Juun

Lolo catre la imelekeu i Iobu me Iehova. Hetrenyi Iobu la ketre fami ka tru nge ka caas. Ame fe angeic, ke ka trene mo. Ngo ngöne hi la ca drai, pë hnyawa ca ewekë i angeic. (Iobu 1:1-5) Ame lo xötrei ke, hna thapa la itre mo i Iobu. Nge ase jë hi lai, ke itre nekö hnimina i angeic. (Iobu 1:13-17) Pane mekune jë së la ka traqa koi Iobu. Drei jë kö la akötre me hleuhleu i Iobu me ifënekö i angeic, la kola aca tro meci la 10 lao nekö i nyidro. Matre tha sesëkötre kö së la Iobu a kuie zezen la iheetre i angeic, me kei e kuhu hnadro, hatrene laka, akötre catre angeic! (Iobu 1:18-20) Hnei Satana hna axulune la ketre meci koi Iobu, me thaipië angeic. (Iobu 2:6-8) Ame ekö, Iobu la ketre atr hna metrötrën, nge tru la itre ka sipo eamo thei angeic. Ngo ame enehila, angatr pena sisi angeic. (Iobu 31:18) Hna nuetrij Iobu hnene la itre trejine me angeic, me itre sinee i angeic, me itre hlue i angeic!—Iobu 19:13, 14, 16. w22.06 21 par. 5-6

Thupene la bapataiso, loi e tro la itre keresiano a trongëne la eamo hnei Paulo aposetolo hna hamëne kowe la itre trejin ne Efeso. Hnei nyidrë hna ithuecatr koi angatr troa “tune la itre ka tru.” (Efe. 4:13) Kösë nyidrëti a qaja koi angatr ka hape, ‘Troa maca ngöne la huliwa i Iehova.’ Tru catre la ihnimi eö koi Iehova. Ngo ijiji eö hi troa acatrene catrën hmaca kö. Tune kaa? Ame ngöne Filipi 1:9, tro sa öhne la ketre aqane troa acatren ej. Hnei Paulo hna thithi fë la angetre Filipi, matre tro la ihnimi angatr “a kökötre trootro.” Kolo hi lai a hape, ijije hi tro la ihnimi së a kökötr. Tro lai a ej, e hetreny the së “la nyipi inamacan, me atrehmekun.” Maine tro sa thel troa atre Iehova hnyawa, tro hë së lai a hnimi Nyidrë, me wangatrune la itre thiina, me itre huliwa i Nyidrë. Celë hi ka troa uku së tro palahi a amadrinë Nyidrë, me sisine la itre ewekë hnei Nyidrëti hna sisin. Ketre, easa nue trengecatr matre atrehmekun la aja i Nyidrë me trongën ej. w22.08 2-3 par. 3-4

Ame la itre hna cinyanyi ngöne la itusi Hna Amaman, ke tha thatraqane kö la nöjei atr asë, ngo koi së hi, itre hlue i Akötresie. Ame easë itre hlue i Akötresie, atre hnyawa hi easë laka, easë fe a hane eatrëne la hna perofetan ngöne la itusi celë. Hnei Ioane aposetolo hna qaja la ijin troa eatr la itre hna perofetan. Öni nyidrëti ka hape: “Hnene la ua hna xomi ni kowe la drai i Joxu.” (Hna ama. 1:10) Ame lo Ioane a cinyanyine lai, lo macatre 96 M.K., ke nanyi palakö “la drai i Joxu.” (Mat. 25:14, 19; Luka 19:12) Ngo thenge la hna perofetan hnei Tusi Hmitrötr, hna nyiqane la drai cili lo 1914 ngöne lo kola acili Iesu troa Joxu ngöne la Baselaia e koho hnengödrai. Qane ju hi la macatre cili, kola nyiqane eatr la itre hna perofetane ngöne la tusi Hna Amaman göne la nöje i Akötresie. Eje hi, easë hnyawa a melëne “la drai i Joxu”!—Hna ama. 1:3. w22.05 2 par. 2-3

Hna xolouthe la öni ka ses memine la perofeta thoi, me ce kuiën amele nyidro kowe la hneopegejë eë me gaz. Ngacama angatr palahi a isa cilëne la itre göhnë i angatr, ngo tro angatr a sesëkötr la Akötresie a apatrene palua angatr. Kola hapeue lai koi së? Pine laka, itre keresiano së, nyipiewekë tro sa mele nyipici koi Akötresie me kowe la Baselaia. (Ioane 18:36) Tha easë kö a lö hnine la kuci politik. Ngo tha ka hmaloi kö, ke itre mus a uku së troa ce mekun me ce huliwa me angatr. Ame la itre ka keithenge la mekuna i angatr, ke, tro ha kapa la hatrene la öni ka ses. (Hna ama. 13:16, 17) Maine tro la keresiano a kapa la hatrene cili, tro ha nuetriji angeic hnei Iehova, nge pë fe hë mel ka epine palua koi angeic. (Hna ama. 14:9, 10; 20:4) Loi e tro sa isine troa iananyi memine la politik, ngacama akötrë së ju hë! w22.05 10-11 par. 12-13

