Diseba

Ka hnëkë hnyawa kö la atre Aithiope troa xomi bapataiso? Hnene la atre Aithiope hna “tro troa hmi e Ierusalema.” (Itre hu. 8:27) Angeice fe la ketre trenyiwa ka kapa la hmi angetre Iudra. Hnei angeic hna thele troa atre Iehova jëne la Itre Hna Cinyihan Qene Heberu. Tru la aja i angeic troa atre Iehova hnyawa. Hnei Filipo hna öhnyi angeic a e catrëne la ketre itus hna ewath hna cinyanyin hnei Isaia perofeta. (Itre hu. 8:28) Aja i angeice fe troa thele ajuin. Hnei angeic hna tro qa Aithiope troa hmi e Ierusalema. Hnei Filipo hna ce thawa memine la atre Aithiope la itre ini ka sisitria hnei angeic hna thatre. Hnei Filipo hna qaja amamane koi angeic ka hape, drei la Mesia. (Itre hu. 8:34, 35) Hna kökötr la ihnimi angeic koi Iehova me Iesu. Celë hi ka saze la mele i angeic, ene pe, hnei angeic hna xomi bapataiso me xötrethenge Iesu. Öhne hi Filipo laka, ijiji hë kowe la atre Aithiope troa xomi bapataiso, ame hna bapataiso angeice jë. w23.03 8-9 par. 3-6

Thatreine kö tro sa amadrinë Iehova, e tha qaja kö së la nyipici. (Ite edomë 6:16, 17) Ame kowe la itre atr enehila, tha ka ngazo kö troa thoi. Ngo tha tro kö sa thëthëhmine la aja i Iehova. (Sal. 15:1, 2) Nyipici, tha easë kö a thoi ngacama ka co hi. Ngo tha tro kö sa juetrëne la itre ithuemacanyi koi itre xan. Ketre, tha tro kö sa kötre fë ithanata. (Ite edomë 25:23; 2 Thes. 3:11) Maine easa öhne laka, kola nyiqane qaja angazone la ketre trejin, loi e tro sa saze porotrik. Alanyimu la itre atr enehila ka huliwane menune la ahnahna qaathei Iehova, ene la troa atreine ithanata. Tro hë Nyidrëti lai a amanathithi së e tro sa huliwane la ahnahna cili ngöne la hna cainöj, ngöne la itre icasikeu, me ngöne la easa porotrik e nöjei drai. Ame hë la kola troa paatre la fene celë ka ngazo, tro ha hmaloi koi së troa atrunyi Iehova, jëne la aqane ithanata së.—Iudra 15. w22.04 9 par. 18-20

Ihnimi Iehova me Iesu a upi së troa hnimi nyidro. (1 Ioane 4:10) Nge kola kökötre catre la ihnimi easë koi nyidro, la easa atre ka hape, hnei Iesu hna meci pi së. Tui Paulo lo nyidrëti a qaja kowe la angetre Galatia, ka hape: ‘Nekö i Akötresie la atre hnimi ni, me meci pi ni.’ (Gal. 2:20) Jëne la thupene mel, hnei Iehova hna ee së koi Nyidrë, matre hane jë fe së nyisinee i Nyidrë. (Ioane 6:44) Kola ketri së la easa atre ka hape, hnei Iehova hna öhne la ketre ewekë ka loi the së, me huujëne la nekö hnimina i Nyidrëti matre tro sa nyisinee i Nyidrë. Hapeu, tha kolo kö lai a acatrene la ihnimi epun koi Iehova me Iesu? Isa hnyinge jë ka hape: ‘Hetre nyine tro kö ni a kuca koi nyidro?’ Ihnimi së koi Iehova me Iesu, a upi së troa hnime la itre xan.—2 Kor. 5:14, 15; 6:1, 2. w23.01 28 par. 6-7

Jëne la Tusi Hmitrötr, Iehova a xatua së troa “nyi hlue i nyidë hnene la hni ka cas.” Hnei Iehova hna upe la itre atr troa cinyanyine la Trengewekë i Nyidrë matre tro hmekuje hi la itre atr ka ipië a trotrohnin. (Luka 10:21) Alanyim la itre ka e la Tusi Hmitrötr. Ngo itre atr ka ipië hmekuje hi la ka trotrohnine hnyawa me trongëne la itre ini. (2 Kor. 3:15, 16) Hane hi la aqane mama la inamacane i Iehova e hnine la Tusi Hmitrötr. Jëne la Tusi Hmitrötr, Iehova a inine la ka alanyim, ngo Nyidrëti fe a ini së isa ala cas. Ame la easa e la Tusi Hmitrötr, drenge hi së la ihnimi Iehova. (Is. 30:21) Hna hane kö traqa koi epun la ewekë celë? Epuni a ithele e hnine la Tusi Hmitrötr, nge öhne ju hi epun la xötr ka ihmeku hnyawa memine la hnei epun hna melën. Eje hi, hna cinyanyine la Tusi Hmitrötr kowe la itre milio lao atr. Ngo hnauëne kö laka, ej a qatrenge la itre eamo ka nyipiewekë palahi enehila, nge ka ihmeku memine la itre aja së isa ala cas? Ke Iehova la Atrekë Ewekën nge ka pë ifegon la inamacane i Nyidrë.—2 Tim. 3:16, 17. w23.02 4-5 par. 8-10

