Ogas

Lue mekune ka tru ka mama ngöne la Salamo celë: (1) Itre atr ka meköt a cile kowe la itre jol. (2) Iehova a amele së qa ngöne la itre jole cili. Tune kaa la aqane kuca i Nyidrë? Nyidrëti a amamai së la pengöne la mele ngöne la fene celë. Nyipici, hnei Iehova hna qaja ka hape, tro sa öhnyi madrine ngöne la huliwa i Nyidrë. Ngo tha hnei Nyidrëti kö hna qaja ka hape, tha tro kö sa hane cile kowe la itre jol. (Isa. 66:14) Nyidrëti pe a thuecatre koi së troa lapa mekune la mele së elany, ene la troa mele madrine utihë epin. (2 Kor. 4:​16-​18) Ngo ame enehila, Iehova a xatua së troa nyihlue i Nyidrë e nöjei drai. (It. t. Iere. 3:​22-​24) Nemene la ini hne së hna xome qa ngöne la tulu ne la itre hlue i Iehova ekö me enehila? Ame la kola asesëkötrë së hnene la itre jol, ke Iehova a xatua së la easa mejiune koi Nyidrë.​—Sal. 55:22. w23.04 14-​15 par. 3-4

Tru la itre ini hne së hna xome qaathei Iosefa me Maria, ke hnei nyidro hna drengethenge la itre mus, ngacama tha ka hmaloi kö. (Luka 2:​1-6) Easenyi catre hë troa mala la upune i Maria, nge hnei Kaisara Auguso hna amekötin troa e la etrune la nöjei atr asë e cailo fen. Nemene la nyine tro Iosefa me Maria a kuca? Loi e tro nyidroti a tro Bethelema. Traqa koi 150 lao kilomet qa cili a tro Bethelema, nge tru hnei sasala ngöne la gojeny. Nge, tha ka loi kö la gojeny koi Maria me kowe la nekönatr hna troa hnahon. Tro jë a tune kaa, e traqa ju cil la upune i Maria e kuhu gojeny? Tha ketre nekönatre menu kö la hnei Maria hna troa hnahon, ngo Mesia. Hapeu, ijiji nyidroti kö troa ena la wathebo i Auguso? Pëkö ka sewe Iosefa me Maria troa drengethenge la wathebo i Kaisara. Hnei Iehova hna amanathithine la idrengethenge i nyidro. Traqa ju kö Maria e Bethelema, nge ka egöcatre la nekönatr la kola hnahon. Ketre, jëne Maria, hna eatr la itre hna perofetan hnei Tusi Hmitrötr!​—Mika 5:2. w23.10 8 par. 9; 9 par. 11-​12

Nemene la nyine tro epuni a kuca e xou i epun troa hamë mekun ngöne la hnë icasikeu? Hnëkë hnyawa jë. (It. Ed. 21:5) Maine trotrohnine hnyawa ha epun la ini hna hamën, ke tha tro hë epuni lai a xou troa liim. Ketre, ahopatrene ju hi la itre mekun hna hamën. (It. Ed. 15:23; 17:27) Maine ka hopatr la mekun hnei epuni hna hnëkën, ke hmaloi hi tro epuni a hamën. Ame la easa hamën la itre mekun ka hopatr ngöne la aqane ithanata së, ke kolo hi lai a amamane ka hape, hne së hna hnëkë hnyawa, nge trotrohnine hnyawa hi së la ini. Ngo tune kaa e ase hë epun kuca la hna qaja e caha, ngo xou epuni palahi troa hamën la cas maine lue mekun? Ka tru koi Iehova la itre trengecatr hnei epuni hna nu matre kuca la hnei epuni hna atrein. (Luka 21:​1-4) Tha aja i Iehova kö troa ahacenyi epun. (Fil. 4:5) Thele jë la itre ewekë hnei epuni hna atreine kuca, nge isine jë troa eatrën. Thithi jë matre troa lepetrij la xou i epun. Nge nyiqane jë troa hamëne la ketre mekun ka hopatre hi. w23.04 21 par. 6-8

