Febuare

Nemene la aliene la xötre tane la topik celë? Iesu e celë a qaja la ihnim ka upi së troa amë panëne la aja i itre xan. Ihnimi hi lai, ka upi së troa meci pine la ketre trejin. Ihnim la thiina hna qaja atrun e hnine la Tusi Hmitrötr. Ame la itre xötr hna pi e hnei itre xan, ke: “Akötresieti la ihnim.” (1 Ioane 4:8) “Qa i eö troa hnime la atre lapa easenyi eö, tui eö hi.” (Mat. 22:39) “Ihnim la ka atreine he la nöjei pengöne ngazo.” (1 Pet. 4:8) “Tha tro kö a patre la ihnim.” (1 Kor. 13:8) Itre xötre celë a amamane la enyipiewekëne troa hetreny me melëne la ihnim. Qaathei Iehova la nyipi ihnim. Maine aja së troa hetrenyi la thiina cili, loi e tro sa kapa la uati hmitrötr me manathith qaathei Nyidrë. (1 Ioane 4:7) Celë hi matre öni Iesu ka hape, troa wangatrehmekun la itre nyipi keresiano hnene la ihnim ka eje thei angatr. Tune la hna qaja hnei Iesu, alanyim la itre ka wangatrehmekun la itre nyipi keresiano jëne la nyipi ihnim ka eje thei angatr. w23.03 27-28 par. 5-8

Ajane kö epun troa canga nue la ngazo i ketre? E cili, loi e tro sa pane e me lapa mekun la itre tulu e hnine la Tusi Hmitrötr. Hnei itre xan hna lapa fë trengehni nge hetrenyi fe la itre ka nue la ngazo hna kuca koi angatr, tui Iesu. (Luka 7:47) Isapengöi nyidrëti kö memine la itre Faresaio. Hnei nyidrëti hna goeëne la itre thiina ka loi thene la itre atr, ngo tha itre tria i angatre kö. Ame pena la itre Faresaio, hnei angatr hna “wangesixa itre xan.” (Luka 18:9) Thupene lai, isa hnyinge jë ka hape: ‘Nemene la hnenge hna goeëne thei itre xan? Eni kö a goeëne la itre thiina ka loi i angatr?’ Maine jole koi së troa nue la ngazo ne la ketre atr, loi e tro sa cinyanyine la itre thiina ka lolo i angeic, me hnying ka hape: ‘Tune kaa la aqane goeë angeice hnei Iesu? Tro kö nyidrëti a nue la ngazo i angeic?’ Celë hi lai ka troa xatua së troa saze la aqane waiewekë së. Eje hi, jole palakö koi së troa nue la ngazo i ketre. Ngo maine tro palahi sa catr, tro ha hmaloi trootro koi së troa nue la ngazo hna kuca. w22.04 23 par. 6

Ame ngöne la tusi Hna Amaman, kola qejepengöne la itre ithupëjia i Akötresie jëne la itre iatr, ene la itre öni ka ses. Ame la ketre öni ka ses, “kola fetra qa hnine la hnagejë.” Nge “ka treen lao jian me seven lao he.” (Hna ama. 13:1) Thupei nyën, ke “kola mejë qa ngöne la ihnadro la ketre öni ka ses.” Ej a ithanata tune la drakona, me ‘autine fe la eë qa hnengödrai kowe la fen.’ (Hna ama. 13:11-13) Nge ase jë hi lai, kolo pena fetra “la öni ka ses ka madra palulu,” hna tith hnene la ketre föe ne gojeny. Ame la köni öni ka ses cili, itre ej a nyihatrene la itre ithupëjia me Iehova memine la Baselaia i Nyidrë. Haawe, nyipiewekë tro sa atrepengöi itre ej hnyawa. (Hna ama. 17:1, 3) Loi e tro sa pane trotrohnine la aliene la itre iatr. Tusi Hmitrötr hmekuje hi la ka ijij troa qejepengön. Ase hë qejepengöne la itre xaa iatr ne la tusi Hna Amaman ngöne la itre xaa tus ne la Tusi Hmitrötr. w22.05 8-9 par. 3-4

