Ogas

Ame la itre ka acatrene la aqane imelekeu i angatr me Iesu ke, tro angatr a kepe eloine qa ngöne la thupene mel. Nemene la ka anyipicine lai? Öni Iesu ka hape, tro nyidrëti “a meci pine la sinee i [nyidrë].” (Ioane 15:13) Ame la itre hlue i Iehova ka mel qëmekene tro Iesu a traqa e celë fen ke, tro angatr elanyi a troa atrepengöi Iesu hnyawa me hane hnimi nyidrë. Kola qaja la itre trahmanyi me föe hna troa amelene hmaca, tui Aberahama, Sara, Mose, me Rahaba. Nyipiewekë tro angatr a acatrene la aqane imelekeu i angatr me Iesu, matre troa hane mele palua. (Ioane 17:3; Itre hu. 24:15; Heb. 11:8-12, 24-26, 31) Easa madrin troa ce huliwa me Iesu, ngöne la easa cainöjëne la itre maca ka lolo ne la Baselaia me inine la itre atr. Ame lo Iesu e celë fen, hnei nyidrëti hna hamë ini. Nge ame lo nyidrëti a bëeke hmaca e hnengödrai, hna acili nyidrë troa elemekene la ekalesia me xomiujine la huliwa ne cainöj. Öhne hi Iesu la itre trengecatre hne së hna kuca, matre troa xatuane la itre atr troa atrepengöi nyidrë me Iehova. Ngo tro sa atreine eatrëne la huliwa cili, e tro Iehova me Iesu a xatua së.—Ioane 15:4. w20.04 22 par. 7-8

Ame ekö, hna hën ka hape, “joxu ne kolopi” me “joxu ne kolojë,” la itre ka mus ngöne la götrane kolopi me e kolojë ne la nöje Isaraela. (Dan. 10:14) Uti hë la Penetekos 33, angetre Isaraela hmekuje hi la nöje i Akötresie. Ngo qane ju hi la macatre cili, hnei Iehova hna amamane laka, itre ka xötrethenge Iesu pena ha la nöje i Nyidrë. Celë hi matre, ame la hna perofetan ngöne Daniela mekene 11 ke, tha koi angetre Isaraela hmaca kö, ngo koi itretre drei Keriso pe. (Itre hu. 2:1-4; Rom. 9:6-8 ; Gal. 6:15, 16) Ketre, qane ekö, alanyimu la itre mus hna nyihatren hnene la joxu ne kolopi me joxu ne kolojë. Ngo köni thiina palahi ka mama thei angatr. Ame la hnapan, hnei angatr hna mus me akötrën la itre hlue i Akötresie. Ame la hnaaluen, hnei angatr hna amamane ngöne la aqane ujë i angatr kowe la itre hlue i Iehova laka, angatr a methinë Nyidrë, Akötresie ka cas. Nge ame la hnaakönin ke, hnene la lue joxu cili hna ithepe mus. w20.05 3 par. 3-4

Nemene la hna kuca hnei Iehova matre troa eatrëne Iehova la aja i Nyidrë? Ame la hnapan, Iehova a kuca la ka ijij matre troa eatrëne la sipu aja i Nyidrë. Ame la hnaaluen, Iehova a aijijëne la itre hlue i Nyidrë ka tha pexeje kö troa eatrëne la aja i Nyidrë. (Is. 64:8) Celë hi lue aqane kuca i Iehova matre troa eatrëne la aja i Nyidrë. Pëkö ka atreine sewe Nyidrë troa kuca la aja i Nyidrë. (Is. 46:10, 11) Nemene la aqane tro sa acatrene la hni ne ole së kowe la Keme së e hnengödrai? Loi e tro sa lapa mekun la itre ewekë hnei Nyidrëti hna kuca ha, memine la itre hnei Nyidrëti hna aijijë së troa kuca. Maine jë, tro sa lapa mekun la itre hnei Nyidrëti hna xup. Celë hi ka troa upi së troa atrunyi Nyidrë. (Sal. 8:3, 4) Maine tro sa lapa mekun la itre hnei Iehova hna aijijë së troa kuca matre eatrën la aja i Nyidrë, tro hë së lai a hetre metrötr koi Nyidrë. Eje hi, nyine xouene la ëje i “Iehova”! Ej a amamane la pengöne la Keme së, memine la itre hnei Nyidrëti hna kuca ekö, me itre hnei Nyidrëti hna troa kuca elany.—Sal. 89:7, 8. w20.06 9-10 par. 6-7

Ame la enyi ka lolo (oxygène) ke, ka nyipiewekë catr kowe la mele ne la itre atr me itre öni. Ame e nöjei drai, easa mano me xome la enyi ka lolo me nuetrije la enyi ka ngazo (dioxyde de carbone). Eloine pe, tha hna hane kö pë enyi ka lolo maine atiqane pena la ihnadro hnei enyi ka ngazo. Pine nemen? Pine laka hnei Iehova hna xupe la nöjei feja, qaane la sinöe atraqatr uti hë la neköi drawa ka co. Itre ej a xome la enyi ka ngazo me nuetrije la enyi ka lolo. Hnene la aqane trongene la enyi ka lolo hna jelenyipicine la hna qaja ngöne la topik ne la drai celë. Nemene la aqane tro sa amamane la hni ne ole së koi Iehova göne la ihnadro ka mingöming me itre aliene ej? (Sal. 115:16) Loi e tro sa lapa mekun la itre hnei Nyidrëti hna xup. Celë hi lai ka upi së troa olene koi Nyidrëti o drai, la itre ewekë ka lolo hna hamën koi së. Ketre, easa amamane la hni ne ole së kowe la ahnahna, ene la ihnadro, ngöne la easa nyidrawane la hnalapa së. w20.05 22 par. 5, 7