Paulo a aceitunë së me itre sooc ka heetrëne la hnaheetr ne isi, nge ka hmek. Ame ngöne la kola isi, nyipiewekë tro la sooc a hnëkë matre troa atreine cile kowe la ithupëjia. Ketre tu së mina fe, nyipiewekë tro sa hnëkë kowe la drai Iehova, me heetrëne la imano së hnene la lapaun me ihnim, memine la itrapetr, ene la mejiune së. Kola thupëne la wenethëhmi ne la sooc hnene la imano. Ketre tun, tro la lapaune me ihnim a thupëne la hni së matre tro palahi sa catre nyihlue i Iehova me xötrethenge Iesu. Jëne la lapaun, xecie koi së laka, tro kö Iehova a amanathithi së la easa thele Nyidrë. (Heb. 11:6) Nge eje fe a uku së troa mele nyipici koi Iesu e nöjei drai, me ngöne la kola traqa la itre itupath ka tru. Tro sa acatrene la lapaune së, e tro sa xomi ini qa ngöne la tulu ne la itre hlue i Iehova enehila, ka mele nyipici ngacama kola axösisi angatr maine pë mani. Nge loi e tro sa nyitipune la itre trejin ka ahmaloeëne la mele i angatr me amë panëne la Baselaia i Akötresie matre tha tro kö sa hnimi mani. w23.06 10 par. 8-9

Ame la atr ka xomihni ke, ka atreine xomehnöthe la itre aja me itre mekuna i angeic. Nge angeic a tuluthe la aqane huliwa i angeic. Tro la thiina cili, a xatua së troa kuca la loi, ngacama tha ka hmaloi kö la huliwa hna upi së troa kuca, maine tha ajane kö së. Ketre, ame la thiina cili ke, ketre igötranene la wene ne la ua. Celë hi matre loi e tro sa sipo Iehova la uati hmitrötre i Nyidrë matre troa huliwane la thiina cili. (Luka 11:13; Gal. 5:​22, 23) The treqene kö la ijine loi. Pine nemen? Ke easa melëne la itre ijine ka ngazo. Maine tro palahi sa treqene la ijine loi, ke aqane lapa i easë pë lai. Tha tro kö së lai a eatrëne la mekuna së. Ame itre xaa ijin, pëkö aja së ke, thatreine kö së eatrëne la mekuna së. Maine tha ijiji epuni kö troa eatrëne la mekuna i epun, ke pane nyiqane jë memine la itre mekune ka co hnei epuni hna atreine eatrën. Maine epuni a ajan troa huliwane la ketre thiina i Iehova, ke pane nyiqane amamane jë hnene la itre huliwa ka co. Nge maine epuni a ajan troa e apexejen la Tusi Hmitrötr, ke pane nyiqane e ju hi koi itre hnepe menetr. w23.05 29 par. 11-​13

Qane lo kola nyiqane la itre drai ne la pun, tha mano kö Iehova hamëne la xen jëne la organizasio i Nyidrë matre xatua së troa lapa ngöne la “Gojenyi Ka Hmitrötr.” (Isa. 35:8; 48:17; 60:17) Ame la ketre atr a nyiqane ini Tus, ke angeic hë lai a trongëne la “Gojenyi Ka Hmitrötr.” Ame la itre xan, ke tha qea ju kö nge angatre hmaca trotrije lai gojenyi cili. Ngo ame pena la itre xan, angatr a isine troa lapa ngöne la gojenyi cili utihë la angatr a traqa kowe la hna ie. Ekaa lai? Ame kowe la itre ka mejiune troa mel e koho hnengödrai, tro la “Gojenyi Ka Hmitrötr” a troxomi angatr kowe “la paradraiso i Akötresie.” (Hna Am. 2:7) Ame pena la itre ka mejiune troa mel e celë fen, tro la gojenyi cili a troxomi angatr kowe la mele ka pexej thupene la 1 000 lao macatre ne musi Iesu. Maine epuni hë ngöne la gojenyi cili, ke the xei hutrö hmaca kö. Nge the trotrije pi kö la gojenyi cili, e tha traqa pala kö epun ngöne la fen ka hnyipixe! w23.05 17 par. 15; 19 par. 16-​18

