Nofeba

Maine jë tro sa mekun ka hape, tha hnei Iona kö hna mele nyipici ekö koi Iehova. Hnei Iehova hna upi angeice troa tro fë la maca ne iameköti koi angetre Nineve. Ngo tha hnei Iona kö hna dreng. Hnei angeice hna ti he me “kötene la xajawa i Iehova.” (Iona 1:1-3) Maine easë ju, tro kö sa nue hmaca koi Iona troa drengethenge la hna amekötine hnei Iehova? Maine jë waea. Ngo tha celë kö aqane ujë i Iehova. Hnei Nyidrëti hmaca hna upi angeic. (Iona 3:1, 2) Kola mama la nyipi pengöi Iona ngöne la angeic a thith. (Iona 2:1, 2, 9) Hnei Iona palahi hna thithi koi Iehova. Jëne la thithi angeic e hnine la ie, easa trotrohnin laka, tha tro kö sa goeë angeic tune la ketre atr ka kötre hnëqa. Ngo kola mama la hni ne ipië i Iona, me hni ne ole, me aja i angeic troa drengethenge Iehova. Celë hi matre, tha hnei Iehova kö hna wangatrune la ngazo hna kuca hnei Iona. Hnei Nyidrëti pe hna sa la thithi angeic me upi angeic hmaca troa perofeta! Eje hi, tha tro kö la itre qatre thup a canga hamë eamo nge “tha pane ate” kö la itre ewekë! w20.04 15 par. 4-6

Hnene la itre pane Keresiano hna kapa la itre ini me sipo uati hmitrötr matre trotrohnine la itre trengewekë i Akötresie. Hnei angatr hna ithel matre wang laka, hna nyitrepene la itre ini cili hnene la itre hna Cinyihan. (Itre hu. 17:11, 12; Heb. 5:14) Eje hi, tha hna nyitrepene kö la lapaune i angatr hnene la ihnimine la nöje i Akötresie. Nge tha angatre kö a nyihlue i Iehova ke, ka lolo la aqane imelekeu i angatr memine la itre trejin. Angatre pe a nyitrepene la lapaune i angatr hnene la “atrehmekunyi Akötresie.” (Kol. 1:9, 10) Tha ka saze kö la nyipici qa hnine la Tusi Hmitrötr. (Sal. 119:160) Ngacama akötrë së ju hë maine tupathi së, maine pena kola tria hnene la ketre trejin, ngo tha saze kö la nyipici. Haawe, loi e tro sa atrepengöne hnyawa la itre ini qa hnine la Tusi Hmitrötr. Nge loi e troa xecie koi së laka, ka nyipici itre ej. Maine ka catr la lapaune së, tro hë sa cile catr ngöne la itupath, tune la aqane cile catr la he hnene la iuhni ngöne la kola wene. w20.07 9 par. 6-7

Ame la itre hne së hna kuca kowe la itre trejin hna iën, easë fe hi lai a kuca koi Iesu. (Mat. 25:34-40) Ame la pane aqane tro sa sajuëne la itre hna iën, tre, troa catre cainöj, tune lo hna ahnithe hnei Iesu. (Mat. 28:19, 20) Jëne la ixatua ne la “itre xa mamoe,” itre trejin me Iesu a eatrën la huliwa ka tru cili e cailo fen. (Ioane 10:16) Maine easa catre cainöjëne la maca ka loi memine la itre xaa mamoe, easë fe hi lai a amamane la ihnimi së koi Iesu me kowe la itre trejin me nyidrë. Easë fe a thele troa ce sinee me Iehova me Iesu, ngöne la easa kuië ahnahna. Easa amamane la aja së troa sajuëne la huliwa i nyidro. (Luka 16:9) Ijije hi tro sa kuië ahnahna thatraqane la huliwa i Iehova e cailo fen, tune la troa xatuane la itre trejin hna lepe hnei hulö. Ame fe e hnine la ekalesia, easa kuië ahnahna matre troa nyithupene la itre ejolen, nge thatraqane la itre trejin ka aja ixatua.—Ite Edomë 19:17. w20.04 24 par. 12-13

Hna perofetan hë ekö ka hape, tha tro kö la joxu ne kolopi a ‘mekune la Akötresi ne la itre keme i angeic.’ Pine nemen? Hnene la musi URSS hna thele troa thapa la musi ne la hmi me apatrene ej. Celë hi matre, ame lo 1918, hnei angeic hna upe la itre uma ne ini troa inine ka hape, pëkö Akötresie. Nemene la aliene la hna hape, tro la joxu ne kolopi a “metötëne la haze ne hunapo”? Hnene la musi URSS hna kuiëne la trenge manie ka tru, matre troa eköthe la ketre trongene isi ka catr me kuca la itre jiane isi ka tru, tune la itre boob ka tru. Eje hi, hetrenyi thene la joxu ne kolopi me joxu ne kolojë, la itre jiane isi ka catr matre troa humuthe la itre miliar lao atr! Hnene la joxu ne kolopi me joxu ne kolojë hna ce huliwa, matre troa “acile la ewekë ka sisi ate angazon,” ene la Organisation des Nations unies (ONU).—Dan. 11:31. w20.05 6-7 par. 16-17

