Febuare

Iehova a ajane tro la itre hlue i Nyidrëti a madrin. Tha nanyi kö Iehova qaathe së, nge öhne hnyawa hi Nyidrëti la easa kucakuca. (Sal. 145:18, 19) Hanawang la aqane thupë Elia perofeta hnei Iehova. Ame ngöne la ijine i Elia, hna akötrëne la nöje Isaraela. Hnene la itre mus hna qanangazo angatr me thele troa humuthi Elia. (1 Ite jo. 19:1, 2) Ketre, hnei Elia hna mekun laka, angeic hmekuje hi la perofeta i Iehova ka mel. Matre hace me jole la mele i angeic. (1 Ite jo. 19:10) Ngo hnei Iehova hna canga xatua angeic. Hnei Nyidrëti hna upe la ketre angela troa qaja koi Elia ka hape, tha angeice caasi kö. Hetre itre xaa atre Isaraela ka catre mele nyipici! (1 Ite jo. 19:5, 18) Hnei Iesu hna ithuecatr kowe la itretre drei nyidrë ka hape, tro angatr a sine la ketre fami ka tru, ene la lapa i Iehova. (Mar. 10:29, 30) Nge Iehova la he ne la fami cili. Tha tro kö Nyidrëti a nuetrije la itre hlue i Nyidrë.​—Sal. 9:10. w21.06 8-9 par. 3-4

Ame la itre xaa atr, tha angatre kö a ajane troa drei së ke, jëne la Tusi Hmitrötr, easa jelethoine la itre ini hna hamën hnene la itre hmi. Ame la itre xaa hmi, angatr a qaja ka hape, Akötresieti a kuiën la itre atr ka ngazo e hnine la ifereno. Jëne la itre ini ka thoi cili, angatr a axouene me iaöne la itre atr. Ngo ame së itre hlue i Iehova, Akötresie ka ihnim, easa xatuane la itre atr me thepe angatr qa ngöne la itre ini ka thoi cili. Ketre, itre xaa hmi a qaja ka hape, e meci hë la atr ke, mele pe kö la u. Easë pe a qaja amamane kowe la itre atr laka, tha hna nyitrepene kö la ini cili hnei Tusi Hmitrötr. Tusi Hmitrötre pe a qaja ka hape, hetre melehmaca. Ketre, itre xaa hmi a inine la itre atr ka hape, ase hë cinyihane la pengöne la mele së elany. Ngo jëne la Tusi Hmitrötr, easa amamane kowe la itre atr laka, isa qanyi së kö ië ewekë, tune la troa nyihlue i Akötresie. Celë hi matre kola elëhni hnene la itre hene ne hmi! Maine easa hniin la nyipici, easa mejiune me trongëne la hna qaja hnei Iehova e hnine la Tusi Hmitrötr. (Ioane 8:45, 46) Tha easë kö a tui Satana Diabolo. Easë pe a cile hut ngöne la nyipici, me catre trongëne la itre ini hne së hna kapa qaathei Iehova. (Ioane 8:44) Ketre, Akötresieti a ajane tro sa tui Iesu laka, tro sa “sisine la ngazo” me “hnine la loi.”​—Rom. 12:9; Heb. 1:9. w21.05 10 par. 10-11

Nemene la nyine tro sa kuca e easa öhne laka, easa pi tru me meciun? Öni Paulo aposetolo, ijije hi tro la itre “hna jel” hnei Satana a canga utretr qa ngöne la hnö. (2 Tim. 2:26) Tha tro kö sa thëthëhmine laka, catrecatre kö Iehova hui Satana. Maine tro sa sipo ixatua koi Nyidrë, tro hë sa utretr qa ngöne la nöjei hnö i Satana. Ngo qëmekene troa traqa e cili, nyipiewekë tro sa pane neëne la itre hnö i angeic. Celë hi matre, nyipiewekë la ixatua i Iehova. Loi e tro sa sipo iele Nyidrë troa xatua së matre öhne laka, kola cia the së la itre thiina ka ngazo. (Sal. 139:23, 24) Tha tro pi kö sa nue la itre thiina cili troa cia qa kuhu hni së! Qaane ekö, Satana palahi a thele tha. Ngo calemi hë la ijine troa othi angeic me humuthi angeic. (Hna ama. 20:1-3, 10) Easa lapa treqene la ijine cili! Ame pe, nyipiewekë palakö tro sa isi matre neëne la itre hnö i angeic. Thupëne kö së wanga tro sa pi tru me meciun. Catre pi së “icilekeu me Diabolo, nge tro hë angeic a ananyi [së].” w21.06 19 par. 15-17

