Nofeba

Tha tro kö la itre Keresiano a iqaqa. Ngo loi e tro fe sa thipetrije la itre xaa aqane ithanata ka iakötrë. Eje hi, tha tro kö sa qaja angazone la aqane mele ne la itre xan, me itre xaa tribu, me itre xaa nöj. Ketre, tha tro kö sa xöjetriji itre xan. Loi pe troa ithuecatre me qaja aloine la itre xan. Tha tro kö sa ixöjetrij me eetr. Maine ju, nyimutre la itre kepin matre tro angetre Isaraela a hetre hni ne ole. Ngazo pe, hnei angatr palahi hna eetr. Loi e tro sa thupën, wanga tro sa ixomi thiina. Pane mekune jë lo 10 lao ka alamekëne la nöj. Hnei angatr hna thoi, matre “hna nyi ulili koi Mose . . . hnene la ite nekö i Isaraela asë.” (Num. 13:⁠31–14:4) Ngo maine tro pena sa qaja aloine la itre xan ke, tro hë lai a hetre eloin. Celë hi matre, loi e tro palahi sa qaja aloine la itre xan. w22.04 8 par. 16-17

Qaane ekö, hnei Iehova palahi hna xatuane la itre nekötrahmanyi me neköjajinyi troa nyisinee i Nyidrë. Maine hetre aja ne la itre nekö i epun, ijije hi tro Iehova a xatua nyudren troa easenyi koi Nyidrë. (1 Kor. 3:6, 7) Ketre, ngacama tha ka nyihlue i Iehova kö nyudren, ngo Nyidrëti palahi a thupë nyudren. (Sal. 11:4) Ame hë la nyudreni a amamane laka, nyudreni a “hmalahnine” troa kapa la nyipici, Iehova lai a xatua nyudren. (Itre hu. 13:48; 2 A. l. ite jo. 16:9) Ketre, tro Iehova a xatua epuni troa iëne hnyawa la nyine tro epuni a qaja koi nyudren, nge ngöne la nyipi ijin. (Ite edomë 15:23) Ijije fe tro Iehova a upe la ketre trejin troa xatuane la nekö i epun. Nge e tru hë angatr elany, ijije hi tro Iehova a amekunë angatr la itre ini hnei epuni hna hamën ngöne lo angatr a co. (Ioane 14:26) Eje hi, tro kö Iehova a amanathithine la itre trengecatr me tulu hnei epuni hna hamën kowe la itre nekönatr, jëne la aqane ithanata me aqane ujë i epun. w22.04 21 par. 18

Pine laka, tha ijiji Satana hmaca kö troa elë e hnengödrai, matre angeic a nu asë la trenge elëhni angeic kowe la itre hna iën e celë fen, itre jini ne la Baselaia, itre ka xome “la huliwa ne anyipici Iesu.” (2 Kor. 5:20; Efe. 6:19, 20) Ame lo 1918, hna akalabusine la 8 lao trejin ka elemekene la organizasio. Matre kösë “meci” hë la huliwa ne la itre hna iën. (Hna ama. 11:3, 7-11) Ngo ame lo macatre 1919, hna nue angatr hmaca qa ngöne la kalabus. Tha qea ju kö, nge angatr hmaca a xejë la huliwa ne cainöj. Ngo tha cile kö Satana akötrëne la nöje i Akötresie. Qane ju hi lai, Satana a neng kösë “hneopegejë” la itre iakötrë kowe la itre hlue i Akötresie. (Hna ama. 12:15) Enehila hi la ijin tro sa “cile hut, me lapaun.”—Hna ama. 13:10. w22.05 5-6 par. 14-16

Hnei Ioane aposetolo hna meköle goeëne la lue gurup ka isigöline la musi Iehova, me kapa la itre manathith ka epine palua. Ame la pane gurup, ke, ala 144 000 angatr. Hna ië angatr qa celë fen matre troa ce musi me Iesu ngöne la Baselaia e hnengödrai. Tro angatr me Iesu a ce musinëne la fen. (Hna ama. 5:9, 10; 14:3, 4) Ioane a meköle goeë angatr a ce cil me Iesu ngöne la Wetre Ziona. (Hna ama. 14:1) Qane hë ekö, itre thauzan la itre atr hna iën troa sine la ala 144 000. (Luka 12:32; Rom. 8:17) Öni Ioane, ame ngöne la itre drai ne la pun, tha tru pe kö la itre hna iën e celë fen. (Hna ama. 12:17) Ame ngöne la ijine akötr atraqatr, troa xomi angatr a tro hnengödrai matre acasi angatr memine la itre xaa hna iën. E cili, tro angatr a ce musi me Iesu ngöne la Baselaia i Akötresie.—Mat. 24:31; Hna ama. 5:9, 10. w22.05 16 par. 4-5

