Diseba

Maine jë, tha trotrohnine kö së la itre xaa ini e hnine la Tusi Hmitrötr. Maine pena, tha canga sa kö Iehova la itre thithi së, matre easa luelu. Ngo maine tha canga hmeke kö së, tro ha nanazij la lapaune së nge tro ha thë la aqane imelekeu së me Iehova. (Iako. 1:7, 8) Ketre, tro hë sa luelue göne la itre hnei Iehova hna thingehnaeane elany. Hnei Paulo hna aceitunëne la mejiune së memine la ketre iuhni. (Heb. 6:19) Ame la kola traqa la ketre wene, tro la iuhni a cilaxome la he wanga troa thaane eje ngöne la itre menij. Ngo eje hi laka, nyipiewekë troa catr la cein ne la iuhni. Maine troa hetre xojene lai cein, tha tro hë eje lai a catr. Ketre tune fe, maine tro palahi sa luelu, tro hë lai a nanazije la lapaune së. Ketre, ame la easa cile kowe la itre jol, loi e tro sa thupën ke, canga tro hi a paatre la mejiune së kowe la itre hna thingehnaean hnei Iehova. Nge maine pëhë lapaune së, tro fe lai a paatre la mejiune së. Thatreine kö tro angeic a madrin! w21.02 30 par. 14-15

Traqa koi 70 lao macatre i Aberahama ngöne la angeic a tro qa Ure me fami angeic. (Gen. 11:31–12:4) Nge traqa koi 100 lao macatre ne angeic a mel e hnine la itre uma mano e Kanana. Hnei Aberahama hna mec ngöne la angeic a 175 lao macatre. (Gen. 25:7) Tha hnei angeice kö hna öhn la kola eatr la hna perofetan hnei Iehova laka, troa hamën la nöje Kanana kowe la itre matra i angeic. Ketre, tha öhne fe kö angeic la kola acile la Baselaia i Akötresie. Ame pe, öni Tusi Hmitrötr ka hape, angeic a mec “nge nyipi qate catë hë.” (Gen. 25:8) Ngacama nyimutre la itre jol ka traqa koi Aberahama, ngo hnei angeic palahi hna lapaun me lapa treqe Iehova. Hnei Aberahama hna cile catr ke, hnei Iehova hna thupë angeic, enehmu i Nyidrë. (Gen. 15:1; Is. 41:8; Iako. 2:22) Tui Aberahama, easa lapa treqene la traon ka hetre nyipi trepen. (Heb. 11:10) Tha kolo kö a qaja la ketre traone hna xup hnei atr. Kolo pe a qaja la Baselaia i Akötresie hna acile lo 1914. (Hna ama. 12:7-10) Easa treqene tro ej a musi e celë fen. w20.08 4-5 par. 11-12

Maine easa ajane troa drenge hnyawa la itre xan, loi e tro sa hetre hni ka ipië me atreine xomihni aqean. Köni kepin matre nyipiewekë troa kuca tun. Ame la hnapan, tha tro hë sa canga mekun la itre ngazo ne la trejin. Ame la hnaaluen, tro ha mama koi së la itre aliene hni angeic, nge tro lai a xatua së troa trotrohni angeic. Nge ame la hnaakönin, tro hë sa atrepengöi angeice hnyawa. Nyipici, ame itre xaa ijin, thatre kö së la itre sipu aliene hni së. Easë pë hë a atre ngöne la easa qaja amamane itre ej. Ame la itre xaa trejin, jole koi angatr troa qaja la aliene hni angatr ke, hnene la itre ewekë ka traqa ngöne la mele i angatr ekö. Maine jë, tha tro kö angatr a canga fe la itre aliene hni angatr. Ngo maine tro sa xomihni aqean tui Iehova, tro hë angatr a mejiun koi së me fe la itre aliene hni angatr. Ketre, nyipiewekë tro sa drei angatre hnyawa. w20.04 15-16 par. 6-7

Ame ngöne la ijine i Iesu, loi e tro la itre ka nyi ie a atre la pengöne ie nyine troa ea. (Lev. 11:9-12) Ketre, nyipiewekë tro angatr a atre la götrane hnë troa nyi ie. Ame la itre ie ke, itre ej a lapa ngöne la götrane gaa loi me gaa hetre xen. Nge hapeu, ka nyipiewekë kö la hawa göi troa nyi ie? Ame la ketre ijin, hnene la ketre trejin ka mel ngöne la caa hnapet ne la Pacifique hna hëne la ketre mesinare troa nyi ie. Önine la mesinare: “Iöhnyi hë nyiso elanyi hmakanyi e 9h!” Ngo önine la trejin: “Waea, tha aqane kö lai ke, hetre hawa kö ne troa nyi ie.” Ame ngöne la ijine la itre pane Keresiano, hnene la itretre drei Iesu hna tro ngöne la itre götrane me hawa gaa hetre “ie.” Eje hi, hnei angatr hna cainöj ngöne la uma ne hmi, me itre sunago, ngöne la itre hnalapa trootro me itre hna maketr. (Itre hu. 5:42; 17:17; 18:4) Loi e tro fe sa atrepengöne hnyawa la itre atrene la teritoare së, tune la itre götrane me hawa i angatr.—1 Kor. 9:19-23. w20.09 4 par. 8-9