Ijije fe tro sa mekun troa maca ngöne la ketre huliwa. Maine tro palahi sa thele troa maca, tro ha ahnithe koi së la itre xaa hnëqa. Nemene la hne së hna öhne ngöne la easa goeëne la itre atr ka ixatua ngöne la kola xupi Uma Ne Baselaia, maine Bethela, maine uma ne asabele? Ame la itre xaa trejin, angatr a atreine huliwa ke, hna ini angatre hnene la itre trejin ka macaj. Ame enehila, itre trejin trahmanyi me föe a inine troa nyihnyawane la itre uma ne asabele me Uma Ne Baselaia. Eje hi, Iehova Akötresie nge “Joxu ka epine palua,” me Iesu Keriso, “Joxu ne la itre joxu,” a upe la itre ka atreine huliwa troa kuca la itre ewekë ka tru. (1 Tim. 1:17; 6:15) Haawe, loi e tro sa catre huliwane la itre hne së hna atreine matre troa atrunyi Iehova, ngo tha easë kö.—Ioane 8:54. w22.04 24 par. 7; 25 par. 11

Ka trene mani Solomona, nge tru catre hnei mo i angeic. (1 Ite jo. 10:7, 14, 15) Ngo, ame pena Iesu, pë fe kö mo me hnalapa i nyidrë. (Mat. 8:20) Ngo ame asë hi nyidro ke, lue ka atreine tulu ewekë göi mani me mo. Hna jëne nemen? Hnene la inamacane qaathei Akötresie. Öni Solomona, jëne la mani, ijije hi tro sa itöne la itre ka nyipiewekë kowe la mele së, me itre xaa ewekë ju kö hne së hna ajan. Ngacama ka trene manie ju hë Solomona, ngo atre hi angeic ka hape, hetre ka nyipiewekë catre kö hune la mani. Celë hi matre öni angeic: “Ka loi kö la troa hlemu la ëje së, hune la tro sa trenamo.” (Ite edomë 22:1, NWT ) Hnei Solomona fe hna öhne la itre atr ka hnimi mani, ngo tha ka madrine kö. (Ate cai. 5:10, 12) Celë hi matre, angeic a hmekë së laka, tha tro kö sa mejiune koi mani, ke, tro hi a canga patr.—Ite edomë 23:4, 5. w22.05 21 par. 4-5

Ame la easa lapa mekun la itre manathith hne së hna kapa enehila, kolo lai a acatrene la aqane imelekeu së me Iehova. Nge tha tro kö sa thëthëhmine la itre manathith hnei Iehova hna hnëkëne koi së elany, ke tro lai a acatrene la mejiune së. Tro hë së lai a madrin troa nyihlue i Iehova enehila. Tro Iehova a “mejë” me isigöli së ngöne la Nyidrëti a troa apatrene la fene i Satana. Atre hi së laka, “Akötresie ka meköti” Iehova matre tha tro kö Nyidrëti a nue paluane la musi Satana. (Is. 25:9) Easa lapa treqene la drai ne tro Iehova a amele së, matre loi e tro sa catre thith, me inine la Tusi Hmitrötr, me trongëne ej me lapa mekun la itre manathith hne së hna troa kapa. E cili, tro hë Iehova a xatua së troa catre nyihlue i Nyidrë ngöne la madrin. w22.11 13 par. 18-19

Tha hna qaja kö hnei Tusi Hmitrötr la ijine kola xomi bapataiso hnei Timoteo. Ngo pane mekune jë së la madrine i Enis, thine i Timoteo, ngöne la ijine cili. (Ite edomë 23:25) Hnei Enis hna ini Timoteo troa hnimi Iehova me Iesu Keriso, Nekö i Nyidrë. Tha ka nyihlue i Iehova kö la keme i Timoteo. Ketre atre Geres nyidrë, nge ame Enis me Lois ke, lue föe ne Iudra. (Itre hu. 16:1) Maine jë, Timoteo a nekötrahmanyi ngöne lo Enis me Lois a atre la nyipici. Celë hi matre, isa hmi nyidroti kö memine la keme i Timoteo. Nemene la hna troa kuca hnei Timoteo? Ame fe enehila, tru catre la ihnimine la itre thine Keresiano kowe la fami angatr. Ame la ka sisitria koi angatr ke, tro la itre nekö i angatr a easenyi koi Iehova. Nge Iehova a wangatrune la itre trengecatre hna kuca hnene la itre thine Keresiano. (Ite edomë 1:8, 9) Nyimutre la itre thine hnei Iehova hna xatuane matre tro la itre nekö i angatr a kapa la nyipici. w22.04 16 par. 1-3