Itre nyipi Keresiano së pine laka, tru la ihnimi së koi Iehova. Celë hi matre, easa hamëne la ka sisitria koi Nyidrë. Ngo nyipiewekë tro sa thele la itre mekun hne së hna troa eatrën ngöne la huliwa i Iehova, tune la troa eënyine la itre thiina ka lolo, me maca troa xome la ketre hnëqa e hnine la ekalesia, me xatuane la itre xan. Pine nemene matre nyipiewekë tro sa maca ngöne la huliwa i Akötresie? Pine laka, easa ajane troa amadrinëne la Keme së ka ihnim e koho hnengödrai. Tru la madrine i Iehova ngöne la easa huliwane la itre hne së hna atrein matre troa nyihlue i Nyidrë me xatuane la itre trejin. (1 Thes. 4:9, 10) Ngacama ekö hë së ngöne la nyipici, ngo nyipiewekë tro palahi sa thele troa maca ngöne la huliwa i Iehova. w22.04 22 par. 1-2

Tro la itre mus a apatrenyi Babulona Atraqatr, ene la itre hmi ka thoi. E cili la kola nyiqane la akötr atraqatr. Tro kö la itre atr a nyinyape thele Iehova? Waea. Kola qaja ngöne la mekene 6 ne la tusi Hna Amaman ka hape, tro la itre ka tha nyihlue i Iehova kö a kötre zae thene la itre mus me itre ka salem, hna aceitunën me itre wetr. Pine laka, tha angatre kö a cilëgöline la Baselaia i Akötresie, ceitui angatr me itre ithupëjia me Iehova. (Luka 11:23; Hna ama. 6:15-17) Ame ngöne la ijine cili, tro kö a mama la itre hlue i Iehova. Angatre pe hi la ka nyihlue i Nyidrë e celë fen, me xele ma isigöline la “öni ka ses.”—Hna ama. 13:14-17. w22.05 16-17 par. 8-9

Tha easë hmekuje kö a cainöjëne la “maca ka loi ne la Baselaia.” (Mat. 24:14) Easë fe a xatuane la itre angela ngöne la huliwa i angatr, hna qaja ngöne Hna Amaman mekene 8 koi 10. Itre angela a qaja la itre ewekë ka troa traqa kowe la itre ka icilekeu memine la Baselaia i Akötresie. Matre easë, itre hlue i Iehova a tro fë la ketre maca hna aceitunëne me “wene mani ka catr me eë.” Kola amamane hnene la maca cili la aqane tro Akötresie a amekötine la fene i Satana. (Hna ama. 8:7, 13) Loi e tro la itre atr a atre ka hape, calemi hë la pun, matre tro angatr a saze me hane mel ngöne la drai ne elëhni Iehova. (Zef. 2:2, 3) Ngo ketre maca lai hna xele ma dreng hnene la itre atr. Matre loi e tro sa catr, la easa tro fë la maca cili. Nge ame ngöne la ijine akötr atraqatr, ke tro kö a catrehnine catr la maca ne iameköti.—Hna ama. 16:21. w22.05 7 par. 18-19

Hanawange la lue Keresiano ka xötrei hnaho. Ame ekö, hnei nyidro hna lapa drenge la itre cainöj thatraqane la itre keme me thin. Ngo pine laka, hetre nekö i nyidroti hë, tro hë nyidro a trongëne la itre eamo hna qaja ngöne la itre cainöj. Ketre hnëqa lai ka tru koi nyidro! Eje hi, ame la kola saze la mele së, tro fe lai a saze la aqane trotrohnine së la itre trepene meköti ne la Tusi Hmitrötr. Celë hi kepine matre, easë itre Temoë Iehova, a e Tusi Hmitrötr lapa. Easa nyitipune la itre joxu ne Isaraela ekö, itre ka lapa mekune la wathebo Iehova e “nöjei drai.” (Deu. 17:19) Itre keme me thin, hnei epuni hna kapa la ketre manathith ka tru, ene la troa inine la itre nekö i epun troa hnimi Iehova. Eje hi, tha tro hmekuje kö epun a ini nyudren troa atre Iehova. Ngo loi e tro mina fe epun a xatua nyudren troa hnimi Nyidrë. w22.05 26 par. 2-3

