Semitrepa

Ame la easa ithanata hnyawa, easë hi lai a amamane laka, itre hlue i Iehova së. Ketre, easë fe a xatuane la itre xan troa öhne la eisapengönene la “ate nyi hlue i Akötesie me ate tha nyi hlue i nyidë.” (Mal. 3:18) Hane hi la ka traqa koi Kimberly, ketre trejin. Hna upi angeic troa ce kuci qa memine la sine ini angeic. Ame hë e thupen, hnene la sine ini angeic hna öhne laka, isapengöi Kimberly kö me itre xan. Tha ka ixöjetriji kö angeic me iqaqa, ngo ka lolo palahi la hnei angeic hna qaja. Hna ketr la sine ini Kimberly hnene la aqane ithanata i angeic. Nge hnei angeic hna nyiqane ini Tus. Drei jë kö la madrine i Iehova ngöne la easa thue aja kowe la itre atr troa atre la nyipici, jëne la aqane ithanata së! Easë asë hi a ajane troa atrunyi Iehova hnene la aqane ithanata së. w22.04 5-6 par. 5-7

Hnei Iesu hna helëne trije la seven lao dremoni qaathei Maria Magadalena! Celë hi ka upi eahlo troa hane atre drei Iesu, me xatua nyidrë ngöne la huliwa ne cainöj. (Luka 8:1-3) Nyipici tru la madrine i Maria kowe la hnei Iesu hna kuca koi eahlo, ngo sisitria catre palakö la ahnahna hnei eahlo hna troa kapa elany qaathei nyidrë. Tro Iesu a hamëne la mele i nyidrë “matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Ketre, hnei Maria hna olene koi Iesu ngöne la eahlo a mele nyipici koi nyidrë. Maria fe hi ezi Iesu lo nyidrëti a thip ngöne la sinöe ne iaxösisi. Eahlo e cili a amamane koi Iesu me kowe la itre xan ka hape, ce eahlo me angatr. (Ioane 19:25) Thupene lo Iesu a mec, hnei Maria me lue xaa föe hna itöne la itre haö ka pui lolo, matre köle la ngönetrei nyidrë. (Mar. 16:1, 2) Maria la hnei Iesu hna pane ithanata memin lo kola amele nyidrëti hmaca. Tha hane fe kö nyidrëti mama tun kowe la itre xaa atre dreng.—Ioane 20:11-18. w23.01 27 par. 4

Tha tro pi kö sa mekun ka hape, pine laka hne së hna huliwa catr koi Nyidrë ekö, matre tha nyipiewekë hë enehila tro sa huliwa atrunyi koi Nyidrë. Ngacama easa utipië trootro, ngo loi e tro palahi sa hmek me catre “huliwa i Joxu” utihë la pun. (1 Kor. 15:58; Mat. 24:13; Mar. 13:33) Loi e tro sa catre huliwa koi Iehova cememine la hni ka pexej. Hnei Iesu hna qaja la ketre jol ka ej thene la ekalesia ne Laodikea. Kösë “ka keu” la hmi angatr. Hnei Iesu hna jelehmo angatr pine la itre thiina i angatr. Loi e tro angatr a akökötrene la aja i angatr troa huliwa i Iehova me atrunyi Nyidrë. (Hna ama. 3:16, 17, 19) Nemene la ini koi së? Maine easë ha nyiqane nanazij, ke loi e tro hmaca sa wangatrune la itre ini hne së hna kapa qaathei Iehova. (Hna ama. 3:18) Tha tro pi kö sa nue la mani me mo troa tro pa ngöne la mele së, nge pi Iehova pë hë. w22.05 3-4 par. 7-8

Itre macatre hë enehila, hnei Iehova hna nyiqane cinyanyine la ketre itus. Hna cinyanyin e hnine la itusi cili la ëje ne la itre hlue i Iehova ka mele nyipici, nge hna nyiqane hnei Abela. (Luka 11:50, 51) Kola tro la itre macatre, nge Nyidrëti palahi a nyialiene la itusi cili. Ame enehila, traqa ha koi itre milio lao ëje ka mama e kuhu hnin. Ame e hnine la Tusi Hmitrötr, hna hëne la itusi cili ka hape, “tusi ne amekunëne,” me “tusi ne mel.” (Mal. 3:16; Hna ama. 3:5; 17:8) Hna cinyanyin e kuhu hnine la itus la ëje ne la itre atr ka xoue Iehova me hnimi Nyidrë. Nge angatre hi la ka troa hetrenyi la mele ka pë pun. Tro fe a hane cinyanyine la ëje së e hnine lai itus, e tro sa acatrene la imelekeu së me Iehova, me lapaune kowe la mele hna huujëne hnei Iesu. (Ioane 3:16, 36) Mejiune ju hë së troa mel e hnengödrai maine e celë fen, ngo easë asë hi a ajan troa hetrenyi la ëje së ngöne la itus. w22.09 14 par. 1-2