Easenyi hë tro Iehova a amë e kuhu hni ne la itre ka cilëne la itre mus troa “sajuëne la mekuna i nyidrë.” Matre nemene hë la pun? Tro la itre mus, ene lo “treene lao joxu,” a lep apatrene la itre hmi ka thoi. (Hna ama. 17:1, 2, 12, 16) Nemene la ka amamane koi së laka, easenyi hë troa apatrenyi Babulona Atraqatr? Loi e tro sa mekune hmaca la pengöne lo traon e Babulona ekö. Ame ekö, hna thupë ej hnene la hneopegejë, Euferata. Tusi Hna Amaman a aceitunëne la itre ka ce xöl me Babulona Atraqatr me “itre tim” ka thupëne ej. (Hna ama. 17:15) Ame pe, troa “pë tim” la hneopegejë cili. Kolo lai a hape, troa pë aliene la itre uma hmitrötr. (Hna ama. 16:12) Eatre hë la hna perofetane cili. Ame enehila, alanyimu la itre atr ka trotrij la hmi ka thoi, me thele la nyipi hmi. w22.07 5-6 par. 14-15

Ame la easa nue la ngazo i ketre, ke ketre aqane tro hi së lai a olene koi Iehova. Ame ngöne la ketre ceitun, hnei Iesu hna aceitunë Iehova memine la ketre joxu ka nue la gufa ne la ketre hlue i nyidrë, ke thatreine kö angeic troa të. Ngazo pe, tha ase kö la hlue cili nue la gufa ne la ketre hlue, ngacama co hi lai gufa. (Mat. 18:23-35) Nemene la ini hne së hna xom qa ngöne la ceitune i Iesu? E tro sa wangatrune la aqane nue Iehova la itre ngazo së, ke tro lai a xatua së troa nue la ngazo i itre xan. (Sal. 103:9) Hane hi la hna qaja hnene la ketre Ita Ne Thup: “Ngacama anyimua nue ju hë së la ngazo i itre xan, ngo thatreine kö së wej la aqane nue la itre ngazo së hnei Iehova, hna jëne Iesu Keriso.” Ame la itre ka nue la ngazo ne la itre xan, ke tro fe a nue la itre ngazo i angatr. Tro Iehova a utipine la itre ka utipi itre xan. (Mat. 5:7) Celë hi hnei Iesu hna qaja lo nyidrëti a inine la itetre dreng troa thith.—Mat. 6:14, 15. w22.06 10 par. 8-9

Ame lo Iesu e celë fen, hnei nyidrë hna tu së itre atr. Nge hnei nyidrëti hna amamane la itre thiina ne la Keme i nyidrë. (Ioane 14:9) Jëne itre ej, hne së hna inine troa hnimi Iehova. Nge ame enehila, tru la itre manathith hne së hna kapa qa ngöne la itre ini me aqane iujine nyidrë la itre ekalesia. Nyidrë a ini së la aqane tro sa amadrinë Iehova, me kepe eloine qa ngöne la meci nyidrë. Eje hi, thupen lo kola amele nyidrëti hmaca, hnei nyidrë hna tro fë la madra i nyidrë koi Iehova. Nge hnei Iehova hna kapa la huuj ka pexeje i Iesu. Nge celë hi lai ka “ahmitrötrë së qa ngöne la nöjei ngazo së.” (1 Ioane 1:7) Joxu hë nyidrë, nge tha tro hmaca kö nyidrëti a mec. Ketre, easenyi hë tro Iesu a waja fica la he ne la un. (Gen. 3:15) E cili, troa apatrene palua Satana. Drei jë kö la madrine së ngöne la ijine cili, e tro sa mele nyipici koi Iehova! Haawe, catre jë së uti hë la pun. Ame la Akötresi së, ke tha ka thoi kö. Nge tro Iehova a amanathithine la “itre nöj e cailo fen.” w22.07 18 par. 13; 19 par. 19