Hnei Iesu hna inine la itretre drei nyidrë la aqane troa goeë angatre kö. Öni nyidrë koi angatr: “Ame nyipunie, goi hna e fe la itre pene he i nyipunie.” (Mat. 10:30) Troa ketri së hnene la trengewekë celë, e ka majemine së wangaconyi së. Kolo hi lai a amamane ka hape, Iehova a wangatrunyi së. Haawe, the mekune pi kö ka hape, tha ka nyipiewekë kö së koi Iehova, nge tha ijiji së kö troa hane kapa la mele ka pë pun. Qane hë ekö, kola ithuecatre koi së hnene la zonal Ita Ne Thup, troa atreine tulu ewekë. Hane hi la hna qaja hnene la ketre Ita Ne Thup: “Tha aja së kö troa sasaithi tulu, me pi mama, me pi tru. Ketre, tha aja së kö troa hane mekune ka hape, ka sisitria catre kö së hui itre xan, nge atre ju kö së koilo hui angatr. Waea! Ame la aja së ke, tro sa atreine tulu ewekë me atre la itre ifego së, me itre hnei easë hna atreine kuca.” w22.05 24-25 par. 14-16

Nemene la nyine tro së isa ala cas a kuca matre tro palahi a cas la ekalesia? Loi e tro sa thele tingeting. (Mat. 5:9; Rom. 12:18) Ame la easa thele tingeting memine la itre trejin ne la ekalesia, easë hi lai a amingömingöne la paradraiso ka ketrepengön. Tha tro pi kö sa thëthëhmine laka, Iehova la ka ea la itre atr kowe la paradraiso ka ketrepengön. (Ioane 6:44) Pane mekune jë la madrine i Iehova la Nyidrëti a goeë së a isine troa acatrene la tingeting me cas thene la itre hlue i Nyidrë hnei Nyidrëti hna hnim! (Is. 26:3; Hag. 2:7) Nemene la aqane tro sa kepe thangane qa ngöne la itre manathith hne së hna kapa qaathei Iehova? Loi e tro sa lapa mekun la itre ini hne së hna xom qa ngöne la Tusi Hmitrötr. Tro lai a xatua së troa melëne la itre thiina ka loi ka troa upi së troa “ihnimikeu tune la itre sipu trejin” e hnine la ekalesia.—Rom. 12:10. w22.11 12-13 par. 16-18

Ame la Iehova a nue la itre ngazo së, easa kapa “la itre ijine iakeukawanyi,” nge kola tingeting la mekuna së me mekuthetheu së. Thatreine kö la itre atr nue la ngazo tune lai, ngo Iehova hmekuje hi. (Itre hu. 3:19) Ame la Iehova a nue la ngazo së, Nyidrëti hmaca a nyisinee së, nge kösë pëkö ngazo hne së hna kuca. Ame hë la Iehova a nue la ngazo së, ke tha Nyidrëti hmaca kö a amexeje maine upezö së pine la ngazo cili. (Is. 43:25) Iehova a ananyine “la ngazo shë tune la enanyine kohië me kuë.” (Sal. 103:12) Ame la easa lapa mekun la aqane nue Iehova la itre ngazo së, ke tru la ole me xoue së. (Sal. 130:4) Tha Iehova kö a nue la itre ngazo së thenge la etrun la ngazo hne së hna kuca. Iehova la Atre Xup, me Atre Acili Wathebo me Atre Iameköti. Nge Nyidrëti a huliwan la itre hnei Nyidrë hna atre, matre troa nue la itre ngazo së. w22.06 5 par. 12-14

Iehova a hamëne la ketre mejiune ka mingöminge kowe la itre ka hnimi Nyidrë. Easenyi catre hë tro Nyidrëti a apatrene la itre sine mec, me itre akötr memine la mec. (Hna ama. 21:3, 4) Tro Nyidrëti fe a xatuane “la itre ka menyik,” ene lo itre ka mejiune koi Nyidrë troa aparadraisone la ihnadro. (Sal. 37:9-11) Ketre, tro hmaca kö a sisitria catre la imelekeu së me Nyidrëti elany, hune la aqane imelekeu së me Nyidrëti enehila. Hapeu, tha itre hna thingehnaeane kö la ka amadrinë epun? Pine nemene matre easa mejiune laka, tro kö Iehova a eatrëne la itre hna thingehnaeane celë? Ke ka eatrëne palahi Iehova la itre hnei Nyidrëti hna qaja. Celë hi lai ka uku së troa “treqe Iehova.” (Sal. 27:14) Nge easa amamane lai ngöne la easa treqene madrine la ijine tro Iehova a eatrëne la aja i Nyidrë. (Is. 55:10, 11) Loi e tro sa mele nyipici koi Iehova, ke tro kö Nyidrëti a “nyithupene kowe la itre ka thele Nyidrë.” w22.06 20 par. 1; 25 par. 18