Maine tro eö a mekune la itre ewekë hnei Iehova hna kuca koi eö, tro hë lai a thue aja koi eö troa nue mel koi Nyidrë. (Sal. 116:​12-​14) Tusi Hmitrötr a qaja ka hape, qaathei Iehova la “nöjei loi me nöjei ahnahna ka pexej.” (Iako. 1:​17) Ame la ahnahna ka sisitria, ke ene la mel hna huujën hnei Iesu. Pane mekune jë laka, hnene la thupene mel, ijiji eö hi troa hetre imelekeu me Iehova, me hane mel utihë epine palua. (1 Ioa. 4:​9, 10) Ame la eö a nue mel koi Iehova, ke eö hi lai a amamane la hni ne ole i eö kowe la thupenne mel, ene la hatrene ihnim ka tru. Nge eö mina fe a amamane la hni ne ole i eö kowe la itre xaa manathith qaathei Nyidrë.​—Dreut. 16:17; 2 Kor. 5:​15. w24.03 5 par. 8

Ame la easa goeëne la aqane ujë ne la itre atr enehila, ke casi hi la hne së hna melën me Lota ekö. Kola “akötrë angeic hnene la itre huliwa nyine hmahmane hna kuca hnei itre ka pë wathebo,” ke atre hi angeic laka, methi Iehova la itre aqane ujë ka ngazo. (2 Pet. 2:​7, 8) Pine laka, Lota a hnimi Akötresie me xoue Nyidrë, matre hnei angeic hna thipetrije la aqane ujë ka ngazo ne la itre atrene la nöj. Ketre tu së fe, easa ce mele memine la itre atr ka pë metrötr kowe la itre trepene meköt ka draië i Iehova. Ame pe, ijiji easë hi troa metrötrëne la itre trepene meköti Iehova, e tro sa akökötrene the së la xoue Nyidrë me ihnimi së koi Nyidrë. Hnei Iehova hna hamë së la itre eamo ka mama ngöne la tusi Ite Edomë, matre xatua së ngöne la götrane cili. Nge ijije hi tro asë hi la itre keresiano, trahmany me föe, jeunes me qatr, a kepe thangane qa ngöne la itre eamo cili. Maine easa xoue Iehova, ke tha tro kö sa nyisineene la itre atr ka kuca la ngazo. w23.06 20 par. 1-2; 21 par. 5

Hna hane kö icilekeu me epun hnei fami? Hnei epuni kö hna acone la itre hawa i epun koi maseta matre amë panëne la Baselaia? (Mat. 6:​33) Maine eje hi, öhne kö Iehova la hnei epun hna kuca matre mele nyipici koi Nyidrë. (Heb. 6:​10) Epuni ha jelenyipicine la hna qaja hnei Iesu, ka hape: “Pëkö atr nue uma, me trejin, me xa, me thin, me kem, me ha nekönatr, me hlapa pine la ëjeng, nge pine la maca ka loi, ka tha tro kö a kapa ngöne la hneijine celë la 100 hmaca kö lao uma, me trejin, me xa, me thin, me ha nekönatr, me hlapa ce memine la akötr, nge ngöne la fen ka troa traqa, la mele ka pë pun.” (Mar. 10:​29, 30) Eje hi, tru kö la itre manathith hnei epuni hna kapa, hune la itre ewekë hnei epun hna nu.​—Sal. 37:4. w24.03 9 par. 5