Ame la itre xaa hlue i Iehova, angatr a kucakuca pine laka, angatr a uti ipië trootro me wezipo. Thatreine hë angatr huliwa catr koi Iehova tune ekö. Maine jë easa hnehengazo me kucakuca pine laka, thatreine hë së huliwa catre koi Iehova tune ekö. Ngo loi e tro sa isa hnying ka hape, ‘Nemene la hnei Iehova hna ajane tro ni a kuca?’ Eje hi, Nyidrëti a ajane tro sa kuca la hne së hna atrein. Pane mekune jë së la ketre trejin qatre föe ka 80 lao macatre. Eahlo a kucakuca pine laka, thatreine hë eahlo catre cainöj tune ekö lo eahlo a 40 lao macatre. Eahlo a mekune laka, tha ka nyipiewekë kö maine tha madrine kö Iehova kowe la itre hnei eahlo hna kuca enehila. Ngo hapeu, ka nyipici kö lai? Maine hnei eahlo hna catre huliwa koi Iehova ngöne lo eahlo a 40 lao macatre uti hë la eahlo a 80 lao macatre, kolo lai a amamane laka, eahlo palahi a thele troa hamën la ka sisitria koi Iehova. Celë hi matre, catre pi së kuca la hne së hna atrein, nge tro Iehova a madrin! (Wange ju fe la Mataio 25:20-23.) Tha tro kö sa lapa mekun la itre hne së hna thatrein. Ngo loi e tro pe sa catre kuca la hne së hna atrein matre tro sa madrin. w22.04 10 par. 2; 11 par. 4-6

Hna Amaman mekene 21 a aceitunëne la ala 144 000 memine la ketre traon ka mingöming hna hën ka hape, “Ierusalema Ka Hnyipixe.” Hna nyitrepene la traone cili hnene la 12 lao etë “hna sija la 12 lao ëje ne la 12 lao aposetolo ne la Neköi Mamoe.” (Hna ama. 21:10-14; Efe. 2:20) Tha ceitune kö la traone cili memine la itre xaa traon. Ame la gojenyi ka tru ne la traon, ke hna kuca hnei nyipi gool, nge hna kuca hnei penina la 12 lao qëhnelö. Hna amingömingöne la itre trepene me itre ngöne uma ne la traon hnene la nöjei pengöne etë mo. Ceitune la traon me ketre kare. (Hna ama. 21:15-21) Ngo kösë hetre ewekë pala kö ka patr! Öni Ioane: “Tha öhne kö ni la ketre uma ne hmi hnine la traon, ke Iehova Akötresie, Atre ka Tru Trenge Men, la sipu uma ne hmi i nyidrë, nge tune fe kowe la Neköi Mamoe. Nge tha nyipiewekë kö troa hetre jö me treu troa hudrum hnine la traon, ke ijije hë la lolo i Akötresie troa thinan, nge laame ne la traon la Neköi Mamoe.” (Hna ama. 21:22, 23) Itre ka sine la Ierusalema Ka Hnyipixe a ithanata meköt koi Iehova.—Heb. 7:27; Hna ama. 22:3, 4. w22.05 17-18 par. 14-15

Nyipici laka, Iehova la Atre Xup me Atre Acili Wathebo me Atre Iameköti, ngo Nyidrëti fe la Keme së ka tru ihnimin. (Sal. 100:3; Is. 33:22) Ame la easa ngazo koi Nyidrë me ietra, tru la aja i Nyidrë troa nue la ngazo së. (Sal. 86:5) Nyidrëti a ithuecatre koi së jëne Isaia perofeta, me hape: “Maine tune la ka palulu la ite ngazo i nyipunie, tro ha wië tune la kiona.” (Is. 1:18) Pine laka, itre atr ka tha pexeje kö së, easa qaja maine kuca la itre ewekë ka akötrë itre xan. (Iako. 3:2) Tha kolo kö lai a qaja ka hape, tha ijiji së kö troa hane nyisinee i angatr. Ijiji së hi e tro sa atreine nu la itre ngazo i angatr. (Ite edomë 17:9; 19:11; Mat. 18:21, 22) Maine tro ketre a tria koi easë, aja i Iehova tro sa nue la ngazo i angeic. Hetre kepin matre loi e tro sa nue la ngazo i itre xan. Ame la pane kepin, ke Iehova a “nyipi köle tij” la itre ngazo së.—Is. 55:7. w22.06 8 par. 1-2

Ngacama tha easë kö a goeëne la eisapengö së memine la itre xaa trejin, ngo ijije hi tro sa xomi ini qa ngöne la tulu i angatr. Hanawang la tulu i Iesu. Nyipici laka, ketre atr ka pexeje Iesu, ngo ijije hi tro sa xomi ini qa ngöne la itre thiina ka lolo i nyidrë me itre hnei nyidrëti hna kuca. (1 Pet. 2:21) Ame la easa kuca la hne së hna atrein matre troa xötrethenge la tulu i Iesu, easë hi lai a nyihlue i Iehova hnyawa. Ame e hnine la Tusi Hmitrötr, hetrenyi la itre hlue i Iehova ekö ka catre nyihlue i Nyidrë, ngacama itre atr ka tha pexeje kö angatr. Ijije hi tro sa xomi ini qa ngöne la itre tulu i angatr. Hanawang la tulu i Dravita joxu. Ngacama tha ka pexeje kö angeic, ngo hnei Iehova hna qaja ka hape, ketre “atre amadrinëne la hning.” (Itre hu. 13:22) Nyipici, hnei Dravita hna kuca la itre ewekë ka ngazo. Ame pe, angeic la ketre tulu koi së. Pine nemen? Pine laka, tha hnei angeice kö hna thele kepin la aqane ujë i angeic. Hnei angeice pe hna kapa la itre eamo me ietra. E cili, hnei Iehova hna nue la ngazo i angeic.—Sal. 51:3, 4, 10-12. w22.04 13 par. 11-12

