Mei

Thupene la hnei Ioane hna goeëne la pane gurup, goeëne ju fe hi angeic “la ka ala nyimu atraqatr.” Ame la ka ala nyimu atraqatr, ke, thatreine kö së e la etru i angatr. Nemene la hne së hna atre göi angatr? Öni Ioane: “Angatr a xulu qa ngöne la akötr atraqatr, nge hnei angatr hna wasine la itre iheetre i angatr, me awiën ngöne la madra ne la Neköi Mamoe.” (Hna ama. 7:14) Thupene la akötr atraqatr, tro “la ka ala nyimu atraqatr” a mele pe e celë fen, me kapa la itre manathith ka tru. (Sal. 37:9-11, 27-29; Ite edomë 2:21, 22; Hna ama. 7:16, 17) Maine hna ië së ju hë troa mel e hnengödrai maine e celë fen, aja së asë hi troa melën la hna qaja ngöne la tusi Hna Amaman mekene 7! Ketre ijine lai ka lolo catr kowe la lue gurup ka mele nyipici koi Akötresie! Tro easë lai a madrin ke, hnei easë hna iëne la musi Iehova. w22.05 16 par. 6-7

Ame la easa axecië mekun, easë a pane sipo Iehova la inamacan. (Iako. 1:5) Öni Solomona joxu: “Kasisitria la inamacan.” (Ite edomë 4:7) Ame e celë, tha Solomona kö a qaja la inamacane i atr, ngo inamacane qaathei Akötresie. Ngo hapeu, ijije kö troa xatua së hnene la inamacane i Akötresie ngöne la itre jole ka traqa koi së enehila? Öö, ijije hi. Tro sa inamacan, e hne së hna inine me trongëne la itre ini hna hamëne hnene la lue atr ka inamacan, nge hna metrötrën. Ame la hnapan ke, Solomona joxu. Öni Tusi Hmitrötr ka hape, “hnei Akötesie hna hamë Solomona la inamacane me wangate hmekune nyipi atraqat.” (1 Ite jo. 4:29) Nge ame la hnaaluene ke, Iesu. Pëkö ka atreine wej la inamacane i nyidrë. (Mat. 12:42) Hnei Isaia hna perofetane göi Iesu, ka hape: “Nge troa të hui nyidë la [u]ati Iehova, u ne inamacane me trotrohnin.”—Is. 11:2. w22.05 20 par. 1-2

Ngacama qatre hë së, ngo ijije hi tro sa thele la itre mekun nyine troa eatrën ngöne la huliwa i Iehova. Celë hi lai hna kuca hnei Beverley, ketre trejine föe ka 75 lao macatre. Hna tithi eahlo hnei meci matre jole hë koi eahlo troa tro. Ngo tru la aja i eahlo troa cainöj me hëne la itre atr kowe la Drai Ne Amekunën. Celë hi matre, hnei eahlo hna iëne la itre mekun hnei eahlo hna atreine eatrën, matre tru catre la madrine i eahlo. Ketre, hnene la tulu i eahlo hna ithuecatre kowe la itre xaa trejin troa hane catre cainöj. Eje hi, ngacama thatreine hë la itre trejin qatr me qatre föe troa cainöj tune ekö, ngo Iehova palahi a wangatrune la itre trengecatre hnei angatre hna kuca. (Sal. 71:17) Loi e tro sa thele la itre mekun hne së hna atreine troa eatrën. Tune la troa eënyine la itre thiina ka lolo nge ka amadrinë Iehova, maine thele troa maca ngöne la ketre hnëqa hna ahnithe koi së. E cili, tro hë Iehova a ië së troa huliwa koi Nyidrë me kowe la organizasio i Nyidrë. Ketre, loi e tro fe sa xatuane la itre trejin. Nge tui Timoteo, tro hë Iehova a amanathithi së nge tro ha “mama koi nöjei atr asë ka hape, keresiano ka macaje” së.—1 Tim. 4:15. w22.04 27 par. 18-19

Nemene la nyine tro epuni a kuca, e traqa ju qaja koi epun hnene la ketre nekö i epun ka hape, xele hë angeic ma nyihlue Iehova? Itre keme me thine fe, the mekune pi kö ka hape, zöi epun la nyëne a trotriji Iehova. Hnei Iehova hna isa hamë së la atreine troa ië ewekë. Nge isa qanyi së kö iëne ka hape, tro sa nyihlue i Iehova maine waea. Catre pi pe! Ke ame e ketre ijin, tro hmaca kö nyën a bëek. Nge mekune kö lo ceitune ne la nekötrahmany ka paatr. (Luka 15:11-19, 22-24) Hnei nyëne lo hna pane trotrij la hnalapa, ngo hnei nyëne hmaca hna bëek. Itre kem me thine fe, ketre manathith ka tru la hnei epuni hna kapa, ene la troa xatuane la itre nekö i epun troa nyihlue i Iehova. (Sal. 78:4-6) Nyipici, tha hnëqa ka co kö! Ngo eahuni pe a madrin me olene catrëne koi epun, la hna inine la itre nekö i epun troa hnimi Iehova. Madrine catre Iehova la Nyidrëti a öhnyi epun a eatrëne hnyawa la hnëqa i epun.—Efe. 6:4. w22.05 30-31 par. 16-18