Akötresieti ka inamacane Iehova, nge ka xomihni aqeany me meköti Nyidrë. Ketre, nyimutre la itre aqane huliwane Iehova la mene i Nyidrë. Nge kola mama la ihnimi Nyidrë ngöne la nöjei ewekë hnei Nyidrë hna kuca. (1 Ioane 4:8) Tha cile kö Iehova troa ahmitrötrëne la ëje i Nyidrë. Satana palahi a adrone la ëje i Akötresie enehila. Angeic a iaöne la itre atr matre tro angatr a luelu ka hape, ka trene men me meköt me inamacan me ihnimi Iehova. Angeic a uku angatr troa mekun ka hape, tha Iehova kö la Atre Xup. Nge Satana a thel tro la itre ka mejiune koi Akötresie a mekun laka, tha ka meköti kö la itre hna amekötin hnei Nyidrë, nge itre ej a hnöthe la mele i angatr. Satana mina fe a thoi ka hape, Akötresieti ka ngazo Iehova ke, Nyidrëti a dreuthetrij la itre atr ngöne la ifereno. Ame la itre ka mejiun kowe la itre trengathoi Satana, canga saqe hi angatre nuetrije la musi cile i Iehova. Tro palahi Satana a thel troa aiananyi së me Nyidrë, uti hë la ijine troa lep apatrenyi angeic. Hapeu, atreine kö Satana troa aiananyi së me Akötresie? w20.06 5 par. 13-15

Nyimutre la itre kepin matre itre xaa trejin a inine la ketre qene hlapa. Ame itre xan, nango jol palakö koi angatr troa qaja la qene hlapa. Ngo tha celë kö la ka nyipiewekë. Loi e tro pe sa goeëne la ihnim me aqane catre huliwa i angatr koi Iehova. E cili, tro hë sa metrötrë angatr me hnimi angatr. Tha tro kö sa qaja koi angatr ka hape: “Tha nyipiewekë kö eö koi ni,” ke thatre hnyawa kö eö la qene hlapa hun. (1 Kor. 12:21) Iehova a aijijëne la itre hlue i Nyidrë troa hane sine la ekalesia. Ngacama thöthi ju hë së maine qatr, ka faipoipo maine tha ka faipoipo palakö, nge maine thatreine palakö së qaja la ketre qene hlapa, ngo ka nyipiewekë asë hi së koi Iehova. (Rom. 12:4, 5; Kol. 3:10, 11) Haawe, catre pi së wangatrune la göhnë së me göhnë ne la itre xan e hnine la ekalesia! w20.08 31 par. 20-22

Athenai la ketre traon ka tiqa hnei idrola. Alanyimu la ka kuca la itre huliwa ka sis me sajuëne la itre ini atr ka tha ihmeku kö memine la Tusi Hmitrötr. Ngo hnei Paulo aposetolo palahi hna cainöj koi angatr, ngacama kola hnyimasai angeic. Paulo ekö “la ketre ka silitrengathoi Akötresie, me iaxösisi, me pi tru.” (1 Tim. 1:13) Ame pe, hnei Iesu hna mejiun laka, tro Paulo a ketre atre drei nyidrë. Celë fe hi aqane ujë i Paulo koi angetre Athenai. Alanyimu la itre ka hane xötrethenge Keriso. (Itre hu. 9:13-15) Alanyimu la itre atr ka xötrethenge Iesu. Hnei Paulo hna cinyihan koi angetre Korinito ka hape, hetre itre xan thei angatr ka qanangazon ekö la itre Keresiano me kuca la itre huliwa ka sis. Öni Paulo: “Celë hi aqane ujë ne la itre xan e nyipunieti ekö, ngo enehila, ase hë ahmitrötrë nyipunie.” (1 Kor. 6:9-11) Hapeu hne së kö hna mekun ka hape, ijije hi troa saze hnei itre xan matre troa hane xötrethenge Iesu? w20.04 12 par. 15-16

