Okotropa

Ame ngöne la itre icasikeu, ijije hi tro sa nyima catr me hane qaja la itre mekun hne së hna isa hnëkën. Ame itre xan, angatr a xou troa nyima me hamë mekun. Hapeu, celë fe hi ka traqa koi epun? Maine eje hi, troa xatua epun hnene la aqane kuca itre xan matre troa elë hune la itre jole cili. Ame göi nyima, itre xan a öhne la enyipiewekëne troa nyima qa kuhu hni. Easa thinge la itre nyima pine laka, easa ajane troa atrunyi Iehova. Ame la easa hnëkëne la itre icasikeu, loi e tro fe sa thinge la itre nyima me thele la kepin matre ka ihmeku la nyima memine la itre mekun ka tru ne la icasikeu. Loi e tro sa mekun la itre trengewekë, ngacama thatreine kö së nyima. Ame koi itre xan, jole catre koi angatr troa hamë mekun ngöne la itre icasikeu. Nemene la ixatua? Loi e troa hamë mekune lapa. Tha nyipiewekë kö e ka hopatre hi la mekun hna qaja. Iehova a madrine la easa nue trengecatr, matre troa atrunyi Nyidrë ngöne la itre icasikeu me elë hune la xou. w22.04 7-8 par. 12-15

Ame la hnëewekë “ixatuang” ke kola qaja la ketre atr ka canga nyinyape troa wang la ketre atr ka aja ixatua. Pane mekune jë la Iehova a nyinyape troa canga xatuane la atr ka akötr. Kolo hi lai a amamane la trenge aja i Iehova troa xatua së. E ce Iehova me easë, tro kö sa madrin ngöne la itre jol. Nemene la aqane xatua së hnei Iehova? Troa sa koi së hnene la tusi Isaia. Pine nemen? Ame la itre hna perofetan hnei Isaia ke, thatraqane la itre hlue i Iehova enehila. Nge ame la aqane qejepengöi Iehova hnei Isaia, ke ka hmaloi hi tro sa trotrohnin. Tro sa ce wang la tusi Isaia mekene 30. Ame ngöne la mekene celë, Isaia a qaja la itre ceitune ka amamane la aqane xatuane Iehova la nöje i Nyidrëti ekö. Iehova a xatua së enehila ngöne la Nyidrëti a (1) dreng me sa la itre thithi së, (2) eatrongë së, me (3) amanathithi së enehila me elany. w22.11 8 par. 2-3

Hnei Iesu hna ithuecatr kowe la ekalesia ne Semurina me Filadelefia laka, tha tro kö angatr a xouene la iakötrë, ke tro kö angatr elanyi a kapa la itre manathith. (Hna ama. 3:10) Loi e tro sa lapa atre ka hape, tro fe a hane axösisi së, matre nyipiewekë tro sa hnëkë. (Mat. 24:9, 13; 2 Kor. 12:10) Tusi Hna Amaman a qaja ka hape, troa akötrëne la nöje i Akötresie ngöne la hneijine i easë, ene “la drai i Joxu.” (Hna ama. 1:10) Kola qaja ngöne Hna Amaman mekene 12 laka, thupene la kola acile la Baselaia i Akötresie, ke hna isi e hnengödrai. Mikaela, ene Iesu Keriso me trongene isi nyidrë a isi me Satana me itre dremoni. (Hna ama. 12:7, 8) Thupene lai, hna ngaa Satana me itre dremoni me ukapië angatr kowe la fen. Celë hi matre, akötre catr la itre atr.—Hna ama. 12:9, 12. w22.05 5 par. 12-13

Meköti palahi la aqane axecië mekune i Iehova. Tha ka iwangatrehmekunyi atre kö Nyidrë. Nge tha Nyidrëti kö a goeëne la atr thenge la pengöi angeic, me manie i angeic, me götrane qa i angeic, memine la hnei angeic hna atreine kuca. (1 Sam. 16:7; Iako. 2:1-4) Pëkö ka atreine musinë Nyidrë me nyithupei Nyidrë. Ketre, tha Nyidrëti kö a axecië mekun cememine la elëhni. (Eso. 34:7) Haawe, Iehova hi la atre iameköti ka sisitria, ke atre hnyawa hi Nyidrë la pengö së memine la hne së hna melën. (Deu. 32:4) Önine la itre ka cinyanyine la Tusi Hmitrötr qene Heberu ka hape, ka sisitria catre kö la aqane nue Iehova la ngazo. Ame ngöne la itre xaa götran ne la Tusi Hmitrötr, hna huliwane la ketre hnëewekë qene Heberu göne la aqane nue Iehova la itre ngazo së. Önine la ketre itus, “hna huliwan hmekuje hi la hnëewekë cili koi Akötresie, ngo tha koi itre atre kö.” Iehova hmekuje hi la ka atreine nue hnyawane la ngazo ne la atr ka ietra. w22.06 4 par. 10-11