Ame lo kola traqa la ijine jiin atraqatr kowe la itre keresiano ne Iudra, hnene la ekalesia ne Anetioka hna “hna axeciëne troa isa iupi fë ewekë kowe la itre trejin ne Iudra, thenge la hnei angatr hna isa hetreny.” (It. Hu. 11:​27-​30) Ngacama ka lapa gaa nanyi la itre trejin hna ketr hnene la jiin, ngo ajane catre la itre keresiano ne Anetioka troa xatua angatr. (1 Ioa. 3:​17, 18) Ijije hi tro fe sa amamane la utipine së la kola lepe la itre trejine hnene la ketre hulö. Easa amamane la utipine së, la easa qaja kowe la itre qatre thup la aja së troa ixatua, maine kuië mani, maine thithi fë la itre hna lepe hnei hulö. Maine jë, tro la itre xaa trejin a aja ixatua, matre troa hetrenyi la ka nyipiewekë. Epi tro Iesu a öhnyi së a utipine la itre trejin ngöne la ijine nyidrëti a traqa. Ame cili, tro fe nyidrëti a hane hë së troa ‘kapa la Baselaia.’​—Mat. 25:​34-​40. w23.07 4 par. 9-​10; 6 par. 12

Hnei Iesu hna nyitipune la aqane tulu ewekë i Iehova. Ame lo nyidrëti e celë fen, ke hna upi nyidrëti hi troa cainöj kowe “la itre mamoe ka paatr ne Isaraela.” Ngo hnei nyidrëti fe hna amamane ka hape, ka atreine tulu ewekë nyidrë. Ame lo ketre ijin, hnene la ketre föe ne Kanana, hna iele nyidrë troa aloine la nekö i eahlo jajiny ‘hna löthe hnei dremoni.’ Hnei Iesu hna utipine la föe, me aloine la nekö i eahlo jajiny. (Mat. 15:​21-​28) Ame lo Iesu a nyiqane cainöj, ke öni nyidrë: “Maine ketre atr a xele ni . . . , tro fe ni a xele angeic.” (Mat. 10:33) Ngo tha hnei nyidrëti kö hna nuetriji Peteru, ngacama akönia xele nyidrëti hnei angeic. Atre hi Iesu ka hape, hace catre Peteru pine la hnei angeic hna kuca, nge ketre atr ka lapaune angeic. Thupene la kola amele Iesu hmaca, hnei nyidrëti hna mama koi Peteru, me akeukawanyi angeic laka, nyidrëti a hnimi angeic, nge ase hë nyidrëti nue la ngazo i angeic. (Luka 24:​33, 34) Ame Iehova me Iesu ke, lue ka atreine tulu ewekë nyidro. Tune kaa fe së? Aja i Iehova tro fe sa atreine tulu ewekë. w23.07 21 par. 6-7

Nemene la aqane tro sa anyipicine koi itre xan laka, tro kö a paradraiso la ihnadro elany? Ame la hnapan, Iehova la ka thingehnaeane lai. Kola qaja ngöne la tusi Hna Amaman ka hape: “Önine la atre lapane la theron ka hape: ‘Hanawang! Eni a ahnyipixene la nöjei ewekë asë.’ ” Ka inamacan, nge ka trene mene Nyidrë, nge aja i Nyidrëti fe troa eatrëne la hnei Nyidrëti hna thingehnaean. Ame la hnaaluen, ka xecie hnyawa koi Nyidrë laka, troa eatr la aja i Nyidrë, matre kösë ame koi Nyidrë, eatre hë. Celë hi matre öni Nyidrë: “Nyine mejiune kow, nge ka nyipici la itre trengewekë celë. . . . Eatre hë itre ej!” Ame la hnaakönin, ame la Iehova a nyiqane la ketre ewekë, Nyidrëti a afenesin. Celë hi matre öni Nyidrë: “Ini la Alefa me Omega.” (Hna Am. 21:6) Tro kö Iehova a amamane ka hape, ka thoi lae Satana, nge ka iaö. Matre, ame la ketre a qaja ka hape, “Lolo palaha lai, ngo ka nyipici kö?” E jë la Hna Amaman 21:​5, 6, nge qejepengöne jë. Amamane jë la aqane anyipicine Iehova laka, tro kö a eatr la itre hna thingehnaean.​—Isa. 65:16. w23.11 7 par. 18-​19