Drei la ka ijij troa thele la itre trejin ka nanazij? Ijiji easë asë hi troa ixatua, ene la itre qatre thup, itre pionie, itre ka hetre sinee ka nanazij me itre xaa trejin. Hapeu, hetre sinee i epuni kö ka nanazij? Ame la epuni a cainöj ngöne la itre hnalapa trootro maine ngöne la gaa tru atr, hnei epuni kö hna ithanata memine la ketre trejin ka nanazij? Maine hnei angeic hna hamën la itre ithuemacanyi göi angeic, loi e tro sa sipo angeic troa hamën kowe la itre qatre thup. Öni Thomas, ketre qatre thup: “Ame itre xaa ijin, eni a hnyingëne kowe la itre xaa trejin la hnalapa ne la itre trejin ka nanazij. Maine pena, eni a hnyingë pengöne la itre ka tha hane hmaca kö sine la itre icasikeu. Ame la eni a wange la itre trejin ka nanazij, eni a hnyingë pengöne la itre nekönatr me itre xaa sinee i angatr. Ame la itre xaa nekö i angatr ke, ka hane sine ekö la itre icasikeu me cainöj. Ijije hi troa xatua nyudren troa bëeke hmaca koi Iehova.” w20.06 24 par. 1; 25 par. 6-7

Isapengöne kö la itre öni memine la itre atr. Ame la itre atr, atreine hi angatre xomi ini qa ngöne la itre ewekë ka traqa ekö, pine laka mekune palahi angatre itre ej nge atreine hi angatre waiewekë qa ngön. Celë hi ka aijijë angatr troa inine la itre trepene meköt ka lolo, me saze aqane mekun me aqane ujë. (1 Kor. 6:9-11; Kol. 3:9, 10) Eje hi, ijije hi tro sa inine la mekuthetheu së troa wangatrehmekune la loi qa ngöne la ngazo. (Heb. 5:14) Ketre, ijije hi tro sa inine troa ihnim, me utipin, me inualoinekeun me thiina ka meköt. Nemene la aqane tro sa amamane la hni ne ole së koi Iehova göne la ahnahna, ene la troa atreine hnehene la itre ithuemacany? Loi e tro sa mekune hmaca la nöjei aqane xatua së me akeukawanyi së hnei Iehova. Celë hi ka troa acatrene la mejiune së laka, tro palahi Nyidrëti a xatua së elany. (Sal. 77:12; 78:4, 7) Loi e tro fe sa mekune hmaca la nöjei ewekë ka lolo hnei itre xan hna kuca koi së, me amamane la hni ne ole së koi angatr. Önine la itre ka ithel ka hape, madrine catre kö la itre ka amamane la hni ne ole i angatr. w20.05 23 par. 12-13

Pane mekune jë la Mose a zae fene la git, nge kola mama la elolo i Iehova qëmeke i angeic. Önine la itus, Étude perspicace des Écritures ka hape, “Mose caasi hi nge pë ju kö ketre atr ka melëne la iamamanyikeu cili uti hë la traqa Iesu Keriso e celë fen.” Hnei Mose hna drenge la ketre angela a qaja, ka hape: “Iehova, Iehova Akötesie, ate utipine me ka ihnim, ate xomi hni ahoean, nge ka tru loi me nyipici, ate thupëne la ihnimi thatraqane la nöjei thauzan, me nue tije la menu, me hna shashaith, me ngazo.” (Eso. 33:17-23; 34:5-7) Maine jë, kola mama la iamamanyikeu celë koi Mose, ngöne la nöjei ijine angeic a qaja la ëje i “Iehova.” Tha sesëkötre kö së laka, hnei Mose hna upi angetre Isaraela troa kuca la hna qaja ngöne la topik enehila. Loi e tro la ëj “Iehova” a amekunë së la Atre xom la ëje cili. Loi e tro sa lapa mekun la itre thiina ka lolo i Akötresie, tune la mene i Nyidrë, me inamacan me meköt me ihnim. Tro hë së lai a atrunyi Nyidrë.—Sal. 77:11-15. w20.06 8-9 par. 3-4