Tha tro kö la itre qatre thup a canga amekötin la ketre trejin ka luelue troa nyihlue i Iehova. Loi e tro pe angatr a thele la kepin matre angeic a luelu me mekun tune lai. E cili, angatr a xom la itre xötr ka troa ithuecatre koi angeic. Hnei Elia perofeta hna kötre Iezebela joxu. (1 Ite jo. 19:1-3) Ame koi Elia, ka gufa la itre hnei angeic hna kuca, matre angeic a ajane troa mec. (1 Ite jo. 19:10) Tha hnei Iehova kö hna nuetriji Elia. Hnei Nyidrëti pe hna akeukawane la hni Elia me qaja ka hape, hetre itre xaa hlue i Nyidrë. Ijije hi tro Elia a mejiune kowe la trengecatr qaathei Iehova. Hnei Iehova hna drei Elia hnyawa ngöne la angeic a fe la hni angeic. Nge hnei Nyidrëti hna ahnith koi Elia la itre xaa hnëqa ka tru. (1 Ite jo. 19:11-16, 18) Nemene la ini? Loi e tro la itre qatre thup a nyihnyawane la itre mamoe i Iehova, ketre tu së fe. Maine jë, tro ketre a mekun ka hape, tha ijije kö troa nue la ngazo i angeic hnei Iehova, nge catrehnine la itre trengewekë i angeic. Haawe, loi e tro la itre qatre thup a drei angeic hnyawa ngöne la kola fe la hni angeic. Nge tro fe angatr a amamane laka, ka nyipiewekë catr angeic koi Iehova. w20.06 22 par. 13-14

Easa madrin troa pane ce lapa memine la itre sinee së me itre atrene la fami së. Celë hi lai aja i Iehova. (Sal. 133:1) Ketre tui Iesu, hetre sinee i nyidrëti fe. (Ioane 15:15) Tusi Hmitrötr a qaja la itre eloine la troa hetre nyipi sinee. (Ite Edomë 18:24) Eje mina fe a qaja ka hape, tha ka loi kö troa mele caas me iananyi me itre xan. (Ite Edomë 18:1) Alanyimu la ka mekun ka hape, ijije hi troa thele sinee ngöne Ëternet (réseaux sociaux). Ngo loi e tro sa thupëne la aqane tro sa huliwane la jiane huliwa cili. Önine la itre ka ithel ka hape, ame la itre ka majemine goeëne la itre foto ngöne la itre réseaux sociaux ke, angatr a kucakuca me mele caas. Pine nemen? Pine laka, itre xan a amë la itre foto i angatr me itre sinee i angatr, me itre götran hnei angatr hna tro kow ngöne la kola ihamë. Ame la ka goeëne la itre foto cili, tre, tro hë angeic a mekun laka, pëkö eloine la mele i angeic. w20.07 5-6 par. 12-13

A ngöne la Ita Ne Thup ne 1 Okotropa 1988, kola qaja ka hape: “Xecie kowe la itre ka cilë hnëqa laka, jëne la uati hmitrötr, ijije hi tro Keriso a xatuane la ketre qatre thup troa öhne la trepene meköt ka ihmeku memine la jol, me axecië mekune hnyawa e thupen. (Itre hu. 15:7-15) Tha Iehova kö a hamëne la uati hmitrötr kowe hi la caa qatre thup, ngo kowe la lapa ne la itre qatre thup.” Ame la qatre thup ka hetre metrötr, tre, tha nyidrëti kö a canga ithanata ngöne la angatr a icasikeu. Nyidrëti pe a nue la itre xan troa isa qeje mekun. Ketre, tha nyidrëti kö a mekun laka, ka nyipici palahi la hnei nyidrëti hna qaja. Nyidrëti pe a amamane la hni ne ipië i nyidrë ngöne la nyidrëti a qeje mekun me hane drei itre xan. Nyidrëti fe a thele la itre trepene meköt, me trongëne la itre hna amekötin hnei “hlue ka nyipici me ka inamacan.” (Mat. 24:45-47) Ame la itre qatre thup a icasikeu, loi e tro angatr a ihnim me imetrötrekeu. E cili, tro la uati hmitrötr a xatua angatr troa axecië mekune hnyawa.—Iako. 3:17, 18. w20.08 27 par. 5-6

Ka catre kö la itre ithupëjia me Paulo aposetolo. Hnei angatr hna iup troa lepi Paulo me akalabusi angeic. Ketre tui Dravita, hnene la itre sinee i Paulo hna qanangazo angeic. Hnene mina fe la itre xaa atrene la ekalesia hna icilekeu me angeic. (2 Kor. 12:11; Fil. 3:18) Ngo hnei Paulo hna cile catr kowe la itre jole cili. Tune kaa? Hnei Paulo hna catre cainöj ngacama kola icilekeu. Hnei angeic hna mele nyipici kowe la itre trejin, ngacama hnei angatr hna akötrë angeic. Nge ame la ka sisitria catr ke, hnei angeic hna mele nyipici koi Iehova uti hë la pun. (2 Tim. 4:8) Hnei angeic hna cile catr kowe la itre jole cili, tha hnene kö la sipu trengecatre i angeic. Hnei angeice pe hna mejiune koi Iehova. Hapeu, hna hane kö qanangazon me qaqa epun? Eje hi, tha easë kö a hna la wene etë kowe la he ne la ketre atr, tui Dravita. Ngo easë pe a thele troa ketr la hni me mekune la itre atr ka drei së. Celë hi matre loi e tro sa xome la Tusi Hmitrötr matre troa sa la itre hnying. Tro fe sa metrötrën me hni ka menyik kowe la itre ka qanangazo së, me kuca la loi kowe la nöjei atr, tune la ithupëjia me easë.—Mat. 5:44; 1 Pet. 3:15-17. w20.07 17-18 par. 14-15

