Januare

Pine nemene matre hnei Iehova hna ië Timoteo matre troa huliwa koi Nyidrë? Pine laka, tru catre la itre thiina ka lolo i angeic. (Fil. 2:19-22) Öni Paulo aposetolo göi Timoteo ka hape, ketre atr ka hetre hni ne ipië angeic me mele nyipici me huliwa hnyawa. Ijije hi tro nyidrëti a mejiune koi angeic. Ketre, ka tru koi Timoteo la itre trejin. Celë hi matre, tru la ihnimi Paulo koi Timoteo nge hnei nyidrëti hna hamë hnëqa koi angeic. Tui Timoteo, maine tro sa eënyine la itre thiina ka lolo i Iehova, tro Nyidrëti a kepe së me hamë hnëqa koi së e hnine la ekalesia. (Sal. 25:9; 138:6) Loi e tro sa sipo Iehova troa xatua së matre öhne la ketre thiina nyine tro sa eënyin, tune la troa utipine me xatua itre xan, maine thele tingeting pena me nue la ngazo i ketre. Eje hi, loi e tro sa hnyingëne la ketre sinee së la mekuna i angeic matre troa xatua së.—Ite edomë 27:6. w22.04 23 par. 4-5

Iehova a ajane tro sa madrin ke, celë hi lai ketre igötranene la wene la uati hmitrötre i Nyidrë. (Gal. 5:22) Eje hi, sisitria catre la madrin e troa ham hune la troa kapa. Celë hi matre, easa madrin ngöne la easa catre cainöj me xatuane la itre trejin. (Itre hu. 20:35) Ame ngöne la topik së enehila, hnei Paulo aposetolo hna qaja la lue ewekë nyine tro sa kuca, matre tro sa madrin. Ame la hnapan, loi e tro sa hamëne la ka sisitria koi Iehova. Maine tro sa kuca la hne së hna atreine koi Nyidrë, tro hë së lai a madrin. (Mat. 22:36-38) Ame la hnaaluene ke, tha tro kö sa goeëne la hna huliwa hnei ketre. Ngacama easa uti ipië trootro me wezipo, maine hetre hne së pena hna thatreine kuca, ngo loi e tro palahi sa hetre hni ne ole koi Iehova. Ngo, maine ka maca la itre xaa trejin troa cainöj, loi e tro sa madrin koi angatr ke, angatre a huliwane itre ej koi Iehova. w22.04 10 par. 1-2

Troa sesëkötr elanyi la fene hnengödrai la kola apatrene la itre hmi ka thoi. (Hna ama. 18:8-10) Nyipici, tro la fen a hokötre ngöne la ijine cili. Ngo tro kö a madrine la nöje i Akötresie, ke pëhë hmi ka thoi e celë fen, nge calemi hë la iamele koi së! Hnei Daniela hna perofetane laka, troa kökötre lolo la nyipi “inamacan.” Nge celë hi hne së hna öhne enehila! Matre jëne la nyipi inamacan, trotrohnine hë së la itre hna perofetane göne la hneijine së. (Dan. 12:4, 9, 10) Eje hi, easa atrunyi Iehova, me wangatrune la Trengewekë i Nyidrë ngöne la easa öhne la aqane eatr la itre hna perofetan. (Is. 46:10; 55:11) Haawe, acatrene jë së la lapaune së, jëne la hne së hna ini Tusi Hmitrötr o drai, me xatuane la itre atr troa hnimi Iehova. E cili, tro Iehova a thupëne la itre ka mejiune koi Nyidrë me hamë angatr la “nyipi tingetinge.”—Is. 26:3. w22.07 6-7 par. 16-17

Kola qaja ngöne la tusi Hna Amaman laka, hna acil la Baselaia i Akötresie, nge hna ukapië Satana a tro e celë fen. (Hna ama. 12:1-9) Celë hi matre, madrine hë e koho hnengödrai, nge tru la akötre së e celë fen. Pine nemen? Pine laka Satana a nu la trenge elëhni angeic kowe la itre ka catr nyihlue i Iehova e celë fen. (Hna ama. 12:12, 15, 17) Nemene la ka troa xatua së troa cile catr qëmekene la icilekeu i Satana? (Hna ama. 13:10) Ame la ka troa xatua së, ke ene la troa atre la itre ewekë ka troa traqa elany. Ioane aposetolo a qaja ngöne la tusi Hna Amaman la itre xaa manathith hne së hna troa kapa, tune la troa apatrene la itre ithupëjia me Akötresie. Ame ngöne la pane xötr ne la tusi Hna Amaman, ke kola qaja “la itre ewekë cili, kösë itre hna meköle goeën.”—Hna ama. 1:1. w22.05 8 par. 1-3