Öni Iesu ka hape, troa wangatrehmekune la itretre drei nyidrë hnene la ihnimi angatr. (Ioane 13:34, 35) Ngo maine easa ajane troa acatrene la lapaune së, tha tro hi sa haine la ihnimine la itre hlue i Akötresie. Tha tro hi a nyitrepene la lapaune së hnene la ihnimine la itre trejin. Pine nemen? Pane mekune jë laka, kola tria hnene la ketre trejin, ketre qatre thup maine ketre pionie. Maine pena, kola akötrë epun hnene la ketre trejin. Maine pena, kola nyiqane iamenumenu hnene la ketre atr me qaja ka hape, tha easë kö ngöne la nyipici. Hapeu, tro kö sa trotrije la nyipici? Maine tro sa nyitrepene la lapaune së hnene la aqane ujë ne la itre xan, ngo tha hnene pe la aqane imelekeu së me Iehova, tha tro hë sa cile hut ngöne la nyipici. Tro ha canga nanazije la lapaune së. Eje hi, ihnim la ka acatrene la lapaune së. Ngo nyipiewekë fe tro sa kapa la itre ini ka nyipici me meköt, matre xecie koi së laka, easë ngöne la nyipici. Loi e tro sa “isa tupathe” la Tusi Hmitrötr laka, eje hi a qatreng la nyipici göi Iehova.—Rom. 12:2. w20.07 8 par. 2-3

Nyimutre la itre tulu ka amamane la ixatua ne la itre angela. Angatr a xatua së troa öhne la itre trejin ka nanazij, ka ajane troa bëeke koi Iehova. (Hna ama. 14:6) Celë hi hna melën hnei Silvio, ketre trejin ka nanazij qa Équateur. Hnei angeic hna thithi iele koi Iehova troa xatua angeic troa bëeke koi Nyidrë. Ame ngöne la angeic a thith, kola fenafena la qëhnelö. Lue qatre thup a traqa troa wai angeic. Madrine catre nyidro troa xatua angeic. Nyimutre la itre eloin hne së hna kapa ngöne la easa xatuane la itre trejin ka nanazij troa bëeke koi Iehova. Hane hi la hna qaja hnei Salvador, ketre pionie ka majemine xatuane la itre trejin ka nanazij. Öni angeic: “Ame itre xaa ijin, eni a treije madrin ke, hnei Iehova thapa la ketre mamoe i Nyidrë qa ngöne la fene i Satana. Nge hna aijijë ni troa ce huliwa me Nyidrë.” Ngacama ka nanazije së, ngo Iehova palahi a hnimi së. Aja i Iehova tro sa bëeke koi Nyidrë. Ngo hetre nyine tro sa kuca. Ame pe, xecie koi së laka, ceitui Iehova memine lo kem ngöne la ceitune i Iesu. Nyidrëti a mejiune laka, tro hmaca sa bëeke koi Nyidrë, nge tro kö Nyidrëti a kepe së! w20.06 29 par. 16-18

Iehova la “Atre Ini Ka Tru,” nge Nyidrëti a ini së jëne la itre tulu ka loi me ka ngazo e hnine la Tusi Hmitrötr. (Is. 30:21) Loi e tro sa lapa mekun la tulu ne la itre hlue i Iehova ka amamane la itre thiina ka lolo, tune la ipië. Ketre, hetre ini hne së hna troa xom qa ngöne la aqane ujë ka ngazo hnei itre xan. (Sal. 37:37; 1 Kor. 10:11) Tro sa ce wang la ka traqa koi Saulo joxu. Ka hni ne ipië angeic ngöne lo angeic a thöth. Atre hi angeic laka, hetre ifego i angeic, nge xou angeic troa hane xomi hnëqa. (1 Sam. 9:21; 10:20-22) Ngo thupene la hna acili Saulo troa joxu, hnei angeic hna pi tru. Ame la ketre ijin, tha hnei angeice kö hna xomihni aqeany me treqe Samuela perofeta. Ketre, tha hnei angeice kö hna mejiun laka, tro Iehova a thupëne la nöje i Nyidrë. Hnei Saulo hna tro fë la ketre huuj, ngo tha hnëqa i angeice pe. E cili, hnei Iehova hna nuetriji angeic me thapa la mus qaathei angeic. (1 Sam. 13:8-14) Eje hi, tha tro kö sa pi tru. Loi e tro pe sa inamacan me xomi ini qa ngöne la aqane ujë ka ngazo i Saulo. w20.08 10 par. 10-11

Nyipici laka, hnei Iehova hna hamë së la “itre ahnahna” jëne Keriso. (Efe. 4:8) Kola qaja la itre atrene la Lapa Ne Xomi Meköt me itre ka xatua angatr, me itre atrene la filial, me itre atre thupë sirkoskripsio, me itre ka hamë ini, me itre qatre thup me itre atre ixatua. Hnei Iehova hna ië angatr hnene la uati hmitrötr, matre troa thupëne la itre mamoe i Nyidrë me xatuane la ekalesia. (1 Pet. 5:2, 3) Isapengöne kö la hnëqa ne la itre trejin trahmanyi e hnine la ekalesia. Tune la enyipiewekëne la itre wanakoime me waca, ka nyipiewekë fe la huliwa hna kuca hnene la itre trejin hna acil. Tha angatre kö a thele troa atrunyi angatr. Angatre pe a ajane troa ithuecatre me acatrene la lapaunene la itre trejin. (1 Thes. 2:6-8) Easa olene koi Iehova ke, hnei Nyidrëti hna hamë së la itre trejin ka catre lapaun me ihnim! w20.08 21 par. 5-6

