Okotropa

Maine tro sa thele troa atrepengöi Iesu hnyawa, tro hë sa nyitipune la aqane mekun me aqane ujë i nyidrë. E cili, tro ha catrecatre la aqane imelekeu së me nyidrë. Nemene la aqane tro sa nyitipu Iesu? Hanawang la ketre ceitun. Sisitria catre kö koi Iesu troa xatuane la itre xan, hune la troa kuca la sipu aja i nyidrë. (Mat. 20:28; Rom. 15:1-3) Hnei Iesu palahi hna nue xecie la mele i nyidrë me nue la itre ngazo itre xan. Tha hnei Iesu kö hna dreng akötrëne la itre hna qaja hnei itre xan. (Ioane 1:46, 47) Ketre, tha hnei nyidrëti kö hna nue la itre tria hna kuca ekö hnene la itre atr, troa saze la aqane ujë i nyidrë. (1 Tim. 1:12-14) Öni Iesu: “Tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:35) Loi e tro sa isa hnying ka hape: “Eni kö a nyitipu Iesu me thele tingeting me iloi memine la itre trejin?” w20.04 24 par. 11

Ngacama alanyimu enehila la itre atr ka silitrengathoi Akötresie me adrone la ëje i Iehova, ngo ijije hi tro sa cilëgöline la nyipici me qaja kowe la nöjei atr ka hape, ka hmitrötr, me meköt me ihnimi Iehova. Ijije fe tro sa sajuëne la musi cile i Nyidrë. Loi e tro sa qaja amamane ka hape, musi cile i Nyidrë hmekuje hi la ka meköt, nge ka ijije troa hamën la tingeting me madrin kowe la itre atr. (Sal. 37:9, 37; 146:5, 6, 10) Hetre ketre nyine tro sa kuca matre troa ahmitrötrëne la ëje i Akötresie. Ame la easa cainöje trootro, easa amamane laka, ka meköti tro Iehova a mus ke, Ka Tru Trenge Men Nyidrë. Eje hi laka, ka nyipiewekë troa inine la itre hna amekötin hnei Akötresie. Ngo ame la ka sisitria, tre, troa xatua angatr troa hnimi Iehova, me mele nyipici koi Nyidrë. Celë hi matre nyipiewekë tro sa amamane la itre thina i Iehova memine la pengöi Nyidrë, tune la aliene la ëje i Nyidrë. (Is. 63:7) Aqane tro hi së lai a xatuane la itre atr troa hnimi Nyidrë me mele nyipici koi Nyidrë. w20.06 6 par. 16; 7 par. 19

Nyine haine la aqane xupe la atuat. Ame la nekönatr e kuhu hni thin, hna eköthe hë la aqane troa kökötre la atuate i nyën. Itre thauzane lao cellule cérébrale hna kuca e nöjei menetr! Önine la itre ka ithel ka hape, hetrenyi la 100 miliar lao cellule hna hën ka hape, neurones ngöne la atuat, matre traqa koi 1,5 kilo. Ame la ketre ewekë hna atreine kuca hnene la atuat ke, troa atreine ithanata. Pane mekune jë la ka traqa ngöne la easa ithanata. Ame la easa qaja la ketre hnaewekë, atuate së a ce huliwa memine la 100 lao ijön qa ngöne la thinem, nyinawa, që, jun enaj, me imano. Nyipiewekë tro la itre ijöne cili a ce huliwa, matre troa trotrohnine la itre hnaewekë hna qaja. Ame lo 2019, hnene la itre ka inamacan hna qaja ka hape, atreine hi la itre medreng troa wangatrehmekune la itre hnaewekë. Celë hi hna jelenyipicin hnene la itre ka ithel ka hape, hna hnaho së cememine la atreine troa inine la ketre qene hlapa, me trotrohnine la aqane eköthe ej. Eje hi, ahnahna i Akötresie la troa atreine ithanata. w20.05 22-23 par. 8-9

Hnei Aberahama hna nue la mele i angeic ka lolo ngöne la traon e Ure. Pine nemen? Pine laka, angeic a treqene la “traon ka hetre nyipi trepen.” (Heb. 11:8-10, 16) Ame la traon hna treqen hnei Aberahama, tre, kola qaja la Baselaia i Akötresie. Iesu memine la ala 144 000 lao hna iën la ka sine la Baselaia cili. Öni Paulo: “Traon ne la Akötresie ka mel, me Ierusalema ne hnengödrai.” (Heb. 12:22; Hna ama. 5:8-10; 14:1) Hnei Iesu hna inine la itretre dreng troa thith matre traqa pi la Baselaia, nge troa eje la aja i Akötresie e celë fen tun e hnengödrai. (Mat. 6:10) Hapeu, atre kö Aberahama la aqane trongene la Baselaia i Akötresie? Waea. Ame ekö, itre ithuemacanyi lai “ka hmitrötr nge hna juetrën.” (Efe. 1:8-10; Kol. 1:26, 27) Ngo atre hi Aberahama laka, tro la itre matra i angeic a joxu. Celë hi la hna thingehnaean hnei Iehova.—Gen. 17:1, 2, 6. w20.08 2-3 par. 2-4

