Eiperem

Loi e tro sa isa hnying ka hape: ‘Tui Dravita, eni kö a canga kapa la itre eamo hna hamëne koi ni? Eni kö a thele kepin la itre hnenge hna kuca me upe zö itre xan?’ Nyipiewekë tro sa e la hna melën hnene la ketre hlue i Iehova e hnine la Tusi Hmitrötr. Loi e tro sa atre la aqane cile angatr kowe la itre jol. Ketre, nyipiewekë tro sa isa hnying ka hape, ‘Tune kaa la aqane tro ni a nyitipu angatr?’ Ijije fe hi tro sa xomi ini qa ngöne la tulu ne la itre trejin enehila, ngacama ka co angatr maine qatre hë. Maine jë, atre hi epuni la ketre trejin ka cile kowe la ketre jol, tune la kola icilekeu hnene la itre sinee maine ka wezipo pena. Hapeu, hetre thiina ka loi kö hnei epuni hna öhn thene la trejin cili nge nyine troa nyitipun? Eje hi, maine tro sa xomi ini qa ngöne la tulu i angeic, tro lai a xatua së troa atreine cile kowe la nöjei pengöne jol. Drei la madrine ka tru koi së troa nyitipune la tulu ne la itre trejin ka catre lapaune koi Iehova enehila!—Heb. 13:7. w22.04 13 par. 13-14

Ame la kola cile kow la ketre jol hnene la ketre trejin, tru la madrine i angeice ngöne la kola xomi ijin hnene la itre qatre thup matre troa dreng me hamë ithuecatre koi angeic. Maine easë fe a thele troa nyiqaane ini tusi memine la ketre atr, easa madrin troa ce cainöj memine la ketre pionie. Tru la madrinene la itre trejin cili troa ixatua. Eje hi, maine tro fe sa xatuane la itre xan, tro hë sa madrin. Maine easa ajane troa catre huliwa koi Iehova memine la itre trejin, nemene la nyine tro sa kuca? Loi e tro sa iëne hnyawa la itre mekun hne së hna ajane troa eatrën. Maine jë, easa ajane troa huliwa catre ngöne la ekalesia. Ngo thatre kö së la nyine troa kuca. Maine pena, tha ijije kö troa eatrëne la huliwa cili. Celë hi kepin matre loi e tro sa iëne hnyawa la itre mekun hne së hna ajane troa eatrën. Ketre, loi e troa cinyihane itre ej me thele la aqane tro sa eatrën. w22.04 25 par. 12-13

Ame enehila, Iehova a hnëkëne “la ka ala nyimu atraqatr” matre troa mel fene la Baselaia i Nyidrë. (Hna ama. 7:9, 10) Ngacama easa mel ngöne la xou, me isi, ngo easa isine troa nuetrij la imethinë pi nöj, me hane ngönetrei, me tribu. Kösë hnei easë hna nyihnan la itre taua matre nyine uja dro. (Mika 4:3) Tha easë kö a lö hnine la itre isi, ngo easë pe a xatuane la itre atr troa atre Akötresie memine la aja i Nyidrë matre kapa la “nyipi mel.” (1 Tim. 6:19) Pine laka, easa isigöline la Baselaia i Akötresie, matre kola icilekeu la fami së, nge kola traqa la itre jol göi mani. Ngo Iehova palahi a hamë së la ka nyipiewekë. (Mat. 6:25, 30-33; Luka 18:29, 30) Kolo hi lai a anyipicine laka, ka ej la Baselaia i Akötresie, nge tro kö ej a eatrëne la aja i Nyidrë. w22.12 5 par. 13

Thupene la 1 000 lao macatre, troa pexeje hmaca la itre atr. Troa patre palua la ngazo memine la hnëjine hne së hna kapa qaathei Adramu. (Rom. 5:12) E cili, pexej asë hë la itre atr e celë fen. (Hna ama. 20:5) Atre hi easë ka hape, hnei Iesu hna cile catr qëmekene la itre itupathi Satana. Hnei nyidrëti hna mele nyipici koi Iehova. Hapeu, tro kö la itre atr ka pexej a hane cile catr ngöne la Satana a tupathi angatr elany? Tro pë së a isa wang e thupen, e ase hë nue Satana hmaca qa ngöne la hnaop ka jui nge ka thatrehmekun. (Hna ama. 20:7) Ame la itre ka mele nyipici koi Iehova ngöne la itupath tixenuë cili, tro angatr a kapa la mele ka pë pun, nge troa nuamacanyi angatr qa ngöne la ngazo. (Rom. 8:21) Nge ame pë hë la itre ka icilekeu, tro angatr a ce mec me Satana me itre dremoni.—Hna ama. 20:8-10. w22.05 19 par. 18-19