Ame la ketre aqane tro sa nyisinee i Iesu ke, troa trongëne la itre hna amekötin. Easa thele troa nyisinee i Iesu ngöne la easa metrötrë nyidrë, he ne la ekalesia. Easë fe a ce huliwa memine la itre hna acil matre troa thupëne la ekalesia. (Efe. 4:16) Ijije hi tro sa huliwane hnyawa la itre Uma Ne Baselaia. Celë hi kepin matre hna acasine la itre xaa ekalesia. Itre aqane kuca hi lai ka aijijëne la organizasio i Iehova, troa huliwane hnyawa la itre manie hna kuiën. Ketre, hnene la itre trejin hna saze la itre hnei angatr hna majemin. Ame la itre xan, itre macatre ne angatr a huliwa ngöne la ketre ekalesia, nge hetre sinee i angatr e cili. Ngo hna sipo angatr troa saze ekalesia. Drei la madrine i Iesu troa goeëne la itre sine huliwa i nyidrë ka nyipici me ka idrengethenge! w20.04 24 par. 14

Kolo palahi a ithepe musi hnene la joxu ne kolopi me joxu ne kolojë. Celë hi lai ka traqa thupene la Hnaaluene Isi Ka Tru, ngöne la musi URSS a nyiqane musi hune la itre nöj e Europe. Hnene la joxu ne kolojë hna ce xöle memine la itre xaa nöj me acasine la itre trongene isi angatr (OTAN). Ketre, kolo palahi a icilekeu hnene la lue joxu me kuiëne la itre manie ka tru, matre troa eköthe la itre trongene isi ka catr. Hnene la joxu ne kolopi hna sajuëne la itre nöj ka icilekeu memine la joxu ne kolojë, tun e Afrique, Asie me Amérique latine. Nge kola mama la musi Russie memine la itre sine xöle ne ej e cailo fen. Angatre fe a isi memine la joxu ne kolojë jëne ordinatör. Kola upezö joxu ne kolopi hnei joxu ne kolojë ka hape, angeice a xome la itre porogaram ne ordinatör matre troa atrekënö la itre manie ka tru me thapa la musi angatr. Nge tune lo hna perofetan hnei Daniela, kolo palahi a icilekeu hnene la joxu ne kolopi memine la nöje i Iehova Akötresie.—Dan. 11:41. w20.05 13 par. 5-6

Ame ngöne lo ijine i Isaia perofeta, hnei Iehova hna hnying kowe la nöje i Nyidrë ka hape: “Hape u, tro la fö’ a thëthëhmine la nekö i nyido hna iji thin?” Nge öni Nyidrë: “Maine tro angat’ a thëthëhmin, loi pe tha tro jë kö ni a thëthëhmi ’ö.” (Is. 49:15) Tha hnei Iehova kö hna majemine aceitunë Nyidrë me ketre thin. Ngo Nyidrëti e celë a qaja la aqane imelekeu ne la thin me nekön, matre troa amamane la etrune la ihnimi Nyidrë kowe la itre hlue i Nyidrë. Maine jë caasi hi la mekuna ne la itre thin me Jasmine, ketre trejin, ngöne la kola hape: “Ka cile hut la aqane imelekeu ne la thin me medreng hna iji thin.” Öhne hi Iehova la ketre nekö i Nyidrëti a nuetrij la itre icasikeu me huliwa ne cainöj. Alanyimu la itre trejin ka nanazij ka bëeke hmaca troa sine la itre icasikeu. Nge easa madrin troa kepe angatr! Aja i Iehova tro angatr a bëeke hmaca koi Nyidrë, nge ketre tu së fe.—1 Pet. 2:25. w20.06 18 par. 1-3

Ame la itre xaa ahnahna, tre, tha ka mama kö. Itre ahnahna lai ka tru alameken. Ame ngöne la Cainöj Hune La Wetr, hnei Iesu hna qaja la itre ahnahna e hnengödrai, nge ka sisitria catre kö hune la itre mo ne fen. Celë hi matre, öni nyidrë: “Ame la göhne ne la trengamo i eö, tre göhne ne fe hi la hni eö.” (Mat. 6:19-21) Tro hë së e cili a catr matre troa kapa la itre ewekë ka tru alameken. Maine easa ajane troa kapa la “itre trengamo e hnengödrai,” loi e tro sa hlemu loi nge matre kepe së hnei Akötresie. Tune la hna qaja hnei Iesu, thatreine kö troa apatrene me atrekënö la itre trengamo cili. Hnei Paulo aposetolo hna ithuecatre koi së troa ‘goeëne hutine la itre ewekë ka tha mama kö.’ (2 Kor. 4:17, 18) Kola qaja la itre manathith hne së hna troa kapa ngöne la fene ka hnyipixe. Hapeu, easë kö a wangatrune la itre ahnahna cili? w20.05 26 par. 1-2