Maine jë, epuni a hetrune caasine la itre nekö i epun, maine pena tha ka hmi kö la föi epun. Ame pe, ketre ithuecatre ka tru koi itre xan, la tulu ne lapaune i epun. Ngo tune kaa e pëkö thangane kowe la nekönatr la itre hnei epuni hna kuca? Tha tro kö a thëthëhmine laka, hmitr e troa inine la nekönatr. Ame la easa tra feja ke, thatre kö së laka, troa wa wen e ketre ijin. Ame pe, easë palahi a fi. (Mar. 4:26-29) Ketre tune fe la itre thin, thatre kö epun e hna ketr la hni ne la itre nekö i epun hnene la nyipici. Ngo maine tro palahi epuni a kuca la hnei epuni hna atrein matre troa ini nyudren, epuni hi lai a aijijë nyudreni troa nyi sinee i Iehova. w22.04 19-20 par. 16-17

Ame lo Solomona palakö a nyihlue i Iehova, atreine hi angeic tulu ewekë. Ame lo angeic a nekötrahmany, atre hi angeic la itre ifego i angeic, matre hnei angeic palahi hna sipo ixatua koi Iehova. (1 Ite jo. 3:7-9) Ketre, atre hnyawa hi angeic la thangane la pi tru. Ngazo pe, tha hnei Solomona kö hna trongëne la itre eamo i angeic. Tha qea ju kö thupen lo kola asë acili joxu angeic, hnei angeic hna nuetrij la itre hna amekötine hnei Iehova. Ame hi lai ketre ke, ene lo wathebo kowe la itre joxu. Kola hape, tha tro kö la joxu a nyimu föe, ke tro lai a ananyi angeic qaathei Iehova. (Deu. 17:17) Tha hnei Solomona kö hna trongëne la wathebo cili. Matre traqa koi 700 lao föe i angeic, me 300 lao hany. (1 Ite jo. 11:1-3) Ma ame jë la mekuna i Solomona, tha tro kö angeic a hane kei. Nemene hë la ka traqa? Hnei Solomona hna xeni pun la itre huliwa i angeic. Nge hnei Iehova hna nuetriji angeic.—1 Ite jo. 11:9-13. w22.05 23 par. 12

Nyipiewekë tro la itre atr enehila a ië ewekë hnyawa. Tro jë kö angatr a ië Iehova maine Satana, ithupëjia me Nyidrë? Loi e tro angatr a iën. Troa hetre thangane kowe la mele së la mekun hne së hna troa axeciën. (Mat. 25:31-33, 46) Ame ngöne la ijine “akötr atraqatr,” tro hmekuje hi a mel la itre ka hetre hatren. (Hna ama. 7:14; 14:9-11; Ezek. 9:4, 6) Maine hnei epuni hna ië Iehova, ke, ketre mekune lai ka lolo catr. Ame enehila, aja i epuni fe troa xatuane la itre xan troa hane ië Iehova. Hetre itre manathith hna troa kapa hnene la itre ka isigöline la musi Nyidrë. Loi e tro fe sa atre hnyawa la itre ini cili. Celë hi ka troa acatrene la aja së troa nyihlue i Iehova. Ketre, jëne la hne së hna inin, ijiji easë troa xatuane la itre xan troa ië Iehova, me mele nyipici koi Nyidrë. w22.05 15 par. 1-2

Loi e tro sa drei Iehova, ngo tha itre ithupëjia kö. Hnei Iobu hna dreng hnyawa la Iehova a ithanata koi angeic. Hnei Iehova hna hnying koi Iobu matre tro angeic a öhne laka, Iehova a hnimi angeic. E thupen, hnei Iobu hna amamane la ipië i angeic me olene koi Iehova. Öni angeic: “Hnenge hna drenge la kola qeje nyipë, ngo ame hë enehila, öhnyi nyipëti hë ni.” (Iobu 42:5) Iobu a qaja la itre trengewekë cili, lo ijine angeic a lapa ngöne la hnatresij, nge tiqa la ngönetrei angeic hnei piagotre. Ame ngöne la ijine cili, hnei Iehova hna amamane la ihnimi Nyidrë, me madrine i Nyidrë koi Iobu. (Iobu 42:7, 8) Ame fe enehila, kola qaqa easë me thaipië easë. Nge kolo fe a silitrengathoi së, memine la organizasio Iehova. Ame pe, mejiune Iehova laka, tro kö sa mele nyipici ngöne la itre itupath. w22.06 24 par. 15-16

