic kowe la ka paatr, hune lo ala 99 ka lapa pe.”—Mat. 18:12, 13. w20.06 19-20 par. 8-9

Ketre manathith ka tru la troa nyihlue i Iehova ngöne la nöjei huliwa hne së hna kuca. (Sal. 27:4; 84:10) Maine ketre trejin a ajane troa cilëne la ketre hnëqa ngöne la ekalesia ke, ewekë ka lolo lai. Nge maine angeice ha cilëne la ketre hnëqa, tha tro kö angeic a sipu wangatrunyi angeic. (Luka 17:7-10) Loi e tro pe a ipië me thele troa huliwa koi itre xan. (2 Kor. 12:15) Hetrenyi e hnine la Tusi Hmitrötr la ceitune ne la itre atr ka sipu wangatrunyi angatr. Ame Dioterefe ke, tha ka ipië kö angeic. Hnei angeic hna “pi lapane la göhnë ka sisitria” e hnine la ekalesia. (3 Ioane 9) Ketre, hnei Uzia hna pi tru me kuca la ketre hnëqa, ngo tha hna ahnithe kö koi angeic hnei Iehova. (2 A. l. ite jo. 26:16-21) Ame pena Abasaloma, aja i angeic troa joxu, matre hnei angeic hna iaöne la nöj matre tro angatr a sajuë angeic. (2 Sam. 15:2-6) Kola mama ngöne la itre ceitun celë laka, tha kapa kö Iehova la atr ka thele la sipu loi koi angeic. (Ite Edomë 25:27) Eje hi, hetre ethane la troa pi tru me pi mama.—Ite Edomë 16:18. w20.07 4 par. 7-8

Ame la itre xaa trejin, hnei angatr me fami angatr hna kötre mel kowe la ketre nöj. Maine pena, angatr a fek matre troa öhnyi huliwa. Angatr a amë la itre nekö i angatr ngöne la uma ne ini ka qaja la ketre qene hlapa. Nge maine angatr a ajane troa öhnyi huliwa, nyipiewekë tro fe angatr a inine lai qene hlapa. Ame itre xaa ijin, hetre ekalesia maine gurup ka qaja la sipu qene hlapa i angatr. Hapeu, tro kö angatr a sine la ekalesia ka qaja la qene hlapa ne la nöj, maine sipu qene hlapa i angatr pena? Eje hi, ngacama hene la fami la ka amekötin me iëne la ekalesia, ngo nyipiewekë tro angeic a mekune la fami angeic. Ketre, loi e tro sa metrötrën me kapa la aja i angeic. Loi e tro fe sa kepe angatre hnyawa e hnine la ekalesia.—Rom. 15:7. w20.08 30 par. 17-18

Maine easa ajane troa öhne la mene i Iehova, tha tro kö sa mejiun kowe la sipu trengecatre së, maine inamacane së, maine aqane mele së, maine mejiune pena kowe la nöjei ewekë hne së hna hetreny. Itre ewekë lai hna wangatrune ngöne la fene celë. Ngo tha ka nyipiewekë kö itre ej koi Iehova. Eje hi, ame kowe la itre atr ne fen ke, ‘tha itre ka inamacan asë kö’ la itre hlue i Akötresie, tha “ka catr” kö angatr, nge ‘tha hna hnaho angatr asë kö ngöne la itre lapa ka trenamo.’ (1 Kor. 1:26) Celë hi matre, tha tro kö sa nue la ketre ewekë troa sewe së troa nyihlue i Iehova. Aqane tro hi së lai a öhne la mene i Akötresie. Maine easa xouene la itre atr ka qaja angazone la lapaune së, loi e tro sa sipo trengecatr koi Iehova, matre troa atreine isigöline la lapaune së. (Efe. 6:19, 20) Maine hna tithi së hnei mec, loi e tro sa sipo trengecatr koi Iehova, matre tro palahi sa catre huliwa koi Nyidrë. Ame la easa öhne la aqane xatua së hnei Iehova, kolo hi lai a acatrene la lapaune së me aegöcatrenyi së. w20.07 16 par. 9

