Ogas

Tro Iehova a cinyihan e hnine la “tusi ne amekunën” la ëje ne la itre ka qaja amamane la ihnimi angatr koi Nyidrë, me xoue Nyidrë. Pine nemen? Pine laka, ame la itre hne së hna qaja ke, kola amamane la itre aliene hni së. Öni Iesu: “Kola ewekë la që qa kuhu hni.” (Mat. 12:34) Aja i Iehova tro la itre ka hnimi Nyidrë a mele palua ngöne la fene ka hnyipixe. Loi e tro sa thupëne la aqane ithanata së, matre tro Iehova a kapa la hmi së. (Iako. 1:26) Ame la itre ka tha hnimi Akötresieti kö ke, angatr a ithanata akökötrenyi me sipu selë angatr. (2 Tim. 3:1-5) Xele kö së troa tui angatr. Easë pe a ajane troa amadrinë Iehova hnene la hne së hna qaja. Ngo ame itre xan, angatr a ithanata hnyawa ngöne la itre icasikeu me ngöne la hna cainöj, ngo ame pë hë ekoilo hnalapa, angatr a ithanata akökötrenyi kowe la fami angatr. Hapeu, tro kö Iehova a madrin koi angatr?—1 Pet. 3:7. w22.04 5 par. 4-5

Tro Akötresie a amë hnine la itre hni ne la öni ka 10 lao jian me öni ka ses la aja troa sajuëne la mekuna i nyidrë. Tro Iehova a nyijëne la öni ka ses ka madra palulu, ene la ONU, troa apatrene trij la nöjei hmi ka thoi. (Hna ama. 18:21-24) Kola hapeue lai koi së? Loi e tro palahi la ‘hmi së a wië me pë engazon qëmeke i Akötresie.’ (Iako. 1:27) Celë hi matre, loi e tro sa nuetrij la itre ini ka thoi qaathei Babulona Atraqatr, me itre feet, me itre huliwa i fen, memine la kuci iöni! Ketre, loi e tro fe sa xatuane la itre atr troa trotriji Babulona Atraqatr, wanga tro fe angatr a hane ce xeni pun me angeic.—Hna ama. 18:4. w22.05 11 par. 17; 14 par. 18

Nyipiewekë tro la itre kem me thin a ami ijin matre qeje Iehova kowe la itre nekönatr me nöjei ewekë ka lolo hnei Nyidrëti hna kuca koi epun. (Deu. 6:6, 7) Ka nyipiewekë catre la itre ijine cili, e tha ka hmi kö i epun, nge tha ijiji epuni kö troa ini tusi me nyudren ngöne la hnalapa. Öni Christine: “Maine ijij, eni a qeje Iehova kowe la itre neköng.” Ketre, loi e troa qaja aloine la organizasio i Iehova memine la itre trejin. Nge tha tro kö a xöjetrije la itre qatre thup, wange tha tro jë la itre nekö i epuni a mejiune koi angatr ngöne la nyudreni a aja ixatua. Troa thele tingeting ngöne la hnalapa. Amamane jë la ihnimi epuni kowe la föi epun me itre nekönatr. Loi e tro epuni a ithanata amenyikene me metrötrëne la föi epun, me inine la itre nekönatr troa hane tun. E cili, tro ha madrin me tingeting ngöne la hnalapa, me thue aja kowe la itre nekönatr troa thele Iehova.—Iako. 3:18. w22.04 18 par. 10-11

Kola mama ngöne la maca i Iesu kowe la ekalesia ne Efeso laka, hnei angatr hna cile hut me catre huliwa i Iehova, ngacama kola traqa la itre jol. Ngo ame pe, patre hë lo ihnimi angatr hnapan. Loi e tro hmaca angatr a acatrene la ihnimi angatr, matre tro Iehova a kapa la hmi angatr. Ketre tune fe enehila, nyipiewekë tro sa cile catr qëmekene la itre jol. Ngo ka nyipiewekë catre fe la itre kepin matre easë a cile catr. Akötresie a goeëne la itre ewekë hne së hna kuca, ngo memine fe la kepin matre easa kuca. Aja i Iehova tro sa nyihlue i Nyidrë qa kuhu hni së. (Ite edomë 16:2; Mar. 12:29, 30) Loi e tro palahi sa hmek. Hetre ketre jol ka traqa kowe la ekalesia ne Saradi. Ngacama itre ka catre huliwa i Akötresie ekö, ngo angatr ha nyiqane nanazije trootro. Matre öni Iesu koi angatr, “hmeke ju.” (Hna ama. 3:1-3) Eje hi, thatreine kö Iehova thëthëhmine la itre huliwa së.—Heb. 6:10. w22.05 3 par. 6-7