Ame la ketre kepin matre easa catre cainöj ke, ‘ceitune la itre atr me itre mamoe ka pë atre thupën,’ nge nyipiewekë tro angatr a atre la nyipici göne la Baselaia. (Mat. 9:36) Iehova a ajane tro la nöjei atr a atre la nyipici matre mel. (1 Tim. 2:4) Maine tro sa lapa mekun laka, huliwa ne iamele la huliwa ne cainöj, tro hë sa wangatrune la huliwa cili. Eje hi, easa amelene la itre atr. (Roma 10:13-15; 1 Tim. 4:16) Ketre, nyipiewekë tro sa hetrenyi la itre jiane huliwa, me atreine huliwan. Hnei Iesu hna amamane kowe la itretre drei nyidrë la aqane troa kuca. Hnei nyidrëti hna qaja koi angatr la nyine troa xom, me hnë troa cainöj, me nyine troa qaja. (Mat. 10:5-7; Luka 10:1-11) Ame enehila, nyimutre la itre jiane huliwa hna hnëkëne hnene la organizasio i Iehova, tune la itre itus me video. Kolo fe a ini së la aqane troa huliwane itre ej, me xatua së troa maca ngöne la hna cainöj.—2 Tim. 2:15. w20.09 4 par. 6-7, 10

Pane mekune jë la madrine i Ioane aposetolo. Angeic a dreng laka, kola catre nyihlue i Iehova hnene la itre hnei angeic hna cainöje kow. Ioane a xome ceitu angatr me itre nekö i angeic ngöne la u. Nge hnei Ioane hna catre xatua angatr troa acatrene la lapaune i angatr ke, nyimutre la itre jol hnei angatr hna cile kow. Tui Ioane, easa madrin ngöne la itre nekö së me itre ka ini tus a nue la mele i angatr koi Iehova me nyihlue i Nyidrë. (3 Ioane 3) Ame lo 98 M.K., hnene la uati hmitrötre i Iehova hna upi Ioane troa cinyihane la köni tus. Itre ej a xatuane la itre Keresiano troa acatrene la lapaune i angatr koi Iesu me catre melëne la nyipici. Ioane a xouene troa ajojezine la itre ekalesia hnene la itre atr ka hamë ini ka thoi. (1 Ioane 2:18, 19, 26) Itre ka iamenumenu a qaja ka hape, atre Akötresieti hi hnei angatr, ngo tha trongëne pe angatr la itre hna amekötin hnei Nyidrë. w20.07 20 par. 1-3

Nemene la aqane tro la lapaun a xatua së, matre tha tro kö sa sawa la iwanakoime së? Ame la hnapan, easa lapaune kowe la maca hne së hna cainöjën, nge easa ajane troa tro fë koi nöjei atr. Easa mejiune kowe la itre hna thingehnaean e hnine la Tusi Hmitrötr. (Sal. 119:42; Is. 40:8) Ame enehila, kola eatre la itre hna perofetan me saze la mele ne la itre ka trongëne la hna qaja hnei Tusi Hmitrötr. Celë hi kepin, matre nyipiewekë tro la itre atr a atre la maca ne la Baselaia. Ame la hnaaluen, easa lapaune koi Iehova, atrekë ewekëne la maca, me koi Iesu, joxu hna acile hnei Iehova. Celë hi matre, easa mejiun laka, ngacama kola traqa la itre jol, ngo tro palahi Iehova a thupë së me thue trengecatre së. (Sal. 46:1-3) Ketre, xecie hnyawa koi së laka, jëne la men me musi qaathei Iehova, Iesu a elemekene la huliwa ne cainöj qa hnengödrai. (Mat. 28:18-20) Ame la atr ka lapaun ke, xecie koi angeic laka, tro kö Iehova a amanathithin la itre trengecatre i angeic. w20.09 12 par. 15-17

Ame itre xaa ijin, loi e tro sa cilëgöline la itre trejine föe. (Is. 1:17) Maine jë, tro sa xatuane la itre trejine föe hna mecitrij maine ka seihnacil, troa kuca la itre xaa ewekë hna kuca ekö hnene la itre föi angatr. Maine pena tro sa ce tro memine la ketre trejine föe ka qatre hë koi droketre. Ijije fe tro sa cilëgöline la ketre pionie ka hetre hnëqa ngöne la organizasio. Maine jë, kola qaja angazo angeic pine laka, tha ijiji angeice kö troa catre cainöj tune la itre xaa pionie. Tro sa ce wang la hna kuca hnei Iesu. Hnei Iesu hna cilëgöline la itre trejine föe ngöne la kola qaja angazo angatr. Hnei nyidrëti hna cilëgöli Maria ngöne la kola wesitr hnei Maretha. (Luka 10:38-42) Hnei Iesu hmaca hna cilëgöli Maria ngöne la kola upezö angeic hnei itre xan. (Mar. 14:3-9) Nge hnei nyidrëti hna qaja aloinyi Maria. Hnei nyidrëti fe hna qaja ka hape, troa atre la hna kuca hnei Maria ngöne “la itre götran ne la fen hna troa cainöjëne la maca ka loi.” w20.09 24 par. 15-16