Hna eatr la hna perofetane cili, ngöne lo Satana a ukune la angetre Iudra me Roma, troa humuthe la nekö i Akötresie. (Luka 23:13, 20-24) E traqa eatr la tidöca ne la ketre atr, tro angeice lai a thatreine tro koi hnepe ijine hi. Kolo hi lo ka traqa koi Iesu lo nyidrëti a mec. Eje hi, hnei nyidrë hna pane meköle koi köni drai hnine la hua. Matre pëkö hnei nyidrëti hna kuca ngöne la hnepe ijine cili. (Mat. 16:21) Thenge la hna perofetane ngöne Genese 3:15, tha tro kö Iesu a meköle palua hnine la hua. Pine nemen? Pine laka, thenge lo hna perofetan, matra ne la föe la ka troa waja fica la he ne la un. Matre, easë hi lai a trotrohnine laka, troa meu la tidöca i Iesu. Ame hë lo Iesu a mejë qa hna mec, ketre angela ha nyidrë, nge tha tro hmaca kö nyidrëti a mec. Nge ame ngöne la ijine hna sa hnei Iehova, tro Iesu a apatrene palua Satana. (Heb. 2:14) Eje hi, tro la itre ka ce musi me nyidrë a xatua nyidrë troa apatrene la itre ithupëjia i Akötresie, ene lo matra ne la un.—Hna ama. 17:14; 20:4, 10. w22.07 16 par. 11-12

Itre kem me thine fe, xatuane jë la itre nekö i epun troa hetre nyipi sinee. Tusi Hmitrötr a qaja hnyawane ka hape, ijije hi tro la itre sinee së a uku së, troa kuca la itre ewekë ka loi, maine ka ngazo pena. Atre kö epun la itre sinee ne la itre nekö i epun? Iöhnyi hë epun me angatr? Tro epuni a xatuane tune kaa la itre nekö i epun troa hetre sinee ka hnimi Iehova? (1 Kor. 15:33) Maine aja i epun troa xatuane la itre nekö i epun, hëne jë la itre trejin ka macaj kowe la hnalapa i epun. (Sal. 119:63) Öni Tony ketre kem: “Ame ekö, hnei nyio hna lapa hëne la itre trejin, trahmany me föe ka isa macatrene kö kowe la hnalapa. Eahuni a ce xen, me kuca la hmi ne la fami. Itre ijine lai ka xatua eahun troa iatre hnyawa memine la itre trejin ka hnimi Iehova. Hnene la tulu i angatr hna xatuane la itre nekö i nyio troa hnimi Iehova.” w22.05 29-30 par. 14-15

Ame la itre qatre thup a ithanata memine la trejin ka kuca la ngazo, loi e tro angatr a axecië mekun tui Iehova. Nemene la eloin kowe la ekalesia e tro angatr a ujë tun? Tro angatr a upetröneë la trejin ka xele ma ietra matre troa thupëne la ekalesia i Iehova. (1 Kor. 5:6, 7, 11-13; Tito 3:10, 11) Tro fe angatr a xatuane la trejin ka kuca la ngazo troa ietra me bëeke hmaca koi Iehova. (Luka 5:32) Tro mina fe la itre qatre thup a thithi san la trejin ka ietra me sipo Iehova troa xatua angeic troa imelekeu hmaca me Nyidrë. (Iako. 5:15) Tune kaa e tha ietra kö la ketre trejin ngöne la kola wai angeic hnene la itre qatre thup? Ame e cili tro ha upetröneë angeic. Ngo, e tro la atre cili a trotrohnine laka, ngazo la hnei angeic hna kuca, nge tro angeic a saze, tro Iehova lai a nue la ngazo i angeic. (Luka 15:17-24) Ngacama tru catre ju hë la itre ngazo hnei angeic hna kuca, ngo tro kö Iehova lai a seng la itre ngazo i angeic.—2 A. l. ite jo. 33:9, 12, 13; 1 Tim. 1:15. w22.06 9 par. 5-6

Jëne la ixatua i Iehova, hnene la itre keresiano ngöne la fene hnengödrai hna elë hune la itre jol me icilekeu me Diabolo. (1 Pet. 5:9) Ketre tui epuni fe hi. Easenyi catre hë tro Iehova a upi Iesu me itre hna iën, matre troa lepe apatrene “la itre huliwa i Diabolo.” (1 Ioane 3:8) E cili, tha tro hmaca kö a xou hnene la itre hlue i Iehova, nge tro fe a “iananyi me angatr la hmengöhmengön.” (Is. 54:14; Mika 4:4) Ngo ame palakö enehila, loi e tro sa catre huliwa matre atreine jë së elë hune la xou. Loi e tro sa catre mejiun laka, Iehova a hnim me thupën la itre hlue i Nyidrë. Ketre, tro fe sa mekune ajuine la aqane xatuane Iehova la itre hlue i Nyidrëti ekö. Nge loi e tro mina fe sa lapa mekune la aqane xatua së isa ala cas hnei Iehova troa cile kowe la itre jol. Jëne la ixatua Iehova, ijije hi tro sa elë hune la xou!—Sal. 34:4. w22.06 19 par. 19-20