Öni Tusi Hmitrötr, ithupëjia la mec. (1 Kor. 15:25, 26) Eje hi, ame la easa wezipo, ke xou i easë fe troa mec. Ceitu fe memine la itre sinee së hna tithe hnei mec. Hnauëne la easa xoue mec? Ke hnei Iehova hna xupi së memine la aja troa mele madrine uti hë epine palua. (Ate cai. 3:11) Ame la easa xoue mec, ke ka tro fe lai a xatua së troa thupëne hnyawane la mele së. Tro la xoue cili a xatua së fe troa iëne hnyawa la itre hne së hna troa xen, me aqane troa kuci sport, me wai droketre, me itre wenekas nyine tro sa xom, me thupëne matre tha tro kö sa eatre menu. Atre hnyawa hi Satana ka hape, ka tru koi së la mel. Ame koi angeic ke, ijije hi tro sa nuetriji Iehova hnene la aja së troa mel. (Iobu 2:5) Ngo ka tria la mekuna i Satana! Pine laka “atreine Satana ihumuth,” angeic a huliwane la xoue cili matre ananyi së qaathei Iehova.—Heb. 2:14, 15. w22.06 18 par. 15-16

Ame ngöne la itre ijine iaxösisi, ke tha easë hmaca kö a icasikeu tune enehila, ngo ngöne la itre neköi gurup. Matre ijine hi la tro sa isine troa ce mele tingeting me cas. Ame la ithupëjia me easë ke, Satana, ngo tha itre trejine kö. The goeëne kö la itre tria i angatr. Ngo e hetre iwesitrë i epun, canga iloi jë. (Ite edomë 19:11) Thele jë troa xatua angatr. (Tito 3:14) Tru la madrin hna kapa hnene la gurupe i Andrei thupene la angatr a xatuane lo trejin föe. Celë hi lai ka acatrene la casi angatr, kösë ketre fami hë angatr. (Sal. 133:1) Itre thauzane lao trejin ka catre nyihlue i Iehova, ngacama hna wathebone la hmi së ngöne la nöje i angatr. Ame la itre xan, ke hna akalabusin pine la lapaune i angatr. Loi e tro sa thithi sai angatr me itre fami angatr. Loi e tro fe sa thithi fë la itre trejin ka nue mel matre tro fë ewekë koi angatr, me isigöli angatr ngöne la itre hnaakootr. (Kol. 4:3, 18) The mekune kö ka hape, tha ka nyipiewekë kö la itre thithi epun!—2 Thes. 3:1, 2; 1 Tim. 2:1, 2. w22.12 26-27 par. 15-16

Itre nekönatr a nyitipune la kem me thine nyudren. Nyipici, pëkö keme me thin ka pexej. (Rom. 3:23) Ame pe, ame la itre keme me thine ka inamacan ke, angatr a isine matre tro palahi a amamai tulu kaloi kowe la itre nekönatr. Önine la ketre kem: “Ceitune hi la itre nekö së me ketre éponge hna kuiëne hnine la tim. Saqe hi angatr xolouthe asë koilo. E qaja ha së la ketre ewekë, nge tha ka ihmeku kö memine la itre thiina së, canga tro hi la itre nekö së a ameköti së.” Haawe itre keme me thin, maine epuni a ajane tro la itre nekö i epuni a hnimi Iehova, loi e troa mama koi nyudren ka hape, epuni fe a hnimi Nyidrë. Nyimu aqane troa inine la itre nekönatr. Öni Andrew, ka 17 lao macatre ka hape: “Hnei kaka me nenë, hna lapa qaja koi ni la enyipiewekëne troa thith. Ame e nöjei hej, ngacama ase hë ni thith, ngo kaka hmaca kö a ce thithi me ni. Tha xouenge hë enehila troa thith, nge eni ha goeë Iehova ceitu me Kemeng ka tru ihnimin.” Itre keme me thine fe, tro la ihnimi epun koi Iehova a xatuane la itre nekö i epun. w22.05 28 par. 7-8