Hapeu, ka hni ka ipië Iehova? Eje hi. Celë hi lai hna qaja hnei Dravita. (Sal. 18:35) Maine jë, Dravita a mekun lo Samuela perofeta a iëne la ka troa joxu ne Isaraela. Ala 7 lao trejin me Dravita nge angeic la ka co. Ngo angeic la hna iën hnei Iehova troa nyihnai Saulo joxu. (1 Sam. 16:1, 10-13) Caasi hi la mekuna i Dravita göi Iehova memine la atre cinyihane la Salamo. Öni angeic: “Nyidrëti a aconyi nyidrëti kö matre troa goeëne la hnengödrai me ihnadro, me adraiëne la ka pë mo qa ngöne la xaxau. Nyidrëti a kapa draië la atr ka pë ewekë . . . matre troa ce alapane memine la itre joxu.” (Sal. 113:6-8) Kola mama la hni ne ipië i Iehova ngöne la aqane ujë i Nyidrë kowe la itre hlue i Nyidrëti ka tha pexeje kö. Iehova a kapa la hmi së me goeë së ceitu me itre sinee i Nyidrë. (Sal. 25:14) Celë hi matre, hnei Nyidrëti hna huujëne la Nekö i Nyidrë matre troa köletrij la itre ngazo së. Eje hi, ka ihnim me utipine Iehova! w20.08 8 par. 1-3

Ase hë Iehova axeciëne la drai me hawa ne la pune la fene celë. (Mat. 24:36) Nyipici laka, aja i Iehova troa amelene hmaca la itre ka mec, ngo Nyidrëti a xomihni aqeany. (Iobu 14:14, 15) Nyidrëti a treqene la nyipi ijin matre troa amele angatr hmaca. (Ioane 5:28) Loi e tro sa hetre hni ne ole kowe la aqane xomihni aqeanyi Iehova, pine laka, kola aijijëne la nöjei atr troa “ietra.” Iehova a ajane tro la nöjei atr asë a mel epine palua. Tro sa amamane tune kaa la hni ne ole së koi Nyidrë? Loi e tro sa catre thele “la itre ka hmalahnine troa kapa la mele ka pë pun.” Loi e tro fe sa xatua angatr troa hnim me nyihlue i Iehova. (Itre hu. 13:48) E cili, tro hë angatr a kepe thangane qa ngöne la aqane xomihni aqeanyi Iehova, tui easë ekö. w20.08 18 par. 17

Ame la kola ini tus, loi e troa ketr la hni ne la hnainin, ngo tha tro hmekuje kö a lapa ngöne la mekuna i angeic. Pine nemen? Pine laka, ame la hni së, ene la itre aja së me itre aliene hni së, tre, celë hi ka upi së troa kuca la ketre ewekë. Eje hi, hetre thangan ekö la itre ini Iesu, nge tru la madrine la itre atr troa drei nyidrë. Angatr a xötrethenge nyidrë ke, nyidrëti a ketr la hni angatr. (Luka 24:15, 27, 32) Nyipiewekë tro la hnainin a trotrohnine laka, ka mele Iehova nge ijije hi troa easenyi koi Nyidrë. Loi e tro angeic a goeë Iehova ceitu me ketre Kem me Akötresie me Sinee. (Sal. 25:5) Celë hi matre, loi e tro sa qaja amamane la itre thiina i Akötresie. (Eso. 34:5, 6; 1 Pet. 5:6, 7) Loi e tro palahi sa qaja la ihnimi Iehova me thiina ka loi Nyidrë me utipin. Öni Iesu ka hape, ame la “wathebo ka tru nge ka sisitria” tre, “Qa i eö troa hnimi Iehova Akötresi eö.” (Mat. 22:37, 38) Nyipiewekë tro sa akökötrene la ihnimi ne la hnainin koi Iehova. w20.10 10 par. 12

Hnei Iesu hna metrötrëne la itre föe. (Ioane 4:27) Ketre, nyidrëti a wangatrune la itre föe ka kuca la aja ne la Keme i nyidrë. Nyidrëti a goeë angatr tune la itre sipu xa i nyidrë. Nge ame la itre trahmany, tune la itre sipu trejin me nyidrë. (Mat. 12:50) Ketre, hnei Iesu hna xomi ijine kowe la itre trejine föe ke, itre nyipi sinee angatr. Tro sa ce wang la aqane imelekeu i nyidrë me Maretha me Maria, lue ka tha faipoipo kö. (Luka 10:38-42) Hnene la itre trengewekë i Iesu me aqane ujë i nyidrë, matre tha xou nyidroti kö troa ithanata me nyidrë. Ame lo Iesu a traqa kowe la hnalapa i nyidro, tha hnei Maria kö hna xou troa lapa ngöne la lue ca i Iesu, tune la itretre dreng. Ame Maretha ke, kola wesitr pine laka, tha hna xatua angeice kö hnei Maria. E cili, hnei Maretha hna qaja la mekuna i angeic koi Iesu. Pine laka, lolo la aqane imelekeu i Iesu me nyidro matre hnei nyidrëti hna hamë ini koi nyidro. Hnei nyidrëti fe hna traqa lapa troa wai angatr ke, tru la ihnimi nyidrë koi nyidro me Lazaro. (Ioane 12:1-3) Nge ame la kola tithi Lazaro hnei mec, hnei Maretha me Maria hna canga sipo ixatua koi Iesu.—Ioane 11:3. w20.09 20 par. 3; 21 par. 6