Hna nyihatrene la musi cili hnei “lue iwaca fao me dro ka fede.” Ej a mama lo ijine Pane Isi Ka Tru ngöne la kola ce huliwa la musi Agele me Amerika. Kola mama ngöne la pu i Nebukaneza laka, ka aisapengönëne la musi cili memine la itre musi hnapan. Ame la ka mama ngöne lo pu, ke tha ka ceitu kö la musi Agele me Amerika memine la itre xaa mus. Eje hi, ceitu ej memine la fao hna ithuenyikön me dro ka fedr, matre tha ka catre kö ej tune la gool me sileva. Ame hi lai dro ka fedr ke, kolo “ite matra ne la ate.” (Dan. 2:43) Tune la hne së hna öhne enehila, pëkö ecatrene la musi Agele me Amerika pine laka, kola icilekeu la itre atrene la nöje tune la itre syndicats, me itre campagnes de défense des droits des citoyens me itre manifestations ka tru. w22.07 4-5 par. 9-10

Hapeu, epuni kö a xou troa xomi bapataiso? Hnyinge jë ka hape, ‘Nemene la ka ajolë ni?’ (Itre hu. 8:36) Öni Iesu, ai nyidrë la troa kuca la aja ne la Keme i nyidrë. Pine nemen? Pine laka, ka nyipiewekë la troa xen. Nge atre hi Iesu laka, ame asë hi la itre hnei Iehova hna qaja, ke nyine loi koi së. Tha aja i Iehova kö tro sa kuca la itre ewekë ka troa akötrë së. Hapeu, aja i Nyidrëti kö tro epuni a xomi bapataiso? Öö. (Itre hu. 2:38) Haawe, tro epuni lai a kepe manathith e tro epuni a trongëne la hna amekötin göi troa xomi bapataiso. Maine hna hnëkëne la ketre xen hnei epuni hna ajan, ke tro kö epuni lai a xou troa xen? Waea! Nga hnauëne hö la epuni a xou troa xomi bapataiso? Nemen la ka ajolë ni? Maine jë tro epuni a sa ka hape, “Tha ijijinge pala kö.” Nyipici, tha tro kö a wangacon la mekune cili, ene la troa nue mel koi Iehova me xomi bapataiso. Celë hi matre, nyipiewekë troa xomi ijine troa mekune hnyawa. Tha nyine tro kö lai a wangahmaloeën. w23.03 7 par. 18-20

Ame lo kola sië Iesu hnei uati hmitrötr, e cili hi la nyidrëti a ketre götrane ka tru ne la matra ne la föe. Thupene lo kola amele Iesu qa hna mec, hnei Akötresie hna “hamëne la lolo me iatruny nyine korona i [nyidrë].” Ketre, hnei Akötresieti fe hna “nue koi Iesu troa musi hune la nöjei ewekë e hnengödrai me e celë fen,” nge tro nyidrë “a lepe apatrene la itre huliwa i Diabolo.” (Heb. 2:7; Mat. 28:18; 1 Ioane 3:8) Tro sa ce wang la hnaaluene götrane la matra ne la föe. Hnei Paulo aposetolo hna qaja la götrane la matrane cili lo angeic a qaja kowe la itre keresiano hna iën ka hape: “Maine tro pala hi nyipunieti a casi me Keriso, nyipunieti hnyawa hi la matra i Aberahama, itre ka troa kepe edrö pine lo isisinyikeu.” (Gal. 3:28, 29) Ame la Iehova a iëne la ketre keresiano hnei uati hmitrötr, angeice hë lai a ketre matra ne la föe. Matre, ame la matra ne la föe ke, Iesu memine lo ala 144 000 lao hna iën. (Hna ama. 14:1) Angatr a isine tro palahi a ujë me ca mekun memine la Keme i angatr, Iehova Akötresie. w22.07 16 par. 8-9