Ame koi Solomona, ame la troa catre huliwa ke, ketre “ahnahna i Akötresie.” (Ate cai. 5:18, 19) Atre hi Solomona la eloine la troa catre huliwa. Ketre trahmanyi ka catre huliwa angeic! Hnei angeic hna xupe la itre uma, me traane la itre vin, me itre iengene ka mingöming, me itre jë i tim. Nge hnei angeic fe hna xupe la itre traon. (1 Ite jo. 9:19; Ate cai. 2:4-6) Ngacama tha ka hmaloi kö la itre huliwa cili, ngo madrine catre angeic troa kuca. Ame pe, hetre ketre huliwa ka sisitria catre kö hune lai, nge ka hamë madrine koi Solomona. Kola qaja la huliwa i Iehova. Eje hi, hnei Solomona hna elemekene la huliwa ne xupe la uma ne hmi i Iehova ngöne 7 lao macatre! (1 Ite jo. 6:38; 9:1) Thupene la hnei Solomona hna huliwa koi angeic me koi Iehova, angeic ha öhne ka hape, ka loi ju kö la troa huliwa koi Iehova, hune la troa huliwa koi angeice kö. Celë hi matre öni angeic: “Tro sha ate la pune la nöjei ewekë asë; Qouju e Akötesie, me trongëne la nöjei wathebo i nyidë ; ke celë hi qâne la nöjei ate asë.”—Ate cai. 12:13. w22.05 22 par. 8

Nyimutre la itre atr e hnine la Tusi Hmitrötr hnei Iehova hna nue la ngazon. Hetre atre kö hnei epuni hna mekun? Maine jë epuni a meku Manase joxu. Hnei angeic hna kuca la itre ewekë ka ngazo qëmekei Iehova. Hnei angeic hna acile hmaca la hmi ka thoi. Hnei angeic hna humuth la itre sipu nekö i angeic matre huujëne kowe la itre haze. Göi acili fe angeic la ketre hnasaatr e hnine la uma ne hmi Iehova. Ketre, öni Tusi Hmitrötr: “Atraqate la ngazo hnei nyidëti hna kuca xajawa i Iehova mate aelëhni anganyidë.” (2 A. l. ite jo. 33:2-7) Ngo ame la Manase a ietra, hnei Iehova hna nue la ngazo i angeic. (2 A. l. ite jo. 33:12, 13) Maine epuni fe a meku Dravita joxu. Hnei angeic hna kuca la lue ngazo ka tru qëmekei Iehova, ene la nyixetë me ihumuth. Ngo ame hë la Dravita a ietra me atrehmekune la ngazo i angeic, hnei Iehova hna nue la ngazo i angeic. (2 Sam. 12:9, 10, 13, 14) Haawe, xecie koi së laka, aja i Iehova troa nue la itre ngazo së. w22.06 3 par. 7

Tha ka hmaloi kö tro palahi a acatrene la mejiune së. Ijije hi tro sa hnehengazo la easa lapa treqene la ijine tro Akötresie a eatrëne la itre hna thingehnaean. Ngo, pine laka ka epine palua Iehova matre tha ceitu kö me easë la aqane goeëne Nyidrë la traem. (2 Pet. 3:8, 9) Tro kö Iehova a eatrëne la aja i Nyidrë ngöne la nyipi ijin, nge maine jë, tha ngöne kö la ijin hne së hna mekun. Nemene la ka troa xatua së troa acatrene la mejiune së, me lapa treqen la ijin tro Iehova a eatrëne la itre hnei Nyidrë hna thingehnaean? (Iako. 5:7) Loi e tro sa lapa qale koi Iehova, Atre eatrëne la aja i Nyidrë. Tusi Hmitrötr a amamane laka, ka ce tro la mejiune memine la lapaune koi Iehova. Troa catr la mejiune së, e tro sa lapaune laka, ka mele Iehova, nge Nyidrë a “nyithupen kowe la itre ka thele nyidrë.” (Heb. 11:1, 6) E tro sa easenyi catr koi Iehova, tro ha catr la mejiune së kowe la itre hna thingehnaean. Tro sa acatrene la mejiune së, e tro sa catre thith koi Iehova me e la Tusi Hmitrötr. Ngacama tha öhnyi Iehova kö hne së, ngo ijije hi tro sa easenyi Nyidrë. Ame la easa thithi koi Nyidrë, xecie koi së laka, Nyidrëti a drei së.—Iere. 29:11, 12. w22.10 26-27 par. 11-13

Pane mekune jë la ijine cili. Iobu a lapa ngöne la hnatresij, nge akötre catr angeic. (Iobu 2:8) Nge kola thele troa iaö angeic me akötrë angeic, hnene la itre sinee ka iaö. Iobu palakö a hace fë la mecine la itre nekö i angeic, nge kolo hmaca nyixane la akötre i angeic hnene lo köni sinee ka iaö. Ame lo xötrei ke, pëkö ca meje i Iobu. (Iobu 2:⁠13) Maine jë, kola mekune hnene la itre sinee ka iaö ka hape, ame la Iobu a lapa thaup ke, Iobu a troa nuetriji Iehova. Ngo ka tria la mekuna i angatr. Maine jë, hnei Iobu hna gala draië me hape koi angatr: “Tha tro kö ni a tije qaja la thinange ka pë ethan, uti hë meci hë ni!” (Iobu 27:5) Nemene la ka xatua Iobu troa cile catr? Ngacama tru ju hë la akötre i Iobu, ngo mejiune i angeic laka, tro kö Iehova a xatua angeic. Atre hi Iobu laka, e tro angeic a mec, ke tro kö Iehova a amele angeic hmaca.—Iobu 14:13-15. w22.06 22 par. 9