Hnene la itretre drei Iesu hna mekun laka, “canga tro hi a mama la Baselaia” me thepe angatr qaathene la musi Roma. Ketre tu së fe, easa treqene la ijine tro la Baselaia i Akötresie a apatrene la fen celë ka ngazo, me acile la fen ka hnyipixe hna troa lapan hnene la itre ka “thiina ka meköt.” (2 Pet. 3:13) Ngo loi e tro sa xomihni aqeany me lapa treqene la drai hna sa hnei Iehova. Hnei Iehova hna nue ijine koi Noa troa xupe la aka me “cainöjëne la meköt.” (2 Pet. 2:5; 1 Pet. 3:20) Hnei Nyidrëti fe hna drei Aberahama ngöne lo angeic a hnehengazo göne la traon e Sodroma me Gomora. (Gen. 18:20-33) Ketre, traqa koi itre macatre ne xomihnine Iehova la nöje Isaraela ka tha idrei. (Neh. 9:30, 31) Ame fe enehila, Nyidrëti a nue ijine kowe la itre atr troa “ietra.” (2 Pet. 3:9; Ioane 6:44; 1 Tim. 2:3, 4) Celë hi matre, tui Iehova, loi e tro sa xomihni aqeany me catre cainöj me inine la itre atr. w20.09 10 par. 8-9

Tro Iehova a amelene hmaca la itre atr, memine la itre mekun me itre thiina ka lolo i angatr. Pine nemen? Pine laka, Iehova a hnimi së. Nyidrëti a wangatrune la itre mekuna së me aliene hni së, me itre hne së hna qaja me kuca. Hnei Dravita ekö hna öhn laka, Iehova a wangatrunyi së isa ala caas. (Sal. 139:1-4) Pine nemene matre nyipiewekë tro sa trotrohnine la aqane goeë së hnei Iehova? Hapeu, tro kö sa xou ke atrepengö së hnyawa hi hnei Iehova? Waea. Pine nemen? Pine laka, Nyidrëti a hnimi së me wangatrunyi së isa ala caas. Atre hi Iehova la itre ewekë ka traqa ngöne la mele së, nge atreine hi Nyidrë troa saze la pengö së. Eje hi, tha tro pi kö sa hnehengazo menu me mekun laka, easë caasi hi. Ce Iehova palahi me easë, nge tro kö Nyidrëti a xatua së.—2 A. l. ite jo. 16:9. w20.08 17 par. 13-14

Aja i Iehova troa inine la itre hlue i Nyidrë. Iehova a ajane tro sa atrepengöi Nyidrëti hnyawa, me hnimi Nyidrë, matre mel epine palua. Celë hi matre, nyipiewekë tro Nyidrëti a ini së. (Ioane 17:3) Ame ngöne la hneijine la itre pane Keresiano, hnei Iehova hna acile la itre ekalesia matre troa inine la nöje i Nyidrë. (Kol. 1:9, 10) Ketre, hnene la uati hmitrötr, ene lo “ixatua” hna qaja hnei Iesu, hna xatuane la itretre dreng troa trotrohnine la Trengewekë i Akötresie. Hnene la uati hmitrötr hna amekunë angatr la itre hna qaja me kuca hnei Iesu, ngöne la itre Evangelia. (Ioane 14:16) Celë hi ka acatrene la lapaun me ihnimi angatr koi Akötresie me Iesu me koi itre xan. Ame enehila, hnei Iehova hna perofetan ka hape, ame “ngöne la ite drai hnapin,” nyimutre la itre atr ka troa traqa qa ngöne la nöjei nöj me elë hune la wetre i Nyidrë, ene la nöje i Nyidrë, matre troa kepe ini. (Is. 2:2, 3) Celë hi lai hne së hna öhn enehila. w20.10 24 par. 14-15

Pine nemene matre, ame itre xaa ijin, tha kapa kö itre xan la eamo hna hamën hnene la ketre sinee? Pine laka ka pi tru angatr, matre angatr a ajane troa “qaloth la itre hnangenyë i angatr.” Angatr a “xele ma drenge la nyipici.” (2 Tim. 4:3, 4) Ketre, angatr a sipu wangatrunyi angatre kö. Öni Paulo: “Maine tro ketre a mekune ka hape, ka sisitria angeic ngo tha eje pe, angeice hi lai a amenu angeice kö.” (Gal. 6:3) Celë fe hi lai hna qaja hnei Solomona joxu. Öni angeic: “Loi la nekö trahmanyi ka pë ewekë nge ka inamacane hune la joxu qate nge ka hmo, lo ate xele ma denge e troa hajin.” (Ate cai. 4:13) Tro sa ce wange la tulu i Peteru aposetolo. Hnei Paulo hna haji Peteru. (Gal. 2:11-14) Maine ju, tro angeic a wesitr ke, hna ithanata koi angeic qëmekene la nöjei atr, nge catr la aqane ithanata i Paulo. Ngo inamacane la aqane ujë i Peteru. Hnei angeic hna kapa la eamo nge tha hnei angeice kö hna thele troa itëkeun. Hnei angeic hna qeje Paulo ka hape, “trejine hnimina.”—2 Pet. 3:15. w20.11 21 par. 9, 11-12