Nyipici laka, ame ngöne la itre drai ne la pun, tro sa ixelë memine la itre jol. (2 Tim. 3:1) Ame ngöne la itre ijine cili, thatreine hë së la nyine troa kuca, nge the qaja palaha la kola traqa itrai la itre jol. Ngo the thëthëhmine kö së laka, tro kö Iehova a thupë së me xatua së ngöne la itre ijine cili. Goeëne la aqane xatua Iobu hnei Iehova. Hna traqa itrai koi angeic la itre jole ka tru. Ame ngöne hi la ca drai, hna thuemacanyi Iobu ka hape, meci hë la itre öni, me itre hlue i angeic, uti fe hë la itre nekö hnimina i angeic. (Iobu 1:13-19) Pë ju kö ijine i angeic troa treije pine la itre nekö i angeic, nge kolo hmaca fe hë a tithi angeic hnene la ketre mec ka apuingazon la ngönetrei angeic. (Iobu 2:7) Iehova a thupë Iobu. Pine laka, tru catr la ihnimi Iehova koi Iobu, matre hnei Nyidrë hna xatua angeic troa cile catr qëmeken la itre jol. w22.08 11 par. 8-10

Tha ka hmaloi kö la kola haji së. Nge tro sa mekune ka hape, tha ka meköti kö la ihaji, maine ka catre palaha. E tro sa ujë tun, tha tro kö së lai a goeëne la ihaji ceitu me hatrene ihnimi Iehova koi së. (Heb. 12:5, 11) Haawe kapa ju la ihaji, nge amekötine ju la aqane ujë së. Anyimua haji Peteru hnei Iesu qëmekene la itre xaa aposetolo. (Mar. 8:33; Luka 22:31-34) Ngacama hmahma pi hë Peteru, ngo hnei angeic hna mele nyipici koi Iesu. Hnei angeic hna kapa la ihaji me xomi ini qa ngön. Celë hi matre hnei Iehova hna amanathithine la aqane mele nyipici Peteru me hamë angeic la itre hnëqa ka tru e hnine la ekalesia. (Ioane 21:15-17; Itre hu. 10:24-33; 1 Pet. 1:1) Ngacama easa hmahma la kola haji së, ngo loi e tro sa kapa la ihaji me amekötine la aqane ujë së. E cili, troa hetre thangane ka loi koi së me koi itre xan. Nge, tro hë Iehova a aijijë së troa huliwa atrun koi Nyidrë me kowe la itre trejin. w22.11 21-22 par. 6-7

Atre hi Aberahama laka, ka kuca palahi Iehova la meköt. Öni Paulo aposetolo ka hape, xecie koi Aberahama laka, tro kö Iehova a amelene hmaca la nekö i angeic. (Heb. 11:17-19) Ketre hnei Iehova lo hna thingehnaean ka hape, troa xulu la matra i angeic qaathei Isaaka. Nge ame ngöne la ijine cili, pë palakö nekö i Isaaka. Pine laka, tru la ihnimi Aberahama koi Iehova, mejiune hi angeic laka, tro kö Nyidrëti a kuca la meköt. Ngacama tha ka hmaloi kö, ngo hnei angeic hna drengethenge Iehova. (Gen. 22:1-12) Tune kaa la aqane tro sa nyitipu Aberahama? Loi e tro palahi sa isine troa atrepengöi Iehova hnyawa. Tro hë së lai a easenyi catr koi Nyidrë me hnimi Nyidrë. (Sal. 73:28) Nge tro la mekuthetheu së a uku së troa wangatrun la mekuna i Iehova. (Heb. 5:14) Matre, ame la ketre atr a uku së troa kuca la ngazo, ke tha tro kö sa kei thenge angeic. Xele së troa akötrëne la Keme së, me troa angazone la imelekeu së me Nyidrë. w22.08 28-29 par. 11-12

Ame lo Paulo me Banaba a bëek a tro Lusetara, me Ikonio, me Anetioka, hnei nyidroti hna ‘acile la itre qatre thup ngöne la itre ekalesia.’ (Itre hu. 14:21-23) Xecie koi së laka, hna akeukawane la itre ekalesia hnene la itre qatre thup cili, tune fe enehila. Itre qatre thupe, catre jë thele la itre ajane troa kapa la itre “tenge ewekë ka loi.” Hnei Paulo hna amekunëne la itre trejin laka, jëne la men i Iehova, hnene “la itretre anyipicine ka ala nyim” hna cile kowe la itre itupath ka nyimutre. (Heb. 12:1) Atre hi angeic laka, tro la hna melëne hnene la itre trejin ekö a thue trengecatr kowe la itre trejin, me xatua angatr troa goeën hutine la “traon ne la Akötresie ka mel.” (Heb. 12:22) Ka nyipici fe hi lai, koi së enehila. Drei thei easë la hna tha akeukawan ngöne la easa e la aqane xatua Gideona, me Baraka, me Dravita me Samuela me itre xane ju kö, hnei Iehova?—Heb. 11:32-35. w22.08 21-22 par. 5-6