Maine easa ajane troa amë panëne la Baselaia ngöne la mele së, loi e tro sa nyitipu Aberahama. Hnei angeic hna xomehnöth la itre xaa aja i angeic, matre troa amadrinë Akötresie. (Mar. 10:28-30; Heb. 11:8-10) The mekune kö laka, ka pë ejolene la mel. Nyimutre fe la itre jol hna troa cile kow hnene la itre ka catre huliwa i Iehova. (Iako. 1:2; 1 Pet. 5:9) Ame enehila, nyipiewekë tro sa lapa mekun la itre drai elany. Kola mama ngöne la itre ewekë ka traqa enehila laka, easa melën la itre drai hnapin. Easenyi hë matre tro la Baselaia i Akötresie a musi e celë fen. E cili, tro ha amelene la itre sinee së hne së hna hnim. Ketre, tro Iehova a amanathithi Aberahama ke, hnei nyidrëti hna catre lapaun me atreine itreqe. Ame elany, tro Iehova a amele nyidrëti hmaca memine la fami nyidrë e celë fen. Hapeu, tro kö sa hane kepe angatr elany? Ijije hi tro sa nyitipu Aberahama. Loi e tro sa xomehnöth la itre xaa aja së, me amë panëne la Baselaia i Akötresie, me catre lapaune ngöne la itre jol, me lapa treqe Iehova.—Mika 7:7. w20.08 5-6 par. 13-14; 7 par. 17

Atre hnyawa hi së laka, maine troa humuthi së elany, tro kö Iehova a amele së hmaca. Pëkö ewekë ka atreine troa thapa la ihnimi së koi Akötresie. (Rom. 8:35-39) Nyipici kola mama la inamacane i Nyidrë jëne la melehmaca! Jëne la mejiune cili, Iehova a sewe Satana troa axouenyi së me ithuecatre koi së. Hapeu, tro kö sa mejiun elanyi koi Iehova, ngöne la kola thele troa humuthi së hnene la itre ithupëjia? Loi e tro sa hnying, ka hape: ‘Hapeu eni kö a amamane la mejiuneng koi Iehova, ngöne la eni a axecië mekun e nöjei drai?’ (Luka 16:10) Ketre, Iehova a thingehnaean laka, maine tro sa amë panëne la Baselaia i Nyidrë, tro hë Nyidrëti a hamë së la ka ijij. Loi e tro sa isa hnying, ka hape: ‘Eni kö a mejiune kowe la hna thingehnaeane celë hnei Iehova?’ (Mat. 6:31-33) Maine eje hi, kolo hi lai a amamane laka, easa mejiune koi Iehova, nge ijije hi tro sa cile kowe la nöjei pengöne jol.—Ite Edomë 3:5, 6. w20.08 17-18 par. 15-16

Loi e tro sa atreine huliwane hnyawa la Tusi Hmitrötr. Celë hi hna ini së ngöne la itre icasikeu. Ngo maine easa ajane troa acatrene la lapaune së me thele troa ketr la hni ne la itre atr, loi e tro palahi sa ini tusi caas me e Tusi Hmitrötr. Nyipiewekë tro fe sa lapa mekun me ithel ngöne la itre itusi së, matre trotrohnine la aliene la itre xötr me xomi ini qa ngön. (1 Tim. 4:13-15) E cili, tro hë sa maca troa huliwane hnyawa la Tusi Hmitrötr me inine la itre atr. Eje hi, tha tro hmekuje kö sa e la ketre xötr, ngo loi e tro fe sa qejepengön, matre tro lai atr a trotrohnine me xomi ini qa ngön. Maine tro sa majemine ini tusi caas, tro hë sa maca troa huliwane hnyawa la Tusi Hmitrötr me inine la itre atr.—2 Tim. 3:16, 17. w20.09 28 par. 12