Pine laka Iehova la he ne la fami së, xecie koi së laka, tro kö Nyidrëti a metrötrëne la trepene meköt ngöne 1 Timoteo 5:8. Maine ka xecie hnyawa koi së ka hape, Iehova hnimi së me fami së, haawe, tro kö Nyidrëti lai a hamë së la ka ijij. (Mat. 6:31-33) Aja i Iehova troa xatua së, ke ka ihnim me hame Nyidrë! Ame la Iehova xupe la ihnadro, tha hnei Nyidrëti hmekuje kö hna hamëne la ka ijij thatraqane la mele së. Ngo hnei Nyidrëti fe hna nyialiene la ihnadro, hnene la itre ewekë ka amadrinë së. (Gen. 2:9) Ngacama, co hi la hne së hna hetrenyi e itre xaa ijin, ngo loi e tro pe sa kapa madrin la hne së hna hetreny. Eje hi, hnei Iehova palahi hna hamë së la ka ijij. (Mat. 6:11) Tha tro pi kö sa thëthëhmine ka hape, ame la itre mo së ke itre ka pë pengöne lai, hune la itre manathith hne së hna kapa enehila me elany.—Is. 65:21, 22. w22.06 15 par. 7-8

Nyipiewekë troa atre Iehova hnyawa memine la Tusi Hmitrötr hnene la itre ka xötrei atre Nyidrë. Ngo tha angatr hmekuje kö. Öni Paulo aposetolo, kolo itre atre lai ka majemine trongëne la itre hnei angatr hna inin. Tro angatr a atreine wangatrehmekun la loi me ngazo. Ame enehila, ngazo catr la thiina ne la itre atr, matre jole koi së troa trongëne la itre trepene meköti Iehova. Ngo Iesu a isine matre tro palahi sa kapa la itre ini ka tru ka troa acatrene la lapaune së. Itre ini lai hna nyitrepene hnene la Trengewekë i Akötresie, ene la Tusi Hmitrötr. Tui Iesu, easa metrötrëne la ëje i Akötresie. (Ioane 17:6, 26) Ame lo 1931, hnei easë hna xom la ëj Itretre Anyipici Iehova qa hnine la Tusi Hmitrötr. Hnei easë e cili hna amamane ka hape, easa wangatrune la ëje ne la Keme së, Iehova. (Is. 43:10-12) Ketre, hnene la Tusi Hmitrötr Fene Ka Hnyipixe hna amë hmaca la ëje i Nyidrë ngöne la sipu göhnene ej. w22.07 11 par. 11-12

Ame la nyipici qa hnine la Tusi Hmitrötr, ke kolo fe a qaja la maca ka lolo ne la Baselaia i Akötresie. Hnei Iesu hna aceitunëne la nyipici göne la Baselaia memine la trengamo hna kelem. Ame ngöne Mataio 13:44, öni Iesu: “Ame la Baselaia ne hnengödrai, tre tune la trengamo hna kelem ngöne la ketre hlapa, nge hna öhn hnene la ketre atr, me juetrëne hmaca. Atraqatre la trenge madrine i angeic, ame hnei angeic hna salemën asë la itre ewekë i angeic, matre itöne la hlapa cili.” Ame ngöne la ceitune celë, tha hnene kö la atr hna thel la trengamo. Ngo ame la angeic a öhne ej, hnei angeic hna salemën asë la itre ewekë i angeic. Pine nemen? Atre hi angeic la enyipiewekëne la trengamo cili. Atre hi së laka, thatreine kö la fene celë troa hamë së la nyipi madrin. Ke ame la nyipi madrin, ke kola xulu qa ngöne la hne së nyihlue i Iehova, memine la mejiun troa kapa la mele ka pë pun elany, fen la Baselaia i Akötresie. Sisitria kö la imelekeu së me Iehova hune la nöjei ewekë hne së hna nu. Ame la aja së, ke troa “amadrinë nyidrë.”—Kol. 1:10. w22.08 15 par. 8-9; 17 par. 12

