Semitrepa

Hnei Peteru hna qaja la ijine cili, ngo hetre hnei angeic hna saze memine lo aqane qaja i Ioela perofeta. (Itre hu. 2:16, 17) Tha hnei Peteru kö hna nyiqaan memine la hnaewekë, hna hape, “nge thupene lai,” tune lo aqane cinyihan ngöne la tusi Ioela. Hnei angeice pe hna qaja ka hape: “Ngöne la itre drai ne la pun,” ene la itre drai ne la pun ne la nöje i Iudra. Ame hë e cili, tro Akötresieti a nue la uati hmitrötre i Nyidrë “kowe la nöjei pengöne atr.” Celë hi lai ka amamane laka, loi e troa pane nue ijin matre troa eatre la hna perofetan hnei Ioela. Thupene la hnei Akötresieti hna nunuëne la uati hmitrötre i Nyidrë ekö, hnene la itre Keresiano hna nyiqaane tro fë la maca e cailo fen. Celë hi hna qaja hnei Paulo aposetolo ngöne lo nyidrëti a cinyanyi koi angetre Kolose lo macatre 61 M.K. Öni nyidrë, kola cainöj “kowe la nöjei atr e cailo fene hnengödrai.” (Kol. 1:23) Ame la Paulo a xome la hnaewekë hna hape, “nöjei atr” ke, nyidrëti hi a qaja la nöjei götrane e cailo fen hnei nyidrëti hna tro kow me itre sinatronge i nyidrë. Ketre, jëne la emenene la uati hmitrötre i Iehova, kola kökötre la huliwa ne cainöj enehila, nge “uti hë la cane la fene hnengödrai”!—Itre hu. 13:47. w20.04 6-7 par. 15-16

Iehova a hnimi së isa ala caas, tune la itre ka iananyi memine la itre xaa mamoe i Nyidrë. (Mat. 18:12-14) Hnei Iehova hna thingehnaeane ka hape, tro Nyidrëti a thel la itre mamoe ka paatr, me xatua angatr troa easenyi hmaca koi Nyidrë. Hnei Iehova mina fe hna qaja ka hape, tune lo atre thupë mamoe ekö e Isaraela, tro Nyidrëti a thel me xatuane la mamoe ka paatr. (Ezek. 34:12-16) Ame la hnapan, tru la traem me trengecatr hna nue hnene la atre thupë mamoe, matre troa thele la mamoe ka paatr. Ame la hnaaluen, angeic a bëeke fë la mamoe koi itre xan. Nge ame la hnaakönin, maine ka eatr maine pi xen la mamoe, angeic a nyihnyawan me hnime ej. Angeic a nyihnyawane la itre eatre ne la mamoe, me xep acon ej, me thuan. Ame la itre qatre thup ne la ekalesia, tre, angatre hi la ka thupëne “la hnënge mamoe” i Akötresie. (1 Pet. 5:2, 3) Itre qatre thup a pane thele angatr, me xatua angatr troa bëeke koi Iehova, me xatua angatre fe troa acatrene hmaca la aqane imelekeu i angatr me Iehova. w20.06 20 par. 10

Ame lo Iesu a qaja ka hape, ijine tro ha menu, hapeu nyidrëti kö a mekun laka, tro la nöjei atr a xötrethenge nyidrë? Waea. Ase hë Tusi Hmitrötr perofetan laka, ala xalaithe hi la ka troa lapaune koi nyidrë. (Ioane 12:37, 38) Öhne hi Iesu la itre aliene hni ne la nöjei atr asë. (Mat. 9:4) Ngo nyidrëti hi a wangatrune la itre ka lapaune koi nyidrë me catre cainöj. Eje hi, tha öhne kö së la itre aliene hni ne la itre atr. Celë hi matre, tha tro kö sa canga amekötine la ketre atr maine teritoare së pena! Ngo loi e tro pe sa goeë angatr tune la itre ka troa xötrethenge Iesu. Tha tro kö sa thëthëhmine la hnei Iesu hna qaja koi itretre drei nyidrë laka, ijine hë troa menu. Ijije hi tro la itre atrene la teritoare së a saze me hane xötrethenge Iesu Keriso. Ame koi Iehova, ceitu i angatr hi me “nöjei ewekë hna ajan.” (Hag. 2:7) Maine tro sa goeëne la itre atr tui Iehova me Iesu, tro hë sa thele troa atre la itre ini hnei angatr hna mejiune kow me itre hnei angatr hna ajan. Ketre, easa goeë angatr ceitu me itre trejin me easë ka xötrethenge Iesu. w20.04 13 par. 18-19