Loi e tro sa thipetrije la itre ini ne la itre ka iamenumenu. Qaane lo kola acile la ekalesia ne la itre Keresiano, Satana palahi a thele troa iaöne la itre hlue i Akötresie, matre tro angatr a luelu. Celë hi matre, loi e tro sa atre la eisapengönene la nyipici memine la thoi. Ame la itre ka icilekeu, angatr a huliwane la itre ewekë ngöne Ëternet, matre troa ajojezine la lapaune së koi Iehova memine la ihnimi së kowe la itre trejin. The thëthëhmine kö së laka, Satana la qaane la itre trengathoi cili. Haawe, loi e tro sa thipetrije itre ej! (1 Ioane 4:1, 6; Hna ama. 12:9) Maine easa ajane troa cile koi Satana, loi e tro sa acatrene la lapaune së koi Iesu. Loi e tro fe sa atre la aqane troa eatrëne la aja i Iehova hnei Iesu. Ketre, nyipiewekë tro sa mejiune kowe la itre atr hnei Iehova hna iën, matre troa xomiujine la organizasio i Nyidrë. (Mat. 24:45-47) Celë hi matre, loi e tro palahi sa inine la Tusi Hmitrötr. E cili, tro ha catre la lapaune së, tune la ketre sinöe ka catre iwaan. Celë hi hna qaja hnei Paulo ngöne la topik enehila. w20.07 23-24 par. 11-12

Itre atr ka ngazo së, matre easa canga amekötine la atr thenge la ka mama koi së. (Ioane 7:24) Ngo tha öhn asë kö së la pengöne la atr. Hanawang la ketre ceitun. Maine tro la droketre a goeëne hi la ka wezipo, tha tro kö nyidrëti lai a atrepengöi angeic. Nyipiewekë tro nyidrëti a drenge la ka wezipo, ngöne la angeic a qaja la mele i angeic, me itre aliene hni angeic, me itre xaa jol. Maine jë tro la droketre a upe lai ka wezipo troa tro ngöne ketre masin, matre troa wang e hnine la ngönetrei angeic. Maine tha celë kö la hna kuca hnei droketre, tro ha ngazo la aqane nyinyine lai mec. Ketre tu së fe. Tha hnene kö laka, hne së hi hna goeëne la ketre trejin, matre atre hë së la jole i angeic. Loi e tro sa thele troa atrepengöi angeic hnyawa. Thatreine kö së öhne la itre aliene hni itre xan. Ame pe, ijije hi tro sa nyitipu Iehova. Iehova a drenge la itre hlue i Nyidrë, nge trotrohnine hi Nyidrëti la itre ewekë ka traqa ngöne la mele i angatr. Nge Nyidrëti a utipi angatr. w20.04 14-15 par. 1-3

Loi e tro sa hetre hni ne ipië. Ame la atr ka pi tru, thatreine kö angeice “tuluthe” la aqane troa sipu waipengöi angeic. Angeic a thele iwesitrë me meku angeice hi. Ketre, angeic a akötrë angeic me itre xane fe hnene la aqane mekun me aqane ujë i angeic. Maine tha thupëne kö angeic, tro ha atimekë angeic me amenu angeic hnei Satana. (2 Kor. 4:4; 11:3) Ame pena la atr ka ipië, tre, ka atreine tulu ewekë angeic. Atre hi angeic laka, hetre hnei angeic hna thatreine kuca tui itre xan. (Fil. 2:3) Ketre, atre hi angeic laka, “methi Akötresie la itre ka pi tru,” nge “Nyidrëti a hamëne la ihnimi gufa koi itre ka ipië.” (1 Pet. 5:5) Ame la atr ka atreine tuluthe la aqane sipu waipengöi angeic, tre, tha aja i angeice kö tro icilekeu me Iehova. Maine easa ajane troa ipië, loi e tro sa trongëne la eamo ne la Tusi Hmitrötr ka hape: “Unatrije pi la itre thiina hnapan me itre hna majemin. Nge hetrëne jë la itre thiina ka hnyipixe.” Nyipiewekë tro sa thele troa atrepengöi Iesu hnyawa me nyitipu nyidrë.—Kol. 3:9, 10; 1 Pet. 2:21. w20.07 7 par. 16-17

Drei la ketre madrin ka tru e troa sine la ekalesia i Iehova! Kösë easë ha mel e hnine la Paradraiso memine la itre trejin ka madrin me thele tingeting. Ngo nemene la hnëqa i epun e hnine la ekalesia? Hnei Paulo aposetolo hna aceitunëne la ekalesia memine la ngönetrei ne la atr. Nge hnei nyidrëti hna aceitunëne la itre trejin memine la itre igötranene la ngönetrei. (Rom. 12:4-8; 1 Kor. 12:12-27; Efe. 4:16) Ame la ketre ini hne së hna xom qa ngöne la ceitune i Paulo ke, isa hetre hnëqa së e hnine la ekalesia. Öni Paulo: “Tune la ngönetrei, nyimutre la itre hnepe igötranen, nge isa hetre huliwa ne itre ej, haawe, tu së mina fe, ngacama ala nyimu së, ngo casi hë së me Keriso, nge easë la itre hnepe ngönetrei hna iacasinekeun.” (Rom. 12:4, 5) Nemene la hnei Paulo hna pi qaja? Ngacama isapengöne kö la itre hnëqa së, ngo ka nyipiewekë asë hi së koi Iehova. w20.08 20 par. 1-2; 21 par. 4