Nyipici, tru la madrin e hnengödrai ngöne la kola troa lepe apatrenyi Babulona Atraqatr, ngo hetre ketre ewekë kö ka troa hamë madrin koi angatr. (Hna ama. 19:1-3) Ketre ijine lai ka sisitria hna qaja ngöne la tusi Hna Amaman, ene la “faipoipo ne la Neköi Mamoe.” Troa acasine la ala 144 000 lao hna iën qëmekene troa nyiqane la isi Amagedro. Ngo, tha ijine faipoipo pala kö. (Hna ama. 21:1, 2.) Troa faipoipo la Neköi Mamoe thupene la isi Amagedro, e patre hë la itre ithupëjia me Akötresie. (Sal. 45:3, 4, 13-17) Nemene la aliene la faipoipo ne la Neköi Mamoe kowe la itre hna iën? Tune la aqane acasine la trahmanyi me föe ngöne la faipoipo, kolo fe a troa acasi Iesu Keriso, memine la “föi” nyidrë, ene la ala 144 000. Celë hi ka troa atrune la Baselaia i Akötresie ka troa mus kowe la fen ngöne la 1 000 lao macatre.—Hna ama. 20:6. w22.05 17 par. 11-13

Hnei Iesu hna qaja ka hape, ame ngöne la itre drai ne la pun, tro nyidrëti a acil la “hlue ka nyipici me ka inamacan” matre hamëne la xen qaathei Akötresie kowe la itretre drei nyidrë. (Mat. 24:45) Iesu a nyijëne la ketre neköi gurup hna iën hnei uati hmitrötr matre thawa la “xeni ngöne la nyipi ijin” kowe la nöje i Akötresie, me kowe la itre atr ka ajan troa atre Nyidrë. Ame pe, tha angatre kö a musinëne la lapaune i itre xan. (2 Kor. 1:24) Ngo, atre hi angatre laka, Iesu la “mekene me ate musi” kowe la itretre drei nyidrë. (Is. 55:4) Qaane lo 1919, hnene la hlue ka nyipici me ka inamacan hna hnëkëne la itre itus matre xatuane la itre atr troa atre la nyipici qa hnine la Tusi Hmitrötr. Ame lo 1921 (1923 ngöne la qene Wiwi), hna mama la itus La Harpe de Dieu matre xatuane la itre atr troa atre la itre ini ka tru qa hnine la Tusi Hmitrötr. Ame e thupen, tru catr la itre itus hna kuca hnene la hlu. Nemene la itus ka xatua epun troa easenyi koi Iehova me hnimi Nyidrë? w22.07 10 par. 9-10

Pëkö ketre atr ka ham tui Iehova. Ame la nöjei ewekë hnei epun hna hamë Nyidrë, ke tro hmaca kö Nyidrëti a hamëne atrun koi epun. (Mar. 10:29, 30) Tro Nyidrëti a hamë epun la mele ka loi, ka hetre aliene ngöne la fene celë ka ngazo. Ijiji epuni mina fe troa nyihluene la Keme i epun uti hë epine palua. Nge tro fe lai a acatrene catrëne la aqane imelekeu i epun me Nyidrë. Pane mekune jë laka, tro hë epun a mele palua tui Nyidrë! Ame la epuni a nue la mele i epun koi Iehova me xomi bapataiso, ke epuni hi lai a hamëne la ketre ahnahna koi Nyidrë. Qaathei Nyidrëti asë hi la nöjei ewekë ka loi hnei epun hna kapa, memine la itre ijine madrin hnei epun hna melën. Haawe, loi e tro epuni a nyihlue i Nyidrë cememine la hni ka pexej me nyipici matre olene koi Nyidrë. E cili, tro hë epun a hamëne kowe la Atre Xup la hnengödrai me ihnadro la ketre ewekë ka pë thei Nyidrë. (Iobu 1:8; 41:11; Ite edomë 27:11) Aqane tro hi epuni lai a huliwan hnyawane la mele i epun. w23.03 6 par. 16-17

Ame la easa jeune catrehnine catr la aja troa ce meköl. Maine jë tro la itre xaa jeune a uku eö troa kuci ngazo. Nge kolo hi lo aja i Satana lai. Nemene la ka troa xatua eö troa wië qëmeke i Iehova? (1 Thes. 4:3, 4) Ame la eö a thith koi Iehova, qaja asë jë koi Nyidrë la itre aliene hni eö. Nge sipo Nyidrëti jë troa xatua eö troa cile catr qëmekene la itre itupath. (Mat. 6:13) Tha aja i Nyidrëti kö troa ameköti eö, ngo tro pe a xatua eö. (Sal. 103:13, 14) The thele pi kö troa nyinyine casine lai jol. Ce ithanatane jë me kaka me nenë. Ngacama tha ka hmaloi kö troa ithanatan la itre ewekë cili, ngo ka nyipiewekë. E jë la Tusi Hmitrötr, nge lapa mekune ju la itre trepene meköt. Celë hi ka troa xatua eö troa axecië mekun ka amadrinë Iehova. Tro hë eö lai a öhn laka, tha ka nyipiewekë kö troa hetre wathebo göne la nöjei pengöne ewekë, ke atre hë eö la mekuna i Iehova. w22.08 5 par. 10-12

