Maac

Hnei nyidrëti hna ithuecatre kowe la itre trejin troa huliwane la itre ahnahna, ene la itre hne së hna atreine kuca, matre troa xatuane la itre trejin ne la ekalesia. Öni Peteru: “Haawe, pine laka, ase hë së isa kepe ahnahna, isa huliwane jë hë thatraqai ketre me ketre, tune la itre hlue ka lolo nge ka atreine huliwa, itre hlue ne la ihnimi gufa i Akötresie.” (1 Pet. 4:10) Eje hi, tha tro kö sa cile troa huliwane la itre ahnahna hne së hna kapa me mekune laka, tro itre xan a zalu maine kucakuca pena. Ngo tha tro kö sa pi mama fë itre ej. (1 Kor. 4:6) Tha tro kö sa thëthëhmine laka, qaathei Akötresieti asë la itre hne së hna atreine kuca. Eje hi, tha tro kö sa pi mama. Ngo loi e tro pe sa huliwane itre ej matre troa xatuane la ekalesia. (Fil. 2:3) Maine tro sa nue la trengecatre së me itre hne së hna atrein matre troa kuca la aja i Akötresie, tro hë së lai a madrin. Ketre, tha easë kö a madrin ke, easë pi mama fë la itre hne së hna atrein. Ngo hnene laka, easa huliwane itre ej matre troa atrunyi Iehova. w22.04 11-12 par. 7-9

Ka tru catr koi Iesu la Tusi Hmitrötr. Kola mama lai ngöne la hna qaja ngöne Salamo 40:8, NWT: “Akötresieng fe, madrine ni troa kuca la aja i nyipë, nge e kuhu hninge la wathebo i nyipë.” Celë hi matre Iesu a catre nyihlue i Iehova me madrin. Ketre tun, tro fe sa madrine me catre nyihlue i Iehova, e tro sa amë e kuhu hni së la Trengewekë i Akötresie. (Sal. 1:1-3) Thenge la itre hnei Iesu hna qaja me kuca, nyipiewekë tro sa atreine e Tusi Hmitrötr hnyawa. Loi e tro sa sipo Iehova troa xatua së troa trotrohnin la hne së hna e, me hnying me fejane la itre mekun ka ketri së, nge tha tro kö a e nyimenyimën. Loi e tro fe sa ithel ngöne la itre itusi së matre trotrohnine la hne së hna e. Maine easa ajane tro la Tusi Hmitrötr a saze së, loi e tro sa e cememine la ipië. Ame cili, tro ha hetre thangane la hne së hna e Tusi Hmitrötr, me easenyi së catr koi Iehova.—Sal. 119:17; Iako. 4:8. w23.02 13 par. 15-16

Troa iëne la ketre mekun nyine troa eatrën, thupene lai, catre jë trongëne la itre eamo hna hamëne koi epun. Tune kaa? Maine jë easa ajane troa maca troa hamë ini. E cili, loi e tro sa inine la boroshür hna hape, Troa Atreine e Tus Me Hamë Ini. Maine hetre hnëqa së ngöne la icasikeu e nyipine la wiik, loi e tro sa sipone kowe la ketre trejin ka macaj troa pane drei së me qaja la itre nyine tro sa huliwan. Loi e tro fe a amamane kowe la itre trejin ka hape, ka atreine huliwa së, nge ijije hi tro angatr a mejiun koi së. (2 Kor. 8:22) Ngo tune kaa ngöne la easa xom la ketre hnëqa nge thatreine pe së kuca? Tha tro pi kö sa hmacahmaca! Hapeu, hnei Timoteo kö hna thele matre maca troa hamë ini? Tha hna qaja kö hnei Tusi Hmitrötr. Ame pe, hnei angeice palahi hna xötrethenge la itre eamo i Paulo. Celë hi lai ka xatua angeic troa xome hnyawa la itre hnëqa hna ahnithe koi angeic.—2 Tim. 3:10. w22.04 24-25 par. 8-11

Drei la öni ka ses ka seven lao he? Ceitune hi la öni cili memine la leopar, nge ame la itre wacan, kösë waca ne bea, nge ame la që, ceitu me që ne liona. Nge 10 lao jiane ej. Ame ngöne la tusi Daniela mekene 7, kolo fe a mama la 4 lao öni cili. Ngo, ame ngöne Hna Amaman mekene 13, hna acasine la 4 lao öni cili ngöne la ca öni. Matre, ame la öni ka ses ka seven lao he, ke tha eje kö a nyihatrene la ca mus. Ej a “musi kowe la nöjei tribu, me atr, me qene hlapa, me nöj.” Easa trotrohnine laka, tru catre kö la musi ne ej hune la itre xaa mus. (Hna ama. 13:7) Kolo hi lai a amamane ka hape, ame la öni ka ses cili, ke kola nyihatrene la itre mus hna acil qane ekö. (Ate cai. 8:9) Ame la ketre ewekë ke, ame la naba 10 ngöne la Tusi Hmitrötr, ke kola nyihatrene la ka pexej. w22.05 9 par. 6