Tha tro hmekuje hi së a akötr pine la ngazo hnei easë hna kuca. Ngo loi e tro fe sa saze la aqane ujë së. Ame la kepin matre Iehova a nue la itre ngazo së, ke loi e tro sa ujë. Ame la atr ka ujë, ke angeic a saze la itre thiina i angeic. Angeic a nuetrij la itre aqane ujë i angeic ka ngazo, me xötrëne la jë i Iehova. (Is. 55:7) Loi e tro angeic a xome la aqane waiewekë i Iehova. (Rom. 12:2; Efe. 4:23) Ketre, loi e tro fe angeic a isine troa nuetrij la aqane mekun me aqane ujë i angeic ka ngazo. (Kol. 3:7-9) Ngo ame la ka nyipiewekë catr matre tro Iehova a nue la itre ngazo së, ke ene la troa lapaune kowe la mel hna huujën hnei Keriso. Tro sa kepe thangan qa ngöne la huuje i Iesu, e tro sa nue trengecatr troa saze la aqane ujë së.—1 Ioane 1:7. w22.06 6 par. 16-17

Ka ngazo palahi la thiina ne la itre atr. (Ate cai. 8:9) Ame enehila ke, ngazo catre la aqane huliwane la mus hnene la itre atr. Kolo palahi a elë la etrune la itre ka ihumuth, itre nekönatr a iqaqa, me lepe la itre xaa nekönatre ngöne la hna ini, nge goi qanangazone fe itre xan la itre atrene la sipu fami angatr. Celë hi lai itre kepin matre easa xouene la itre xaa atr. Tro Satana a huliwane tune kaa la xoue cili? Satana a huliwane la xoue atr matre uku së troa tha mele nyipici koi Iehova, me cile troa cainöjëne la maca ka loi. Celë hi matre angeic a huliwane la itre mus troa wathebone la huliwa së, me akötrë së. (Luka 21:12) Ketre, angeice fe a sile la itre ithuemacany ka tria göne la itre Temoë Iehova. Matre ame la itre atr ka drenge la itre trengathoi cili ke, tro angatre lai a hnyimasai së, maine lepi së pena. (Mat. 10:36) Tro kö sa sesëkötre göne la itre nyinyithiina i Satana? Waea. Pine laka, aqane kuca i angeice hi lai ekö, ngöne lo ijine i itre pane keresiano.—Itre hu. 5:27, 28, 40. w22.06 16 par. 10-11

Drei la itre ka troa hane sine “la ka ala nyimu” hna troa eatrongëne kowe la thiina ka meköt? Kolo itre hna amelene hmaca, me itre ka mele pe qa ngöne la isi Amagedro, memine fe la itre nekönatr hna hnahon ngöne la fene ka hnyipixe. Ame hë ngöne la pune la 1 000 lao macatre, ke pexej asë hë la itre atr hune la ihnadro. Tha hnene kö laka, pexeje hë la atr matre ijiji angeice hë troa hetrenyi la mel ka pë pun. Pane meku Adramu jë së me Eva. Lue ka pexeje nyidroti lo, ngo loi e tro nyidroti a pane drengethenge Iehova matre hetrenyi la mele ka pë pun. Ame pe, tha celë kö la hnei nyidroti hna kuca. (Rom. 5:12) Pine laka, tro asë hi la itre atr a pexej ngöne la pune la 1 000 lao macatre, hapeu, tro kö angatr asë a isigöline la musi cile i Iehova? Maine tro pe kö itre xan a tui Adramu me Eva, lue ka pexej ngo tha ka mele nyipici kö? Kola ajane troa sa la itre hnyinge celë. w22.09 22-23 par. 12-14

Ame la epuni a goeëne la pengöne la fen enehila, maine jë, jole koi epun troa mekun laka, troa hetre mel ka loi elany. Akötre catr la itre fami enehila. Nge ame la itre atr, angatr a pi isi, me mele cas, me pi ihumuth. Tha mejiune hë la itre atr kowe la itre mus. Ngo itre ewekë lai ka thue mejiune së. Pine nemen? Pine laka, itre aqane ujë lai ka eatrëne la ketre hna perofetan göne la “itre drai ne la pun.” (2 Tim. 3:1-5) Ame la kola eatr la itre hna perofetane cili, ke hatrene hi lai kowe la itre atr ka lapaun laka, Joxu hë Iesu ngöne la Baselaia i Akötresie. Ngo hetre itre xaa hna perofetan göne la Baselaia. Ka ce tro hi la itre hna perofetan, tune la ketre puzzle ka amamane laka, easenyi hë la drai i Iehova. w22.07 2 par. 1-2