Ijije hi tro sa saze la itre mekun nyine tro sa eatrën. Pine nemen? Pine laka, thatre kö së la itre ewekë ka troa traqa elany. Hanawang la ketre ceitun. Hnei Paulo aposetolo hna eköthe la ketre ekalesia ka hnyipixe e Thesalonika. Ngazo pe, alanyimu la itre ka icilekeu me nyidrë. (Itre hu. 17:1-5, 10) Maine tro Paulo a lapa, tro hë lai a hetre ethane kowe la itre trejin. Ngo tha celë kö lai ka sewe Paulo troa xatuane la itre trejin. Hnei nyidrëti hna upi Timoteo matre troa xatuane la itre trejin ne Thesalonika. (1 Thes. 3:1, 2) Eje hi, tru la madrinene la itre trejin. Hetre ini hne së hna xome qa ngöne la tulu i Paulo. Maine jë easa ajane troa xome la ketre hnëqa, ngo hetre itre ewekë ka traqa nge ka sewe së troa eatrëne la aja së. (Ate cai. 9:11) Maine celë hi lai ka traqa koi së, loi e tro sa saze mekun, me thele la ketre hnëqa ka ijije tro sa xom. w22.04 25-26 par. 14-15

Iehova a akeukawanyi së jëne la itre hna thingehnaean. Tro sa ce wang la itre xaa mekun qa hnine la Tusi Hmitrötr, ka troa akeukawanyi së ngöne la easa melën la itre jol. Iehova a qaja ka hape, pëkö ketre ewekë, ka troa “thepe së qa ngöne la ihnimi [Nyidrë].” (Rom. 8:38, 39) Ketre, Nyidrëti a easeny “koi angat’ asë angete hë nyidë” ngöne la thith. (Sal. 145:18) Öni Iehova, maine tro sa mejiun koi Nyidrë, tro së lai a atreine cil kowe la itre jol ka traqa koi së, me madrin ngacama easa akötr. (1 Kor. 10:13; Iako. 1:2) Kola amekunë së hnene la Trengewekë i Akötresie laka, ka pë pengöne la itre jole së enehila, hune la itre manathith hne së hna troa kapa elany. (2 Kor. 4:16-18) Iehova a thingehnaean koi së laka, tro kö Nyidrëti a apatrene la qaane la itre akötre së, ene Satana Diabolo me itre sine xöle i angeic. (Sal. 37:10) Hnei epuni kö hna hane inine gufan la itre xötr ne la Tusi Hmitrötr, ka troa xatua epun troa cil kowe la itre itupath elany? w22.08 11 par. 11

Hapeu, xou i epuni kö troa thatreine trongëne la itre trepene meköti Iehova e nöjei drai, me ngöne la itre macatre? Öni Iehova, troa “tune la ite hoke ne gejë” la thiina ka meköti epun. (Is. 48:18) Pane mekune jë la epun ngöne la hnangöni, nge epuni a goeën la kola kaca la itre hoke ne gejë. Hapeu, tro kö epuni lai a xou laka, troa patre la itre hoke ne gejë? Waea! Atre hi epuni laka, tha tro kö lai a saze. Ceitune hi la thiina ka meköti epun memine la itre hoke ne gejë! Pine nemen? Ame la epuni a axecië mekun, pane hnyinge jë ka hape, nemene la aja i Iehova? Nge e thupene lai, kuca jë. Maine jë, tha ka hmaloi kö troa kuca. Ngo, tro kö la Keme i epun ka tru ihnimin a xatua epun, me hamëne la trengecatr ka ijij matre melëne la itre trepene meköti Nyidrë e nöjei drai.—Is. 40:29-31. w22.08 30 par. 15-17

Thupene la 1 000 lao macatre, tro hmaca a nue angeic. E cili, tro angeic a tupathe lo itre atr ka pexeje hë. Ame ngöne la itupath cili, tro la nöjei atr a isa amaman ka hape, angatre kö a metrötrëne la ëje i Iehova me isigöline la musi cile i Nyidrë. (Hna ama. 20:8-10) Tro la isa aqane ujë i angatr kowe la itre itupathi Satana a amamane ka hape, ijije kö tro hane sija paluane la ëje i angatr ngöne la tusi ne mel. Alanyimu catr la itre ka troa thipetrije la musi Iehova, tui Adramu me Eva. Nemene la pun koi angatr? Öni Hna Amaman 20:15: “Ame la nöjei atr ka pë ëjen hnine la tusi ne mel, hna kuië angatre fe hnine la hneopegejë eë.” Eje hi, troa apatrene palua angatr. Ngo tru catre kö hnei atr ka troa mele nyipici ngöne la itupath cili. w22.09 23-24 par. 15-16