Nemene “huliwa”? Tro kö a ameköti angatr thenge la itre huliwa hnei angatr hna kuca ekö qëmekene troa mec? Waea! Hna köletrij la itre ngazo i angatr la angatr a mec. Matre ame la itre “huliwa” hna qaja e celë ke, tha kolo kö lo itre huliwa hnei angatr hna kuca ekö. Ngo, kolo pe a qaja la itre huliwa i angatr ngöne la fene ka hnyipixe. Ngacama itre ka mele nyipici Noa, me Samuela, me Dravita, me Daniela ekö, ngo nyipiewekë tro angatr a atrepengöi Iesu Keriso, me lapaune kowe la thupene mel. Nge the qaja palaha la itre hna troa inin hnene la itre ka tha meköti kö! Nemene la pun kowe la itre atr ka pëkö ëj e hnine la tusi ne mel? Öni Hna Amaman 20:15: “Ame la nöjei atr ka pë ëjen hnine la tusi ne mel, hna kuië angatre fe hnine la hneopegejë eë.” Troa apatrene palua angatr. Celë hi matre loi e tro sa isine tro palahi la ëje së a lapa e hnine la tusi ne mel! w22.09 19 par. 17-19

Easa axecië mekun göi aqane troa inyië thenge la mekuthetheu së hna inin hnei Tusi Hmitrötr. (1 Tim. 3:9) Ame la easa qaja koi itre xan la mekun hne së hna axeciën, loi e tro sa trongëne la hna qaja ngöne Filipi 4:5, kola hape: “Loi e mama cile kowe la nöjei atr ka hape, itre ka atreine tulu ewekë nyipunie.” Ame la trejin ka atreine tulu ewekë, ke tha angeice kö a mekun atrune palaha la itre sine meci angeic. Easa hnim me metrötrëne la itre trejin, ngacama isa aqane axecië mekune së kö me angatr. (Rom. 14:10-12) Easa amamane la hni ne ole së koi Iehova, Atre Xup la mel, ngöne la easa thupëne hnyawane la mele së, me catre nyihlue i Nyidrë. (Hna ama. 4:11) Ame enehila, hetrenyi palahi la itre sine mec, me itre hulö me itre xaa akötr. Ngo tha celë kö la mel hnei Nyidrëti hna ajan koi së. Easenyi hë matre tro sa kapa qaathei Iehova la mele ka pë pun, nge pëhë akötr me mec. (Hna ama. 21:4) Ngo ame enehila, nyipiewekë tro sa thupëne la mel me nyihlue i Iehova, Keme së! w23.02 25 par. 17-18

Ame ekö, hnei Iehova hna amamane laka, ka sisitria catre kö la musi Nyidrë hune la itre musi ne fen. (Rom. 13:1) Tro sa ce wang la köni ijin. Hnei Farao hna thahluëne la nöje i Iehova, nge xele kö angeic ma nue angatr. Ngo hnei Akötresie hna thepe angatr qa cili, me apatrenyi Farao ngöne la Hnagejë Ka Palulu. (Eso. 14:26-28; Sal. 136:15) Ame ngöne la ketre feet ka tru, hnei Belesaza, joxu ne Babulona “hna pi tru kowe la Joxu ne hnengödrai” la kola “atrune la ite haze sileva, me gol.” (Dan. 5:22, 23) Ngo hnei Akötresie hna thaipië angeic. Ame “ngöne la jidi cili,” hna humuthi Belesaza me thapa la baselaia i angeic hnene la angetre Madai me Peresi. (Dan. 5:30, 31) Hnei Herodra joxu hna humuthi Iakobo aposetolo, me akalabusi Peteru göi tro fe a humuthi angeic. Ngo hnei Iehova hna sewe Herodra troa eatrëne la aja i angeic. “Lepi angeice ju hi hnene la angela i Iehova,” nge meci pi hi angeic.—Itre hu. 12:1-5, 21-23. w22.10 15 par. 12

Ame la easa e la aqane thupëne Iehova la itre hlue i Nyidrëti ekö, kola catrecatr la mejiune së. Ame asë hi la itre hna qaja e hnine la Tusi Hmitrötr, ke “hna cinyihan göi troa ini së. Matre, jëne la hne së hna cile huti memine la iakeukawanyi qa hnine la itre hna cinyihan, hetre mejiune së hë.” (Rom. 15:4) Loi e tro sa lapa mekun la aqane eatrëne Iehova la itre hna thingehnaean. Tro sa ce wang la hnei Iehova hna kuca koi Aberahama me Sara. Lue qatre hë nyidro, matre tha ijiji nyidroti hë troa hnaho. Ngo hnei Akötresie hna thingehnaean ka hape, troa hetre nekö i nyidro. (Gen. 18:10) Tune kaa la aqane ujë i Aberahama göne la hna thingehnaeane cili? Öni Tusi Hmitrötr: “Hnei Aberahama hna mejiun me lapaun laka, tro kö nyidrëti a keme ne la itre nöj.” (Rom. 4:18) Ngacama thatre kö Aberahama la aqane tro Iehova a eatrëne lai, ngo xecie koi angeic laka, tro kö Iehova eatrëne la hnei Nyidrëti hna qaja. Nge tha tria ju kö la hna qaja hnei Iehova. (Rom. 4:19-21) Kola amamane hnene la hna melëne celë laka, tro kö Iehova a eatrëne la hnei Nyidrëti hna qaja. w22.10 27 par. 13-14