Hnei Iosefa hna atre tune kaa laka, ketre “ngazo ka tru” qëmeke i Akötresie la troa nyixetë? Ame lo Wathebo i Mose, hna hape, “The nyixetë kö,” ke hna hamëne pë hë kowe la angetre Isaraela, 200 lao macatre thupen. (Eso. 20:14) Ame pe, atre hnyawa hi Iosefa la mekuna i Iehova göne la kuci ngazo. Atre hi angeic laka, ame la faipoipo, ke kola iothekeune la ca trahmany me ca föe. Ketre, hnei angeice fe hna dreng la aqane thupë Sara qaqaa i angeic hnei Iehova, ngöne lo kola alua thel troa angazo eahlo. (Gen. 2:24; 12:14-20; 20:2-7) Jëne la hnei Iosefa hna lapa mekun la itre ewekë ka traqa, atre hë angeic la ka loi me ngazo qëmeke i Akötresie. Pine laka, tru catre la ihnimi angeic koi Akötresie, angeic a hniin la itre trepene meköti Nyidrë me trongëne itre ej. w22.08 26 par. 1-2

Kola mekun ekö ka hape, Daniela 12:2 a qaja la melehmaca e koho hnengödrai, maine pena lo kola xejë hmaca la huliwa ne cainöj, thupene lo hna pane acilëne hnene la itre ka icilekeu lo 1918. Ngo easa trotrohnine enehila ka hape, ame la hna perofetane celë ke, kola qaja la itre atr hna troa amelene hmaca ngöne la fen ka hnyipixe. Kola qaja lo melehmaca thupene la isi Amagedro. Kola hapeu la Daniela 12:2 a qaja ka hape, troa amelen la itre xan “kowe la mele ka epine palua”? Kolo lai a hape, ame la itre atr hna troa amelene hmaca, ene la itre ka atre Iehova hë me Iesu, me ka drengethenge nyidroti palahi, memine la itre ka troa atre nyidro ngöne la 1 000 lao macatre, ke tro angatr a kapa la mele ka pë pun.—Ioane 17:3. w22.09 21 par. 6-7

Tha kolo kö lai a hape, Iehova a upi së troa mejiun koi angatr, nge pë pe nyipi kepin. Ngo hnene laka hnei angatr hna amaman ka hape, ijije hi tro sa mejiun koi angatr. Loi e tro sa nue ijin matre troa mejiun kowe la ketre atr. Tune kaa la aqane tro sa acatrene la mejiune së kowe la itre trejin? Thele jë troa atre angatre hnyawa. Porotrike jë me angatr qëmeken me e thupen la itre icasikeu. Ce cainöje jë fe me angatr. Loi e tro sa atreine itreqe, me nue ijin koi angatr troa amaman laka, ijije hi tro sa mejiun koi angatr. Ame la easa xötrei atre la ketre atr, ke tha easë kö a canga fe la hni easë koi angeic. Ngo ame hë la easa atre angeice hnyawa, ke tha xou easë hë. (Luka 16:10) Ngo tune kaa e traqa ju angeic kötrefë ithanata? The canga wesitre kö koi angeic ngo pane nue ijine pi. Ketre, the nue kö la aqane ujë i angeic troa sewe eö troa mejiun kowe la itre xaa trejin. w22.09 4 par. 7-8

Hna akötrë Miqueas, ketre qatre thup hnene la itre xaa trejin ka hetre hnëqa e hnine la organizasio. Ngo, hnei angeic hna isine troa xomihni. Hnei angeic palahi hna thith, me sipo Iehova la uati hmitrötre i Nyidrë matre cile catr. Hnei angeic mina fe hna ithel ngöne la itre itusi së. Nemene la ini koi së? Maine kola akötrë së hnene la ketre trejin, thele jë troa lepetrij la itre mekun ka ngazo. Maine jë hetre kepin matre angeic a ithanata maine ujë tune lai. Ithanata jë koi Iehova jëne la thith, nge sipo Nyidrëti jë troa xatua së troa trotrohni angeic. Nue pi la ngazo i angeic, nge thele jë troa thëthëhmine la hnei angeic hna kuca. (Ite edomë 19:11) The thëthëhmine kö laka, atre hi Iehova la hne së hna melën, nge tro kö Nyidrëti lai a xatua së troa cile catr.—Ate cai. 5:8. w22.11 21 par. 5

Iëne jë la itre sinatro ka hnimi Iehova. Hetre thangane catr la itre sinatro i eö kowe la aqane imelekeu i eö me Iehova. (Ite edomë 13:20) Öni Julien, ketre qatre thup hë enehila ka hape: “Ame lo eni a jeune, hnenge hna iëne troa nyisineene la itre trejin ka ce cainöj me eni. Itre ka catre cainöj angatr matre hnenge hna öhne laka, ka hamë madrin la huliwa ne cainöj. . . . Maine hnenge ju hi hna iën la itre sine xötreng, ke triane pë hë ni la itre xaa aqane mel ka mingöming.” Nemene la nyine tro eö a kuca, e tha sinatro ka lolo kö la ketre atren la ekalesia? Atre hi Paulo laka, hetreny e hnine la ekalesia, ngöne lo ijine ne itre pane keresiano, la itre sinatro ka tha loi kö. Celë hi matre hnei angeic hna hmekë Timoteo, troa iananyi me angatr. (2 Tim. 2:20-22) Ka nyipiewekë catr la aqane imelekeu së me Iehova. Hnei easë hna nue trengecatr matre acatrene la aqane imelekeu së me Nyidrë. Haawe, the nue pi kö la ketre atr troa angazone lai. w22.08 5-6 par. 13-15

