Julai

Ame la troa ithanata ke, ketre ahnahna lai qaathei Akötresie. Ngo, hnene la itre xan ekö hna huliwane menune la ahnahna qaathei Iehova. Hnei Satana hna thoi koi Eva, matre ngazo hë la itre atr enehila. (Gen. 3:1-4) Nge hnei Adramu hna qaja ka hape, zöi Eva me Iehova la angeic a tria. (Gen. 3:12) Ketre, hnei Kaina hna thoi koi Iehova ngöne lo angeic a humuthi Abela. (Gen. 4:9) Ame enehila ngöne la itre film, kola iqaqa me ijelë; nge ceitune hi ngöne la hna ini me ngöne la hna huliwa. Maine tha hmeke kö së, tro hë sa majemine drenge me qaja la itre trengewekë ka ngazo. Eje hi, itre Keresiano së matre easa ajane troa amadrinë Iehova. Ngo tha tro hi sa thipetrije la itre trengewekë ka sis. Loi e tro fe sa atrunyi Akötresie hnene la itre hne së hna qaja. w22.04 4 par. 1-3

Atreine fe Iesu tulu ewekë göi mani me mo. Ajane catre nyidrë troa xeni me ij. (Luka 19:2, 6, 7) Ame lo ketre ijin, hnei nyidrë hna saze la tim koi nyipi waina. (Ioane 2:10, 11) Ame ngöne lo nyidrëti a mec, hna heetrë nyidrë hnei itre iheetr ka tru thupen. (Ioane 19:23, 24) Ame pe, tha hnei Iesu kö hna nue la itre mo ne fen, troa tro pa ngöne la mele i nyidrë. Hnei Iesu hna ini së troa amë panëne la Baselaia ngöne la mele së, nge tro pë hë Iehova a hamë së la ka ijije göne la mel. (Mat. 6:31-33) Nyimu eloine la troa trongëne la itre eamo i Tusi Hmitrötr göi mani. Ame hi lai ketre ke, Daniel, ketre trejine ka tha faipoipo kö. Öni angeic: “Ame lo eni a nekötrahmany, hnenge hna iëne troa huliwa koi Iehova. Nge tro la huliwa cili a tro pa ngöne la meleng.” Jëne la hnei Daniel hna ahmaloeëne la mele i angeic, hnei angeic hna nue la traem me atreine i angeic troa huliwa i Iehova. Öni Daniel: “Goi thatreine fe la mani troa weje la etrune la itre manathith hnenge hna kapa qaathei Iehova.” w22.05 21-22 par. 6-7

Easa amaman laka, easa wangatrun la nyipici ngöne la easa e lapane la Tusi Hmitrötr memine la itre itusi së. Ngacama ka hekö hë së ngöne la nyipici, ngo hetre nyine tro palakö sa inin. Tha ka hmaloi kö tro sa thel ajuine la Tusi Hmitrötr, ngo emele së hi lai. Ame itre xan, ke tha ka pi e tusi kö me ithel. Ngo Iehova a ajan tro palahi sa “thel” troa trotrohnine hnyawane la nyipici qa hnine la Tusi Hmitrötr. (Ite edomë 2:4-6) Maine tro sa catre ithel, tro hë së lai a kepe thangan qa ngön. Ame la Corey a e Tusi Hmitrötr, ke angeic a pane ithel ngöne hi la ca xötr. Öni angeic: “Eni a e la itre ithuemacany ka mama e kuhu fen, me xome la itre xötr ka mama ngöne la itre neköi mataitus me ithele ngöne la itre xaa itus. . . . Tru catre la thangane koi ni la aqane ini Tusi celë!” Nyipiewekë tro sa ini Tusi cas. Ame la easa xomi ijine troa ini Tusi cas, easë hi lai a amamane laka, easa wangatrun la nyipici.—Sal. 1:1-3. w22.08 17 par. 13; 18 par. 15-16

Ame lo Iesu e celë fen, hnei nyidrëti hna xatuane la itretre drei nyidrë troa atre Iehova, jëne la itre hna xup. Tro sa ce wange la ketre ini hnei nyidrëti hna hamën jëne itre ej. Iehova a hnime la nöjei atr. Ame ngöne lo Cainöje i Iesu Hune La Wetr, hnei nyidrëti hna qaja la lue ewekë hna xupe hnei Iehova, ngo tha hna nyipiewekëne kö hnene la itre atr, ene la jö me mani. Ka nyipiewekë lue ej kowe la mele së. Maine ju hi, tha tro kö Iehova a hamëne la lue ewekë cili kowe la itre atr ka ngazo. Ngo hnene la ihnimi Nyidrë, matre angatr a hane kepe thangan. (Mat. 5:43-45) Nemene la ini hnei Iesu hna kapa? Aja i Iehova tro sa hnime la nöjei atr. Ame la easa goeëne la emingömingöne la hnengödrai ngöne la kola lö la jö, maine kola menyike la drai thupene la hna mani, ke mekune jë së la ihnimi Iehova kowe la nöjei atr. Nge celë hi ka uku së troa cainöj kowe la nöjei atr. w23.03 17 par. 9-10