Atre hnyawa hi la atre thupë mamoe laka, ijije hi troa paatr la ketre mamoe. Ngo tha hnei angeice kö hna qanangazon ej. Tro sa ce wang la aqane xatuane Akötresie la itre xaa hlue i Nyidrëti ekö ka iananyi me Nyidrë. Hnei Iona ekö hna kötrene la hnëqa i angeic qaathei Iehova. Ngo tha hnei Nyidrëti kö hna nuetriji angeic. Tune la atre thupë mamoe, hnei Iehova hna xatua angeic me hamë angeic la trengecatr ka ijij matre eatrëne la hnëqa i angeic. (Iona 2:7; 3:1, 2) Thupene lai, hnei Nyidrëti hna aciane la ketre feja matre xatua Iona troa trotrohnine laka, ka sisitria la mele ne la atr. (Iona 4:10, 11) Nemene la ini? Loi e tro palahi la itre qatre thup a xatuane la itre ka nanazij. Loi e tro angatr a thele la itre kepin matre kola nanazij la itre xaa trejin. Nge maine kola bëeke koi Iehova hnene la ketre, loi e tro palahi la itre qatre thup a xatuan me hnimi angeic. w20.06 20-21 par. 10-12

Thupene la kola patre la musi URSS lo 1991, hna “nango xatuane” la nöje i Akötresie, nge tingetinge la mele i angatr. Pëhë ewekë ka ajolë angatr troa cainöj, nge kola kökötre la etrune la itre trejin ka cainöj ngöne la itre nöje ka lapa fene la musi URSS ekö. Thupene la itre macatre, Russie me itre nöj ka sajuën ej la ka nyihatrene la joxu ne kolopi. Ame la musi ka troa nyihatrene la joxu ne kolopi me joxu ne kolojë, tre, loi e troa mama la köni ewekë celë: (1) hetre thangane ngöne la mele ne la itre hlue i Akötresie, (2) troa icilekeu me Iehova me nöje i Nyidrë, nge (3) troa icilekeu memine la ketre joxu. Musi Russie me itre sine xölene ej a icilekeu memine la itre hlue i Akötresie. Angatr a qanangazone la itre trejin me easë me wathebone la huliwa ne cainöj. Mama hnyawa hi laka, angatr a methinë Iehova me nöje i Nyidrë. Ketre, angatr a icilekeu memine la joxu ne kolojë, ene la Musi Agele me Amerika. w20.05 12-13 par. 3-4

Maine easa ajane troa xatuane la itre atr troa xötrethenge Iesu, loi e tro sa pane maca troa hamë ini. Easa inine la itre nyipici qa hnine la Tusi Hmitrötr kowe la itre milio lao atr e cailo fen. Eje hi, ka tru koi së la itre nyipici qa hnine la Tusi Hmitrötr. Celë hi matre, easa ajane troa qaja asë la itre hne së hna atre. Ngo ame la easa ini tus memine la ketre atr, loi e tro sa xomihni troa ithanata atrun, tune la itre ka iujine la Ita Ne Thup maine Ini Tusi Hmitrötr Ne La Ekalesia. Loi e troa huliwane la Tusi Hmitrötr me qaja la ka ijij göne la ketre xötr maine tane mekun pena. (Ioane 16:12) Ketre, loi e troa qaja la eisapengönene la itre hne së hna atre ekö qëmekene tro sa xomi bapataiso me enehila. Ame lo easa xötrei xomi bapataiso, maine jë trotrohnine hi së la itre ini ka tru. (Heb. 6:1) Thupene la itre macatre, hne së hna xome la itre xaa ini qa hnine la Tusi Hmitrötr. Celë hi matre, tha tro kö sa aca tro qaja la itre ini cili kowe la hnainin. w20.10 14-15 par. 2-4

Hnei Iehova hna iëne hnyawa la kem me thine i Iesu. (Mat. 1:18-23; Luka 1:26-38) Jëne la hnei Maria hna qaja, kola mama la etrune la ihnimi eahlo koi Iehova me kowe la Trengewekë i Nyidrë. (Luka 1:46-55) Nge jëne la aqane drengethenge Iehova hnei Iosefa, kola mama la xou me aja i Iosefa troa amadrinë Iehova. (Mat. 1:24) Tha hnei Iehova kö hna iëne troa hetru Iesu hnene la ketre kem me thine ka trenamo. Celë hi lai ka mama ngöne la huuj hna tro fë hnei Iosefa me Maria ngöne lo kola hnaho Iesu. (Luka 2:24) Ame Iosefa ke, ka tratrau sinöe angeic e Nazareta, nge maine jë, hetre sine uma i nyidrë hnë tratrau sinöe. Eje hi, hmaloi la mele i nyidro, ngacama sevene lao nekö i nyidro. (Mat. 13:55, 56) Nyipici laka, hnei Iehova hna thupën la mele i Iesu. Ngo tha hnei Nyidrëti kö hna apatren asë la itre jole i Iesu. (Mat. 2:13-15) Ame la itre xaa atrene la fami Iesu ke, tha ka mejiune kö angatr koi nyidrë. Hace catre koi Iesu ngöne lo xötrei ke, tha hnei angatre kö hna kepe nyidrë tune la Mesia. (Mar. 3:21; Ioane 7:5) Ketre, hace me hleuhleu la mele i Iesu, ke hna meci hnei Iosefa ngacama nekötrahmanyi palakö nyidrë. w20.10 26-27 par. 4-6