Loi e tro palahi sa hamëne la ka sisitria koi Iehova. E cili, tro ha tingeting me caasi la ekalesia. Hanawang la tulu ne la itre pane Keresiano ekö. Nyimutre la itre ahnahna me hnëqa hnei angatre hna kapa qaathei Iehova. (1 Kor. 12:4, 7-11) Ngo tha hnei angatre kö hna nue la itre ewekë cili troa thë la caasi e hnine la ekalesia. Hnei Paulo hna ithuecatre koi angatr troa kuca la hnei angatre hna atrein, matre troa “xupe draiëne la ngönetrei i Keriso.” Öni Paulo kowe la itre Keresiano ne Efeso: “Ame la kola isa huliwa hnyawa hnene la itre hnep, kolo hi lai a xatuane la ngönetrei asë troa tru trootro, nge ej a tru ngöne la ihnim.” (Efe. 4:1-3, 11, 12) Celë hi matre, kola caasi me tingeting la nöjei ekalesia enehila. Tha tro kö sa goeëne la eisapengö së me itre xan. Loi e tro pe sa xomi ini me xötrethenge la tulu i Iesu. Nyipiewekë tro sa kuca la hne së hna atrein me mejiune laka, “thatreine kö [Iehova] thëthëhmine la itre huliwa” së. (Heb. 6:10) Nyidrëti a wangatrune la itre trengecatre hne së hna kuca matre troa amadrinë Nyidrë. w22.04 14 par. 15-16

Easa madrine laka, tha hnëqa së kö troa amekötine la itre atr ka kuca la ngazo! Ngo, ame pe, hetre nyine tro sa kuca. Ame itre xaa ijin, tro la ketre atr a ngazo koi easë, ngo e thupen, tro angeic a qeje menu. Ngo e tha qeje menu kö angeic, ijije hi tro sa nue la ngazo i angeic. Kolo lai a hape, tha easë kö a lapa fë trenge hni koi angeic. Nyipici laka, tha tro kö a canga patr la elëhni easë, ngo loi e tro sa nue trengecatr, ngacama tru la hna akötrë së. Kola qaja ngöne la Ita Ne Thup ne 15 Semitrepa 1994 (qene Wiwi) ka hape: “Ame la easa nue la ngazo ne la atr ka kuca la ngazo, tha kolo kö lai a hape, easa wangacone la ngazo i angeic. Ame la keresiano a nue la ngazo, ke kolo hi lai a hape, angeic a nue Iehova troa ameköti ewekë. Nyidrëti la Atre Iameköti, matre tro kö Nyidrëti a të la ngazo ngöne la nyipi ijin.” w22.06 9 par. 6-7

Hnei Iehova hna qaja göne la hneijine së laka, tro Nyidrëti a acasine ngöne la hmi ka wië, la itre atr ka xulu qa ngöne la itre nöjei nöj, me nöjei tribu, me nöjei qene lapa. Hna hëne la itre atr cili ka hape, “ka alanyimu atraqatr.” (Hna ama. 7:9, 10) Ngacama hna nyi atrene la gurupe cili hnene la itre trahmanyi me föe me itre nekönatr, ka isa nöj, ame pe, ka ihnimi catre angatr, me caas, me tingeting. (Sal. 133:1; Ioane 10:16) Eje hi, ajane catr angatr troa ce thawa memine la itre atr la mejiune kowe la fene ka hnyipixe. (Mat. 28:19, 20; Hna ama. 14:6, 7; 22:17) Maine epuni fe hi la ketre ka hane sine la ka alanyimu atraqatr, ke eje hi, ka tru koi epuni la mejiune cili. Aja i Satana matre tha tro kö sa mejiune kowe la itre hna thingehnaeane hnei Iehova. Nge aja i angeic fe tro sa mekune ka hape, tha tro kö Nyidrëti a eatrëne la itre hna thingehnaean. E tro Satana eatrëne la aja i angeic, tro ha pë trengecatre së, nge tro hë sa nuetriji Iehova. w22.06 20-21 par. 2-3

