Diseba

Hnei Iesu hna aceitunëne la itretre drei nyidrë me itre mamoe. (Ioane 10:14) Ame la itre mamoe ke, canga wangatrehmekune hi itre ej la nin ne la atre thupë mamoe. Önine la ketre atr ka ihamë: “Hne huni hna tupath troa hëne la itre mamoe matre kuca la ketre video. Ngo tha xötrethenge huni kö hnei itre ej ke, tha wangatrehmekune kö la itre nine hun. Ame la kola ihë hnene la nekötrahmanyi ka thupë mamoe, itre eje hi lai a xötrethenge angeic.” Kola amekunë së hnene la hna melën hnene la atre ihamë, lo hna qaja hnei Iesu kowe la itretre drei nyidrë. Öni Iesu: “Tro nyudreni a drenge la aqane ewekëng.” Tro sa drei Iesu tune kaa nge nyidrëti pe e hnengödrai? Easa drengethenge Iesu ngöne la easa trongëne la itre ini i nyidrë ngöne la mele së.​—Mat. 7:24, 25. w21.12 16 par. 1-2

Hnei Paulo ekö hna icilekeu memine la itre hlue i Iehova. Ngo ame hë e thupen, hnei nyidrëti hna wangatrehmekune la itre ngazo i nyidrë, me thele troa saze. (1 Tim. 1:12-16) Jëne la ixatua i Iehova, ketre atre thup ka ihnimi Paulo, me utipin, me hetre hni ne ipië. Xecie koi Paulo laka, hnei Iehova hna nue la itre ngazo i nyidrë. (Rom. 7:21-25) Celë hi matre, hnei nyidrëti hna thele troa saze, me thele ixatua thei Iehova matre eatrëne hnyawa la hnëqa i nyidrë. (1 Kor. 9:27; Fil. 4:13) Tha hna iëne kö la itre qatre thup ke, itre atr ka pexeje angatr. Iehova pe a ajane tro angatr a wangatrehmekune la itre tria i angatr me eënyine la itre thiina ka lolo. (Efe. 4:23, 24) Ame la angatr a ini Tusi caas, angatr a öhne la itre nyine troa saze. Tro hë Iehova lai a xatua angatr troa xome la hnëqa i angatr me madrin.​—Iako. 1:25. w22.03 29-30 par. 13-15

Nemene la nyine tro sa kuca e hne së hna qejegelene la ketre trejin, ngo ka tria pe la mekuna së? Loi e tro sa acatrene la ihnimi së koi angeic. (Iako. 2:8) Ketre, loi e tro sa sipo ixatua koi Iehova ngöne la thith, matre tha tro kö sa iwaigele. Thupene lai, loi e tro sa ujë thenge la itre thithi së. Maine jë, tro sa sipo angeic troa ce cainöj me easë, maine könë angeic pena troa xen. Tui Iehova me Iesu, loi e tro sa thele la ka loi thei angeic. Aqane tro hi së lai a drengethenge la atre thup ka lolo, lo nyidrëti a hape, tha tro kö a qejegele itre xan. Ame la itre mamoe ke, wangatrehmekune hi itre eje la nin ne la atre thupë mamoe. Ketre tune fe, wangatrehmekune hi la itretre drei Iesu la nine i nyidrë. Ngacama easa sine “la itre mamoe ka xalaith” maine “itre xaa mamoe” pena, ngo loi e tro sa catre drengethenge la atre thup ka lolo.​—Luka 12:32; Ioane 10:11, 14, 16. w21.12 19 par. 11; 21 par. 17-18

Ame lo kola acili Reoboama troa joxu ne Isaraela, hnene la itre atrene la nöj hna sipo nyidrë troa ahmaloeëne la huliwa hna ahnithe hnei Solomona joxu, keme i nyidrë. Hnei Reoboama hna pane thele eamo thene la itre qatre ne la nöj. Öni angatr ka hape, maine tro nyidrëti a kapa la sipo ne la nöj, tro palahi angatre lai a sajuë nyidrë. (1 Ite jo. 12:3-7) Ngo tha madrine kö Reoboama la eamo cili, matre hnei nyidrëti hna thele eamo pena thene la itre ka ce tru me nyidrë. Hnei angatr hna upi nyidrë troa nyixane la huliwa ne la nöj. (1 Ite jo. 12:9-11) Maine ju, tro Reoboama a sipo ixatua koi Iehova, matre axecië mekune hnyawa. Ngazo pe, hnei nyidrëti hna dreng la itre sine xötre i nyidrë. Nge hna hetre ethane koi nyidrë me kowe la nöje Isaraela. Ketre tu së fe, maine jë, troa hamë eamo koi së ngo tha hne së pe hna ajane troa dreng. Ngo maine hna nyitrepen hnei Tusi Hmitrötr, loi e tro sa kapa la eamo cili. w22.02 9 par. 6