Öni Tusi Hmitrötr, loi e tro palahi sa akökötrene la ihnimi së koi Iesu, matre troa amadrinë Iehova. Ame la nyine tro sa kuca matre troa nyisinee i Iesu ke, troa atrepengöi nyidrë. Tro sa atrepengöi nyidrëti hnyawa jëne la itre tusi Mataio, Mareko, Luka, me Ioane. Maine tro sa lapa mekun la mele i Iesu hna qaja e hnine la Tusi Hmitrötr, tro ha kökötre la ihnim me metrötre së koi nyidrë. Eje hi, lolo la aqane ujë i nyidrëti kowe la itre atr. Ngacama Iesu la maseta ne la itretre dreng, ngo tha hnei nyidrëti kö hna thahluë angatr. Hnei nyidrëti pe hna qaja koi angatr la itre mekun me aliene hni nyidrë. Hnei Iesu hna ce akötr me ce treij me angatr. (Ioane 11:32-36) Ketre, öhne fe hi la itre ithupëjia me Iesu laka, kola nyisinee i nyidrë hnene la itre ka kapa la maca. (Mat. 11:19) Maine tro sa nyitipune la aqane ujë i Iesu kowe la itretre dreng, tro ha lolo la aqane imelekeu së me itre xan, nge tro hë sa madrin. Ketre, troa kökötre la ihnim me metrötre së koi Iesu. w20.04 22 par. 9-10

Ame lo 1870, ketre musi ka tru la musi Agele nge ka catr la trongene isi angatr. Ame ngöne la ketre mekene tusi Daniela, hna nyihatrene la musi cili hnene la ketre jon ka co, nge atre ngaane la köni xaa jon, ene la musi Faras, Espagne me Pays-Bas. (Dan. 7:7, 8) Eje hi la joxu ne kolojë uti hë lo Pane Isi Ka Tru. Ame ngöne la ijine cili, hnene la musi Agele hna ce huliwa memine la musi Etazini, ketre musi ka tru nge ka trenamo. Ame ngöne lo Pane Isi Ka Tru, hnene la trongene isi Agele hna ce xöl memine la trongene isi Etazini. Celë hi matre kola hëne la musi nyidro ka hape, Musi Agele me Amerika. Tune la hna perofetan hnei Daniela, hnene la joxu cili hna acasine la ketre ‘trongene isi ka tru me catr.’ Kola amamane hnyawa laka, Musi Agele me Amerika la joxu ne kolojë ngöne la itre drai hnapin. w20.05 4 par. 7-8

Hetre tim e celë fen ke, hna amë hnyawa la enanyine la ihnadro qa ngöne la jö. Maine nango easenyi ju, tro ha qaqacile la ihnadro; kösë ketre etë ka idreuth nge pëkö mel. Nge maine nango nanyi ju, tro ha lepany me timi ka catr. Ngo pine laka, hnei Iehova hna amë hnyawa la ihnadro qa ngöne la jö, matre lolo la aqane trongene la tim, nge hetre mel e celë fen. Ame la kola dreuthe la hnagejë hnei jö, tre, kola elë la so ne la tim matre troa nyi iaw. Ame e nöjei macatre, hnene la idreuthine la jö, matre itre milio lao litë tim ka nyi iaw. Thupene la 10 lao drai, kolo hmaca a mala la tim, tune la mani me kiona, ngöne la hnagejë me itre ga hetre tim. Thupene lai, kolo hmaca a nyiqan. Ka lolo la aqane trongene la tim, nge ka cile hut. Kola jelenyipicine laka, ka inamacan me trene mene i Iehova.—Iobu 36:27, 28. w20.05 22 par. 6

Hnei Iesu hna ithuecatre koi së tro palahi a sipo Iehova la uati hmitrötr ngöne la thith. (Luka 11:9, 13) Jëne la uati hmitrötr, Iehova a aegöcatrenyi së me hamë së la “men atraqatr.” (2 Kor. 4:7) Ketre, ej a xatua së troa cile kowe la nöjei pengöne jol. Uati hmitrötre fe a xatua së troa xome hnyawa la itre hnëqa së ngöne la huliwa i Akötresie. Eje fe a xatua së troa macaj me atreine huliwa. Celë hi ka aijijë së troa kuca hnyawa la itre huliwa ngöne la ekalesia. Haawe, hetre thangane la huliwa së ke, hnene la ixatua ne la uati hmitrötr. Ame la easa sipo Iehova la uati hmitrötr, matre troa saze la itre mekun me itre aja ka ngazo, easë hi lai a wangatrune la ahnahna cili. (Sal. 139:23, 24) Jëne la uati hmitrötr, Iehova a amamane la itre mekuna së me itre aqane ujë së ka ngazo. Thupene lai, ijije fe tro sa sipone la uati hmitrötr matre xatua së troa saze. Easë hi lai a amamane laka, aja së tro Iehova a xatua së jëne la uati hmitrötr.—Efe. 4:30. w20.05 28-29 par. 10-12