Tro la mejiun a xatua së troa cile catr ngöne la itre ijine jol ke, atre hi së laka, tro kö sa hetre mel ka loi e thupen. Nge ase hë Iesu qaja ka hape, tro kö a axösisi së. (Ioane 15:20) Celë hi matre, ame la easa lapa mekune la mejiune së koi elany, ke kola xatua së troa catr trongëne la gojenyi ne mel. Hnene la mejiun hna xatua Iesu troa mele nyipici, ngacama troa humuthi nyidrë. Ame lo Penetekos macatre 33 M.K., hnei Peteru aposetolo hna amexeje la ketre hna perofetane ngöne la tusi Salamo ka amamane la mejiune i Iesu ngöne la ijine cili. Kola hape: “Tro ni a lapa hnine la mejiun. Ke tha tro kö nyipëti a nue ni ngöne la Hua, nge tha tro pi kö nyipëti a nue la atre mele nyipici troa öhne la hnyiqetr. . . . troa atraqatre la madrineng troa öhnyi nyipë.” (Itre hu. 2:25-28; Sal. 16:8-11) Ka catre la mejiune i Iesu laka, tro kö Akötresie a amele nyidrëti hmaca, nge tro nyidro a iöhnyi e hnengödrai.—Heb. 12:2, 3. w22.10 25 par. 4-5

Ame lo ketre ijin, hnei Iakobo me Ioane hna sipone kowe la thine i nyidro troa ithanata koi Iesu matre tro nyidroti a hane lapa ezi nyidrë ngöne la Baselaia. (Mat. 20:20, 21) Nyidroti a amaman e cili laka, nyidroti a pi draië me pi mama. (Ite edomë 16:18) Ame ngöne la ijine cili, tha Iakobo me Ioane hmekuje kö la ka ngazo thiina. Ketre, ka ngazo fe la aqane ujë ne la itre xaa aposetolo. Öni Tusi Hmitrötr: “Matre atre jë hi lai hnene lo ala treen, ame hnei angatr hna wesitr kowe la lue trejin.” (Mat. 20:24) Maine jë hnene la itre xaa aposetolo hna iwesitrë memine la lue trejin. Tune kaa la aqane ujë i Iesu e cili? Tha hnei nyidrëti kö hna elëhni. Tha hnei nyidrëti kö hna qaja ka hape, tro nyidrëti a nyihnai angatr hnene la itre atr ka ipië me ka ihnimikeu. Atre hnyawa hi Iesu laka, hetre aja i angatr troa kuca la loi, matre hnei nyidrëti hna xomi ijine troa xatua angatr. (Mat. 20:25-28) Hnei Iesu hna hnimi angatr. w23.03 28-29 par. 10-13

Hnei eö hna nue trengecatr. Hnei eö hna ini Tusi Hmitrötr ma ije macatre, matre xecie koi eö laka, Tusi Hmitrötr la Trengewekë i Akötresie. Ngo ame la ka nyipiewekë catre kö, ke atre hë eö la Atrekë Ewekëne la itus cili, me hnimi Nyidrë. Tru catre la ihnimi eö koi Iehova, ke ame enehila ase hë eö nue la mele i eö koi Nyidrë, me xomi bapataiso. Ketre manathith ka tru lai! Qëmekene tro eö a xomi bapataiso, hnei eö hna ixelë me nöjei pengöne jol ka tupath la lapaun i eö. Nge ame la eö a atre Iehova trootro, tro eö lai a cile kowe la itre xaa jol. Satana a thel matre tha tro hmaca kö eö a hnimi Iehova, me nyihlue i Nyidrë. (Efe. 4:14) The nue angeic pi kö troa kuca tune lai. Nemene la ka troa xatua eö troa mele nyipici koi Iehova, me metrötrëne la hnei eö hna sisiny? Loi e tro eö a catre huliwa koi Iehova, ene la troa “isine troa macaj.”—Heb. 6:1. w22.08 2 par. 1-2

E kuhu hnalapa, tha tro kö la itre atrene la fami a qaja koi itre xan la itre ewekë ka traqa e kuhu hnalapa. Maine jë hetre hna majemine kuca hnene la föe. Tro kö la trahmanyi a hnyima fë koi itre xan? Waea! Tru la ihnimi nyidrë kowe la föi nyidrë, matre tha aja i nyidrëti kö troa akötrë eahlo. (Efe. 5:33) Tha madrine kö la itre jeunes la kola thaipië angatr. Matre loi e tro la itre keme me thin a metrötrë nyudren, nge tha tro kö a qaja la itre tria nyudren koi itre xan. (Kol. 3:21) Ketre, loi e tro la itre keme me thin a inine la itre nekönatr troa hetre metrötr, nge tha tro kö nyudreni a qaja la itre ewekë ka traqa e kuhu hnalapa, wanga ahmahmanyi angatre pi. Maine tro la itre atrene la fami a atreine xomehnöthe la thineme i angatr, tro ha madrine la fami. w22.09 10 par. 9