Hna eatre lai ngöne la angetre Iudra a bëeke hmaca qa Babulona. Hnei angatr hna jelenyipicine hnyawane ka hape, Iehova la Atre Ini Katru ke, hnei Nyidrë hna xatua angatr troa acile hmaca la hmi ka wië. Easa madrine laka, Iehova la Atre Ini Katru koi së enehila. Isaia a amamane la aqane ini së hnei Iehova, öni angeic: “Troa öhne hnene la lue meke i ’ö la [atre] ini eö.” Ame e celë, kola aceitunë Iehova memine la ketre porofesör ka cil qëmekene la itre hna inin. Tru la madrine së la Nyidrëti a ini së enehila. Nyidrëti a ini së tune kaa? Jëne la organizasio i Nyidrë. Easa olene la itre eamo hna hamëne hnene la organizasio! Easa kapa la itre ini jëne la itre icasikeu, itre asabele katru, itre itusi së, itre emisio JW Télédiffusion me itre xane ju kö. Nge celë hi ka xatua së troa madrin ngöne la itre jol. w22.11 10 par. 8-9

Ame göne la aqane troa apatrenyi Ierusalema, memine la “pune la fene celë,” ene la hneijine së. Öni Iesu: “Ame göi drai me hawa, pëkö ka atre, thatre kö la itre angela ne hnengödrai, nge goi thatre fe la Nekön, ngo Keme hi.” Celë hi matre hnei Iesu hna upe la itretre drei nyidrë troa ‘catre hmek.’ (Mar. 13:32-37) Loi e tro la itre pane keresiano a catre hmek, ke emele i angatre hi lai. Hnei Iesu hna qaja kowe la itretre drei nyidrë ka hape: “E öhne hë nyipunie la itre trongene isi a lapa xötreithe la traon ne Ierusalema, atre hnyawa ju laka, easenyi catre hë matre lep apatrenyi angeice jë.” Nge ame ngöne la ijine cili, loi e tro la itre keresiano a drengethenge la hna amekötine hnei Iesu me “kötre kowe la itre wetr.” (Luka 21:20, 21) Ame hë la angetre Roma a lep apatrenyi Ierusalema, ke mele ju pe hi lo itre keresiano ka idrengethenge. Easë hnyawa a melëne la pune la fene celë ka ngazo. Celë hi matre loi e tro sa waiewekë hnyawa me catre hmek. w23.02 14 par. 1-2; 16 par. 3

Iehova a ini la itre hlue i Nyidrë troa huliwa nyipici me thiina ka meköt. Celë hi matre, ka tingetinge la hni angatr, nge kola qaja aloinyi angatr. (Ite edomë 13:5, 6) Hapeu, tha celë fe kö la ka traqa koi epun, lo epuni a nyiqane ini Tus? Hnei epun hna öhn laka, ka hetre thangane catr la itre trepene meköti Nyidrë kowe la nöjei atr me koi epuni fe. (Sal. 77:13) Haawe, aja i epun troa kuca la loi me meköt qëmekei Akötresie. (Mat. 6:33) Ketre, aja i epun troa isigöline la nyipici me ahmitrötrëne la ëje i Iehova qa ngöne la itre trengathoi Satana. Ngo, tro epuni lai a kuca tune kaa? Ijiji epun hi troa iëne la aqane mele i epun, kösë epuni a qaja ka hape, “Eni a thipetrij la itre trengathoi Satana me isigöline la nyipici. Ajang troa lapa fene la musi Iehova, me kuca la loi me meköt qëmekei Nyidrë.” Ngo, tro epuni a amaman tune kaa ka hape, ce epun me Iehova? Loi e tro epuni a nue la mele i epun koi Nyidrë jëne la thith me xomi bapataiso. Eje hi, tro la ihnimi së kowe la nyipici me thiina ka meköt a uku së troa xomi bapataiso. w23.03 3 par. 4-5