Ame la easa cilëgöline la ëje i Iehova ke, easë hi lai a nyitipu Iesu. Hnei Iesu hna qaja la ëje i Iehova me cilëgöli Nyidrë. Hnei nyidrëti fe hna jelethoine la itre Faresaio ka qaja ka hape, Akötresie ka calogitr Iehova me nanyi qaathe së. Hnei Iesu hna xatuane la itre atr troa trotrohnine laka, ka lolo la Keme i nyidrë, nge ka atreine xomihni aqeany, ka tru ihnimin nge ka nue la itre ngazo së. Hnei nyidrëti fe hna xatua angatr troa “öhnyi” Iehova. Hnei Iesu hna amamane hnyawa la itre thina i Iehova ngöne la mele i nyidrë. (Ioane 14:9) Tui Iesu, loi e tro sa qaja koi itre xan la itre hne së hna atre göi Iehova laka, ka lolo Nyidrë nge ka tru ihnimin. Celë hi aqane tro sa jelethoine la itre trengathoi hna qaja göi Nyidrë. Ketre, ame la easa xatuane la itre atr troa metrötrë Iehova, easë hi lai a ahmitrötrëne la ëje i Nyidrë. Jëne la aqane ithanata së me aqane ujë së, easa amamane la nyipi pengöi Iehova. Nge ame la easa xatuane la itre atr troa nuetrij la itre ini ka thoi hna qaja göi Iehova, easa hi lai a cilëgöline la ëje i Nyidrë. w20.06 6 par. 17-18

Hetre eloine la itre ewekë ngöne Ëternet ke, kola aijijë së troa cinyany kowe la itre fami së me itre sinee së. Ngo hapeu la itre ka ami foto me cinyany ngöne la itre ewekë ngöne Ëternet, tha angatre kö a sipu wangatrunyi angatr? Kösë angatr a qaja ka hape, “Goeë ni jë.” Nge ame la itre xan, angatr a cinyany la itre trengewekë ka sis me ka iakötrë hune la itre foto i angatr maine foto itre xan. Tha celë kö aqane ujë ne la itre Keresiano. Hna ithuecatr kowe la itre Keresiano troa ipië me wangatrune la itre xan. (1 Pet. 3:8) Ame la easa huliwane la itre ewekë ngöne Ëternet, loi e tro sa isa hnying, ka hape: ‘Tha eni kö a pi mama me sipu selë ni ngöne la eni cinyany me ami foto me video? Hapeu, tha tro jë kö itre xan a zalu?’ Tha ajane kö la itre Keresiano troa wangatrunyi angatr hnei itre xan. Angatre pe a xötrethenge la eamo hna qaja ngöne la topik enehila. Maine tro sa ipië, tha tro kö a ajojezi së hnene la aqane ujë ne la itre atr enehila, itre ka pi mama me pi tru.—1 Ioane 2:16. w20.07 6 par. 14-15

Qëmekene troa xötrethenge Iesu, tha hnei Paulo kö hna metrötrëne la itre Keresiano. Hnei angeic hna pane qanangazo angatr. (Itre hu. 7:58) Hnei Iesu hna sewe Paulo, lo hna hën ekö ka hape, Saulo, troa akötrëne la ekalesia. Hnei nyidrëti hna ithanata qa hnengödrai me atimekë Paulo. Paulo a ajane troa goe hmaca, matre hnei angeic hna sipo ixatua kowe la itre hnei angeic hna akötrën ekö. Hnei Paulo hna kapa la ixatua i Anania, matre goe hmaca pi hi angeic. (Itre hu. 9:3-9, 17, 18) Paulo la ketre atr ka hlemu ngöne la ekalesia. Ngo hnei angeic hna lapa mekun la ini hna hamën hnei Iesu ngöne la gojenyi ne tro Damaseko. Hnei angeic hna hni ka ipië me kapa la ixatua ne la itre trejin. Atre hnyawa hi Paulo laka, angatr la ka ‘ithuecatre’ koi angeic.—Kol. 4:10, 11, ftn. w20.07 18-19 par. 16-17

Ngacama ka Tru Trenge Men Akötresie, ngo hnei Nyidrëti hna thue hnëqa koi itre xan. Hnei Iehova hna acili Iesu troa joxu ne la Baselaia. Nge Nyidrëti fe a aijijëne la 144 000 lao atr hna iën troa ce musi me Iesu. Eje hi, hnei Iehova hna ini Iesu troa xome hnyawa la hnëqa ne Joxu me Atre Huuj Ka Sisitria. (Heb. 5:8, 9) Ketre, Nyidrëti fe a inine la itre ka troa ce musi me Iesu. Ngo tha Nyidrëti kö a amekötin la aqane huliwa i angatr. Pine nemen? Pine laka Nyidrëti a mejiun laka, tro angatr a kuca la aja i Nyidrë. (Hna ama. 5:10) Ngacama ijiji Iehova hi troa xom asë la itre hnëqa, ngo hnei Nyidrëti fe hna hamë hnëqa koi itre xan. Tune kaa fe së? Hapeu, epuni kö la ketre kem maine qatre thup pena? Loi e tro epuni a hamë hnëqa koi itre xan tui Iehova. Ketre, tha tro kö a amekötin la aqane huliwa i angatr. Maine tro epuni a nyitipu Iehova, tro ha tro loi la huliwa, nge tro fe epuni a inine la itre xan troa xome hnyawa la hnëqa i angatr.—Is. 41:10. w20.08 9 par. 5-6