Ame ngöne la ijine COVID, hne së hna kapa la itre hna amekötin ka hnyipixe göne la aqane troa icasikeu me cainöj. Tha qea ju kö, nge easë fe hë a hane sine la itre icasikeu, me itre asabele jëne visioconférence. Ketre, ame fe enehila, easë hi a cainöje jëne telefon me cinyanyi tus. Nge hnei Iehova hna amanathithi së. Alanyim la itre filial ka öhne laka, tiqa catr hnei itre ka xome la huliwa ne cainöj. Nge alanyim thei easë ka öhne la iwanakoime i Iehova ngöne la huliwa cili. Maine jë, itre xan a mekun ka hape, catre palaha la itre hna amekötine hna hamën hnene la organizasio i Iehova ngöne la ijine COVID. Ngo hnei easë palahi hna öhn e thupëne laka, ka inamacan la itre mekune hna axeciëne hnene la hlu. Ame la easa öhne la aqane eatrongë së hnei Iesu, kola acatrene la mejiune së laka, tro palahi nyidrë me Iehova a ce me easë ngöne la itre xaa jol ka troa traqa elany.—Heb. 13:5, 6. w22.07 13 par. 15-16

Loi e tro mina fe sa olene koi Iehova la itre ewekë ka mingöming hnei Nyidrë hna xup. Tune la itre hane iengen, memine la ehnyapane la itre xen, me itre trejin ne la ekalesia. Hnei Iehova hna hamë së la itre ewekë cili me itre xane ju kö, göne hi matre tro sa madrin. (Sal. 104:12-15, 24) Ngo ame kö la ka nyipiewekë, ke ene la tro sa olene koi Iehova la itre ini qaathei Nyidrë, memine la mejiune ka mingöming hnei Nyidrëti hna hamë së. Ame itre xaa ijin, canga tro hi sa thëthëhmine troa olene koi Iehova la itre hnei Nyidrëti hna kuca koi së. Nemene la nyine tro sa kuca? Makëne jë ngöne la sine pepa la itre hnei epuni hna sipone koi Iehova. Nge e nöjei drai, goeëne hmaca jë la pepa matre wange la aqane sa Iehova la itre thithi epun. Thupene lai, olene jë koi Nyidrë la ixatua.—Kol. 3:15. w22.07 22 par. 8-9

Tha tro hmekuje kö sa inine la itre nyipici qa hnine la Tusi Hmitrötr. Nyipiewekë tro fe sa melëne itre ej, ene la troa trongëne ngöne la mele së. Nge e cili hi la tro sa kapa la nyipi madrin. (Iako. 1:25) Easa atre tune kaa laka, easa melëne la nyipici? Önine la ketre trejin trahmany ka hape, loi e troa isawaipengö së, matre atre la nyine troa saze. Öni Paulo aposetolo mina fe ka hape: “Pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.” (Fil. 3:16) Pane mekune jë la itre manathith hne së hna troa kapa, e tro sa “catre trongëne la nyipici”! Tro hë së lai a hetre mele ka loi me amadrinë Iehova me itre trejin. (Ite edomë 27:11; 3 Ioane 4) Hapeu, hetre ketre kepine kö matre tro sa wangatrun me trongëne la nyipici? w22.08 18-19 par. 16-18

Tro la itre qatre thup a amamane tune kaa la ihnimi angatr koi Iehova me Iesu? Ame la pane nyine tro angatr a kuca, ke troa thupëne hnyawa la itre mamoe i Iesu. (1 Pet. 5:1, 2) Kolo ithuecatre Iesu lai koi Peteru. Thupene la hnei Peteru hna akönia qaja ka hape, thatre Iesu kö hnei angeic, hnei angeic hmaca hna amamane koi Iesu la ihnimi angeic koi nyidrë. Ame lo kola amele Iesu hmaca, öni nyidrë koi Peteru: “Simona nekö i Ioane, eö kö a hnimi ni?” Tru catre la aja i Peteru troa amamane la ihnimi angeic koi Iesu. Matre öni Iesu koi Peteru: “Ithuane jë la itre neköi mamoeng.” (Ioane 21:15-17) Qaane ju hi lai, hnei angeic hna thupëne hnyawa me hnim la itre neköi mamoe i Iesu. Itre qatre thup, tro epuni a amamane tune kaa ka hape, ka tru koi epun la trengewekë i Iesu koi Peteru? Ene la troa xatuane la itre trejine ka nanazij troa bëeke koi Iehova. Epuni hi lai a amamane la ihnimi epun koi Iehova me Iesu.—Ezek. 34:11, 12. w23.01 29 par. 10-11