Iehova a madrin ngöne la kola kapa me tro fë hnene la itre atr la nyipici koi itre xan. (Ite edomë 23:15, 16) Nge drei jë kö la madrine i Iehova troa goeëne la huliwa ne cainöj enehila! Ngacama hna traqa la meci ka ixötrekeu ngöne lo macatre 2020, ngo traqa koi 7 705 765 lao atr ka ini Tusi Hmitrötr. Ketre, traqa koi 241 994 lao atr ka sa xepu koi Iehova me xomi bapataiso. Nge angatre fe hë a hamë ini me xatua itre xan troa hane xötrethenge Iesu. (Luka 6:40) Eje hi, easa amadrinëne la hni Iehova ngöne la easa cainöj me inine la itre atr. Tha huliwa ka hmaloi kö la troa inine la itre atr. Ngo jëne la ixatua i Iehova, ijije hi tro sa xatua angatr troa hnimi Nyidrë, Keme së e koho hnengödrai. Haawe, catre jë së thele troa nyiqaane ini tus memine la ketre atr. Maine jë tro sa sesëkötre ngöne la easa hnyingëne kowe la ketre atr troa ini tus. Tha tro kö sa thëthëhmine laka, tro Iehova a amanathithine la itre trengecatre së. w21.07 6-7 par. 14-16

Hnei Dravita joxu hna hamëne la itre mo ka tru matre troa nyithupene la itre ewekë nyine xupe la uma ne hmi. (1 A. l. ite jo. 22:11-16) Hnei Dravita hna sajuëne la huliwa cili, ngacama atre hi nyidrë laka, Solomona nekö i nyidrë la ka troa xupe la uma ne hmi. Ketre tu së fe, ngacama tha ijiji së hë troa hane sine la huliwa ne xupi Uma Ne Baselaia, ngo easë palahi a sajuëne la huliwa cili jëne la itre ahnahna së. Ketre, ijije tro sa qaja kowe la itre xötr ka co, la itre hne së hna kuca ekö ngöne la huliwa i Iehova. Hnei Paulo aposetolo fe hna amamai tulu göne la troa hetre hni ne ham. Hnei Paulo hna hë Timoteo, ketre thöth, troa ce tro me nyidrë ngöne la huliwa ne mesinare. (Itre hu. 16: 1-3) E cili, hnei Paulo hna ini Timoteo la aqane troa cainöj me hamë ini. (1 Kor. 4:17) Ketre, hnei Timoteo hna nyitipu Paulo me hane xatua itre xan. w21.09 12 par. 14-15

Nemene la ini hne së hna xom qa ngöne la tulu i Apolo me Paulo aposetolo? Nyidroti la lue ka atre hnyawa la Itre Hna Cinyihan me maca troa hamë ini. Celë hi matre, jëne la ixatua i nyidro, nyimutre la itre atr ka atre la nyipici. Tha hnei nyidroti fe kö hna mekun laka, ka sisitria kö ketre hui ketre. (Itre hu. 18:24) Thupene la Apolo a tro qa Korinito, hnei Paulo hna sipo iele angeice troa bëeke hmaca e cili. (1 Kor. 16:12) Hnei Apolo hna catre cainöjëne la maca ka loi me thuecatrene la itre trejin. Ketre, hnei angeice palahi hna amamane la hni ne ipië i angeic. Ame lo Akula me Perisila a “qejepengöne hnyawa koi angeice la itre jë i Akötresie,” ke, hnei angeice hna drei nyidro hnyawa. (Itre hu. 18:24-28) Eje hi, tru la madrine i Paulo kowe la huliwa hna kuca hnei Apolo. Tha hnei nyidrëti kö hna hnehengazo ke, kola wangatrunyi Apolo hnene la itre trejin. Hnei Paulo hna hetre hni ne ipië me atreine waiewekë hnyawa. Celë hi lai ka mama ngöne lo nyidrëti a hamë eamo kowe la ekalesia ne Korinito.​—1 Kor. 3:4-6. w21.07 18-19 par. 15-17

Hnei Adramu me Eva hna tha idrei, matre tha sine hmaca kö nyidroti la lapa i Iehova. Ngo tune kaa pë hë la itre matra i nyidro? Ka ihnimi Iehova, matre aja i Nyidrëti troa kapa la itre ka idrengethenge. Celë hi matre, hnei Iehova hna huujëne la Nekö i Nyidrëti ka caas. (Ioane 3:16) Jëne la huuje cili, hna aijijëne la 144 000 lao atr ka mele nyipici troa hane nekö i Akötresie. (Rom. 8:15-17; Hna ama. 14:1) Ketre, itre milio la itre atr ka catre nyihlue i Akötresie enehila. Thupene la Caa Thauzane lao macatre, tro fe a aijijë angatr troa hane sine la lapa i Iehova. (Sal. 25:14; Rom. 8:20, 21) Ijiji angatre fe troa hë Iehova ka hape, “Kaka.” (Mat. 6:9) Ketre, tro fe la itre hna amelene hmaca elany a atre la aja i Iehova. Maine tro angatr a drengethenge Iehova, tro hë angatr a sine la lapa i Nyidrë. w21.08 5 par. 10-11