Drei la itre ka troa kapa la itre manathithi cili? Troa nyiqane hnene la ka alanyim atraqatr, lo itre ka mele pe qa ngöne la isi Amagedro, memine la itre nekönatr hna troa hnahon ngöne la fen ka hnyipixe. Ngo tusi Hna Amaman mekene 20 a thingehnaean ka hape, troa amelene hmaca la itre ka mec. (Hna ama. 20:11-13) Kolo itre ka “meköt,” itre ka mele nyipici ekö, memine fe la itre ka “tha meköti kö,” itre ka thatre Iehova kö utihë la angatr a mec. (Itre hu. 24:15; Ioane 5:28, 29) Kolo kö lai a hape, troa amelene asë la itre atr ka mec ngöne la Ca Thauzane Lao Macatre? Waea. Tha tro kö a amelene la itre ka methinë Iehova me xele ma nyihlue i Nyidrë qëmekene tro angatr a mec. Hna nue ijine koi angatr troa atrepengöi Iehova, ngo tha kapa kö angatr la ihnimi Nyidrë matre troa mel ngöne la paradraiso e celë fen.—Mat. 25:46; 2 Thes. 1:9; Hna ama. 17:8; 20:15. w22.05 18 par. 16-17

Jëne la “hlue ka nyipici me ka inamacan,” hnei Iesu hna acil la ketre organizasio e celë fen ka troa cilëgöline la hmi ka wië. (Mat. 24:45) Nemene fe la mekuna i epun göne la organizasio cili? Ma casi fe la mekuna i epun memine la hnei Peteru aposetolo hna qaja koi Iesu ngöne la topik së. Maine patre ju la organizasio i Iehova, ekaa easë enehila? Eje hi, Iesu a isine matre tro palahi sa kapa la xen qaathei Iehova. Nyidrëti fe a ini së matre tro sa atreine tro fë hnyawane la maca ka loi. Ketre, nyidrëti a xatua së troa hetrëne “la thiina ka hnyipixe,” nge ka amadrinë Iehova. (Efe. 4:24) Nyipici, Iesu fe a xatua së ngöne la kola traqa la itre jol ka tru. Kola mama lai ngöne lo kola traqa la mec COVID-19. Ame la itre xan, angatr a nyinyape hmohmo, ngo ame kö së, hnei Iesu hna hamëne la itre hna amekötine matre thupëne la mele së. w22.07 12 par. 13-14

Hnei Iehova hna amekötine kowe la angetre Isaraela, troa xatuane la itre nekö i angatr troa atre Nyidrë. (Deu. 6:6, 7) Ame e nöjei drai, ijije hi tro la itre keme me thine a inine la itre nekö i angatr troa hnimi Iehova. Itre nekö trahmanyi a ce tro helep me keme i angatr, me inine troa tra feja, me menu. Ame pena la itre nekö jajiny, angatr a ce lapa memine la thine i angatr, matre inine troa ca imaano, me kuca la itre xaa jol e kuhu hnalapa. Ame e cili, itre keme me thine a ce huliwa me itre nekö i angatr, me porotrikëne la itre nyipi porotrik. Tune la troa qeje Iehova, me aqane hnimi angatr hnei Nyidrë. Ame ngöne la itre xaa nöj, pëhë ijine kowe la itre keme me thine troa porotrik memine la itre nekö i angatr. Itre keme me thin a huliwa, nge itre nekönatr a ini. Matre loi e tro la itre keme me thin a thele ijine troa pane porotrik me itre nekö i angatr.—Efe. 5:15, 16. w22.05 28 par. 10-11

Ame la atr ka kuca la itre ewekë cili, ke angeic a ena la itre wathebo i Iehova. Maine tro la ketre trejin a kuca la ketre ngazo ka tru, loi e tro angeic a thith koi Iehova me wang la itre qatre thup ne la ekalesia. (Sal. 32:5; Iako. 5:14) Nemene la hna troa kuca hnene la itre qatre thup? Iehova hmekuje hi la ka ijij troa nue la itre ngazo së, nge hna jëne la thupene mel. Ngo hnei Iehova hna nue kowe la itre qatre thup la hnëqa troa amekötine la trejin ka kuca la ngazo, thenge la hna qaja ngöne la Tusi Hmitrötr. (1 Kor. 5:12) Loi e tro la itre qatre thup a pane hnying ka hape: Hnei angeice kö hna thë troa kuca la ngazo? Hnei angeice kö hna thel troa juetrëne la ngazo i angeic? Ekö hë angeic kuca la ngazo? Hetre ka amamane kö ka hape, angeic a nyipi ietra? Nemene la ka amamane ka hape, ase hë Iehova nue la ngazo i angeic?—Itre hu. 3:19. w22.06 9 par. 4