Itre xaa trejin a mekun ka hape, pëkö ka atreine trotrohni angatr. Ngo ketre hnö la troa mekune tun, ke tro epuni lai a mekun ka hape, ka luzi hë epun, nge tha ijiji epuni kö troa isi memine la itre aja ka ngazo. Eloine pe, tha celë kö la hna qaja hnei Tusi Hmitrötr. Ej a qaja ka hape: “Hnine la itupath, tro kö nyidrëti a nyi jëne kötre i nyipunie, matre atreine jë nyipunie cile hut.” Haawe, ngacama catrehnine la aja ka ngazo ka ej thei epun, ngo ijiji epun troa mele nyipici koi Iehova. Nge jëne la ixatua i Nyidrë, tha tro kö epuni a kei kowe ej. The thëthëhmine kö laka, itre atr ka tha pexeje kö së, matre tro lai a fetra hmaca la itre aja ka ngazo. Ngo e traqa mina ha, canga lepetrije pi, tui Iosefa lo angeic a kötrene la föi Potifara. (Gen. 39:12) The kei thenge pi kö la itre aja i epuni ka ngazo! w23.01 12-13 par. 16-17

Ame la thiina ka tru i Iehova ke, ene la meköt. (Deu. 32:4) Ame la atr ka meköt ke, tha ka ië hna hnime kö. Matre tha ka ië hna hnime kö Iehova. (Itre hu. 10:34, 35) Celë hi ka mama ngöne la aqane cinyanyine la Tusi Hmitrötr. Öni Iehova ka hape, ame ngöne la itre drai ne la pun, tro la itre atr a trotrohnine la nyipi “inamacan” hna qatreng e hnine la Tusi Hmitrötr. (Dan. 12:4) Hna eatr la hna perofetane celë, jëne la hna ujën me fejan Tusi Hmitrötr memine la itre xaa itusi së. Hnene la organizasio i Iehova hna ujën apexejen maine sine la Tusi Hmitrötr koi 240 lao qene lapa, me thawa kowe la nöjei atr. Celë hi matre kola kapa “la maca ka loi ne la Baselaia” hnene la itre atr qa ngöne la nöjei nöj qëmeken troa traqa la pun. (Mat. 24:14) Aja i Iehova, Akötresie ka meköt, tro la nöjei atr a atre Nyidrë jëne la Tusi Hmitrötr. Nge tru catr la ihnimi Nyidrë koi së isa ala cas. w23.02 5 par. 11-12

Ka hniine kö epun la meköt? Öö, ngo pine laka, itre atr ka tha pexeje kö së, loi e tro sa thupën wanga tro sa xome la aqane mekuna i fen göne la meköt. (Is. 5:20) Ame la itre xan, angatr a mekun ka hape, ka meköt angatr, ngazo pe, itre ka pi tru, ka ixöjetrij, nge ka pi draië. Itre thiina lai, hna methinën hnei Iehova. Ame lo Iesu e celë fen, hnei nyidrëti hna ejin la itre hene ne hmi, pine angatr acile la sipu emeköti angatr. (Ate cai. 7:16; Luka 16:15) Ame la atr ka sipu jele meköti angeice kö, ke tha atr ka meköti kö lai. Ame la meköt, ke ketre thiina ka lolo. Tusi Hmitrötr a amaman la aliene la “meköt,” ene la troa kuca la loi qëmeke i Iehova. Ame la aliene la hnaewekë cili ngöne qene Heberu me Geres, ke kola qaja la troa mele thenge la itre trepene meköt ka draië i Iehova. w22.08 27 par. 3-5

Hnei Iesu hna mejiun kowe la itretre drei nyidrë ngacama itre atr ka tha pexeje kö angatr. (Ioane 15: 16) Ame lo Iakobo me Ioane a sipo Iesu troa cilëne la ketre göhnë ka tru ngöne la Baselaia, ke tha ase kö nyidrë mekun ka hape, nyidroti a nyihlue i Iehova göi thupen, me xome qaathei nyidro la hnëqa ne aposetolo. (Mar. 10:35-40) Ame ngöne lo jidr kola othi nyidrë, hnene la itretre dreng asë hna kötr me nuaxöji nyidrë. (Mat. 26:56) Ngo hnei Iesu palahi hna mejiun koi angatr. Ngacama atre hi nyidrëti la itre tria i angatr, ngo hnei nyidrëti palahi hna “hnimi angatre uti hë la pun.” (Ioane 13:1) Thupene la kola amele nyidrëti hmaca, hnei nyidrëti hna ahnithe kowe lo ala 11 lao aposetolo la ketre hnëqa ka tru, ene la troa elemekene la huliwa ne cainöj me thupëne la itre mamoe i nyidrë. (Mat. 28:19, 20; Ioane 21:15-17) Nge nyipici nyidrëti hi ke, hnei angatr hna mele nyipici koi Iehova utihë la angatr a mec. Hnei Iesu hna mejiun kowe la itre atr ka tha pexeje kö. Angatre hi la itre tulu nyine tro sa xötrethenge. w22.09 6 par. 12