Maine tro sa lapa mekun la itre hnei Iehova hna kuca koi së, tro hë sa amë panëne la huliwa ne cainöj. Nyidrëti a hamë së la göxeni ngöne la nyipi ijin, ene la itre itusi hna fejan maine ngöne tablet, me itre nyine dreng, itre video, me itre emisio ngöne JW Télédiffusion. Hetrenyi ngöne la site së la itre itus hna ujën ngöne la 1 000 nge hetre munën lao qene hlapa! (Mat. 24:45-47) Maine tro palahi sa lapa mekune la tulu i Iesu, tro hë sa amë panëne la huliwa ne cainöj. Eje hi, pëkö ewekë ekö ka sewe Iesu troa tro fë la nyipici. (Ioane 18:37) Hnei Iesu hna cile catr ngöne la kola tupathi nyidrë hnei Satana me amamane “la nöjei baselaia ne la fen memine la lolo ne itre ej.” Nge tha hnei nyidrëti kö hna kapa la aja ne la itre xan, troa acili nyidrë troa joxu. (Mat. 4:8, 9; Ioane 6:15) Ketre, tha hnei nyidrëti kö hna thele mo. Nge hnei nyidrëti hna cile catr ngöne la icilekeu. (Luka 9:58; Ioane 8:59) Ame la kola traqa la itre jol, loi e tro sa lapa mekune la eamo hna hamën hnei Paulo ngöne la topik ne la drai, matre troa catr. w20.09 9-10 par. 6-7

Easa madrin laka, nyimutre la itre trejine föe e hnine la ekalesia ka catre nyihlue i Iehova! Ngacama angatr a cile kowe la itre jol, ngo angatr a sine la itre icasikeu me catre cainöj me hnime la itre trejin. Angatre fe a nyihnyawane la Uma Ne Baselaia. Itre xan a thupëne la itre kem me thine i angatr ka qatre hë. Ame itre xan, kola icilekeu hnene la itre atrene la fami angatr. Nge ame la itre xaa trejine föe, angatr a hetrune caasine la itre nekö i angatr me huliwa thatraqai nyudren. Pine nemene matre loi e tro sa wangatrune la itre trejine föe? Pine laka, kola wangaconyi angatr enehila. Celë hi matre, Tusi Hmitrötr a ithuecatre koi së troa metrötrë angatr. Celë hi hna kuca hnei Paulo aposetolo. Hnei nyidrëti hna ithuecatre kowe la ekalesia ne Roma troa kepe Fibi me ‘xatua angeic e kola aja ixatua.’ (Rom. 16:1, 2) Ame ngöne la qenenöje i Paulo, sisitria catre kö la itre trahmany hune la itre föe. Ngo ketre Keresiano hë Paulo, matre hnei nyidrëti ha metrötrëne me thiina ka loi kowe la itre föe, tui Iesu. w20.09 20 par. 1-2

Maine easa ajane troa xatuane la hnainin troa trongëne la hna amekötin hnei Iesu, loi e tro sa hnyingë angeic ka hape: “Tune kaa la aqane saze la mele i eö ngöne la eö a kapa la maca ne la Baselaia? Hapeu, nyipiewekë kö troa hane tro fë la maca cili koi itre xan? Nemene la aqane tro eö a xatua angatr?” (Ite Edomë 3:27; Mat. 9:37, 38) Hnei Iesu hna upi së troa inine la itre xan ‘troa trongëne lo nöjei ewekë hnei nyidrëti hna amekötine koi së.’ Kola qaja la lue wathebo ka tru, ene la troa hnimi Akötresie me hnime la atre lapa easenyi së. Ka nyipiewekë la lue wathebo celë ngöne la easa cainöj me inine la itre atr. (Mat. 22:37-39) Eje hi, ihnim la ka upi së troa cainöje trootro. Ame la itre xaa hnainin, angatr a xou troa cainöj. Ngo loi e tro sa amamane koi angatr laka, jëne la ixatua i Iehova, ijije hi tro angatr a elë hune la xoue atr.—Sal. 18:1-3; Ite Edomë 29:25. w20.11 3 par. 6-8