Thenge la aja i Iehova, nemene la aqane tro sa goeëne la itre mamoe ka paatr? Hnei Iesu hna amamai tulu koi së. Atre hnyawa hi Iesu laka, ka sisitria catr koi Iehova la itre mamoe i Nyidrë. Celë hi matre hnei nyidrëti palahi hna xatuane la “itre mamoe ka paatr ne Isaraela” troa bëeke kowe la Keme i nyidrë. (Mat. 15:24) Pine laka, Iesu la atre thup ka lolo, hnei nyidrëti hna kuca asë la hnei nyidrëti hna atrein matre tha tro kö a paatr la ketre mamoe i Iehova. (Ioane 6:39) Hnei Paulo aposetolo hna ithuecatr kowe la itre qatre thup ne la ekalesia ne Efeso troa nyitipu Iesu. Öni nyidrë: “Tro nyipunie a huliwa catr göi troa xatuane la itre ka kucakuca, me mekune pala hi la itre trengewekë i Iesu Joxu, lo öni nyidrë: ‘Sisitria catre kö la madrine ne la atre ham, hune la atre kapa.’ ” (Itre hu. 20:17, 35) Kola mama ngöne la xötre celë laka, ka sisitria la hnëqa ne la itre qatre thup. Öni Salvador, ketre qatre thup e Espagne: “Ame la eni a mekun la etrune la ihnimi Iehova kowe la itre mamoe ka paatr, kola upi ni troa catre xatua angatr. Nyipiewekë koi ni troa thupë angatre hnyawa. Celë hi aja i Iehova.” w20.06 23 par. 15-16

Qëmekene troa nyipune la musi Iesu ka 1 000 lao macatre, tha Iehova a treqene tro sa pexej. Nyidrëti pe a xomihni aqeany me köletrije la itre ngazo së. Tui Iehova, loi e tro sa goeëne la itre thiina ka lolo itre xan me xomihni aqeany. Madrine catre Iesu memine la itre angela ngöne la kola xup ekö la ihnadro. Ngo the qaja palaha elany ngöne la kola troa lapan ej hnene la itre atr ka pexej me ka hnimi Iehova! Easa mekune la madrinene la itre ka troa ce musi me Iesu. Tro angatr a öhne la itre manathithi hna troa kapa hnene la itre atr qa ngöne la musi angatr. (Hna ama. 4:4, 9-11; 5:9, 10) Ketre, easa mekun la mele elany laka, pë hmaca kö treij me akötr. Easa madrin ke, paatre hë la itre sine mec me akötr me mec. Lapa treqene hnyawa jë së la ijine cili. Tui Iehova, catre jë së ihnim me inamacan, me xomihni aqeany. Tro lai a xatua së troa madrin ngacama tru la itre jol. (Iako. 1:2-4) Eje hi, “tro kö nyidrëti a amelene la itre atr.” (Itre hu. 24:15) Haawe, catre jë së amamane la hni ne ole së koi Iehova! w20.08 19 par. 18-19

Ame la Tusi Hmitrötr tre, ahnahna i Akötresie, nge hatrene la ihnimi Nyidrëti koi së. Jëne la uati hmitrötr, hnene la Keme së e koho hnengödrai hna upe la itre atr troa cinyihane ej ke, Nyidrëti a hnimi së, itre nekö i Nyidrë. Nge jëne la Tusi Hmitrötr, Iehova a sa la itre hnying ka tru, tune la kola hape: Ka xulu së qa kaa? Nemene la aliene la mele së? Nge nemene la ka troa traqa elany? Aja i Nyidrëti tro la itre nekö i Nyidrë a atre la itre mekun ka sa la itre hnying celë. Celë hi kepin matre hnei Nyidrëti palahi hna upe la itre atr troa ujëne la Tusi Hmitrötr ngöne nyimu qene hlapa. Ame enehila, hna ujën apexejen maine sine pena la Tusi Hmitrötr koi 3 000 lao qene hlapa. Celë hi itus hna ujën atrune hune la itre xaa itus. Easa amamane la hni ne ole së kowe la ahnahna cili, ngöne la easa e lapane la Tusi Hmitrötr, me lapa mekun la itre ini hna hamën, me trongëne itre ej. Ketre, easa amamane la hni ne ole së koi Akötresie, ngöne la easa cainöjëne la maca ne la Tusi Hmitrötr kowe la itre atr.—Sal. 1:1-3; Mat. 28:19, 20. w20.05 24-25 par. 15-16

Jole catre la teritoare i Ieremia perofeta ekö. Tha ka hmaloi kö koi angeic, matre kucakuca catre angeic. Hnei angeic hna mekun troa nue la hnëqa i angeic. Ngo tha celë kö la hnei angeic hna kuca. Pine nemen? Pine laka, kösë eë ka mel e kuhu hni angeic la Trengewekë i Iehova, nge thatreine kö angeice lapa fë lai! (Iere. 20:9) Maine tro palahi sa nyialiene la hni së hnene la Trengewekë i Akötresie, tro hë sa tui Ieremia. Celë hi matre loi e tro sa e me lapa mekun e nöjei drai la hna qaja hnei Tusi Hmitrötr. Tro hë sa madrin nge hetre thangane la huliwa ne cainöje së. (Iere. 15:16) Ketre, ame la easa kucakuca, loi e tro palahi sa sipo ixatua koi Iehova. Tro kö Nyidrëti a xatua së troa atreine waiewekë göne la itre ngazo së, me itre hne së hna thatreine kuca, me itre sine meci së. Nge maine pë palakö hnëqa së e hnine la ekalesia, tro kö Iehova a xatua së troa madrin ngöne la hna cainöj. Haawe, loi e tro sa catre thith me fe la hni së kowe la Keme së e hnengödrai. E cili, tha tro hë sa kucakuca! w20.12 27 par. 20-21