Ame la atr ka hetre hni ne ipië me atreine waiewekë ke, tha angeice kö a goeëne la hna thatreine kuca hnene la itre xötr ka co. Angeice pe a mejiune koi angatr. Tha angeice kö a goeë angatr ceitu me itre ka thapa la hnëqa i angatr, ngo itre ka ce huliwa pe me angatr. Itre trejin ka qatre hë a goeëne la itre xötr ka co ne la ekalesia ceitu me itre ahnahna qaathei Iehova. Angatr a madrine la itre hnei nyudreni hna kuca. Ngacama angatr a uti ipië trootro, ngo angatr a mejiune laka, itre xötr ka co a catre huliwa me ixatua ngöne la ekalesia. Tusi Hmitrötr a qaja la tulu i Naomi. Ngacama qatre föe hë Naomi, ngo hnei eahlo hna nue la ketre föe ka co troa xatua eahlo. Thupene la kola meci la nekö i Naomi trahmany, hnei eahlo hna pane upi Rutha, tresi eahlo, troa bëek kowe la fami angeic. Ngo xele kö Rutha ma nue eahlo. Hnei angeice pe hna iele Naomi troa ce tro me eahlo e Bethelema. Nge hnei Naomi hna kapa la mekuna i Rutha. (Rutha 1:7, 8, 18) Drei jë kö la madrine la lue föe! (Rutha 4:13-16) Maine tro la itre trejin ka qatre hë a hetre hni ne ipië, tro hë angatr a nyitipu Naomi. w21.09 10-11 par. 9-11

Atre hi Iehova Keme së laka, hetre hne së hna isa atreine kuca. Maine jë, tru kö la hnei epuni hna kuca hune la itre sinee i epun. Maine pena, thatreine kö epuni huliwa catr ke, epuni a uti ipië trootro me wezipo, maine pena hetre hnëqa i epun ngöne la fami. Ngo tha tro pi kö a kucakuca. (Gal. 6:4) Tha tro kö Iehova a thëthëhmine la itre huliwa i epun. Maine tro epuni a hamën la hnei epuni hna atrein, cememine la ihnim, tro hë Nyidrëti a madrin. Öhne hi Iehova la itre hnei epuni hna pi kuca koi Nyidrë. Ngo Nyidrëti a ajane tro epuni a madrine la hnei epuni hna kuca enehila, matre troa atrunyi Nyidrë. Ketre, tingetinge la mele së ke atre hi së laka, Iehova a xatuane la itre hlue i Nyidrë ka cile kowe la itre jol. (Is. 41:9, 10) Celë hi kepin matre easa madrine troa atrunyi Iehova Keme së ka tru ihnimin, nge ka “ijije troa kapa la lolo me iatrunyi” qa ngöne la nöjei ewekë asë hna xup!​—Hna ama. 4:11. w22.03 24 par. 16; 25 par. 18

Easa ajane troa nyitipu Iesu, ngo tha tro pi kö sa hnehengazo menu, e thatreine kö së troa xötrethenge hnyawa la tulu i nyidrë. (Iako. 3:2) Pane mekune jë së la ka inin troa peidr. Eje hi, thatreine kö angeice troa peidre hnyawa tune la atre ini angeic. Ngo maine tro angeic a xomi ini qa ngöne la itre tria i angeic, me thele troa nyitipun hnyawa la atre ini angeic, tro hë angeice lai a maca. Ketre tu së fe, loi e tro sa trongëne hnyawa la itre trepene meköti Iehova, me xomi ini qa ngöne la itre tria së. E cili, tro hë sa nyitipu Iesu me xötrethenge hnyawa la itre thupa ca i nyidrë. (Sal. 119:59) Ame la itre atr enehila ke, angatr a pi mama me meku angatre hi. Ngo tha celë kö lai aqane ujë ne la itre hlue i Iehova. Eje hi, hna ketri së hnene la aqane nyipiine Iesu la itre xan. Celë hi matre, easa ajane troa nyitipu nyidrë. (1 Pet. 2:21) Haawe, loi e tro sa catre thele troa nyitipune la aqane nyipiine Iesu la itre xan. E cili, tro hë sa madrin nge tro ha kepe së hnei Iehova. w22.02 24 par. 16; 25 par. 18

Iehova a eatrongëne la nöje i Nyidrë enehila jëne la Tusi Hmitrötr. Maine tro sa xomi ijine matre troa lapa mekun la itre ini qaathei Iehova, tha jole hë koi së troa drengethenge la itre hna amekötin me catre cainöj. (1 Tim. 4:15, 16) Ame enehila, Iehova a hamë së la itre xaa hna amekötin jëne la “hlue ka nyipici me ka inamacan.” (Mat. 24:45) Ngo ame itre xaa ijin, tha trotrohnine kö së la itre hna amekötin cili. Maine jë, kola troa upi së troa hnëkë kowe la ketre hulö, ka tha hane traqa kö ngöne la nöje së. Nemene la nyine tro sa kuca e cili? Loi e tro sa lapa mekun la itre hna melën e hnine la Tus Hmitrötr. Eje hi, hnene la nöje i Iehova ekö hna trongëne la itre hna amekötin, ngacama tha trotrohnine kö angatr. Hnei angatre hna idrengethenge, matre hna amele angatr.​—A. ame. 7:7; 8:10. w22.03 18-19 par. 15-16