Hnei Iehova hna amekunë angeic la edraiën la inamacan i Nyidrë, me ihnimi Nyidrë kowe la itre hna xup. Hnei Nyidrëti hna qejepengöne la emingömingöne la itre öni. (Iobu 38:1, 2; 39:9, 13, 19, 27; 40:15; 41:1, 2) Ketre hnei Iehova mina fe hna aijijë Elihu, ketre hlue i Nyidrë troa ithuecatr me akeukawanyi Iobu. Öni Elihu koi angeic, tro kö Iehova a amanathithin la itre hlue i Nyidrë ka catre mele nyipici. Ngo hnei Iehova fe hna upi Elihu troa hamë eamo ka troa akeukawanyi Iobu. Hnei Elihu hna amekunë Iobu laka, wanamamike angeic qëmeke i Iehova, Atre Xup la fen hnengödrai, nge tha tro kö angeic a goeëne catrën la jol ka traqa. Hnei Iehova fe hna ahnith koi Iobu troa thithi fë lo köni sinee i angeic ka akötrë angeic. (Iobu 42:8-10) Tune kaa la aqane xatua së enehila hnei Iehova ngöne la easa cile kowe la itre jol ka tru? Tha Iehova hmaca kö a ithanata meköt koi së tui Iobu ekö, ngo jëne pë hë la Tusi Hmitrötr.—Rom. 15:4. w22.08 11 par. 10-11

Hetreny e hnine la ekalesia cili, la itre keresiano ne Iudra, me itre atre ne fen. Qaane lo kola apatrene la Wathebo i Mose, ke tha hna wathebone hmaca kö la itre xaa xen. (Mar. 7:19) Celë hi matre, tha cile kö la itre xaa trejin ne Iudra troa xome la nöjei pengöne xen, ngo tha hna kuca tune kö hnei itre xan. Ame hna nyiqane traqa pi la gomegom e hnine la ekalesia. Celë hi matre, hnei Paulo hna amexej la enyipiewekën troa thele tingeting. Hnei Paulo hna qaja kowe la itre trejin laka, e tro angatr a iwesitrë, tro lai a hetre ethane kowe la itre xaa trejin me kowe la ekalesia. (Rom. 14:19, 20) Hnei angeic hna saze la aqane mele i angeic, matre tha tro kö a akeine la itre xan. (1 Kor. 9:19-22) Haawe, maine aja së troa xatua itre xan me thele tingeting, tha tro pi kö sa aciane la iwesitrë me catre fë mekun. w22.08 22 par. 7

Maine hetre mekun hne së hna ajan troa kuca ngöne la huliwa i Iehova, ke tro së lai a isine troa eatrën. Ceitune hi lai memine la easa trongëne la meköt. Nge tro kö Iehova a xatua së troa akökötrene la ihnimi së kowe la thiina cili. (Sal. 84:5, 7) Iehova a amexeje koi së laka, tha ka hace kö la itre trepene meköti Nyidrë. (1 Ioane 5:3) Itre eje pe a thupë së. Nge ka nyipiewekë tro sa trongëne itre ej e nöjei drai. Ma mekune hi epun lo hnaheetr ne isi hna qaja hnei Paulo. (Efe. 6:14-18) Nemene la igötranen la hnaheetr ne isi ka thupën la hni ne la keresiano? Kola qaja la “imano ne la meköt,” ka nyihatrene la itre trepene meköti Iehova. Tune la imano ka thupëne la wenethëhmi, tro la itre trepene meköti Iehova a thupëne la hni së, ene la sipu pengö së. Celë hi matre, loi e tro sa thupën, tha tro kö a patr la imano qaa ngöne la hna heetr ne isi easë!—Ite edomë 4:23. w22.08 29 par. 13-14

Qaane hë ekö, hnene la Trengewekë i Akötresie hna xatuane la itre atr ka lapaun. Hnei Iehova hna kuca matre tro palahi la itre atr a fejane lapan la itre hna cinyihan ka hmitrötr. Ngacama tha ka pexeje kö la itre atr ka fejane la Tusi Hmitrötr, ngo hnei angatr palahi hna isine troa fejane hnyawan. Önine la ketre ka qejepengöne la Tusi Hmitrötr göne la Itre Hna Cinyihane Qene Heberu, ka hape: “Qaane ekö, pëkö ketre itus hna fejane hnyawan tune la itusi celë.” Xecie koi së laka, itre mekuna i Iehova la hne së hna e e kuhu hnin. Qaathei Iehova “la nöjei loi me nöjei ahnahna ka pexej.” (Iako. 1:17) Nge ame la ketre ahnahna ka tru qaathei Iehova ke, ene la Tusi Hmitrötr. Ame la ahnahna ke, ej a amamane la pengöne la atr ka hamën. Jëne la ahnahna, angeic a amamane ka hape, atre hi angeic la hna ajan hnene la atr ka troa kapa lai ahnahna. Ceitune hi lai memine la Tusi Hmitrötr, ej a amamane la pengöne la Atre hamëne koi së. Jëne la Tusi Hmitrötr, Akötresie a amamane laka, atre së hnyawa hi hnei Nyidrë, nge öhne hi Nyidrë la itre aja së. w23.02 2-3 par. 3-4