Hnei Iehova hna sisinyi lai koi Aberahama, lo nyidrëti a 75 lao macatre. Hnei Aberahama kö hna öhne la kola eatr la hna thingehnaeane cili? Waea. Hna hnaho Isaaka, 25 lao macatre thupen la nyidrëti a thupa la hneopegejë ne Euferata. Nge 60 lao macatre thupen, kola hnahone la lue api nyidrë, ene Esau me Iakobo. (Heb. 6:​15) Ngo tha hnei nyidrëti kö hna öhne la itre matra i nyidrë a nöje ka tru, me lö kowe la Nöje Hna Thingehnaean. Ame pe, hnei Aberahama hna mele nyipici koi Iehova utihë mec. (Iako. 2:​23) Pane mekune jë la madrine i nyidrëti ngöne la fen ka hnyipixe, la nyidrëti a atre ka hape, hna amanathithine la nöjei nöje hnene la lapaun me xomihni nyidrë! (Gen. 22:18) Nemene la ini? Maine jë, tha tro pë hë sa öhne la kola eatr asë la itre hna thingehnaeane hnei Iehova. Ame pe, e tro sa atreine xomihni tui Aberahama, tro Iehova a amanathithi së enehila me ngöne la fen ka hnyipixe.​—Mar. 10:​29, 30. w23.08 24 par. 14

Ketre joxu ka ipië Uzia lo angeic a jeune. Hnei angeic hna inine “troa xouene la nyipi Akötresie.” Hnei angeic hna mec lo kola 68 lao macatre, nge tru catre la hnei Iehova hna amanathithi angeic. (2 Aq. Jo. 26:​1-4) Tru catr la itre ithupëjia hnei Uzia hna lep, nge hnei angeic hna xup acatrene la itre qanahage ne Ierusalema. (2 Aq. Jo. 26:​6-​15) Tru catre la madrine i angeic, ke hnei Iehova hna aijijë angeic troa eatrëne la itre huliwa cili. (A. Cai. 3:​12, 13) Ka majemine Uzia joxu qaja koi itre xan la nyine tro angatr a kuca, nge angatr a drengethenge angeic. Celë hi matre, ame koi angeic, pëkö ka hane qeje angeic. Ame lo ketre ijin, hnei angeic hna lö hnine la uma ne hmi Iehova, me dreu ka pui loi. Ngo, tha ijije kö tro la itre joxu a kuca la huliwa cili. (2 Aq. Jo. 26:​16-​18) Hnei Azaria lo Atre Huuj Ka Sisitria, hna thele troa sewe Uzia, ngo elëhni jë hi angeic. Ngacama itre macatre ne mele nyipici angeic koi Iehova, ngo pine angeic pi tru, hnei Iehova hna lepi angeic hnei lepera. (2 Aq. Jo. 26:​19-​21) Maine ipië ju angeic tune lo xötrei, ke tha tro kö a traqa koi angeic la itre ewekë cili! w23.09 10 par. 9-​10