Ame la itre ini hnei Mose hna hamëne koi angetre Isaraela, tre, hna acatrene la lapaune i angatr me ithuecatre koi angatr, tune la wene mani a fi la itre feja. Nemene la nyine tro sa kuca matre tro fe a hane hetre thangane la huliwa ne cainöje së kowe la itre ka drei së? Ame la easa cainöj, nyipiewekë tro sa amamane la ëje i Iehova e hnine la Tusi Hmitrötr. Loi e tro sa tro fë la itre itus me amamane la itre video me itre xaa ka mama ngöne la site së, nge ka atrunyi Iehova. Ketre, ijije hi tro sa qeje Akötresie me itre thiina i Nyidrë ngöne la hna huliwa, me hna ini me ngöne la easa ihamë. Ame la easa qaja koi itre xan la aja i Iehova kowe la itre atr me ihnadro, easë hi lai a amamane la itre ithuemacany ka hnyipixe göi Nyidrë. Ketre, easa ahmitrötrëne la ëje i Iehova ngöne la easa qaja la nyipici göi Nyidrë, me jelethoine la itre ini ka thoi hna sil hnei Satana. Nge easa hamë angatr la itre ini ka acatrene la lapaune i angatr me aegöcatrenyi angatr.—Is. 65:13, 14. w20.06 10 par. 8-9

Nemene la itre thiina ka nyipiewekë matre troa atreine xatuane la itre ka ajane troa bëeke koi Iehova? Nyimutre la itre ini hne së hna troa xom qa ngöne la ceitune hna hamën hnei Iesu, göne la nekönatr ka mejengön. (Luka 15:17-24) Hnei Iesu hna qaja la kepin matre angeic a bëeke hmaca kowe la keme i angeic. Hnei nyidrëti fe hna qaja la etrune la madrin me ihnimi ne la kem, ngöne la kola nyenyap me idrem memine la nekö i nyidrë. Ngo kola huliwa la mekuthetheu ne la nekön, nge ame koi angeic, tha ijiji angeice kö troa kapa la ihnimi ne la kem. Hnei angeic hna fe la hni angeic koi kem, nge hnei nyidrëti hna utipin me hnimi angeic. Hnene la kem hna amamane laka, tha trenyiwa kö angeic maine hlu ngöne la hnalapa, ngo neköne pe hna hnim. Nge hnei nyidrëti hna kuca la ketre feet me hamë angeic la ketre iheetr ka mingöming. Ceitui Iehova memine la kem ngöne la ceitune celë. Nyidrëti a hnim la itre trejin ka nanazij, nge aja i Nyidrëti tro angatr a bëeke hmaca. Maine tro sa nyitipu Iehova, tro hë sa atreine xatua angatr. Celë hi matre, nyipiewekë tro sa atreine itreqe, me utipin, me ihnim. w20.06 25-26 par. 8-9

Hnei Iesu hna qaja ka hape, tro la itre xan a kapa “madrin” la nyipici, ngo ame hë la kola tupathi angatr, tre, canga nanazije pi hi la lapaune i angatr. (Mat. 13:3-6, 20, 21) Maine jë, tha trotrohnine kö angatr laka, tru la itre jol ka traqa kowe la itre ka xötrethenge Iesu. (Mat. 16:24) Maine pena, angatr a mekun laka, itre manathithe hi la hna troa kapa hnene la itre Keresiano, nge pëkö jol ka troa traqa koi angatr. Ngo easa mel ngöne la fene ka ngazo, matre tru la itre jol ka traqa. Ijije hi troa saze la mele së me paatre trootro la madrine së. (Sal. 6:6; Ate cai. 9:11) Alanyimu la itre trejin ka amamane laka, angatre hi ngöne la nyipici. Tune kaa? Maine jë, hna akötrë angatr hnene la ketre trejin, maine pena ka ngazo la aqane ujë ne lai trejin. Ngo ame pe, ka catr palahi la lapaune i angatr. (Sal. 119:165) Tha nanazije kö la lapaune i angatr ngöne la itupath, ngo kolo pe a catr. (Iako. 1:2-4) Eje hi, loi e tro sa acatrene la lapaune së. w20.07 8 par. 1; 9 par. 4-5

Qëmekene troa e la Tusi Hmitrötr, loi e troa pane sipo Iehova la aqane troa kepe thangan qa ngön. Maine easa cile kowe la ketre jol, loi e troa sipo Nyidrë troa xatua së troa öhne la itre trepene meköt ka lolo. (Fil. 4:6, 7) Hnei Iehova hna aijijë së troa lapa mekun la itre ewekë. Maine easa ajane troa trotrohnine la ketre hna melën e hnine la Tusi Hmitrötr, loi e tro sa pane atre la itre götran me itre atren. Loi e tro sa thele la itre mekun me itre aliene hni ne la atr hna qaja. Ketre, nyipiewekë tro sa mekun ajuin. Kolo lai a hape, troa thel ajuine la itre hne së hna e me xomi ini qa ngön. Pane mekune jë laka, easa kuci itra. Nyipiewekë tro sa xome la nöjei xen thatraqane lai. Maine pëkö la itre xaa xen, tha tro kö a lolo la itra. Ketre tune fe, loi e tro sa ce xome la nöjei mekun matre trotrohnine hnyawa la hna qaja. Eje hi, maine tha tro kö sa mekun ajuin, tro ha gufa la itre hne së hna e. w21.03 15 par. 3-5