Ame la itre trejine föe ke, angatr a madrine troa iöhnyi memine la itre xaa trejin ngöne la itre icasikeu. Celë hi matre, nyipiewekë tro sa kepe angatre hnyawa, me ithanata me angatr, me wangatrunyi angatr. Tui Iesu, loi e tro sa xomi ijine kowe la itre trejine föe. (Luka 10:38-42) Maine jë, tro sa hë angatr troa ce xen. Ngo loi e tro palahi sa ithuecatrekeu ngöne la itre ijine cili. (Rom. 1:11, 12) Loi e tro la itre qatre thup a atreine waiewekë tui Iesu. Atre hi Iesu laka, tha ka hmaloi kö la mele ne la itre ka tha faipoipo kö. Öni nyidrëti fe ka hape, tha jëne madrine kö la troa faipoipo me hnaho. (Luka 11:27, 28) Maine easa ajane troa madrin, nyipiewekë tro sa amë panëne la huliwa i Iehova. (Mat. 19:12) Loi e tro la itre qatre thup a wangatrune la itre trejine föe, ceitu me itre thin me itre xa. Maine jë, tro la itre qatre thup a xomi ijin matre troa porotrik me angatr, qëmeken me thupene la itre icasikeu. w20.09 21-22 par. 7-9

Ame e Isaraela, sikisi lao treu ne troa pane itreqe qëmekene troa menu. Thupene la ijine mani e Okotropa, itre ka eëny a jume la itre wene qitr. Nge ame e treu Eiperem, angatre ha menuëne la hlapa. (Mar. 4:28) Eje hi laka, tha ka hmaloi kö, ngo loi e tro sa inamacan me catre xomihni aqeany, tune la itre ka eëny. Nyipici laka, tha ka pexeje kö së, matre easa ajane troa canga kepe thangan qa ngöne la itre huliwa së. Ngo pane mekune jë laka, hetre hlapa së. Qëmekene troa menuën, loi e tro sa pane wakeca me tha la dro, me tran, me fi. Ketre tune fe, loi e tro sa nue trengecatr matre troa inine la itre atr. Loi e tro sa xatuane la itre ka ini tus troa xometrije la itre itine ka ngazo, tune la iwangatrehmekunyi atr. Nyipiewekë fe tro sa xomihni aqeany ngöne la kola xele ma drei së hnene la itre atr. Ketre, nyipiewekë tro sa atreine xomihni aqeany ngöne la kola kapa la nyipici hnene la ketre atr. Tha tro kö sa musinëne la lapaune i angeic. Ame la itretre dreng ekö, tha canga trotrohnine kö angatr la itre ini hna hamën hnei Iesu. (Ioane 14:9) Tha tro kö sa thëthëhmine laka, easa jum me fi, ngo tro kö Akötresieti a acian.—1 Kor. 3:6. w20.09 11 par. 10-11

Easë asë hi a ajane tro la itre ka ini tusi a xomi bapataiso. Celë hi matre, loi e tro sa ithuecatre koi angatr troa hane sine la itre icasikeu. Ame la itre hnainin ka canga sine la itre icasikeu ke, angatre hi la ka canga kökötre ngöne la nyipici. Hnene la itre xaa trejin hna amamane kowe la itre ka ini tus laka, ka ce tro la ini tus memine la itre icasikeu. Pine laka, hetre itre xaa ini hnei angatr hna troa kapa ngöne la itre icasikeu. Haawe, loi e troa ce e memine la ketre ka ini tus la Heberu 10:24, 25, nge amamane jë la itre eloine la itre icasikeu. Ketre, loi e troa qaja koi angeic la ketre ini hna hamën ngöne la icasikeu. Tro hë lai a thue aja koi angeic troa sine la itre icasikeu. Ame la angeic a xötrei sine la icasikeu, tro hë angeic a öhn laka, ka isapengöne memine la itre xaa hmi. (1 Kor. 14:24, 25) Ketre, jëne la itre icasikeu, angeic a troa nyisineene la itre xaa trejin ka amamai tulu ka loi, nge ka troa xatua angatr troa kökötre ngöne la nyipici me xomi bapataiso. w20.10 10-11 par. 14-15