Hapeu, hnei epuni kö hna cile kowe la ketre jol nge pëkö ka xatua epun? Alanyimu la itre hlue i Akötresie ka hane melëne la jole cili. (1 Ite jo. 19:14) Maine tro fe a hane traqa koi epuni la jole cili, mekune jë la hna qaja hnei Iehova ka hape: “Tha tro jë kö ni a triji eö, nge tha tro jë kö ni a nuaxöji eö.” Celë hi matre, ijije tro sa qaja ka hape: “Iehova la ixatuang, tha tro kö ni a xou.” (Heb. 13:5, 6) Hnei Paulo aposetolo hna cinyihane la itre trengewekë celë kowe la itre Keresiano ne Iudra lo 61 M.K. Celë hi hna qaja ngöne Salamo 118:5-7. Tune la atre cinyihane la Salamo, hnei Iehova hna anyimua xatua Paulo, matre xecie koi angeic laka, tro palahi Nyidrëti a ceme angeic. Lue macatre qëmekene tro Paulo a cinyanyi koi angetre Heberu, hnei angeic hna cile kowe la ketre jol e kuhu hnagejë. (Itre hu. 27:4, 15, 20) Eje hi, hnei Iehova palahi hna xatua angeic. w20.11 12 par. 1-2

Pine nemene matre tha tro kö sa qaja lapane ka hape, ka loi la mele së ekö? Pine laka, ame la easa lapa mekun la itre drai hnapan, easa mekun la itre ewekë ka loi me wangacone la itre jol ka traqa ekö. Hanawang la hna melën hnei angetre Isaraela. Thupene la hna fek qa Aigupito, hnei angatr hna canga thëthëhmine la aqane akötrë angatr. Nemene la hnei angatr hna lapa mekun? Öni angatr: “Eësha mekune la ite ie hne shë hna öni gufa e Aigupito; ite kokuma, me ite wanathim, me ite liki, me ite salat, me ite galika.” (Num. 11:5) Ngo hapeu, ka “gufa” kö la itre xen cili? Waea. Hna thahluë angatr me qanangazo angatr hnei angetre Aigupito! (Eso. 1:13, 14; 3:6-9) Ame e thupen, thëthëhmine hë angatr la itre jole cili nge hnei angatre hmaca hna piin la mele i angatr ekö. Hnei angatr hna wangatrune la itre drai ekö nge tha öhne hë angatr la hnei Iehova hna kuca koi angatr. E cili, tha madrine hë Iehova.—Num. 11:10. w20.11 25 par. 5-6

Ame itre xaa ijin, easa qaja ka hape, xoxopatre hi la mel nge “atraqate la gomegom.” (Iobu 14:1) Matre easa kucakuca me akötr. Celë fe hi la ka traqa ekö kowe la itre hlue i Iehova. Ame itre xan, angatr a ajane troa mec. (1 Ite jo. 19:2-4; Iobu 3:1-3, 11; 7:15, 16) Ngo hnei Iehova Akötresie hna ithuecatre koi angatr me aegöcatrenyi angatr. Eje hi, hna cinyihane lai e hnine la Tusi Hmitrötr, matre troa akeukawane la hni së me hamë ini koi së. (Rom. 15:4) Hanawang la tulu i Iosefa, nekö i Iakobo. Nyimenyime la aqane traqa la itre jol koi angeic. Iosefa la nekö hnimina ne la keme i angeic, ngo angeice hë a huliwa e Aigupito kowe la ketre atr ka thatre Iehova. (Gen. 37:3, 4, 21-28; 39:1) Thupene lai, hnene la föe i Potifara hna upezö angeic ka hape, hnei angeic hna thele troa angazo eahlo. Tha hnei Potifara kö hna pane thele la nyipici. Hnei nyidrëti hna othi Iosefa me akalabusi angeic. (Gen. 39:14-20; Sal. 105:17, 18) Pane mekune jë la akötr ka eje thei Iosefa! w20.12 16-17 par. 1-4