Maine ju, tro Paulo a mekun laka, maine tha catre cainöje kö nyidrë ke, tha tro kö a akalabusi nyidrë. Maine ju, tro fe nyidrëti a elëhni kowe la itre trahmany ne Asia ka nuaxöji nyidrë, me tha mejiune kowe la itre xaa sinee i nyidrë. Ame pe, tha celë kö aqane ujë i Paulo. Ngacama atre hi Paulo laka, nyidrëti a troa mec, ngo tha hnei nyidrëti kö hna thëthëhmine la ka nyipiewekë, ene la troa atrunyi Iehova. Hnei nyidrëti fe hna kuca la loi koi itre xan me catre thith. Ketre, tha hnei Paulo kö hna lapa mekun la aqane nuaxöji nyidrë hnei itre xan. Hnei nyidrëti pe hna hetre hni ne ole kowe la ihnim me ixatua ne la itre sinee i nyidrë. Hnei Paulo fe hna catre inine la Trengewekë i Akötresie. (2 Tim. 3:16, 17; 4:13) Ngo ame la ka sisitria ke, xecie koi Paulo laka, Iehova me Iesu a hnimi nyidrë. w21.03 18 par. 17-18

Ame ngöne la itre macatre 100, hna ajojezine la itre nyipi Keresiano hnene la itre Keresiano ka thoi. Hnei angatr hna inine la itre ini ka thoi me juetrëne la nyipici qa hnine la Tusi Hmitrötr. Qane la ijine cili uti hë la macatre 1870, pëhë gurupe ka nyihlue i Akötresie e celë fen. Eje hi, tune la zizania, alanyimu hë la itre Keresiano ka thoi, matre jole hë troa wangatrehmekun la itre nyipi Keresiano. (Mat. 13:36-43) Pine nemene matre loi e troa amexeje lai? Ke kola amamane laka, tha hna eatrëne kö la hna perofetan ngöne Daniela mekene 11, göne la joxu ne kolopi me joxu ne kolojë, ngöne lo itre macatre 100 uti hë lo itre macatre 1870. Eje hi, thatreine kö la itre mus troa akötrëne la nöje i Akötresie ngöne la ijine cili ke, pëhë gurup ka nyihlue i Akötresie. Ngo ame ngöne la pun la itre macatre 1800, mama hmaca pi hi la joxu ne kolopi me joxu ne kolojë. w20.05 3 par. 5

Hnei Ioela hna perofetan ka hape, troa xulu la iume sipa me haöthe la nöje Isaraela me xen la nöjei feja ne la nöj! (Ioela 1:4) Qaan ekö, easa mekun ka hape, kola qaja la nöje i Iehova ka catre cainöj, nge pëkö ka atreine troa sewe angatr. Easë lo a mekun ka hape, ka hetre thangane la huliwa ne cainöj kowe la “nöj,” ene la itre atr hna musinën hnene la itre hene ne hmi. Maine tro sa lapa mekun la nöjei hna qaja hnei Ioela perofeta, easa öhne laka, loi e tro sa saze la aqane troa trotrohnin la hna perofetan celë. Hnei Iehova lo hna perofetan göne la iume sipa, ka hape: “Tro ni a aiananyine me nyipunie la ate ne kolopi.” (Ioela 2:20) Maine Itretre Anyipici Iehova ju la ka nyihatrene la iume sipa, hnauëne kö laka, Iehova a qaja ka hape, tro Nyidrëti a aiananyine me helëne itre ej? (Ezek. 33:7-9; Mat. 28:19, 20) Eje hi, tha tro kö Iehova a aiananyine me helëne la itre hlue i Nyidrëti ka mele nyipici. Ngo Iehova pe a aiananyine la ketre ewekë maine ketre atr ka thele troa qanangazone la nöje i Nyidrë. w20.04 3 par. 3-5

Tune kaa e tha canga sa kö Iehova la itre thithi së? Öni Iakobo ka hape, ‘loi e tro palahi sa sipo Akötresie’ la inamacan. Tha tro kö Nyidrëti a wesitr pine la hne së hna lapa thith. Ame la easa sipo inamacane matre troa xomihnine la itre jol, Iehova Keme së a ‘hamën atrun koi së.’ (Sal. 25:12, 13) Öhne hi Nyidrëti la itre jole ka traqa koi së, nge aja i Nyidrëti troa xatua së. Celë hi ka hamë madrine koi së! Ngo tune kaa la aqane hamë inamacane së hnei Iehova? Jëne la Trengewekë i Nyidrë. (Ite Edomë 2:6) Celë hi matre, nyipiewekë tro sa inine la Tusi Hmitrötr me itre itusi së. Ngo tha tro hmekuje kö sa atre la itre eamo qaathei Iehova. Loi e tro fe sa trongëne itre ej ngöne la mele së. Öni Iakobo: “The tro hmekuje kö nyipunie a itretre drenge la trengewekë, . . . ngo loi e tro fe nyipunie a itretre trongën.” (Iako. 1:22) E cili, tro hë sa tingeting, me menyik, me tiqa hnei utipin. (Iako. 3:17) Celë hi la itre thiina ka troa xatua së troa xomihnine la itre jol me madrin. w21.02 29 par. 10-11