Itre kem me thin, tune kaa la aqane tro epuni a nyitipu Iehova me hetre hni ne ipië? Hnyingëne jë la mekuna ne la itre nekö i epun. Nge maine ijij, loi e troa hane drei nyudren. Hnei Iehova mina fe hna amamai tulu göne la troa xomihni aqeany. Maine kola hane qeje mekun hnene la ketre hlue i Iehova, Nyidrëti a xomihni aqeany. Hnei Iehova hna drei Aberahama ngöne la angeic a qaja la mekuna i angeic göi Sodroma me Gomora. (Gen. 18:22-33) Ketre, hnei Iehova hna xomihni aqeanyi Sara, föe i Aberahama. Ame lo kola qaja hnene la angela ka hape, tro Sara a hnaho ngacama qatre föe hë eahlo, hnei eahlo hna hnyima. Ngo tha hnei Iehova kö hna dreng akötrën maine wesitr pena. (Gen. 18:10-14) Hnei Iehova pe hna metrötrë Sara. Itre kem me thin me itre qatre thup, nemene la ini hnei epuni hna xom qa ngöne la tulu i Iehova? Isa hnyinge jë ka hape: ‘Nemene la aqane ujëng ngöne la kola hane qeje mekun hnei ketre? Hapeu, eni kö a canga thele kepin, maine thele pena troa trotrohnine la mekuna i angeic?’ Maine tro la itre ka trene hnëqa a nyitipu Iehova, tro ha hetre eloine kowe la itre fami memine la ekalesia. w20.08 10 par. 7-9

Ame lo easa xötrei atre la nyipici, hne së hna kapa la ixatua ne la itre xan. Atre hi së laka, “itre nekönatre” së ngöne la götrane u nge hetre nyine tro palakö sa inin. (1 Kor. 3:1, 2) Ngo tune kaa enehila? Maine jë, ekö hë së nyihlue i Iehova nge nyimutre la itre hne së hna atre. Ngo kösë tha canga kapa kö së la ixatua qaathene la ketre trejin ka xötrei atre la nyipici. Ame pe, Iehova ithuecatre koi së jëne la itre trejin. (Rom. 1:11, 12) Maine easa ajane troa kapa la ixatua qaathei Iehova, loi e tro sa kapa la ixatua angatr. Ame la ka nyipiewekë ke, tha ene kö la troa egöcatr, me inamacan me trenamo, maine tro pena a lolo la aqane mel. Ngo loi e troa hetre hni ne ipië me catre mejiune koi Iehova. Haawe, loi e tro sa nyitipu Paulo, me (1) mejiune koi Iehova, me (2) lapa mekune la tulu ne la itre hlue i Iehova ekö, me (3) kapa la ixatua ne la itre trejin. Eje hi, ngacama easa kucakuca, ngo tro kö Iehova a aegöcatrenyi së! w20.07 14 par. 2; 19 par. 18-19

Tha ka hmaloi kö troa xomihni aqean ngöne la easa cainöj kowe la itre sinee së ka tha hmi kö. Ngo kola qaja ngöne Ate Cainöj 3:1, 7 (MN) ka hape: “Hetre ijine . . . lapa thaup, me ijine ithanata.” Jëne la aqane ujë së, ijije hi tro sa tro fë la nyipici. Ngo loi e tro palahi sa thele ijine troa tro fë la nyipici kowe la itre atr. (1 Pet. 3:1, 2) Eje hi laka, easa ajane troa catre cainöj, ngo loi e tro fe sa xomihni aqeanyi la itre xan, tune la itre fami së. Ijije hi tro sa xomi ini qa ngöne la tulu ne la itre hlue i Iehova ekö me enehila, göne la aqane troa xomihni aqeany. Aja i Habakuka ekö troa canga paatre la iakötrë e Iudra. Ngo hnei angeic hna mejiun me hape: “Tro ni a cile ngöne la hnenge hna hmek.” (Hab. 2:1) Ame Paulo, aja i nyidrë troa canga “umuthe” la huliwa ne cainöj. Ame pe, hnei nyidrëti palahi hna xomihni me catre “anyipicine la maca ka loi.”—Itre hu. 20:24. w20.09 11-12 par. 12-14