Hnei Iesu hna ithuecatr kowe la itretre drei nyidrë troa thele catrëne la thiina ka meköt. (Mat. 5:6) Celë hi matre, aja së palahi troa kuca la loi me meköt qëmeke i Akötresie. Hapeu, epuni kö a hniin la nyipici me meköt? Öö. Methi epun la thoi me itre ewekë ka ngazo. (Sal. 119:128, 163) Ame la atre thoi, ke ka nyitipu Satana, atre musinëne la fen. (Ioane 8:44; 12:31) Ame la aja i Satana, ke ene la troa adrone la ëje ka hmitrötre i Akötresie. Angeic a silitrengathoi Iehova qaane lo kola icilekeu e Edrena. Nge öni angeic göi Iehova ka hape, Atre Mus ka pi tru me ka huliwa thoi, nge Nyidrëti a xomehnöth la mele ne la itre atr. (Gen. 3:1, 4, 5) Hnene la itre trengathoi cili, matre itre atr a qajangazo Akötresie. Maine tro la itre atr a thipetrije la nyipici, ke tro hë Satana lai a uku angatr troa kuca la nöjei ewekë ka ngazo.—Rom. 1:25-31. w23.03 2 par. 3

Maine epuni a isi memine la ketre hna majemine ka ngazo, ke ijije hi tro hmaca epuni a kei. Nge e cili, tro epuni a elëhni, ke thatreine kö epun canga nuetrij la itre hna majemine cili. Nemen la ka troa xatua epun troa cile catr? Troa xatua epun hnene la ketre thiina ka sisitria, ene la ihnimi epun koi Iehova. Ame la ihnimi epun koi Iehova, ke celë hi thiina ka lolo nyine tro epuni a hetreny. (Ite edomë 3:3-6) Maine ka catrecatre la ihnimi epun koi Iehova, ke tro lai a xatua epun troa cile kowe la itre itupath. Hnei Tusi Hmitrötr palahi hna qaja la ihnimi nyipici Iehova kowe la itre hlue i Nyidrë. Pine laka, ka tru catr la ihnimi Nyidrëti koi angatr, matre tha hnei Nyidrëti kö hna nuetriji angatr. Ketre, hna xupi epun hnaiji Akötresie, matre ijiji epuni fe troa hetreny la thiina cili. (Gen. 1:26) Tune kaa? Amamane jë la hni ne ole i epun koi Iehova. (1 Thes. 5:18) Hnyinge jë e nöjei drai ka hape, ‘Tune kaa la aqane hnimi ni hnei Iehova?’ Thupene lai, olene jë koi Nyidrë, nge qaja asë jë la itre ewekë hnei Nyidrëti hna kuca koi epun. Goeëne jë la itre hatrene ihnimi Iehova ceitu me itre ahnahna i Nyidrëti koi epun. w23.03 12 par. 17-19

Iesu pe hi la ka loi thiina me hnimi angatr asë, lo ala 12. Nemene la ini koi së? Ame la ka nyipiewekë, ke ene la aqane ujë i easë kowe la tria itre xan, ngo tha ene kö la hna kuca hnei angatr. Maine tro la ketre trejin a akötrë së, loi e tro sa hnyinge ka hape: ‘Hnauëne laka, akötre catre koi ni la hnei angeic hna kuca? Kolo kö lai a amaman ka hape, hetre nyine tro ni a saze? Maine jë, hetre jole hnei angeic hna cile kow? Ngacama hetre nyipi kepin matre eni a elëhni, ngo ijije kö tro ni a amaman la nyipi ihnim me nue la ngazo i angeic?’ Ame la easa isine troa hnim la itre xan, ke easë hi lai a amaman laka, itre nyipi keresiano së. Tro mina fe la tulu i Iesu a xatua së troa trotrohnine la itre trejin. (Ite edomë 20:5) Nyipici laka, thatreine kö sa e la itre aliene hni ne la itre trejin, tui Iesu. Ngo, ijije hi tro sa xomihni angatr ngöne la angatr a akötrë së. (Efe. 4:1, 2; 1 Pet. 3:8) Nge tro sa atreine xomihni angatr, e hne së hna thel troa atre angatr. w23.03 30 par. 14-16