Ame koi Paulo, ka sisitria catre la huliwa ne cainöj. Hnei nyidrëti hna cainöj “ngöne itre hnalapa trootro.” (Itre hu. 20:20) Hnei nyidrëti hna cainöj e nöjei drai! Ame la ketre ijin, Paulo a treqene la lue trejin qa Athenai. E cili, hnei nyidrëti hna cainöj kowe la itre atr, nge hnei angatr hna drei nyidrë. (Itre hu. 17:16, 17, 34) Ame fe la kola akalabusi Paulo, hnei nyidrëti hna cainöj kowe la itre atr e cili. (Fil. 1:13, 14; Itre hu. 28:16-24) Hnei Paulo hna huliwane hnyawa la traeme i nyidrë. Ketre, hnei nyidrëti hna hëne la itre xan troa hane ce cainöj me nyidrë. Ame ngöne lo pane tronge i Paulo ne mesinare, hnei nyidrëti hna ce tro me Ioane, lo hna hën ka hape, Mareko. Nge ame ngöne la hnaaluen, hnei nyidrëti hna hë Timoteo. (Itre hu. 12:25; 16:1-4) Eje hi, hnei Paulo hna ini nyidro la aqane troa eköthe la ketre ekalesia, me xome la hnëqa ne qatre thup, me maca troa hamë ini.​—1 Kor. 4:17. w22.03 27 par. 5-6

Ame itre xan, tha mejiune kö angatr kowe la Atre Xup ke, angatre hi a mejiune kowe la ka mama koi luemek. Ame pe, angatre fe a mejiune kowe la itre ewekë ka tha mama kö, tune la eny. Tusi Hmitrötr a qaja göne la lapaune ka hape, “ej a anyipicine la nöjei ewekë ka tha mama kö koi luemek.” (Heb. 11:1) Ame itre xan, xele kö angatre ma ithel ke, kola xomi traeme me trengecatr. Ngo maine tha ithele kö së, tro hë sa mekun laka, pëkö Atre Xup. Thupene la hna pane ithel, hnene la itre xaa ka inamacan hna öhne laka, Akötresie la Atre Xup la nöjei ewekë asë. Ame lo xötrei, tha mejiune kö itre xan kowe la Atre Xup ke, tha celë kö la hna inine ngöne la itre uma ne ini ka tru. Ame pe, hnei angatr hna thele troa atre Iehova me hnimi Nyidrë. Haawe, nyipiewekë tro sa isa acatrene la lapaune së koi Akötresie, ngacama hne së hna hane tro maine tha tro pena ngöne la itre uma ne ini ka tru. w21.08 14 par. 1; 15-16 par. 6-7

Hnei Iesu hna qaja la ceitune la nekötrahmanyi ka paatr matre troa amamane la ihnim me utipine i Iehova. Hnene la nekötrahmanyi hna trotrije la hnalapa me “aluzine la edrö i angeic hnene la hna mele menu.” (Luka 15:13) Ngo eloine pe, hnei angeic hna nuetrije la itre huliwa ka sis, me ietra, me bëeke hmaca kowe la hnalapa. Nemene la hna kuca hnei kem? Öni Iesu: “Angeice pala kö e gaa nany, nge öhnyi angeice ju hi hnei kem. Ame hnei nyidrëti hna utipi angeic, me nyinyap, me haluthi angeic, me dremi angeic.” Eje hi, tha hnei keme kö hna ahmahmanyi angeic. Hnei nyidrëti pe hna hetre hni ne utipin me nue la ngazo i angeic. Ngacama tru catre la ngazo ne la nekötrahmany, ngo hnei angeic hna nyipi ietra. Ame ngöne la ceitune celë, Iehova la kem ka utipin. Iesu a amamane laka, aja i Iehova troa nue la ngazo ne la itre ka ietra.​—Luka 15:17-24. w21.10 8 par. 4; 9 par. 6