Tro la aqane ujë ne la itre hlue i Iehova a jele la trenge elëhni ne la itre ka icilekeu me Iehova. E cili, tro la itre nöj a cas matre troa lepe la nöje i Akötresie e celë fen. Ame la isi cili, ke hna hëne ka hape, isi Gog atre Magog. (Ezek. 38:14, 15) Nemene la aqane ujë i Iehova ngöne la kola troa lepe la nöje i Nyidrë? Öni Nyidrë: “Troa mama la elëhninge ngöne la qëmekeng.” (Ezek. 38:18, 21-23) Ame ngöne Hna Amaman mekene 19, kola qaja la itre ewekë ka troa traqa e thupen. Tro Iehova a upe la Nekö i Nyidrë troa isigöline la nöje i Nyidrë, me lepe la itre ithupëjia. Tro la “itre trongene isi ne hnengödrai,” ene la itre angela memine la ala 144 000 a ce me Iesu ngöne la isi cili. (Hna ama. 17:14; 19:11-15) Nemene la pune la isi? Troa lepe apatren asë la itre atr memine la nöjei organizasio ka icilekeu me Iehova!—Hna ama. 19:19-21. w22.05 17 par. 9-10

Thupene la hnei Adramu me Eva hna eni wathebo, hnei Iehova hna hamë mejiune kowe la itre matra i nyidro, jëne la ketre hna perofetan. Kolo hi lo ka ej ngöne Genese 3:15: “Tro ni a axulune la icilekeu nyipi eö memine la föe, me matra i eö me matrane la föe. Nge tro angeic a waja fica la he i eö, nge tro hë eö a eatrën la tidöca i angeic.” Kola mama la hna perofetane cili ngöne la pane itus ne la Tusi Hmitrötr. Ngo ame asë hi la itre xaa itus ne la Tusi Hmitrötr ke, ka ce tro memine la hna perofetane cili. Ceitune hi la hna qaja ngöne Genese 3:15 memine la ketre otretre ka iothekeune la itre sinöe. Ej a iothekeune la itre itus ne la Tusi Hmitrötr. Casi hi la maca ka mama ngöne itre ej, ene la troa upe la ketre atre iamele ka troa apatrenyi Diabolo me itre sinexöle i angeic. Drei la ketre manathithi ka tru kowe la itre ka hnimi Iehova! Tro la Tusi Hmitrötr a xatua së troa atre la aqane troa eatre la hna perofetane cili, me thangane koi së. w22.07 14 par. 1-3

Itre keme me thine fe, catre jë sipo Iehova la inamacan, matre atreine jë epun akökötrene la ihnimi Iehova e kuhu hni ne la itre nekö i epun. (Iako. 1:5) Iehova hi la ka ijije troa xatua epun. Pine nemen? Lue kepin. Ame la hnapan ke, ketre Keme lae Iehova, nge ekö hë Nyidrëti xome la hnëqa ne Kem. (Sal. 36:9) Ame la hnaaluene ke, jëne manathith la itre eamo qaathei Nyidrë. (Is. 48:17) Ame enehila, easa kapa la itre eamo jëne la Tusi Hmitrötr memine la organizasio i Iehova. Itre ej a xatuane la itre keme me thin troa inine la itre nekö i angatr troa hnimi Iehova. (Mat. 24:45) Hetrenyi fe la itre xaa eamo ka lolo catr ngöne lo hna hape, “De l’aide pour les familles,” ka mama ngöne la zonal Hmeke Jë! (qene Wiwi), me ngöne la site së. Ketre, ame ngöne la site jw.org, hetreny la itre hna melën, me itre hna elon, ka troa xatuane la itre keme me thin troa hiane la itre nekö i angatr.—Ite edomë 2:4, 5. w22.05 27 par. 4-5

Iehova casi hi la ka atreine nue hnyawane la itre ngazo së. Ame la hnapan, ke aja i Nyidrë troa nue la itre ngazo së. Ame la hnaaluen, ke atre së hnyawa hi hnei Nyidrë. Atre hnyawa hi Nyidrë la pengö së, nge Nyidrë hmekuje hi la ka atre laka, ka nyipi ietra kö la atr. Nge ame la hnaakönin, ke ame la Iehova a nue la itre ngazo së, Nyidrëti a nu apexejen. Tro hë Iehova lai a kepe së hmaca, nge tro ha lolo la mekuthetheu së. Pine laka itre atr ka tha pexeje kö së, tro palahi së lai a tria. Ngo kola thuecatre së hnene la hna qaja ngöne la itus Étude perspicace, Volume 2, götrane 765, ka hape: “Trotrohnine hi Iehova laka, itre atr ka tha pexeje kö së, nge ka ngazo. Matre tha tro kö sa hace fë la itre tria së. (Sal. 103:8-14; 130:3) Maine tro sa isine troa xötrëne la itre jë i Iehova, ke tro hë sa madrin. (Fil. 4:4-6; 1 Ioane 3:19-22).” w22.06 7 par. 18-19