Maine tro la ekalesia a xatuane la itre ka ini tus, tro hë angatr a kökötr ngöne la nyipici me xomi bapataiso. Nge maine tro la itre trejin a caas me ce huliwa, tro ha kökötre lolo la ekalesia. (Efe. 4:16) Önine la ketre pionie: “Hne huni hna majemine qaja ka hape, hnëqa ne la tribu troa hetrune la nekönatr. Ketre tune fe la itre ka ini tus laka, hnëqa ne la ekalesia troa xatua angatr.” Maine tro la itre kem me thin, me itre sinee, me itre porofesör a xatuane la nekönatr, tro hë nyën a ketre atr ka macaj. Nyipiewekë tro angatr a ithuecatre koi nyën me ini nyën. Ketre tune fe, loi e tro la itre trejin ne la ekalesia a xatuane la ka ini tus uti hë la angeic a xomi bapataiso. Nyipiewekë tro angatr a hamë eamo, me ithuecatr, me amamai tulu koi angeic. (Ite Edomë 15:22) Pine nemene matre nyipiewekë tro la trejin ka hamë ini a nue itre xan troa hane xatuane la ka ini tusi me angeic? Pine laka, alanyimu la ka ijij troa xatuane la hnainin troa kökötr ngöne la nyipici. w21.03 8 par. 1-3

Nyipiewekë tro la itre Keresiano, itre thöth me itre qatr, a thupën matre tha tro kö angatr a juetrë thiina. Öni Ioane, thatreine kö tro sa trongëne la nyipici me kuca la itre ewekë ka sis. (1 Ioane 1:6) Maine easa ajane troa kepe së enehila me elany hnei Akötresie, loi e tro palahi sa idrengethenge. Eje hi, pëkö ngazo “ka sihngödr” koi Iehova. Tune la kola thina së hnei laam, öhn asë hi Nyidrë la itre hne së hna kuca. (Heb. 4:13) Loi e tro sa thipetrije la aqane mekune i fen göne la ngazo. Ame lo ijine i Ioane, hnene la itre ka iamenumenu hna qaja ka hape, ijije hi troa kuca la ngazo me hane nyihlue i Iehova. Celë hi aqane mekune la itre atr enehila. Öni angatr ka hape, angatr a lapaune koi Akötresie, ngo tha kapa kö angatr la mekuna i Nyidrë göne la ngazo, tune la troa kuci ngazo. Ame la ka ngazo koi Iehova ke, tha ka ngazo kö koi angatr. Angatre kö a kuca la sipu aja i angatr. w20.07 22 par. 7-8

Hapeu, easë kö a hane cilëgöline la itre trejine föe? Pane mekune jë së la ketre trejine föe ka faipoipo nge tha ka hmi kö la föi angeic. Kola öhn hnene la itre xaa trejin laka, angeic palahi a traqa hmitr, me canga tro thupene la itre icasikeu. Ketre, tha ce traqa hmaca kö angeic memine la itre nekö i angeic. Celë hi matre, angatr a xöjetriji angeic me hape, ka loi tro angeic a catr memine la föi angeic. Ame pe, thatre kö angatr laka, angeic a kuca la hnei angeic hna atrein, nge föi angeic la ka axecië mekun kowe la itre nekönatr. Loi e tro sa qaja aloine lai trejine föe, matre tha tro kö la itre xan a xöjetriji angeic. Nyipiewekë tro la itre qatre thup a xatuane la itre trejine föe. Atre hi angatr laka, Iehova a ajane troa thupëne hnyawa la itre trejine föe. (Iako. 1:27) Celë hi matre angatr a nyitipu Iesu. Tha angatre kö a acili wathebo menu. Ngo angatre pe a thele troa trotrohnine la itre trejine föe. (Mat. 15:22-28) Ame la ketre qatre thup a xatuane la itre trejine föe, angeice hi lai a amamane la ihnimi Iehova memine la organizasio i Nyidrë. w20.09 24-25 par. 17-19

Hnei Daniela perofeta palahi hna hetre hni ne ipië me sipo ixatua koi Iehova. Ame lo Iehova a aijijë Daniela troa qejepengöne la pu i Nebukaneza, tha hnei angeice kö hna pi mama. Hnei angeice pe hna hni ne ipië me atrunyi Iehova. (Dan. 2:26-28) Nemene la ini koi së? Maine jë, itre trejin a qaja aloinyi së göne la aqane cile fë cainöj, maine göne la huliwa ne cainöje së pena. E cili, loi e tro palahi sa atrunyi Iehova. Eje hi, maine pëkö ixatua qaathei Nyidrë, thatreine kö së troa kuca la itre ewekë cili. (Fil. 4:13) Celë hi hna kuca hnei Iesu ekö. Hnei Iesu palahi hna mejiune koi Iehova. (Ioane 5:19, 30) Tha hnei Iesu kö hna thel troa thapa la musi Iehova. Kola qaja ngöne Filipi 2:6 ka hape, “tha hnei nyidrëti kö hna thele troa thapa la göhnë i Akötresie.” Atre hnyawa hi Iesu laka, hetre ifegone la musi nyidrë. Celë hi matre, hnei Iesu hna drengethenge me metrötrëne la musi Iehova, Keme i nyidrë. w20.08 11 par. 12-13