Ame ngöne lo hneijin ne la itre pane keresiano, hnene la itre xaa trejin hna ukun la itre atre ne fen troa xötrehatrenyi angatr, wanga troa xöjetriji angatr hnene la angetre Iudra. (Gal. 6:12) Tha celë fe kö la mekuna i Paulo aposetolo. Tha hnei angeice kö hna catre fë mekun, ngo hnei angeice pe hna tro fë la jole cili, koi itre aposetolo me itre qatre thup e Ierusalema. (Itre hu. 15: 2) Hetre eloine la aqane ujë i angeic kowe la itre keresiano cili, ke tingetinge hmaca ha la ekalesia. (Itre hu. 15:30, 31) E traqa ju la ketre jol ka tru e hnine la ekalesia, nyipiewekë tro sa thele eamo thene la itre trejin hnei Iehova hna acil, matre hetre tingeting. Hnene la organizasio hna amamai së la nyine troa kuca thenge la itre trepene meköt, jëne la itre itusi së maine itre hna amekötin. Maine tro sa trongëne la itre hna amekötine cili hune la troa catre fë mekun, ke easë hi lai a thele tingeting e hnine la ekalesia. w22.08 22 par. 8-9

Ame itre xaa ijin, easa ajan troa fe la hni së kowe la ketre sinee hne së hna mejiune kow. Ngo, tha ka hmaloi kö, ke tha majemine kö së fe la hni së koi itre xan. Nge xoue easë tro la sinee cili a kötrefë ithanata. Ngo easë pe a madrin, e hetre sinee së ka metrötrë së, nge tha ka tro fë ithanata kö! Ame la itre qatre thup ka metrötrëne la itre hna qaja koi angatr ke, ceitui angatr me itre “nyine zaene la eny, me hnapo” kowe la itre trejin. (Is. 32:2) Tha cile kö së troa fe la hni së koi angatr, ke atre hi easë ka hape, tha tro kö angatr a iqajakeun. Tha tro kö sa hnyingë angatr la itre ithuemacany, nge tha nyine tro kö së a atre. Ketre tune fe la itre föi angatr, tha tro kö nyudreni a thel troa atre la itre ewekë ka traqa e hnine la ekalesia. Tha tro kö la qatre thup a qaja kowe la föi nyidrë la itre ewekë tha nyine tro kö eahlo a atre. Nyidrëti hi lai a amamane ka hape, nyidrëti a hnimi eahlo. w22.09 11 par. 10-11

Ka xecie koi së laka, tro kö Nyidrëti a amelene la itre hlue i Nyidrë ka mele nyipici ngöne la ijine “akötr atraqatr.” (Mat. 24:21; Dan. 12:1) Tro Nyidrëti a thupëne la itre hlue i Nyidrë ngöne la ijine tro Gog atre Magog (ene lo itre nöj ka troa ce xöl) a thel troa apatrenyi angatr. Ngacama traqa ju hë koi 193 lao nöj ka nyiatrene la Nations unies, ngo ka pëkö ca pengöne kowe la Kasisitria memine la trongene isi Nyidrë! Öni Iehova: “Tro ni a atrunyi ni me ahmitötë ni kö ; nge tro ni a mama qëmeke ne la ite nöje ka nyimute, nge tro angat’ a ate laka ini Iehova.” (Ezek. 38:14-16, 23) Ame hë la Gog a thel troa lepi së, tro ha nyiqane la isi Amagedro. Nge e cili hi la tro Iehova a amamane la mene Nyidrë me apatrene “la nöjei joxu ne fen.” (Hna ama. 16:14, 16; 19:19-21) Thupene lai, “tro hi la itre ka meköti a lapane la ihnadro, nge tro hi la itre ka pë ethan a mele palua ngöne ej.”—Ite edomë 2:21, NWT. w22.10 16-17 par. 16-17

Iehova hmekuje hi la ka ‘öhne la hni.’ (Ite edomë 16:2) Nyidrëti a hnim la nöjei atr, ngacama isa nöje i angatre kö me isa aqane mele i angatre kö. Nge Iehova a ithuecatre koi së troa ‘fe hnyawane la itre hni së.’ (2 Kor. 6:13) Loi e tro sa hnim la nöjei trejin me easë, me cil troa ameköti angatr. Ame la troa tha ameköti itre xan, ke kolo fe hi lai a hape, tha tro kö sa amekötine la itre atr ka tha nyihlue i Iehova kö. Tro kö epun a qaja göne la ketre atrene la fami epun, ka tha hmi kö ka hape, “Tha tro jë fe kö angeice lai a hane atre Iehova”? Waea, ka pi tru la aqane mekune cili, nge kösë epuni lai a pi nyi ka meköt. Iehova a ajane tro “la nöjei atr” a ietra. (Itre hu. 17:30) The thëthëhmine kö së laka, Iehova a goeën la itre atr ka pi nyi ka meköt ceitu me itre ka tha meköti kö. E tro sa hniin la itre trepene meköti Iehova, ke tro së lai a madrin. Nge jëne la tulu së ka lolo, tro lai a thue aja koi itre xan troa easenyi së me Iehova. w22.08 31 par. 20-22