Iesu la ka trene hnëqa ka tru thupe i Iehova. Ngo tha hnei Iesu kö hna sipu wangatrunyi nyidrë. Nyipiewekë tro fe sa ipië, matre tro palahi a hetre ihnim e hnine la organizasio i Iehova. (Luka 9:48; Ioane 13:35) Nemene la nyine tro sa kuca ngöne la easa öhn laka, tha ka loi kö la aqane nyinyine la itre jol e hnine la ekalesia? Tha tro kö sa eetr. Loi e tro pe sa ipië me drengethenge la itre trejin ka elemeken la ekalesia. (Heb. 13:17) Tro fe sa isa hnying ka hape: ‘Hapeu, ka ngazo catre kö la jol celë? Ijine kö lai troa nyinyine la jol? Nge hnëqange kö lai? Eni kö a thel troa caasi e hnine la ekalesia, maine eni pena a thele troa pi mama?’ Ame koi Iehova, sisitria catre kö la troa ipië hune la troa atrein. Nge nyipiewekë catre kö koi Iehova tro sa caas, hune la thangane la itre huliwa së. Celë hi matre, loi e tro sa nyihlue i Nyidrë me ipië. E cili, tro hë sa caasi e hnine la ekalesia.—Efe. 4:2, 3. w20.07 4-5 par. 9-11

Hnei Iesu hna wangatrune la itre föe ka xötrethenge nyidrë nge ka “ixatua hnene la itre ewekë i angatr.” (Luka 8:1-3) Hnei Iesu fe hna qaja amamane koi angatr la nyipici göi nyidrë me göne la aja i Akötresie. Hnei nyidrëti hna qaja ka hape, tro nyidrëti a mec nge troa amele nyidrëti hmaca. (Luka 24:5-8) Ketre, hnei Iesu hna canga thuemacanyine la itre föe laka, tro angatr a cile kowe la itre jol. Celë hi aqane hnëkëne nyidrëti ekö la itre aposetolo. (Mar. 9:30-32; 10:32-34) Ame lo kola othi Iesu, hnene la itre aposetolo hna kötr. Ngo ame pe la itre föe ka xötrethenge Iesu, hnei angatr hna ceme nyidrë utihë la nyidrëti a mec hune la sinöe. (Mat. 26:56; Mar. 15:40, 41) Thupene la kola amele Iesu hmaca, hnei nyidrëti hna pane mama kowe la itre föe me upi angatr troa thuemacanyine la itre aposetolo. (Mat. 28:5, 9, 10) Ame ngöne lo Penetekos 33 M.K., hnene la itretre drei Iesu hna tiqa hnei uati hmitrötr, nge hetrenyi fe thei angatr la itre föe. E cili, atreine hë angatre qaja la “itre ewekë nyine haine i Akötresie” ngöne la nyimu qene hlapa.—Itre hu. 1:14; 2:2-4, 11. w20.09 23 par. 11-12

Ame la easa cainöj me inine la itre atr ke, easë hi lai a amele angatr! Nemene la ka anyipicine lai? Öni Iesu ngöne Mataio 28:19, 20: “Inine jë la nöjei atr . . . Bapataiso angatre jë.” Öni Tusi Hmitrötr, nyipiewekë troa xomi bapataiso matre hane mel epine palua. Ame la ka ajane troa xomi bapataiso ke, loi e xecie koi angeic laka, jëne la thupene mel me melehmaca i Iesu, ijije hi tro sa mel epine palua. Hnei Peteru aposetolo hna cinyihan, ka hape: ‘Ame la bapataiso, tre kola amele nyipunie enehila . . . jëne la mele hmaca i Iesu Keriso.’ (1 Pet. 3:21) Celë hi matre, ame la kola bapataisone la ketre atr, tro hë angeic a mel. Maine easa ajane troa inine la itre atr, loi e tro sa maca me “atreine hamë ini.” (2 Tim. 4:1, 2) Pine nemen? Pine laka, hnei Iesu hna upi së troa “inine la nöjei atr.” Ketre, hnei Paulo aposetolo hna ithuecatre koi së troa “qale catre” ngöne la huliwa cili ke, ‘tro hë sa amele së, me itre ka drei së.’ w20.10 14 par. 1-2

Hnei Peteru aposetolo ekö hna nyi ie thatraqane la fami angeic. Ngo hnei angeice fe hna nyi ie ke, ka tru koi angeic la huliwa cili. (Ioane 21:3, 9-15) Ketre, hnei angeic hna inine troa hnime la huliwa ne cainöj. Nge hnei Iehova hna xatua angeic troa maca ngöne la huliwa cili. (Itre hu. 2:14, 41) Easa cainöj pine laka, easa hnimi Iehova. Maine easa mekun laka, tha ijiji së kö troa xome la huliwa cili, tro la ihnimi së koi Akötresie a xatua së. Ame lo Iesu a hë Peteru troa xötrethenge nyidrë, öni nyidrë: “The xou kö.” (Luka 5:8-11) Eje hi, tha hnei Peteru kö hna xou troa xötrethenge Iesu. Hnei angeice pe hna mekun laka, tha ijiji angeice kö troa ce huliwa me nyidrë ke, hnei angeic hna öhn la iamamanyikeu i Iesu lo kola nyi ie. Maine jë, epuni a xouene la itre nyine troa pane kuca matre troa xötrethenge Iesu. Ngo loi e tro epuni a acatrene la ihnimi epun koi Iehova, Iesu me koi itre xan. Tro hë epuni lai a kapa la ihë i Iesu me catre cainöj.—Mat. 22:37, 39; Ioane 14:15. w20.09 3 par. 4-5