Ame la ketre nyine tro sa pane kuca matre hnëkë kowe la bapataiso, ke ene la troa ietran la itre ngazo së. (Itre hu. 2:37, 38) Maine tro epuni a nyipi ietra, ke tro ha saze la aqane ujë i epun. Hapeu, hnei epuni kö hna nuetrij la itre huliwa hna methinën hnei Iehova, tune la kuci ngazo, ufi sixa maine iqaqa? (1 Kor. 6:9, 10; 2 Kor. 7:1; Efe. 4:29) Catre jë huliwa matre saze. Sipo ixatua jë kowe la ka hamë ini koi epun, maine itre qatre thup pena. Maine epuni palakö thei kaka me nenë, nge epuni a isi memine la ketre aja ka ngazo, ke sipo ixatua jë thei nyidro. Nyipiewekë mina fe tro sa hetre hna majemin ka loi ngöne la huliwa i Iehova. Kola qaja la troa sine lapan la itre icasikeu me hane qeje mekun. (Heb. 10:24, 25) Nge maine ijiji epuni hë troa hane cainöj, ke catre jë cainöj. w23.03 10-11 par. 14-16

Tusi Genese 3:⁠14, 15 a qaja la ketre “un” me “matra” ne la un. Eje hi, thatreine kö la un troa trotrohnine la hnei Iehova hna qaja ngöne lo hlapa e Edrena. Kolo hi lai a hape, Iehova a ithanata kowe la ketre hna xup ka inamacan. Nga drei jë angeice lai? Hna Amaman 12:9 a qaja laka, kolo “un ekö,” hna hëne ka hape, Satana Diabolo. Ame la Tusi Hmitrötr a qeje matran, ej a qaja la itre ka nyitipune la ketre atr ngöne la aqane mekun me aqane ujë, matre kösë itre neköi angeice hë angatr. Haawe, ame la matra ne la un, ke kola qaja la itre angela me itre atr ka icilekeu me Iehova me nöje i Nyidrë. Kolo hi lai a qaja la itre angela ka trotrij la göhnë i angatr e hnengödrai ngöne lo hneijine Noa, memine fe la itre atr ka icilekeu tui Satana.—Gen. 6:1, 2; Ioane 8:44; 1 Ioane 5:19; Iudra 6. w22.07 14-15 par. 4-5

Tru catre la ihnimi Paulo kowe la itre trejin. Hnei angeice hna hane cile kowe la itre jol, matre ijiji angeice hi troa utipin me trotrohnine la itre trejin ka hane melëne lai. Ketre, hna hane fe traqa koi Paulo la troa pë mani, nge hnei angeic hna huliwa matre troa hetreny la ka nyipiewekë koi angeic, me itre ka ce tro me angeic. (Itre hu. 20:34) Ka cai itate angeic. Ame la angeic a traqa e Korinito, hnei angeic hna ce huliwa me Akula me Perisila. Ngo ame “nöjei Sabath” angeic a cainöj kowe la angetre Iudra me angetre Geres. Ame hë la kola traqa hnei Sila me Timoteo, “kolo pala hi a tru hnei huliwa i Paulo göi troa cainöjëne la trengewekë i Akötresie.” (Itre hu. 18:2-5) Tha thëthëhmine kö Paulo la huliwa ka nyipiewekë koi angeic, ene la troa nyihlue i Iehova. Pine laka, Paulo la ketre tulu ka lolo göne la aqane troa tulu ewekë göi huliwa, matre ijiji angeic hi troa ithuecatr kowe la itre trejin. Hnei angeic hna amekunë angatr laka, tha tro kö a nue la itre jol ne la mel, memine la huliwa i maseta troa sewe angatr troa “tuluthe la ka nyipiewekë,” ene la itre igötranene la hmi Iehova. w22.08 20 par. 3

Ame la aja i Iehova enehila, ke tro sa cainöjëne la maca ka loi ne la Baselaia ngöne la nöjei nöj asë. (1 Tim. 2:3, 4) Ketre huliwa lai ka sisitria catr koi Nyidrë, matre hnei Nyidrë hna ahnith la huliwa cili kowe la nekö hnimina i Nyidrë. Pine laka, Iesu la ka elemekene la huliwa cili, xecie koi së laka, tro kö a eatr la aja i Iehova, qëmekene troa traqa la pun. (Mat. 24:14) Easa atre tune kaa? Qëmekene tro Iesu a elë hnengödrai eë, hnei nyidrë hna qaja kowe la itretre dreng hune la Wetre Galilaia ka hape: “Ase hë Akötresieti nue koi ni troa musi hune la nöjei ewekë e hnengödrai me e celë fen.” Nge öni nyidrë hmaca jë hi: “Qa ngöne lai, tro jë nyipunie, nge inine jë la nöjei atr qa ngöne la nöjei nöj troa xötrethenge ni.” (Mat. 28:18, 19) Haawe, Iesu hi la hna ahnith kow la hnëqa ne xomiujine la huliwa ne cainöj. Nge, Iesu palahi enehila a xomiujine la huliwa ne cainöj. w22.07 8 par. 1, 3; 9 par. 4