Tha tro kö sa sesëkötr laka, troa icilekeu me easë ngöne la easa cainöj. Nge tro kö a catrehnine catre ngöne la itre drai ka calemi. (Dan. 11:44; 2 Tim. 3:12; Hna ama. 16:21) Ngo xecie koi së laka, tro kö Iehova a hamë trengecatre së. Pine nemen? Pine laka hnei Iehova palahi hna xatuane la itre hlue i Nyidrë troa eatrëne la hnëqa i angatr ngöne la kola traqa la itre jol. Tro sa wang la hna melëne hnei Ezekiela ngöne la angeic a tro fë la maca kowe la angetre Iudra hna oth a tro Babulona. Tune kaa la itre atr hnei Ezekiela hna cainöje kow? Iehova a qeje angatr ka hape, itre ka tha idrei, “ka xeti hni,” me “ka cate meke.” Hna aceitunë angatr me itre sinöe ka ithiny me itre sekopio. Celë hi matre anyimua qaja jë kö Iehova koi Ezekiela ka hape: “The qou kö”! (Ezek. 2:3-6) Ngo hnei Ezekiela hna eatrëne hnyawa la hnëqa i angeic, ke (1) Iehova la ka upi angeic, (2) hna xatua angeic hnene la uati hmitrötr i Nyidrë, nge (3) hna thuecatre i angeic hnene la Trengewekë i Nyidrë. w22.11 2 par. 1-2

Tha hnei Iehova kö hna hamën la mele ka pë pun kowe la itre öni me itre feja. Ngo kowe la atr hmekuje hi. Hnei Iehova fe hna amë e kuhu hni ne la atr la aja troa mel epine palua. Öni Tusi Hmitrötr, hnei Akötresie hna amë “e kuhu hni ne la atr la mekune kowe la itre drai ka epine palua.” (Ate cai. 3:11, NWT ) Celë hi matre ithupëjia me easë la mec. (1 Kor. 15:26) Hapeu la easa wezipo, easë kö a lapa treqene la mec? Waea. Tro së lai a canga wai droketre me thele drösinöe. Eje hi, easa isine troa thele nyin la meci së, ke easa pi mel. Nge tru la akötre së la kola mecitriji së hnene la ketre sinee së hne së hna hnim, nekönatre ju hë maine qatr. (Ioane 11:32, 33) Hapeu, tro kö la Atre Xupi së a amë e kuhu hni së la aja troa mel epine palua, nge tha ijiji së pe? w22.12 3 par. 5; 4 par. 7

Ame ngöne la itre ijine jol, alanyim la itre ka ce hmi me easë ka wezipo, maine ka xou, maine ka umë. Tha tro kö sa thëthëhmine la itre trejin. Ame la kola traqa la ketre meci ka ixötrekeu, easa cil ananyine la itre xan, ngo memine fe la itre trejine me easë. Ame ngöne la ijine cili, ceitu easë me Ioane aposetolo. Aja i angeic troa iöhnyi me Gaio, sinee i angeic. (3 Ioane 13, 14) Atre hi Ioane ka hape, tha ijije palakö tro angeic a ithanata iqëmekë me Gaio. Ngo hnei angeic hna kuca la hnei angeic hna atrein, ene la troa cinyanyi koi Gaio. Haawe, e tha ijije palakö tro sa iöhny memine la itre trejin, isine jë troa hë angatr.E tro palahi sa hnyingë pengön la itre trejin, tha tro kö sa seseu menu, nge tro ha tingetinge la hni së. Ngo e ka hape, tru palaha la hnei epuni hna seseu, sipo ixatua jë thene la itre qatre thup, nge kapa ju la itre ithuecatre i angatr.—Is. 32:1, 2. w22.12 17-18 par. 6-7

Ame lo xötrei, hna ceinëne la lue ca i angeic, nge goi ceinëne fe la nyinawa i angeic. (Sal. 105:17, 18) Ngazo catre hë la mele i Iosefa! Ame ekö, ketre hlu hna mejiune kow hnei maseta, ngo ame enehila, angeice hë ngöne la kalabus. Hna hane fe kö traqa koi epun la ewekë celë: Epun palahi a thith, ngo kolo jë pe ka hape, catrehnine jë la jol ka traqa koi epun. Pine laka, easa mel ngöne la fene i Satana, tro palahi a traqa koi së la itre jol. Nge tha Iehova kö a apatren itre ej. (1 Ioane 5:19) Ngo the luelue kö laka, öhne hi Iehova la jol hnei epuni hna melën, nge Nyidrëti a meku epun. (Mat. 10:29-31; 1 Pet. 5:6, 7) Ketre öni Nyidrë: “Tha tro jë kö ni a triji eö, nge tha tro jë kö ni a nuaxöji eö.” (Heb. 13:5) Tro kö Iehova a xatua epun, ngacama ame koi epun, pëhë nyin la jole i epun. w23.01 16 par. 7-8