Ngacama hna ië Peteru hnei uati hmitrötr, ngo angeic palahi a tria. Ame lo macatre 36 M.K., ceme Peteru hi lo uati hmitrötr a ië Konelio atre ne fen hna tha xötrehatren. Kolo hi lai a amamane ka hape, “tha ka ië hna hnime kö Akötresie” nge Nyidrëti ha kapa la itre atre ne fen ngöne la ekalesia. (It. Hu. 10:​34, 44, 45) Qane ju hi lai, angeice ha ce xen memine la itre atre ne fen. Ngo, ame kowe la angetre Iudra ka xome la hmi keresiano, ke tha loi kö tro angatr a ce xen memine la itre atre ne fen. Matre, ame la angatr a traqa e Anetioka, hnei Peteru hna xou troa ce xen memine la itre xaa trejin, ke tha angetre Iudra kö. Öhne hi Paulo aposetolo la aqane ujë i angeic ka ngazo, matre hnei nyidrë hna haji angeic qëmeken la ka alanyim. (Gal. 2:​13, 14) Ngo tha celë kö ka sewe Peteru troa catre nyihlue i Iehova. w23.09 22 par. 8

Maine tro sa waipengö së, tro së lai a öhne la itre nyine troa saze, ngo the dekurage pi kö së! Ka “lolo la Joxu,” matre tro kö nyidrëti a xatua së. (1 Pet. 2:3) Peteru a ithuecatre koi së ka hape: “Tro hë la Akötresie . . . a sipu apexejene la ini i nyipunie. Tro nyidrëti a acatrenyi nyipunie.” Hnei Peteru hna mekun ka hape, tha ijiji angeic kö troa hane cile ezine la nekö i Akötresie. (Luka 5:8) Ngo, jëne la ixatua me ihnimi Iehova me Iesu, hnei angeic hna catre xötrethenge Iesu. Matre hna aijijë angeic troa lö kowe “la Baselaia ka epine palua, lo Baselaia ne la Joxu së me Atre Amele së, Iesu Keriso.” (2 Pet. 1:​11) Ketre manathith ka tru lai! Maine tro epuni a catr tui Peteru, me nue Iehova troa ini epun, tro fe epun a hane kapa la mele ka pë pun. Nge ame hë cili, tro epuni a “kapa la iamele, pine la lapaune i nyipunie.”​—1 Pet. 1:9. w23.09 31 par. 16-​17

Hna kuca la götrane gaa pë ihakun ezine la uma maano, nge hna nyihagene xötreith. E cili la hnë huliwa ne la itretre huuj. Ame ngöne la götrane gaa pë ihakun, hna amë la ita ne huuj memine la trepene tim kopa, matre tro la itretre huuj a pane wasi wanakoim me waca qëmekene troa eatrëne la hnëqa i angatr ka hmitrötr. (Eso. 30:​17-​20; 40:​6-8) Ame enehila, itre trejin me Keriso hna iën e celë fen a catre nyihlue i Iehova, ngöne la götrane gaa pë ihakun ka ej e hnine la uma ne hmi ka tru i Iehova. Tro la trepene tim ne la uma ne hmi a amekunëne kowe la itre hna iën me itre xaa keresiano laka, nyipiewekë tro angatr a iananyi memine la kuci ngazo, nge troa wië la hmi angatr koi Iehova. Tune kaa fe “la ka ala nyimu atraqatr”? Ekaa la angatr a nyihlue i Iehova? Hnei Ioane aposetolo hna meköle goeë angatr a “cil qëmekene la therone i Akötresie,” nge “angatr a kuca la huliwa ka hmitrötr e lai me jidr hnine la uma ne hmi i [Akötresie].” (Hna Am. 7:​9, 13-​15) Eje hi, angatr a kuca la huliwa cili e celë fen, hnine la götrane gaa pë ihakun e trön ne la uma ne hmi ka tru i Iehova. Easa madrine ke, hnei Iehova hna hane aijijë së troa nyihlue i Nyidrë ngöne la uma ne hmi ka tru i Nyidrë! w23.10 28 par. 15-​16