Tusi Hna Amaman a qaja la ketre “drakona atraqatr ka palulu tune la eë.” (Hna ama. 12:3) Eje hi lo ka isi me Iesu memine la itre angela i nyidrë. (Hna ama. 12:7-9) Ej a isi memine la nöje i Akötresie, nge qaathei angeic la men ne la itre öni ka ses, ene la itre mus. (Hna ama. 12:17; 13:4) Drei la drakona? Kolo “un ekö, lo hna hëne ka hape, Diabolo me Satana.” (Hna ama. 12:9; 20:2) Angeic la ka mus kowe la itre ithupëjia me Iehova. Nemene ka troa traqa kowe la drakona? Thenge la hna qaja ngöne Hna Amaman 20:1-3, tro la ketre angela a kuië Satana ngöne la hnaop ka jui nge ka thatrehmekun. Kösë angeic e hnine la kalabus. Tro angeic a lapa e cili koi “1 000 lao macatre,” matre thatreine hë angeic “amenune la itre nöj.” Nge e thupen, troa triji angeic me itre dremoni angeic kowe “la hneopegejë eë me gaz.” Pane mekune jë la elolone la mele së elany, e patre hë Satana me itre dremoni! w22.05 14 par. 19-20

Iesu la ketre atr ka catre huliwa. Ame lo nyidrëti e celë fen, hnei nyidrë hna pane xome la huliwa ne tratrau sinöe. (Mar. 6:3) Madrine catre la keme me thine Iesu, ke, nyidrë a xatua nyidro troa huliwa kowe la fami. Nge pine laka, ka pexeje Iesu, tru hnei ka hain, me ka pi itöne la itre hnei nyidrë hna kuca! Eje hi, hnim catre Iesu la huliwa i nyidrë. Ngacama, ka tru ju hë koi Iesu la huliwa cili, ngo hnei nyidrëti palahi hna ami ijine kowe la huliwa i Iehova. (Ioane 7:15) Ame hë la nyidrëti a xome la huliwa ne cainöj, öni nyidrë kowe la itretre dreng: “The huliwa kö thatraqane la falawa ka canga patr, ngo thatraqane la xeni ka hamëne la mele ka pë pun.” (Ioane 6:27) Öni nyidrëti fe ngöne la cainöje hune la wetr, ka hape: “Xawane jë pe thatraqai nyipunieti la itre trengamo e hnengödrai.” (Mat. 6:20) Tro la inamacane i Akötresie a xatua së, matre tro sa atreine tulu ewekë göi huliwa i maseta. Pine laka, itre Keresiano së, hna ini së troa “catre huliwa, me huliwa hnyawa.” w22.05 22 par. 9-10

Hnei Enis hna amamai tulu koi Timoteo. Nge jëne la aqane ujë i Enis, öhne hi Timoteo laka, tru la ihnimi eahlo koi Iehova me öhne laka, Enis a madrine troa nyihlue i Iehova. Ketre tune enehila, alanyimu la itre trejine föe ka “ahmalane la hni” ne la itre sinee i angatr, jëne la aqane ujë i angatr. (1 Pet. 3:1, 2) Ijije fe hi tro epuni a kuca tun. Tune kaa? Troa amë panë Iehova ngöne la mele i epun. (Deu. 6:5, 6) Itre thine fe, tru la itre huliwa hnei epuni hna kuca thatraqane la itre nekö i epun. Epuni a hlë jidr, me nue traem, me mo, me itre xaa ewekë ju kö, matre troa thupëne la itre nekö i epun. Ngo tha tro kö a nue la itre ewekë cili troa xome la traeme i epun koi Iehova. Loi e tro pe epuni a ami ijine matre troa thith, me ini tusi caas, me sine la itre icasikeu. Aqane tro epuni lai a acatrene la lapaune i epun, me amamai tulu kowe la fami epun me itre xan. w22.04 16 par. 1; 19 par. 12-13