Ame la troa xouene la itre mus ke, tha eje hmekuje kö lai hnö i Satana. Ame la itre xan ke, tru catre kö la hnei angatr hna xoue fami hune la troa akötrë angatr. Eje hi, angatr a ajane tro la itre xaa atrene la fami angatr a hane atre Iehova me nyihlue i Nyidrë. Ngo ame la angatre a drenge la kola qajangazo Iehova memine la itre hlue i Nyidrë ke, akötre catr angatr. Ame la itre xaa keme me thiin ka icilekeu ekö, ke, angatre fe hë nyihlue Iehova enehila. Ngo tune kaa e tro la itre atrene la fami së a nuetriji së, pine easë iëne troa Temoë Iehova? Nemene la aqane tro së lai a ujë? Kola akeukawanyi së hnene la hna qaja ngöne Salamo 27:10. Ame la easa mekune la aqane hnimi së hnei Iehova, ke tha xou i easë kö troa cile kowe la itre icilekeu. Nge xecie fe koi së laka, tro kö Iehova a amanathithine la hne së hna mele nyipici koi Nyidrë. Eje hi, Iehova hi la ka atreine troa hamë së la ka ijij ngöne la nöjei götrane la mele së. w22.06 16-17 par. 11-13

Ame ngöne la Iesu a cainöj, hna upezö nyidrë ka hape, ketre atr ka iji waina atrun, me xeni atrun, me huliwa koi Satana, me qaja angazo Akötresie, nge tha ka metrötrëne kö la Sabath. (Mat. 11:19; 26:65; Luka 11:15; Ioane 9:16) Ame pe, tha hnei Iesu kö hna elëhni me sa koi angatr. Tui Iesu, tha tro kö sa itëkeun ngöne la kola ithanata akökötrenyi koi së. (1 Pet. 2: 22, 23) Nyipici, tha ka hmaloi kö. (Iako. 3:2) Nemene la ka troa xatua së e cili? Ame la kola ithanata akökötrenyi koi së ngöne la hna cainöj ke, tha tro kö sa canga elëhni. Öni Sam, ketre trejin: “Ame la ka nyipiewekë koi ni ke, troa tro fë la nyipici kowe la atr. Atre hi ni laka, ijiji angeic troa saze.” Maine jë, itre atr a wesitr pine laka, easa traqa nge hetre jole i angatr. Maine celë hi ka traqa koi së, loi e tro sa thith me sipo Iehova troa xatua së, matre tha tro kö sa elëhni me sa akötrën kowe la itre atr. w22.04 6 par. 8-9

Ame la ketre aqane tro la itre kem me thine a xatuane la itre nekö i angatr troa easenyi Iehova, ke ene la troa ce ini Tusi Hmitrötr me angatr. (2 Tim. 3:14-17) Ngo kola mama e hnine la Tusi Hmitrötr la ketre aqane troa ini nyudren. Ame ngöne la tusi Ite Edomë, ketre kem a ithuecatr kowe la nekö i angeic troa thel la itre thiina i Iehova ka mama ngöne la itre hna xup. (Ite edomë 3:19-21) Maine jë, aja i epun itre kem me thin troa ce ngenu memine la itre nekö i epun me goeëne la itre hna xup. Haawe, xomi ijine jë troa qaja kowe la itre nekö i epun la itre thiina i Iehova, ka mama ngöne “la itre ewekë hna xup.” (Rom. 1:20) Tro sa ce wange la aqane huliwane i Iesu la itre hna xup matre hamë ini kowe la itretre dreng. Ame la ketre ijin, hnei nyidrëti hna upi angatr troa goeëne la itre halo me itre lili. (Luka 12:24, 27-30) Hnei nyidrëti hna qaja la lue thiina i Iehova, ene la aqane ham me ihnimi Nyidrë. Eje hi, tro kö Iehova a ithuan me heetrëne la itre hlue i Nyidrë, tune la aqane kuca i Nyidrë kowe la itre halo me itre lili. w23.03 20-21 par. 1-4

Easa olene koi Iehova la hna aijijë së troa thithi koi Nyidrë jëne Iesu. Hnei Iehova hna acili Iesu matre troa kapa la itre thithi së. Tro hi Iehova a dreng me sa la itre thithi së e hna jëne Iesu me aijijë Iehova troa seng la itre ngazo së. (Rom. 5:1) Tusi Hmitrötr a qeje Iesu ka hape, ‘atre huuje ka lapa ngöne la götrane maca ne la theron ne la Akötresie ka draië e hnengödrai.’ (Heb. 8:1) Iesu fe la “ixatua thene la Kem.” (1 Ioane 2:1) Matre easa olene koi Iehova la hnei Nyidrëti hna acile la Atre Huuj Ka Sisitria ka atreine trotrohni së me “xëwe sai së”! (Rom. 8:34; Heb. 4:15) Maine patre ju la huuje i Iesu, thatreine kö së easenyi koi Iehova jëne la thith. Haawe, tro sa olene tune kaa koi Iehova la ahnahna ka tru celë, ene la mele ne la Nekö hnimina i Nyidrë? w22.07 23 par. 10-12