Nemene la ka troa xatuane la hnainin troa canga kökötr ngöne la nyipici? Loi e tro angeic a sine la itre icasikeu, matre atrepengöne hnyawa la Tusi Hmitrötr, me acatrene la lapaune me ihnimi angeic koi Akötresie. (Itre hu. 15:30-32) Ketre, loi e tro la trejin ka ini angeic a amamane laka, ihnimi angeic koi Iehova la ka xatua angeic troa trongëne la itre hna amekötin qa hnine la Tusi Hmitrötr. (2 Kor. 7:1; Fil. 4:13) Maine tro la ka ini tusi a atre la itre xaa trejin, tro hë angeic a xomi ini qa ngöne la tulu i angatr göne la aqane troa trongëne la hna amekötin hnei Iesu, troa hnimi Akötresie me hnime la itre xan. (Ioane 13:35; 1 Tim. 4:12) Tro fe hë angeic a öhne laka, hnene la itre xaa trejin hna melëne la itre jol hnei angeic hna cile kow. E cili, ijiji angeice hë troa hane saze matre troa xötrethenge Keriso. (Deu. 30:11) Eje hi, tru catr la ixatua hna hamën hnene la itre trejin kowe la itre ka ini tus.—Mat. 5:16. w20.11 5 par. 10-12

Maine jë, hna kuië Paulo aposetolo ekö kowe la itre öni wael ngöne la hnë kuci elo e Efeso. (2 Kor. 1:8; 4:10; 11:23) Maine pena, angeic a qaja la angetre Iudra me itre xan ka icilekeu, nge hna aceitunë angatr me itre öni wael. (Itre hu. 19:26-34; 1 Kor. 16:9) Ngacama hna anyimua thele troa humuthi Paulo, ngo hnei angeic palahi hna catre mejiun. (1 Kor. 15:30, 31; 2 Kor. 4:16-18) Easa melëne la itre ijine ka ngazo. Hna qanangazone la itre xaa trejin. Ame itre xan, angatr a mel ngöne la itre nöj ka isi, matre angatr a xou troa humuthi angatr. Nge ame itre xan, angatr a nyihlue i Iehova ngöne la itre nöj hna wathebone la huliwa ne cainöj. Ngacama hna xomehnöthe la mele i angatr, ngo angatr palahi a catre atrunyi Iehova. Eje hi, itre tulu lai koi së. Atre hi angatr laka, maine tro angatr a mec, tro kö Iehova a eatrëne la itre hna thingehnaean. Nge celë hi la ka akeukawane la hni angatr. w20.12 9 par. 3-4

Hapeu, epuni kö a kucakuca e pëkö ka drei epun ngöne la hna cainöj? Maine eje hi, nemene la nyine tro epuni a kuca matre troa madrin? Nyipiewekë tro sa wangatrune la huliwa ne cainöj. Kola hapeue lai? Ame la aja së, tre, troa cainöjëne la ëje i Akötresie memine la Baselaia i Nyidrë. Hnei Iesu hna qaja ka hape, xalaithe hi la itre ka troa öhne la gojenyi ne mel. (Mat. 7:13, 14) Ngo ame la easa cainöj, easa ce huliwa me Iehova me Iesu memine la itre angela. (Mat. 28:19, 20; Hna ama. 14:6, 7) Ketre, Iehova la ka ea koi Nyidrë la itre atr ka hetre hni ne aja. (Ioane 6:44) Haawe, maine pëkö ka kapa la maca hne së hna tro fë, tha tro pi kö sa kucakuca. Maine jë, tro la itre atr a drei së e thupen. Öni Deborah, ketre trejine föe: “Aja i Satana tro sa kucakuca. Ketre nyinyithina i angeice lai.” Ame pe, catre kö Iehova Akötresie hui Satana. w20.12 26 par. 18-19; 27 par. 21

Alanyimu la itre trejin ka huliwa ngöne la drai ka pexej matre hetrenyi la ka ijij kowe la fami angatr. Ame pe, angatre fe a catre sajuëne la organizasio i Akötresie. Angatr a ixatua ngöne la itre nöj hna lep hnei hulö, maine ixatua ngöne la Huliwa ne Xupi Uma Ne Baselaia, nge angatre fe a kuië ahnahna. Ihnimi angatr koi Akötresie me kowe la itre xan la ka upi angatr troa kuca la itre ewekë celë. Ketre, easë fe a amamane la ihnimi së kowe la itre trejin ngöne la easa sine la itre icasikeu me hamë mekun. Ngacama easa kucakuca, ngo easa sine itre ej. Ngacama easa xou troa hamë mekun, ngo easa kuca. Nge ngacama easë asë hi a cile kowe la itre jol, ngo easa ithuecatrekeu qëmeken me e thupen la itre icasikeu. (Heb. 10:24, 25) Easa olene kowe la trengecatre hna nue hnene la itre trejin! w21.01 10 par. 11