Easa madrin, ke tha hnei Iehova kö hna nue koi easë troa amekötine la itre atr! Iehova kö la atrekë hnëqane lai, ke Nyidrë la Atre Iameköti Katru. (Rom. 14:10-12) Loi e tro sa mejiun koi Iehova laka, tro kö Nyidrëti a ameköti ewekë thenge la itre trepene meköti Nyidrë göi loi me ngazo. (Gen. 18:25) Ka meköti palahi la aqane ameköti ewekë i Nyidrë! Easa lapa treqene la ijin tro Iehova a apatrene asë la itre thangane la ngazo. Ame hë e cili, troa ameun paluane la nöjei pengöne akötre së. (Sal. 72:12-14; Hna ama. 21:3, 4) Tha tro hmaca kö sa mekun la itre akötre së hnapan. Qëmekene troa traqa la ijine cili, easa olene koi Iehova la hna aijijë së troa hane nyitipu Nyidrë, ene la troa nue la ngazo i itre xan. w22.06 13 par. 18-19

Ame la atre iameköti, ke ka atre hnyawa la itre wathebo. Nyidrë la ka atrehmekune hnyawa la loi me ngazo. Nemene la itre xaa ewekë hna atreine kuca hnene la atre iameköti? Loi e tro angeic a atre hnyawa la itre ewekë ka traqa qëmekene troa amekötine la ketre atr. Nge ame ngöne la götrane cili, ke Iehova hmekuje hi la ka ijij troa amekötin. Tha ceitu Iehova kö memine la itre ka iameköti ngöne la itre hnaakootr, ke atre hnyawa hi Nyidrë la itre hna melën hnene la itre atr. (Gen. 18:20, 21; Sal. 90:8) Tha Nyidrëti kö a ameköti së thenge la hna dreng maine öhne hnene la itre xan. Trotrohnine hi Iehova ka hape, ame la aqane hetru së, memine la götran hne së hna mele ngön, memine la itre sine meci së ke, ka hetre thangan kowe la aqane ujë së. Ketre, atre hi Iehova la itre aliene hni së. Nge öhne hi Nyidrë la itre mekun me itre aja i easë isa ala cas. Pëkö ewekë hna juetrën qëmekei Nyidrë. (Heb. 4:13) Celë hi matre, hetre nyipi kepin la Iehova a nue la ngazo ne la itre atr. w22.06 4 par. 8-9

Loi e tro sa xomi ini qa ngöne la itre nyinyithina i Satana koi Iobu, ke aqane tro fe angeice lai a tune koi së enehila. Kösë Satana qaja ka hape, tha easë kö a hnimi Iehova. Nge tro sa nuetriji Nyidrë pine la mele së. Ame koi Satana, tha Iehova fe kö a hnimi së. Nge tha Nyidrëti kö a nyipiewekëne la itre trengecatr hne së hna nue troa amadrinë Nyidrë. Pine laka, atre hi së la itre nyinyithina i Satana, tha tro pi kö sa mejiune kowe la itre trengathoi angeic. Loi e tro sa nue la itre itupath matre amamane la sipu pengö së. Hnene la itre itupath ka traqa koi Iobu hna xatua angeic troa atre la itre xaa thiina nyine tro angeic a saze. Hnei Iobu hna öhne laka, tha ka ipië kö angeic. (Iobu 42:3) Ketre tu së fe, tro sa öhne la itre thiina nyine tro sa saze la kola traqa la itre itupath. E traqa jë së öhne la itre tria së, tro hë së lai a thel troa saze. w22.06 23 par. 13-14

Öni Iehova, tro kö Nyidrëti a xatua së. Qëmekene lo Nyidrëti a qaja ka hape: “Nyipunie la itete anyipici ni,” ke öni Nyidrë: “E tro eö a trongëne la hnagejë, tro ni a ce me eö; nge eö a trongëne la ite hneopegejë, tha tro kö a kaca tranyi ’ö; e tro eö a tro nyipine la eë, tha tro kö a deuthi ’ö, nge tha tro kö eö a weli hnei ukahlokin.” (Is. 43:2) Ame ngöne la hna cainöj, easa cil kowe la itre jole hna aceitunëne me itre hneopegejë, me itre eë. Ngo jëne la ixatua i Iehova, easë palahi a catre cainöj. (Is. 41:13) Alanyimu la itre atr enehila ka xelene la maca. Ngo tha kolo kö lai a hape, tha ase kö easë eatrëne hnyawa la hnëqa së. Kola akeukawanyi së me ithucatre së la easa atre ka hape, Iehova a madrin la easa catre tro fë la maca i Nyidrë. Öni Paulo: “Tro la nöjei atr a isa kepe thupen, thenge la isa huliwa i angatr.”—1 Kor. 3:8; 4:1, 2. w22.11 4 par. 5-6