Ame la atr ka huliwa nyipici, ke angeic a eatrën la hnei angeic hna qaja, nge ka qaja palahi la nyipici. (Sal. 15:4) Ketre, itre atr a mejiun koi angeic. Easa ajan tro la itre trejin a mejiune koi së. Thatreine kö së troa musinëne la itre xan troa mejiune koi së. Loi e tro pe sa amamane koi angatr ka hape, ijije hi tro angatr a mejiune koi së. Ceitune hi la mejiun memine la mani, loi e tro sa huliwa catr matre hetreny, ngo canga tro fe hi ej a patr. Eje hi laka, easa mejiun koi Iehova, ke ame asë hi la itre huliwa i Nyidrë, ke “hna kuca ngöne la nyipici.” (Sal. 33:4) Nge aja i Nyidrë tro sa nyitipu Nyidrë. (Efe. 5:1) Easa olene koi Iehova la hnei Nyidrëti hna ee së kowe la organizasio i Nyidrë hna nyiatrene hnene la itre atr ka ihnim, nge nyine tro sa mejiune kow! Hnëqa së isa ala cas troa huliwane la itre thiina tune la ihnim, me ipië, me atreine waiewekë, me qaja la nyipici, me xomihni matre tro la itre trejin a mejiune koi së. Loi e tro sa nyitipu Iehova Akötresi së, me amamane laka, ijije hi tro itre xan a mejiune koi së. w22.09 8 par. 1-2; 13 par. 17

Ngacama alanyim la itre trejin e hnine la ekalesia, ngo ame itre xaa ijin easa mekun ka hape, easë cas, easa isi memine la itre mekun ka ngazo ke easa mekun ka hape, pëkö ka atrein xatua së. Ngo, tha aja i Iehova kö tro sa mekune tun. Tro sa ce wange la aqane xatua Elia hnei Iehova. Hnei Nyidrë hna ithuecatr koi Elia troa fe la hni angeic. Alua hnyinge Nyidrë koi Elia ka hape: “Eö a ue e celë?” (1 Ite jo. 19:9, 13) E cili, Iehova a drenge la Elia a fe la hni angeic. Nge, hnei Iehova hna sa koi Elia ngöne la Nyidrëti a amaman la mene i Nyidrë. Ketre hnei Nyidrë hna ithuecatr koi angeic ka hape, nyimutre catr palakö hnei atr ka nyihlue i Nyidrë. (1 Ite jo. 19:11, 12, 18) Ame hë e cili, lapa hnyawa ha la mekuna i Elia, thupene la hna fe la hni angeic koi Iehova, me dreng la aqane sa i Nyidrë. Hnei Iehova hna ahnith koi Elia la ketre huliwa ka nyipiewekë. Hna upi angeic troa sië Hazaela matre joxu ne Suria, me Iehu matre joxu ne Isaraela, me Elisaia matre perofeta. (1 Ite jo. 19:15, 16) Ame la Iehova a hamë Elia la itre huliwa cili, ke göne troa xatua angeic troa mekune palahi la itre ewekë ka loi. Hnei Iehova fe hna thue sinatronge i angeic, ene Elisaia. w22.08 8 par. 3; 9 par. 5

Hnene kö la ekalesia i epun hna hane xup maine nyihnyawan la ketre Uma Ne Baselaia? Maine eje hi, mekune hi epun lo pane icasikeu hnei epun hna sine e cili. Tru catre la ole i epun koi Iehova ngöne la ijine cili. Pine laka, tru palaha la madrine i epun, matre thatreine hë epun thing la pane nyima. Kola atrunyi Iehova hnene la itre Uma Ne Baselaia. Ngo kola atrunyi Nyidrëti catr hmaca kö, ngöne la easa kuca la ketre aqane xupi uma. Ketre huliwa lai ka sisitria kö, hune la itre uma hna xup. Kola qaja la troa xup la lapaun ne la itre atr ka traqa e hnine la itre Uma Ne Baselaia. Ka nyipiewekë koi Paulo aposetolo la huliwa cili, ngöne lo angeic a cinyanyine la mekun ngöne la xötre ka nyitrepene la topik së. Paulo aposetolo la ketre tulu göne la aqane troa ithuecatrene la itre trejin. Angeic a utipi angatr. Loi e tro sa nyitipu Paulo matre ithuecatr kowe la itre trejin enehila.—1 Kor. 11:1. w22.08 20 par. 1-2

Ame la keresiano ka ajane troa meköt qëmeke i Akötresie, ke angeic a huliwa nyipici ngöne la angeic a salem. Ketre ame la atr ka hniine la meköt, xele angeic ma wange la kola qanangazon la ketre atr, ngo pë pe nyipi kepin. Nge, maine angeic a ajane troa amadrinë Iehova, loi e tro angeic a wangatrun la mekuna i Nyidrë ngöne la kola axecië mekun. Öni Tusi Hmitrötr ka hape, Iehova la Qaane la meköt. Celë hi matre kola qaja ka hape, Nyidrëti “la hne ne la meköt.” (Iere. 50:7) Pine laka, Nyidrëti la Atre Xup, Nyidrëti hmekuje hi la ka ijije troa acile la itre trepene meköt göi loi me ngazo. Nge sisitria kö la aqane goeëne Nyidrë la loi me ngazo hui easë. (Ite edomë 14:12; Is. 55:8, 9) Ame pe hna xupi së hnaiji Akötresie, matre ijije hi tro sa mele thenge la itre trepene meköti Nyidrë. (Gen. 1:27) Nge madrine catre së troa trongëne itre ej. Tru la ihnimi së kowe la Keme së, matre easa isin troa nyitipu Nyidrë.—Efe. 5:1. w22.08 27 par. 5-6