Easa madrine troa nue la traem me trengecatre së me itre mo së, matre troa thele la itre atr “ka hmalahnine troa kapa la mele ka pë pun.” (Itre hu. 13:48) Caasi hi la mekune së me Iesu lo nyidrëti a hape: “Ange la troa kuca la aja ne la atre upi ni, me afenesine la huliwa i nyidrë.” (Ioane 4:34; 17:4) Tui Iesu, easa ajane troa afenesine la huliwa hna ahnithe koi së. (Ioane 20:21) Celë hi matre, easa catre cainöj memine la itre trejin, nge aja së tro la itre trejin ka nanazij a bëeke kowe la ekalesia. (Mat. 24:13) Nyipici laka, tha ka hmaloi kö la huliwa hna ahnithe koi së hnei Iesu. Ngo tha easë kö a huliwa caas. Hnei Iesu hna thingehnaean laka, tro nyidrëti a ceme easë. Nge easë fe a “ce huliwa me Akötresie.” (1 Kor. 3:9; 2 Kor. 2:17) E cili, tro sa atreine afenesine la huliwa hna ahnithe koi së. Drei la ketre madrine ka tru troa xatuane la itre xan troa hane sine la huliwa ne cainöj!—Fil. 4:13. w20.11 7 par. 19-20

Ame itre xaa ijin, hetre thangan kowe la itre nekönatr, la itre mekun hna axeciën hnei itre kem me thin. Maine ngazo la aqane axecië mekune i angatr, tro hë lai a hetre ethane kowe la itre nekönatr. Ngo maine tro angatr a axecië mekune hnyawa, tro ha hetre thangane ka loi koi nyudren. Ketre, loi e tro la itre nekönatr a axecië mekune hnyawa. Ame la ka sisitria ngöne la mele së, tre, troa nyihlue i Iehova, Keme së ka tru ihnimin. (Sal. 73:28) Ame la ka nyipiewekë ekö kowe la kem me thine i Iesu, tre, troa xatuane la itre nekö i nyidro troa nyihlue i Iehova. Celë hi lai ka mama ngöne la aqane axecië mekune i nyidro. (Luka 2:40, 41, 52) Hnei Iesu fe hna axecië mekune hnyawa me kuca la aja i Iehova. (Mat. 4:1-10) Ame hë e thupen, ketre atr ka loi nyidrë nge ka mele nyipici koi Akötresie. Drei la madrinene la itre kem me thin ka hnimi Iehova, e tro la itre nekö i angatr a nyitipu Iesu! w20.10 26 par. 1-2

Hanawang la itre hna melën celë. Kola mekune hmaca la itre drai ekö hnene la ketre trejine qatre föe. Ngacama tru la itre jol hnei eahlo hna cile kow enehila, ngo eahlo palahi a catre nyihlue i Iehova. (1 Kor. 15:58) Ame e nöjei drai, eahlo a lapa mekun la fene ka hnyipixe memine la itre sinee hna hnim. Nge ketre trejine föe a mekune hmaca la kola akötrë angeic hnene la ketre Keresiano, ngo angeic a thele troa thëthëhmine la hna kuca. (Kol. 3:13) Ame pena la ketre trejin trahmany, angeic a mekune hmaca la itre tria i angeic ekö, ngo aja i angeic troa catre mele nyipici koi Iehova. (Sal. 51:10) Nemene la hna kuca hnene la köni trejin? Hnei angatre hna mekune hmaca la itre drai ekö ngo tha angatre kö a wangatrune la itre drai cili. Angatre pe a ‘goeëne mekötine’ la itre drai elany. Pine nemene matre ka nyipiewekë? Thatreine kö së troa tro meköt nge easë palahi a xei hutrö. Ketre tune fe, thatreine kö së troa catre nyihlue i Akötresie nge easë palahi a mekun la itre drai ekö.—Luka 9:62. w20.11 24 par. 1-3

Goliatha la ketre sooc ka tru trengecatr. Hnei Goliatha hna wangaconyi Dravita me hnyimasai angeic. Eje hi laka, ka hoea Goliatha, nge ka atreine isi. Ame pena Dravita, ketre thöth angeic ka thatreine palakö isi, matre pëkö jiane isi angeic. Ngacama ka pë pengöne Dravita koi Goliatha, ngo catre kö angeic. Hnei Dravita hna mejiune kowe la mene i Iehova me ngaan la ithupëjia me angeic. (1 Sam. 17:41-45, 50) Hnei Dravita hna cile kowe la ketre jol ka tru, nge maine ju, tro angeic a kucakuca me xou. Hnei angeic hna huliwa nyipici koi Saulo, lo joxu ne Isaraela hna acile hnei Iehova. Ame lo xötrei, hnei Saulo hna metrötrë Dravita. Ngo ame hë e thupen, hnei angeic hna pi tru me zalu koi Dravita. E cili, hnei angeic hna akötrë Dravita, me thele troa humuthi angeic. (1 Sam. 18:6-9, 29; 19:9-11) Ngacama hna qanangazo Dravita, ngo hnei angeic palahi hna metrötrëne la joxu hna acile hnei Iehova. (1 Sam. 24:6) Hnei angeice pe hna sipo trengecatre koi Iehova, matre troa atreine xomihnine lai jol.—Sal. 18:1, texte de présentation du Psaume. w20.07 17 par. 11-13