Tru catr la madrine së elany la kola amelene hmaca la itre ka mec e celë fen ngöne la 1 000 lao macatre ne Musi Keriso! Easa lapa treqen la ijine tro hmaca sa iöhnyi memine lo itre sinee së ka mec. Ketre tui Iehova fe. (Iobu 14:15) Pane mekune jë la madrine së elany, la easa iöhnyi memine la itre sinee së ka mec. Ame “la itre atre ka meköt,” ka hetre ëjen ngöne la tusi ne mel, ke troa amele angatre hmaca “kowe la mel.” (Itre hu. 24:15; Ioane 5:29) Maine jë alanyimu la itre sinee së elany hna troa amelene panën e celë fen. Ketre, ame la itre “ka tha meköti kö,” ene lo itre ka thatre Iehova me ka tha nyihlue i Nyidrëti kö qëmeken tro angatr a mec, ke troa amele angatr “kowe la iameköti.” Ame la itre hna amelen hmaca, ke tro lai a ini angatr. (Is. 26:9; 61:11) Ketre porogaram ne ini ka tru elanyi lai hna troa eköth, laka tha hna hane kö tun qaan ekö.—Is. 11:10. w22.09 20 par. 1-2

Hnei Iehova hna amamane ka hape, ngacama tro la itre joxu a ce xöl, ngo ka catre kö Nyidrë hui angatr. Hnei Nyidrëti hna isigöline la angetre Isaraela, me xatua angatr troa lapane la itre xaa götran ne la Nöje Hna Thingehnaean. (Ios. 11:4-6, 20; 12:1, 7, 24) Anyimua amamane Iehova laka, Nyidrëti hi la Kasisitria! Hnei Iehova hna amenu Nebukaneza joxu ke, hnei angeic hna sipu selëne la trengecatr, me men, me lolo i angeic, ngo tha Iehova kö. Ame hmaca la Nebukaneza a loi, hnei angeic “hna ole koi Kasisitia” me wangatrehmekune laka, “musi ka epine palua la musi [Iehova].” Nge, “pëkö ate troa shawa la ime i nyidë.” (Dan. 4:30, 33-35) Önine la atre cinyihane la Salamo: “Manathithi la nöj’ e Iehova la Akötesi angat ; ene la nöjei ate hna iëne hnei nyidëti nyine edö i nyidë.” (Sal. 33:12) Hapeu, tha celë kö la ka upi së troa mele nyipici koi Iehova? w22.10 15-16 par. 13-15

Itre hna perofetan hnei Tusi Hmitrötr a acatrene la mejiune së kowe la itre hna thingehnaean hnei Akötresie. Casi hi la mekuna së memine la atre cinyihan la Salamo la kola thithi koi Iehova me hape: “Eni a lapa treqene la iamele qaathei nyipë ; ke trengewekë i nyipë la hnenge hna mejiune kow.” (Sal. 119:81, NWT ) Jëne la Tusi Hmitrötr, Iehova a hamë së “la pune memine la mejiun.” (Iere. 29:11) Tro kö a eatr la mejiune së, ke Iehova la ka qaja, ngo tha atre kö. Haawe, catre jë së inine la itre hna perofetan matre acatrene la mejiune së kowe la Tusi Hmitrötr. Ame la ketre kepin matre loi e tro sa mejiun kowe la Tusi Hmitrötr, ke ej a saze la mele ne la atr. (Sal. 119:66, 138) Hnene la lue trefën ka mekun troa seihnacil, hna trongëne la itre trepene meköt ne la Tusi Hmitrötr. Ame enehila, casi hmaca nyidro me madrin ngöne la mele ne trefën. Nge kolo fe a madrin la itre nekö i nyidro me tingeting ke, nyudren a mel ngöne la fami ka ihnim.—Efe. 5:22-29. w23.01 5 par. 12-13

Pane mekune jë epun la aqane eatr la itre hna thingehnaean e hnine la Tusi Hmitrötr. Öni Iesu lo, tro kö Iehova a hamë së la ka nyipiewekë kowe la mel. (Mat. 6:32, 33) Nge tro fe Iehova a hamë së la uati hmitrötr, e tro sa sipon. (Luka 11:13) Celë hi hna kuca hnei Iehova. Maine jë hetre xaa ewekë hnei Iehova hna kuca koi epun. Tune la troa nue la itre ngazo së, me akeukawanyi epun, me hamë epun la xen ka troa easenyi epun koi Nyidrë. (Mat. 6:14; 24:45; 2 Kor. 1:3) Haawe, ame la easa lapa mekun la hnei Akötresieti hna kuca koi së, kola acatrene la mejiune së kowe la itre hnei Nyidrëti hna troa kuca elany. Xecie koi së laka, tro kö Iehova a eatrëne la hnei Nyidrëti hna qaja. Önine la atre cinyihane la Salamo ka hape: ‘Manathithi la atr . . . lapa treqe Iehova Akötresi angeic; . . . atre nyipici epine palua.’—Sal. 146:5, 6. w22.10 27 par. 15; 28 par. 17