Ame la atr ka pi tru, tre, tha ka qaja aloinyi itre xane kö. Angeice pe a treqene troa qaja aloinyi angeic. Angeic a wangesixane la itre xan me pi mama me zalu. Tha aja i angeice kö troa hamë hnëqa koi itre xan ke, tha mejiune kö angeic koi angatr. Ame koi angeic, ijiji angeice hi troa xom asë itre ej. Maine easa öhne laka, hetrenyi the së la pi tru, loi e tro sa sipo ielene koi Iehova troa xatua së troa ‘ahnyipixene la aqane mekuna së,’ matre tha tro kö a cia e kuhu hni së la thiina cili. (Rom. 12:2) Ketre tulu ka lolo Iehova! (Sal. 18:35) Easa öhne la hni ne ipië i Iehova, ngöne la aqane ujë i Nyidrë kowe la itre hlue i Nyidrë. Celë hi kepin matre, easa ajane troa nyitipu Iehova memine la itre xaa hlue i Nyidrëti ekö. Haawe, catre pi së atrunyi Iehova.—Hna ama. 4:11. w20.08 13 par. 19-20

Ame la faipoipo, ketre ahnahna ka lolo qaathei Akötresie. Ngo tha ka pexeje kö la itre atr ka faipoipo. (1 Ioane 1:8) Celë hi matre, öni Tusi Hmitrötr, tro angatr a “ixelë me itre akötr.” Iehova a ajane tro la itre trahmanyi a huliwa thatraqane la fami, me xatua angatr troa acatrene la lapaune i angatr. (1 Tim. 5:8) Ngo nyipiewekë tro la itre trejine föe ka faipoipo a xomi ijin troa e me lapa mekun la Tusi Hmitrötr, me catre thith koi Iehova. Tha ka hmaloi kö ke, tru catre hnei jol Ngo ame pe, ka nyipiewekë catr. Pine nemen? Pine laka, Iehova a ajane tro sa isa acatrene la aqane imelekeu së me Nyidrë. (Itre hu. 17:27) Eje hi, tha ka pexeje kö la itre trahmany, matre nyipiewekë tro la itre föe a nue trengecatr matre troa metrötrë angatr. Ngo maine tro la itre föe a trotrohnine la kepin matre Iehova a upi angatr troa metrötrëne la itre trahmany, tro ha hmaloi koi angatr troa eatrëne la hnëqa i angatr. w21.02 9 par. 3, 6-7

Ijije hi tro sa aceitunëne la itre itupath memine la kola dreu fao. Thupene la kola dreuthe la fao, ej a catr. Ketre tune fe, ame la easa xomihnine la itre jol, kola acatrene la lapaune së. Celë hi matre öni Iakobo: “Nue pi tro la thiina cili, ene la xomihni, a apexejene la huliwan ej, matre pexeje pi nyipunie, me pë engazon ngöne la nöjei götran asë.” (Iako. 1:4) Ame la easa öhn laka, itre itupath a acatrene la lapaune së, kolo lai a xatua së troa madrine me xomihnine la itre jol. Ame ngöne la tusi angeic, Iakobo mina fe a qaja la itre jol ka troa thapa la madrine së. Ame la ketre jol ke, thatre kö së la nyine troa kuca. Ame la kola traqa la itupath, easa canga thele ixatua thei Iehova matre axecië mekun thenge la aja i Nyidrë, nge ka troa hetre eloine kowe la itre trejin, me xatua troa mele nyipici. (Iere. 10:23) Eje hi, nyipiewekë tro sa inamacane matre atre la nyine troa kuca maine qaja kowe la itre ka icilekeu. Maine thatre kö së la nyine troa kuca, tro hë sa kucakuca nge tro ha patre la madrine së. w21.02 28 par. 7-9

Hnei Iehova hna amamai tulu koi së. Eje hi, maine tro sa mele nyipici me hnimi Iehova, tro hë Nyidrëti a hnimi së. (Rom. 8:38, 39) Ame la aliene la hnaewekë qene Geres, “catre” ke, kola qaja la ketre atr ka nue trengecatr matre troa amamane la ihnimi angeic. Ame itre xaa ijin, jole koi së troa amamane la ihnimi së kowe la itre trejin. Nemene la nyine troa kuca ngöne la easa elëhni kowe la ketre trejin? Loi e tro sa catre “ixomihnikeu thenge la ihnim. Nge mele tingetinge jë me itre xan, nge isine jë troa acatrene la cas i nyipunie, lo hnei nyipunieti hna kapa jëne la ua.” (Efe. 4:1-3) Tha tro hë sa lapa mekune la itre tria i angatr. Ngo tro hë sa goeëne la itre trejin, ceitu me Iehova. (1 Sam. 16:7; Sal. 130:3) Nyipici laka, ame itre xaa ijin, tha ka hmaloi kö troa hnime la itre trejin, pine laka, atre hi së la itre hnepe ngazo ka eje thei angatr. Celë hi lai ka traqa ekö kowe la itre pane Keresiano, tui Euodia me Sunetuke. Celë hi matre, hnei Paulo aposetolo hna ithuecatre koi nyidroti troa “ca mekun thei Joxu.”—Fil. 4:2, 3. w21.01 22-23 par. 10-11