Ame la easa wezipo, Satana a thele jëne tro sa ena la itre trepene meköti Iehova. Matre ijije hi tro la itre droketre memine la itre fami së ka tha hmi kö, a uku së troa xomi madra. Ngo hna wathebone pe lai hnei Akötresie. Maine pena, tro la itre xan a uku së, troa xome la itre xaa drösinöe ka tha ihmeku kö memine la itre trepene meköti Iehova. Tha aja së kö troa mec. Ngo e traqa ju së mec, xecie koi së laka, lehova palahi a hnimi së. (Rom. 8:37-39) Ame la itre sinee i Iehova a mec, ke, ka mele palahi angatr ngöne la mekuna i Nyidrë. (Luka 20:37) Tru la aja i Nyidrë troa amele angatr hmaca. (Iobu 14:15) Celë hi lai matre hnei Iehova hna huujëne la sipu neköi Nyidrëti, matre tro sa “hetrenyi la mele ka pë pun.” (Ioane 3:16) Atre hi së laka, tru catre la ihnimi Iehova koi së, nge Nyidrëti a thupë së. Matre tha tro kö sa nuetriji Nyidrë ngöne la easa wezipo, me ngöne la kola thele troa lepi së. Loi e tro pe sa sipo ixatua, me inamacane, me trengecatre thei Nyidrë.—Sal. 41:3. w22.06 18 par. 16-17

Önine la Tusi Hmitrötr: “Ame la qoue Iehova, te, qane la inamacan, nge troa ate la Kahmitöt, celë hi [inamacan].” (Ite edomë 9:10) Celë hi matre ame la easa axecië mekun, loi e tro sa thele la mekuna i Iehova ngöne la Tusi Hmitrötr me ngöne la itre itusi së. Aqane tro hi së lai a hetrenyi la nyipi inamacan. (Ite edomë 2:5-7) Iehova hmekuje hi la ka atreine hamëne la nyipi inamacan. (Rom. 16:27) Pine nemen matre Nyidrëti la Qaane la inamacan? Ame la pane kepin, ke Nyidrëti la Atre Xup, nge thatrehmekune la trotrohnine memine la atrehmekune i Nyidrë. (Sal. 104:24) Ame la hnaaluen, kola mama la inamacane i Nyidrë ngöne la nöjei huliwa i Nyidrë. (Rom. 11:33) Ame la hnaakönin, ke itre atr a kepe thangane ka loi la angatr a xötrethenge la itre eamo i Nyidrë. (Ite edomë 2:10-12) Haawe, maine easa ajan troa hetrenyi la nyipi inamacan, nyipiewekë tro sa inine la itre nyipici qa hnine Tusi Hmitrötr me axecië mekun thenge la hne së hna inin. w22.10 19 par. 3-4

Ame ngöne Hna Amaman mekene 12, hna ngaa Satana me ukapië angeic me itre dremoni angeic kowe la ihnadro. Matre “ekölö hi ni la ihnadro” ke, atraqatr la trenge elëhni Satana, nge angeic a akötrëne la fen. (Hna ama. 12:9-12) Kola xatua së tune kaa hnene la itre hna perofetane celë? Ame la kola saze la aqane ujë ne la itre atr memine la aqane trongene la fen, kolo hi lai a amamane koi së laka, Joxu hë Iesu. Haawe, tha tro kö sa wesitr la easa öhne la itre atr a pi tru me xele ma iwai ke, itre aqane ujë lai ka eatrëne la ketre hna perofetan. Eje hi, cile hë la Baselaia! (Sal. 37:1) The sesëkötre kö së laka, tro kö a elë catre la ngazo, ke easenyi hë la isi Amagedro. (Mar. 13:8; 2 Tim. 3:13) Haawe, olene jë së kowe la Keme së e hnengödrai la hna amamane koi së la kepine matre easa melëne la hneijine celë ka ngazo. w22.07 3-4 par. 7-8

Loi e tro sa sipo Iehova troa xatuane la itre trejin troa xomihnine la itre sine mec, maine itre hulö, maine itre isi, maine iaxösisi, me itre xaa jole ju kö. Ketre, loi e tro sa thithi san la itre trejin ka saen troa hamë ixatua. Ma atre hi epun la itre xaa trejin ka hane melëne la itre jole cili. Qaja jë la itre ëje i angatr la epuni a thith. Easa amamane la ihnimi easë, la easa sipo Iehova troa xatua angatr troa cil kowe la itre jol. Madrine catr la itre trejin ka elemekene la ekalesia la easa thithi sai angatr. Nge hetre thangane hnei angatr hna kapa qa ngöne la itre thithi së. Celë hi hna qaja hnei Paulo aposetolo. Öni angeic: “Thithi sai ni jë matre hamë trengewekë koi ni e fe pi ni la qëng. Haawe, tro hë ni a atreine qaja catrëne la ini ka hmitrötr nge hna juetrën göne la maca ka loi.” (Efe. 6:19) Ame fe enehila, tru catr la itre trejin trahmany ka catre huliwa kowe la ekalesia. Easa amamane la ihnimi së koi angatr la easa sipo Iehova troa amanathithine la itre huliwa i angatr. w22.07 23-24 par. 14-16