Ame la easa kucakuca me hnehengazo, easa thel troa kuca la ketre ewekë matre loi pi la he së. Tha ka ngazo kö, ngo loi e tro sa thupëne wanga huli së jë troa kuca la ketre ewekë hnei Iehova hna sisin. (Efe. 5:10-12, 15, 16) Ame ngöne la tusi Paulo koi angetre Filipi, hnei angeic hna thuecatre koi angatr troa thele catrëne la itre ewekë “ka meköt, me ka wië, me ka aciane la ihnim, . . . me ka lolo.” (Fil. 4:8) Tha Paulo kö e celë a qaja la itre nyine iamadrinë, ngo ka nyipiewekë tro sa trongën la eamo celë ngöne la easa iëne la itre nyine iamadrinë. Ame la epuni a iëne la ketre nyine iamadrinë, tupathe jë troa nyihnane la hnaewekë hna hape, “ewekë” ngöne la xötr, hnene la itre hnaewekë “nyima,” “film,” “itus,” maine “jeux videos.” Tro lai a xatua epun troa öhne la itre nyine iamadrinë ka loi me ka ngazo qëmekei Iehova. Aja i easë troa mele thenge la itre trepene meköti Iehova.—Sal. 119:1-3. w22.10 9 par. 11-12

Nyipiewekë tro sa xatua la itre “ka tha meköti kö,” ke hnei angatr ekö hna kuca la itre huliwa ka sis me ka ngazo catr. Hnëqa së troa ini angatr la itre trepene meköti Iehova. Ame ngöne la ijine cili, tro la Baselaia i Akötresie a acil la ketre porogaram ne ini Tusi Hmitrötr ngöne la fen asë. Drei la ka troa hamë ini kowe la itre ka tha meköti kö? Hnëqa ne la ka alanyimu atraqatr memine la itre atr ka meköt hna amelene hmaca. Troa cinyanyine la ëje ne la itre ka tha meköti kö ngöne la tusi ne mel, e tro angatr a imelekeu me Iehova me nue la mele i angatr koi Nyidrë. Tro Iesu memine la itre hna iëne a goeën qa hnengödrai ka hape, angatre kö a kapa hnyawa la itre ini hna hamën koi angatr. (Hna ama. 20:4) Maine tro la ketre e angatr a thipetrij la itre ini cili, troa apatrenyi angeic ngacama 100 ju hë lao macatre i angeic. (Is. 65:20) Öhne hi Iehova me Iesu la hni ne la itre atr, nge tha tro kö nyidro a nue la ketre atr troa qanangazone la fene ka hnyipixe.—Is. 11:9; 60:18; 65:25. w22.09 17 par. 11-12

Ame la hnaewekë “itre mus” ngöne la xötre celë ke, kola qaja la musi atr. Ame easë itre keresiano, easa metrötrëne la itre musi cili. Angatr la ka acil la itre wathebo ka troa thupëne la mele së, nge ame itre xaa ijin, angatr a isigöline la hmi së. (Hna ama. 12:16) Celë hi matre, Tusi Hmitrötr a upi së troa hamëne koi angatr la mani, me thupen, me xou me nyine atrun. (Rom. 13:7) Ngo angatr a mus ke, hna nue angatr hnei Iehova. Celë hi hna qaja hnei Iesu lo nyidrëti a cil qëmekei Pilato. Ame lo Pilato a qaja koi Iesu ka hape, ijiji angeice hi troa musinëne la mele i nyidrë, sa jë hi Iesu: “Thatreine jë kö nyipëti musinë ni e tha ka qaa kö hnengödrai.” (Ioane 19:11) Tui Pilato, ame la itre mus me itre ka kuci politik enehila, ke ka hetre ifegone hi la musi angatr. w22.10 14 par. 6

Jëne la uati hmitrötre i Iehova, hnei Dravita joxu hna qejepengöne la mele ne la itre atr fene la musi ne la ketre joxu ka inamacan me nyipici. (Sal. 37:10, 11, 29) Hne së hna majemine e kowe la itre atr la tusi Salamo 37:11 ngöne la easa qaja la paradraiso. Ka nyipici hi, ke hnei Iesu fe hna amexeje la xötre celë ngöne lo Cainöj Hune La Wetr. Celë hi ka amamane laka, tro fe a eatr elanyi la xötre celë. (Mat. 5:5) Ngo, Dravita lo a qaja la aqane mele ne la itre atr fene la musi Solomona joxu. Ame fene la musi Solomona, tingetinge la nöje i Akötresie, nge angatr a mele madrine ngöne la nöj “ka di hnei zane thi me hani.” Öni Akötresie: “E tro nyipunie a trongëne la ite hnenge hna acil . . . , tro ni a hamë nyipunie la tingetinge ngöne la nöj, nge tro nyipunie a meköl, nge pëkö ate troa aqoun.” (Lev. 20:24; 26:3, 6) Hna eatr la itre hna thingehnaeane celë lo kola joxu hnei Solomona. (1 A. l. ite jo. 22:9; 29:26-28) Ame la itre hna qaja ngöne Salamo 37:10, 11, 29 ke, ase hë eatrëne ekö, nge tro fe a hane eatr elany. w22.12 10 par. 8