Ame la easa hnëkëne la ini tusi së, loi e tro sa thith thatraqane la hnainin memine la itre hnei angeic hna ajan. Easë fe a sipo Iehova matre troa huliwane hnyawa la Tusi Hmitrötr, me ketr la hni angeic. Ame la ka sisitria ke, tro la hnainin a acatrene la lapaune i angeice koi Iehova me canga xomi bapataiso. Nyipiewekë tro la hnainin a ithanata me Iehova me drei Nyidrë ngöne la angeic a e Tusi Hmitrötr e nöjei drai. (Ios. 1:8; Sal. 1:1-3) Ketre, nyipiewekë tro angeic a ithanata koi Iehova e nöjei drai ngöne la thith. Ame la easa nyiqaane me nyipun la ini tusi së, loi e tro sa thithi qa kuhu hni së me qaja la ëjene la hnainin. E cili, tro hë angeic a thith qa kuhu hni angeic me thith jëne Iesu. (Mat. 6:9; Ioane 15:16) Eje hi, maine tro la hnainin a e Tusi Hmitrötr e nöjei drai (drengethenge Iehova) me thith (ithanata koi Iehova), tro hë lai a xatua angeic troa easenyi catr koi Iehova!—Iako. 4:8. w20.10 8 par. 8; 9 par. 10-11

Tune la itre pane Keresiano, easa ajane troa tingeting me tro loi la organizasio. (Itre hu. 16:4, 5) Eje hi, maine easa sine la Ita Ne Thup ngöne la ketre ekalesia maine ngöne la ketre nöj, atre hi së la aqane troa cile fë la ini cili memine la tane mekun hna troa wang. Tro ha mama laka, tha trenyiwa kö së. Nyipici, hnene la uati hmitrötr matre kola caasi la nöje i Iehova! (Zef. 3:9) Nemene la nyine tro sa kuca? Isa hnyinge jë ka hape: “Hapeu, eni kö a acatrene la caas me thele tingeting e hnine la ekalesia? Eni kö a drengethenge la itre ka elemekene la ekalesia? Maine hetre hnëqang, itre xane kö a mejiune koi ni? Eni kö a xatua itre xan me canga traqa ngöne la hna icasikeu?” (Iako. 3:17) Maine easa öhn laka, hetre nyine tro palakö sa saze, loi e tro sa sipo uati hmitrötr. Maine tro sa nue la uati hmitrötr troa saze la itre thiina së me aqane ujë së, tro ha hnimi së hnene la itre trejin me hetre hni ne ole kowe la itre hne së kuca. w20.10 23 par. 12-13

Hna aceitunëne la Tusi Hmitrötr memine la ketre ithulu. (Iako. 1:23-25) Ame e nöjei hmakany, easa pane ithulu qëmekene troa tro. Celë hi ka aijijë së troa goeëne la nyine troa saze, wanga öhne jë hnei itre xan. Ketre tune fe, maine tro sa e Tusi Hmitrötr e nöjei drai, tro hë sa öhne la itre nyine troa saze ngöne la aqane mekun me aqane ujë së. Ame itre xan, angatr a e la topik ne la drai e nöjei hmakany. Angatr a wenë amekötine la itre mekuna i angatr thenge la hna e, me thele troa trongën. Celë hi matre, loi e tro sa e Tusi Hmitrötr e nöjei drai me lapa mekune ej. Maine jë, ka hmaloi hi troa kuca, ngo ka nyipiewekë matre troa lapa ngöne la gojenyi ne mel. Tune la ketre masin, Tusi Hmitrötr a amamane la itre ewekë ka ej e kuhu hni së. Ngo loi e tro sa hetre hni ne ipië matre kepe thangane qa ngöne la itre eamo hna hamën hnei Tusi Hmitrötr maine itre hna acil hnei Akötresie. w20.11 18 par. 3; 20 par. 8