Tro la itre sooc a ami itrapetr matre thupëne la he i angatr. Ketre tune mina fe, loi e tro sa thupëne la itre mekuna së ke, Satana a thel troa ajojezi së jëne la itre itupath me itre mekun ka ngazo. Tune la aqane thupëne la he ne la sooc hnene la itrapetr, tro la mejiune së a thupëne la itre mekuna së matre tro palahi sa mele nyipici koi Iehova. E tha hmeke kö së, tro hë së lai a nue la itre aja ne ngönetrei troa löthi së, nge tro ha patre trootro la mejiune së kowe la mele ka pë pun. Celë hi ka traqa kowe la itre keresiano ne Korinito ekö. Tha mejiune hë angatr kowe la ketre hna thingehnaean hnei Iehova, ene la melehmaca. (1 Kor. 15:12) Öni Paulo koi angatr ka hape, ame la itre ka pë mejiun ke, angatre hi a mele menu. (1 Kor. 15:32) Ame enehila, alanyimu la itre atr ka tha mejiune kowe la itre hna thingehnaean hnei Akötresie, matre ame la ka tru ngöne la mele i angatr ke, kuci madrin. Ngo ame easë, easa mejiune kowe la itre hna thingehnaean hnei Akötresie. w22.10 25-26 par. 8-9

Iehova a hë epun troa thith koi Nyidrë. Öhne hi Nyidrë la hnei epun hna melën, nge tro kö Nyidrëti lai a dreng la itre thithi epun. Madrine catr Nyidrë troa drenge la itre hlue i Nyidrë. (Ite edomë 15:8) Nemene la nyine tro epuni a qaja koi Iehova ngöne la epuni a mekun ka hape, epuni cas? Hnenge pi la itre aliene hni epun koi Iehova. (Sal. 62:8) Qaja jë koi Nyidrë la itre hnei epun hna hnehengazon memine la itre hna akötre fë. Sipo Iehova jë troa xatua epun matre atre la nyine troa kuca, ngöne la kola traqa la itre mekun ka ngazo me troa hamëne la trengecatr, matre atreine jë epun ithanata. Ijiji epuni fe troa sipo Nyidrë la inamacan, matre atreine qaja amenyiken la itre hnei epun hna inin qa hnine la Tusi Hmitrötr. (Luka 21:14, 15) Maine epuni a lapa fë la itre mekun ka ngazo, sipo Iehova jë troa xatua epun troa ithanata kowe la ketre trejin ka macaj. Sipo Nyidrëti jë fe troa xatuane la trejin hnei epun hna troa wang, matre drei epuni hnyawa me trotrohni epun. Nge goeëne ju la aqane sa Nyidrë la itre thithi epun. Ketre, kapa ju la ixatua ne la itre xaa trejin. E cili, tha tro hë epuni lai a mekun ka hape, epuni cas. w22.08 10 par. 6

Thupene la hna acile la ekalesia ne Thesalonika, hna traqa koi angatr la icilekeu. Hnene la itre ka icilekeu, hna uti sane la “itre trejine kowe la itre trene mus.” (Itre hu. 17:6) Pane mekune jë la kola xou hnene la itre keresiano ka xötrei xomi bapataiso. Maine ju tro angatr a kucakuca ngöne la huliwa i Iehova, ngo hnei Paulo aposetolo palahi hna thupëne matre tro la ekalesia e cili a kepe ixatua. Öni Paulo kowe la angetre Thesalonika ka hape: Eahuni a “upi Timoteo, trejin me eahun . . . matre akeukawane me acatrene la lapaune i nyipunie. Qa ngöne lai, tha tro kö a enienijë ketre hnene la itupathe celë.” (1 Thes. 3:2, 3) Hnei Timoteo hna öhne la aqane akeukawane Paulo la itre trejin e Lusetara, me öhne la iwanakoime i Iehova. Celë hi matre hnei angeic hna akeukawane la itre trejin ne Thesalonika laka, tro kö Iehova a ce me angatr.—Itre hu. 14:8, 19-22; Heb. 12:2. w22.08 21 par. 4

Ame ngöne la pun lo itre macatre 1 800, hnei Charles Russell me itre ka ce huliwa me nyidrë hna xomi ijine troa thele hnyawa la itre ini qa hnine la Tusi Hmitrötr. Hnei angatr hna thele troa trotrohnine la nyipi aliene la mel hna huujën hnei Iesu, me aqane troa atrun la drai ne meci nyidrë. Easa kepe thangane enehila, lo hna ithele hnyawa ekö. Atre hë së la aliene la mel hna huujën hnei Iesu, memine la eloine kowe la itre atr elany. (1 Ioane 2:1, 2) Ketre, trotrohnine hë së ka hape, ame thene la itre hlue i Akötresie, hetre ka troa mel e hnengödrai me mele palua e celë fen. Ame la easa öhne la ihnimi Iehova, memine la itre manathith hne së hna kapa jëne la huuje i Iesu, ke kola easenyi së koi Nyidrë. (1 Pet. 3:18) Celë hi matre, tune la itre trejin ekö, easa hëne la itre atr troa atrun la Drai Ne Amekunën, thenge lo itre hna amekötin hnei Iesu. w23.01 21 par. 6-7