Ketre manathithi ka tru la tro sa easenyine jëne la thith la Atre Xup la hnengödrai me fen. Ijije hi tro sa thithi koi Iehova ngöne la nöjei qene hlapa, me ngöne la nöjei ijin. Iehova a drei së ngacama easë e pital, maine hnine la kalabus. Matre, tru la ole së koi Iehova göne la ahnahna cili! Ka tru koi Dravita joxu la troa thith koi Iehova. Öni angeic: “Loi e cile huti la thithinge xajawa i cilie tune la sinöe ka pui loi.” (Sal. 141:1, 2) Ame ngöne la hneijine i Dravita, hetre aqane hnëkën la sinöe ka pui loi hnene la itretre huuj. (Eso. 30:34, 35) Ame hi la Dravita a qaja la itre sinöe ka pui loi, ke göne hi troa amamane ka hape, hnei angeic hna hnëkën la nyine tro angeic a qaja kowe la Keme i angeic, ene Iehova. Eje hi, aja së fe hi lai. Aja së tro Iehova a kapa la itre thithi së. w22.07 20 par. 1-2; 21 par. 4

Qa i Iehova troa të la ngazo. Tha ase kö Iehova a nue koi së troa të la ngazo. (Rom. 12:20, 21) Pine laka, itre atr ka tha pexeje kö së, nge ka nyi ifegone la hne së hna trotrohnin, thatreine kö së troa ameköti ewekë tui Iehova. (Heb. 4:13) Ame itre xaa ijin, tro sa a nue la itre aliene hni së troa ajeanyi së qa ngöne la meköt. Celë hi matre hnei Iehova hna qaja jëne Iakobo ka hape: “Ame la elëhni ne la atr, tha eje kö a eatrëne la meköti Akötresie.” (Iako. 1:20) Xecie koi së laka, ka meköti Iehova, nge tro kö Nyidrëti a amekötine hnyawane lai jol. Ame la easa nue la ngazo i ketre, easë hi lai a amamane ka hape, easa mejiun kowe la aqane ameköti ewekë i Iehova. Ame la easa nue koi Iehova troa amekötine la jol, easë hi lai a amamane la mejiune së laka, tro kö Nyidrë a apatrene la itre akötr ka xulu qa ngöne la ngazo. Ame ngöne la fen ka hnyipixe, ‘tha tro hmaca kö sa mekun, me amejën qa kuhu hni së’ la itre ewekë ka akötrë së ekö.—Is. 65:17. w22.06 10-11 par. 11-12

Matre ame la kola akötrë së, ke kolo hi lai a hape, Iehova a kepe së. (Mat. 5:11, 12) Diabolo la qaane la icilekeu cili, ngo ka pë pengöne lai koi Iesu! Ce nyidrëti palahi me easë matre kolo palahi a catre cainöjëne la maca ka loi ngöne la nöjei nöj. Hetrenyi fe la ketre jol hne së hna ixelë memin, ene la itre qene hlapa. Ame ngöne la ketre hna meköle goeën, öni Iesu koi Ioane aposetolo laka, tro la itre ka cainöjëne la maca ka loi a elë hune la jole cili. (Hna ama. 14:6, 7) Troa tune kaa? Tro angatr a aijijëne la ka alanyim troa hane atre la maca ne la Baselaia. Ame enehila, hna ujëne la site jw.org ngöne la 1 000 lao qene hlapa me sin. Matre ngacama isa nöje i angatre kö, ngo ijije hi tro la itre atr a inine la Tusi Hmitrötr me itre xaa itusi së ngöne la sipu qene hlapa i angatr! Ketre, hna mekun troa ujën koi 700 lao qene hlapa la itus Gojenyi Kowe La Nyipi Mel!—matre ini Tus memine la itre atr. w22.07 9 par. 6-7