Hetre ketre tingeting hna thatre hnene la itre atre ne fen. Kolo “tingetinge i Akötresie,” hne së hna kapa ke, ka catr la imelekeu së memine la Keme së e hnengödrai. Nge celë hi lai ka thupëne la mele së. (Fil. 4:6, 7) Ketre, easa madrin troa nyisineene la itre atr ka hnimi Nyidrë, me nyisineene la “Akötresie ne tingeting.” (1 Thes. 5:23) Matre, e traqa ju hë la itre jol, ka tingetinge la hni së, ke atre hnyawa hi së la pengöi Nyidrë, nge easa mejiune me drengethenge Nyidrë. Ijije kö tro sa kapa la tingetinge i Akötresie la kola traqa la itre jol, tune la mec ka ixötrekeu, itre hulö me itre icilekeu? Ame la kola traqa la itre ewekë cili, canga tro hi sa xou. Hna traqa la itre jol ka tru kowe la itre xaa trejin, nge hnei angatr hna trongëne la eamo i Iesu ka mama ngöne la xötre ka nyitrepene la topik së. Nge jëne la ixatua Iehova, tingetinge la hni angatr, ngacama tru la itre jol. w22.12 16 par. 1-2

Thatre kö së la itre ewekë ka troa traqa ngöne la mele së. Celë hi matre, tha tro kö sa mekun laka, hnene la itre hnëqa së matre ka sisitria catre së. Ketre, tha tro kö sa meciun me piine la hnëqa i ketre. (Gal. 6:4) Ame la ka sisitria catr ke, ene la troa catre huliwa koi Iehova me kowe la itre trejin. Maine easa ajane troa catre huliwa koi Iehova, tha tro kö sa xomi gufa menu. Ngo loi e tro pe sa ahmaloeëne la mele së. Nyipiewekë fe tro sa eatrëne la itre mekun ka co matre hane xome elanyi la itre hnëqa ka tru. Maine easa ajan troa xome la huliwa ne pionie lapa, loi e tro sa pane xome la huliwa ne pionie ka ixatua e nöjei treu. Nge maine easa ajane troa atre ixatua, loi e tro sa pane catre cainöj. Celë hi lai ka troa aijijë së troa hane xome la itre xaa hnëqa ngöne la huliwa i Iehova. Haawe, catre jë së troa eatrëne hnyawa la itre hnëqa hna ahnithe koi së. w22.04 26 par. 16-17

Ijiji hi tro Iehova a xatua së troa cile catr qëmekene la itre itupath me madrin ngöne la huliwa Iehova. Ame la easa sipo Iehova troa xatua së ngöne la ketre jol maine jë, tro Nyidrëti a pane hamë së la trengecatre ka ijij matre troa atreine cil kowe lai jol. Nge e tha canga paatre kö lai jol, tro së lai a sipo Iehova la itre xaa trengecatr matre atreine xomihnine ej. Nge celë hi aja i Nyidrë. Nge kola mama lai ngöne la itre trengewekë i Isaia, kola hape: “The nue [Iehova] kö troa mano.” (Is. 62:7, NWT ) Kola hapeue lai? Loi e tro sa thithi lapa koi Iehova matre pëkö ijine i Nyidrë troa mano. Itre trengewekë i Isaia a amekunë së la ceitun hna hamëne hnei Iesu göne la thith ngöne Luka 11:8-10, 13. Ame e celë, Iesu a upi së troa me catre sipone la uati hmitrötr. Ijije fe tro sa sipo Iehova la itre eamo ka troa xatua së troa axecië mekune hnyawa. w22.11 8 par. 1; 9 par. 6-7

Hnëkëne jë la fami epun troa cil kowe la iaxösisi. The mekun atrune kö la itre akötre ka troa traqa koi epun elany. Ngo acatrene jë pe la imelekeu i epun me Iehova, nge xatuane jë fe la itre nekö i epun troa hane tun. Ame la epuni a seseu ke, thithi jë koi Iehova. (Sal. 62:7, 8) Ce ithanatane jë memine la fami epun la itre kepin matre loi e troa lapaune koi Iehova. Ame hë la kola traqa la hulö, ke tro hë la itre nekö i epun a catr me tingeting, ke ase hë epun hnëkë nyudren me acatrene la mejiune i nyudren koi Iehova. Tro la tingetinge i Akötresie a thupëne la hni së. (Fil. 4:6, 7) Jëne la tingetinge cili, Iehova a xatua së ngacama kola tithi së hnei mec, kola traqa la itre hulö, me axösisi së enehila. Nyidrëti a upe la itre qatre thup troa xatua së. Nge aja i Nyidrë tro sa itö ixatua. Tro la tingetinge i Nyidrë a hnëkë së troa cil kowe la itre itupath ka tru elany, tune la “akötr atraqatr.”—Mat. 24:21. w22.12 27 par. 17-18