Xecie koi Iesu la hna qaja ngöne la topik ne la drai. Atre hi nyidrëti laka, Iehova hi la ka atre la mele i nyidrëti elany. Ketre, tha tro kö Iehova a thëthëhmine la aqane mele nyipici nyidrë. Nemene la ini hne së hna xom qa ngöne la itre trengewekë i Iesu? Tui Iesu, loi e tro sa nue la mele së koi Iehova me ‘lapaune koi Iehova hnene la hni së ka pexej.’ (Ite edomë 3:5) Hane hi la hna melën hnei Joshua, ketre trejin nekötrahmanyi ka 15 lao macatre. Ngacama hna tithi angeic hnene la ketre mec ka pë nyin, ngo tha hnei angeice kö hna kapa la itre aqane inyië ka tha ihmeku kö memine la wathebo i Iehova. Qëmekene tro Joshua a mec, öni angeic kowe la thine i angeic: “Nenë, ase hë ni nue la meleng koi Iehova. Atre hi ni laka, tro Nyidrëti a amele ni hmaca ke, atre hi Nyidrëti la itre aliene hning memine la ihniming koi Nyidrë.” Haawe, loi e tro sa isa hnying ka hape, ‘Maine kola troa humuthi ni pine la lapauneng, hapeu, tro kö ni a nue la meleng koi Iehova me mejiun laka, tha tro kö Nyidrëti a thëthëhmi ni?’ w21.04 12-13 par. 15-16

Ame la ka thue trengecatre kowe la itre hlue i Iehova ke, ene la huliwa ne cainöj. Ame la easa qaja koi itre xan la itre nyipici qa hnine la Tusi Hmitrötr, kola thue trengecatr koi së ngacama tha kepe së kö hnei angatr. Ame la itre xaa trejin, angatr a kucakuca me hnehengazo ke, tha tru kö la hnei angatr hna kuca ngöne la huliwa ne cainöj. Maine easë fe a hane mekun tun, tha tro pi kö sa thëthëhmine laka, madrine catre Iehova ngöne la easa kuca la hne së hna atrein. Ngacama easa umë ngöne la hnalapa së, ngo madrine catre Iehova ngöne la easa nue trengecatr troa cainöj. Nyidrëti a xatua së troa cainöj kowe la itre ka nyinyin la itre sine meci së, me itre xaa ka huliwa ngöne pital. Eje hi, maine tro sa mekun lo itre hne së hna kuca ekö, tro hë sa kucakuca me akötr. Tha tro pi kö sa thëthëhmine laka, Iehova la Atre Xatua së. E cili, tro hë sa madrin me atreine xomihnine la nöjei akötr. Nyipici, easa jume la itre itine nyipici e kuhu hni ne la itre atr, ngo thatre kö së la itre ka troa cia.​—Ate cai. 11:6. w21.05 24-25 par. 14-17

Hnei Iehova hna amanathithi Dravita. Hnei Nyidrëti hna aijijë angeic troa trenamo me hlemu. Hnei Nyidrëti fe hna xatua Dravita troa ngaane la itre ithupëjia, matre öni Dravita ka hape, “kösaue it’ eje tha nune e kö!” (Sal. 40:5) Ngacama nyimutre la itre föe i Dravita, ngo hnei angeic hna piine la föe i Uria, atre Heth. Hnei angeic hna ce meköl me Batheseba, matre hna upune hnei Batheseba. E cili, hnei Dravita hna kuca matre troa humuthi Uria! (2 Sam. 11:2-15) Hapeu, tha öhne kö Iehova la itre hna kuca hnei Dravita? Hnei Dravita hna meciun me kei kowe la ngazo, ame hna hetre ethan kowe la mele i angeic. Eloine pe, hnei Dravita hna canga ietra me saze. Tru la madrine i Dravita ke, hnei Iehova hmaca hna kepe angeic!​—2 Sam. 12:7-13. w21.06 17 par. 10

Maine jë, tro sa luelu laka, thatreine kö së hamë ini kowe la ketre atr. Maine jë, ame koi së, loi e troa pane hetre atrehmekun me inamacan qëmekene troa inine la ketre atr. Ngo tro sa ce wange la köni mekun ka troa ixatua. Ame la hnapan, ke, atre hi Iehova laka, ijiji së hi troa hamë ini koi itre xan. Ame la hnaaluen, hnei Iesu, ene lo atre “musi hune la nöjei ewekë e hnengödrai me e celë fen,” hna aijijë së troa cainöj. (Mat. 28:18) Nge ame la hnaakönin, ijije hi troa sipo ixatua koi itre xan. Hnei Iesu hna ithanata thenge la itre ini hnei nyidrëti hna kapa qaathene la Keme i nyidrë. (Ioane 8:28; 12:49) Ketre tu së fe, ijije hi tro sa sipo ixatua kowe la atre thupëne la gurupe së me ketre pionie, maine ketre trejin pena ka macaj. Ijije fe tro sa ce tro me angatr ngöne la kola ini tus. Tro hë lai a xatua së matre tha tro kö sa xou troa nyiqane ini tusi memine la ketre atr. w21.07 6 par. 12