Hapeu, Itretre Anyipici Iehova kö la nöje ka xome la ëje i Akötresie? Ame enehila, hnene la itre hene ne hmi hna juetrëne la ëje i Akötresie kowe la itre atr. Hnei angatr hna xometrije ej qa hnine la Tusi Hmitrötr, me wathebone la itre atr troa qaja la ëje i Nyidrë ngöne la angatr a hmi. Eje hi, Itretre Anyipici Iehova hmekuje hi la ka qaja la ëje i Akötresie. Nge easa kuca la hne së hna atrein, matre troa metrötrëne la ëj hne së hna xom! (Is. 43:10-12) Eje hi, ase hë sasaithe la 240 milio lao Tusi Hmitrötr hna fejan tune lo hna hape, Tusi Hmitrötr Fene Ka Hnyipixe Hna Ujën. Ame ngöne la Tusi Hmitrötr cili, hna amë hmaca la ëje i Iehova ngöne la itre götrane hna xometrij hnene lo itre ka ujëne la Tusi Hmitrötr ekö. Ketre, easa fejan la itre itus ka qaja la ëje i Iehova ngöne la 1 000 nge hetre munëne lao qene hlapa! w21.10 20-21 par. 9-10

Troa xatuane la ketre trejin. Öni Iehova kowe la angetre Isaraela ekö ka hape, tro kö Nyidrëti a amanathithine la itre ka hnime la itre ka pë ewekë. (Deu. 15:10) Ame koi Iehova, ketre ahnahna koi Nyidrë la easa xatuane la ketre trejin. (Ite edomë 19:17) Ame la itre Keresiano ne Filipi a iupi fë ahnahna koi Paulo ngöne la kalabus, öni nyidrë ka hape, ketre “huuj ka amadrinë Akötresie.” (Fil. 4:18) Ketre tune fe, loi e tro sa isa hnying ka hape: ‘Hetre trejine kö e hnine la ekalesia ka aja ixatua?’ Iehova a madrin ngöne la easa nue la traeme së me trengecatr me itre hne së hna atrein me itre mo së, matre troa xatuane la itre trejin. Aqane tro hi së lai a atrunyi Iehova. (Iako. 1:27) Nyipiewekë tro sa nue la traeme së me trengecatr matre troa atrunyi Iehova. Ngo tha ketre ehnefe kö lai koi së. (1 Ioane 5:3) Pine nemen? Pine laka, tru la ihnimi së koi Iehova me kowe la itre trejin me easë. w22.03 24 par. 14-15

Easa amamane la hni ne utipine së, ngöne la easa sa thele troa pane atre la itre jol hna cile kow hnene la itre trejin. Pane mekune jë së la lue ceitun celë. Maine jë, hna tithi hnei mec ketre trejine föe, ngo tha hnei eahlo kö hna qaja koi itre xan. Nyipici maine tro sa xatua eahlo, tro hë eahlo a madrin. Hapeu, ijije kö tro sa tro fë xen maine ixatua göi nyidrawa uma? Maine jë pena, pëhë huliwa ne la ketre trejin trahmany. Tune kaa e tro sa hamë manie koi angeic, ngo tha tro pe sa qaja la ëje së? Eje hi, angeice hi a ajane la ka ijij uti hë la tro angeic a öhne la ketre huliwa. Tha tro kö sa treqene tro la itre trejin a sipo ixatua koi së. Nyipiewekë troa canga thele troa xatua angatr. Eje hi, Iehova a amejëne la jö e nöjei drai, ngacama tha hne së kö hna sipo Nyidrë! Easë asë hi a kepe eloine qa ngöne la idreuthine la jö. Tha kolo hmekuje kö lo itre ka olene koi Iehova. Drei la ketre tulu ne ihnim ka sisitria koi së! Nyipici, Akötresieti ka lolo nge ka hame Iehova. Nyidrëti a hamë së la nöjei ewekë ka lolo thatraqane la mele së. Hapeu, tha kolo kö lai a upi së troa acatrene la ihnimi së koi Nyidrë! w21.09 22-23 par. 12-13

Hnene la ihnimi nyipici Iehova matre Nyidrëti a nue la itre ngazo së. Jëne la thiina cili, Iehova nue la ngazo ne la atr ka ietra me saze la aqane ujë i angeic. Öni Dravita göi Iehova: “Tha hnei nyidëti kö hna kuca koi shë cei tune memine la ite ngazo shë; nge tha hna të koi shë cei tune memine la ite menu shë.” (Sal. 103:8-11) Atre hnyawa hi Dravita laka, hace catre la kola huliwa la mekuthetheu së. Ngo xecie fe koi angeic laka, Iehova la “ate sheng” la itre ngazo së. Pine nemene matre Iehova a nue la itre ngazo së? Kola sa la hnying celë ngöne la topik enehila. Tune la hnei Dravita hna qaja ngöne la thithi angeic, ihnimi nyipici la ka upi Iehova troa nue la ngazo ne la itre ka ietra. Kola huliwa la mekuthetheu së ngöne la easa kuca la ketre ewekë ka ngazo. Ngo ka loi hi lai ke, celë hi ka troa upi së troa ietra me saze. w21.11 5 par. 11-12