Tha ceitui easë kö memine la itre ka methinëne la eamo i Akötresie, ke easa wangatrune la itre mekuna i Nyidrë me itre trepene meköti Nyidrë. Ame la easa goeëne la pun kowe la itre ka idrei me ka tha idrei, ke kola uku së troa trongëne la itre trepene meköti Akötresie. Pane goeëne jë la aqane ngazone la mele ne la itre atr ka thipetrije la itre eamo i Iehova! Hapeu, tha madrine kö së laka, mingöminge me lolo la mele së, ke easa drengethenge Akötresie? (Sal. 32:8, 10) Aja i Iehova tro asë hi së a hetrenyi la inamacan, ngo tha Nyidrëti kö a musinë së. Ame pe, Nyidrëti a amamane la itre thangane ka ngazo hna troa kapa hnene la itre ka xelene la inamacane i Nyidrë. (Ite edomë 1:29-32) Tro “angat’ a xeni [pune] la thina i angate kö.” Troa traqa koi angatr la itre akötr me hleuhleu utihë la Iehova a apatrenyi angatr. Ngo ame kö la itre ka drengethenge Iehova me trongëne la itre trepene meköti Nyidrë, ke ase hë thingehnaeane koi angatr ka hape: “Ame la ate dei ni, te, troa lapa xetietë; nge tro angeic’ a lapa hnyawa, nge tha qouene la ngazo.”—Ite edomë 1:33. w22.10 21 par. 11-13

Ame la atr ka xoue Iehova ke, angeic a metrötrë Nyidrë, nge xele angeic troa kuca la ketre ewekë ka troa akötrë Nyidrë. (Ite edomë 16:6) Matre angeic a isine troa trongëne la itre trepene meköti Iehova göi loi me ngazo, thenge la hna qaja hnei Tusi Hmitrötr. (2 Kor. 7:1) Nge maine tro sa kuca la itre ewekë hnei Iehova hna ajan, me nuetrij la itre ewekë hnei Nyidrëti hna methinën, tro së lai a madrin. (Sal. 37:27; 97:10; Rom. 12:9) Maine jë, atre hi la ketre atr laka, Iehova hmekuje hi la ka ijij troa amekötine la ka loi me ka ngazo. Ngo loi e tro fe angeic a trongëne la itre trepene meköti Nyidrë. (Rom. 12:2) Haawe, loi e tro sa amamane ngöne la aqane ujë së laka, nyine loi koi së la itre trepene meköti Iehova. (Ite edomë 12:28) Celë hi hna qaja hnei Dravita. Öni angeic göi Iehova: “Tro [nyipëti] a amamane koi ni la jëne mel; tiqa la madine [qëmeke] i [nyipë]; nge ngöne la [ime] maca i [nyipë] la ite nyine amadin’ epine palua.”—Sal. 16:11. w22.10 8 par. 9-10

Ka atreine tulu ewekë nge ka ipië Iesu. Qëmekene tro nyidrëti a traqa e celë fen, hnei nyidrëti palahi hna catre huliwa koi Iehova. Atre hi së ka hape, “jëne [Iesu], hna xup la nöjei ewekë asë e hnengödrai me e celë fen.” (Kol. 1:16) Ame lo kola bapataiso Iesu, hnei nyidrë hna mekune hmaca lo itre hnei nyidrë hna kuca ekö memine la Keme i nyidrë. (Mat. 3:16; Ioane 17:5) Tha hnei Iesu kö hna pi mama, me pi tru fë la inamacane i nyidrë. Öni Iesu kowe la itretre dreng göne la traqa i nyidrë e celë fen, ka hape: “Tha [eni] kö a traqa troa hetre hlu, ngo troa nyihlu, me hamëne la mele[ng] nyine nyi thupene mel kowe la ka ala nyim.” (Mat. 20:28) Ketre, hnei nyidrëti fe hna qaja amamane ka hape, thatreine kö nyidrë kuca xanëne la ketre ewekë. Drei la ketre tulu ne ipië! Haawe, catre pi së nyitipu Iesu. w22.05 24 par. 13