Calemi hë la pune la fene celë, matre nyipiewekë tro sa mejiune kowe la itre hna amekötin hnei Iehova. Pine nemen? Pine laka, ame ngöne la akötr atraqatr, tro sa kapa la itre xaa hna amekötin, nge hne së hna tha trotrohnin. Eje hi, tha tro kö Iehova a ithanata meköti koi së. Ngo tro Nyidrëti a hamëne la itre hna amekötin cili jëne la itre trejin hna acil. Tha tro kö sa qeje hune ithanata me luelu, maine hnyingën ka hape, ‘Qaathei Iehova kö la itre hna amekötin cili, maine qaathei angatre hi itre ka elemeken?’ Hapeu, tro kö sa mejiune koi Iehova me organizasio i Nyidrë ngöne la ijine cili? Maine tro sa mejiun me trongën enehila la itre hna amekötin hnei Iehova, tro hë sa kuca tun elanyi ngöne la akötr atraqatr. w22.02 6 par. 15

Jëne la ixatua i Iehova, hnei Gideona memine la ala 300 lao sooc hna ngaan la itre ithupëjia, nge tha hnei angatre kö hna sipu selë angatr. Hnei angetre Eferaima hna elëhni koi Gideona pine laka, tha hnei angeice kö hna hane hë angatr ngöne la kola nyiqaane isi. (A. ame. 8:1) Hnei Gideona hna amexeje koi angatr lo aqane amanathithi angatr hnei Iehova. E cili, “hna pate la elëhni angate koi nyidë.” (A. ame. 8:3) Eje hi, hnei Gideona hna hetre hni ne ipië matre kola tingetinge la nöje i Akötresie. Tha tro kö sa tui angetre Eferaima, ka ajane troa qaja aloinyi angatr nge itre ka sipu selë angatre kö. Ame la ka sisitria catre koi së ke, troa atrunyi Iehova. Maine ketre hene fami epuni maine qatre thup, tune kaa la aqane tro epuni a nyitipu Gideona? Maine ketre trejin a qaja angazone la aqane ujë i epun, tha tro kö epuni a dreng akötrën. Loi e tro pe epuni a qaja aloine la itre hnei angeic hna kuca. Aqane tro hi epuni lai a hetre hni ne ipië. Ame la ka sisitria catr ke, troa thele tingeting me itre xan. w21.07 16-17 par. 10-12

Hnei Iehova hna xupi së hnaiji Nyidrë. Celë hi matre, ijije hi tro sa nyitipune la itre thiina i Nyidrë, tune la ihnim, me utipin, me nyipici, me meköt. (Sal. 86:15; 145:17) Ame la easa eënyine la itre thiina cili, easa atrunyi Iehova me amamane la hni ne ole së koi Nyidrë. (1 Pet. 1:14-16) Ketre, easa amadrinë Nyidrë, nge celë fe hi ka thue madrine koi së. Eje hi, ame la Iehova a xupi së hnaiji Nyidrë, Nyidrëti a aijijë së troa sine la lapa i Nyidrë. Ketre, hnei Iehova hna hnëkëne la ketre götrane ka mingöming. Qëmekene troa xupe la pane atr, hnei Nyidrë hna hnëkëne la ihnadro. (Iobu 38:4-6; Iere. 10:12) Pine laka, ka ihnimi Iehova me catre ham, matre hnei Nyidrëti hna xup la nöjei pengöne ewekë matre tro sa mele madrin. (Sal. 104:14, 15, 24) Thupene la Iehova a xupe la ketre ewekë, öni Nyidrë ka hape, ka “nyipi loi.”​—Gen. 1:10, 12, 31. w21.08 3 par. 5-6

Hnëqa së troa cainöj me inine la itre atr. (Mat. 28:19, 20; Rom. 10:14) Hapeu, epuni kö a ajane troa maca ngöne la hnëqa cili? Loi e tro epuni a inine me trongëne la itre ini qa hnine la boroshür, Troa Atreine e Tus Me Hamë Ini. Ame la ketre mekun nyine tro sa eatrën, tre, tro sa eënyine la itre thiina ka lolo. (Kol. 3:12; 2 Pet. 1:5-8) Eje hi laka, easa ajane troa akökötrene la huliwa së koi Iehova. Ame ngöne la fene ka hnyipixe, tro palakö sa catre huliwa koi Nyidrë. Ngo maine tro sa kuca asë la hne së hna atrein enehila, tro hë sa madrin. Nge ame la ka sisitria ke, troa atrunyi Iehova, “Akötresie ka madrin.” (1 Tim. 1:11) Haawe, catre jë së wangatrune la itre hnëqa hna hamën koi së enehila! w21.08 25 par. 18-20