Hnei Iesu hna qaja kowe la itre atr, la itre manathith hnei angatr hna troa kapa elanyi fene la Baselaia i Akötresie. Tru la ole së kowe la thupene mel, ke celë hi lai ka aijijë së troa hane nyisinee i Iehova me Iesu. Nge ame la itre ka lapaune koi Iesu, ke tro angatr a hane kapa elany la mel ka pë pun, me iöhnyi hmaca memine la sinee i angatr ka mec. (Ioane 5:28, 29; Rom. 6:23) Drei së matre tro sa hane kapa la itre manathithi cili! Atreine kö së të koi Iehova me Iesu la itre hnei nyidroti hna kuca koi së? Waea. (Rom. 5:8, 20, 21) Ngo, ijije hi tro sa amamane la ole së koi nyidro. Tune kaa? Loi e tro sa hamëne la hne së hna hetreny kowe la huliwa ne Baselaia. Tune la troa ixatua ngöne la huliwa ne xup me nyihnyawane la itre uma ne hmi së. w23.01 26 par. 3; 28 par. 5

Ame la itre ka troa mus ngöne la Baselaia i Akötresie ke, tro angatr a thupën me xatuane la itre miliar lao atr ngöne la fen asë. Tui Iesu, tro la ala 144 000 lao hna iën a xome la hnëqa ne joxu me itretre huuj. (Hna ama. 5:10) Fene la Wathebo i Mose, pane hnëqa ne la itretre huuj troa thupëne la mele ne la nöj me xatua angatr troa drengethenge Iehova. Ame la Wathebo ke, “iahnue ne la itre ewekë ka loi ka troa traqa.” Celë hi matre, tro fe la itre ka ce musi me Iesu a thupëne la mele ne la nöje i Iehova me xatua angatr troa mele nyipici koi Nyidrë. (Heb. 10:1) Thatre palakö së la aqane tro la itre hna iën a hamëne la itre ithuemacanyi kowe la itre atr e celë fen. Ngo xecie koi së laka, ame ngöne la paradraiso, ke tro kö la itre atr a kapa la itre hna amekötin ngöne la nyipi ijin.—Hna ama. 21:3, 4. w22.12 11 par. 11-13

Ame la ketre kepin matre easa hëne la itre atr kowe la Drai Ne Amekunën ke, aja i easë tro angatr a atre la hnei Iehova me Iesu hna kuca koi së asë. (Ioane 3:16) Aja i easë tro la itre hnei angatr hna dreng me öhn a ketri angatr, me thue aja i angatr troa nyihlue i Iehova. Easë mina fe a hëne la itre trejin ka nanazij. Aja i easë tro angatr a öhne ka hape, Iehova palahi a hnimi angatr. Easa madrine troa öhne la itre trejin ka nanazij a traqa troa sine la Drai Ne Amekunën. Angatre hmaca a mekun lo ijine angatr a nyihlue i Iehova. (Sal. 103:1-4) Ngacama tha traqa kö la itre atr kowe la Drai Ne Amekunën, ngo easë catre hë angatr, ke Iehova a goeëne la hni ne la itre atr ka traqa.—Luka 15:7; 1 Tim. 2:3, 4. w23.01 20 par. 1; 22-23 par. 9-11

Ame lo jidr qëmeken tro Iesu a mec, hnei nyidrë hna sipone la ketre ewekë ka sisitria kowe la Keme i nyidrë. Hnei nyidrëti hna sipo Iehova troa thupëne la itretre drei nyidrë. (Ioane 17:15, 20) Hnei Iehova palahi hna thupën me nyihnyawan la nöje i Nyidrë. Ngo, atre hi Iesu laka, troa akötrëne la itretre drei nyidrë hnei Satana. Ketre, tro angatr a aja ixatua qaathei Iehova matre cile koi Satana. Kola akötrëne la itre hlue i Iehova enehila, hnene la fene i Satana. Easa cile kowe la itre jol ka troa thapa la madrine së, me tupath la lapaune së koi Iehova. Ngo tha tro pi kö sa xou. Iehova a thupë së, ke öhne hi Nyidrë la itre jol ka traqa koi së, nge aja i Nyidrë palahi troa xatua së. Nyipici, lue meke i Iehova ‘hui angetre qoue nyidrë . . . matre amele angatr.’—Sal. 33:18-20. w22.08 8 par. 1-2