Iesu a utipine la itre atr. Öni Mataio aposetolo: “Ame la Iesu a öhne la itre atr, nyidrëti a utipi angatre ju, ke ceitu i angatr me itre mamoe ka pë atre thupën.” (Mat. 9:36) Ame Iehova ke? Nyidrëti kö a utipin la itre atr? Öni Iesu: “Tha aja i Kakati kö e hnengödrai troa paatre la ketre ka co celë.” (Mat. 18:14) Itre mekune la, ka akeukawanyi së! E tro sa atrepengöi Iesu hnyawa, tro ha kökötr la ihnimi së koi Iehova. Tro fe a akökötrene la ihnimi eö koi Iehova, e tro eö a ce tro memine la itre trejin ka macaj ne la ekalesia. Tro eö lai a öhne laka, ka madrine palahi angatr troa nyihlue i Iehova. Hnyingë angatre jë la itre hnei angatr hna melën ngöne la huliwa i Iehova. Nge sipo ixatua jë thei angatr ngöne la eö a troa axecië mekun. Mekune hnyawa ju laka, ‘e ala nyimu la ka hamë eamo, troa eatr la itre mekun.’ w22.08 3 par. 6-7

Tro asë hi së a cil kowe la itre jol. Ngo, tha easë casi kö, ngöne la kola traqa la ketre jol. Iehova palahi a thupë së, tune la ketre kem ka ihnim. Nyidrëti a ce me easë me dreng la easa hë, nge aja i Nyidrë troa xatua së. (Is. 43:2) Xecie koi së laka, tro Iehova a xatua së troa cil kowe la itre jol, jëne la thith, la Tusi Hmitrötr, me itre hna hnëkën hnene la hlue ka nyipici me ka inamacan memine la itre trejin. Easa olen koi Iehova la hna thupë së! “Tro ha la ite hni shë a madine koi nyidë.” (Sal. 33:21) Easa amaman la ole së koi Iehova, ngöne la easa nyipiewekëne la itre hnei Iehova hna hnëkën koi së, matre xatua së. Nge loi e tro fe sa isin troa lapa thei Iehova. Kolo lai a hape, maine tro sa catr drengethenge Iehova me kuca la loi, ke tro hë Nyidrëti lai a thupë së uti hë epin! w22.08 13 par. 15-16

Pëhë mejiune thene la itre atr enehila. Thatre hë angatr ka hape, drei la nyine troa dreng. Ame koi angatr, tha wangatrunyi angatr kö hnene la itre atr hnei angatr hna metrötrën, tune la itre hene politik, me itre ka inamacan, maine itre maseta. Nge xele fe angatr ma wang la itre hene ne hmi. Celë hi matre, tha sesëkötre kö së laka, tha mejiune hë la itre atr kowe la Tusi Hmitrötr, lo itus nyine tro la itre hene ne hmi a metrötrën Atre hi së, itre hlue i Iehova laka, Nyidrë la “Akötesieti ka nyipici,” nge aja i Nyidrë tro sa mele ka loi. (Sal. 31:5; Is. 48:17) Easa mejiune kowe la itre hne së hna e ngöne la Tusi Hmitrötr. Easa jelenyipicine la hna qaja hnene la ketre atr ka qejepengöne la Tusi Hmitrötr. Öni angeic: “Pëkö trengewekë i Akötresie ka tria, nge tro itre ej asë a eatr. Itre hlue i Akötresie a mejiun kowe la itre hnei Nyidrëti hna qaja ke, ka mejiune angatr koi Nyidrë.” w23.01 2 par. 1-2

Easë fe a xatuane la itre trejin ngöne la easa acatrene la lapaune i angatr koi Iehova. Ame itre xan, kola hnyimasai angatr hnene la itre ka tha hmi kö. Ame pena itre xan, hetre sine mec i angatr maine kolo pena hleuhleu la mele i angatr. Ame la itre xaa trejin, ekö hë angatr ajane troa canga apatren la fen celë. Itre ewekë lai ka tupathe palahi la lapaune së. Hnene fe la itre pane keresiano ekö, hna hane cile kowe la itre jole cili. Paulo aposetolo a acatrene la lapaun ne la itre trejin jëne la Itre Hna Cinyihan. Ame la itre xaa keresiano ne Iudra, ke thatreine kö angatr sa kowe la fami angatr, ka thaipiëne la hmi Keresiano. Hna acatrene la lapaune i angatr hnene la tusi Paulo koi angetre Heberu. (Heb. 1:5, 6; 2:2, 3; 9:24, 25) Ijiji angatre hë troa isigöline la lapaune i angatr, qëmeken la itre ka icilekeu. w22.08 23-24 par. 12-14

Ame enehila, tha mejiune hë la itre atr koi itre xan. Xele catr angatr ma wang la aqane ujë ne la itre ka salem, me itre he ne politik, me itre hene ne hmi. Goi tha mejiune fe angatr kowe la itre sinee i angatr me itre atrene la fami angatr. Ngo tha sesëkötre kö së, ke öni Tusi Hmitrötr ka hape: “Ngöne la itre drai ne la pun . . . , tro la itre atr a . . . tha mele nyipici, . . . me silitrengathoi ketre, . . . me mele hnihni.” Kolo lai a hape, tro la itre atr a ujë tune la haze ne la fene celë laka, tha nyine tro kö a mejiune kow. (2 Tim. 3:1-4; 2 Kor. 4:4) Ame easë itre hlue i Iehova, easa mejiun koi Nyidrë. Xecie koi së laka, Nyidrëti a hnimi së, nge tha tro kö Nyidrëti a “nuetrij” la itre hnei Nyidrëti hna hnim. (Sal. 9:10) Nge easë fe a mejiun koi Iesu ke, hnei nyidrëti hna nue la mele i nyidrë koi së. (1 Pet. 3:18) Ketre, ka hetre thangane koi së la itre eamo qa hnine la Tusi Hmitrötr.—2 Tim. 3:16, 17. w22.09 2 par. 1-2