Mama hnyawa hi enehila laka, kola eatr lo itre hna perofetan! Itre atr “qa ngöne la ite qene hlapa asë” a inine la “aqane ewekë ka wië,” ene la itre ini qa hnine la Tusi Hmitrötr. (Zaka. 8:23; Zef. 3:9) Ase hë sasaith la 8 000 000 lao atr ka sine la nöje i Iehova, nge ka traqa qa ngöne la 240 lao nöj. Nge e nöjei macatre, alanyimu catr la ka xomi bapataiso! Ngo ame kö la ka nyipiewekë catr ke, itre ka nyipi xomi bapataiso a huliwan la itre thiina i Iehova hna qaja hnei Tusi Hmitrötr ka hape, “itre thiina ka hnyipixe.” (Kol. 3:8-10) Hnei angatr hna nuetriji la itre huliwa ka sis, me isi, me ixele ma iwai, me isigöli nöj. Ketre, kola eatr la hna perofetan ngöne la tusi Isaia 2:4 hna hape, “tha tro hmaca kö angat’ a ini ishi.” Hnene la hne së hna isin troa hetrëne la thiina ka hnyipixe, matre kola ea la itre atr kowe la organizasio i Iehova. Öhne hi angatr ka hape, easë a xötrethenge Keriso. (Ioane 13:35) Easa kapa la itre thangane ka lolo cili, ke easa ce huliwa fene la musi Iesu. w22.07 9 par. 7-8

Ame la easa thithi koi Iehova, loi e troa mama la metrötre së koi Nyidrë. Pane mekune jë la itre hna meköle goeëne hnei Isaia, Ezekiela, Daniela me Ioane. Itre ej a amamai Iehova a lapa hune la therone i Nyidrë. Hnei Isaia hna öhnyi Iehova a “[të] hune la therone ka draië me sisitia.” (Is. 6:1-3) Nge hnei Ezekiela hna öhnyi Iehova a të hune la ikariota i Nyidrë kola “hadehadeu xöteith, te, tune la ngöne la lewene.” (Ezek. 1:26-28) Hnei Daniela hna öhne la “qate ate ka hekö,” ka wië la iheetre i Nyidrë, nge tune la ukahlokin eë la therone i Nyidrë. (Dan. 7:9, 10) Nge hnei Ioane hna öhnyi Iehova a të hune la therone i Nyidrë, nge “hetre lewen xötreithe la theron, nge kösë semerado.” (Hna ama. 4:2-4) Ame la easa mekun la lolo i Iehova, kolo hi lai a upi së troa thithi koi Nyidrë cememine la metrötr. w22.07 20 par. 3

Jeune fe, tro Satana lai a sewe eö troa huliwa catr koi Iehova. Tro angeice lai a aciane thei eö la luelu, matre tha tro hmaca kö eö a mejiun kowe la itre ini qa hnine la Tusi Hmitrötr. Maine jë, ame elany tro eö a dreng la ketre ini ka thaipië Akötresie, ene la ini évolution. Ma tha hnei eö kö hna hane dreng ngöne lo eö a co, ngo ame enehila, ke eö fe hë dreng la ini cili ngöne uma ne ini. Maine jë tro eö a mekun ka hape, ka nyipici hi la ini cili. Hapeu, hnene kö la itre porofesör hna pane ithel ka hape, hetre Atr Xup? Mekune kö la trepene meköt ngöne Ite Edomë 18:17, NWT: “Maine jë ka meköt la mekun ne la atr ka pane ithanata, ngo traqa pi ketre a qaja troa jelenyipicin.” The kapa menune kö la itre ini hna hamëne koi eö, ngo pane ithele jë e hnine la Trengewekë i Akötresie, ene la Tusi Hmitrötr me e hnine la itre itusi së. w22.08 2 par. 2; 4 par. 8

Aja i easë troa trotrohnine la hne së hna e ngöne la Tusi Hmitrötr, matre hetre thangane koi së. Tro sa ce wange la hna qaja hnei Iesu kowe lo “thupëtresij ka atrepengöne hnyawa la itre Wathebo.” (Luka 10:25-29) Hnei angeic hna hnyingë Iesu la nyine tro angeic a kuca matre kapa la mel ka pë pun. Hnei Iesu hna hnying matre xatua angeic troa ketre öhne ngöne la Tusi Hmitrötr la mekun ka sa la hnyinge i angeic. Öni nyidrë: “Nemene la hna cinyihan ngöne la Trenge Wathebo? Nemene la hnei eö hna trotrohnin?” Hnei angeic hna sa hnyawane koi Iesu me amexej la itre xötr ka qaja la enyipiewekëne troa hnimi Akötresie memine la atr lapa easenyi së. (Lev. 19:18; Deu. 6:5) Ngo, öni angeic hmaca jë hi: “Drei la atre lapa easenyi ni?” Kolo hi lai a amaman laka, tha nyipi trotrohnine kö angeic la alien la hnei angeic hna e. Celë hi matre, thatre kö angeic la aqane troa trongëne itre ej. Tro sa atreine trotrohnin la Tusi Hmitrötr e tro sa sipo ixatua koi Iehova. Haawe, sipone jë la uati hmitrötr i Nyidrë matre tha tro kö epuni a meku xaa ewekë la epuni a e Tusi Hmitrötr. Nge sipo Nyidrëti jë troa xatua epun troa trongëne la hnei epuni hna e. w23.02 9 par. 4-5