Kola goeë drei hnei Ioane aposetolo? La ketre föe ka tith la öni ka ses ka madra palulu. Hna hë angeic ka hape, “Babulona Atraqatr,” me “föe ne gojeny ka hlemu catr.” Nge angeic a “kuci ngazo memine la itre joxu ne fen.” (Hna ama. 17:1-5) Drei lae “Babulona Atraqatr”? Ame la föe cili, tha eje kö a nyihatrene la itre mus, ke, tusi Hna Amaman a qaja ka hape, ej a kuci ngazo memine la itre joxu ne fen. (Hna ama. 18:9) Ame la ej a tith la öni ka ses, ke kolo hi lai a hape, ej a thel troa musinë angeic. Ketre, tha ej kö a nyihatrene la huliwa ne salem ne la fene i Satana, ke ase hë nyihatrene hnene la “itre ka salem e cailo fen.” (Hna ama. 18:11, 15, 16) Ame ekö, hna fetra qa Babulona la nöjei hmi ka thoi. Matre, Babulona Atraqatr a nyihatrene la nöjei hmi ka thoi.—Hna ama. 17:5, 18. w22.05 11 par. 14-16

Itre thin a hnehengazo ka hape, tro kö la nekö i angatr a nyihlue i Iehova. Eje hi, atre hi la itre kem me thin laka, tru catre la itre jol ka traqa kowe la itre nekönatr ngöne la fene i Satana. Ketre, ame la itre xaa thin ke, angatr a hetrune caasine la itre nekö i angatr ngöne la nyipici pine laka, tha ka faipoipo kö angatr, maine pena tha ka hmi kö la föi angatr. Ketre jole ka tru kowe la itre kem maine thine ka hetrune caasine la itre nekönatr. Ngo jole fe kowe la kem me thine Keresiano troa inin me xatuane la itre nekönatr troa hnimi Iehova. The hnehengazo kö. Tro kö Iehova a xatua epun. Loi e tro epuni a hnyingëne la itre xaa kem me thin la aqane kuca angatr, matre huliwane la itre jiane huliwa cili ngöne la Hmi Ne La Fami. (Ite edomë 11:14) Ketre, ijije hi tro Iehova a xatua epun troa atreine ithanata memine la itre nekö i epun. Haawe, sipo Nyidrëti jë la nyine troa kuca, matre tro la itre nekö i epuni a fe la itre mekun me aliene hni nyudren.—Ite edomë 20:5. w22.04 17 par. 4, 7; 18 par. 9

Iesu la hnaiji Akötresie, matre e aja së troa akökötrene la ihnimi së koi Iehova loi e tro sa atrepengöi Iesu hnyawa. (Heb. 1:3) Ame la ketre aqane troa atrepengöi Iesu, ke ene la troa e me lapa mekun la foa lao Evangelia. Maine tha majemine kö eö e Tusi Hmitrötr e nöjei drai, ke nyiqane jë enehila. Ame la eö a e la itre hna melëne hnei Iesu, thele jë la itre thiina i nyidrë. Nyidrëti la ketre atr ka ihnim me wangatrune la itre xan. Ame lo ketre ijine, hnei nyidrë hna xome la itre nekönatr me haluthi nyudren. (Mar. 10:13-16) Ketre tha xouene kö la itretre dreng troa fe la aliene hni angatr. (Mat. 16:22) Maine Iesu hi a nyitipune la Kem i nyidrë, haawe, ketre ka hmaloi hi troa easenyi Iehova. Ijije hi tro sa easenyi Nyidrë jëne la thith. Ame la easa thith, loi e tro sa fe la hni së, ke tha Nyidrëti kö a ameköti së. Nyidrëti pe a meku së me hnimi së.—1 Pet. 5:7. w22.08 3 par. 4-5

Atrepengö së hnyawa hi hnei Iehova, ke, Nyidrëti la ka xupi së. Atre hnyawa hi Nyidrë la itre atr ka mel e celë fen. (Sal. 139:15-17) Nge atre fe hi Nyidrë laka, hne së hna kapa la ngazo qaathene la pane keme me thine së. Ketre, atre hnyawa hi Nyidrë la nyipi pengö së qa ngöne la itre hne së hna melën. Pine laka, atre hnyawa hi Iehova la pengö së, nemene la hnei Nyidrëti hna kuca? Nyidrëti a utipi së. (Sal. 78:39; 103:13, 14) Hnei Iehova hna amamane ka hape, aja i Nyidrë troa nue la itre ngazo së. Trotrohnine hi Nyidrë laka, hnene la hna tha idrei hnene la pane atr, Adramu, matre ngazo me mec la pun koi easë asë. (Rom. 5:12) Nge pëkö ala cas ka atreine thepe së qa ngöne la ngazo me mec. (Sal. 49:7-9) Ngo, hnene la Akötresie së ka tru ihnimin hna utipi së me thepe së qa ngöne la hnëjine cili. Kola qaja ngöne Ioane 3:16 ka hape, hnei Iehova hna up la nekö hnimina i Nyidrë ka cas troa meci pi easë.—Mat. 20:28; Rom. 5:19. w22.06 3 par. 5-6