Ame la nyipi madrin ke, tha ene kö la troa hnyimahnyima, ngo madrin ka cile hut. Kola hapeue lai? Öni Iesu ngöne la Cainöj Hune La Wetr ka hape: “Madrine la itre ka atrehmekune laka, nyipiewekë Akötresie koi angatr.” (Mat. 5:3) Atre hi Iesu laka, hna xup la atr matre troa atre me atrune la Atre Xup, ene Iehova Akötresie. Nge pine laka, Iehova la “Akötresie ka madrin,” tro fe a madrin la itre ka nyihlue i Nyidrë. (1 Tim. 1:11) Hapeu, tro hi sa madrin e kola tro loi la mele së? Waea. Öni Iesu ngöne la Cainöj Hune La Wetr ka hape, tro fe a madrin la “itre ka hace hni.” Hnei Iesu hna qaja fe tune kowe la “itre hna axösisine pine la thiina ka meköt.” (Mat. 5:4, 10, 11) Iesu a ini easë e celë laka, tha easë kö a madrin ke, ka lolo la mele së. Ngo tro pe easë a madrin ke, easa atre Iehova me easenyi Nyidrë.—Iako. 4:8. w22.10 6 par. 1-3

Atre hi la trejin ka atreine waiewekë laka, hetre “ijine lapa thaupu,” nge hetre “ijine ewekë.” (Ate cai. 3:7) Önine la ketre edromë, “Ka catre kö la atr ka lapa thaup hune la ka ithaithanata.” Kolo hi lai a qaja ka hape, ame itre xaa ijin, ka loi kö troa lapa thaup hune la troa ithanata. Tro sa pane qaja la tulu ne la ketre qatre thup ka macaj, nge hna lapa up troa xatuane la itre xaa ekalesia ka cil kowe la itre jol ka tru. Önine la ketre qatre thup ne la ekalesia i nyidrë ka hape, “Tha ase fe kö nyidrë hane qaja la itre jol ka traqa ngöne la itre xaa ekalesia.” Pine laka, ka atreine waiewekë lai trejine cili, kola metrötrë nyidrë hnene la itre xaa qatre thup ne la ekalesia. Matre xecie koi angatr laka, tha tro kö nyidrë a hane qaja koi itre xan la itre jol ka traqa ngöne la ekalesia. Maine easa ajan tro la itre xan a mejiune koi së, nyipiewekë tro sa qaja la nyipici. Canga tro hi sa mejiune kowe la atr ka qaja mekötine koi së la itre tria së, nge ka nyipici palahi.—Efe. 4:25; Heb. 13:18. w22.09 12 par. 14-15

Alanyimu la itre ka drei simiine la kola “hë cate ngöne la ite gojeny” hnene la inamacan. (Ite edomë 1:20) Tusi Hmitrötr a qaja la köni pengöne atr ka thipetrije la inamacan, ene la “itre ka thatre,” “itete ihnyima sai,” me “ite hmo.” (Ite edomë 1:22-25) Ame la “itre ka thatre” ke, kolo itre atr hna iaön, nge ka kapa la nöjei ewekë hna qaja koi angatr. (Ite edomë 14:15) Itre milio lao atr hna iaön hnene la itre hene ne hmi me itre hene ne politik! Ame la itre xan, kola elëhni la kola atre ka hape, hna iaö angatr hnene la itre hene i angatr. Ngo ame ngöne Ite Edomë 1:22 ke, kola qaja la itre ka atre, ngo hnei angatre hi hna sipu iën troa ujë tune lo itre ka thatre. (Iere. 5:31) Xele kö angatr ma inine la Tusi Hmitrötr. Tha pi tro kö sa ujë tune la itre atre cili!—Ite edomë 1:32; 27:12. w22.10 19 par. 5-7