“Hnei epun hna atre tune kaa la nyipici?” Ma anyimua sa ha epun la hnyinge celë. Celë hi hne së hna hnyingëne kowe la ketre trejin ngöne la easa ajane troa atre angeic hnyawa. Pi tro catre së a dreng la itre trejin a qaja la aqane atre Iehova hnei angatr. Easë fe a ajane troa ce thawa me angatr la madrine së la easa atre la nyipici. (Rom. 1:11) Tro la itre porotrike cili a amamane koi së laka, ketre manathith ka tru la troa atre la nyipici. Ketre, easa isine troa “catre trongëne la nyipici,” ene la troa mele thenge la aja i Iehova me kepe manathith qa ngön. Nyimu kepin matre easa wangatrun la nyipici. Ngo ame la pane kepin, ke hnene la ihnimi së koi Iehova, Atrekë Ewekëne la nyipici. Jëne la Tusi Hmitrötr, tha easë hmekuje kö a atre Nyidrë tune la Atre Xup la nöjei ewekë, ngo tune fe la Keme së ka ihnim.—1 Pet. 5:7. w22.08 14 par. 1, 3

Paulo aposetolo a ithuecatr kowe la itre trejin troa amaman la ihnimi angatr jëne la “itre huliwa ka loi.” (Heb. 10:24) Tha hnei Paulo hmekuje kö hna xatuane la itre trejin jëne la itre eamo, ngo jëne mina fe la itre huliwa ka loi hnei angeic hna kuca koi angatr. Ame lo kola traqa la ketre jiin atraqatr e Iudra, hnei angeic hna tro fë ixatua kowe la itre trejin e cili. (Itre hu. 11:27-30) Ngacama angeic a nue ijine troa cainöj me hamë ini, ngo hnei angeic fe hna thele jëne troa xatuane la itre ka pë ewekë. Angeic hi lai a acatrene la lapaun ne la itre trejin laka, tro kö Iehova a thupë angatr. Ketre tune mina fe enehila, ame la easa saen troa xatuane la itre trejin hna lepe hnei hulö, me nue la traeme së memine la hne së hna atrein, ke easë hi lai a acatrene la lapaun i angatr. Ceitune hi lai memine la easa kuië ahnahna thatraqane la huliwa ne cainöj e cailo fen. Itre ewekë lai ka acatrene la lapaune ne la itre trejin laka, tha tro jë kö Iehova a nuetriji angatr. w22.08 24 par. 14

Ame la itre xaa hna perofetan hnei Tusi Hmitrötr, ke eatre hë. Nge ame la itre xan, ke hna eatr a itre hadredr lao macatre thupen. Hetre ka anyipicine lai. Tha sesëkötre kö së ke, Iehova la Atrekë Ewekëne la Tusi Hmitrötr. Tro sa ce wang la itre hna perofetan göne la traon e Babulona. Ame ngöne la itre macatre 700 M.P.K., hnei Isaia hna perofetan laka, troa lep apatrene la traon e Babulona. Hna qaja fe ka hape, Koreso la ka troa thapa la traon, memine la aqane tro angeic a kuca. (Is. 44:⁠27–45:2) Ketre, öni Isaia, troa apatrene trij la traon e Babulona, nge tha tro hmaca kö a lapane ej. (Is. 13:19, 20) Ame ngöne la macatre 539 M.P.K., hna lepe la traon e Babulona hnene la angetre Madai me Peresi, nge ame enehila, ke hnënge etë pe hi la ka lapa. w23.01 4 par. 10