Itre trejin nekötrahmany, madrine catre la itre trejin troa ce nyihlue i Iehova me epun! (Zef. 3:9) Angatr a madrin ngöne la epuni a wangatrune la itre hnëqa i epun e hnine la ekalesia. Eje hi, tru la ihnimi angatr koi epun! Haawe itre trejin nekötrahmany, the thëthëhmine kö laka, Iehova a hnimi epun me mejiune koi epun. Hnei Nyidrëti hna perofetan laka, ame ngöne la itre drai hnapin, tro la itre nekötrahmany me itre neköjajiny a “hujë angate xane kö.” (Sal. 110:1-3) Atre hi Iehova laka, tru la ihnimi epun koi Nyidrë, nge aja i epun troa catre nyihlue i Nyidrë. Celë hi matre, loi e tro epuni a xomihnine la itre xan me xomihni aqeany. Maine tro epuni a tria, loi e tro epuni a kapa la itre eamo hna hamën ke, Iehova a ini epun. (Heb. 12:6) Ketre, loi e tro epuni a eatrëne hnyawa la itre hnëqa i epun. Ngo ame la ka sisitria, tre, troa amadrinë Iehova, Keme së e hnengödrai.—Ite Edomë 27:11. w21.03 7 par. 17-18

Nyimutre la itre ewekë ka akötrë së, tune la itre tria së me itre hne së hna thatreine kuca me itre sine meci së. Easë fe a kucakuca ke, tha hna acili së kö troa xom la ketre hnëqa e hnine la organizasio i Iehova. Maine pena, pëkö thangane la huliwa ne cainöje së ngöne la teritoar. Ijije hi tro sa canga kucakuca pine la itre tria së me itre hne së hna thatreine kuca. Ketre, easë fe a mekun laka, tha tro kö Iehova a kepe së ngöne la fene ka hnyipixe pine la itre ngazo së. Ngo tha tro pi kö sa mekun tune lai. Öni Tusi Hmitrötr, “itre ka ngazo asë hi la nöjei atr.” Iesu hi la ka pexeje nge ka pëkö ngazo. (Rom. 3:23) Ngo tha Iehova kö a wangatrune la itre tria së me thele matre troa pexeje la aqane ujë së. Kem ka tru ihnimin Iehova me Akötresieti ka xomihni aqeany. Celë hi matre, tha sihngödri kö koi Nyidrëti la itre trengecatre hne së hna kuca matre troa isi memine la itre mekun me aja së ka ngazo. Nge tru la aja i Nyidrëti troa xatua së.—Rom. 7:18, 19. w20.12 22 par. 1-3

Ijije hi tro sa aceitunëne la mele ne la Keresiano memine la kola ihamë. Ekaa la hne së hna tro kow? Easa tro kowe la fene ka hnyipixe hna musinën hnei Iehova, Akötresie ka tru ihnimin. Easë palahi a thele troa lapa ngöne la gojeny ka tro kowe la mel ka pë pun. Hnei Iesu hna qaja ka hape, ka ilitre la gojeny nge jole troa trongën. (Mat. 7:13, 14) Ketre, tha ka pexeje kö së, matre canga tro hi sa jea qa ngöne la gojenyi ne mel. (Gal. 6:1) Maine easa ajane troa lapa ngöne la gojenyi ne mel, loi e tro sa saze la mekuna së me aqane ujë së. Paulo aposetolo a ithuecatre koi së troa “wenë amekötine la itre mekuna” së. Tha ka hmaloi kö koi së troa waipengöne la itre mekuna së me itre aliene hni së. Pine nemen? Pine laka, ka iaö la hni së. Thatre kö së ka hape, ka loi maine ka ngazo la hne së hna kuca. (Iere. 17:9) Ijije hi troa amenu së hnene la “itre mekune ka tria.” (Iako. 1:22) Celë hi matre nyipiewekë tro sa isa waipengö së jëne la Tusi Hmitrötr. Ej a amamane la “itre mekun me itre aja ne la hni” së.—Heb. 4:12, 13. w20.11 18 par. 1-3

Easa madrin la easa hetre hni ne ipië. Pine nemen? Pine laka, hetre ifego së matre easa madrin ngöne la kola xatua së. Pane mekune jë lo treen lao lepera hna aloin hnei Iesu. Caasi hi la ka bëeke troa olene koi nyidrë. Atre hi angeic laka, thatreine kö angeic troa sipu aloine la meci angeic. Hnei angeic hna ipië me olene la ixatua i Iesu, me atrunyi Akötresie. (Luka 17:11-19) Ame la atr ka hetre hni ne ipië, tre, nyimutre la itre sinee i angeic. Pine nemen? Pine laka, canga öhne hi angeic la itre thiina ka lolo i angatr. Ketre, angeic a mejiune laka, tro angatr a xome hnyawa la hnëqa i angatr. Tha cile kö angeic troa qaja aloine la huliwa i angatr. w20.08 12 par. 17-18