Ka tru koi Iehova la ëje i Nyidrë, matre aja i Nyidrëti tro la nöjei atr a metrötrëne ej. (Is. 42:8) Ngazo pe, traqa koi 6 000 hë lao macatre enehila ne kola adrone la ëje i Nyidrë. (Sal. 74:10, 18, 23) Hnei Diabolo (maine “Atre ixöjetrij”) hna silitrengathoi Akötresie. Öni angeic ka hape, Iehova a cipane koi Adramu me Eva la ketre ewekë ka loi. (Gen. 3:1-5) Ame fe enehila, Satana a silitrengathoi Iehova ka hape, Nyidrëti a cipane kowe la itre atr la itre ewekë ka loi thatraqane la mele i angatr. Tha madrine kö Iesu kowe la aqane adrone la ëje ne la Keme i nyidrë. Iehova hmekuje hi la ka ijij troa musi e hnengödrai me e celë fen, nge ka draië catre kö la musi Nyidrë. (Hna ama. 4:11) Ngo hnei Diabolo hna iaöne la itre angela me itre atr ka hape, tha meköti kö tro Nyidrëti a mus. Calemi hë la ijine troa nyinyine la jol göne la musi cile i Iehova Akötresie. E cili, tro ha anyipicine laka, Baselaia i Akötresie hmekuje hi la ka troa hamë mele ka loi me tingeting kowe la fen. w21.07 9 par. 5-6

Ijije hi tro la kem a hnehengazo göi xen, me hna heetr, me hnalapa i angeic me fami angeic. Hapeu, epuni kö a cile kowe la itre jol göi manie? Maine eje hi, ijije hi tro epuni a catre lapaun. Nemene la nyine troa kuca? Loi e troa catre thith koi Iehova. Loi e tro fe a e me lapa mekun la hna qaja hnei Iesu ngöne Mataio 6:25-34. Ketre, loi e troa xomi ini qa ngöne la aqane xatuane Iehova la itre hlue i Nyidrë. Eje hi, hnei Iehova hna thupë angatr ke, hnei angatr hna catre nyihlue i Nyidrë. (1 Kor. 15:58) E cili, tro ha xecie koi epun laka, tro Iehova a xatua epun, tune lo aqane xatua angatr hnei Nyidrë. Atre hi Nyidrë la ka nyipiewekë kowe la mele i epun. Ame la epuni a öhne la ixatua i Iehova ngöne la mele i epun, kola acatrene la lapaune i epun. Nge tro hë epuni lai a atreine cile catr kowe la itre jol elany. w21.11 20 par. 3; 21 par. 6

Hnene la itre ini göne la thupene mel hna acatrene la lapaunene la itre Keresiano. Celë hi ka xatua angatr troa catre cainöj me xomihnine la itre jol ka tru, ngacama qatre catre hë angatr. Tro sa ce wang la tulu i Ioane aposetolo. Hnei nyidrëti hna catre cainöjëne la nyipici göi Iesu me göne la thupene mel, koi 60 lao macatre. Ame hë la kola traqa koi 100 lao macatre i Ioane, hna akalabusi nyidrëti ngöne la hnapet e Patamo. Easa öhne la aqane xoue Ioane hnene la musi angetre Roma. Nemene la ngazo i Ioane? Hnei nyidrëti “hna qeje Akötresie me anyipici Iesu.” (Hna ama. 1:9) Drei la ketre tulu ne lapaune me xomihni! Ame ngöne la itre tusi hna cinyihane hnei Ioane, hnei nyidrëti hna qaja la etrune la ihnimi nyidrëti koi Iesu, me hni ne ole i nyidrëti kowe la thupene mel. Traqa koi 100 lao qaja nyidrëti la thupene mel memine la itre eloine ej. (1 Ioane 2:2) Eje hi, tru la hni ne ole i Ioane kowe la thupene mel. w21.04 17 par. 9-10