Maine jë, hna hetru epun ngöne la nyipici. Matre, hna ini epun laka, Iehova la Atre Xup asë. Hnei epuni fe hna inine la itre thiina ka lolo i Nyidrë, memine la aja i Nyidrëti kowe la itre atr. (Gen. 1:1; Itre hu. 17:24-27) Nyimutre la itre ka mekun laka, pëkö Akötresie me Atre Xup. Ame koi angatr, hna xulu xane la itre ewekë ka mel nge hnei itre ej hna saze trootro. Ame fe kowe la itre ka inamacan, tha ka ihmeku kö la hna qaja hnei Tusi Hmitrötr memine la sias. Celë hi matre, angatr a jele hmo la itre atr ka lapaune kowe la Atre Xup. Ngacama ekö hë së maine easë xötrei atre la nyipici, ngo nyipiewekë tro sa acatrene la lapaune së. E cili, tha tro kö a ajojezi së hnene la “itre mekune ka pë alien” nge ka tha ihmeku kö memine la Trengewekë i Akötresie.​—Kol. 2:8. w21.08 14 par. 1-3

Hnei Abela me Noa me Aberahama me Iobu hna amamane la ihnim me metrötre i angatr koi Iehova jëne la hnei angatre hna idrengethenge me lapaun me tro fë la itre huuje koi Iehova. Hnei angatre hna kuca la hnei angatr hna atrein matre atrunyi Iehova, nge hnei Nyidrëti hna kapa la hmi angatr. Thupene lai, hnei Iehova hna hamën la Wathebo i Mose kowe la itre matra i Aberahama. Ame ngöne la Wathebo cili, kola qaja la aqane tro angatr a atrunyi Iehova thenge la aja i Nyidrë. Thupene la kola amele Iesu hmaca qa hna mec, tha hnei Iehova kö hna musinëne la itre hlue i Nyidrë troa drengethenge la Wathebo i Mose. (Rom. 10:4) Ngo loi e tro pe la itre Keresiano a trongëne la wathebo ka hnyipixe, ene la “wathebo i Keriso.” (Gal. 6:2) Eje hi, tha nyipiewekë hmaca kö tro angatr a trongëne la itre wathebo hna amë xötren. Ngo loi e tro pe angatr a nyitipu Iesu me drengethenge la itre ini qaathei nyidrë. Ketre tu së fe enehila, easa kuca la hne së hna atrein matre xötrethenge la tulu i Iesu me amadrinë Iehova me “catr.”​—Mat. 11:29. w22.03 20-21 par. 4-5

Iehova a drenge la kola ithanata hnene la itre neköi Nyidrë. Nyidrëti a drenge hnyawa la nöjei thithi Iesu e celë fen. Hnei Iesu hna sipo ixatua koi Iehova, matre troa iëne lo 12 lao aposetolo i nyidrë. (Luka 6:12, 13) Hnei Iesu fe hna thithi ngöne lo nyidrëti a hnehengazo me kucakuca. Nge hnei Iehova palahi hna drei nyidrë. Ketre, hnei Iesu fe hna thithi qëmekene troa wanaxoeë nyidrë hnei Iudra Isakariota, me thatraqane la itre jol hnei nyidrëti hna troa cile kow. Ngo tha hnei Iehova hmekuje kö hna drenge la itre thithi Iesu, hnei Nyidrëti fe hna upe la ketre angela troa aegöcatrene la Nekö hnimina i Nyidrë. (Luka 22:41-44) Ame fe enehila, Iehova a drenge hnyawa me sa ngöne la nyipi ijin la thithi ne la itre hlue i Nyidrë. (Sal. 116:1, 2) Tro sa ce wange la ka traqa kowe la ketre trejin föe e Inde ka hnehengazo catr. Hnei eahlo hna catre thithi koi Iehova me hape: “Hna qejepengöne hnyawa ngöne la porogarame ngöne JW Télédiffusion ne Mei 2019 la nyine tro ni a kuca ngöne la eni a hnehengazo. Celë hi lai ka sa hnyawa la itre thithing.” w21.09 21-22 par. 6-7