Organizasio i Iehova a hamë së la itre hna amekötine matre thupëne la mele së. Aija qaja ha ka hape, troa hamën kowe la itre qatre thup la itre numero ne telefon, me itre aderesi së, matre e traqa ju la ketre hulö, tro angatr a canga hë së. Tro fe easë a kapa la itre hna amekötine göi confinement, me aqane troa kötre mel, me aqane troa hetre xen, maine aqane tro sa saene matre ixatua. E tha trongëne kö së la itre hna amekötine cili, tro hë sa eatr, nge tro fe la itre qatre thup a xeni pun la hne së hna tha idrei, ketre, hnëqa i angatre troa thupëne la mele së. (Heb. 13:17) Nyimutre la itre trejin ka nuetrije la itre uma i angatr thupene la itre isi, me itre hulö. Ngo angatr palahi a catre huliwa i Iehova. Tune lo itre pane keresiano ka kötre mel pine la iaxösisi, angatr palahi a catre “tro fë trongëne la trengewekë i Akötresie.” (Itre hu. 8:4) Celë hi lai ka xatua angatr troa goeëne catrëne la Baselaia, hune la itre jole ka traqa koi angatr. Matre ka madrine me tingetinge palahi angatr. w22.12 19 par. 12-13

Iehova a nyipiewekë së isa ala cas. Qëmeken tro la itretre drei Iesu a cainöj, hnei nyidrë hna xome la ketre ceitune matre xatua angatr troa triji xou. (Mat. 10:29-31) Hnei nyidrëti hna qaja la ketre waco hna atre hnyawa e Isaraela, ene la neköi sisi. Ame ngöne lo hneijine i Iesu, ke hna wangacone la itre neköi waco cili. Ngo ame pe, öni Iesu kowe la itretre drei nyidrë ka hape: “Tha kei kö e kuhu hnadro la ala casi e nyidro, nge tha hna öhne kö hnei Keme i nyipunie e koho hnengödrai.” Öni nyidrëti hmaca jë hi: “Nyipiewekë catre kö nyipunie hune la itre sisi ka nyimutre.” E cili, Iesu a amamane ka hape, ka tru angatr isa ala cas koi Iehova, nge tha tro kö angatr a xouene la itre ka icilekeu. Ame hë la angatr a öhne la itre neköi sisi ngöne la angatr a cainöje trootro, ke canga mekune jë hi angatre lo hnei Iesu hna qaja. Ketre tui epuni fe, e tro epuni a öhne la ketre neköi waco, ke mekune kö laka, ka tru catr epuni koi Iehova, nge ka “nyipiewekë catre kö nyipunie hune la itre sisi ka nyimutre.” Celë hi lai ka troa ithuecatr koi së, e traqa ju icilekeu me easë. w23.03 18 par. 12

Ame itre xaa ijin, easa cile kowe la itre jol, tune la kola icilekeu me easë hnei fami, maine kola pë huliwa së. E qea palaha la ijine melëne lai jol, ke easa hleuhleu me akötr. Ame ngöne la ijine cili, aja i Satana tro sa mekune ka hape, pëhë ihnimi Iehova koi së. Diabolo a ajane tro sa mekune ka hape, zöi Iehova me organizasio i Nyidrë la itre akötre së. Celë hi ka traqa kowe la angetre Isaraela, lo angatr e Aigupito. Ame lo xötrei, xecie koi angatr ka hape, Iehova la ka upi Mose me Arona troa thepe angatr qa cili. (Eso. 4:29-31) Ame hë lo Farao a ahacene la mele i angatr, hnei angatr hna upezö Mose me Arona. (Eso. 5:19, 20) Hnei angatr hna qajangazone la lue hna upe hnei Iehova. Ekölöhini pe angatr! Maine ekö hë epun cile kowe la ketre jol, fe pi la hni epun koi Iehova ngöne la thith, nge thele ixatua jë thei Nyidrë. w22.11 15 par. 5-6

Pine laka, Iehova la Qeqe ne mel, ijiji Nyidrëti hi troa amelene hmaca la itre atr ka mec. Hnei Nyidrëti hna aijijë Elia troa amelene la nekön ne la sine föe ne Sarepeta. (1 Ite jo. 17:21-23) E thupen, jëne la ixatua i Akötresie, hnei Elisaia perofeta hna amelene la nekön ne la ketre föe ne Sunema. (2 Ite jo. 4:18-20, 34-37) Kola amamane hnene la itre iamamanyikeu celë laka, atreine hi Iehova amelene hmaca la itre ka mec. Ame lo Iesu e celë fen, hnei nyidrëti hna amamane ka hape, hnei Iehova hna hamë nyidrëti fe la mene cili. (Ioane 11:23-25, 43, 44) Ame enehila, Iesu hë e hnengödrai, nge hna nue nyidrë “troa musi hune la nöjei ewekë e hnengödrai me e celë fen.” Matre, ijiji nyidrëti hi troa ahlëne “la itre ka meköl hnine la itre hua ne amekunën,” me hamë angatr la mele ka pë pun.—Mat. 28:18; Ioane 5:26-29. w22.12 5 par. 10