Ame la itre ka meköt, ene la itre ka kuca la aja i Iehova qëmekene troa mec, troa amele angatr hmaca “kowe la mel,” ke ase hë cinyanyine la ëje i angatr ngöne la tusi ne mel. Kolo hi lai a amamane ka hape, casi hi la melehmaca ne la “itre ka kuca la loi” hna qaja ngöne Ioane 5:29 memine la melehmaca ne la “itre atre ka meköt” hna qaja ngöne Itre Huliwa 24:15. Roma 6:7 a hape: “Ame la atre ka mec, tre pëhë ngazo i angeic.” Haawe, thëthëhmine hë Iehova la itre ngazo hna kuca ekö hnene la itre ka meköt, ngo tha thëthëhmine kö Nyidrë la itre huliwa ka loi i angatr. (Heb. 6:10) Maine aja i angatr tro la ëje i angatr a lapa palua ngöne la tusi ne mel, ke nyipiewekë tro angatr a mele nyipici koi Iehova. w22.09 18 par. 13, 15

Daniela perofeta la ketre tulu koi së, ke hnei angeic palahi hna huliwa nyipici. Ngacama angeic la ketre hna oth a tro Babulona, ngo canga mejiune hi la itre atr koi angeic. Nge the qaja palaha la angeic a qejepengöne la itre pu i Nebukaneza. (Dan. 4:20-22, 25) Itre macatre thupen, hnei Daniela hna amamane ka hape, ijije hi troa mejiune koi angeic. Hnei angeic hna qejepengöne hnyawa la itre hna cinyanyine ngöne la ngöne uma ne la hnanyijoxu e Babulona. (Dan. 5:5, 25-29) Thupene lai, hnei Dariu me itre tane i angeic hna öhne laka, hetrenyi thei Daniela “la hni ka ’tein.” Hnei angatr hna öhne laka, ka “nyipici [Daniela], nge pëkö menu me ngazo hna öhne thei nyidë.” (Dan. 6:3, 4) Loi e tro sa isa hnyinge ka hape: ‘Hapeu, itre xan kö a goeë ni tune la ketre atr nyine troa mejiune kow?’ Easa atrunyi Iehova, ngöne la itre atr a mejiun koi së. w22.09 8-9 par. 2-4

Ame la easa trongëne la itre trepene meköti Iehova göi loi me ngazo, ke easa kapa la itre thangan ka lolo. Pine nemen? Pane mekune jë laka, itre baak a isa athip la etrune la mani thenge la sipu meköti angatr, maine pena tro la itre entreprise ne xupi uma, a isa athip la aqane troa tuluth la itre ewekë thenge la isa meköti angatr. Tro lai a hetre ethan koi së. Nge maine tro la itre droketre a isa kuci mekun, me tha trongëne la itre hna amekötin göne la aqane troa inyië, ke tro hë lai a mec la itre xaa ka wezipo. Nyipici, ame la itre hna amekötine cili, ke itre nyine thupë së. Ketre, kolo fe a thupë së hnene la itre trepene meköt hnei Akötresie hna acil. Iehova a amanathithine la itre atr ka isin troa mele thenge la itre trepene meköti Nyidrë. Öni Nyidrë: “Tro ha la ange ka meköti a hetenyi la nöj, me lapa palua kö ngön’ ej.” (Sal. 37:29) Pane mekune jë la cas, me tingeting me madrine hna troa kapa hnene la itre atr, e tro asë hi sa trongëne la itre trepene meköti Iehova. Aja i Nyidrë tro epuni a melëne la mele cili ka mingöming. Celë hi matre nyipiewekë tro së asë a hniine la meköt! w22.08 27-28 par. 6-8

Ame la easa cile kowe la itre jol, ke kola tupath la lapaune së koi Iehova me kowe la organizasio i Nyidrë. Nemene la aqane tro sa elë hun la itre jole cili? Loi e tro sa waiewekë hnyawa me hmek me cile huti ngöne la lapaun. Easa waiewekë hnyawa, ngöne la easa xomihni me isine troa waiewekë tui Iehova. Ame la easa ujë tun, ke tha easë kö a nue la itre aliene hni së troa musinë së. Maine jë hna akötrë së hnene la ketre trejin ka trene hnëqa e hnine la organizasio i Iehova. Maine jë, tha hnei angeic kö hna thë troa akötrë epun. (Rom. 3:23; Iako. 3:2) Ngo, hna ketri epun hnene la hnei angeic hna kuca. Maine jë, tro epun a mekun ka hape, ‘Maine celë hi aqane ujë ne la itre trejin, ke tha easë kö ngöne la organizasio i Akötresie!’ Aja i Satana tro sa mekune tun. (2 Kor. 2:11) Tro la mekune cili a ananyi së qaathei Iehova memine la organizasio i Nyidrë. Haawe, loi e troa thupëne matre tha tro kö sa lapa fë trengehni. w22.11 20 par. 1, 3; 21 par. 4