Ame e nöjei macatre, ngöne la ijine Drai Ne Amekunën, easa xomi ijine troa lapa mekun la aliene la meci Iesu me thith, matre troa amamane la hni ne ole së kowe la hnei nyidrëti hna kuca. Ketre, easa hëne la nöjei atr troa sine la drai cili ka sisitria. Haawe, nyipiewekë tro sa sine la Drai Ne Amekunën, nge pëkö ketre ewekë ka troa sewe së. Ame ngöne la ijine Drai Ne Amekunën, kola troa qejepengöne la kepine matre ka nyipiewekë koi së la thupene mel, me amamane laka, jëne la meci ne la ala cas, tro ha nue la ngazo ne la ka alanyim. Ketre, kola amekunë së la hna nyihatrene hnene la falawa me waina, me qaja la itre ka ijij troa xen la falawa me iji la waina. (Luka 22:19, 20) Eje mina fe a aijijë së troa lapa mekun la itre manathith hna troa kapa elany hnene la itre ka mejiun troa mel e celë fen. (Is. 35:5, 6; 65:17, 21-23) The wangacone kö së la itre nyipici cili. w23.01 20 par. 2; 21 par. 4

Hnei Iehova hna nue la Nekö i Nyidrë troa meci pine la itre ngazo së, matre tro sa hane kapa la mele ka pë pun. (Mat. 20:28) Öni Paulo: “Pine laka, hna xulu la mec qaathene la trahmany, matre kolo fe a traqa la iamele jëne la trahmany. Eje hi, kola meci la nöjei atr asë hnei Adramu, nge tune fe, jëne Keriso, tro ha mele la nöjei atr.” (1 Kor. 15:21, 22) Hnei Iesu hna inine la itretre drei nyidrë troa thith matre traqa pi la Baselaia i Akötresie, nge tro fe a ej la aja i Nyidrë e celë fen. (Mat. 6:9, 10) Aja i Akötresie tro la itre atr a mel epine palua e celë fen. Celë hi matre hnei Iehova hna acili Iesu troa Joxu ne la Baselaia. Ketre, hnei Nyidrë hna iën la ala 144 000 lao atr troa mel e hnengödrai, me xatua Iesu troa eatrëne la aja i Nyidrë.—Hna ama. 5:9, 10. w22.12 5 par. 11-12

Akötre catre së la kola mec la ketre sinee së, nge tru la hne së hna meku angeic! Ma ame jë lo xötrei, jole catre së ke, easë hmaca mekune lo angeic a thë fë la akötre i angeic qëmeken troa mec. Ngo kola tro la itre drai, easë hmaca mekune lo itre ijine easa ce mel me ce madrin, memine la itre hnei angeic hna qaja me kuca matre ithuecatr koi së. Ketre tun, kola ketri së la easa e la aqane akötrë Iesu qëmeken tro nyidrëti a mec. Matre ame ngöne la Drai Ne Amekunën, loi e tro sa pane lapa mekune la aliene la hnei nyidrëti hna kuca koi së. (1 Kor. 11:24, 25) Eje hi, easa madrin la easa lapa mekune la itre hnei Iesu hna qaja me kuca lo nyidrëti e celë fen. Kolo fe a thuecatre koi së la itre hnei nyidrë hna kuca enehila, me itre hnei nyidrëti hna troa kuca elany. w23.01 26 par. 1-2

Akötre catre la itretre dreng la Iesu a mec. Patre hë la sinee i angatr hnei angatr hna hnim, nge kösë pëhë mejiune i angatr. (Luka 24:17-21) Eloine pe, ame lo Iesu a mama koi angatr thupene la kola amele nyidrëti hmaca, hnei nyidrë hna ithuecatr koi angatr me qejepengöne koi angatr la aqane eatrëne nyidrë la itre hna perofetan. Nge hnei Iesu mina fe hna ahnithe koi angatr la ketre hnëqa ka tru. (Luka 24:26, 27, 45-48) Celë hi matre ame lo Iesu a elë e hnengödrai, angatr pena ha a madrin. Nyipici, angatr a madrin ke, melehmaca ha Iesu, nge tro kö nyidrëti a xatua angatr troa eatrëne la huliwa hnei nyidrë hna ahnithe koi angatr. Celë hi ka upi angatr troa catre nyihlue i Iehova. (Luka 24:52, 53; Itre hu. 5:42) Tro sa nyitipune la itretre drei Iesu ngöne la easa amë panëne la Baselaia i Iehova ngöne la mele së. Nyipici, tha ka hmaloi kö troa catre nyihlue i Iehova, ngo tro kö Nyidrëti a amanathithi së, e tro sa catre nyihlue i Nyidrë.—Ite edomë 10:22. w23.01 30-31 par. 15-16