Ame la ka nue la ngazo ne la itre xan, ke tro fe a nue la itre ngazo i angeic, tre celë fe hi hnei Iehova hna amaman ekö koi Iobu. Ngacama hna akötrë Iobu hnene la hna qaja hnei Elifaza, Biledad, me Zofar, ngo hnei Iehova hna upi angeic troa thithi sai angatr. Nge thupene la hnei Iobu hna thith, hnei Iehova hna amanathithi angeic. (Iobu 42:8-10) Ka ngazo catr troa lapa fë trenge hni. Ceitune hi la easa lapa fë trenge hni memine la easa thu la ketre ehnef. Iehova a ajane tha tro kö sa lapa fë trenge hni, ke nyine loi lai koi së. (Efe. 4:31, 32) Nyidrëti a upi së troa nuetrij la ‘elëhni me iwesitrë.’ (Sal. 37:8) Ka inamacan la atr ka ujë tune lai. Ame la troa lapa fë trenge hni, ke ka hetre thangan ka ngazo kowe la ngönetrei me mekuna së. (Ite edomë 14:30) Ame la easa lapa fë trenge hni kowe la ketre atr, kösë easë lai a iji poizin, ka pëkö thangane lai koi angeic. Ngo easë kö la ka troa xeni pun. Matre ame la easa nue la ngazo i itre xan, tro kö sa sipu kepe eloin. Tro ha tingeting la hni me mekuna së, nge tro sa catre nyihlue i Iehova. w22.06 10 par. 9-10

Ceitune hi la mejiune së memine la itrapetr, ke ej a thupëne la itre mekuna së, me sewe së troa kuca la itre huliwa ka ngazo ka troa ananyi së me Iehova. (1 Kor. 15:33, 34) Tro la itrapetr, ene la mejiune së a thupë së qa ngöne la itre mekun ka thoi tune la kola hape, tha nyipiewekë kö troa amadrinë Iehova. Celë hi hna qaja hnene la ketre sinee i Iobu ka iaö, ene Elifaza. Öni angeic: “Ka ue la ate mate wië nyën?” Ketre öni angeic göi Akötresie: “Hana wang, tha qale kö anganyidë kowe la ite ka hmitöte i nyidë, nge tha wië kö la hnengödrai xajawa i nyidë.” (Iobu 15:14, 15) Itre trengathoi lai! The thëthëhmine kö laka, aja i Satana hi lai tro sa mekune tun. Atre hi angeic laka, e tro epuni a mekun tun, ke tro ha patre la mejiune i epun. Haawe, thipetrije pi la itre trengathoi cili. The luelue kö laka, aja i Iehova tro epuni a kapa la mele ka pë pun, nge tro kö Nyidrëti a xatua epun.—1 Tim. 2:3, 4. w22.10 25-26 par. 8-10

Satana a ajane tro Iobu a mekune ka hape, ame la kola traqa la itre jole koi angeic ke hnene laka, tha Iehova hmaca kö a hnimi angeic. Hnei Satana hna ufe la uma Iobu matre kei tran la 10 lao nekö i angeic. (Iobu 1:18, 19) Hnei angeice fe hna axulune la eë qa hnengödrai me dreuthe la itre mamoe me itre hlue i Iobu. (Iobu 1:16) Pine laka, ka ketre pengöne la aqane xulu la enyi me eë, Iobu a mekune ka hape, Iehova la ka axulune lai. Ame pe, tha hnei Iobu kö hna qajangazo Iehova. Atre hnyawa hi angeic laka, ame la trenamo pi angeic, ke hnei Iehova. Nge atre Iobu ka hape, hetre ijine loi me ijine ngazo. Nge ngacama jole ju hë, ngo loi pe tro angeic a kapa. Öni Iobu: “Loi e tro palahi a qaja aloine la ëje i Iehova.”—Iobu 1:20, 21. w22.06 21 par. 7

Celë hi lai hnei Iesu hna qaja e thupen kowe la itretre drei i nyidrë, ngöne Ioane 17:14. Haawe, hna eatre hnyawa la hna perofetane ngöne Genese 3:15 ngöne lo itre drai ne la pun. Tune kaa? Thupene lo kola acili Iesu troa joxu lo 1914, hna ukapië Satana a tro celë fen. Nge angeic a kanothe la fen me treqene troa apatrenyi angeic. (Hna ama. 12:9, 12) Ame pe, angeic a elëhni, me axösisine la itre hlue i Iehova. (Hna ama. 12:13, 17) Celë hi lai matre, kolo fe a elëhni koi së hnene la fene i angeic. Ngo tha xou Satana kö së me itre sinexöle i angeic. Nge casi hi la mekuna së me Paulo, lo öni angeic: “Maine ce Akötresie me easë, drei la sa i easë?” (Rom. 8:31) Tha luelue kö së laka, tro kö Iehova a xatua së. w22.07 18 par. 14-15