Hnei Iehova hna hamë së la mejiun troa mel epine palua. Hetre itre ka troa mel epine palua e hnengödrai. (1 Kor. 15:50, 53) Nge ame la itre xan, tro angatr a mele palua me pexej e celë fen. (Hna ama. 21:3, 4) Ngacama easa mejiune troa mel e celë fen, maine e koho hnengödrai, ngo ka sisitria la mejiune së. Tha luelue kö së laka, tro kö a eatr la mejiune së ke, qaathei Iehova. (Rom. 15:13) Atre hi easë laka, hetre hnei Nyidrëti hna thingehnaean, nge tha tro kö Nyidrëti a thoi. (Num. 23:19) Xecie koi së laka, aja i Iehova troa eatrëne la hnei Nyidrëti hna qaja, nge hetre mene i Nyidrë troa eatrën. Tru la ihnimi Iehova koi së, nge aja i Nyidrë tro sa mejiune koi Nyidrë. Maine ka catr la mejiune së koi Iehova, atreine hi së elëhune la itre jol ka traqa koi së ngöne la madrin. w22.10 24 par. 1-3

Pine laka, hnei angatr hna tha idrei, öni Isaia, tro Iehova a nyithupene koi angatr. (Is. 30:5, 17; Iere. 25:8-11) Nge, celë hi ka traqa ngöne la kola othi angatr hnene la angetre Babulona. Ngo ame pe, hetre ka mele nyipici thene la angetre Iudra, matre öni Isaia tro hmaca kö Iehova a bëeke sai angatr a tro Ierusalema. (Is. 30:18, 19) Nge celë hi ka traqa. Hnei Iehova hna thepe angatr qa Babulona. Ngo itre macatre hnei angatr hna pane itreqe matre eatre pi la hna perofetane cili. Öni Tusi Hmitrötr, “Tro Iehova a teqene mate hnimi nyipunie,” kolo hi lai a amamane ka hape, tha tro kö a canga amelene la itre ka mele nyipici qa Babulona. Eje hi, hnene la angetre Isaraela hna lapa koi 70 lao macatre e Babulona qëmekene troa aijijë angatr troa bëeke hmaca a tro Ierusalema. (Is. 10:21; Iere. 29:10) Ame lo angetre Isaraela e Babulona, ke tru la hnei angatr hna treij me hleuhleu. Ngo ame la angatr a bëeke kowe la nöje i angatr, ke angatr ha treij ne madrin. w22.11 9 par. 4

Ame enehila, ngöne la itre nöj, casi hi la itre jol hna melën hnene la itre trejin memine la itre aposetolo ekö, kola qanangazo angatr ke, angatr a qeje Iesu. Anyimua wathebo angatr hnene la hnakootr katru i angetre Iudra “troa ithanata ngöne la ëje i Iesu.” (Itre hu. 4:18-20; 5:27, 28, 40) Ngo atre hnyawa hi angatr laka, hetre mus ka sisitria catre kö ka ‘amekötine koi angatr troa cainöje kowe la itre atr, me anyipicine’ la ëje i Iesu. (Itre hu. 10:42) Hnei Peteru me Ioane, lue qeneqaja ne la itre aposetolo hna sa mekötine koi angatr ka hape, ka nyipiewekë kö troa drengethenge Akötresie hune la atr. Celë hi matre tha cile kö angatr troa cainöjëne la ëje i Iesu. (Itre hu. 5:29) Itre tulu ka lolo koi së fe enehila. Thupene la hna kootrë angatr pine mele nyipici koi Iehova, angatr a tro pi qa ngöne la hnakootr, me “madrin atraqatr, ke ame koi angatr, ahnahna la troa ahmahmanyi angatr pine la ëje i [Iesu].” Nge tha hmiitre ju kö, nge angatr hmaca a cainöj!—Itre hu. 5:41, 42. w22.10 12-13 par. 2-4