Qëmekene tro Iehova a nue la ngazo ne la ketre atr, Nyidrëti a pane wang ka hape, atre kö lai atr laka, ka ngazo la hnei angeic hna kuca. Celë hi hnei Iesu hna qaja ngöne Luka 12:47, 48. Ketre ngazo ka tru la troa kuca la ketre ewekë ka ngazo, nge atre hnyawa hi së laka, tro lai a akötrë Iehova. Ma tha tro kö Iehova lai a nue la ngazo i angeic. (Mar. 3:29; Ioane 9:41) Ngo hapeu, tro kö Iehova e cili a nue la itre ngazo së? Öö! Hetre ketre kepine mina fe ka uku Iehova troa nue la ngazo, ke loi e tro la atr a nyipi ietra. Ame la atr ka ietra, ke “angeic a saze la aqane mekun me aqane ujë i angeic.” Angeic fe a hace pine la itre ewekë ka ngazo hnei angeic hna kuca memine la itre ewekë ka loi hnei angeic hna tha kuca. Angeic a akötr pine laka, ngazo catr la itre huliwa hnei angeic hna kuca, nge nanyi hë angeic qaathei Iehova. w22.06 5-6 par. 15-17

Itre ithupëjia a silitrengathoine la itre trejin ka elemeken la organizasio i Iehova. (Sal. 31:13) Ame itre xan ke, hna othi angatr me upezö angatr ceitu me itre ka ihumuth. Hna traqa fe lai kowe la itre pane keresiano ekö, ngöne la kola upezö Paulo aposetolo me othi nyidrë. Hnene la itre xane hna iananyi me Paulo aposetolo, ngöne lo kola akalabusi nyidrë e Roma. (2 Tim. 1:8, 15; 2:8, 9) Tune kaa Paulo ngöne la ijine cili? Hnei nyidrë hna cile kowe la itre jole ka tru, göi nue mele fe nyidrë pi angatr. (Itre hu. 20:18-21; 2 Kor. 1:8) Epi tha tro kö sa tune la itre trejin ka nuetriji Paulo! Matre tha sesëkötre kö së laka, Satana a nue la trengehni angeic kowe la itre trejin ka elemeken la organizasio i Iehova. Ame la aja i angeic ke, ene la troa thë la aqane mele nyipici së koi Iehova me axounyi së. (1 Pet. 5:8) Catre jë xatuane la itre trejin me mele nyipici koi angatr.—2 Tim. 1:16-18. w22.11 16-17 par. 8-11

Ketre atre Iudra lo atrekënö ka ietra, hna athip ezi Iesu. Casi hi la Akötresie hna nyihluen hnene la angetre Iudra, ngo ame la itre atre ne fen ke, ka nyimu haze. (Eso. 20:2, 3; 1 Kor. 8:5, 6) Maine atre ne fene ju lo lai atrekënö, ke tro pe la hnyinge ne la topik ne la drai a hape, “Tha xou i eö kö la itre haze?” Ketre, tha hna upi Iesu kö kowe la nöjei atr asë, ngo hna upi nyidrëti hi kowe “la itre mamoe ka paatr ne Isaraela.” (Mat. 15:24) Hnei Akötresie hna amamane kowe la angetre Isaraela laka, tro kö Nyidrëti a amelene la itre ka mec. Atre hnyawa hi lai hnene la atrekënö. Nge ka xecie koi angeic laka, tro Iehova a amele Iesu hmaca me acili nyidrë troa joxu ne la Baselaia. Nge angeice fe a ajan tro Akötresie a amele angeic hmaca. Pine laka, atre Iudra la atrekënö ka ietra, matre ame hi la paradraiso hnei angeic hna atre, ke kolo paradraiso hnei Iehova hna ami Adramu me Evati ngön. Celë hi matre ame la Iesu a qeje paradraiso ngöne Luka 23:43, canga mekune hi angeic la ketre gatrane ka mingöming e celë fen.—Gen. 2:15. w22.12 8-9 par. 2-3