Ame la hna perofetan göne la troa acile hmaca la nyipi hmi, ke thatraqai easë fe enehila. Pine nemen? Pine laka ame lo 1919 M.K., itre milio lao atr hna thapa qaathei Babulona atraqatr, ene la itre hmi ka thoi. Hna tro sai angatr kowe la ketre götran ka lolo catre ju kö hune lo Nöje Hna Thingehnaean ekö. Angatr enehila a ce nyihlue i Iehova ngöne la paradraiso ka ketrepengön. (Is. 51:3; 66:8) Qaane lo 1919, itre hna iën a ce nyihlue i Iehova ngöne la paradraiso ka ketrepengön. Nge thupene la itre macatre, hnene fe la itre xaa mamoe hna ce nyihlue i Iehova ngöne la paradraiso cili me kapa la itre manathith ka tru qaathei Nyidrë. (Ioane 10:16; Is. 25:6; 65:13) Ame la paradraiso ka ketrepengön, ke ej ngöne la fen asë. Ngacama easë ju hë a mel ngöne la ketre götrane la fen, ngo easë ngöne la paradraiso ka ketrepengön, e tro sa huliwa catre kowe la nyipi hmi. w22.11 11-12 par. 12-15

Ka jole kö koi epun troa trotrohnine ka hape, “ka epine palua” Iehova? (Is. 40:28) Tha epuni casi kö la ka mekune tun. Öni Elihu göi Akötresie ka hape: “Thatreine kö së e la itre macatre i nyidrë.” (Iobu 36:26, NWT ) Tha hnene kö laka, tha trotrohnine kö së la ketre ewekë, matre tha ka nyipici kö la ewekë cili. Ka tune la lai, tha trotrohnine hnyawa kö së la aqane trongene ej, ngo tha kolo kö lai a hape, pëkö lai e celë fen! Maine jë, tha nyipi trotrohnine kö së la pengöi Iehova laka, ka epine palua Nyidrë. Ngo tha kolo kö lai a hape, tha ka epine palua kö Nyidrë. Hna nyi ifegone hi la inamacane së, ngo ame Iehova, pëkö sai Nyidrë. (Rom. 11:33-36) Ka hekö catre kö Nyidrë hune la jö me itre wëtresij. Nyidrëti lo ka “sheluthe la hnengödrai.”—Iere. 51:15. w22.12 2-3 par. 3-4

Ame itre xaa ijin, ijije hi troa upi së troa thith. Maine jë, tro la trejin föe ka xomiujine la ini Tus a sipone kowe la trejin föe ka ce tro me eahlo troa thith. Maine thatre hnyawa kö angeic la atr ka ini Tus, ma ka loi tro angeic a thith ngöne la pun. Ame hë e cili, atre hë angeic la nyine troa qaja matre ithuecatr kowe la ka ini Tus. Ijije fe troa sipone kowe la ketre trejin trahmany troa cile fë la thith ngöne la icasikeu koi cainöj, maine ngöne la icasikeu ne la ekalesia. Loi e tro la itre trejine cili a isine matre tro la itre thithi angatr a ihmeku memine la icasikeu. Tha tro pi kö a iameköti la kola thith qëmekene la ekalesia, maine qaja la itre ithuemacany. Ame ngöne la itre xaa icasikeu, tha tro kö la thith me nyima a sasaith la 5 lao menetr. Kolo hi matre tha tro kö la trejin ka thith, a ithanata aqeany. Loi e tro la trejin ka cile fë la thith ne nyiqan a trongëne la hna amekötine celë.—Mat. 6:7. w22.07 24 par. 17-18

Ekö hë Iesu qaja ka hape, ame ngöne la itre drai ne la pun, troa hetre meci ka ixötrekeu “ngöne la ketre götran me ketre götran.” (Luka 21:11) Hapeu, tha ka tingetinge kö la hni epun troa atre lai? Nyipici, ke tha sesëkötre kö së la kola traqa la itre ewekë cili. Kola eatr lo itre hnei Iesu hna qaja. Celë hi lai ka upi së troa trongëne la eamo i nyidrë koi së enehila, lo kola hape: “The xou kö!” Ame la kola traqa la ketre mec ka ixötrekeu, ke kola saze la aqane mele së. Ngo, the nue pi kö la ini Tusi casi epun, memine la itre icasikeu. Hetrenyi e hnine la itre itusi së me itre video la tulu ne la itre trejin ka mele nyipici koi Iehova, ngacama angatr a cile kowe la itre jol. Tro la tulu i angatr a xatua së. w22.12 17 par. 4, 6