Ame enehila, hnei Iehova hna ee së kowe la fami Nyidrë, ene la itre hlue i Nyidrë. Nge ketre manathithi ka tru la troa sine la fami cili! (Mar. 10:29, 30) Ame ngöne la fen, nyimutre la itre trejin ka tu së, ka hnimi Iehova me ka isine troa trongëne la itre trepene meköti Nyidrë. Ngacama isapengöne kö la qene hlapa së, me qenenöje së, me aqane heetre së, ngo ame la easa iöhnyi me angatr ke, kösë ka iatre hë së qaan ekö. Madrine catre së troa ce nyihlue i Iehova me angatr me ce atrun la Keme së ka tru ihnimin, me cas me angatr. (Sal. 133:1) Angatr a ce thu me easë la itre hace së. (Rom. 15:1; Gal. 6:2) Angatr a ithuecatr me xatua së troa catre nyihlue i Iehova. (Heb. 10:23-25) Nge angatr a xatua së troa cile catr qëmekene la itre ithupëjia me easë, ene Satana memine la fene i angeic. w22.09 2-3 par. 3-4

Maine jë, thatreine kö së xomehnöthe la thineme së la easa ngöne la itre réseaux sociaux. Ngo e tha thupëne kö së, tro sa qaja menune la itre ewekë tha nyine tro kö a qaja kowe la ka alanyimu. Nge ame la easa amë la ketre ithuemacanyi ngöne Ëternet, ke ka tro hë lai, nge tru catr la itre jol ka troa xulu qa ngön. Tro fe la xomihni a xatua së ngöne la kola ajojezi së me uku së hnene la itre ithupëjia troa qaja la itre ithuemacanyi göne la itre trejin me easë. Maine easa mel ngöne la ketre nöj hna wathebone la hmi së, tro la itre polis a hnyingë pengöne la itre trejin me easë. E cili hi la tro sa “thupëne la ukeineq[ë së] hnene la nyine ahumun’ ej.” (Sal. 39:1) Nyipiewekë tro la fami së, me itre sinee, me itre trejin ne la ekalesia, me itre xan a öhne laka, ijije hi tro angatr a mejiune koi së. Tro angatr a mejiune koi së, e atreine hi së xomihni. w22.09 13 par. 16

Maine easa ajan troa hetrenyi la nyipi madrin, loi e tro sa e me inine la Tusi Hmitrötr. Jëne mele hi lai koi së. Celë hi matre öni Iesu: “Tha tro kö la atr a mel hnei falawa hmekuj, ngo hnene la nöjei trengewekë hna qaja hnei Iehova.” (Mat. 4:4) Haawe, loi e tro sa e la Tusi Hmitrötr e nöjei drai. Tru la ihnimi Iehova koi së matre hnei Nyidrëti hna qaja e hnine la Tusi Hmitrötr la aqane tro sa madrin. Nyidrëti fe a qaja la aliene la mel, memine la aqane tro sa easenyi Nyidrë, me aqane tro Nyidrëti a seng la itre ngazo së. Ketre, Nyidrëti a qejepengöne la mele ka lolo hnei Nyidrëti hna hnëkën koi së elany. (Iere. 29:11) Itre ini lai qa hnine la Tusi Hmitrötr ka amadrinë së! Matre ame la epuni a cil kowe la itre jol, ke catre jë e me lapa mekune la Tusi Hmitrötr. w22.10 7 par. 4-6

Eje hi, Tusi Hmitrötr a thuecatre koi së laka, tha tro kö a ujë tune lo itre ka thatre. Nge ame la aqane tro sa macaj, ke ene la tro sa trongëne la itre trepene meköti ngöne la mele së. Tro lai a xatua së troa neëne la itre jol me axecië mekune hnyawa. Loi e tro palahi sa waipengö së ngöne la götrane cili. Isa hnyinge jë ka hape: Hnauëne laka, tha ase palakö ni xomi bapataiso, nge ka hekö hë ni ini Tusi Hmitrötr me sine la itre icasikeu? Nge maine ka bapataiso hë ni, ke hapeu, eni kö a isine troa maca ngöne la huliwa ne cainöj? Ame la eni a axecië mekun, eni kö a trongëne la itre trepene meköt? Ka loi kö la thiinang kowe la itre trejin? Maine hetre nyine tro palakö a saze the së, ke xötrethenge jë la itre eamo i Iehova, ‘atre ainamacanëne la atr ka thatre.’—Sal. 19:7. w22.10 20 par. 8