Eje hi laka, alanyimu la itre ka icilekeu memine la itre pane Keresiano. Ngo hnei angatre fe hna melëne la itre ijine loi. Nemene la hnei angatr hna kuca ngöne la itre ijine cili? Kola qaja ngöne la tusi Itre Huliwa ka hape, hnei ‘angatr hna xoue Iehova,’ matre “kolo pala hi a elë la etrune la itretre dreng.” Mama hi laka, hnei Iehova hna amanathithine la itre huliwa i angatr ngöne la itre ijine loi. (Itre hu. 9:26-31) Hnene la itre pane Keresiano hna cainöjëne la maca ka loi kowe la nöjei atr asë ngöne la itre ijine loi. Celë hi hna kuca hnei Paulo. Hnei nyidrëti hna pane lapa e Efeso matre troa cainöj me inine la itre atr. (1 Kor. 16:8, 9) Ame lo 49 M.K., hnei Paulo me itre xaa Keresiano hna melën la itre ijine loi thupene la jol göi troa xötrehatren. (Itre hu. 15:23-29) Nemene la thangane lai? Celë hi hna qaja ngöne la topik ne la drai. w20.09 16 par. 6-8

Tune kaa la aqane tro la meci ne la ala caasi a amelene la nöjei atr? Hnei Paulo hna sa la hnyinge celë. Hnei angeic hna qaja la itre ethane la ngazo i Adramu memine la itre eloine la meci Keriso. Öni Paulo göi Adramu: “Hna xulu la mec qaathene la trahmany.” Pine la ngazo i Adramu, akötr me hleuhleu la pun koi angeic me itre matra i angeic, nge uti hë enehila. Eloine pe, hnei Iehova hna amelene hmaca la Nekö i Nyidrë. Xecie koi së laka, tro sa hane mele madrin elany! Eje hi, “kola traqa la iamele jëne la trahmany,” ene Iesu. Öni Paulo mina fe: “Kola meci la nöjei atr asë hnei Adramu, nge tune fe, jëne Keriso, tro ha mele la nöjei atr.” (1 Kor. 15:22) Nemene la aliene la hna hape, “kola meci la nöjei atr asë hnei Adramu”? Paulo a qaja la itre matra i Adramu. Pine laka, hnei Adramu hna tha idrei, matre itre atr ka ngazo hë la itre matra i angeic, nge meci la pun koi angatr. (Rom. 5:12) Celë hi matre, tha tro kö a “amele [Adramu] hmaca” elany. Ngacama ketre atr ka pexeje angeic ekö, ngo tha hnei angeice kö hna drengethenge Akötresie. Celë hi matre, caasi la pune koi Adramu memine la itre hna amekötin hnene la “Nekö i Atr” ka hape, itre “nani.” Ame Adramu, angeic a “tro kowe la meci ka epine palua.”—Mat. 25:31-33, 46; Heb. 5:9. w20.12 5 par. 13-14

Maine pëkö hnëqa hna hamën koi së, loi e tro sa xomi ini qa ngöne la tulu ne la itre angela. Ame ngöne la ijine musi Ahaba, hnei Iehova hna hnyingë angatr la aqane troa iaöne la joxu. Alanyimu la ka hane qeje mekun. Ngo hnei Akötresie hna dreng la ketre. (1 Ite jo. 22:19-22) Hapeu, hnene kö la itre xaa angela hna kucakuca me qaja ka hape, ‘Tha nyipiewekë kö la hnenge hna kuca?’ Waea. Hnene la itre angela hna hetre hni ne ipië angatr. Ame la ka sisitria catre koi angatr, tre, ene la troa atrunyi Iehova. (A. ame. 13:16-18; Hna ama. 19:10) Loi e tro sa wangatrune la edrö së, ene la troa xome la ëje i Iehova me cainöjëne la Baselaia. Ame la itre hnëqa, tre, tha celë kö lai hnei Akötresieti hna goeëne the së. Hnene laka, ka hetre hni ne ipië së matre kola hnimi së hnei Iehova memine la itre trejin. Celë hi matre, loi e tro sa sipo Iehova troa xatua së troa hetre hni ne ipië. Ketre, tro fe sa lapa mekun la itre tulu ne ipië hna qaja e hnine la Tusi Hmitrötr, me thele troa xatuane la itre trejin me easë.—1 Pet. 5:5. w20.12 26 par. 16-17