Ame la itre xan ka nyenyape ngöne la gojenyi ne mel ke, pëkö ka atre la akötre i angatr. Maine jë, hna tithi epun hnei mec nge kösë pëkö ka trotrohni epun. Ijije hi troa ithuecatre koi epun hnene la tulu i Mefiboseth. (2 Sam. 4:4) Ka sinatr Mefiboseth, nge ngazo la aqane ameköti angeic hnei Dravita joxu. Ngo tha hnei Mefiboseth kö hna wesitr. Hnei angeice pe hna hetre hni ne ole kowe la itre ewekë ka lolo ka traqa ngöne la mele i angeic, me kowe la aqane nyihnyawa angeic ekö hnei Dravita. (2 Sam. 9:6-10) Ngacama ngazo la aqane ameköti Mefiboseth hnei Dravita, ngo hnei angeic hna mekun asë la itre ewekë. Tha hnei angeic kö hna elëhni koi Dravita pine la ngazo i nyidrë. Ketre, tha hnei angeic kö hna elëhni koi Iehova pine la hna kuca hnei Dravita. Hnei Mefiboseth hna thele la aqane troa sajuëne la joxu hna iën hnei Iehova. (2 Sam. 16:1-4; 19:24-30) Hnei Iehova hna nue troa cinyihane la hna melën hnei Mefiboseth e hnine la Tusi Hmitrötr, matre troa sa xomi ini qa ngön.—Rom. 15:4. w20.04 26 par. 3; 30 par. 18-19

Ame la itre xaa trejin, hna acilë angatr troa mesinare, maine pionie hut maine pionie lapa. Angatr a cainöj ngöne la drai ka pexej me inine la itre atr. Ngacama tha tru kö hnei ewekë i angatr, ngo Iehova a amanathithi angatr. (Mar. 10:29, 30) Tru catr la ihnimi së kowe la itre trejin cili, nge easa madrin laka, ce angatr me easë ngöne la ekalesia! Hapeu, itre trejin trahmanyi hmekuje hi la ka nyipiewekë, memine la itre ka huliwa i Akötresie ngöne la drai ka pexej? Waea. Nyipiewekë asë hi la itre trejin koi Iehova me kowe la ekalesia. (Rom. 10:15; 1 Kor. 3:6-8) Ame la ka nyipiewekë, tre, troa cainöj me xatuane la itre atr troa xötrethenge Iesu Keriso joxu së. (Mat. 28:19, 20; 1 Tim. 2:4) Ame easë e hnine la ekalesia, itre ka bapataiso me itre ka cainöj, easa ajane troa amë panëne la huliwa ne cainöj ngöne la mele së.—Mat. 24:14. w20.08 21 par. 7-8

Kola amamane ngöne la topik ne la drai celë laka, tro kö Iesu a xatua së ngöne la easa cile kowe la itre jol. Eje hi, kola akeukawanyi së hnene la hna qaja hnei Iesu. Pine nemen? Pine laka, easa cile kowe la nöjei pengöne jol. Maine jë, hna mec la ketre sinee së. Nyipici, tha tro kö a canga paatre la akötre së. Itre macatre ne hleuhleu me akötre la mele së. Maine pena, hace la mele së ke, easa qatre trootro. Ame itre xan, hace la mele i angatr ke, tha loi kö la itre mekuna i angatr. Ngo ame pe, hetre trengecatre së troa xomihnine la itre jol ke, ce Iesu “pala hi” me easë e nöjei drai. (Mat. 11:28-30) Tusi Hmitrötr a amamane laka, Iehova a xatua së jëne la itre angela. (Heb. 1:7, 14) Itre angela a xatua së me eatrongë së ngöne la easa cainöjëne la “maca ka loi ne la Baselaia” “koi nöjei nöj, me nöjei tribu, me nöjei qene hlapa.”—Mat. 24:13, 14; Hna ama. 14:6. w20.11 13-14 par. 6-7