Hnei Iehova hna upe la itre hlue i Nyidrëti ekö troa nyipiine la itre sinatr. Tha tro kö angatr a ëjine la ka simi hnangenyë, me akötrëne maine xöjetriji angeic pena. Drei la ketre aqane ujë ka ngazo! Eje hi, tha drenge kö angeic la itre hna qaja, matre tha ijiji angeice kö troa sa kowe la ka xöjetriji angeic. Ketre, kola qaja ngöne Levitiko 19:14 ka hape, tha tro kö la atre Isaraela a ‘amë la ketre ewekë qëmekene la timek.’ Kola qaja ngöne la ketre itus ka hape: “Ame ekö ngöne la itre xaa nöj e Proche-Orient ke, hna qanangazone me axösisine la itre sinatr.” Itre xan a amë qëmekene la ka timek la itre ewekë, matre troa akeinyi angeic me hnyimasai angeic. Drei la ketre aqane ujë ka ngazo! Jëne la Levitiko 19:14, Iehova a amekunëne la angetre Isaraela troa hnime me utipine la itre sinatr. w21.12 8-9 par. 3-4

Atraqatr la xou Iakobo pine la trejin me nyidrë. Matre, hnei nyidrë hna pane qaja koi Iehova la jole cili. Thupene lai, hnei nyidrë hna iupi fë la itre ahnahna ka tru. (Gen. 32:9-15) Nge ame hë la Iakobo a iöhnyi me Esau, hnei nyidrë hna sa iwatingöneca; tha hna acaas maine alu, ngo traqa koi 7 lao sa iwatingöneca nyidrë! Eje hi, hnei Iakobo hna hetre hni ne ipië me metrötr, matre troa iloi memine la trejin me nyidrë. (Gen. 33:3, 4) Hetre ini hne së hna xom qa ngöne la tulu i Iakobo. Qëmekene tro nyidrë a iloi me Esau, hnei nyidrë hna hetre hni ne ipië me sipo ixatua koi Iehova. Thupene lai, hnei nyidrë hna thele aqane troa iloi me Esau. Ame hë la Iakobo a iöhnyi me Esau, tha hnei nyidrëti kö hna upezö Esau me qaja ka hape, ka tria la mekuna i angeic. Ame la aja i Iakobo, tre, troa iloi me angeic. Tro kö sa nyitipu Iakobo?​—Mat. 5:23, 24. w21.12 25 par. 11-12

Maine jë, hnei epuni fe hna mekun laka, tha ijiji epuni kö troa kapa la ahnahna cili, ene la thupene mel. Pine nemen? Pine laka, tha ka pexeje kö së matre kola iaö së hnene la hni së. Easë fe a mekun laka, tha ka nyipiewekë kö së matre tha ijije kö troa hnimi së. (1 Ioane 3:19) Loi e tro pe sa mekun laka, “draië kö Akötresie hune la itre hni së.” Haawe, tha luelue kö së laka, atraqatr la ihnimi Iehova koi së, nge aja i Nyidrë troa nue la itre ngazo së. Celë hi matre, nyipiewekë tro sa catre inine la Tusi Hmitrötr, me catre thith, me cememine la itre hlue i Iehova. Pine nemen? E cili, tro hë sa atrepengöi Iehova hnyawa memine la itre thiina i Nyidrë, me öhne la etrune la ihnimi Nyidrëti koi së. Ketre, loi e tro sa lapa mekun la itre xötr hne së hna e, matre troa “xom amekötine la nöjei ewekë” ngöne la hni së me mekuna së.​—2 Tim. 3:16. w21.04 23-24 par. 12-13

Hetre ewekë nyine tro sa kuca matre acatrene la lapaune së. Nyipiewekë tro sa lapa mekun la itre hne së hna e. Hanawang la tulu ne la atre cinyihane la Salamo 77. Hnei angeic hna mekun laka, tha kepe angeic hmaca kö me angetre Isaraela hnei Iehova. Celë hi matre, kucakuca catre angeic nge thatreine hë angeice meköl. (Xötr 2-8) Nemene la hnei angeic hna kuca? Öni angeic koi Iehova: “Tro ni a mekune la ite huliwa i cilie asë; nge tro ni a lapa mekune la ite hnei cilieti hna [kuca].” (Xötr 12) Eje hi, tha thëthëhmine kö angeic la itre hnei Iehova hna kuca ekö kowe la nöje i Nyidrë. Ame pe, hnei angeic hna hnehengazo me hape: “Hape u, thëthëhminejë hë Akötesie troa ihnim? nge hape u, ase hë thinge la tenge ihnimi ka menyike i nyidë hnene la elëhni?” (Xötr 9) Hnene la atre cinyihane la Salamo hna lapa mekun la itre huliwa i Iehova, me aqane ihnimi Nyidrë me nue Nyidrëti la ngazo i angatr. (Xötr 11) Nemene la thangan? Xecie koi angeic laka, tha tro jë kö Iehova a nuetrije la nöje i Nyidrë. (Xötr 15) w22.01 30-31 par. 17-18