Ame së itre keresiano, loi e tro sa drengethenge la itre hna amekötin hnene la organizasio i Iehova. Öni Tusi Hmitrötr: “Tro eö a thë la ishi ’ö thenge la hna eamo hnyawa ; nge tro eö a kepe thangan qa ngöne la itre eamo ne la ka ala nyimu.” (Ite edomë 24:6) Ame la easa trongëne la eamo celë, ke easa öhne ka hape, easa maca ngöne la aqane cainöj me hamë ini. Tha easë kö a kuci mekun la easa cainöj, ngo easa xötrethenge hnyawa la itre tulu ne aqane nyiqane ithanata hna hamën hnene la hlu. Easa kapa la itre eamo ka xatua së ngöne la itre icasikeu jëne la itre trejin ka macaj ka cile fë cainöj. Ketre, nyimutre la itre itus, me itre video hna hamëne hnene la organizasio matre xatuane la itre atr troa trotrohnine la Tusi Hmitrötr. Easa olene koi Iehova la itre eamo hnei Nyidrëti hna hamë së jëne la Tusi Hmitrötr! Maine patre ju itre ej ke, tha tro kö a lolo la mele së. Haawe, catre jë së tro thenge la inamacane i Iehova.—Ite edomë 3:13-17. w22.10 23 par. 18-19

Ka hetre thangane kowe la ngönetrei së la xen. Ketre tune mina fe, e tro sa e me inine la Tusi Hmitrötr ke, tro hë lai a hetre thangane kowe la imelekeu së me Iehova. Aja i Iehova tro sa trotrohnine hnyawan ej. Nge tro lai a ej e hne së hna thith, me e la Tusi Hmitrötr me lapa mekun. Loi e tro sa pane thith matre hnëkëne la hni së troa trotrohnine la itre mekuna i Akötresie. Nge e thupen, easa e la Tusi Hmitrötr. Nge loi e tro sa pane cil me mekune ajuine la hne së hna e. Nemene hë la thangane lai? Maine tro palahi sa lapa mekun la itre hne së hna e, ke tro ha lapa hut la itre ini cili e kuhu hni së. Pine nemene matre nyipiewekë tro sa e me lapa mekun la Tusi Hmitrötr? Celë hi lai ka troa xatua së troa catre cainöjëne la maca ne Baselaia enehila, me tro fë la maca ne iameköti elany. Ketre, ame la easa lapa mekun la itre thiina i Iehova, kola acatrene la aqane imelekeu së me Nyidrë. w22.11 6-7 par. 16-17

Iesu a qaja e celë ka hape, troa wangatrehmekune la itre nyipi keresiano hnene la aqane ihnimikeu i angatr. Nge, tha itretre drei nyidrëti hmekuje kö la ka troa wangatrehmekune lai, ngo tro nöjei atr asë. Nge, nyine haine la ihnim ka mama thene la itre hlue i Iehova. Ngo, tha ka pexeje kö angatr. (1 Ioane 1:8) Matre, ame hë la easa iatre hnyawa, ke canga mama hi koi easë la itre tria i angatr. (Rom. 3:23) Nge pine la itre tria cili, hnei itre xan hna trotriji Iehova. Hnei Iesu hna amamane tune kaa la ihnimi nyidrë kowe la itre aposetolo? Nge, troa xötrethenge tune kaa la tulu i Iesu enehila? Ngacama ka bapataiso hë së, ngo nyipiewekë tro sa lapa mekun la itre hnyinge celë. Celë hi ka troa acatrene la ihnimi së koi itre xan, ngacama hnei angatr hna ngazo koi së.—Efe. 5:2. w23.03 26-27 par. 2-4

Easa melëne la pun la fen celë, matre tha sesëkötre kö së la kola traqa la itre jol e hnine la ekalesia. Itre jole lai ka troa tupath la aqane mele nyipici së koi Iehova. Haawe, loi e tro sa atreine waiewekë hnyawa. Maine hna akötrë epun hnene la ketre trejin, the lapa fë elëhni kö. Nge, maine hna haji epun, the hmahma kö, ngo kapa ju la ihaji, nge amekötine jë la thiina i epun. Ketre, e hetre ewekë ka saze e hnine la organizasio i Iehova, kapa ju nge trongëne jë itre ej. Catre jë mejiun koi Iehova me kowe la organizasio i Nyidrë, ngöne la kola tupathi epun. Loi e tro sa atreine waiewekë hnyawa, ene la troa tingeting, me waiewekë tui Iehova. Sipo ixatua jë thei Iehova jëne la thith. The ananyine kö la ekalesia. Ngacama traqa ju hë la itre jol, ngo thatreine kö Satana ananyi së qaathei Iehova me organizasio i Nyidrë.—Iako. 4:7. w22.11 24-25 par. 14-16