Nyipiewekë catre tro la he ne la fami a eatrëne la hnëqa i angeic, ene la troa thupëne hnyawa la itre atrene la fami angeic. Maine ketre he ne fami epun, ma epuni a xouene troa pë nyine nyi thupe i xen me uma. Ma epuni fe a xouen e troa upi epuni elanyi qa ngöne hna huliwa i epun, nge tro hmaca epuni a thele huliwa ka lolo. Maine xou i epuni fe troa ahmaloeëne la mele i epun, wanga tha mele pi epuni tune ekö. Alanyim la itre atr ka kei kowe la hnö i Satana cili. Aja i Satana tro sa mekune ka hape, tha Iehova fe kö a hnehengazo së, nge isa qanyi së kö ketre isine troa thupëne la fami së. Ame la ejolene ke, tro hë së lai a huliwa meci koi maseta, nge uti fe hë la tro sa thëthëhmine la itre trepene meköti Iehova. w22.06 15 par. 5-6

Akötresie “ka utipin nge ka itrotrohni, nge ka hmitre troa elëhni, nge ka tru trenge ihnimi nyipici, me nyipici.” (Eso. 34:6) Aja i Iehova la meköt. (Is. 61:8) Akötre catre Nyidrë la Nyidrëti a goeë së a akötr, matre tro kö Nyidrëti a apatrene la itre akötre së ngöne la nyipi ijin. (Iere. 29:11) Hapeu, tha ketre mejiune kö la, ka amadrinë së? Celë hi ka acatren la ihnimi së koi Iehova! Nemene la ketre kepin matre easa wangatrun la nyipici? Ame la ketre kepin, ke hetre eloine la troa atre la nyipici. Ame la nyipici qa hnine la Tusi Hmitrötr, ke kolo fe a qaja la mejiune së kowe la itre drai elany. Tune la ketre iuhni ka cilaxome la he, tro la mejiune së hna nyitrepene hnei Tusi Hmitrötr a xatua së troa cile catr ngöne la itre jol. Ame ngöne la xötre ne la topik celë Paulo a qaja la mejiun ne la itre keresiano hna iën ka troa mel e koho hnengödrai. Ngo thatraqane mina fe la itre keresiano ka mejiun troa mele palua ngöne la paradraiso e celë fen. (Ioane 3:16) Eje hi, ame la easa atre la mejiun kowe la mel ka pë pun, ke hetre aliene hë la mele së. w22.08 14-15 par. 3-5

Ihnim la ka upi së troa mejiun koi itre xan. Ame la itre igötranene la ihnim hna qaja ngöne 1 Korinito mekene 13, ke kola upi së troa mejiun maine mejiune hmaca koi itre xan. (1 Kor. 13:4-8) Kola qaja ngöne la xötre 4 ka hape, “ame la ihnim, tre ka xomihni me menyik.” Iehova a xomihni së la easa ngazo koi Nyidrë. Celë hi matre loi e tro fe sa xomihnine la itre trejin, la angatr a qaja maine kuca la itre ewekë ka aelëhni së maine akötrë së pena. Önine la xötre 5 ka hape, ame la ihnim tre “tha ka canga elëhni kö. Nge tha ka lapa fë trenge hni kö.” Tha tro kö sa hnehen la nöjei ngazo hna kuca koi së matre troa amexeje hmaca ngöne la ketre ijin. Kola qaja ngöne Ate Cainöj 7:9 ka hape, ‘tha tro kö sa canga drengakötrën.’ Thele jë troa goeëne la itre trejin tui Iehova. Tha Nyidrëti kö a mekune lapane la itre tria i angatr ke, tru la ihnimi Nyidrë koi angatr. Matre loi e tro sa nyitipu Nyidrë. (Sal. 130:3) Tha tro kö sa goeën la itre thiina ka ngazo i angatr, ngo la itre thiina ka loi.—Mat. 7:1-5. w22.09 3-4 par. 6-7

Tusi Daniela a e wengën la itre ewekë ka troa traqa ngöne la itre drai ne la pun. Daniela 12:1 a qaja ka hape, tro Mikaela ene Iesu Keriso a ‘cilëgölin la nöje i Akötresie.’ Hna nyiqane eatr la hna perofetane celë lo macatre 1914, lo kola acili Joxu Iesu ngöne la Baselaia i Akötresie e hnengödrai. Daniela fe a qaja ka hape, tro Iesu a “cil” ngöne la ‘ijine akötr laka, tha hna hane kö tun qaane la kola xötrei lapane la ihnadro utihë la ijine cili.’ Ame la “ijine akötr” cili, ke kolo “akötr atraqatr” hna qaja ngöne Mataio 24:21. Nge tro Iesu a cil, kolo lai a hape, tro nyidrëti a isigöline la nöje i Akötresie ngöne lo pun la ijine akötr e Amagedro. Tusi Hna Amaman a hëne la nöje cili ka hape, ka alanyimu atraqatr, “angatr a xulu qa ngöne la akötr atraqatr.”—Hna ama. 7:9, 14. w22.09 21 par. 4-5