Xecie koi Iesu laka, tro kö a alanyim la itre ka cainöj ngöne la itre drai ne la pun. Ketre, atre hi nyidrë laka, tro kö a eatr la hna perofetane celë, hna hape: “Tro la nöje i cilie a hujë angate xane kö ngöne la drai ne mene i nyipë.” (Sal. 110:3) Matre ame la epuni a cainöjëne la maca ka loi, epuni hi lai a xatua Iesu memine la hlue ka nyipici me ka inamacan. Ketre, epuni fe hi lai a eatrëne la hna perofetane celë. Haawe, kolo kö a tro loi la huliwa ne cainöj, ngo hetre itre jol hne së hna troa cile kow. Ame la ketre jol hne së hna ixelë memin ke, ene la icilekeu. Itre ka iamenumenu me itre hene ne hmi, me itre mus a sili trengathoi së, matre itre fami së, me itre sinee së, me itre sine huliwa së a sewe së troa nyihlue i Iehova me catre cainöj. Ame ngöne la itre xaa nöj, itre ithupëjia a axouene me qanangazone la itre trejin me easë, me othi angatr me akalabusi angatr. w22.07 8 par. 1; 9 par. 5-6

Aja i Iehova tro sa xomi ijin troa inine la Tusi Hmitrötr me lapa mekun ej. Ame la easa trongëne la itre hne së hna inin, kola acatrene la lapaune së me easenyi së kowe la Keme së e hnengödrai. Celë hi lai ka troa xatua së troa xomihnin la itre itupath. Iehova fe a hamëne la uati hmitrötr kowe la itre ka trongëne la Trengewekë i Nyidrë. E cili, uati hmitrötr a hamë së “la men atraqatr” matre xomihnine la nöjei pengöne itupath. (2 Kor. 4:7-10) Hnei Iehova hna nyijëne “la hlue ka nyipici me ka inamacan” troa hnëkëne la itre itus, me itre video, me itre miuzik, ka acatren la lapaune së me xatua së troa hmek. (Mat. 24:45) Hnei Iehova hna inine la nöje i Nyidrë troa ihnimikeu me itö ixatua ngöne la itre ijine akötr. (2 Kor. 1:3, 4; 1 Thes. 4:9) Itre trejin a xatua së troa mele nyipici ngöne la easa cile kowe la itre jol. w22.08 12 par. 12-14

Loi e tro sa qaja atrun la itre thiina ka lolo ne la itre trejin. Easë hi lai a thue aja koi angatr troa ce mel, nge celë hi ka troa xupe draiëne la ekalesia ngöne la ihnim. Troa traqa e xaa ijin laka, itre keresiano ka macaj a tha itrotrohni me iwesitrë. Celë hi ka traqa koi Paulo me Banaba. Aja i ketre tro Mareko a ce tro me nyidro troa cainöj ngöne la ketre götran, ngo xele kö ketre. Hnei nyidro “hna icatrë” me isa ijei. (Itre hu. 15:37-39) Ngo hnei Paulo, me Banaba me Mareko hna elë hun la jole cili. Nge e thupen, hnei Paulo hna qaja aloine Banaba me Mareko. (1 Kor. 9:6; Kol. 4:10) Loi e tro fe sa canga iloi memine la itre trejin ne la ekalesia, me thele palahi la ka loi thei angatr. Aqane tro hi së lai a acatrene la tingetinge me cas ne la ekalesia. w22.08 23 par. 10-11

Maine easa ajane troa trongëne la itre trepene meköti Iehova, ke loi e tro sa hmekën matre tha tro kö sa ameköti itre xan. The thëthëhmine kö së laka, Iehova hmekuje hi “la Atre Iameköti e cailo fen.” (Gen. 18:25) Tha hnei Iehova kö hna nue së troa ameköti itre xan. Tro hmaca së a wange la tulu i Iosefa, ketre atr ka meköt. Xele angeic troa ameköti itre xan, uti fe hë lo itre ka qanangazo angeic. Hnene lo itre sipu trejin me angeic hna akötrë angeic, me salemë angeic, me thoi kowe la keme i angatr ka hape, meci hë angeic. Itre macatre thupen, hnei Iosefa hna iöhnyi hmaca memine la fami angeic. Ame ngöne la ijine cili, angeic la hen ka tru ne la nöj. Maine ju, tro hi angeic a amekötin me thel troa të la ngazo hna kuca hnene la itre trejin me angeic. Nge celë hi hnei angatr hna xouen, ngacama ase hë angatr nyipi ietrane la itre ngazo i angatr. Ngo hnei Iosefa hna akeukawanyi angatr me hape: “The xou kö, Akötresieti ni matre troa ameköti epun?” (Gen. 37:18-20, 27, 28, 31-35; 50:15-21) Hnei Iosefa hna nue Iehova troa amekötine la ewekë ka traqa. w22.08 30 par. 18-19