Maine aja së troa atre Iehova, ke loi e troa pane inine la itre ini ka nyitrepene la Tusi Hmitrötr. Kolo hna qaja hnei Paulo ngöne la itre tusi angeic kowe la angetre Heberu ka hape, “itre pane ini” hna aceitunën me melek ka ithuane la medreng. (Heb. 5:12; 6:1) Hnei angeic hna hmekën la itre keresiano laka, tha tro hmekuje kö a inine la itre pane ini cili. Loi e tro fe angatr a inine la itre ini ka jui ne la Tusi Hmitrötr. Aja i epuni kö troa atre la itre nyipici cili? Nge, aja i epuni fe kö tro palahi a atrepengöi Iehova hnyawa memine la aja i Nyidrë? Alanyim hnei ka qaja ka hape, jole catre koi angatr troa e me inine la ketre itus. Ame epuni ke? Hnei epuni kö hna inine troa e hnyawa me ini tus ngöne uma ne ini? Hetre thangane kö la hnei epun hna ini? Maine öhne hi epun laka, jole catre koi epun? Maine eje hi , ke tha epuni casi kö. Ngo ame pe, ijije hi tro Iehova a xatua epun, ke ka pexeje Nyidrë, nge Nyidrëti la Atre Ini Ka Tru. w23.03 9-10 par. 8-10

E tro sa menyik, ke tro ha lapa e kuhu hni së la Trengewekë i Akötresie. Troa hetre thangane la itre ini Iesu e tro sa nuetrij la pi tru me iqej. Tro la aqane ujë së koi itre xan a amamane ka hape, ka hetre thangane la Tusi Hmitrötr ngöne la mele së. Tha hnene kö la itre Faresaio hna nue la Itre Hna Cinyihan troa ketr hna hni angatr. Celë hi ka uku angatr troa “jelengazone la ka pë engazon.” (Mat. 12:7) Ketre tun, tro la aqane ujë së koi itre xan a amamane ka hape, easa nue la Tusi Hmitrötr troa saze la itre thiina së. Hapeu, easë kö a canga goeëne la itre thiina ka lolo thene la itre xan, maine easë pena qaja amamane la itre tria i angatr? Hapeu, easë kö a nue la ngazo itre xan maine lapa fë trenge hni? Tro la itre hnyinge celë a amamane ka hape, easa nue la Tusi Hmitrötr troa saze la itre mekuna së, me itre aliene hni së, me aqane ujë së.—1 Tim. 4:12, 15; Heb. 4:12. w23.02 12 par. 13-14

Tro sa ce wang la tulu i Iosefa atre Arimathea. Ketre atr hna metrötrën thene la angetre Iudra. Angeic la ketre atrene la hnaakootr ka tru i angetre i Iudra. Ame lo Iesu palakö a cainöje trootro, hnei angeic hna xoue atr. Öni Ioane ka hape, “Ketre atre drei Iesu angeic, ngo pine laka, xou i angeic e angetre Iudra, angeic a juetrëne lai.” (Ioane 19:38) Ngacama ka kapa Iosefa la maca ne la Baselaia, ngo hnei angeic hna juetrëne koi itre xan la lapaune i angeic koi Iesu. Ma angeice jë xouene laka, tha tro hmaca kö a metrötrë angeic e troa atre ka hape, angeic la ketre atre drei Iesu. Ame pe, öni Tusi Hmitrötr, thupene la Iesu a mec, hnei Iosefa hna “tro ju koi Pilato troa sipone la ngönetrei i Iesu.” (Mar. 15:42, 43) Eje hi, tha xou i angeice hë troa amamane ka hape, ka lapaune angeic koi Iesu. Hna hane fe kö traqa koi epun troa xoue atr tui Iosefa? w23.01 30 par. 13-14

Hna drei mejen hnene la joxu föe ne Sheba la aqane hlemu me tingeting la angetre Isaraela fene la musi Solomona. Hnei eahlo hna tro qa gaa nany utihë Ierusalema matre jelenyipicine la hnei eahlo hna dreng. (1 Ite jo. 10:1) Matre hnei eahlo hna qaja koi Solomona la itre hnaewekë e caha hun. Ngo, co hi la emingömingöne la mel fene la musi Solomona hune la mele së elanyi hna hnëkëne hnei Iehova fene la musi Iesu Keriso. Sisitria kö Iesu hui Solomona. Tha ka pexeje kö Solomona matre ka tria la aqane ameköti ewekë i angeic. Nge kola xeni pun hnene la nöje i Akötresie la aqane axecië mekune i angeic. Ngo ka pexeje Iesu, nge ka meköti palahi la aqane axecië mekune i nyidrë. (Luka 1:32; Heb. 4:14, 15) Kolo hi lai a amaman ka hape, tha tro pi kö nyidrëti a tria me kuca la ketre ewekë ka troa akötrëne la itre hlue i nyidrë. Madrine catre së troa hetre Joxu ka tune lai! w22.12 11 par. 9-10