Easa ajane tro la hnainin a trotrohnine laka, itre Trengewekë i Akötresie la itre hnei angeic hna inin. (1 Thes. 2:13) Nemene la nyine tro sa kuca? Ithuecatre jë koi angeic troa qaja la mekuna i angeic göne la ini tus. Tha tro kö sa canga qejepengöne la itre xötr. Loi e tro pe sa sipo angeic troa qaja la hnei angeice hna trotrohnin. Ketre, xatua angeice jë troa thele la aqane troa trongëne la itre ini ne la Tusi Hmitrötr. Nyipiewekë fe tro sa hnying matre atre la mekuna i angeic göne la itre xötr hna e. (Luka 10:25-28) Maine jë tro sa hnyingë angeic ka hape: “Nemene la thiina i Iehova ka mama ngöne la xötre celë?” “Nemene la aqane xatua eö hnene la mekun celë?” “Nemene la mekuna i eö göne la ini celë?” Ame la ka sisitria ke, tha ene kö la troa kapa la nöjei ini hnene la hnainin. Loi e tro pe angeic a hniin me trongëne la itre ini cili. Haawe, loi e tro sa nue la Tusi Hmitrötr troa ithanata. Maine easa ajane troa maca troa hamë ini, loi e tro sa hetre hni ne ipië. w20.10 15 par. 5-6

Xecie koi së laka, troa nyipune la huliwa ne cainöj ngöne la nyipi ijin. Ame ngöne la hneijine i Noa, hnei Iehova hna amaman laka, Nyidrëti la ka musinëne la itre ijin me itre ewekë ka traqa. Eje hi, 120 lao macatre qëmeken, hnei Iehova hna sa la ijine troa traqa la Iwë Atraqatr. (Gen. 6:3) Itre macatre thupen, hnei Nyidrëti hna upi Noa troa xupe la aka. Hnei Noa hna catre huliwa koi 40 maine 50 lao macatre, qëmeken troa traqa la Iwë Atraqatr. Ketre, ngacama tha drei Noa kö hnene la itre atr, ngo hnei angeic hna catre cainöj utihë la Iehova a upi angeic troa lö e hnine la aka. Ame hë la kola traqa la drai hna sa, “hnei Iehova hna thinge qëhnelö.” (Gen. 6:3; 7:1, 2, 16) Easenyi hë la ijine tro Iehova a qaja ka hape, tha tro hmaca kö a cainöj. Thupene lai, ‘tro Nyidrëti a thinge la qëhnelö’ me apatrene la fene i Satana me acile la fene ka hnyipixe hna troa lapan hnene la itre atr ka meköt. Ngo loi e tro sa catre nyitipu Noa enehila, me Habakuka, me itre xaa hlue i Akötresie ka tha sawa kö la iwanakoime i angatr. Loi e tro sa amë panëne la huliwa ne cainöj me xomihni aqeany, me catre lapaun koi Iehova me kowe la itre hnei Nyidrëti hna thingehnaean. w20.09 13 par. 18-19

Maine tha canga mama kö la isa hnëqa së, tro ha gomegome me pë madrine la lapa ka cahae i Iehova. Thatre kö së la ka troa axecië mekun nge thatre fe kö së la ka troa xatua itre xan troa trongën. Maine ketre ahnahna qaathei Akötresieti la troa mus, hnauëne laka, alanyimu la itre föe ka akötr? Pine laka, tha trongëne kö la itre trahmany la itre hna amekötin hnei Iehova. Angatre pe a kuca tune la hnei angatr hna majemin. Ame itre xan, angatr a pi tru nge pëkö ihnimi angatr, matre angatr a qanangazone la itre föe i angatr. Ame itre xaa ijin, itre trahmanyi a thaipiëne la föe i angatr matre troa amamane koi itre xan laka, angeice la “ka mus.” Atre hi angatr laka, thatreine kö troa musinëne la föe troa hnimi angatr, ngo ijije hi tro angatr a axouene me musinëne la föe. Ngo tha celë kö lai aja i Iehova. Ketre, tha angatre kö lai a metrötrëne la itre föe i angatr.—Efe. 5:25, 28. w21.02 3 par. 6-7

Ame la easa hnehengazo, ijije hi troa xatua së hnene la thith. Thithi jë koi Iehova qa kuhu hni. E cili, tro hë sa kapa “la tingetinge qaathei Akötresie, tingetinge hna thatreine trotrohnine hnei atr.” (Fil. 4:6, 7) Jëne la uati hmitrötre i Nyidrë, tro Iehova a xatua së ngöne la easa kucakuca. (Gal. 5:22) Ame la epuni a thithi koi Iehova, loi e tro epuni a fe la itre aliene hni epun koi Nyidrë. Loi e troa qaja la mekuna i epun memine la itre jol hna cile kow. Sipone jë la inamacane me trengecatre qaathei Iehova, matre xatua epun troa elë hune la jol. Ngo maine thatreine kö epun troa nyinyine lai jol, sipo Nyidrëti jë troa xatua epun troa xomihnine lai jol. Maine tro sa qaja asë, canga tro hi sa öhne la aqane sa i Iehova. Ngo tha tro kö sa hnehengazo e tha canga sa kö Nyidrëti la itre thithi së. Iehova a ajane tro sa fe la itre aliene hni së me catre thith.—Luka 11:8-10. w21.01 3 par. 6-7