Tusi Hmitrötr a a qaja ka hape, tha tro kö Iehova a nuetriji së, e hne së hna kuca la ketre ewekë ka ngazo. Hna anyimua akötrë Iehova hnene la angetre Isaraela, ngo ame la angatr a nyipi ietra, ke hnei Nyidrëti hna nue la itre ngazo i angatr. Hnene fe la itre pane Keresiano hna öhne la ihnimi Iehova. Jëne la uati hmitrötr, hnei Paulo aposetolo hna qaja kowe la itre trejin troa “nue hnyawane” la ngazo me akeukawane la nekötrahmany ka ietrane la ngazo i angeic. (2 Kor. 2:6, 7; 1 Kor. 5:1-5) Ketre ewekë lai nyine haine laka, tha Iehova kö a nuetrij la itre hlue i Nyidrë la angatr a tria! Nyidrëti pe a xatua angatr, me haji angatr me aijijë angatre hmaca troa nyisinee i Nyidrë. Celë fe hi la aqane ujë i Nyidrëti kowe la itre ka ietra enehila. (Iako. 4:8-10) Tusi Hmitrötr a amamane la inamacan, la meköt me ihnimi Nyidrë. Ej a amamane laka aja i Iehova tro sa atre Nyidrë me nyisinee i Nyidrë. w23.02 7 par. 16-17

Easa pi atre la aqane trongene la fene enehila, ke ej a eatrëne la itre hna perofetane hnei Tusi Hmitrötr. Hnei Iesu hna e wengën la itre ewekë ka troa traqa matre xatua së troa atre la ijine kola troa nyipune la fene i Satana. (Mat. 24:3-14) Hnei Peteru aposetolo mina fe hna ithuecatr koi së troa goeën hnyawane la aqane eatr la itre hna perofetan, matre tro palahi a acatrene la lapaune së. (2 Pet. 1:19-21) Aja i nyidrë tro sa atreine waiewekë hnyawa ngöne la easa inine la itre perofetane hnei Tusi Hmitrötr. Öni nyidrë, “the thëthëhmine kö la ijine hna hape, celë hë la drai Iehova.” (2 Pet. 3:11-13) Pine nemen? Pine laka aja i easë troa huliwane hnyawane la traeme së troa ‘melëne la thiina ka meköt, me kuca la itre huliwa ka nyipici koi Akötresie.’ Ngo tha hnene kö laka, easa ajan troa atre la “drai me hawa” ne traqa la isi Amagedro. (Mat. 24:36; Luka 12:40) Aja i easë troa kuca la meköt, me huliwa i Iehova qa kuhu hni së. Celë hi matre nyipiewekë tro sa hmek, matre thupëne la mele së. w23.02 16 par. 4, 6

Hetre nyine tro la ‘itre xa mamoe’ a kuca enehila matre mele ngöne la paradraiso. Loi e tro sa amamane la hni ne ole së koi Iesu. Ame la ketre aqane tro sa amamane la ihnimi së koi nyidrë, ke ene la troa xatuane la itre trejin hna iën. Celë hi ka troa amamane koi Iesu ka hape, ketre mamoe hi së. (Mat. 25:31-40) Easa xatua angatr ngöne la easa catre cainöj me inine la itre atr. (Mat. 28:18-20) Tha tro kö sa treqene troa lö ngöne la paradraiso matre troa saze la itre thiina së. Ngo enehila hi la tro sa nyipici ngöne la aqane ujë me aqane ithanata, me tuluth la itre hne së hna majemine kuca. Ketre loi e tro sa nyipici koi Iehova, me kowe la föi easë, me kowe la itre trejin ne la ekalesia. Maine tro sa isine troa trongëne la itre trepene meköti Iehova enehila ngöne la fene ka ngazo, ke tro ha hmaloi elanyi ngöne la paradraiso. Loi e tro fe sa huliwan la itre thiina ka loi me itre hne së hna atrein, matre hnëkë së troa mel ngöne la paradraiso. w22.12 11-12 par. 14-16