Öhne hi hnene la itre xaa nekö i Iakobo qatr ka hape, tru catre kö la ihnimi nyidrë koi Iosefa hui angatr. (Gen. 37:3, 4) Celë hi matre zalu catr angatr koi Iosefa. Ame hë lo ketre ijin, hnei angatr hna salemë Iosefa kowe la angetre Midiana. Hnene la itretre salem hna xomi angeic a tro Aigupito, matre nanyi hë angeic qa ngöne la hnalapa i angeic. Nge ame e cili, hna salemë angeic koi Potifara, tane la itre sooce i Farao. Saze catr la mele i Iosefa! Ame ekö lo, angeic la nekö hnimina i kem, ngo ame hë enehila, angeic la ketre hlu e Aigupito. (Gen. 39:1) Nge easë fe a cil kowe la itre jol ka “hane traqa koi nöjei atr asë.” (1 Kor. 10:13) Maine jë, kola akötrë së ke, easa drengethenge Iesu. Itre atr a hnyimasai së, maine icilekeu, maine axösisi së pine la lapaune së. (2 Tim. 3:12) Traqa ju hë la nöjei pengöne jol, ngo tro kö Iehova a xatua së troa xomihnin itre ej. w23.01 14-15 par. 3-4

Maine hna akötrë së hnene la ketre trejin, canga tro hi së a wai angeic. Ngo qëmeken troa tro, loi e tro sa pane hnying ka hape: ‘Hapeu, atre asë kö ni la itre ithuemacany?’ (Ite edomë 18:13) ‘Hnei angeice kö hna thë troa akötrë ni?’ (Ate cai. 7:20) ‘Hnenge fe kö hna hane ujë tui angeic ekö?’ (Ate cai. 7:21, 22) ‘Maine tro ni a wange lai trejin, hapeu, tha eni kö lai a troa atrune catrëne lai jol?’ Maine tro sa xomi ijine troa lapa mekun la itre hnyinge celë, troa kökötre la ihnimi së kowe la trejin, nge tro hë sa nue la ngazo i angeic. Nyipiewekë tro sa amaman la ihnimi së kowe la itre trejin, ngacama tha ka pexeje kö angatr. Tro la aqane ujë së a aijijëne la itre atr troa wangatrehmekune la nyipi hmi me ce nyihlue i Iehova me easë. Haawe, catre pi së ihnimikeu, ke celë hi sipu hatrene la itre nyipi keresiano. w23.03 31 par. 18-19

Tusi Hmitrötre fe a amamane la thiina ka sisitria i Akötresie, ene la ihnim. Pine laka, tru la ihnimi Nyidrë, hnei Nyidrë hna tuluthe hi la itre ithuemacanyi hna hamë së, ke tha ijiji së kö troa kapa asë itre ej. (Ioane 21:25) Ame la ketre aqane mama la ihnimi Iehova e hnine la Tusi Hmitrötr, ke ngöne la aqane ujë i Nyidrë koi easë. Tha Nyidrëti kö a musinëne la mele së. Aja i Nyidrëti pe tro sa atreine xomi ini qa ngöne la itre hna melën e hnine la Tusi Hmitrötr, me itre hna perofetan me itre eamo. Celë hi lai ka upi së troa hnimi Iehova me drengethenge Nyidrë hnene la hni së ka pexej. Tusi Hmitrötr a amaman ka hape, ka tru koi Iehova la itre atr. Eje a qaja la itre hna melën ka amamane la aliene la hni ne la itre atr me itre aja i angatr. Trotrohni angatre hi së ke itre atre “ka tu së hi, nge casi hi la itre aliene hni së” me angatr. (Iako. 5:17) Ketre, ame la easa öhne la aqane ujë i Iehova kowe la itre atr ka tu së, ke easë hi lai a trotrohnine laka, “ka nyipi menyike la ihnimi i Iehova nge ka iutipi.”—Iako. 5:11. w23.02 6 par. 13-15

Nge kola qaja ngöne la itus tixenuë ne la Tusi Hmitrötr, ka hape: “Hna amaman jëne Iesu Keriso, lo hnei Akötresie hna ahnithe kow troa amamane la itre ewekë ka troa canga traqa koi itre hlue i nyidrë.” (Hna ama. 1:1) Celë hi matre, ka nyipiewekë koi së la itre ewekë ka traqa enehila, nge aja së troa atre ka hape, itre eje kö a eatrën la itre hna perofetan. Ketre, easa ajane troa ce porotrikëne lai memine la itre trejin. Loi e tro sa thupën tha tro kö sa qaja la sipu mekuna së ngöne la easa porotrikën me itre xan la itre hna perofetan. Pine nemen? Pine laka tha ajane kö së troa qaja la ketre ewekë ka troa thë la cas ne la ekalesia. Maine tro sa drenge la itre hene ne mus a qaja ka hape, tro angatr a nyinyine la ketre jol me acile la tingeting, ke tha tro kö sa canga mekune ka hape, eatre hë lo hna perofetan ngöne 1 Thesalonika 5:3. Ngo loi e tro pe sa treqene la itre ithuemacanyi hna hamën ngöne la itre itusi së. Ame la easa nyitrepene la itre porotrike së hnene la itre itus hna hnëkën hnene la organizasio i Iehova, ke easë hi lai a xatuane la ekalesia troa cas ngöne la “aqane waiewekë.”—1 Kor. 1:10; 4:6. w23.02 16 par. 4-5