Kolo hi lai a amamane ka hape, ijije hi troa xometrij la itre ëje hna cinyanyine ngöne la itus. Kösë hnei Iehova hna cinyanyine hnei crayon la itre ëj. (Hna ama. 3:5, ithuemacany.) Haawe, loi e tro palahi sa isine matre tro la ëje së a lapa e hnine la itusi cili, utihë la Iehova a cinyianyine ej hnei peen. Ame la pane gurup hna cinyanyine la ëj e hnine la tusi ne mel, ke kola qaja la itre hna iën troa ce musi me Iesu e hnengödrai. Öni Paulo kowe la itre trejin ne Filipi ka hape, hna cinyanyine la ëje ne la itre hna iën troa ce musi me Iesu ngöne la tusi ne mel. (Fil. 4:3) Ngo maine aja i angatr tro la ëje i angatr a lapa palua ngöne la itus, loi e tro angatr a mele nyipici. Nge e tro angatr a mele nyipici utihë la mec maine utihë la kola nyiqane la akötr atraqatr, tro ha cinyanyine palua la ëje i angatr e hnine la itus.—Hna ama. 7:3. w22.09 14 par. 3; 15 par. 5-6

Tro sa xom la ketre ceitun. Kola kuci xen koi epun hnene la ketre atr. Ngo pine laka, pëkö ijine i epun troa xen, maine epuni pena a mekune la ketre ewekë matre epuni a xen nyimenyimëne la trepa i epun. Ame la kola pë la trepa i epun, epuni lai a öhne laka, tha drenge ju kö epun la ehnyapane la xen. Ceitune hi lai memine la easa e la Tusi Hmitrötr. E tro sa e nyimenyimëne la Tusi Hmitrötr, ke tha öhne kö së la itre maca qaathei Iehova. Ame la epuni a e la Tusi Hmitrötr, xomi ijine jë troa mekun la itre ewekë ka traqa, me dreng la itre nine ithanata, me lapa mekun la hnei epuni hna e. E tro epuni a kuca lai, ke tro hë epuni lai a madrin. Hnei Iesu hna acil “la hlue ka nyipici me ka inamacan” matre troa thawa la xen qaathei Iehova ngöne la nyipi ijin. Nge kola mana la xen enehila. (Mat. 24:45) Ame la xen hna thawa hnene la hlu, ke kola qaja la itre itus me video hna nyitrepene hnene la Tusi Hmitrötr.—1 Thes. 2:13. w22.10 7-8 par. 6-8

Ase hë Tusi Hmitrötr qaja ka hape, ame ngöne la itre drai ne la pun, troa tru hnei atr ka ihnyima sai. (2 Pet. 3:3, 4) Angatr a “tro thenge la itre sipu aja i angatr, matre kuca la ka tha meköti kö.” (Iudra 7, 17, 18) Nemene la nyine troa kuca matre tha tro kö sa ujë tune la itre ka ihnyimasai? Tha tro pi kö sa ce tro memine la itre atre cili. (Sal. 1:1) Kolo lai a hape, tha easë kö a hane dreng maine e pena la itre hna cinyanyine hnene la itre ka iamenumenu. E tha hmeke kö së, ke canga tro hi së lai a qajangazone la itre hna amekötine hnei Iehova memine la organizasio i Nyidrë. Celë hi matre nyipiewekë tro palahi sa hnying ka hape: ‘Eni kö a canga kapa me drengethenge la itre hna amekötin me itre ini ka hnyipixe? Nge eni kö a qajangazone la itre trejin ka elemeken?’ E tro sa canga wenë amekötine la aqane mekune së, ke tro së lai a amadrinë Iehova.—Ite edomë 3:34, 35. w22.10 20 par. 9-10

Hnene la uati hmitrötr i Akötresie hna xatua Ezekiela troa cainöj kowe la itre atr ne la teritoare i angeic ka “cate meke me xeti hni.” Öni Iehova mina fe koi Ezekiela ka hape: “Ase hë ni acatene la qëmeke i ’ö hmekune la qëmeke i angat, memine la göpadi ’ö hmekune la göpadi angat. Ase hë ni celohmëne la göpadi ’ö mate tune la [diamant ka catr] hune la [silex]; the qou kö e angat, nge the hmengöhmengön’ ene la ite qëmeke i angat.” (Ezek. 3:8, 9) Kösë Iehova a qaja koi Ezekiela ka hape: ‘The kucakuca kö pine la nöje cili. Tro kö ni a aegöcatrenyi ö.’ Hnene la uati hmitrötre i Iehova hna trosai Ezekiela kowe la teritoar hnei angeic hna troa cainöje ngön. Öni Ezekiela, “Cate la [ime] i Iehova hung.” Ca wiik hnei Ezekiela hna pane lapa troa trotrohnine la maca hnei angeic hna troa tro fë kowe la nöj. (Ezek. 3:14, 15) E thupen, hnei Iehova hna trosai angeic kowe la hnathup, nge hna löthi angeic hnene la ua. (Ezek. 3:23, 24) Ka hnëkë hë Ezekiela troa tro fë la maca. w22.11 4-5 par. 8-9