Hnei Iesu hna qaja ka hape, ketre ewekë lai ka sisitria nyine tro sa sipone ngöne la thith. Nemene la aliene la hnaewekë celë? Ame la easa ahmitrötrëne la ketre ewekë, easa thel matre tro ej a porop me wië. Maine jë tro itre xan a hnying ka hape, “Tha ka hmitrötre hë me wië la ëje i Akötresie?” Qëmekene troa sa la hnying, loi e tro sa pane atre la aliene la ëje celë. Ame la ëj, tre, tha ene hmekuje kö la troa qaja maine cinyanyine la itre mataitus. Öni Tusi Hmitrötr: “Loi e troa ajane la hlemu loi hune la ite mo ka nyimute.” (Ite Edomë 22:1; Ate cai. 7:1) Pine nemene matre ka nyipiewekë la ëj? Pine laka, ka ce tro memine la aqane hlemu ne la atr ka xome la ëje cili, ene la aqane goeë angeic hnei itre xan. Eje hi, sisitria catre kö la aqane goeëne la ketre atr hnei itre xan, hune la aqane troa qaja maine cinyanyine la ëje i angeic. Ame la itre atr a silitrengathoi Iehova, angatre hi lai a qaja angazon me adrone la ëje i Nyidrë. w20.06 3 par. 5-7

Ame la kola traqa itrai la itre jol, easa kucakuca me hnehengazo. Maine jë tro sa hnehengazo göi manie, maine xoue troa wezipo, maine upi së pena qa ngöne la hna huliwa. Maine pena, easa xou troa tha drei Akötresie ngöne la itupath. Ketre, atre hi së laka, easenyi hë tro Satana a upe la itre sine xöle i angeic troa lep la nöje i Akötresie. E cili, tro sa xou e thatre kö së la nyine troa kuca ngöne la ijine cili. Maine jë easa isa hnying ka hape: ‘Hapeu, ka ngazo kö troa hnehengazone la itre ewekë cili?’ Öni Iesu kowe la itretre dreng: ‘Ea loi ju hë hna hnehengazo.’ (Mat. 6:25) Hapeu, Iesu kö a qaja ka hape, tha tro kö sa hnehengazo? Waea. Hnene la itre xaa hlue i nyidrëti ekö hna hane hnehengazo, ngo tha hnei Iehova kö hna nuetriji angatr. (1 Ite jo. 19:4) Iesu e celë a akeukawane la itre hni së, matre tha tro kö sa nue la huliwa i Iehova pine la itre jol. w21.01 3 par. 4-5

Nyipiewekë koi Iehova me Iesu la aqane thupëne la trahmany, la hnepe lapa i angeic. (1 Pet. 3:7) Iehova la ketre he ne fami, matre Nyidrëti hmekuje hi la ka ijij troa acile la itre wathebo kowe la itre nekö i Nyidrë, e koho hnengödrai me e celë fen, me upi angatr troa trongën. (Is. 33:22) Ketre tune fe, Iesu la he ne la ekalesia, matre meköti tro nyidrëti a acili wathebo me upe la itre trejin troa trongëne itre ej. (Gal. 6:2; Kol. 1:18-20) Tui Iehova me Iesu, hnëqa ne la trejine trahmanyi troa axecië mekun thatraqane la föe me itre nekönatr. (Rom. 7:2; Efe. 6:4) Ngo ka hetre ifegone hi la musi angeic. Eje hi, loi e tro angeic a axecië mekun thenge la itre trepene meköti qa hnine la Tusi Hmitrötr. (Ite Edomë 3:5, 6) Angeic a acili wathebo thatraqane hmekuje hi la itre atrene la fami angeic, ngo tha koi itre xane kö. (Rom. 14:4) Ketre, ame la kola tru la itre nekönatr nge nyudreni a tro qa kuhu hnalapa, tha nyudreni hmaca kö fene la musi ne la keme i nyudren. Ame pe, loi e tro palahi nyudreni a metrötrëne la kem.—Mat. 19:5. w21.02 2-3 par. 3-5

Ame la trahmany ke, angeice la he ne la hnepe lapa. Angeic a amamane la ihnimi angeic kowe la fami me hamë angatr la ka ijij ngöne la götrane la ngönetrei. Ngo loi e tro angeic a mekun laka, tha celë kö ka troa acatrene la aqane imelekeu i angatr me Iehova. (Mat. 5:3) Ame lo Iesu hune la sinöe, hnei nyidrëti hna sipo Ioane troa thupë Maria, thine i nyidrë. (Ioane 19:26, 27) Ame la itre trejin trahmany ka hetre fami ke, nyimutre la itre hnëqa i angatr. Loi e tro angatr a amamai tulu ngöne la hna huliwa matre atrunyi Iehova. (Efe. 6:5, 6; Tito 2:9, 10) Nge maine hetre hnëqa i angatr e hnine la ekalesia, loi e tro angatr a xomi ijine troa ithuecatre kowe la itre trejin me catre cainöj. Ketre, nyipiewekë tro angatr a ini tus memine la föe i angatr me itre nekö i angatr. Tro hë angatr a madrine la hna kuca hnei kem matre troa thupë angatr.—Efe. 5:28, 29; 6:4. w21.01 12 par. 15, 17