E xecie koi së ka hape, Iehova a hnimi së, nge ce Nyidrëti me easë, ke tro së lai a atreine cile koi Satana. Hnene la atre cinyihane la Salamo 118, hna hane cile kowe la itre jol ka tru. Nyimutre la itre ithupëjia me angeic. Ame la itre xan ke, itre joxu (xötre 9, 10). Hna hane fe qanangazo angeic (xötre 13). Nge hnei Iehova hna haji angeic (xötre 18). Ame pe, öni angeic: “Tha tro kö ni a qou.” Atre hnyawa hi angeic ka hape, Iehova a hnimi angeic la Nyidrëti a haji angeic. Ngacama traqa ju hë la nöjei pengöne jol, ngo xecie hnyawa kowe la atre cinyihane la Salamo laka, tro kö Iehova a xatua angeic. (Sal. 118:29) Loi e troa xecie koi së laka, Iehova a hnimi së isa ala cas. Celë hi ka troa xatua së troa elë hun la, (1) xou troa thatreine thupëne la fami së, (2) xoue atr, nge (3) xoue mec. w22.06 15 par. 3-4

Loi e tro sa amë panëne la hmi Iehova ngöne la mele së. Pine laka, Iehova la Atre Xupi së, meköt e tro sa nyihlue i Nyidrë. (Hna ama. 4:11; 14:6, 7) Matre ame la ka tro pa ngöne la mele së, ke ene la troa nyihlue i Iehova thenge la aja i Nyidrë, “thenge la uati hmitrötr me nyipici.” (Ioane 4:23, 24) Easa ajan tro la uati hmitrötr a eatrongë së matre tro la hmi së a ihmeku memine la itre nyipici hna qaja e hnine la Tusi Hmitrötr. Loi e tro palahi sa amë panëne la hmi së ngacama easë ju hë a mel ngöne la ketre nöje hna wathebone la hmi së. Ame enehila, ase hë sasaith la 100 lao trejin hna akalabusine pine la hmi së, ngo angatre palahi a catre thith, me inine la Tusi Hmitrötr, me qeje Iehova me Baselaia koi itre xan. Ame la kola qaqa së maine qanangazo së, easa madrin, ke atre hi së laka, tro kö Iehova a ce me easë me amanathithi së.—1 Pet. 4:14. w22.10 9 par. 13

Ame ngöne la tusi Ite Edomë, hetrenyi la itre eamo ka troa xatua së ngöne la mele së. Tro sa ce wang la lue eamo. Ame la hnapan, mejihnine ju la hna hetreny. Öni Ite Edomë 23:4, 5: “The huliwa troa tena mo. . . . ke tro ej’ a nyi lue iape ne ej, me sheshë hnengödrai ’ë tune la aeto.” Ngo ame enehila, kola nyinyape thele mani hnene la nöjei atr, ngacama itre ka trenamo ju hë maine ka pë ewekë. Ame la thangane lai, ke angatr a ahmahmanyi angatre kö, me iwajahuj, nge kola tithi angatr hnei mec. (Ite edomë 28:20; 1 Tim. 6:9, 10) Ame la hnaaluen, loi e troa pane mekune qëmeken troa ithanata. E tha hmeke kö së, ijije hi tro sa akötrëne la itre xan hnene la itre trengewekë së. Öni Ite Edomë 12:18: “Hetete ewekë kösë hna thine hnei taua; ngo nyine ameune la sesepeneqe ne la ate ka inamacan.” Ame la easa ixöjetrij, ke easë hi lai a thë la aqane imelekeu së me itre xan.—Ite edomë 20:19. w22.10 21 par. 14; 22 par. 16-17

Nyipiewekë tro Ezekiela a trotrohnine hnyawa la maca nyine tro angeic a tro fë. Loi e tro la maca a ketr la hni angeic. Ezekiela a sesëkötr la angeic a öhne ka hape, ka hnyapa la tusi hna ewath “tune la hani.” (Ezek. 3:3) Pine nemen? Pine laka, ame koi Ezekiela ketre madrine ka tru la troa nyitrengewekë i Iehova. (Sal. 19:8-11) Hnei angeic hna olene koi Iehova ke, hnei Nyidrë hna ië angeic troa nyi perofeta i Nyidrë. E thupen, hnei Iehova hna qaja koi Ezekiela ka hape: “Ame la nöjei tenge ewekënge hnenge hna troa qaja koi ’ö, te, [amë hutine ju] e kuhu hni ’ö, nge dengeju hnene la lue hnangenyë i ’ö.” (Ezek. 3:10) Iehova e celë a upi Ezekiela, troa inine gufan la itre hna cinyanyine e hnine la tusi hna ewath me lapa mekun itre ej. Celë hi matre kolo ha catrecatre la lapaune i Ezekiela. Ketre, atrepengöne hnyawa ha angeic la maca nyine tro angeic a tro fë kowe la nöj. (Ezek. 3:11) Ame hë la Ezekiela a trotrohnine hnyawa la maca qaathei Akötresie, ke tha xou i angeice hë troa cainöj, me afenesine la huliwa hna ahnith koi angeic. w22.11 6 par. 12-14