Tha tro hmaca kö sa hace fë la itre ngazo hne së hna kuca ekö. Ngo thupëne kö, hmitrötr e troa xome la thupene mel matre “kuca atrene la ngazo.” (Heb. 10:26-31) Maine hne së hna kuca la ketre ngazo ka tru, nge e thupen hne së hna ietra, me kapa la ixatua i Iehova me saze, ke ase hë Iehova köletrij la ngazo së. (Is. 55:7; Itre hu. 3:19) The luelue kö laka, ijije hi tro la mel hna huujën hnei Iesu a köletrij la itre ngazo së me aijijë së troa mel ngöne la paradraiso. Hetre nyine tro palahi sa kuca ngöne la paradraiso. Nge hetre xaa atre hne së hna troa iöhnyi memin, me itre huliwa ka lolo hne së hna troa kuca. Ngo ame la ka sisitria, ke tro sa atre Iehova hnyawa, me kapa madrin la itre manathith qaathei Nyidrë. Nge hetre ewekë ka hnyipixe hne së hna troa atre göi Iehova me göne la itre hna xup. w22.12 13 par. 17, 19

Ame “la föe” ke tha Eva kö. Kola qaja ngöne lo hna perofetane ka hape, tro la matra ne la föe a “waja fica” la he ne la un. Ame lo un ke, ketre angela, ene Satana. Easë hi lai a trotrohnine ka hape, thatreine jë kö troa waja fica la he i Satana hnene la ketre matra i Eva. Haawe, nga troa apatrenyi Satana tune kaa? Hna amamane koi së ngöne la pune la Tusi Hmitrötr, la pengöne la föe ka eje ngöne lo Tusi Genese 3:15. (Hna ama. 12:1, 2, 5, 10) Tha ketre föe menu kö la föe cili! Pine laka, ame la treu, ej fene la lue ca i eahlo, nge ej ngöne la he i eahlo la korona ka 12 lao wëtresij. Ketre, hetre medreng ka ketrepengön hnei eahlo hna hnahon, ene la Baselaia i Akötresie. Pine laka, ej e hnengödrai la Baselaia, haawe, föe fe e hnengödrai. Kolo hi a qaja la organizasio Iehova e hnengödrai, hna nyiatrene hnene la itre angela ka mele nyipici. (Gal. 4:26) Tusi Hmitrötr a xatua së troa atre la götrane ka tru ne la matra ne la föe. Eje hi, tro ej a fetra qaathei Aberahama.—Gen. 22:15-18. w22.07 15-16 par. 6-8

Ame e hnine la Tusi Hmitrötr, tru catr hnei itre eamo i Iehova. Kola mama la inamacane i Nyidrë ngöne la itre eamo cili. Celë hi matre, itre atr a kepe thangane qa ngöne la itre eamo i Iehova, nge kola saze la mele i angatr. Ame ngöne la itre pane itus ne la Tusi Hmitrötr, öni Mose kowe la angetre Isaraela: “Tha itre trengewekë ka pë aliene kö lai. Ke jëne itre ej tro epuni lai a mel.” (Deu. 32:47, NWT ) Ame la itre ka trongëne la itre eamo i Iehova, ke tro angatr a madrine me mele ka loi. (Sal. 1:2, 3) Ngacama kola tro la itre macatre, ngo Tusi Hmitrötr palahi enehila a saze la mele ne la itre atr. Ame la itre trepene meköt qa hnine la Tusi Hmitrötr ke, ka hetre thangane palahi koi easë enehila. Ame la easa e me lapa mekune la Tusi Hmitrötr, ke Iehova a hamë së la uati hmitrötr matre xatua së troa trongëne la itre eamo. (Sal. 119:27; Mal. 3:16; Heb. 4:12) Eje hi, aja i Iehova, Atrekë Ewekëne la Tusi Hmitrötr troa xatua së. Celë hi matre ka nyipiewekë tro palahi sa e la Tusi Hmitrötr! w23.02 3 par. 5-6

Ame ngöne Hna Amaman mekene 13, hna nyihatrene la musi Agele me Amerika hnene la “öni ka ses ka lue jian kösë neköi mamoe, ngo ej a ithanata tune la drakona.” Nge “ej a kuca la itre ewekë ka tru nyine hain, nge goi autine fe ej la eë qa hnengödrai kowe la fen, qëmeke i nöjei atr.” (Hna ama. 13:11-15) Celë hi matre, ame ngöne la mekene 16 me 19, kolo fe a hëne ej ka hape, “perofeta thoi.” (Hna ama. 16:13; 19:20) Daniela fe a qaja la itre xaa aqane ujë ne la musi Agele me Amerika ngöne la kola qaja ka hape, troa “kete pengöne kö la aqane iapatenyi angeic.” (Dan. 8:19, 23, 24) Nge celë hi ka traqa ngöne lo Hnaaluene Isi Katru. Hnene la musi Agele me Amerika hna ce kuca lo lue ibob atomiques hna kuiëne ngöne la Pacifique. Celë hi aqane autine “la eë qa hnengödrai kowe la fen” hnene la musi Agele me Amerika. w22.05 10 par. 9