Ijije hi tro Iehova a sa la thith ne la ketre trejin jëne easë. Maine ketre qatre thup ju hë së, maine atre ixatua, maine pionie, maine ketre trejine hi, ngo tro Iehova lai a upi easë troa hamë ixatua. Ijiji epun troa ixatua, ngacama ka jeune epun, maine qatr, maine epun la ketre trejin föe maine trahmany. Ame la ketre hlue i Iehova a sipo ixatua koi Nyidrë, ke Nyidrëti a upe la itre qatre thup maine ketre trejin troa “akeukawanyi” angeic. (Kol. 4:11) Ketre madrine ka tru la troa nyihlue i Iehova me xatuane la itre trejin tune lai! Ijije hi tro sa xatuane la itre trejin ngöne la kola traqa la itre mec ka ixötrekeu, maine itre hulö, memine la iaxösisi. Ketre, easa pi xatua itre xan, ngo hetre ka wezipo fe ngöne la hnalapa së. Iehova a madrin la Nyidrëti a öhne laka, easa kuca la hne së hna atrein matre troa xatuane la itre trejin.—Ite edomë 19:17. w22.12 22 par. 1-2

Ka nyipiewekë la ihnim matre tro la itre xan a mejiune koi së. Öni Iesu, ame la lue wathebo ka tru ke, ene la troa hnimi Iehova me hnim la atr lapa easenyi së. (Mat. 22:37-39) Hnei Iehova hna amamane laka, ijije hi tro sa mejiune koi Nyidrë. Nge ihnimi së koi Nyidrë la ka upi së troa nyitipu Nyidrë. Ihnimi easë fe kowe la itre trejin la ka sewe së troa qaja menune la mele i angatr, ke xele së troa akötrë angatr maine ahmahmanyi angatre pena. Ka nyipiewekë fe la ipië matre tro la itre xan a mejiune koi së. Ame la trejin ka ipië, ke tha angeice kö a canga qaja la itre ithuemacanyi matre pi mama. (Fil. 2:3) Tha angeice kö a susu fë ka hape, hetre hnei angeic hna atre, ngo tha ijiji angeice kö troa qaja. Ketre, tro la ipië a sewe së troa qaja menune la ketre ini qa hnine la Tusi Hmitrötr, nge tha hna qaja pe hnene la itre itusi së. w22.09 12 par. 12-13

Önine la angela koi Daniela ka hape, tro la itre hlue i Iehova a trotrohnine hnyawa la itre hna perofetan ngöne la tusi Daniela. Ngo “pëkö ate ka ngazo troa trotrohnin.” (Dan. 12:10) Enehila hi la ijin tro sa amaman ka hape, tha ce easë kö memine la itre atr ka ngazo. (Mal. 3:16-18) Iehova a acasine la itre atr ka mele nyipici matre ewekë i Nyidrëti pë hë angatr, kolo itre atr hnei Nyidrëti hna hnim catrën. Nge aja së hi lai troa ce memine la itre hnei Nyidrëti hna hnim. Easë hnyawa hi a melën la hneijin ka ketrepengön. Ngo hetre ewekë palakö hne së hna treqen. Easenyi hë matre goeëne jë së la kola apatrene la ngazo e celë fen. Nge tro fe sa öhne la kola eatr lo hnei Iehova hna qaja koi Daniela ka hape: “Tro eö a mejë ngöne la itre drai ne la pun troa kapa la edrö i eö.” (Dan. 12:13, NWT ) Epuni kö a lapa treqene la ijine tro Daniela me itre sinee i epun a ‘mejë’ hmaca? Nga isine jë troa mele nyipici utihë la pun. Ame hë e cili, tro ha sija paluan la ëje i epun ngöne la tusi ne mel. w22.09 24 par. 17; 25 par. 19-20

Hnene la itre trengewekë celë hna ithuecatre koi Ezekiela. Pine nemen? Pine laka itre trengewekë hi lai hnei Iehova hna qaja ekö koi Mose me Isaia, lo Nyidrë a upi nyidro troa perofeta i Nyidrë. (Eso. 3:10; Is. 6:8) Ketre, atre hi Ezekiela la aqane xatua nyidro hnei Iehova ngöne la nyidroti a qëmeke kowe la itre jol. Celë hi kepin matre, ame la Iehova a alua qaja koi Ezekiela ka hape: “Ini a upi ’ö,” ke xecie hnyawa koi angeic laka, tro kö Iehova a xatua angeic. Nge anyimua mama ngöne la tusi Ezekiela, la itre trengewekë celë: “Ame hna traqa koi ni la [trengewekë] i Iehova.” (Ezek. 3:16) Kolo fe a mama la itre trengewekë celë: “Traqa ha koi ni la [trengewekë] i Iehova.” (Ezek. 6:1) Matre xecie koi Ezekiela laka, Iehova la ka upi angeic. Pine laka, atre huuj la keme i angeic, matre atre hi angeic laka, hnei Iehova palahi hna xatuane la itre perofeta i Nyidrë. Nge hnei Iehova hna qaja mina fe koi Isaaka, Iakobo, me Ieremia, ka hape: “Ce eni me eö.”—Gen. 26:24; 28:15; Iere. 1:8. w22.11 2 par. 3