Tro sa eatrëne hnyawa la huliwa ne cainöj jëne hi la ixatua ne la uati hmitrötre i Iehova. Pine nemen? Pine laka, Satana a isine troa acilëne la huliwa ne cainöj. (Hna ama. 12:17) Thatreine kö la atr troa cile cas koi Satana. Ngo jëne la huliwa ne cainöj, easë hi lai a ngaa Satana! (Hna ama. 12:9-11) Pine nemen? Ke ame la easa catre cainöj, easë hi lai a amamane ka hape, tha easë kö a xoue Satana. Ame la easa xomi ijine troa cainöje trootro, ke ketre aqane tro hi së lai a ngaa Satana. Jëne la uati hmitrötre i Iehova, atreine hi së eatrëne hnyawa la huliwa ne cainöj, nge kolo hi lai a amamane ka hape, ce Iehova me easë. (Mat. 5:10-12; 1 Pet. 4:14) Tro la uati hmitrötr a xatua së troa cil kowe la itre jol ka troa traqa ngöne la huliwa ne cainöj. (2 Kor. 4:7-9) Nemene la nyine tro sa kuca matre tro palahi sa kapa la uati hmitrötr? Tro sa catre sipo Iehova la uati hmitrötr, ke Nyidrëti a dreng la itre thithi së. w22.11 5 par. 10-11

Ame la aqane tro sa hnime la itre trejine me easë, ke, ene la troa mele tingetinge me angatr. Matre, easa isine troa nyitipune la aqane nue Iehova la itre ngazo së. Hnei Iehova hna nue la nekö i Nyidrë troa meci pine la itre ngazo së, haawe, loi e tro fe sa nue la ngazo hna kuca koi së hnene la itre trejin. The tune kö lo hlue ka ngazo ngöne lo ceitune i Iesu. Ka tru catre lo gufa i angeic, ngo hna nu hnene la maseta. Ngo tha hnei angeice kö hna nu la gufa ne la ketre hlu, ngacama ka co hi. (Mat. 18:23-35) Maine hetre iwesitrë i epun memine la ketre trejin ne la ekalesia, loi e traqa pë hë la Drai Ne Amekunën, nge ase hë epon iloi. (Mat. 5:23, 24) Tro hë lai a mama hnyawa e cili, la ejuine la ihnimi epun koi Iehova me Iesu. w23.01 29 par. 8-9

Loi e tro la itre qatre thup a hnyingëne kowe la itre trejin la hnei angatr hna ajan. (Ite edomë 20:5) Loi e troa hnyingëne ka hape, hetre a i angatre kö, me drösinöe maine itre xaa ewekë ju kö? Hapeu, tro kö a pë huliwa i angatr, maine upi angatr qa ngöne la hnalapa i angatr? Angatre kö a aja ixatua matre nyialiene la itre pepa ne sipo koi mus? Aja i Iehova tro asë hi së a ithuecatr me itö ixatua. (Gal. 6:10) Ngacama ame koi easë, co hi la hne së hna kuca kowe la ketre trejin ka wezipo, ngo ame koi angeic, ka tru catr. Ijije hi tro la ketre nekönatr a hamë tus maine desë kowe la ketre trejin. Ijije fe tro la ketre nekötrahmanyi a komisio kowe la ketre trejin föe. Ijiji epuni kö troa kuci xen kowe la ketre trejin ka wezipo? Hnene la itre xaa trejin hna cinyanyi tus matre olene koi itre qatre thup, ke tru catr la itre huliwa i angatr ngöne la itre ijine cili. Mingöminge catr la easa isine troa “ithuecatrekeu me itö ixatua”!—1 Thes. 5:11. w22.12 22 par. 2; 23 par. 5, 6

Ngacama atre hnyawa hi la itre Sadukaio la faif lao pane itus ne la Itre Hna Cinyihan qene Heberu, ngo tha trotrohnine kö angatr la itre ini ka nyipiewekë. Ame lo ketre ijin, hnei angatr hna hnying koi Iesu göne la melehmaca matre tra thethi nyidrë. Ngo, öni nyidrë koi angatr: “Tha hane kö nyipunieti e hnine la itusi Mose, lo Akötresie a qaja koi angeic ngöne la sinöe ka ithinyi ka hape: ‘Eni la Akötresi Aberahama, me Akötresi Isaaka, me Akötresi Iakobo’?” (Mar. 12:18, 26) Anyimua e hë la itre Sadukaio la itre xötre cili. Ngo, kösë Iesu hi lai a qaja koi angatr ka hape, tha trotrohnine kö angatr la ketre ini ka sisitria ne la Itre Hna Cinyihan, ene la melehmaca. (Luka 20:38) Nemen la ini koi së? Ame la easa e la Tusi Hmitrötr, nyipiewekë tro sa thele hnyawan la itre ini ngöne la itre xötr maine itre hna melën. Aja së troa trotrohnine la itre ini ka tru ngöne la ketre xötr, ngo memine fe la itre nyipici me itre trepene meköt ka tha canga mama kö. w23.02 11 par. 9-10