Ame la itrapetr ne iamele, kola nyihatrene la mejiune së qaathei Iehova. Eje hi, xecie hnyawa koi së laka, tro kö Iehova a amanathithine la itre ka kuca la aja i Nyidrë, me amelene hmaca la itre ka mec. (1 Thes. 5:8; 1 Tim. 4:10; Tito 1:1, 2) Kola thupëne la itre mekuna së hnene la mejiune kowe la iamele. Ej a xatua së troa lapa mekun la itre hna thingehnaean hnei Akötresie, me cile catr ngöne la itre jol. Easa petrëne la itrapetr ne iamele, ngöne la easa goeëne la itre ewekë tui Iehova. Eje hi, tha tro kö sa mejiun kowe la itre ewekë me itre mo, ngo koi Akötresieti pe. (Sal. 26:2; 104:34; 1 Tim. 6:17) Ame la taua ne la uati hmitrötr, kola nyihatrene la Trengewekë i Akötresie, ene la Tusi Hmitrötr. Jëne la taua cili, ijije hi tro sa lepetrije la nöjei mekun ka thoi, me thapa la itre atr qa ngöne la itre ini ka thoi, me itre hna majemine kuca ka ngazo. (2 Kor. 10:4, 5; 2 Tim. 3:16, 17; Heb. 4:12) Maine easa ajane troa huliwane hnyawa la taua cili, loi e tro sa inine la Tusi Hmitrötr, me kapa la itre ini hna hamën hnene la organizasio i Iehova.—2 Tim. 2:15. w21.03 27 par. 4; 29 par. 10-11

Ngacama hna akalabusi Ioane, ngo hnei nyidrëti palahi hna meku itre xan. Ame lo kola akalabusi nyidrëti e Patamo, hnei nyidrëti hna cinyihane la tusi Hna Amaman, me iupi fë kowe la itre ekalesia, la itre ewekë ka troa traqa elany. (Hna ama. 1:1) Nge thupene lai, hnei Ioane hna cinyihane me qejepengöne la mele i Iesu me huliwa ne cainöje i nyidrë. Ketre, hnei nyidrëti hna cinyihane la köni tus matre ithuecatre kowe la itre trejin. Ijije hi tro sa nyitipu Ioane me amamane la ihnimi së, jëne la aqane huliwane së la mele së. Aja i Satana memine la fene i angeic tro sa sipu meku së kö, me nue la traem me trengecatre së matre troa thele manie maine hlemu pena. Ngo isapengöne kö la itre trejin e cailo fen ke, angatr a nue la traeme i angatr troa cainöjëne la maca ka loi kowe la itre atr. w21.01 10 par. 9-10

Maine ju, tro Ionathana a zalu koi Dravita. Angeic la nekö i joxu, nge maine ju, angeic la ka troa mus thupe i Saulo, keme i angeic. (1 Sam. 20:31) Ame pe, hnei Ionathana hna hetre hni ne ipië me mele nyipici koi Iehova. Celë hi matre, hnei angeic hna sajuëne la mekuna i Iehova göi Dravita. Hnei angeic hna nyipici koi Dravita, ngacama hnei Saulo hna elëhni koi angeic. (1 Sam. 20:32-34) Hnei Ionathana hna hnimi Dravita tune la sipu trejin me angeic, matre tha hnei angeice kö hna goeë Dravita ceitu me ketre ithupëjia. Eje hi, ka maca Ionathana troa huji pehna me isi. Ka hlemu fe angeic me Saulo troa “saqe . . . hune la ite aeto, nge cate hune la ite liona.” (2 Sam. 1:22, 23) Maine ju, tro Ionathana a pi mama fë la itre ewekë cili maine zalu pena koi Dravita. Ngo hnei Ionathana hna haine la aqane catre i Dravita me mejiune koi Iehova. Nge thupene lo Dravita a humuthi Goliatha, hnei Ionathana hna hnimi Dravita tui angeice kö. w21.01 21 par. 6; 22 par. 8-9