Ngacama hnei Adramu me Eva hna tha idrei, me hamë mec kowe la itre matra i nyidro, ngo tha saze kö lo aja i Iehova ekö. (Is. 55:11) Aja i Nyidrëti palahi tro la itre ka lapaun koi Nyidrë a kapa la mele ka pë pun. Loi e troa wange la itre ewekë hnei Nyidrëti hna qaja me kuca matre eatr la aja i Nyidrë. Hnei Iehova hna thingehnaeane laka, tro Nyidrëti a amelene hmaca la itre ka mec, me hamë angatr la mel ka pë pun. (Itre hu. 24:15; Tito 1:1, 2) Xecie koi Iobu laka, tru la aja i Iehova troa amelene hmaca la itre ka mec. (Iobu 14:14, 15) Atre hi Daniela perofeta laka, troa amelene hmaca la itre atr me hamë angatr la mele ka pë pun. (Sal. 37:29; Dan. 12:2, 13) Ketre, atre fe hi la angetre Iudra ngöne la hneijine i Iesu laka, tro Iehova a hamëne kowe la itre hlue i Nyidrë la “mele ka pë pun.” (Luka 10:25; 18:18) Anyimua qaja Iesu la hna thingehnaean celë, nge hna amele nyidrëti fe hnene la Keme i nyidrë.—Mat. 19:29; 22:31, 32; Luka 18:30; Ioane 11:25. w22.12 4-5 par. 8-9

Iehova a ajane tro sa easenyi koi Nyidrë. (Iako. 4:8) Aja i Nyidrë troa Akötresi së, me Keme së, me Sinee së. Nyidrëti a sa la itre thithi së me xatua së ngöne la itre ijine jol. Jëne la organizasio i Nyidrë, Iehova a ini së me thupë së. Easa easenyi Iehova ngöne la easa thith, me e la Tusi Hmitrötr, me lapa mekune ej. E cili, tro ha kökötre la ihnimi së koi Nyidrë memine la hni ne ole së. Nge tro fe lai a upi së troa drengethenge me atrunyi Nyidrë. (Hna ama. 4:11) Maine tro sa inine troa atre Nyidrëti hnyawa, tro hë sa mejiune koi Nyidrë me kowe la organizasio hnei Nyidrëti hna acile matre xatua së. Diabolo a thelejëne troa thë la mejiune së koi Iehova me kowe la organizasio i Nyidrë. Ngo, ijiji së hi troa cile koi angeic. Loi e troa catre la lapaune së me mejiune së koi Iehova, matre tha tro kö sa nuetriji Nyidrë memine la organizasio i Nyidrë.—Sal. 31:13, 14. w22.11 14 par. 1-3

Alanyimu la itre keresiano hna oth, me hna humuth ke, angatr a hnimi Iehova me drengethenge Nyidrë, Atre Mus Ka Sisitria. Hnene la itre trahmanyi me föe cili hna nyitipune lo köni nekötrahmanyi ne Heberu ka mele nyipici kowe la Kasisitria lo kola kuië angatr ngöne la hu eë. Hnei Dravita hna amamane la enyipiewekën tro sa mele nyipici me pë ethan. Öni angeic: “Tro Iehova a amekötine la nöjei nöj ; Iehova fe, ameköti nieti jë thenge la thinange ka meköt, me ka pë ethang.” (Sal. 7:8) Öni angeice hmaca: “Loi e troa acile huti ni hnene la thina ka pë ethane me ka meköt.” (Sal. 25:21) Maine tro sa mele nyipici koi Iehova me pë ethan, ke pëkö ketre ewekë ka troa thepe së qaathei Nyidrë! Casi hi la mekuna së memine la atre cinyihane la Salamo, kola hape: “Manathithi ange ka pë ethane ngöne la gojeny, angete trongëne la wathebo i Iehova.”—Sal. 119:1. w22.10 17 par. 18-19

Alanyim la itre atr hnei Iobu hna ithanata memin, ngo ame kö la ka ketri angeic, ke kolo ijine angeic a porotrike me Iehova. Hnei Iehova hna amamai Iobu la itre hnei Nyidrëti hna xup matre troa acatrene la lapaune i angeic kowe la atreine i Nyidrë troa thupëne la itre hlue i Nyidrë. Nge tro fe lai a amekunë angeic la ejuine la inamacane i Nyidrë. Ketre, hnei Iehova hna amamai Iobu la aqane thupëne Nyidrë la itre öni, me akeukawanyi angeic laka, tro fe Nyidrëti a ujë tune koi angeic. (Iobu 38:39-41; 39:1, 5, 13-16) Jëne la hna lapa mekune la itre hna xup, hnei Iobu hna inin troa atrepengöi Iehova hnyawa. Ketre tui easë fe, loi e tro sa goeëne la itre hna xup matre troa atrepengöi Iehova hnyawa. Ngo ame itre xaa ijin, tha ka hmaloi kö. Ame la easa lapa ngöne la itre traon ka tru, ke jole koi së troa goeëne la itre hna xup. Nge maine ka lapa ju hë së ngöne la itre tribu, ke pë palahi ijine së troa hane goeëne hnyawane la itre hna xup. Ngo nyipiewekë troa ami ijine me nue trengecatr matre xomi ini qa ngöne la itre hna xup. w23.03 15 par. 1-2