Hna nyiqaane eatr la hna perofetan, göne la joxu ne kolopi me joxu ne kolojë. Celë hi matre, xecie koi së laka, tro kö ej a eatr asë. Maine aja së troa trotrohnine la hna perofetan ngöne Daniela mekene 11, tha tro kö sa thëthëhmin laka, eje hmekuje hi a qaja la itre mus ka icilekeu memine la nöje i Iehova. Ngacama ala xalaithe hi la itre hlue i Iehova, ngo hna ketri angatre fe hnene la itre jol ka traqa e cailo fen. Pine nemen? Pine laka, aja i Satana memine la fen celë troa ‘ngaan’ maine apatrene la itre hlue i Iehova me Iesu. (Gen. 3:15; Hna ama. 11:7; 12:17) Ketre, loi e troa ihmeku la hna perofetan hnei Daniela memine la itre xaa hna perofetan hnei Tusi Hmitrötr. Maine tro sa ce xome la hna perofetan hnei Daniela memine la itre xan, tro hë sa trotrohnine ej. w20.05 2 par. 1-2

Alanyimu la itre ka mejiune kowe la itre ini ka thoi, göne la melehmaca. Ngo nemene la mekuna i Tusi Hmitrötr? Ame la kola meci la atr, kola hnyiqetr la ngönetrei angeic me ae trootro uti hë paatr. Ngo ijije hi tro la Atre Xup asë a amelene la ketre atr ngöne la ketre ngönetrei ka lolo. (Gen. 1:1; 2:7) Hnei Paulo aposetolo hna qaja la ketre ceitune ka amamane laka, atreine hi Akötresie troa amelene la ketre atr ngöne la ngönetrei ka hnyipixe. Hnei angeic hna qaja la itine feja hna jum, nge ka cia. Tha itine hmaca kö ngo ketre feja. Jëne la ceitune celë, Paulo a amamane laka, ijije hi tro la Atre Xupi së a hamëne “la ngönetrei thenge la aja i Nyidrë.” Ketre, öni Paulo ka hape, “hetre ngönetrei thatraqane la hnengödrai me thatraqane la ihnadro.” Ame la itre ka mel e celë fen, hetrenyi angatr la ngönetrei ne fen ka hetre ijön. Nge ame la itre ka mel e hnengödrai, tre, ngönetrei ne u tune la itre angela.—1 Kor. 15:36-41. w20.12 9-10 par. 7-9

Easë asë hi a ajane troa hetre mele ka loi me mele tingeting. Eje hi, easa akötr ngöne la kola traqa la itre jol nge easa hnehengazo me kucakuca. Celë hi matre ame itre xaa ijin, easa hnying tui Dravita joxu ngöne la topik ne la drai celë. Nyipici laka, thatreine kö tro sa apatrene la itre jol ka traqa, tune la kola elë la thupene mo, maine ngöne la kola upi së hnene la ketre sinee së troa qenatrekënö maine kuci ngazo pena. Ketre, thatreine kö së troa apatrene la iakötrë ngöne la nöje së. Kola traqa la itre jole cili ke, tha trongëne kö la itre atrene fen la itre trepene meköti ne la Tusi Hmitrötr. Ketre, Satana la ka musinëne la fen. Jëne la “itre ewekë hna hnehengazone ngöne la fene celë,” angeic a thele matre tha tro hmaca kö sa nyihlue i Iehova. (Mat. 13:22; 1 Ioane 5:19) Celë hi kepin matre, tru catre la itre jol nge easa kucakuca me hnehengazo. w21.01 2 par. 1, 3

Hnei Ioane aposetolo hna hmekë së qa ngöne la troa methinëne la itre trejin. Maine tha trongëne kö së la eamo cili, tro hë Satana lai a iaö së. (1 Ioane 2:11) Celë hi ka traqa kowe la itre pane Keresiano ekö. Hnei Satana hna thele troa thë la caas e hnine la ekalesia me aciane la imethinë. Ame lo ijine Ioane a cinyihane la itre tusi angeic, hnene la itre xan ka hetrenyi la aqane mekuna i Satana hna lö hnine la ekalesia, tui Dioterefe. Hnei angeic hna thë la caas ne la itre trejin. (3 Ioane 9, 10) Pëkö metrötre i angeic kowe la itre hna upe hnene la lapa ne xomi meköt. Hnei angeice fe hna thele troa upetröneëne la itre trejin ka kapa la itre atr hnei angeic hna methinën. Drei la ketre aqane ujë ka pi tru! Ame fe enehila, Satana a thele troa thë la caas ne la itre trejin me sewe angatr troa itö ixatua. Haawe, tha tro kö sa nue la imethinë troa iananyi së memine la itre trejin. w21.01 11 par. 14