Tru catre la itre jol hna cile kow hnei Habakuka perofeta. Hnei angeice fe hna luelu laka, tha Iehova hmaca kö a meku angeic. Matre hnei Habakuka hna fe la hni angeic koi Iehova. Hnei Iehova hna sa la thithi Habakuka. (Hab. 2:2, 3) Thupene lai, hnei Habakuka hna lapa mekun la aqane iamele i Iehova, matre madrine hmaca pi hi angeic. Xecie koi angeic laka, Iehova a hnimi angeic me xatua angeic troa cil kowe la itre jol. (Hab. 3:17-19) Nemene la ini koi së? Ame la easa cile kowe la itre jol, loi e tro sa fe la hni së koi Iehova, me thele ixatua thei Nyidrë. E tro sa kuca tune lai, tro kö Iehova a hamë së la trengecatr ka ijij. Ame hë la easa öhne la ixatua qaathei Nyidrë, tro ha catrecatre la lapaune së koi Nyidrë. Maine tro palahi sa easenyi koi Iehova, tha tro kö sa nue la ketre jol troa ananyi së qaathei Nyidrë.—1 Tim. 6:6-8. w22.11 15 par. 6-7

Easenyi hë tro Iesu memine la lue atrekënö hna ce athip me nyidrë a mec, matre tru catr la akötre i angatr. (Luka 23:32, 33) Hnei nyidro hna pane hnyimasai nyidrë. (Mat. 27:44; Mar. 15:32) Ngo e thupen, saze pi hi la aqane ujë ne la ketre. Öni angeic: “Iesu, the thëthëhmi ni kö e lö jë nyipë kowe la Baselaia i nyipë.” Matre hnei Iesu hna sa me qaja la itre trengewekë ne la topik ne la drai. (Luka 23:39-42) Itre trengewekë i Iesu kowe la atrekënö a upi së troa lapa mekun la mele së elanyi ngöne la paradraiso. Tru la itre ini hne së hna xom qa ngöne la aqane mel la itre atr fene la musi Solomona. Pine laka, sisitria catre kö Iesu hui Solomona, matre tha nyine qaja kö la mele së elanyi fene la musi nyidrë me itre hna iën. (Mat. 12:42) Ketre, loi e tro la ‘itre xa mamoe’ a atre la nyine tro angatr a kuca matre troa mele palua ngöne la paradraiso.—Ioane 10:16. w22.12 8 par. 1; 9 par. 4

Isaia a amamane e celë laka, tro Iehova a dreng la easa hë koi Nyidrë, nge tro Nyidrëti a sa la itre thithi easë. Nge öni Isaia: “E [drenge] hë, tro nyidëti a sa koi ’ö.” Kolo hi lai a amamane la trenge aja i Iehova troa xatuane la itre ka hë koi Nyidrë. Celë hi ka xatua së troa madrine ngöne la itre jol. Iehova a dreng la itre thithi së isa ala cas. Hnauëne laka, qaja jë së lai? Ame ngöne la qane la Isaia mekene 30, Iehova a qaja la hnëewekë “itete” me “angat” ke, Nyidrëti a ithanata kowe la nöj asë. Ngo ame ngöne la xötre 19, Nyidrëti a hape, “eö” ke Nyidrëti a ithanata kowe ala cas. Öni Isaia: “Tha trojë kö eö a teij;” “tro nyidëti a hnimi eö;” “tro nyidëti a sa koi ’ö.” Tro Iehova, Keme ka ihnim a wangatrunyi së isa ala cas, me wangatrune la itre thithi së.—Sal. 116:1; Is. 57:15. w22.11 9 par. 5-6

Ame la easa cainöjëne la maca ka loi ngöne la itre ijine ngazo, ke hetre tingetinge së me madrin. Ame ngöne lo hneijin ne la itre pane keresiano, hnene la itre musi angetre Iudra hna wathebone la itre aposetolo troa cainöj. Ngo hnei angatr hna drengethenge Akötresie. Hnei angatr hna catre cainöj, nge madrine catr angatr. (Itre hu. 5:27-29, 41, 42) Ngo loi e tro palahi sa hmek, e hna wathebone la hmi së. Maine tro sa isine troa kuca la itre huliwa i Iehova, tro hë sa kapa la tingeting, ke easa amadrinë Nyidrë, nge easë fe a amelene la itre atr. Loi e troa xecie koi së laka, ijije hi tro sa tingeting, ngacama traqa ju hë la itre jol. The thëthëhmine kö laka, Akötresie hi la ka ijije troa hamë së la tingetinge cili. Catre jë mejiune koi Iehova, e traqa ju la ketre mec ka ixötrekeu, maine ketre hulö, maine iaxösisi pena. Qale catre jë kowe la organizasio i Nyidrë. Nge lapa mekune jë la itre drai elanyi ka mingöming. E cili, “tro hë la Akötresie ne tingeting a ce me [së].”—Fil. 4:9. w22.12 21 par. 17-18