Ame e hnine la ekalesia, hetrenyi la itre trefën, itre fami, me itre trejin ka tha faipoipo kö. Nemene la aqane tro sa goeëne la itre trejin ka tha faipoipo kö? Hane hi la aqane goeë angatre hnei Iesu. Ame lo Iesu e celë fen, tha hnei nyidrëti kö hna faipoipo. Hnei nyidrëti pe hna nue la mele i nyidrë, matre troa eatrëne la hnëqa i nyidrë. Ketre, tha hnei nyidrëti kö hna ielene la itretre drei nyidrë troa faipoipo maine tro pena mele caas. Hnei nyidrëti pe hna qaja ka hape, tro itre xan a mekun laka tha tro kö angatr a faipoipo. Eje hi, hnei Iesu hna metrötrëne la itre ka tha faipoipo kö. Ame koi nyidrë, tha ka sisitria catre kö la mele ne trefën hune la itre ka tha faipoipo kö. Tui Iesu, tha hnei Paulo kö hna faipoipo. Ketre, tha hnei nyidrëti kö hna qaja ka hape, tha tro kö la itre Keresiano a faipoipo. Öni nyidrë ka hape, isa qanyi së kö iën. w20.08 28 par. 7-8

Nyimutre la itre ewekë ka traqa ngöne la mele i Ioane. Tru catre la itre jol hnei angeic hna cile kow nge ka tupathe la lapaune i angeic. Ngo hnei angeic palahi hna catre trongëne la itre hna amekötin hnei Iesu, tune la troa hnime la itre trejin. Xecie koi angeic laka, tro kö Iehova me Iesu a hnimi angeic me aegöcatrenyi angeic troa elë hun la nöjei pengöne jol. (Ioane 14:15-17; 15:10) Tha hnei angeice kö hna nue Satana memine la fen troa sewe angeic troa hnime la itre trejin, ngöne la aqane ithanata me aqane ujë i angeic. Tui Ioane, easa mel ngöne la fene i Satana ka imethinë. (1 Ioane 3:1, 10) Angeic a thel troa sewe së troa hnime la itre trejin me easë. Ngo maine tro sa hmek, tha tro kö angeic a hun. Haawe, catre jë së amamane jëne la aqane ithanata me aqane ujë së laka, easa hnime la itre trejin! Tro hë sa madrine troa hane sine la lapa i Iehova me mele madrin.—1 Ioane 4:7. w21.01 13 par. 18-19

Tha ka hmaloi la mele ngöne la fen hna musinën hnei Satana. (2 Tim. 3:1) Ngo tha tro kö sa hnehengazo me xou. Atre hnyawa hi Iehova la itre jol hne së hna cile kow. Hnei Nyidrëti hna thingehnaean laka, tro Nyidrëti a ee së memine la ime maca i Nyidrë. (Is. 41:10, 13) Haawe, loi e xecie koi së laka, tro kö Iehova a xatua së. Maine tro palahi sa thele ixatua jëne la itre tulu ne la Tusi Hmitrötr, tro hë sa catre xomihni me cile hut ngöne la nöjei pengöne jol! Nyimutre la itre jiane huliwa hna hnëkën hnene la organizasio i Iehova, tune la itre video, itre nyine dreng, itre hna elo, me itre tane mekun hna hape, “Ange Hane Ju Lapaune Tui Angatr.” Qëmekene tro sa huliwane itre ej, loi e tro sa pane sipo Iehova troa xatua së troa xomi ini qa ngön me trongën. Loi e tro sa lapa mekun la mele ne la hlue i Iehova ekö. Tro fe sa mekun ajuine la hnei angeic hna kuca, memine la aqane xatua angeic hnei Iehova. Nyipiewekë tro sa xomi ini me trongën ngöne la mele së. Ketre, loi e tro sa olene koi Iehova la ixatua i Nyidrë, me hamë ithuecatr koi itre xan. w21.03 19 par. 22-23

Maine ka faipoipo epun nge epuni a ajane troa hetre nekönatr, isa hnyinge jë ka hape: ‘Hapeu, ka hetre hni ne ipië nge ka lolo kö la aqane imelekeu i nyio me Akötresie? Ijije kö tro Iehova a hane ië nyio matre troa kem me thine ne la ketre nekönatr hnei Nyidrëti hna hnim? (Sal. 127:4) Ngo maine hetre nekö i epuni hë, isa hnyinge jë ka hape: ‘Eni kö a amamane kowe la itre neköng la enyipiewekëne troa huliwa? (Ate cai. 3:12, 13) Eni kö a thupë nyudreni hnyawa qa ngöne la itre ewekë ka ngazo?’ (Ite Edomë 22:3) Eje hi, thatreine kö së troa apatren asë la itre jol ne la itre nekö së. Ngo ijije hi tro sa hnëkë nyudren göne la itre jole cili, me ini nyudren troa thele ixatua e hnine la Tusi Hmitrötr. (Ite Edomë 2:1-6) Pane mekune jë laka, ketre sinee i epun a trotrije la nyipici. E cili, loi e troa xome la Tusi Hmitrötr, matre amamane kowe la itre nekö i epun la enyipiewekëne la troa mele nyipici koi Iehova. (Sal. 31:23) Nge maine hna meci la ketre sinee i epun, loi e troa amamane koi nyudren la aqane akeukawane la hni epun hnei Tusi Hmitrötr.—2 Kor. 1:3, 4; 2 Tim. 3:16. w20.10 27 par. 7