Maine tha kapa kö së la ketre hna amekötine ka hnyipixe e hnine la organizasio i Iehova, nemene la nyine tro sa kuca? Loi e troa kapa la itre ewekë ka saze ngöne la organizasio. Ame lo angatr ngöne la hnapapa, hnene la itre matra i Kohatha hna kapa la pua ne isisinyikeu qëmekene la nöj. (Num. 3:29, 31; 10:33; Ios. 3:2-4) Ketre manathithi ka tru lai! Ngo, ame la angetre Isaraela a lö kowe la Nöj Hna Thingehnaean hna saze la huliwa i angatr. Tha tro hmaca kö a kapa trongëne la Pua Ne Isisinyikeu. Celë hi matre, hna upe la itre matra i Kohatha troa kuca la itre xaa huliwa. (1 A. l. ite jo. 6:31-33; 26:1, 24) Tha hna qaja kö hnei Tusi Hmitrötr laka, hnene la itre matra i Kohatha hna eetr maine piine la ketre hnëqa ka tru catr. Nemene la ini koi së? Kapa ju la itre ewekë ka saze ngöne la organizasio i Iehova, ngacama tro lai a hetre thangane fe kowe la itre hnëqa i epun. Kapa madrine jë la itre hnëqa hna hamë epun. The thëthëhmine kö laka, tha hnene kö la itre hnëqa së matre kola hnimi së hnei Iehova. Ame la ka sisitria koi Nyidrë, ke ene la aqane idrengethenge së, ngo tha itre hnëqa së. w22.11 23 par. 10-11

Hnei Onesiforo hna thele Paulo aposetolo, me xatua nyidrë. Ame e cili, hnei Onesiforo hna nue mel pi Paulo. Nemene la ini koi së? Tha tro kö sa nue la xoue atr troa sewe së troa xatuane la itre trejin hna axösisin. Ngo loi e tro pe sa isigöli angatr me xatua angatr. (Ite edomë 17:17) Aja i angatr tro sa hnimi angatr me ce me angatr. Hnene la itre trejin ne Russie hna xatuane la itre xaa trejin hna akalabusin. Ame lo kola kootrëne la itre xan, alanyim la itre trejin ka traqa ngöne la hnakootr matre xatua angatr. Nemene la ini koi së? Tha tro pi kö sa xou la kola qajangazone me oth maine axösisine la itre trejin ka elemeken la organizasio i Iehova. Thithi sai angatre jë pe, nge xatuane jë fe la itre fami angatr. Thele jë la itre xaa aqane troa xatua angatr.—Itre hu. 12:5; 2 Kor. 1:10, 11. w22.11 17 par. 11-12

Hnëqa ne la itre qatre thup troa xatuane la itre trejin troa easenyi koi Iehova, me akeukawanyi angatr. (1 Pet. 5:2) Nge e traqa ju la ketre hulö, loi e tro la itre qatre thup a wang la itre trejin me atre ka hape, hetre nyine xeni angatre kö, me iheetr, me uma. Ngo thupene la hulö, loi e tro palahi angatr a akeukawan, me acatrene la imelekeu ne la itre trejin me Iehova. (Ioane 21:15) Hnei Harold, ketre atrene la Filial, hna iöhnyi memine la itre xaa trejin hna lepe hnei hulö. Öni nyidrë, “Kaloi troa pane nue ijin koi angatr. Nyipici laka, tro kö angatr a mejë hmaca thupene la hulö. Ame pe, angatr palahi a mekun la itre sinee i angatr ka mec, me ewekë i angatr ka patr, maine lo ijin xönë hi angatr troa mec. Aqane kö lai! Ngo the mekune pi kö ka hape, pëkö lapaune i angatr.” Loi e tro la itre qatre thup a trongëne la eamo celë, “ce treije jë memine la itre ka treij.”—Rom. 12:15. w22.12 22 par. 1; 24-25 par. 10-11