Ame ngöne lo Pane Isi Ka Tru, hnene la musi Alema me musi Agele hna qanangazone la itre hlue i Akötresie ke, tha hnei angatre kö hna hane isi. Hnene fe la musi Etazini hna akalabusine la itre ka elemekene la huliwa ne cainöj. Celë hi lai ka eatrën lo hna perofetan ngöne Hna Amaman 11:7-10. Ame ngöne la itre macatre 1930 hmekune la Hnaaluene Isi Ka Tru, hnene la joxu ne kolopi hna qanangazone la itre hlue i Akötresie. Hnei Hitler me itre sine xöle i angeic hna wathebone la huliwa ne cainöj e Alema. Kola traqa koi itre hadredre lao Temoë Iehova hna humuth nge itre thauzane lao hna umëne ngöne la itre uma ne iaxösisi Nazi. Hnene la joxu ne kolopi hna “angazone la ga hmitöte ka cat” me “apatene la huj’ o drai.” Hnei angeic hna wathebone la itre hlue i Iehova troa atrune la ëje i Nyidrë. (Dan. 11:30b, 31a) Hnei Hitler hna sisinyi ka hape, tro angeic a lep apatrene la itre Temoë Iehova e Alema. w20.05 6 par. 12-13

Ame la easa hnime la itre trejin, easë hi lai a thele tingeting me caasi e hnine la ekalesia. Pane mekune jë lo tulu i Ionathana. Tha hnei Ionathana kö hna zalu koi Dravita ke, hnei Iehova hna ië angeic troa joxu. Ketre, tha hnei Ionathana kö hna goeë Dravita ceitu me ketre ithupëjia. (1 Sam. 20:42) Tro sa nyitipu Ionathana tune kaa? Tha tro kö sa zalu pine la itre trejin. Loi e tro pe sa hetre hni ne ipië me ‘mekune ka hape, sisitria kö itre xane hui’ easë. (Fil. 2:3) Ketre, tha tro kö sa thëthëhmine laka, nyipiewekë asë hi së e hnine la ekalesia. Maine tro sa hetre hni ne ipië, tro hë sa goeëne la ka loi thene la itre trejin me xomi ini qa ngöne la aqane mele nyipici angatr. (1 Kor. 12:21-25) Ame la easa hnime la itre trejin e hnine la ekalesia, easa thele troa caas me tingeting la ekalesia. Easa anyipicine laka, itretre drei Iesu së nge kola thue aja kowe la itre xan troa hane lö ngöne la nyipi hmi. Ngo ame la ka sisitria ke, easa atrunyi Iehova, “Keme ka tru trenge utipin, me Akötresie ne iakeukawany.—2 Kor. 1:3. w21.01 24 par. 14; 25 par. 16

Ame enehila, itre atr a wangaconyi së me hnyimasai së. Ame koi angatr, itre ka kucakuca nge ka tha inamacane kö së. Pine nemen? Pine laka, tha ceitu së kö memine la itre atr ne fen. Easa ajane troa ipië me thiina ka menyik me idrengethenge. Ame ngöne la fene celë, kola wangatrune la itre atr ka pi tru me pi mama me ka icilekeu. Ketre, tha ka kuci politik kö së me hane isi. Pine laka tha ceitu së memine la itre xaa atr ne fen, matre kola wangaconyi së. (Rom. 12:2) Ngacama kola wangaconyi së hnene la itre atr, ngo Iehova a aijijë së troa eatrëne la huliwa i Nyidrë. Nyidrëti a upi së troa cainöj me ujëne la itre itus nyine tro fë e cailo fen asë. Nge jëne la Tusi Hmitrötr, easa xatuane la itre milio lao atr troa mele madrin me mele ka loi. Eje hi, Iehova hi la nyine tro sa atrun. w20.07 15 par. 5-6

Hnei Iesu hna drengethenge Iehova. Ngo tha kolo kö lai a hape, pëkö inamacane i nyidrë. Eje hi, e kola canga trotrohnine hnene la itre atr la itre ini qaathei Iesu ke, hnene laka ka inamacane nyidrë. (Ioane 7:45, 46) Ketre, atre hi Iehova la itre hna atreine kuca hnei Iesu, matre hnei Nyidrëti hna aijijë Iesu troa ce xupe me Nyidrë la nöjei ewekë e cailo fen asë. (Ite Edomë 8:30; Heb. 1:2-4) Ame la kola amele Iesu hmaca, hnei Iehova hna nue Iesu “troa musi hune la nöjei ewekë e hnengödrai me e celë fen.” (Mat. 28:18) Ngacama tru la atreine Iesu, ngo hnei nyidrëti palahi hna mejiune koi Iehova. Pine nemen? Pine laka, tru la ihnimi nyidrëti koi Iehova. Nemene la ini kowe la itre trahmany? Ame la Iehova a upe la itre föe troa metrötrëne la itre trahmany ke, tha hnene kö laka, sisitria kö la trahmanyi hune la föe. Hnei Iehova fe hna iëne la itre föe matre troa ce musi me Iesu. (Gal. 3:26-29) Ketre, hnei Iehova hna hamë hnëqa ka tru koi Iesu. Kolo hi lai a amamane laka, Nyidrëti a mejiune koi Iesu. Ketre tune fe, itre trahmanyi a inamacan ngöne la angatr a hamë hnëqa kowe la itre föe i angatr. w21.02 11 par. 13-14