Ame la angatr a xele ma drei Ezekiela, ke angatre hi lai a nuetriji Iehova. Hnene la itre trengewekë hne la topik ne la drai hna ithuecatr koi Ezekiela. Ngacama hna nuetriji angeic hnene la nöj, ngo tha kolo kö lai a hape, tha xome hnyawa kö angeic la hnëqa ne perofeta. Öni Iehova fe koi Ezekiela ka hape, ame la kola amekötine elanyi la angetre Isaraela, ke “tro angat’ a ate laka qa ha thei angate la perofeta.” (Ezek. 2:5; 33:33) Celë hi lai ka ithuecatr koi Ezekiela troa eatrëne hnyawa la hnëqa hna ahnithe koi angeic. Ketre tu së fe enehila, hetre trengecatre së ke, atre hi së laka, Iehova la ka upi së. Nyidrëti a wangatrunyi së la Nyidrëti a hë së ka hape, “itete anyipici” Nyidrë. (Is. 43:10) Ketre manathithi ka tru lai! Tune la aqane thuecatre i Ezekiela hnei Iehova ka hape: “The qou kö,” Nyidrëti fe a ithuecatre koi së ka hape: “The hmengöhmengöne kö.” (Ezek. 2:6) Hnauëne laka tha tro kö sa xouene la itre ithupëjia? Tui Ezekiela, easë la itre hna upe hnei Iehova, nge ce Nyidrëti me easë.—Is. 44:8. w22.11 3-4 par. 4-5

Madrine së kowe la itre qatre thup, memine la itretre ixatua pine laka, ijije hi tro sa mejiune koi angatr. Tru la ihnimi angatr koi së, matre easa olene koi Iehova, ke itre ahnahna angatre koi së. Tro pena sa ce wang enehila la nyine tro sa kuca matre troa hane mejiune koi easë. Easa hnim la itre trejin me easë, matre easa hnehengazo angatr. Ngo, tha tro pi kö sa lö hnine la mele i angatr. Ame ekö, alanyimu la itre keresiano ka “iqej, me lö hnine la itre ifekë jolen, me kötre fë ithanata.” (1 Tim. 5:13) Tha aja së kö troa tui angatr. Pane mekune jë ka hape, tro la ketre atr a qaja koi epun la ketre ewekë, nge xele kö angeic tro la itre xan a atre. Maine jë tro la ketre trejin a qaja koi epun laka, hna tithi angeic hnei mec, nge angeic a sipo epun matre tha tro kö a iqajakeun. Haawe, loi e tro epuni a metrötrëne la aja i angeic. w22.09 10 par. 7-8

Ame la hnëewekë qene Geres hna ujëne ka hape, “ahnyipixene la aqane mekun i nyipunie” ke, kolo fe a hape, troa “saze la aqane mekune i nyipunie.” Tha kolo kö lai a hape, tro hi sa kuca la loi. Ngo, loi e tro pe sa saze la mele së matre trongëne la itre trepene meköti Iehova. Tha tro hi a aca kuca, ngo tro palahi a kuca lapan. Ame elany, e pexeje hë së, ke tro palahi sa kuca la itre ewekë ka amadrinë Iehova. Ngo ame enehila, loi e tro sa pane nue trengecatr matre amadrinë Nyidrë. Ame ngöne la Roma 12:2, Paulo a qaja laka, ka ce tro hi la troa ahnyipixene la aqane mekun memine la troa atre la aja i Akötresie. Haawe, the nue pi kö la fene celë troa löthe la aqane mekune së. Loi e tro pe sa isa waipengö së ka hape, ame la itre ewekë hne së hna ajane troa eatrën, me itre mekun hne së hna xome ke, ka ihmeku memine la mekuna i Akötresie maine mekuna i fen. w23.01 8-9 par. 3-4

Iehova kö a nyinyine asë la itre jole së? Nyidrëti kö la ka amekötine la nöjei ewekë ka traqa koi së, me thupëne laka, tro kö a eatr? Waea, tha celë kö la hna qaja hnei Tusi Hmitrötr. (Ate cai. 8:9; 9:11) Ngo, atre hi së laka, ame la easë ngöne la itupath, ke öhne hnyawa hi Iehova la hne së hna melën nge drenge hi Nyidrë la easa xëwe koi Nyidrë. (Sal. 34:15; Is. 59:1) Ketre, Nyidrëti fe a xatua së troa cile catr. Tune kaa? Iehova a xatua së la Nyidrëti a akeukawanyi së me ithuecatre koi së ngöne la nyipi ijin. (2 Kor. 1:3, 4) Mekune kö epuni lo ijine Iehova a akeukawanyi epun me ithuecatre koi epun lo epuni a aja ixatua? E thupene la hna traqa la itre itupath, la easa öhne laka hnei Iehova hna xatua së troa cile kow itre ej. w23.01 17-18 par. 13-15