Hnei Ezekiela hna öhne la emenene la uati hmitrötre i Akötresie. Hnei angeic hna goeën la huliwa ne la uati hmitrötr thene la itre angela me ngöne la itre wiil ka draië ne la ikariota i Iehova. (Ezek. 1:21) Nemene la hna kuca hnei Ezekiela e thupen? Öni angeic: “Nge öhnë hë ni, ame hnenge hna kei qe ipië.” Tru catre la xou i Ezekiela matre hnei angeic hna kei e kuhu hnadro. (Ezek. 1:28) Hnei Ezekiela hna lapa mekune la iamamanyikeu cili, matre xecie koi angeic laka, tro kö la uati hmitrötre i Akötresie a xatua angeic troa catre cainöj. Öni Iehova koi Ezekiela ka hape: “Nekö i ate fe, cilënejë la lue ca i ‘ö, nge tro ni a ewekë koi ’ö.” Hnene la hna amekötine celë memine la uati hmitrötre i Akötresie hna hamë trengecatre koi Ezekiela troa mejë qa kuhu hnadro. (Ezek. 2:1, 2) Ame hë la nöjei ijin Ezekiela a cainöj, hna iuji angeic hnene la ‘ime’ i Iehova, ene la uati hmitrötr i Nyidrë.—Ezek. 3:22; 8:1; 33:22; 37:1; 40:1. w22.11 4 par. 7-8

Isaia a aceitunë Iehova memine la ketre porofesör ka tro e hutrö ne la itre hna inin, nge Nyidrëti a amamai gojenyi koi angatr. Ame enehila, easa dreng la Iehova a ithanata e hutrö së. Tune kaa? Ekö hë cinyanyine la itre trengewekë i Iehova e hnine la Tusi Hmitrötr. Celë hi matre ame la easa e la Tusi Hmitrötr, ke kösë easa drei Iehova ithanata e hutrö i easë. (Is. 51:4) Nemene la aqane tro sa kepe thangane qa ngöne la itre eamo hnei Iehova hna hamën? Lue ewekë nyine tro sa kuca hna qaja hnei Isaia. Ame la hnapan, ke “dei la gojeny.” Nge ame la hnaaluene ke, “tro nyipunie a trongën’ ej.” Tha tro hmekuje kö së a atre la “gojeny.” Ngo loi e tro fe sa trongëne ej. Organizasio a ini së la aja i Iehova, ka ej e hnine la Tusi Hmitrötr. Kolo fe a xatua së troa trongëne la hne së hna inin. Maine easa ajan troa madrin ngöne la huliwa i Iehova, loi e tro sa atre me trongëne la aja i Nyidrë. Nge e cili hi la tro sa kapa la itre manathith qaathei Iehova. w22.11 11 par. 10-11

Thupene la kola mec hnene la itre aposetolo, hna lö hnine la ekalesia hnene la itre keresiano thoi. (Mat. 13:24-27, 37-39) Hnei angatr hna qaja “la itre ewekë ka qaliqali, matre hule koi angatr la itretre dreng.” (Itre hu. 20:30) Hnene la itre keresiano thoi cili hna inine la itre atr ka hape, tha hnei Iesu kö “hna aca huujë nyidrë matre thu la itre ngazo ne la ka ala nyim,” tune la hna qaja hnei Tusi Hmitrötr, ngo tro pe a anyimua kuca la huuje cili. (Heb. 9:27, 28) Ame enehila, tru catr la itre atr ka mejiun kowe la ini ka thoi cili. Angatr a tro e nöjei wiik maine e nöjei drai koi uma hmitrötr, matre troa atrun lo hna hape, “le sacrifice de la Messe.” Ame pena la itre xaa hmi, tha nyipiewekë kö koi angatr troa atrune lapane la ijine meci Iesu. w23.01 21 par. 5

Ame ngöne la 1 000 lao macatre, troa amelene la itre ka mec, nge tro ha pexej la itre atr ka idrengethenge. Tro la itre ka mele nyipici a “hetenyi la [ihnadro], me lapa palua kö ngön’ ej.” (Sal. 37:10, 11, 29) E thupen, “tro ha apatrene la mec, lo ithupëjia tixenuë.” (1 Kor. 15:26) Ame la mejiune së troa mel epine palua, ke hna nyitrepene hnene la Tusi Hmitrötr. Tro la mejiune cili a xatua së troa mele nyipici ngöne la itre drai ne la pun. Tha easë kö a amadrinë Iehova, matre troa kapa la mel ka pë pun. Ame la nyipi kepine matre easa mele nyipici koi Iehova me Iesu, ke tru la ihnimi së koi nyidro. (2 Kor. 5:14, 15) Pine laka easa hnimi nyidro matre easa nyitipu nyidro, me qaja la mejiune së koi itre xan. (Rom. 10:13-15) E tro sa catre ham, me amë panëne la aja i itre xan, ke tro hë Iehova lai a nyisinee së epine palua. w22.12 6-7 par. 15-16