Iesu Keriso la he ne la itre Keresiano, nge ketre atr ka pexeje nyidrë. Ngo ame la ketre trejine föe a faipoipo, angeic a drengethenge la föi angeic ka tha pexeje kö. Celë hi matre, tru la itre jol hnei nyidroti hna troa cile kow. Haawe, maine ketre trejine föe a ajane troa faipoipo, loi e tro angeic a pane hnying ka hape: ‘Hapeu, tro kö la trejine celë elanyi a ketre he ne fami ka lolo? Angeice kö a wangatrune la huliwa i Iehova? Maine tha eje kö, nemene la ka amamane laka, tro angeic elanyi a saze, thupene la nyio a faipoipo?’ Loi e tro fe angeic a hnying ka hape: ‘Hetrenyi kö thenge la itre thiina ka troa acatren elanyi la faipoipo i nyio? Atreine kö ni troa xomihni me ham? Hapeu, catrecatre kö la aqane imelekeung me Iehova?’ (Ate cai. 4:9, 12) Eje hi, maine tro la föe a axecië mekune hnyawa qëmekene troa faipoipo, tro ha madrine la faipoipo i angeic. Alanyimu la itre föe ka metrötrën me drengethenge la itre föi angatr. Celë hi matre, loi e tro sa qaja aloinyi angatr! w21.02 8 par. 1-2

Ame enehila, nyimutre la itre trejin ka thele troa akökötrene la huliwa ne cainöje i angatr. Angatr a saze aqane mele i angatr me inine la ketre qene hlapa. Maine jë, hnei angatr hna tro kowe la ketre nöje ka aja ixatua me inine la ketre qene hlapa. Angatr a ajane troa amamane laka, angatr a sajuëne la Baselaia. Maine jë, itre macatre ne tro angatr a pane inine lai qene hlapa. Ngo angatre palahi a thele troa xatuane la itre xan. Eje hi, tha sihngödri kö koi itre xan la itre hnei angatr hna kuca. Kola acatrene la ihnim me caasi e hnine la ekalesia. Nyipici, tru la hnine ole së kowe la itre trejin cili! Ketre, tha tro kö la lapa ne la itre qatre thup a sawa la ketre trejin troa hane xome la hnëqa ne qatre thup maine atre ixatua pena, pine laka, thatre hnyawa kö angeice la qene hlapa. Loi e tro pe la lapa ne la itre qatre thupe cili a nyitrepene la mekuna i angatr thenge la itre hna qaja hnei Tusi Hmitrötr. E cili, tro hë angatr a axecië mekune hnyawa.—1 Tim. 3:1-10, 12, 13; Tito 1:5-9. w20.08 30 par. 15-16

Ame koi itre xan, tro sa madrin e pëkö meci së, nge tru hnei mo së, nge ka lolo la aqane imelekeu së memine la fami së. Ngo ame la madrin hna qaja hnei Iakobo, tre, ketre igötranene la wene la ua i Akötresie, nge tha ka xulu kö qa ngöne la itre ewekë ka traqa ngöne la mele së. (Gal. 5:22) Itre Keresiano a madrin ngöne la angatr a amadrinë Iehova me nyitipu Iesu. (Luka 6:22, 23; Kol. 1:10, 11) Eje hi, ceitu la madrine celë memine la ukahlokin eë ne la laam laka, ka mele palahi ej ngacama kola enyi me manie. Ketre tune fe, easë palahi a madrin, ngacama hna tithi së hnei mec maine pëkö ewekë së pena maine kola icilekeu me hnyimasai së hnene la itre sipu sinee së me itre xan. Easa madrine ke, kola akötrë së pine la lapaune së. Easa cile catre ngöne la itre itupath me amamane laka, itre nyipi Keresiano së. (Mat. 10:22; 24:9; Ioane 15:20) Celë hi matre hnei Iakobo hna cinyihane la xötr ka nyi tane la topik ne la drai. w21.02 28 par. 6