Atre hnyawa hi së laka, jol kowe la itre pane Keresiano ekö troa nue la itre mo i angatr me fek kowe la ketre nöj. Nyipiewekë tro angatr a lapaune laka, tro Iehova a hamën la ka ijij thatraqane la mele i angatr. Eloine pe, hnei Iehova hna hnëkë angatr kowe la jol cili. Faifi lao macatre qëmekene tro la angetre Roma a lep la nöj e Ierusalema, hnei Paulo hna hamën la eamo celë me hape: “Ngöne la aqane mele i nyipunie, the tro kö a hni koi mani, ngo tro pe a melëne la ka ijij. Ke öni nyidrë: ‘Tha tro jë kö ni a triji eö, nge tha tro jë kö ni a nuaxöji eö.’ Qa ngöne lai, tro hë së a catr me qaja ka hape: ‘Iehova la ixatuang, tha tro kö ni a xou. Nemene la hna troa kuca koi ni hnei atr?’ ” (Heb. 13:5, 6) Eje hi, tha jole kö kowe la itre Keresiano ka drengethenge la eamo i Paulo troa ahmaloeëne la mele i angatr, me mel ngöne la ketre uma ka co. Xecie koi angatr laka, tro kö Iehova a hamën la ka ijij thatraqane la mele i angatr. w22.01 4 par. 7, 9

Ame koi epun, nemene la pengöne la atr ka utipin? Maine jë, ketre atr ka loi thiina, ka menyik, ka ihnim, nge ka ham. Easa canga mekun lo tulu hna hamën hnei Iesu göne lo atre Samaria. Ngacama ketre trenyiwa angeic, ngo hnei angeic hna “utipine” me nyihnyawane la ketre atre Iudra hna lepe hnei itre atrekënö. (Luka 10:29-37) Jëne la ceitune celë, kola mama la aqane utipine i Iehova. Celë hi ketre igötranene la ihnimi Nyidrëti koi së o drai. Ame la aqane tro sa utipine la ketre atr ke, tro sa nue la ngazo i angeic, ngacama meköti troa ameköti angeic. Celë hi lai hna kuca hnei Iehova. Öni Dravita: “Tha hnei nyidëti kö hna kuca koi shë cei tune memine la ite ngazo shë.” (Sal. 103:10) Ngo ame itre xaa ijin, Iehova a amekötine la itre atr ka kuca la ngazo. w21.10 8 par. 1-2

Iehova a hetre ihnimi nyipici kowe la itre hlue i Nyidrëti hmekuje hi. Celë hi lai hna qaja hnei Dravita joxu me Daniela perofeta. Öni Dravita: “Epi nyi xane ju la tenge ihnimi cilie koi angete ate cilie.” Öni nyidrëti fe: “Qan’ ekö palua uti hë epine palua la ihnimi Iehova koi angete qoue nyidë.” Ketre, öni Daniela: “Ekölö hi ni Joxu Akötesie, ate ihnimi koi angete aja nyidë, me trongëne la ite wathebo i nyidë.” (Sal. 36:10; 103:17; Dan. 9:4) Eje hi, Iehova a hetre ihnimi nyipici kowe la itre hlue i Nyidrë ke, angatr a atre Nyidrë, me xoue Nyidrë, me hnimi Nyidrë me trongëne la itre wathebo i Nyidrë. Iehova a amamane la ihnimi nyipici Nyidrë kowe la nöje i Nyidrë, itre ka nyihlue i Nyidrë. Qëmekene tro sa atre Iehova, hnei Nyidrëti hna hnimi së, tune la aqane hnime la nöjei atr. (Sal. 104:14) Ngo ame hë enehila, itre hlue i Nyidrëti hë së, matre easa hane kapa la ihnimi nyipici Iehova. w21.11 4 par. 8-9

Easa ajane troa trongëne la hna qaja e celë hnei Iesu. Ame enehila, alanyimu la itre ka dreng me atrune la itre hene ne hmi. Itre atr a tro kowe la itre uma hmitrötr, me itöne la itre itusi angatr, me kuië manie matre sajuëne la aja i angatr. Itre atr a drenge me wangatrune la itre hene ne hmi, matre thëthëhmi Iesu fe hë hnei angatr! Ngo tha celë kö la hne së hna kuca. Eje hi laka, easa metrötrëne la itre ka elemekene la huliwa së. Ngo atre fe hi së lo hna qaja hnei Iesu, ka hape: “Itre trejin asë pë hë nyipunie.” (Mat. 23:8-10) Tha easë kö a atrune la itre atr, tune la itre hene ne hmi me itre hene politik, me sajuëne la itre mekuna i angatr. Easë pe a iananyi memine la kuci politik memine la fene celë. Nge tha easë fe kö a sine la itre huliwa ne hmi.​—Ioane 18:36. w21.10 20 par. 6-7

Maine easa ajane troa hmitrötr, tha tro pi kö sa nue la ketre atr maine ketre ewekë troa thë la aqane imelekeu së me Akötresie. Ketre, easa xome la ëje i Iehova, matre tha tro pi kö sa kuca la ketre ewekë ka troa adrone la ëje i Nyidrë ka hmitrötr. (Lev. 19:12; Is. 57:15) Hnene la angetre Isaraela hna drengethenge la itre wathebo i Iehova. Celë hi aqane amamane angatr laka, Iehova la Akötresi angatr. Kola qaja ngöne Levitiko 18:4: “Qâ i nyipunie troa kuca la ite hnenge hna amekötin, me thupëne la ite wathebonge mate xöte thenge it’ ej.” Ame ngöne la mekene 19, hetrenyi fe la itre xaa hna amekötin kowe la nöje Isaraela. Ame ngöne la xötre 5-8, 21, 22, kola qaja la itre öni hna huujën. Nyipiewekë tro la angetre Isaraela a huujëne itre ej thenge la aja i Iehova, matre tha tro kö a ‘adrone la ewekë ka hmitötre i Iehova.’ Itre xötre celë a ithuecatre koi së troa amadrinë Iehova, me hamë Nyidrëti la itre huuj qa ngöne la ukeineqë së, tune la hna qaja ngöne Heberu 13:15. w21.12 5-6 par. 14-15