Uati hmitrötr la ka xatua së troa trongëne la itre hne së hna e me inin e hnine la Tusi Hmitrötr. Tune la atre cinyihane la Salamo, loi e tro sa thith me hape: ‘Iehova fe, ini ni jë la itre jë i cilie. Tro ni a trongëne la nyipici cilie. Apexejene ju la hning matre tro ni a xouene la ëje i cilie.’ (Sal. 86:11) Ketre, loi e tro palahi sa xome la itre göxene hna hnëkën hnei Iehova jëne la Tusi Hmitrötr me organizasio i Nyidrë. Ngo tha easë kö a thele troa tiqa hnei atrehmekun. Easa ajane troa ketr la hni së hnene la nyipici matre tro sa saze. Nge ijije hi troa xatua së hnene la uati hmitrötr. Ketre, easa ajane troa ithuecatre kowe la itre trejin. (Heb. 10:24, 25) Pine nemen? Pine laka, easa sine la lapa ka cahae i Iehova. Sipone jë koi Iehova la uati hmitrötre i Nyidrë, matre tro sa hamë mekun qa kuhu hni së ngöne la hna icasikeu, me kuca hnyawa la itre iamacany me cainöj. E cili, easa amamane koi Iehova me Iesu laka, easa hnime la itre “mamoe” i nyidro. (Ioane 21:15-17) Easenyi hë matre troa musi la organizasio hna xomiujine hnene la uati hmitrötre i Iehova. w20.10 24-25 par. 15-17

Nemene la aqane ujë i Iesu e cili? Thupene la kola amele nyidrëti hmaca, öni nyidrë kowe la itre xan: “The xou kö! Tro jë, nge qaja ju kowe la itre trejin me eni laka, [ase hë amele ni hmaca].” (Mat. 28:10a) Eje hi, tha hnei nyidrëti kö hna nuetrije la itre aposetolo. Ngacama hnei angatr hna kötr, ngo hnei nyidrëti hna hë angatr ka hape, “itre trejin me eni.” Tui Iehova, ka utipine Iesu me nue la ngazo i itre xan. (2 Ite jo. 13:23) Ketre tu së fe, easa mekune la itre ka nanazij. Easa hnimi angatr ke, itre trejine hi lai me easë. Tha thëthëhmine kö së laka, itre macatre ne angatr a catre huliwa koi Iehova me hnimi Nyidrë. (Heb. 6:10) Tru la hne së hna meku angatr! (Luka 15:4-7) Haawe, loi e tro sa hë angatr kowe la itre icasikeu me kepe angatre hnyawa ngöne la angatr a traqa kowe la Uma Ne Baselaia. w20.11 6 par. 14-17

Hnei Salome hna sipo Iesu matre tro Iakobo me Ioane, lue nekö i eahlo, a lapa ezi nyidrë ngöne la Baselaia. Öni Iesu ka hape, Akötresieti la atrekë hnëqane lai. (Mat. 20:20-23) Hnei Iesu hna amamane laka, ka hni ne ipië nyidrë. Tha hnei nyidrëti kö hna kuca la sipu mekuna i nyidrë, ngo hnei nyidrëti pe hna drengethenge Iehova. (Ioane 12:49) Tune kaa la aqane tro sa nyitipu Iesu? Maine easa ajane troa nyitipune la aqane hni ne ipië i Iesu, loi e tro sa trongëne la hna qaja ngöne la topik ne la drai. Haawe, ame la kola hnyingëne la mekuna së, tha tro kö sa catre fë mekun maine canga ithanata. Loi e tro pe sa thele la mekuna i Iehova ngöne la Tusi Hmitrötr me e hnine la itre itusi së. Aqane tro hi së lai a amamane laka, ka hetre ifego së. Ketre, ka sisitria catre koi së la “itre wathebo ka meköti” Iehova.—Hna ama. 15:3, 4. w20.08 11-12 par. 14-15

Nemene la nyine tro sa pane mekun qëmekene troa hamë eamo kowe la ketre sinee? Qëmekene troa ithanata koi angeic, loi e tro sa isa hnying ka hape: ‘Eni kö a “thina ka meköti cat”?’ Ame la atr ka nyi ka meköt ke, angeic a amekötin la itre xan thenge la sipu inamacane i angeic, ngo tha thenge kö la itre hna amekötin hnei Iehova. Ketre, ka catre la aqane ujë i angeic koi angatr. Maine easë palahi a ajane troa ithanata koi angeic, loi e tro sa qaja hnyawane koi angeic la jol me hnying matre xatua angeic troa trotrohnine laka, ka ngazo la hnei angeic hna kuca. Loi e troa hamë eamo thenge la Tusi Hmitrötr. Ketre, tha tro kö a thëthëhmine laka, Iehova hi la ka troa ameköti angeic ngo tha easë kö. (Rom. 14:10) Loi e tro sa nue la Tusi Hmitrötr troa eatrongë së, nge tui Iesu, loi e tro sa ihnim. (Ite Edomë 3:5; Mat. 12:20) Pine nemen? Pine laka, Iehova a troa ujë koi së tune la aqane ujë së koi itre xan.—Iako. 2:13. w20.11 21 par. 13