Hna aceitunëne la Trengewekë i Akötresie memine la ketre ithulu. Ej a amamane la itre engazo së me xatua së troa saze. (Iako. 1:23-25) Maine jë, ame la easa ini tus, easa öhne laka, loi e tro sa atreine xomehnöthe la aliene hni së. Jëne la ixatua i Iehova, easa inine troa thiina ka menyik, me xomehnöth la elëhni. E cili, ijiji së hë troa pane mekun, me axecië mekune hnyawa. (Iako. 3:13) Haawe, nyipiewekë tro sa atre hnyawa la Tusi Hmitrötr! Ame itre xaa ijin, easa tria me xomi ini qa ngöne la itre tria së. Loi e tro pe sa xomi ini qa ngöne la itre tulu ka lolo me ka ngazo. Celë hi kepin matre Iakobo a ithuecatre koi së troa xomi ini qa ngöne la itre tulu ekö, tui Aberahama, Rahaba, Iobu me Elia. (Iako. 2:21-26; 5:10, 11, 17, 18) Ngacama hnei angatre hna cile kowe la itre jol ka tru, ngo tha patre kö la madrine i angatr. Eje hi, jëne la ixatua i Iehova, ijije hi tro sa catre xomihnine la itre jol me mele nyipici koi Nyidrë. w21.02 29-30 par. 12-13

Nyipici laka, hnëqa ne la ka hamë ini troa xatuane la ka ini tusi me angeic, troa trotrohnine la Tusi Hmitrötr. Maine ketre trejin a sipo së troa sine la ini tus, tha tro kö sa thëthëhmine laka, easa ce huliwa me angeic. (Ate cai. 4:9, 10) Tune kaa la aqane tro sa xatuane lai trejin? Loi e troa hnëkë hnyawa. Nyipiewekë tro sa hnyingë pengöne la ka ini tus. Nemene la ini hne së hna troa ce wang? Hetre mekune kö ka tru hnei eö hna ajane troa amamane ngöne la ini tus? Hetre nyine tro kö ni a kuca maine tha kuca pena? Nemene la aqane tro ni a xatuane la ka ini tusi me eö? Loi e tro la trejin ka hamë ini a thupën, matre tha tro kö a qaja atrune palaha la mele ne la atr ka ini tus. Celë hi hna majemine kuca hnei Joy, ketre mesinare. Öni angeic: “Kola aijijëne la trejin ka ce tro me eni troa atrepengöne la ka ini tus. Tro hë angeic a xatuane me ithuecatre kowe la ka ini tus.” w21.03 9 par. 5-6

Ame itre xaa ijin, kola methinë së pine laka, easa trongëne la itre trepene meköti Iehova ka isazikeu memine la itre mekun ne la fene celë. Ame enehila, nyimutre la itre atr ka kuca la itre huliwa ka sis, tune lo itre hna majemin ekö e Sodroma me Gomora, lue traon hna apatrene hnei Iehova. (Iudra 7) Matre, ame la easa trongëne la itre hna qaja hnei Tusi Hmitrötr, kola hnyimasai së me jelengazo së. (1 Pet. 4:3, 4) Nemene la ka troa xatua së troa xomihni ngöne la kola methinë së me iqaqa? Loi e xecie koi së laka, tro kö Iehova a xatua së. Jëne la petr ka tru ne la lapaun, ijije hi tro sa ‘thupë së qa ngöne la itre ewekë hna hna koi së.’ (Efe. 6:16) Eje hi, nyipiewekë tro sa lapaun, ngo loi e tro fe sa ihnim. Pine nemen? Pine laka, “tha ka canga elëhni kö la ihnim,” ngo ka xomihnin me cile hut ngöne la nöjei ewekë asë. (1 Kor. 13:4-7, 13) Ihnimi së koi Iehova, kowe la itre trejin, me kowe la itre ka akötrë së, a xatua së ngöne la kola methinë së. w21.03 20-21 par. 3-4

Ame itre xaa ijin, ihnimi së a sewe së troa kuca la ketre ewekë, tune la troa dreng akötrëne la hna qaja hnene la ketre trejin. Hane hi la ka traqa ngöne la ijine Iesu a cainöje trootro. Hnei Iesu hna qaja kowe la itretre drei nyidrë ka hape, maine angatr a ajane troa mel, loi e tro angatr a pane öni la ngönetrei nyidrë me ije la madra i nyidrë. (Ioane 6:53-57) Alanyimu thei angatr la ka nuetriji nyidrë pine la hnei nyidrëti hna qaja. Ngo hnene la itre sipu sinee i Iesu, hna mele nyipici. Maine jë, hna asesëkötrë angatre fe nge tha trotrohnine kö angatr la aliene la hna qaja hnei Iesu. Ngo tha hnei angatre kö hna luelu me drenge akötrën. Hnei angatre pe hna mejiune koi nyidrë ke, atre hi angatr laka, ka nyipici palahi nyidrë. (Ioane 6:60, 66-69) Eje hi, tha tro kö sa dreng akötrëne la hna qaja hnene la itre trejin! Maine hetre jol ka traqa, loi e tro sa pane nue angatr troa qeje mekun.—Ite Edomë 18:13. w21.01 11 par. 13