Ijije hi tro la itre ka xötrei faipoipo a nyitipune la tulu ne la itre Keresiano ka catre lapaun koi Iehova. Ame la itre xaa trefën, nyimu macatre ne huliwa angatre koi Iehova ngöne la drai ka pexej. Celë hi matre, ijije hi tro epuni a sipo ixatua koi angatr, ngöne la epuni a lapa mekun la itre nyine tro epuni a eatrën ngöne la huliwa i Iehova. Celë hi lai aqane tro epuni a amamane laka, catrecatre la lapaune i epuni koi Iehova. (Ite edomë 22:17, 19) Mekune pala kö, ame la faipoipo ke, ketre ahnahna qaathei Iehova. (Mat. 19:5, 6) Aja i Nyidrë tro la itre ka xötrei faipoipo a kepe eloine qa ngöne la ahnahna cili. Celë hi matre, loi e tro angatr a lapa mekun la itre nyine troa kuca ngöne la mele ne trefën. Hapeu, epuni kö a hamëne la ka sisitria koi Iehova me olene la ixatua i Nyidrë? Loi e tro epuni a thithi thatraqane lai, me thele la itre trepene meköti ka troa xatua epun. Ketre, loi e tro epuni a trongëne la itre eamo hna hamën hnei Iehova. Haawe, itre ka xötrei faipoipo, maine tro epuni a amë panëne la huliwa i Iehova ngöne la mele i epun, tro hë epuni a madrin! w21.11 18-19 par. 16, 18

Tha hnei Iakobo kö hna mekun laka, ka sisitria catre kö angeice hui itre xan. Tha hnei angeice kö hna qaja kowe la itre trejin ka hape, angeice la ketre trejin me Iesu me pi mama fë la itre hnëqa i angeic e hnine la ekalesia. Hnei angeice pe hna hëne la itre Keresiano ka hape, “itre trejin hniminang.” (Iako. 1:16, 19; 2:5) Ketre, tha hnei Iakobo kö hna qaja ka hape, ketre atr ka pexeje angeic. Ini: Tha tro kö sa thëthëhmine laka, itre atr ka tha pexeje kö së. Celë hi matre, tha tro kö sa pi tru me wangacone la itre ka ini tus. Pine nemen? Pine laka, tro hë angatr a mekun laka, thatreine kö angatr nyitipu easë me kuca la aja i Iehova. Ketre, loi e tro sa qaja koi angatr ka hape, ame itre xaa ijin, jole koi së troa trongëne la itre xaa trepene meköti Iehova. Ngo hnei Nyidrëti hna xatua së troa xomihnine la itre jol. E cili, tro hë angatr a atrehmekune laka, ijije fe hi tro angatr a hane mele nyipici koi Iehova me catre huliwa koi Nyidrë. w22.01 11-12 par. 13-14

Maine tro sa nyitipune la aqane waiewekë i Iesu me aqane ujë i nyidrë, tro hë sa xötrethenge la tulu i nyidrë. (Heb. 1:3) Maine jë, tro epuni a qaja ka hape: ‘Atr ka pexeje Iesu, matre thatreine kö ni troa xötrethenge hnyawa la tulu i nyidrë!’ Ngo tha tro kö epuni a thëthëhmine la köni ewekë celë. Ame la hnapan, hna xupi së matre tro sa atreine nyitipu Iehova me Iesu. (Gen. 1:26) Ame la hnaaluen, uati hmitrötr la trengecatre i Akötresie. Jëne la trengecatre cili, ijije hi tro epuni a kuca la itre hnei epuni hna thatrein. Nge ame la hnaakönin, atre hnyawa hi Iehova laka, thatreine kö epuni troa hetrenyi asë la itre thiina i Nyidrë. Celë hi kepin matre hnei Nyidrëti hna nue la 1 000 lao macatre matre tro la itre ka mejiun troa mel e celë fen a pexej me mel uti hë la pun. (Hna ama. 20:1-3) Celë hi matre, Iehova a ajane tro sa kuca la hne së hna atrein koi Nyidrë me sipo ixatua fe koi Nyidrë. w22.03 9 par. 5-6