Tha aja së kö troa tui Adramu me Eva. Celë hi matre, nyipiewekë tro sa xomi ijine troa atre Iehova hnyawa, me wangatrun la itre thiina i Nyidrë, me thele troa trotrohnin la mekuna i Nyidrë. Nge e cili, tro ha kökötr la ihnimi së koi Nyidrë. Tro sa ce wang la tulu i Aberahama. Tru catre la ihnimi angeic koi Iehova. Ngacama tha trotrohnine kö angeic la aqane axecië mekune i Iehova, ngo tha wesitre kö angeic koi Nyidrë. Hnei angeic pe hna thel troa atre Iehova hnyawa. Ame lo Aberahama a dreng laka, Iehova a troa apatrene Sodroma me Gomora, hnei angeic hna pane xou. Xou i angeic tro “la Atre Iameköti e cailo fen” a apatrene la itre ka meköt tune la itre ka ngazo. Ketre mekune lai ka ahleuhleunyi angeic, matre hnei angeic hna anyimua hnying koi Iehova. Nge hnei Nyidrëti hna xomi ijine troa sa koi angeic. Ame hë la pun, trotrohnine hnyawa ha Aberahama laka, atre Iehova la isa aliene hni ne la itre atr, nge Nyidrëti hi a apatrene la itre atr ka ngazo.—Gen. 18:20-32. w22.08 28 par. 9-10

Ame lo macatre 455 M.P.K., thupene la hna xup la hag e Ierusalema, hnei Nehemia Gavena hna thel la itre trahmanyi ka nyipici matre xom la itre hnëqa ngöne la nöj. Hnei Nehemia hna ië Hanani, atre musinëne la hunapo. Tusi Hmitrötr a qeje angeic ka hape, “ate ka meköti angeice me ate nyipi qoue Akötesie hune la ka ala nyimu.” (Neh. 7:2) Hnene la ihnimi angeic me metrötre i angeic koi Iehova matre angeic a eatrëne hnyawa la itre hnëqa hna athip koi angeic. Tro fe la ihnimi së koi Iehova me metrötre së koi Nyidrë a upi së troa huliwa nyipici koi Nyidrë. Tro pena sa qeje Tukiko, ketre sinatro i Paulo aposetolo. Hnei Paulo hna mejiun koi Tukiko me qeje angeic ka hape, ketre trejin “ka mele nyipici koi Joxu.” (Efe. 6:21, 22) Hnei Paulo hna upi angeic troa tro fë la itre tus kowe la itre trejin ne Efeso me Kolose, me ithuecatr koi angatr. Ame la easa qeje Tukiko, easa mekun la itre trejin trahmanyi ka huliwa nyipici, nge ka thupëne la ekalesia.—Kol. 4:7-9. w22.09 9-10 par. 5-6

Hnei Iosefa hna melëne la itre jole ka tru ngöne la 13 lao macatre. Maine ju tro Iosefa a mekune ka hape, tha hnimi angeice kö hnei Iehova. Nge hnei Nyidrëti hna nuetriji angeic ngöne la ijine angeic a aja ixatua. Ngo, tha hnei Iosefa kö hna lapa fë trengehni. Hnei angeice pe hna waiewekë hnyawa me xomihni. Ame hë lo itre mama i Iosefa a traqa koi angeic, tha hnei angeice kö hna të la ngazo i angatr. Ngo hnei angeic pe hna xomihni me amamane la ihnimi angeic koi angatr me nue la ngazo hna kuca koi angeic. (Gen. 45:4, 5) Hnei Iosefa hna ujë tun, ke atreine hi angeic waiewekë hnyawa. Tha hnei angeic kö hna wangatrun la itre jol ka traqa koi angeic, ngo hnei angeic pe hna waiewekë tui Iehova. (Gen. 50:19-21) Nemene la ini koi së? Maine kola akötrë së, the elëhni kö koi Iehova, nge the mekune kö ka hape, ase hë Nyidrëti nuetriji së. Lapa mekune jë pe la aqane xatua së hnei Nyidrë ngöne lai jol. Ketre, ame la kola akötrë së, thele jë troa he la itre tria i angatr hnene la ihnim. w22.11 21 par. 4

Kola mama ngöne la itre hna meköle goeën hnei Daniela perofeta laka, ka sisitria catre kö la musi Iehova hune la itre musi atr. Hnei angeic hna pane öhne la foa lao öni ka ses ka nyihatrene la itre musi ekö, ene la musi Babulona, la musi Madai me Peresi, musi Geres, me musi Roma, memine la musi ka cil enehila, ene la musi Agele me Amerika. (Dan. 7:1-3, 17) Thupene lai, hnei angeic hna öhnyi Iehova a lapa hune la therone i Nyidrë e hnengödrai. (Dan. 7:9, 10) Hnei Akötresie hna xom la mus qaathene la itre atr, me hamëne kowe la itre ka ijij me ka trene men. Drei la itre atr cili? Kola qaja “la Nekö i ate,” ene Iesu Keriso, memine la “ite ka hmitöte ne la Kasisitia,” ene lo ala 144 000 ka troa ce musi me nyidrë “epine palua.” (Dan. 7:13, 14, 18) Eje hi, Iehova “la Kasisitia.” Ame la hnei Daniela hna meköle goeën ke, kola jelenyipicine la ketre hnei angeic hna meköle goeën ekö. Öni Daniela lo ka hape, “Akötesi ne hnengödrai . . . a xomepi la ite joxu, me acile la ite joxu.”—Dan. 2:19-21. w22.10 14-15 par. 9-11