Itre qatre thup, xatuane jë la itre trejin troa hnëkë qëmekene troa traqa la ketre hulö. Loi e tro la itre atrene la ekalesia a atre la nyine troa kuca, me xom la numero ne la itre qatre thup. Nemene la nyine tro epuni a kuca? E hna lep hnei hulö la ketre götrane ne la nöje i epun, hnyingëne jë kowe la itre qatre thup la nyine tro epuni a kuca. Maine ijiji epun, fe pi la hnalapa i epun kowe la itre trejin hna lep hnei hulö, maine kowe la itre ka saen troa ixatua. Ijiji epuni fe troa tro fë xen, me itre ewekë kowe la itre trejin ka aja ixatua. Maine hna lep la ketre nöj gaa nany, ijiji epuni fe troa hane ixatua. Troa tune kaa? Thithi jë thatraqane la itre hna lep hnei hulö. (2 Kor. 1:8-11) Nge kuië ahnahna jë thatraqane la huliwa ne cainöj e cailo fen. (2 Kor. 8:2-5) Maine ijiji epun troa ixatua ngöne la götran hna lep hnei hulö, qaja jë kowe la itre qatre thup ka hape, epuni fe a hane pi saen. Maine hna nue epun troa hane saen, troa pane hamë formasio koi epun matre hnëkë epun troa huliwa hnyawa ngöne la götran hna upi epuni kow. w22.12 24 par. 8; 25 par. 11-12

Önine la ketre Tusi Hmitrötr kowe la xötre tane la topik së ka hape: “Casi hi la itre itupath ka traqa koi epun me kowe la itre xaa trahmanyi me föe.” Hna cinyanyine lai kowe la itre trejin trahmanyi me föe ne Korinito. Ame la itre xan thei angatr ekö ke, itre ka nyixetë, nge itre trahmanyi ka ce meköl me trahmany, me itre ka iji gorok. (1 Kor. 6:9-11) Ame koi epun, patre hnyawa ha la itre aja cili thei angatr thupene la bapataiso? Waea. Nyipici, itre trejin hna iëne angatr, ngo itre atr ka tha pexeje palakö. Matre ame itre xaa ijin, angatr a isi memine lo itre aja i angatr ekö. Celë hi ka ithuecatre koi së. Pine nemen? Pine laka, kola amamane ka hape, hetre hlue i Iehova hë ka hane melëne la jol ka traqa koi së enehila. Celë hi matre “cile huti ju ngöne la lapaun, ke atre hë [së] ka hape, hna traqa fe la itre akötre cili kowe la lapa ne la itre trejin me [së] e cailo fen.”—1 Pet. 5:9. w23.01 12 par. 15

Hnei Iesu hna sipo Iehova troa xatuane la itretre dreng. (Ioane 17:11) Hnauëne laka, ka ithuecatre fe lai koi së? Pine laka, pëkö sa i Iehova. (1 Ioane 4:4) Öhne asë hi nyidrëti koilo. Haawe, e tro sa mejiune koi Iehova, tha tro kö sa xou, ngo pe sa cile catr. Hnei epuni kö hna hane hmahma troa qaja ka hape, ketre Temoë Iehova epun? Epuni kö a xou troa nyiqane cainöj maine xomi bapataiso, wanga qajangazo epuni jë? The nue pi kö la itre ewekë cili, troa sewe epun troa kuca la loi. Catre jë pe thithi koi Iehova. Sipo iele Nyidrëti jë troa hamë epuni la catr matre troa kuca la aja i Nyidrë. Nge ame la epuni a öhne la aqane sa Nyidrë la itre thithi epun, ke tha tro hë epuni lai a xoue atr.—Is. 41:10, 13. w23.01 29 par. 12; 30 par. 14

Hnei Iesu hna hnyinge kowe la itre Faresaio ka hape, “Hapeu, tha hnei nyipunieti kö hna e?” matre amaman laka, angatr a huliwane angazon la Itre Hna Cinyihan. (Mat. 12:1-7) Hnei angatr hna qaja angazone la itretre drei Iesu me hape, itretre ena la wathebo göi Sabath. Ame hnei Iesu hna sa jëne la lue ceitun memine la ketre xötr ne la tusi Hosea, matre amaman laka, tha trotrohnine kö la itre Faresaio la nyipi aliene la Sabath nge pëkö utipine i angatr. Pine nemen matre pëkö thangan la hnei angatr hna e Tusi Hmitrötr? Pine laka, angatr a e ngo ka ngazo la hni angatr, nge ka pi tru. Celë hi lai ka sewe angatr troa trotrohnine hnyawa la hnei angatr hna e. (Mat. 23:23; Ioane 5:39, 40) Mataio 19:4-6 a amamane fe lo Iesu a qaja hmaca kowe la itre Faresaio la hnyinge celë: “Tha hane kö nyipunieti e?” Atre hnyawa hi angatr la aqane xup Akötresie la itre ewekë, ngo tha trotrohnine kö angatr la ini ka mama qa ngöne la itre xötre cili, göne la aqane goeëne Nyidrë la faipoipo. Kola ini së hnene la itre trengewekë i Iesu la enyipiewekëne troa e la Tusi Hmitrötr cememine la ipië. Loi e tro sa ipië me nue Iehova troa ini së, ngo tha tro kö sa tune la itre Faresaio. w23.02 12 par. 12-13