Ame la itretre anyipicine hna qaja ngöne la topike së, ke hnei angatr asë hi hna cile kowe la itre jol ka tru, ngo hnei angatr palahi hna mele nyipici koi Iehova. (Heb. 11:36-40) Ka gufa kö la itre trengecatre i angatr? Waea! Nyipici laka, tha hane ju kö angatr öhne la itre hna thingehnaean, ngo hnei angatr palahi hna mejiune koi Iehova. Nge Iehova a madrine koi angatr. Matre xecie koi angatr laka, tro kö angatr a öhne elany la itre hna thingehnaean. (Heb. 11:4, 5) Tro la tulu i angatr a xatua së troa catre mejiune koi Iehova. Ame enehila, kola tro ngazo la fen. (2 Tim. 3:13) Nge Satana palahi a tupath la itre hlue Iehova. Ngacama tru ju hë la itre jol ka traqa koi së, ngo easa isine troa catre huliwa koi Iehova, me “mejiune kowe la Akötresie ka mel.”—1 Tim. 4:10. w22.06 25 par. 17-18

Ame la ketre kepin matre nyipiewekë troa thupëne la mele së, ke tro lai a xatua së troa nyihlue i Iehova hnyawa. (Mar. 12:30) Easa neëne la itre ewekë ka troa apoizinëne la ngönetrei së. (Rom. 12:1) Ngazo pe, kuca ju hë së la hne së hna atrein, ngo tro palahi sa wezipo. Ame la easa thupëne la mele së, ke easë hi lai a amamane kowe la Keme së ka hape, easa metrötrëne la ahnahna, ene la mel. Maine jë, easa wezipo me utipië trootro, matre tha ijiji easë hë troa huliwa tun ekö. Celë hi matre hace me hleuhleu la mele së. Ngo ame pe, tha tro kö sa kucakuca me wangahmalohmaloeëne la mele së. Pine nemen? Pine laka, qatre ju hë së, me wezipo, ngo tui Dravita, ijiji së palahi troa atrunyi Iehova. Madrine catre së troa atre ka hape, Akötresie a wangatrunyi së ngacama tha ka pexeje kö së! (Mat. 10:29-31) E traqa ju së a mec, ke Iehova kö a lapa treqene la ijin troa amele së hmaca. (Iobu 14:14, 15) Haawe, kuca asë jë la hne së hna atreine matre troa thupëne hnyawane la mele së. w23.02 20-21 par. 3-5

Ame la ëjene la ka alanyimu atraqatr, ke thupene Amagedro, tro palahi a mama la ëje i angatr e hnine la itus. (Hna ama. 7:14) Ame la itre ka troa mele pe qa ngöne la isi Amagedro, ke angatre hi la ‘itre xa mamoe’ ka troa kapa “la mele ka pë pun.” (Mat. 25:46) Ngo tha tro kö angatr a canga kapa la mele ka pë pun. Ame ngöne la 1 000 lao macatre, tro Iesu a “troxomi angatr kowe la itre qeqe ne timi ne mel.” Matre ame la itre ka xötrethenge Iesu me mele nyipici koi Iehova ngöne la itupath tixenuë, ke tro ha cinyanyine palua la ëje i angatr ngöne la tusi ne mel. (Hna ama. 7:16, 17) Ngo ame la itre nani, ke itre hna troa apatrene ngöne la isi Amagedro. Öni Iesu, tro angatr a “tro kowe la meci ka epine palua.” (Mat. 25:46) Nge öni Paulo, troa ‘ameköti angatr . . . tro ha apatrene palua’ angatr.—2 Thes. 1:9; 2 Pet. 2:9. w22.09 16 par. 7-8

Ame la itre fami a ce ngenu me goeëne la itre hna xup, ke angatr a madrin nge kola acatrene la aqane imelekeu i angatr. Hnei Iehova hna acile la paradraiso, matre tro sa mele madrin ngöne la ihnadro ka mingöming. Celë hi matre, madrine catr la itre fami troa xomi ijine troa eli wetr maine ce tro koi hnagejë. Ame ngöne la fen ka hnyipixe, tro la itre kem me thine me itre nekönatr a madrine troa goeën la itre hna xup. Tha tro hmaca kö sa xouene la itre öni, nge ketre tui nyudreni fe. (Is. 11:6-9) Nge, tro sa madrine kowe la itre hnei Iehova hna xup, uti hë epine palua. (Sal. 22:26) Ngo itre kem me thine fe, the treqene kö la fene ka hnyipixe matre troa inine la itre nekö i epun troa wangatrune la itre hna xup. Huliwane jë pe la itre ewekë cili, matre xatua nyudren troa atrepengöi Iehova hnyawa. Tro hë nyudren e cili a qaja tui Dravita joxu ka hape: “Joxu fe, . . . pëkö huliwa ka tune la ite huliwa i [nyipë].”—Sal. 86:8. w23.03 25 par. 16-17