Ceitu hnyawa hi la öni ka ses celë, memine lo öni ka ses ka sevene lao he, ngo ka madra palulu pe ej. Tusi Hna Amaman a hëne ej ka hape, “hnasaatr ne lai öni ka ses” maine “hnaaeitrene joxu.” (Hna ama. 13:14, 15; 17:3, 8) Kola qaja ka hape, tro la “joxu” cili a pane mama, me patr, me mama hmaca e thupen. Nge celë hi ka traqa kowe lo Organisation des Nations unies (ONU) ka cilëgöline la itre musi ne la fen! Hna pane hëne la joxu cili ka hape, Société des Nations, nge hnene ej hna patr ngöne lo Hnaaluene Isi Katru, me fetra hmaca memine la ëj hna hape, ONU. Hnene la itre öni ka ses ne la tusi Hna Amaman ka nyihatrene la itre mus, hna thelejëne troa icilekeu me Iehova memine la itre hlue i Nyidrë. Itre ej a acasine “la nöjei joxu ne fen” kowe la isi Amagedro, ene “la isi ne la drai ka tru i Akötresie, ka Tru Trenge Men.”—Hna ama. 16:13, 14, 16. w22.05 10 par. 10-11

Ame la Iesu a ketre e caasine la Itre Hna Cinyihan, ke celë hi ka xatua nyidrë troa atre hnyawa itre ej me hnin me trongëne itre ej. Ma mekune hi epun lo ka traqa ngöne la uma ne hmi, lo nyidrëti petre hi a 12 lao macatre. Hnene la itre ka hamë ini, ka atre hnyawa la Wathebo i Mose hna “haine la inamacane i [Iesu] me aqane sa i nyidrë.” (Luka 2:46, 47, 52) Maine tro sa e lapane la Tusi Hmitrötr, tro hë së lai a atre hnyawa la alien me wangatrun ej. Hetre ini nyine tro sa xom qa ngöne la hnei Iesu hna qaja kowe la angetre cinyihan, me itre Faresaio, me itre Sadukaio, itre ka atre hnyawa la Wathebo. Ngacama itre ka e lapan angatr la Itre Hna Cinyihan, ngo pëkö thangan hnei angatr hna kapa qa ngön. Hnei Iesu hna qaja la köni ewekë hnei angatr hna tha kuca. Tro la itre hnei Iesu hna qaja koi angatr a xatua së troa (1) trotrohnine hnyawa la itre hne së hna e, (2) öhne la itre mekun ka sisitria, me (3) nue la Tusi Hmitrötr troa saze la mele së. w23.02 8-9 par. 2-3

Hane hi la itre xaa huliwa ka ngazo nyine tro sa kötren, ene la troa wesiwes, troa iji me xeni atruny, troa qaja la itre trenge ithanata ka akötr, troa goeë isi maine pornographie, me itre xane ju kö. (Sal. 101:3) Satana palahi a thel troa thë la imelekeu së me Iehova. (1 Pet. 5:8) E tha hmeke kö së, ke tro angeic a jum ngöne la mekun me hni së la itre itin ka ngazo, tune la troa piin, troa huliwa thoi, troa meciun, troa imethinë, troa pi tru me itëkeun. (Gal. 5:19-21) Maine tha canga fejetrije kö së la itre itine cili, ke tro hë itre ej lai a cia tune la ketre feja poizin ka troa axulune la itre jol. (Iako. 1:14, 15) Ame la ketre hnö i Satana ka tha canga mama kö, ke ene la itre sinatro ka ngazo. The thëthëhmine kö së ka hape, ijije hi tro sa xome la thiina ne la itre atr hne së hna majemine ce tro memin. (1 Kor. 15:33) Maine tro sa hmek, ke tro së lai a kötren la itre atr ka tha trongëne la itre trepene meköti Iehova. (Luka 21:34; 2 Kor. 6:15) E cili, tro hë së lai a öhne la hnö me tro ananyin ej. w23.02 16 par. 7; 17 par. 10-11

Ame la epuni a inine troa atrepengöi Iehova hnyawa, ke kola tru trootro la ihnimi epun koi Nyidrë. Ijije hi tro palahi epuni a easenyi Nyidrë. Madrine catre Iehova la epuni a kuca la aja i Nyidrë. (Ite edomë 23:15, 16) Ijije hi tro epuni a amadrinë Nyidrë qa ngöne la aqane ithanata me huliwa i epun. Troa mama qa ngöne la aqane axecië mekun i epun laka, epuni a hnimi Iehova. Ame la troa amadrinë Iehova, ke ketre mekune lai ka lolo nyine tro epuni a eatrëne ngöne la mele i epun. Tune kaa la aqane tro epuni a amaman laka, epuni a hnimi Iehova? Ame la hnapan, ene la troa nue la mele i epun koi Nyidrë jëne la thith. (Sal. 40:8) Nge thupen, troa xomi bapataiso. Ame la ijine epuni a xomi bapataiso, ke ketre drai lai ka tru koi epun nge ijine madrin. Ame e cili, tha tro hmaca kö epuni a mel koi epuni hmekuj, ngo koi Iehova pë hë. (Rom. 14:8; 1 Pet. 4:1, 2) Eje hi, ketre mekune lai ka tru hnei epun hna troa xom. Ngo ame pe, jëne mele hi lai ka lolo. w23.03 5-6 par. 14-15