Ame la easa e la Tusi Hmitrötr, hetre itre xötr ka amamane la enyipiewekëne la troa mejiune koi Iehova. Loi e tro sa hnehene la itre xötre cili. Loi e tro sa e catrëne itre ej, maine cinyanyine pena matre troa e lapan. Hna upi Iosua troa catre e la tusi Wathebo matre troa inamacan. Ketre, hnene la itre eamo qaathei Iehova hna hamë trengecatre i angeic, me xatua angeic matre tha tro kö a xou. (Ios. 1:8, 9) Ketre tu së fe, nyimutre la itre xötr e hnine la Tusi Hmitrötr ka akeukawanyi së me xatua së ngöne la kola traqa la itre jol. (Sal. 27:1-3; Ite Edomë 3:25, 26) Ame ngöne la itre icasikeu, easa kepe thangane qa ngöne la itre ini me itre mekun hna hamën hnene la itre trejin. (Heb. 10:24, 25) Ketre, ijije fe tro sa fe la hni së kowe la ketre trejine ka macaj. w21.01 6 par. 15-16

Ame la epuni a xomi bapataiso, epuni a amamane la lapaune me mejiune i epun koi Iehova. Madrine catre Iehova troa kepe epun ngöne la lapa i Nyidrë. Ngo loi e tro palahi a catre lapaune koi Iehova. Eje hi, easa canga sipo ixatua koi Iehova qëmekene troa axecië mekun ka tru. Ngo tune kaa ngöne la itre xaa götrane la mel? Nyipiewekë tro epuni a mejiune koi Iehova ngöne la epuni a axecië mekun göi huliwa me nyine iamadrinë. Tha tro kö epuni a mejiune kowe la sipu inamacane i epun. Thele jë la itre eamo e hnine la Tusi Hmitrötr, nge trongëne jë. (Ite Edomë 3:5, 6) E cili, tro hë epuni a amadrinë Iehova, nge tro ha metrötrë epun hnene la itre trejin. Eje hi laka, itre atr ka tha pexeje kö së, matre easa tria. Ngo tha tro kö lai a sewe së troa huliwa koi Iehova. w21.03 6 par. 14-15

Hapeu, kolo kö a icilekeu hnene la fami epun? Epuni kö a mel ngöne la ketre nöj hna wathebone la huliwa i Iehova? Maine eje hi, loi e tro epuni a e la itre ithuecatre i Paulo, ngöne 2 Timoteo 1:12-16 me 4:6-11, 17-22. Hnei Paulo aposetolo hna cinyihane la itre itusi celë e hnine la kalabus. Qëmekene troa e la itre xötr, loi e troa pane qaja koi Iehova la jol hne së hna cile kow, me itre aliene hni së. Ketre, tro fe sa sipo Nyidrë matre tro sa xomi ini qa ngöne la tulu i Paulo, me öhne la itre trepene meköt ka troa xatua së. Hnei Iehova hna hmekë Paulo göne la itre jol hnei angeic hna troa cile kow. (Itre hu. 21:11-13) Nemene la aqane xatua Paulo hnei Iehova? Hnei Nyidrëti hna sa la itre thithi Paulo me hamë trengecatre i angeic. Ketre, hnei Iehova hna akeukawane la hni Paulo ka hape, tro angeic a kepe manathith qa ngöne la hnei angeic hna akötr. Nge hnei Nyidrëti hna upe la itre sinee i Paulo matre troa xatua angeic. w21.03 17-18 par. 14-15, 19