Nemene la nyine tro sa kuca e traqa ju la mec ka ixötrekeu ngöne la nöje i easë? Nyipiewekë tro sa trongëne la hna amekötin hnei mus, ene la troa wasi wanakoim lapa, me lapa iananyi, me ami mask, me umë së e traqa ju së wezipo. Ame la easa trongëne hnyawan la itre hna amekötine cili, ke easë hi lai a amamane ka hape, easa wangatrune la mel. Ame ngöne la itre ijine cili, tru catr la itre ithuemacany ka tria hna iqajakeun hnene la itre fami së me itre ka lapa ezi së, me qaathene fe la itre nuvel. The ‘kapa menune kö la nöjei trengewekë asë,’ ngo drenge ju pe la itre ithuemacanyi qaathene la itre mus me itre droketre. (Ite edomë 14:15) Qëmekene troa amekötine la aqane trongene la itre icasikeu memine la huliwa ne cainöj, hnene la Lapa Ne Xomi Meköt hna pane ithele hnyawa. Ame la easa idrengethenge, easë hi lai a thupëne la mele së memine la mele ne la itre xan. Aqane tro fe hi së lai a ukune la itre xan troa qaja aloine la hmi së.—1 Pet. 2:12. w23.02 23 par. 11-12

Ame la angetre Isaraela a traqa ngöne la Nöje Hna Thingehnaean, hnei angatr hna lapan asë la nöj. Ngo ame la ejolen la troa lapa iananyi, ke tha tro hmaca kö angatr a sikusikun la itre xaa trejin me angatr. Eloine pe, hnei Iehova hna acile la itre icasikeu matre troa acasi angatr, nge tro angatr a ce dreng me inine la Trengewekë i Nyidrë. (Deu. 31:10-12; Neh. 8:2, 8, 18) Pane mekune jë la madrin ne la angetre Isaraela asë la angatr hmaca a itronyi e Ierusalema. Jëne la itre icasikeu cili, Iehova a acatrene la cas ne la nöje i Nyidrë. Nge e thupen, kola acile la itre ekalesia. Ame ngöne la ekalesia, hetre trahmanyi me föe, ka trenamo maine pë ewekë, nge ka isa qene lapane kö. Ngo ka casi angatr ngöne la nyipi hmi. Nge tro hi la itre atr a trotrohnine la Tusi Hmitrötr, e tro angatr a sipo ixatua kowe la itre xaa trejin me sine la itre icasikeu.—Itre hu. 2:42; 8:30, 31. w23.02 3 par. 7

Ase hë Iehova qaja ka hape, tro la itre ka drengethenge Nyidrë a kapa la “mele ka pë pun.” (Rom. 6:23) Ame la easa lapa mekune lai, ke kola kökötre la ihnimi së koi Nyidrë. Pane mekune jë la: Tru catr la ihnimi Iehova matre Nyidrëti a ajan tro sa casi me Nyidrë epine palua. Tro la mejiune së kowe la mele ka pë pun a xatua së troa cil kowe la itre jol. Ame la kola pi humuthi së hnene la itre ithupëjia, ke tha easë kö a xou me kei thenge la mekuna i angatr. Pine nemen? Pine laka, maine tro sa mele nyipici utihë la mec, tro kö Iehova a amele së hmaca, me hamë së la mel ka pë pun. (Ioane 5:28, 29; 1 Kor. 15:55-58; Heb. 2:15) Iehova la Qeqe ne mel, nge ka epine palua Nyidrë matre ijiji Nyidrëti hi troa hamë së la mele ka pë pun. (Sal. 36:9) Tusi Hmitrötr a qaja ka hape, ka hekö hë Iehova, nge tro palahi Nyidrëti a ej.—Sal. 90:2; 102:12, 24, 27. w22.12 2 par. 1-3

Pine laka itre hlue i Iehova së, matre tha sesëkötre kö së la easa ixelë me itre jol. Atre hi së la hna qaja hnei Tusi Hmitrötr ka hape, “tro së lai a lö kowe la Baselaia i Akötresie jëne la itre akötr ka nyimutre.” (Itre hu. 14:22) Ketre, ame la itre xaa jol ke, tro hi a patr elanyi ngöne la fene ka hnyipixe. Nge ame e cili “pë hmaca kö mec, me hleuhleu, me treij, me akötr.” (Hna ama. 21:4) Tha Iehova kö a thepe së qa ngöne la itre itupath, ngo Nyidrëti pe a xatua së troa xomihnin itre ej. Goeëne la hnei Paulo hna qaja kowe la itre keresiano ne Roma. Thupene la hna e wengën la itre jol ka traqa koi angeic me itre trejin, öni angeic: “Easë pala hi a hun hnene la atre hnimi së.” (Rom. 8:36, 37) Kolo hi lai a hape, jëne la ixatua i Iehova, ijije hi tro sa hun, ngacama easë nyipine la itre jol. w23.01 14 par. 1-2