Öni Iesu troa “hetre sa atraqatr” me itre xaa hulö ju kö. (Luka 21:11) Ketre, hnei Iesu hna qaja ka hape, troa “elë catre la iangazo,” me itre isi, me itre terorist. (Mat. 24:12) Tha hnei Iesu kö hna qaja ka hape, tro hi a ketr la itre atr ka ngazo. Waea! Tro fe lai a traqa kowe la itre hlue i Iehova ka mele nyipici. (Is. 57:1; 2 Kor. 11:25) Nyipici laka, tha tro kö Iehova a thepe së qa ngöne la itre hulö. Ngo, tro pe Nyidrëti a xatua së matre tha tro kö sa seseu menu, me hamë së la tingeting. E tro sa canga hnëkë, tha tro kö së lai a seseu menu. Ngo hapeu, ka pë lapaune la atr ka canga hnëkë kowe la ketre hulö? Waea! Easë pe a amamane ka hape, easa lapaune kowe la atreine i Akötresie troa thupëne la mele së. Pine nemen matre easa qaja tun? Pine laka Trengewekë i Akötresie a upi së troa canga hnëkë qëmekene troa traqa la ketre hulö. w22.12 18 par. 9-10

Ame lo Iosefa ngöne la kalabus, hnei Iehova hna hamë Farao la lue pu. Ame la Farao a atre ka hape, atreine Iosefa qejepengöne la lue pu i nyidrë, ke hnei nyidrë hna iup troa thei angeic. Hnei Iehova hna xatua Iosefa troa qejepengöne itre ej, me qaja la itre nyine troa kuca. Celë hi lai ka ketri Farao. Öhne hi Farao ka hape, ce Iehova me Iosefa matre hnei nyidrë hna acili angeic troa thewe xen kowe la nöje Aigupito asë. (Gen. 41:38, 41-44) Itre macatre thupen, hna traqa la jiin atraqatr ngöne la nöje Aigupito utihë Kanana, lo nöj hna mele ngön hnene la fami Iosefa. Ijiji Iosefa hi troa amelene la fami angeic, me thupëne la itre xötrapan ne la Mesia. Mama cile hi ka hape, Iehova pala hi a eatrëne la nöjei huliwa i Iosefa. Hnene la itre mama i Iosefa hna thele troa humuthi angeic, ngo hnei Iehova hna kuca matre eatr la aja i Nyidrë. w23.01 17 par. 11-12

Ame la nyipi keresiano ka hmek, ke angeic a neëne me thupën la itre ewekë ka troa thë la imelekeu i angeic me Iehova. E cili, tro hë angeic “a lapa fene la ihnim i nyidrë.” (Ite edomë 22:3; Iudra 20, 21) Hnei Paulo mina fe hna qaja kowe la itre keresiano troa thupëne la mele i angatr. Öni nyidrë kowe la itre keresiano ne Efeso, ka hape: “Wai nyipunieti hnyawa kö, wanga tro nyipunie a tro tune la itre hmo, ngo loi pe troa tro inamacan.” (Efe. 5:15, 16) Pine laka Satana palahi a thele troa thë la imelekeu së me Iehova, Tusi Hmitrötr a ithuecatr koi së tro palahi a “trotrohnine la aja i Iehova” matre thupë së qa ngöne la itre hnö i Satana. (Efe. 5:17) Maine easa ajane troa axecië mekune hnyawa, ke loi e tro sa trotrohnin me atre la “aja i Iehova.” Matre nyipiewekë tro sa inine me lapa mekune la Trengewekë i Nyidrë. Maine tro palahi sa thele la aja i Iehova memine la “aqane waiewekë i Keriso,” ke tro hë së lai a ujë tune la itre ka “inamacan,” ngacama pëkö wathebo hna acil.—1 Kor. 2:14-16. w23.02 16-17 par. 7-9