Ame ngöne la Wathebo i Iehova, hnei Nyidrëti hna hamën la itre hna amekötin kowe la nöje Isaraela, matre thupëne la mele i angatr ngöne la itre hnalapa me itre hnë huliwa. (Eso. 21:28, 29; Deu. 22:8) Maine tro la ketre atre Isaraela a humuth la trejin me angeic, nge tha hna thë kö, ke tro kö angeic a xeni pun la huliwa i angeic. (Deu. 19:4, 5) Ketre, önine la Wathebo, troa nyithupene kowe la atr ka humuth la nekönatr e kuhu hni, ngacama tha hnei angeice kö hna thë. (Eso. 21:22, 23) Tusi Hmitrötr a amamane hnyawa ka hape, aja i Iehova tro sa thupën la aqane tro sa tro. Easa amamane koi Akötresie ka hape easa nyipiewekëne la mel, la easa neëne la itre aksida ngöne la hnalapa së me hnë huliwa. Nyipiewekë tro sa juetrën la itre hele ka idrei, me itre poizin, me itre drösinöe, matre tha tro kö la itre nekönatr a ketr. Nge loi e tro fe sa thupën la aqane tro sa trij itre ej. Ketre, loi e tro sa hmek la easa amele eë, maine ngöne la easa huliwan la sas me kura. Tha tro kö sa xomi loto e easa pi meköl, maine thupene la hne së hna xomi drösinöe, maine iji kahaitr. Ketre, tha tro kö sa goeë mobilis ngöne la easa xomi loto. w23.02 21-22 par. 7-9

Ka atreine itreqe Iehova, ka loi thiina, nge ka itrotrohni. Nyidrëti a thele la ka loi thene la itre ka ini. (Sal. 130:3) Nge, tha Nyidrëti kö a upi angatr troa kuca la ketre ewekë hnei angatr hna thatreine kuca. The thëthëhmine pi kö laka, hnei Nyidrëti hna hamë epun la ketre ahnahna, ene la atuat i epun. (Sal. 139:14) Aja i Nyidrë tro palahi sa madrin la easa kapa la itre ini. Celë hi matre, nyipiewekë enehila troa acatrene la “aja” së troa atre la itre ini qa hnine la Tusi Hmitrötr. (1 Pet. 2:2) Thele jë troa hetre mekun nyine troa eatrën. Ketre isine jë troa eatrëne la porogaram ne e me ini Tusi Hmitrötre i epun. (Ios. 1:8) Nge jëne la ixatua i Iehova, tro hë epuni lai a e Tusi Hmitrötr lapa, me atrepengöi Nyidrëti hnyawa. Tha tro hmekuje kö së a hetreny la atrehmekun. Ka nyipiewekë la atrehmekun, e tro ej a xatua së troa atre Iehova hnyawa me huliwane la itre thiina i Nyidrë. Eje fe a xatua së troa acatrene la ihnim me lapaune së koi Iehova. (1 Kor. 8:1-3) Catre jë sipo Iehova troa nyixane la lapaune i epun, ngöne la epuni a ini Tusi cas. (Luka 17:5) Pi tro catre Iehova a sa la itre thithi cili. w23.03 10 par. 11, 13

Aja Iesu tro la itretre drei i nyidrë a catre huliwa qëmeken troa traqa la pun. Hnei nyidrë hna ahnithe koi angatr la ketre huliwa, ene la troa cainöjëne la maca ka loi “e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.” (Itre hu. 1:6-8) Eje hi, tha huliwa ka co kö! Hnene la itretre dreng hna huliwane hnyawan la traeme i angatr, matre eatrën la huliwa cili. Ame la ketre aqane tro sa thupëne la mele së, ke ene la troa mekun hnyawan la aqane tro sa huliwane la traeme së. Ame la “ijine memine la ewekë ka xulu” ke kola traqa koi së asë. (Ate cai. 9:11) Matre ijije hi troa thupatëne la mele së. Easa huliwane hnyawane la traeme së, la easa catre kuca la aja Iehova me acatrene la aqane imelekeu së me Nyidrë. (Ioane 14:21) Haawe, “catre pi, nge the enienije kö, ngo loi e tro pala hi a tru hnei huliwa i nyipunie koi Joxu.” (1 Kor. 15:58) Maine tro sa mec, nge troa traqa la pun la fene celë ka ngazo, tha hleuhleu kö së, ke hne së hna catre huliwa i Iehova.—Mat. 24:13; Rom. 14:8. w23.02 18 par. 12-14