Nemene la mekuna i Iehova göne la itre hlue i Nyidrëti ka mec? Nyidrëti a lapa treqene la ijine tro Nyidrëti a amele angatre hmaca! (Iobu 14:15) Nyidrëti a ajane troa amele Aberahama, sinee i Nyidrë. (Iako. 2:23) Ketre tui Mose, hnei Iehova “hna itö ineqë” me angeic me ithanata meköti koi angeic. (Eso. 33:11) Iehova fe a lapa treqene la ijine tro Nyidrëti a drenge hmaca la itre nyima i Dravita me itretre cinyihane la salamo! (Sal. 104:33) Ngacama meci hë angatr ekö, ngo tha hnei Iehova kö hna thëthëhmine la itre sinee i Nyidrë. (Is. 49:15) Eje hi, mekun palahi Iehova la itre thiina ka lolo i angatr. Calemi hë la ijine tro Iehova a amele angatre hmaca. Tro hë Nyidrëti a dreng la itre thithi angatr me madrine troa kapa la aqane atrunyi Nyidrëti hnei angatr. Haawe, maine hna meci la ketre sinee së, tro la itre mekun celë a xatua së me akeukawane la hni së. Qaane lo kola icilekeu e Edrena, atre hi Iehova laka, troa pane ngazo catre la fen, qëmekene troa tingeting. Methi Nyidrëti la iakötrë, me huliwa ka tha meköti kö, me isi. w21.07 10 par. 11; 12 par. 12

Ame la easa ihnim, easë hi lai a amamane la hni ne ole së kowe la thupene mel. Pine nemen? Pine laka tha hnei Iesu kö hna meci thatraqai së hmekuj, ngo thatraqane fe la itre trejin. Kolo lai a hape, ka sisitria catre angatr koi nyidrë. (1 Ioane 3:16-18) Celë hi matre, loi e troa mama la ihnimi së koi angatr ngöne la aqane ujë së. (Efe. 4:29, 31–5:2) Maine jë, tro sa xatua angatr ngöne la angatr a cile kowe la itre jol, tune la kola tithi angatr hnei mec me lepi angatr hnei hulö. Ngo nemene la aqane ujë së ngöne la kola akötrë së hnene la ketre trejin? Hapeu, jole kö troa nue la ngazo hna kuca koi së? (Lev. 19:18) Maine eje hi, loi e tro sa trongëne la eamo celë, ka hape: “The mano kö nyipunie ixomihnikeu me inualoinekeun, ngacama kola ngazo koi nyipunie. Nge loi e tro fe nyipunieti a nyitipune la aqane nue Iehova la itre ngazo i nyipunie.” (Kol. 3:13) Ame la easa nue la ngazo i itre xan, easë lai a amamane koi Iehova la hni ne ole së kowe la thupene mel. w21.04 18 par. 12-13

Loi e tro sa catre huliwa koi Iehova me xatuane la ka alanyimu troa atre la nyipici. Ame pe, tha tro kö sa thëthëhmine laka, Iehova la ka xatua së matre hetre thangane la huliwa së. Tui Apolo me Paulo aposetolo, nyipiewekë tro la itre trejin ka cilë hnëqa a sajuëne la tingeting me caasi e hnine la ekalesia. Easa madrine la angatr a nyitrepene la itre eamo i angatr hnei Tusi Hmitrötr, me xatuane la itre trejin troa nyitipu Keriso. (1 Kor. 4:6, 7) Nyipici, hnei Iehova hna xupi së matre hetre itre hne së hna isa atreine kuca. Maine jë, tro sa mekun laka, pëkö hne së hna kuca. Ame pe, tha tro kö sa thëthëhmine laka, ngacama ka co hi la hna kuca, ngo ijije hi troa caasi la ekalesia. Ceitune hi lai memine la easa xome la thenyi me nyilan, matre troa ce cane la itre sine mano matre troa kuca la ketre iheetr ka mingöming. Haawe, tha tro kö sa pi mama me sipu selë së. Ngo loi e tro pe sa catre thele la caasi me tingeting e hnine la ekalesia.​—Efe. 4:3. w21.07 19 par. 18-19