Iehova a hamë së la uati hmitrötr matre xatua së troa catre kuca la loi. Ame la easa ini Tusi Hmitrötr, easë hi lai a kapa la ixatua ne la uati hmitrötr. Ketre, easa kapa la uati hmitrötr ngöne la easa sine la itre icasikeu. Ame ngöne la itre ijine cili, easa ce madrin memine la itre trejin ka isine troa kuca la loi tu së, nge celë hi ka ithuecatre koi së. (Heb. 10:24, 25; 13:7) Ame la easa sipo Iehova troa xatua së troa nuetrij la ketre aja ka ngazo, Nyidrëti a hamë së la trengecatr matre troa cil kowe la aja cili. Tha kolo kö lai a hape, troa patr la itre aja së ka ngazo thupene la hna ini Tusi Hmitrötr, maine icasikeu, maine thith. Ngo e tro sa majemine kuca la itre ewekë cili, ke tha tro kö sa kei thenge la itre aja së ka ngazo. Ngacama catrecatre hë la imelekeu së me Iehova, ngo loi e tro palahi sa isin troa hetre aja ka loi. w23.01 11 par. 13-14

Ngacama tha Tusi Hmitrötr kö a qaja la aqane troa nyinyine la itre meci së, maine aqane tro sa xen, ngo ej a amamane la mekuna i Akötresie göne la itre ewekë cili. Ej a upi së troa ‘iananyi me ngazo la ngönetrei së,’ ene la itre ewekë ka troa adrone la ngönetrei së. (Ate cai. 11:10) Tusi Hmitrötr a wathebo së troa xeni atrun, me iji atrun la kahaitr, ke kola angazone la ngönetrei së. (Ite edomë 23:20) Nemene la aja i Iehova koi së? Aja i Nyidrë tro sa tuluthe la aqane troa xen me ij. (1 Kor. 9:25) Easa amamane koi Iehova ka hape, easa nyipiewekëne la mel ngöne la easa axecië mekune hnyawa. (Sal. 119:99, 100; Ite edomë 2:11) Loi e tro sa iëne hnyawa la hne së hna troa xen. Maine pi tro catre sa xen la ketre xen, nge atre hi së ka hape, tro së lai a wezipo, ngaa the xeni hmaca kö lai xeni cili. Ketre, nyipiewekë tro sa meköle hnyawa, me kuci spor, me aporopëne la ngönetrei me hnalapa së. w23.02 21 par. 6-7

Tro sa öhne tune kaa la itre trengamo qa hnine la Tusi Hmitrötr? Tro sa ce wange la hna qaja hnei 2 Timoteo 3:16, 17. Kola hape, ame la “nöjei hna cinyihan asë . . . ka nyipiewekë göi” troa (1) hamë ini, (2) hmekën, (3) xom amekötine la nöjei ewekë, me (4) hajin ngöne la thiina ka meköt. Ka nyipici hi la foa lao eloine celë ngöne la easa e la itre xaa itus ne la Tusi Hmitrötr hne së hna tha xom lapan. Ame la epuni a e, thele jë la itre ini memine la aja i Iehova, maine itre trepene meköt. Thele jë fe la aqane tro itre ej a xatua epun troa hmek. Isa hnyinge jë ka hape, “Hapeu, kolo kö a xatua ni hnene la itre xötre celë troa öhne me nuetrij la itre thiina me itre mekun ka ngazo matre mele nyipici koi Iehova?” Thele jë la aqane tro ej a xom amekötine la ketre mekun hnei epuni hna dreng ngöne la hna cainöj. Ketre kapa hnyawa ju la itre ihaji ka mama ngöne la itre xötr matre xatua epuni troa ca mekun me Iehova. Maine tro epuni a lapa mekun la foa lao ewekë celë, tro hë epuni a öhne la itre trengamo ka ej e hnine la Tusi Hmitrötr. w23.02 11 par. 11

Kola qaja ngöne la ketre hna perofetan hnei Daniela laka, tro Iesu a kapa la Baselaia ngöne la pun la seven lao ijin. Ijije kö tro sa atre la ijine kola acili Iesu? (Dan. 4:10-17) Ame la ‘seven lao ijine’ ke, kola qaja la 2 520 lao macatre. Kola nyiqane la ijine cili lo macatre 607 M.P.K. ngöne lo angetre Babulona a apatrene la joxu hna acile hnei Iehova e Ierusalema. Nge kola nyipune lo macatre 1914 M.K. ngöne lo Iehova a acili Iesu, ene lo “ate [ka ijij] troa amekötin,” troa Joxu ne la Baselaia. (Ezek. 21:25-27) Kola xatua së tune kaa hnene la hna perofetane celë? Ame la easa atre la pengöne la ‘seven lao ijine’ ke, kola akeukawanyi së laka, tro kö Iehova a eatrëne la itre hnei Nyidrë hna thingehnaean ngöne la nyipi ijin. Hnei Iehova hna eatrëne la aja i Nyidrë göne la ijine troa acile la Baselaia. Haawe, tro kö Nyidrë a eatrëne la itre xaa hna perofetane ngöne la nyipi ijin. Eje hi, “tha tro kö a hmit” la drai i Iehova.—Hab. 2:3. w22.07 3 par. 3-5