Hapeu, aja së kö troa ameköti së thenge la hane ne ngönetrei së me etrune la hmae së maine iqëmeke së pena? Waea. Ame Iehova, tha Nyidrëti kö a axecië mekun thenge la itre ewekë ka mama koi atr! Hanawang la ketre ceitun. Isapengöne kö la aqane goeëne Samuela la itre nekö i Iese me Iehova. Hnei Nyidrëti hna qaja koi Samuela ka hape, troa joxu ne Isaraela hnene la ketre nekö i Iese. Ngo drei la ka troa joxu? Ame lo Samuela a öhnyi Eliaba, lo pane nekö i Iese, öni angeic: “Nyipici eje xajawa i Iehova la siana i nyidë.” Ame koi Samuela, Eliaba la ka troa joxu. Ngazo pe, “öni Iehova koi Samuela, ka hape, The tro kö eö a wange la qëmeke i angeic, memine la ehoeanyi angeic, ke tha ajange kö angeice lai.” Nemene la ini koi së? Öni Iehova: “Ame la at’ a wange la ka mama, ngo Iehova a wange la hni.” (1 Sam. 16:1, 6, 7) Loi e tro sa nyitipu Iehova ngöne la easa cememine la itre trejin. w20.04 14 par. 1; 15 par. 3

Iesu a trongëne la itre hlapa. (Ioane 4:3-6) Kola cia la itre qitr, ngo tha ijine tro palakö a menu. Loi e troa pane treqene la foa lao treu. Ngo easa sesëkötr la Iesu a qaja, ka hape: “Goeëne la hlapa, ijine tro ha menuën.” (Ioane 4:35, 36) Nemene la aliene lai? Iesu a qaja la ketre ceitun laka, tha kolo kö a menuë qitr ngo kolo pe a menuë atr. Tro sa pane ce wang la itre ewekë ka traqa. Ame la angetre Iudra tre, ka imethinë me angetre Samaria. Ngo hnei Iesu hna cainöj kowe la föe ne Samaria. Nge hnei eahlo hna drei Iesu! Ame lo Iesu a qaja ka hape, “ijine tro ha menuën,” nyidrëti a qaja la itre atr ka traqa troa kepe ini qaathei nyidrë. Eje hi, hnene la föe ne Samaria hna qeje Iesu koi angatr. (Ioane 4:9, 39-42) Önine la ketre ka qejepengöne la Tusi Hmitrötr, göne la hna qaja hnei Iesu, ka hape: “Ame la kola canga traqa troa drei Iesu hnene la itre atr tre, . . . kola amaman laka, ceitu i angatre hi me itre qitr nyine tro ha menuën.” w20.04 8 par. 1-2

Itre icasikeu a hnëkë së kowe la isi, me xatua së troa maca troa cainöj me hamë ini. Itre eje fe a xatua së troa huliwane hnyawa la Itre Jia Ne Cainöj. Haawe, loi e tro sa hnëkëne hnyawa la itre icasikeu, me drenge hnyawa itre ej, me trongëne la itre hne së hna inin. E cili, tro hë sa “ketre nyipi sooc i Keriso Iesu.” (2 Tim. 2:3) Kolo fe a xatua së hnene la itre milio lao angela. Pane mekune jë la hna atreine kuca hnene hi la caa angela. (Is. 37:36) Nge the qaja palaha la trongene isi ne la itre angela! Eje hi, pëkö atr maine dremoni ka atreine cil qëmekene la trongene isi Iehova. Önine la ketre atr, maine easë caasi hi me Iehova, pëkö ka atreine cile koi së ke, alanyimu kö the së. (A. ame. 6:16) Haawe, tha tro kö sa kucakuca pine la aqane ujë me aqane ithanata ne la ketre sine huliwa, maine ketre sine ini, maine pena ketre sinee ka tha hmi kö. Eje hi, tha easë caasi kö. Maine tro palahi sa drengethenge Iehova, tro kö Nyidrëti a xatua së. w21.03 29 par. 13-14

Maine jë, Paulo aposetolo a amexeje lo hna qaja ngöne Isaia 22:13 göne la aqane ujë i angetre Isaraela. Tha hnei angatre kö hna thele Akötresie, hnei angatre pe hna thel la itre nyine iamadrinë. Kösë angatr a hape, “enehila hi la ijine mel, ngo tha elanyi kö.” Celë hi aqane mekune la itre atr enehila. Ame la mejiune kowe la melehmaca, tre, kola xatua së troa iëne hnyawa la itre sinee së. Nyipiewekë tro la itre Keresiano ne Korinito a thupën, matre tha tro kö a nyisineene la itre atr ka tha mejiune kö kowe la melehmaca. Nemene la ini koi së? Ijije hi troa ajojezi së hnene la itre sinatro ka thele la itre nyine iamadrinë, me saze la aqane waiewekë së, me itre hne së hna majemine ka loi. Tro fe angatr a upi së troa kuca la ngazo, ewekë hna methinën hnei Akötresie. Celë hi matre, öni Paulo: “Inamacane pi thenge la ka meköt, nge the majemine kö kuca la ngazo.”—1 Kor. 15:33, 34. w20.12 9 par. 3, 5-6