Ijije hi troa thapa la madrine së la kola axösisi së. Nge, tro sa seseu me xou ke, thatre kö së la ka troa traqa e thupen. Nge aqane kö lai! Ame pe, hnei Iesu hna hmekë së ka hape, ijije hi tro sa kei la easa qëmek kowe la iaxösisi. (Ioane 16:1, 2) Eje hi, loi e tro sa lapa atre ka hape, tro fe a hane axösisi së e ketre ijin. Ngo öni Iesu, ijije hi tro sa mele nyipici. (Ioane 15:20; 16:33) Ame la kola wathebone la hmi së, ke tro sa kapa la itre hna amekötine qaathene la filial, me itre qatre thup. Itre hna amekötine lai, ka troa thupëne la mele së, me xatua së tro palahi a kapa la itre itusi së, me cainöjëne la maca ka loi. Haawe, trongëne jë la itre hna amekötine cili. (Iako. 3:17) Ketre, the hamëne pi kö kowe la itre atr hne së hna thatre, la itre ithuemacany göne la itre trejin.—Ate cai. 3:7. w22.12 20-21 par. 14-16

Iesu mina fe enehila a xatuane la itre hlue i Iehova ka cainöjëne la Baselaia e cailo fen. Tune la hnei Iesu hna thingehnaean, nyidrëti a ini së la aqane troa cainöj jëne la organizasio i Iehova, me hamë së la itre jia ne huliwa matre eatrëne hnyawane la huliwa cili. (Mat. 28:18-20) Easa kuca la hnei Iesu hna amekötine koi së, ene la troa catre cainöj me inine la itre atr me hmek, qëmeken tro Iehova a apatrene la fene celë. Loi e tro sa trongëne la hna qaja ngöne Heberu 6:11, 12, matre troa catrecatre la mejiune së “uti hë la pun.” Ase hë Iehova sa la drai me hawa ne tro Nyidrëti a apatrene la fene i Satana. Ame ngöne la ijine cili, tro Nyidrëti a eatrëne asë la itre hnei Nyidrëti hna perofetan e hnine la Tusi Hmitrötr. Maine jë tro sa mekune ka hape, tha canga traqa palakö la drai cili. Ngo ame pe, “tha tro kö a hmit” la drai Iehova (Hab. 2:3) Haawe, catre jë së “teqe Iehova,” me ‘mejiune kowe la Akötresie atre amele së.’—Mika 7:7. w23.02 19 par. 15-16

Ame la hna thel hnene la ka eli wetr ke, ene la troa traqa e koho hune la wetr. Ngo, ame ngöne la gojeny, ke nyimu götran hnë tro angeic a cil matre goeën la itre hna xup xötreithi angeic. Ketre tu së fe, loi e tro sa xomi ijine troa lapa mekun la aqane xatua së hnei Iehova ngöne la easa cile kowe la itre jol. Ame la kola fenes la drai, isa hnyinge jë ka hape: ‘Tune kaa la aqane amanathithi ni hnei Iehova enehila? Tha patre kö la jole theng, ngo tune kaa la aqane xatua ni hnei Iehova troa xomihnin ej?’ Pane mekune jë la ketre ewekë hnei Iehova hna kuca matre xatua epun troa cile catr. Maine jë epuni a thithi koi Iehova matre apatrene la jole i epun. (Fil. 4:6) Ngo, the thëthëhmine kö la itre manathith hnei Iehova hna hamë epun enehila. Mekune palakö lo hnei Nyidrëti hna qaja laka, tro kö Nyidrëti a ithuecatre koi epun me xatua epun troa cile catr. Celë hi matre amamane jë la hni ne ole i epun kowe la ixatua i Nyidrë. Ame e cili, tro hë epuni a öhne laka, ngacama epun ngöne la itupath, tro kö Iehova a xatua epun troa cile catr.—Gen. 41:51, 52. w23.01 19 par. 17-18

Isa hnyinge jë ka hape: ‘Kolo kö a mama ngöne la meleng laka, easenyi hë troa apatrene la fene celë? Eni kö a amamane ka hape, ka sisitria la huliwa i Iehova hune la troa ini aqeanyi maine huliwa i maseta? Xecie kö koi ni laka, tro Iehova a thupë ni me faming?’ Pane mekune jë la madrine i Iehova la Nyidrëti a öhnyi epun a amë panëne la aja i Nyidrë ngöne la mele i epun! (Mat. 6:25-27, 33; Fil. 4:12, 13) Loi e tro palahi sa waipengö së, me saze la itre thiina së ka ngazo. Öni Paulo kowe la angetre Korinito: “The mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie.” (2 Kor. 13:5) Nyipiewekë tro palahi sa e la Tusi Hmitrötr matre ahnyipixen la aqane mekune së. Celë hi ka troa xatua së troa waiewekë tui Iehova, me amadrinë Nyidrë.—1 Kor. 2:14-16. w23.01 9 par. 5-6