Loi e xecie fe koi epun laka, tro hmaca epuni a iöhnyi memine la itre sinee i epuni ka meci hë. Eje hi, hnei Iesu hna treij ngöne lo nyidrëti a akeukawane la hni ne la itre sinee i nyidrë. Kolo lai a amamane la aja i nyidrë troa amelene hmaca la itre atr! (Ioane 11:35) Ijije hi tro sa xatuane la itre ka treij me akötr. Tha hnei Iesu hmekuje kö hna ce treij me Maretha me Maria. Ngo hnei nyidrëti mina fe hna drei nyidro me akeukawane la hni nyidro. (Ioane 11:25-27) Ketre tu së fe, loi e tro sa xatuane la itre ka treij me akötr. Öni Dan, ketre qatre thup qa Australie: “Eni a aja ixatua ngöne lo kola meci la föeng. Hnene la itre xaa trefën hna traqa troa wai ni e lai me jidr me drei ni. Hnei angatr hna nue ni troa treij, me xatua ni. Hnei angatr hna wasine la lotong, me komisio, me kuci xen ngöne la eni a kucakuca. Nge hnei angatr hna ce thithi me eni. Eje hi, itre ‘trejin angatr ngöne la itre ijine akötr.’ ”​—Ite edomë 17:17, MN. w22.01 16 par. 8-9

Iehova a ajane la itre ewekë ka loi koi së. (Ite edomë 4:20-22) Nyidrëti a amamane la ihnimi Nyidrëti koi së ngöne la Nyidrëti a hamë eamo jëne la Tusi Hmitrötr, la itre itusi së, maine ketre trejin pena ka macaj. (Heb. 12:9, 10) Tro sa goeëne la aliene la eamo, ngo tha aqane hamëne kö. Ame itre xaa ijin, easa mekun laka, tha ka loi kö la aqane hamëne la eamo. Maine easa ajane troa hamë eamo koi ketre, loi e tro sa ithanata amenyikene matre hmaloi koi angeic troa kapa. (Gal. 6:1) Ngo maine easë la ka kapa la eamo, loi e tro sa goeëne la aliene ej ngacama tha ka loi kö la aqane hamën. Loi e tro sa isa hnying ka hape: ‘Ngacama tha ka madrine kö ni kowe la aqane hamë eamo ne la trejin, ngo hapeu, tha ka nyipici kö la hnei angeic hna qaja? Hapeu, tro kö ni a goeëne catrëne la itre tria ne lai trejin, maine pena la aliene la eamo hnei angeic hna hamën?’ Ka inamacane la atr ka kapa madrin la itre eamo. Loi e tro sa thele eamo matre kepe manathith. w22.02 12 par. 13-14

Atre hi Iehova laka, nyipiewekë tro sa xomi ijine me nue trengecatr, matre troa thipetrije la itre mekun me itre hna majemin ka ngazo. (Sal. 103:13, 14) Celë hi matre, Iehova a xatua së jëne la Tusi Hmitrötr, me uati hmitrötr, me organizasio i Nyidrë. Hnei Nyidrëti hna hamëne la inamacan me trengecatr me ixatua ka ijij, matre tro sa saze la mele së. Troa isa waipengö së jëne la Tusi Hmitrötr. Hna aceitunën la Tusi Hmitrötr memine la ketre ithulu. Ej a aijijë së troa isa waipengö së ngöne la aqane mekun, aqane ithanata, me aqane ujë. (Iako. 1:22-25) Eje hi, aja i Iehova troa xatua epun. Atre hi Nyidrëti la itre hnei epuni hna ajan me itre aliene hni epun. (Ite edomë 14:10; 15:11) Celë hi matre, nyipiewekë tro epuni a catre thith me inine la Tusi Hmitrötr e nöjei drai. Troa xecie koi së laka, ka sisitria catre la itre trepene meköti Iehova. Eje hi, hetre eloin e tro sa drengethenge Iehova. Ame la itre ka trongëne la itre trepene meköti Iehova ke, angatr a metrötrëne la mele i angatr. Hetre aliene la mele i angatr nge angatr a madrin.​—Sal. 19:8-11. w22.03 4 par. 8-10

Troa xup me nyidrawane la itre uma ne hmi së. Öni Tusi Hmitrötr ka hape, ketre huliwa ka “hmitrötr” la kola acile la uma mano me kuca la itre aliene ej. (Eso. 36:1, 4) Ketre tune enehila, ketre huliwa ka hmitrötr koi Iehova la troa xupe la itre Uma Ne Baselaia me itre xaa uma thatraqane la hmi ka wië. Ame la itre xaa trejin, angatr a nue la traeme i angatr troa hane sine la huliwa cili. Hapeu, hetre hni ne ole së kö koi angatr? Angatre fe a catre cainöj me ajane troa xome la huliwa ne pionie. Tro la itre qatre thup a amamane la hni ne ole i angatr, ngöne la angatr a aijijëne la itre trejin cili troa hane pionie. Ngacama tha ijije kö tro sa hane sine la huliwa ne xupi Uma Ne Baselaia, ngo easa atrunyi Iehova ngöne la easa nyidrawane la itre hnë hmi së. w22.03 22 par. 11-12