Ame ngöne la xötre celë, kola qaja la aqane eköthe Iehova la nöje i Nyidrë e celë fen me e koho hnengödrai. Ame la itre ka trene mus, tre, hetre hnëqa i angatre fe. Sisitria catre kö la musi Iehova, matre Nyidrëti la ka troa amekötine la nöjei nekö i Nyidrë, e celë fen me e koho hnengödrai. (Rom. 14:10; Efe. 3:14, 15) Hnei Nyidrëti hna acili Iesu troa he ne la ekalesia, ngo tro fe Iesu a qaja koi Akötresie la aqane musinë së hnei nyidrë. (1 Kor. 15:27) Hnei Iehova mina fe hna acile la trahmany matre troa he ne la fami. Nemene la ka troa xatuane la itre he ne fami? Loi e tro angeic a pane atre la aja i Iehova göi angeic. Loi e tro angeic a trotrohnine la kepin matre Iehova a hamë musi koi itre xan, memine la aqane tro angeic a xötrethenge la tulu i Iehova me Iesu. Pine nemen? Pine laka, hnei Iehova hna aijijëne la itre he ne fami troa mus nge aja i Nyidrë tro angatr a musi hnyawa.—Luka 12:48b. w21.02 2 par. 1-3

Hetre eloin e tro sa nyitipu Iehova me thëthëhmine la itre xaa ewekë. Drei la ketre ceitun. Ngacama ka pexeje Iehova, ngo Nyidrëti a thëthëhmine me nue la itre ngazo së ngöne la easa ietra. (Sal. 25:7; 130:3, 4) Nge aja i Iehova tro sa nyitipu Nyidrë ngöne la kola qeje menu hnene la itre ka akötrë së. (Mat. 6:14; Luka 17:3, 4) Easa amamane la hni ne ole së koi Iehova, ngöne la easa huliwane hnyawa la ahnahna cili me atrunyi Nyidrë. Ame itre xan, ngazo la aqane huliwane angatr la atuat. Angatre kö a sipu amekötine la loi qa ngöne la ngazo. Ngo pine laka Iehova la Atre Xupi së, matre sisitria catre kö la itre trepene meköti Nyidrë, hune la aqane sipu ameköti ewekë së. (Rom. 12:1, 2) Ame la easa trongëne la itre trepene meköti Nyidrë, tingeting la mele së. (Is. 48:18) Ketre, hetre aliene la mele së, ene la troa atrune la Atre Xupi së me Keme së, me amadrinë Nyidrë.—Ite Edomë 27:11. w20.05 23-24 par. 13-14

Nemene la ka troa xatua së troa ihnimi trejin? Loi e tro sa thele troa atrepengöne hnyawa la itre trejin e hnine ekalesia, matre trotrohni angatr. Ketre, tha tro kö sa nue la itre macatre së ka iananyi maine nöje së troa sewe së troa caas. Loi e tro palahi sa mekune la tulu i Ionathana me Dravita. Ngacama 30 lao macatre ka iananyi nyidro, ngo lue treme sinee nyidro. Hapeu, ijije kö tro epuni a hane nyisineene la ketre trejin ka tru maine ka co e hnine la ekalesia? Maine eje hi, tro hë epuni a amamane laka, epuni a ‘hnime la lapa ne la itre trejin asë.’ (1 Pet. 2:17) Ngo hapeu, tro kö sa easenyi catr kowe la nöjei trejin asë? Waea, easa easenyi catr kowe la itre trejin ka ce mekun me easë nge ka ajane la itre ewekë hne së fe hna ajan. Hnei Iesu hna hën asë la itre aposetolo i nyidrë ka hape, “sinee.” Ame pe, epe catre kö nyidrë koi Ioane. (Ioane 13:23; 15:15; 20:2) Ame pe, tha hnei Iesu kö hna ië hna hnim.—Mar. 10:35-40. w21.01 23 par. 12-13

Tha ceitune kö la aqane cainöje Paulo aposetolo koi angetre ethen e Athenai, me koi angetre Iudra e hnine la sunago. Maine jë, hnei Paulo hna goeëne hnyawa la itre hnei angatr hna kuca ngöne la hmi angatr. (Itre hu. 17:23) Ame e thupen, hnei Paulo hna thele ngöne la aqane hmi angatr, la itre xaa ini ka nango ce tro memine la hna qaja e hnine la Itre Hna Cinyihan. E cili, ijiji nyidrëti hë troa tro fë la nyipici koi angatr. Öni Paulo koi angetre Athenai ka hape, nyidrëti a tro fë la maca ne la “Akötresie Hna Thatre,” lo hnei angatr hna thele troa nyihluen. Nge ngacama thatre kö la angetre ethen la Itre Hna Cinyihan, ngo hnei Paulo hna goeë angatr tune la itre qitr nyine tro ha menuën. Hnei nyidrë hna thele la aqane troa ketr la hni angatr. Loi e tro sa tui Paulo, troa atreine goe me thele troa trotrohnine la hna mejiune kow hnene la itre atr. Nemene la ka mama ngöne la easa goeëne la hnalapa maine loto i angatr? Ijije kö tro sa atre la hmi angatr, jëne la ëje i angatr, me aqane heetr, me aqane mel me aqane ithanata? w20.04 9-10 par. 7-8