Ame la easa thith ke, tha celë hmekuje kö la ka acatrene la lapaune së koi Iehova. Ngo nyipiewekë fe tro sa inine la Tusi Hmitrötr me sine la itre icasikeu. Nemene la nyine tro sa kuca matre troa kepe thangan qa ngöne la lue ewekë cili? Loi e tro sa isa hnying ka hape, ‘Nemene la ka ajolë ni ngöne la eni a sine la itre icasikeu me ini Tus?’ Maine jë, kola hë së maine cinyianyi pena koi së jëne telefon me mail. Hetrenyi la itre ewekë ka troa ajolë së ngöne la easa ini Tusi caas me sine la itre icasikeu. Ngo loi e tro sa sipo ixatua koi Iehova. Eje hi, tha ka hmaloi kö troa lapa mekun la itre huliwa i Iehova ngöne la easa hnehengazo me kucakuca. Ngo tha tro kö sa nue la ketre ewekë troa ajolë së. Loi e tro pe sa catre thith me sipo Iehova la tingeting ka troa thupëne la itre hni së me itre “mekuna” së.​—Phil. 4:6, 7. w22.01 29-30 par. 12-14

Hnei Uzia joxu hna thipetrije la eamo hna hamën koi nyidrë. Hnei nyidrëti hna tro kowe la uma ne hmi i Iehova matre dreu sinöe ka pui loi. Ngo hnëqa hna ahnithe pe kowe la itretre huuj. Önine la itretre huuj koi nyidrë: “Tha qâ i nyipëti kö lai, Uzia, troa deu ka pui loi koi Iehova ngo qâ i angete huj.” Nemene la aqane ujë i Uzia joxu? Maine hetre hni ne ipië i nyidrëti ju, tro hë nyidrëti a kapa la eamo me tro qa cili. Nge tro hë Iehova a nue la ngazo i nyidrë. Ame pe, “hnei Uzia hna elëhni.” Hnauëne la nyidrëti a thipetrije la eamo hna hamën? Ame koi Uzia, ijije hi tro nyidrëti a kuca la mekuna i nyidrë ke, nyidrëti la joxu. Ngo tha celë kö la aja i Iehova. Ame la pune la pi tru i Uzia joxu ke, hna lepi nyidrë hnei lepera “uti hë la drai ne meci nyidë.” (2 A. l. ite jo. 26:16-21) Kola amamane hnene la tulu i Uzia laka, ngacama hetre hnëqa së ka tru, ngo tha tro pi kö sa thipetrije la itre eamo qa hnine la Tusi Hmitrötr, wanga troa nuetriji së hnei Iehova. w22.02 9 par. 7

Ame la atr ka hetrenyi “la itre thiina hnapan” ke, angeic a kuca la itre aja ne ngönetrei. (Kol. 3:9) Angeic a meku angeice kö me saqe troa elëhni me pë hni ne ole me pi mama. Angeic a goeëne la itre film ka amamane la itre huliwa ka sis me isi. Maine jë, hetrenyi thei angeic la itre thiina ka lolo, nge kola huliwa la mekuthetheu i angeic pine la itre ewekë ka ngazo hnei angeic hna qaja me kuca. Ame pe, pëkö aja me trengecatre i angeic troa saze. (Gal. 5:19-21; 2 Tim. 3:2-5) Pine laka, itre atr ka tha pexeje kö së, matre tha ijije kö tro sa nuetrij asë la itre aja ne la hni së me itre mekun ka ngazo. Ame itre xaa ijin, easa akötr ke, hne së hna qaja maine kuca la ketre ewekë nge tha hne së pe hna ajan. (Iere. 17:9; Iako. 3:2) Ngo ame la easa nuetrije la itre thiina hnapan ke, tha itre eje hmaca kö la ka musinëne la mele së.​—Is. 55:7. w22.03 3 par. 4-5

Itre qatre thup fe, loi e troa goeëne la itre thiina ka lolo ne la itre trejin. Eje hi, tha ka pexeje kö së, ngo hetre thiina ka lolo fe the së. Nyipici laka, ame itre xaa ijin, itre qatre thup a amekötin la aqane waiewekë ne la ketre trejin. Ngo tui Paulo aposetolo, tha tro kö angatr a goeëne hi la itre tria i angeic. Loi e tro fe angatr a goeëne la ihnimi angeic koi Iehova, me aqane mele nyipici angeic, memine la itre ewekë ka loi hnei angeic hna kuca. Maine tro la itre qatre thup a ujë tune lai, tro ha madrin me tingeting la ekalesia. Tha Iehova kö a ajane tro epuni a pexej. Nyidrëti pe ajane tro epuni a nyipici. (1 Kor. 4:2) Ketre, Iehova a wangatrune la itre huliwa i epun e hnine la ekalesia. “Thatreine kö nyidrëti thëthëhmine la itre huliwa i nyipunie, me ihnim hnei nyipunieti hna amamane kowe la ëje i nyidrë, ene lo itre huliwa i nyipunie ekö me enehila kowe la ange ka hmitrötr.”​—Heb. 6:10. w22.03 31 par. 19, 21