Aija nyidrawane eö la hnalapa i eö? Maine jë, qëmekene tro eö a lapane la uma, ke hnei eö hna pane nyidrawan asë. Ngo tune kaa e tha nyidrawane hë eö? Atre hi së laka, tro hë lai a canga dro lai uma. Haawe, loi e troa nyidrawane lapane la uma matre tro palahi ej a porop. Ketre tun, loi e tro palahi sa amekötine la aqane mekune së me aqane ujë së. Qëmekene tro sa bapataiso, hne së hna nue trengecatr troa “ahmitrötrë së qa ngöne la itre ewekë ka adrone la ngönetrei së, me mekuna së.” (2 Kor. 7:1) Ngo ame enehila, loi e tro sa trongëne la eamo i Paulo aposetolo, me ‘ahnyipixene pala hi la itre aqane waiewekë së.’ (Efe. 4:23) Saqe hi troa adronyi së hnene la itre ewekë ne la fen celë. Maine aja së troa amadrinë Iehova, loi e tro palahi sa isa waipengö së, ene la itre mekuna së, me aqane waiewekë së me itre aja së. w23.01 8 par. 1-2

Pane mekune jë laka, epuni a drei Iesu a hamë ini. Anyimua amexej jë kö nyidrë me e gufane la Itre Hna Cinyihan! Ame lo ijine kola bapataiso Iesu, hnei nyidrëti hna kapa la uati hmitrötr, matre mekune hmaca jë hi nyidrë lo mele i nyidrëti ekö e koho hnengödrai. Hnei Iesu hna amexej la Itre Hna Cinyihan ngöne ju kö lo nyidrëti a ase bapataiso me qëmeken tro nyidrëti a mec. (Deu. 8:3; Sal. 31:5; Luka 4:4; 23:46) Ame ngöne la köni macatre nge sine ne cainöje i Iesu, hnei nyidrëti palahi hna e me amexej me qejepengöne la Itre Hna Cinyihan kowe la itre atr. (Mat. 5:17, 18, 21, 22, 27, 28; Luka 4:16-20) Ame ngöne lo itre macatre qëmeken tro Iesu a cainöj, hnei nyidrëti palahi hna e me dreng la Itre Hna Cinyihan. Tune la nyidrëti a drei Maria me Iosefa a porotrikën lapane la itre hna cinyihan. (Deu. 6:6, 7) Nge tune la hnei nyidrëti hna majemin e nöjei Sabath, nyidrëti a ce tro me fami nyidrë kowe la sunago. (Luka 4:16) Ame cili, nyidrëti a drenge hnyawa la kola e la Itre Hna Cinyihan. w23.02 8 par. 1-2

Nyimutre catre la itre kepin matre easa hnimi Iehova. Xecie koi së laka, Nyidrëti la “qeqe ne mel” nge qaathei Nyidrë la “nöjei loi me nöjei ahnahna ka pexej.” (Sal. 36:9; Iako. 1:17) Ame asë hi la nöjei ewekë hnei epun hna kapa, ke qaathene la Akötresi së ka ham me ka ihnim. Ketre ahnahna ka tru qaathei Iehova la thupene mel. Pine nemen? Pane mekune jë la imelekeu i Iehova me nekö i Nyidrë. Öni Iesu: ‘Kakati a hnimi ni’ nge “ka hnimi Kakati ni.” (Ioane 10:17; 14:31) Hnene la itre macatre ne ce mele nyidro hna acatrene la aqane imelekeu i nyidro. (Ite edomë 8:22, 23, 30) Pane mekune jë la akötre Iehova ngöne la kola axösisin me humuth la nekö i Nyidrë. Atraqatr la ihnimi Iehova kowe la fen, matre hnei Nyidrëti hna up la nekö hnimina i Nyidrë troa mec me aijijë epun me nöjei atr troa kapa la mel ka pë pun. (Ioane 3:16; Gal. 2:20) Celë hi lai pane kepin matre easa hnimi Akötresie. w23.03 4-5 par. 11-13

Loi e tro sa kötrene la itre ka iamenumenu. Hnei Iesu hna hajine la itre xaa trejin ne Peregamo, ke hnei angatr hna aciane la icilekeu, me thë la cas ne la ekalesia. (Hna ama. 2:14-16) Ngo nyidrëti pe a madrine kowe la itre trejin ne Thuataira, ke, hnei angatr hna ananyine la “itre ewekë ka jui i Satana.” Nge hnei nyidrëti hna ithuecatre koi angatr troa fedr kowe la nyipici. (Hna ama. 2:24-26) Loi e tro la itre trejin hna ajojezin hnene la itre ini ka thoi a ietra. Tune kaa fe easë enehila? Loi e tro fe sa nuetrij la itre ini ka icilekeu memine la mekuna i Iehova. Itre ka iamenumenu a “nyi ka hmi, ngo tha metrötrëne pe [angatr] la mene i Akötresie.” (2 Tim. 3:5) Maine tro sa catre inine la Tusi Hmitrötr, ke canga tro hi sa wangatrehmekune la itre ini ka thoi me thipetrij itre ej. (2 Tim. 3:14-17; Iudra 3, 4) Nyipiewekë tro sa waipengöne la hmi së koi Iehova. Maine hetre ewekë ka adrone la hmi së, ke loi e tro sa canga saze.—Hna ama. 2:5, 16; 3:3, 16. w22.05 4 par. 9; 5 par. 11