Easa madrin tro Iesu a Joxu së, ke pëkö Atre Mus ka tui nyidrë. Iehova kö la ka ini nyidrë me acili nyidrë troa joxu. (Is. 50:4, 5) Hnei Iesu hna amaman la ihnimi nyidrëti koi së, ngöne lo nyidrëti a huujëne la mele i nyidrë. (Ioane 13:1) Meköt tro epuni a hnimi nyidrë, ke nyidrëti la Joxu i epun. Öni nyidrë, ame la itre ka hnimi nyidrë, ene lo itre sipu sinee i nyidrë ke, kolo itre ka trongëne la itre hnei nyidrëti hna amekötin. (Ioane 14:15; 15:14, 15) Ketre manathith ka tru la troa nyisineene la nekö i Iehova! Atre hi epun laka, ka ipië Iesu, nge nyidrëti hnyawa hi la hnaiji Keme i nyidrë. Ketre, hnei nyidrëti hna ithuan la ka alanyim, me ithuecatr kowe la itre ka kucakuca, me aloine la itre ka wezipo. (Mat. 14:14-21) Nge mama hi koi epun laka, nyidrëti la ka xomiujine la itre ekalesia enehila. (Mat. 23:10) Nge tro nyidrëti fe a kuca la itre ewekë ka tru elany fene la Baselaia i Akötresie. Tro epuni a amamane tune kaa la ihnimi epun koi nyidrë? Loi e tro epuni a xötrethenge la tulu i nyidrë. Matre ame la epuni a nue mel koi Iehova me xomi bapataiso, ke epuni hi lai a nyiqane xötrethenge nyidrë. w23.03 4 par. 8, 10

Hnei Iehova hna atiqane la hnengödrai me fene hnengödrai hnene la itre ewekë nyine hain, nge nyine tro fe sa xomi ini qa ngön. (Sal. 104:24, 25) Mekune jë fe la aqane xupi së hnei Nyidrë. Pi tro catre sa goeëne la emingömingöne la itre hna xup. Ketre, hnei Nyidrëti hna xupi së matre mele madrin memine la atreine troa goeëne la itre hna xup, me dreng, me ketr, me tupath, me punepun. Tusi Hmitrötr fe a amamane la ketre kepin, matre nyipiewekë tro sa goeëne la itre hna xup. Itre ej a amamane la itre thiina i Akötresie. (Rom. 1:20) Pane mekune jë la emingömingöne la itre ewekë ka lapa xötreithi së. Hapeu, tha itre ej kö lai a amamane la inamacane i Akötresie? Nge pane mekune jë la nöjei pengöne xen e celë fen. Ketre hatrene ihnimi Nyidrëti hi lai kowe la itre atr! Ame la easa öhne la itre thiina i Iehova ka mama ngöne la itre hna xup, ke easa atrepengöi Nyidrëti hnyawa me easenyi koi Nyidrë. w23.03 16 par. 4-5

Kola trongazo la fen matre jole catr troa mejiune kowe la Tusi Hmitrötr. Tro la itre atr a iaö së ka hape, tha ka nyipici kö la Tusi Hmitrötr, nge tha hna iëne kö la hlue ka nyipici me ka inamacan troa xomiujine la organizasio i Iehova enehila. Maine ka xecie koi së laka, ka nyipici la Trengewekë i Iehova, ke tha tro kö sa nue la itre ewekë cili troa thë la lapaune së. E cili, tro hë sa catre xötrethenge ‘la itre wathebo i Iehova uti hë la pun.’ (Sal. 119:112) Tha tro kö sa “hmahma” troa qaja la itre trenge nyipici kowe la itre atr, me xatua angatr troa xötrethenge itre ej. (Sal. 119:46) Tro hë së lai a atreine “itreqe, me madrin” qëmekene la itre jol ka tru, tune la iaxösisi. (Kol. 1:11; Sal. 119:143, 157) Eje hi, tro la nyipici a hamë së la tingeting me mejiun, me ini së la aqane troa mel. Eje fe a acatrene la mejiune së troa mel fene la Baselaia i Akötresie. w23.01 7 par. 16-17

Ame lo jidr tixenuë i Iesu e celë fen, hnei nyidrë hna thithi san la itretre dreng. Hnei nyidrëti hna sipo Iehova troa “thupë angatr pine la atre ka ngazo.” (Ioane 17:15) Hnime catre Iesu la itretre dreng! Easenyi hë troa humuthi nyidrë, ngo nyidrëti a hnehengazone la itre aposetolo. Tui Iesu, tha easë hmekuje kö a thith kowe la itre sipu aja së. Ngo tro fe sa thithi san la itre trejin. Easë hi lai a trongëne la hna amekötin hnei Iesu troa ihnimikeu, me amamane koi Iehova laka, easa hnim la itre trejin. Tha easë kö a aluzi traem la easa thithi sai angatr. Önine la Tusi Hmitrötr, “ka hetre thangane catre la thithi ne la atre ka meköt.” (Iako. 5:16) Ame la itre xaa trejin, ke angatr a cil kowe la nöjei pengöne itupath. w22.07 23-24 par. 13-15