Nyipiewekë tro sa nue trengecatr. Eje hi, tha ka hmaloi kö troa xometrij la trengehni, me elëhni, me iwesitrë qa kuhu hni së. (Efe. 4:31, 32) Pine nemene matre jole catr troa saze la itre thiina së? Pine laka, ase hë lapane la hni së hnene la itre xaa thiina cili. Öni Tusi Hmitrötr, hetre atr ka “canga elëhni, nge ka pi iöni hatrë.” (Ite edomë 29:22, NWT) Thupene la bapataiso, nyipiewekë tro palahi sa isine troa nuetrij la itre thiina ka ngazo. (Rom. 7:21-23) Qaja jë koi Iehova la itre thiina hnei eö hna pi saze, nge tro kö Nyidrëti a drei eö, me xatua eö. (1 Ioane 5:14, 15) Tha tro kö Iehova a apatrene la thiina i eö cili, ngo tro Nyidrëti a xatua eö troa nuetrije la thiina cili. (1 Pet. 5:10) Ketre, the kuca kö la itre ewekë ka troa ahlëne hmaca lai thiina cili. Nge the ahlëne kö thei eö la itre aja ka ngazo.—Fil. 4:8; Kol. 3:2. w23.01 10 par. 7, 9-10

Ame la ketre aqane tro sa amamane la ihnimi së koi itre xan, ke ene la troa catre cainöj. Loi e tro sa ithanata kowe la nöjei atr hne së hna ixelë memin, ngacama isa hane ngönetrei së kö, me tribu, me huliwa, me göhnë hna cilën ngöne la nöj. Aqane tro hi së lai a kuca la aja i Akötresie, matre “tro la nöjei pengön atr a mel, me atrehmekune hnyawa la nyipici.” (1 Tim. 2:4) Ame la ketre aqane tro sa amamane la ihnimi së koi Iehova me Iesu, ke ene la troa hnime la itre trejine me easë. Loi e tro sa nyipiewekë angatr, me xatua angatr troa cile kowe la itre jol. Ketre, loi e tro sa ithuecatr koi angatr ngöne la kola mec la ketre sinee i angatr, me hane wai angatr la angatr a wezipo. Nge, maine angatr a kucakuca, isine jë troa hamë ithuecatr koi angatr. (2 Kor. 1:3-7; 1 Thes. 5:11, 14) Loi e tro palahi sa thithi sai angatr. Nge the thëthëhmine kö, “ka hetre thangane catre la thithi ne la atre ka meköt.”—Iako. 5:16. w23.01 28-29 par. 7-8

Tune la atr ka xupi uma, tro hë angeice lai a atreine huliwa hnyawa thupene la itre macatre. Ketre tu së fe, itre macatre thupen, tro hë së lai a atreine xatuane la itre trejin. Ijiji hi tro sa xatuane la ketre trejin troa xomihnine la jol i angeic, me qaja la itre tulu ne la itre hlue i Iehova ekö ka hane melëne la jole cili. (Heb. 11:32-35; 12:1) Ketre easa thele tingeting ngöne la easa qaja aloine la itre trejin ne la ekalesia. Loi mina fe tro sa thel troa cas me canga iloi ngöne la kola iwesitrë e hnine la ekalesia. (Efe. 4:3) Ijije fe tro sa acatrene la lapaune ne la itre trejin, ngöne la easa amaman koi angatr la aqane troa isigölin la lapaun i angatr, me xatua angatr e nöjei drai. Madrine catre së troa acatrene la lapaun ne la itre trejin. Ame la thangan la huliwa së, ke ka epine palua, tha ka ceitu kö memine la ketre uma ka troa patr! w22.08 22 par. 6; 25 par. 17-18