Tusi Hmitrötr a qaja göne la föe ka loi thiina ka hape, angeic a nyidrawane la hnalapa me itö hnepadro me salemë xen. (Ite Edomë 31:15, 16, 18) Eje hi, ame la itre föe, tha itre hlue kö angatr, matre ijiji angatre fe troa hane qeje mekun. Nge loi e tro la itre trahmany a mejiune kowe la itre föe i angatr me drenge la mekuna i angatr. (Ite Edomë 31:11, 26) Maine tro la trahmanyi a wangatrune la föe i angeic, tro ha hmaloi kowe la föe troa metrötrë angeic. Ngacama nyimutre la itre ewekë hna kuca hnei Iesu, ngo tha hnei nyidrëti kö hna mekun laka, kola thaipië nyidrë e tro nyidrëti a drengethenge Iehova. (1 Kor. 15:28; Fil. 2:5, 6) Ketre tune fe, kola nyitipu Iesu hnene la föe ka loi thiina. Tha angeice kö a mekun laka, kola thaipië angeic e tro angeic a metrötrën la föi angeic. Angeice pe a sajuën me hnime la föi angeic ke, tru la ihnimi angeic koi Iehova. Ame pe, tha tro kö la angeic a kuca la ketre ewekë ka isazikeu memine la hna qaja hnei Tusi Hmitrötr, ngacama kola iele angeic hnene la föi angeic. w21.02 11 par. 14-15; 12 par. 19

Hnene la ihnimi së koi Iehova, matre atreine së troa xomihni me cile catr ngöne la icilekeu. Celë hi hna melën hnene la itre aposetolo, ngöne la kola wathebone la huliwa ne cainöj, hnene la hnaakotr ka tru i angetre Iudra. Tru la ihnimi angatr koi Iehova, matre hnei angatr hna “drengethenge Akötresie hune la atr.” (Itre hu. 5:29; 1 Ioane 5:3) Ame fe enehila, hnene la ihnimi ne la itre trejin hna hamë trengecatre i angatr, matre troa xomihni ngöne la kola icilekeu me qanangazo angatr hnene la itre mus. Eje hi, tha angatre kö a xou. Angatre pe a madrin ngöne la kola methinë angatr hnene la fene celë. (Itre hu. 5:41; Rom. 5:4, 5) Eje hi, hace catre koi së ngöne la kola icilekeu hnene la sipu fami së. Ame lo easa nyiqane ini tus, maine jë hnei angatr hna mekun laka, hna iaö së, nge angatre fe a jele hmo së. (Wange ju fe la Mareko 3:21.) Maine pena, angatr a elëhni koi së. Ngo tha tro kö sa sesëkötr. Öni Iesu: “Ame la ithupëjia memine la atr, tre, cili kö ngöne la hnepe lapa i angeic.”—Mat. 10:36. w21.03 21 par. 6-7

Ame la easa sine la ketre ini tus, loi e tro sa drenge la hna qaja hnene la trejin ka hamë ini memine la ka ini tus. E cili, tro hë sa atre la ijine troa hane qeje mekun. Ngo loi e tro sa atreine waiewekë hnyawa, matre tha tro kö a isazikeu la itre mekuna së memine la hna qaja hnene la ka hamë ini. Tro pe sa qaja la itre mekun ka tru, me itre ceitun, maine hnying pena. Ame itre xaa ijin, pëkö nyine tro sa qaja. Ngo ijije hi tro sa qaja aloine la ka ini tus. Tro hë angeic a madrin ke, easa wangatrunyi angeic. Maine jë, tro sa qaja la ijine easa atre la nyipici, maine aqane cile së kowe la ketre jol, maine aqane xatua së pena hnei Iehova. (Sal. 78:4, 7) Celë hi itre aqane tro sa xatua angeic, me acatrene la lapaune i angeic, me ithuecatre koi angeic. w21.03 10 par. 9-10

Drei la nyine atrune ngöne la kola hetre thangane la huliwa ne cainöje së? Hnei Paulo hna sa la hnying celë ngöne la nyidrëti a qaja kowe la ekalesia ne Korinito, ka hape: “Hnenge hna traan, nge hnei Apolo hna fi, ngo Akötresie la ka acian. Celë hi matre tha tro kö a atrune la atre traan, maine atre fi, ngo Akötresieti pe, atre acian.” (1 Kor. 3:6, 7) Haawe, tui Paulo, tro palahi sa atrunyi Iehova e kola hetre thangane la huliwa ne cainöje së. Nemene la aqane tro sa wangatrune la ahnahna, ene la troa ce huliwa me Iehova, me Iesu memine la itre angela? (2 Kor. 6:1) Loi e tro palahi sa catre cainöj. Easa “ce huliwa me Akötresie” ngöne la easa fi la itre itine nyipici hne së hna jum. Ame la ketre atr a kapa la maca ne la Tusi Hmitrötr, easa canga bëeke troa wai angeic me nyiqane ini tus. Ketre manathith ka tru troa öhne la aqane saze Iehova la hni me mekuna ne la ketre atr ka ini tus! w20.05 30 par. 14, 16-18