Pine nemen matre epuni a hnimi Iesu? Kola qaja e celë ka hape, Iesu a nyinyape fë la nyipici, me ipië me meköt. Maine epuni a ajane la nyipici me meköt, haawe tro fe epuni lai a hnimi Iesu. Mekune jë epuni lo ijine nyidrëti a isigöline la nyipici me meköt. (Ioane 18:37) Tune kaa la aqane amamane Iesu la enyipiewekëne troa ipië? Iesu a amaman qa ngöne la aqane ujë i nyidrë la enyipiewekëne troa ipië. Tha hnei nyidrëti kö hna thele troa atrunyi nyidrë, ngo Keme i nyidrëti pe. (Mar. 10:17, 18; Ioane 5:19) Nemen la ka ketri epun ngöne la aqane ipië i nyidrë? Hapeu, tha kolo kö lai a upi epun troa hnim me xötrethenge nyidrë? Nyipici. Hnauën laka, ka ipië Iesu? Ke nyidrëti a hnim me xötrethenge la Keme i nyidrë ka ipië. (Sal. 18:35; Heb. 1:3) Aja i epuni kö troa hnime la atre ka xötrethenge hnyawane la itre thiina i Iehova? w23.03 3-4 par. 6-7

Tusi Hmitrötr a qaja la lue gurup hna troa amelene hmaca e celë fen, nge ka troa kapa la mele ka pë pun, ene la “itre atre ka meköt,” me “ka tha meköti kö.” Ame la “itre atre ka meköt,” ke kolo itre ka nyihlue i Iehova qëmekene tro angatr a mec. Nge ame pena la itre “ka tha meköti kö” ke, kolo itre atr ka thatre Iehova kö, ngöne la angatr a mel. Pine laka, troa amelene hmaca la lue gurupe cili, kolo kö lai a hape, hna cinyanyine la ëje i angatr ngöne la tusi ne mel? Ame lo mele palakö lo “itre atre ka meköt,” ase hë cinyanyine la ëje i angatr ngöne la tusi ne mel. Ngo tune kaa la angatr a mec, hna köletrije kö la ëje i angatr? Waea, ke “itre ka mel asë hi angatr” ngöne la mekuna i Akötresie. Ame Iehova, “tha nyidrëti kö la Akötresi ne la itre ka mec, ngo itre ka mele pe.” (Luka 20:38) Kolo lai a hape, ame la kola amele angatr hmaca e celë fen, ke hna cinyanyine palahi la ëje i angatr hnei crayon ngöne la tusi ne mel.—Luka 14:14. w22.09 16 par. 9-10

Aja i Iehova tro Adramu a madrin la angeic a goeëne la itre hna xup. Hnei Iehova hna hamë Adramu la ketre hlapa ka mingöming, me upi angeic troa eëny me nyihnyawan ej. (Gen. 2:8, 9) Pane mekune jë la madrine i Adramu la angeic a öhne la kola cia la itre itine feja memine la kola kekë la itre iengen. Ketre madrine ka tru koi angeic troa nyihnyawane la hlapa e Edrena. Hnei Iehova fe hna upi angeic troa ati ëjen la itre öni. (Gen. 2:19, 20) Maine ju hi, tro kö Iehova a ati ëjen la itre öni, ngo hnei Nyidrë hna hamëne la hnëqa cili koi Adramu. Qëmeken tro Adramu a ati ëjen la itre öni, angeic a pane goeëne hnyawane la pengön me aqane ujë i nyudren. Madrine catre angeic troa kuca la huliwa cili. Nge jëne nyudren, angeic a öhne la inamacan, memine la atreine i Iehova troa xupe la itre ewekë. w23.03 15 par. 3

Musi Agele me Amerika la mus tixenuë hna qaja hnei Tusi Hmitrötr, ke hna nyihatrene ej hnene la lue iwaca ne la hnasaatr. (Dan. 2:31-33) Pëkö xaa mus ka troa cil e thupen. Ame pe, troa canga apatrene la musi cili ngöne la isi Amagedro. Nge Baselaia i Akötresie la ka troa apatrene ej, memine ju kö la itre xaa mus. (Hna ama. 16:13, 14, 16; 19:19, 20) Kola xatua së tune kaa hnene la itre hna perofetane celë? Hetre xaa ithuemacanyi ngöne la hna perofetan hnei Daniela göne la itre drai ne la pun. Hnei Daniela hna perofetane a 2 500 lao macatre enehila ka hape, thupei Babulona, 4 lao mus ka troa cil e thupen, nge ka hetre thangan kowe la nöje i Iehova. Ketre, ame la musi Agele me Amerika, ke celë hi musi tixenuë ka troa cil. Celë hi ka akeukawanyi së me thue mejiune koi së laka, easenyi catre hë tro la Baselaia i Akötresie a apatrene la nöjei musi ne fen, nge tro ej a mus kowe la ihnadro epine palua. w22.07 4 par. 9; 5 par. 11-12