Hnei Iesu hna qaja la ketre thiina ka nyipiewekë matre tro sa atre la aliene la Tusi Hmitrötr, ene la trotrohnin. (Mat. 24:15) Nemene la trotrohnin? Kola qaja la troa atreine öhne la ka acasine la lue mekun, maine ka aisapengönëne lue ej. Nge celë hi ka xatua së troa öhne la itre mekun ka tha canga mama kö. Ketre, tune la hna qaja hnei Iesu, nyipiewekë tro sa hetrenyi la trotrohnine matre öhne la aqane eatr la itre hna perofetan hnei Tusi Hmitrötr. Ka nyipiewekë la thiina cili matre troa kepe thangane qa ngöne la hne së hna e ngöne la Tusi Hmitrötr Iehova a hamëne la trotrohnin kowe la itre hlue i Nyidrë. Haawe, sipone jë koi Nyidrë troa xatua epun troa huliwane la thiina cili. Tune kaa la aqane tro epuni a ujë thenge la thithi epun? Lapa mekune ju la itre ini hnei epun hna e, nge wange ju ka hape, ka ihmeku kö memine la itre hnei epuni hna atre. Thele jë troa trotrohnin la ketre xötr ne la Tusi Hmitrötr, me aqane tro epuni a trongën. (Heb. 5:14) Maine tro epuni a huliwane la trotrohnine ngöne la epuni a e Tusi Hmitrötr, tro hë epuni a atre hnyawa la aliene ej. w23.02 10 par. 7-8

Pane mekune jë ka hape, tro la sinee i epun a hamë epun la ketre tablo ka tru thupene catr. Ngacama qatre catre hë lai tablo, nge pëhë han, ngo ka tru palahi la thupen. Matre tro epuni lai a nyipiewekën, me thupëne ej hnyawa. Ketre tune mina fe, hnei Iehova hna hamë së la ketre ahnahna ka sisitria, ene la mel. Eje hi, ka tru koi Iehova la mele së ke, hnei Nyidrëti hna upe la Nekö hnimina i Nyidrë troa meci pi së. (Ioane 3:16) Iehova la Qeqene mel. (Sal. 36:9) Ka xecie hnyawa lai koi Paulo aposetolo. Öni angeic: “Easë a mel me enij hnei nyidrë.” (Itre hu. 17:25, 28) Celë hi matre easa qaja ka hape, ahnahna qaathei Akötresie la mel. Ketre, hnei Nyidrë hna hamëne la ka nyipiewekë kowe la mele së. (Itre hu. 14:15-17) Tha Iehova kö a kuca la itre iamamanyikeu matre thupëne la mele së. Ngo aja i Nyidrëti pe tro sa isa thupëne la mele së, me catre nyihlue i Nyidrë.—2 Kor. 7:1. w23.02 20 par. 1-2

Easa olene koi Iehova la hna hamë së la Tusi Hmitrötr! Ej a qatrenge la itre eamo ka xatua së troa cile kowe la itre jol. Eje fe a hamë mejiune së kowe la mel elany. Nge ame la ka nyipiewekë catr, ke ej a amamane koi së la itre thiina i Akötresie, la Atrekë Ewekëne la Tusi Hmitrötr. Ame la easa lapa mekune la itre thiina i Nyidrë, ke kola jele la itre aliene hni së, me easenyi së koi Nyidrë. (Sal. 25:14) Aja i Iehova tro la itre atr a atre Nyidrë. Ame ekö, hnei Nyidrëti hna mama kowe la itre atr jëne la itre pu me itre hna meköle goeën, maine jëne la itre angela. (Num. 12:6; Itre hu. 10:3, 4) Ngo hapeu, tro sa trotrohnine tune kaa la itre hna puj, me itre hna meköle goeën, me itre maca cili, e tha hna cinyanyine kö? Celë hi matre hnei Iehova hna upe la itre atr troa ‘cinyanyine ngöne la ketre itus’ la itre mekuna i Nyidrë. Pine laka ‘meköti la aqane ujë i Akötresie,’ matre xecie koi së laka, troa hetre thangane koi së me koi itre xan la Tusi Hmitrötr.—Sal. 18:30. w23.02 2 par. 1-2

Thele jë la itre mekun nyine troa eatrën. Iëne jë la itre mekun nyine troa eatrëne ka troa acatrene la lapaune i eö, me xatua eö troa macaj. (Efe. 3:16) Tune la troa catre ini Tusi cas me e Tusi Hmitrötr e nöjei drai. (Sal. 1:2, 3) Ketre, loi e tro eö a thithi lapa, me fe la hni eö koi Iehova. Maine pena, troa iëne hnyawane la itre nyine iamadrinë me huliwane hnyawan la traem i eö. (Efe. 5:15, 16) Maine eö a ajane troa macaj, nyipiewekë tro eö a xatua itre xan. Thele jë troa xatuane la itre trejin ne la ekalesia, ka qatre hë maine ka adikape. Hnyinge jë ka hape, ajane kö angatr troa komisio i angatr? Maine amamane pena la aqane huliwane la tablet me mobilis. Ketre, tro eö a amamane la ihnimi eö kowe la itre atr, ngöne la eö a cainöjëne la maca ka loi ne la Baselaia. (Mat. 9:36, 37) Nge e ijij, xome jë la huliwa ne pionie. w22.08 6 par. 16-17