Ame la ketre aqane aegöcatrenyi së hnei Iehova, ke jëne la itre qatre thup. (Isa. 32:​1, 2) Matre ame la epuni a seseu, ke the cile kö troa thele ixatua thene la itre qatre thup. Canga kapa ju la ixatua hna hamën hnei angatr. Jëne angatr, tro Iehova a hamë trengecatr koi epun. Tro la mejiune së qa hnine la Tusi Hmitrötr, ene la troa mele palua ngöne la paradraiso e celë fen maine ngöne la Baselaia e hnengödrai, a hamë trengecatre së. (Roma 4:​3, 18, 19) Tro la mejiune së a xatua së troa xomihnine la itre jol, me catre cainöj, me xom la itre xaa hnëqa ngöne la ekalesia. (1 Thes. 1:3) Celë fe hi ka hamë trengecatr koi Paulo. Hna öj, me “axösisi” angeic, nge hnei angeic hna “luelu” me “kei.” Ketre, anyimua qëmek angeic kowe la mec. (2 Kor. 4:​8-​10) Hetre trengecatre i Paulo troa xomihnine la itre jol, ke ka mel la mejiune i angeic e kuhu hni angeic. (2 Kor. 4:​16-​18) Hnei Paulo hna lapa mekun la mejiune i angeic, ene la troa mele palua e koho hnengödrai. Matre ‘o drai, kolo pala hi a ahnyipixene la hni me mekuna i angeic.’ w23.10 15-​16 par. 14-​17

Ame la easa thith, loi e tro sa mekun ka hape, maine jë, ijine hë tro Iehova a sa la thithi së. Aja i easë tro Iehova a canga sa la thithi së. Ngo atre kö Nyidrë la ijine troa xatua së. (Heb. 4:​16) Maine tha canga sa kö Iehova la thithi së, tro së a mekun e cili ka hape, ‘Tha aja i Nyidrëti kö.’ Ngo maine jë, troa eatre pë hë e thupen. Pane mekune jë la trejin trahmany ka thith, matre troa aloine la meci angeic. Ngo tha loi kö la meci angeic. Maine kuca ju Iehova la ketre iamamanyikeu, tro Satana lai a qaja ka hape, angeic a nyihlue i Iehova, ke hnei Nyidrë hna aloinyi angeic. (Iobu 1:​9-​11; 2:4) Ketre, ase hë Iehova sa la ijin tro Nyidrëti a apatrene la nöjei mec. (Isa. 33:24; Hna Am. 21:​3, 4) Matre, the mekune pi kö së laka, tro Iehova a kuca la ketre iamamanyikeu koi së. Loi pe tro lai trejin a sipo Iehova troa hamëne la trengecatr me tingeting matre xomihnine la meci angeic, me catre nyihlue i Nyidrë. w23.11 24 par. 13

Ngacama hnei Samasona hna kuca la ketre ngazo ka tru, ngo hnei angeic hna bëeke hmaca koi Iehova. Tha hnei angeice kö hna nuetriji Nyidrë! Hnei angeic hna isine troa afenesine la hnëqa i angeic qaathei Akötresie, ene la troa lepe la angetre Filisiti. (Ang. A. 16:​28-​30) Celë hi matre, hnei angeic hna sipo Iehova ka hape: ‘Epi tro ni a nyithupen kowe la angetre Filisiti.’ Ame hnei Akötresie hna kapa la sipo i angeic, me hamë angeic hmaca la trengecatr. Ame ngöne la ijine cili, tru catre hmaca kö la angetre Filisiti hnei angeic hna humuth, hun ekö. Ngacama hnei Samasona hna xeni pune la itre huliwa i angeic, ngo ka tru palahi koi angeic la aja i Iehova. Maine hna haji epun, maine hna ami epun pena qa ngöne la ketre hnëqa, ke the dekurage pi kö! Aja i Iehova troa nue la itre ngazo epun. (Sal. 103:​8, 9) Maine hnei epuni hna kuca la ketre ngazo ka tru ekö, the mekune pi kö laka, ka luzi hë epun. Tro hmaca kö Iehova lai a hamë epun la itre hnëqa, tui Samasona. w23.09 6 par. 15-​16

Pine laka, eö a cile hut matre kola kepe eö hnei Iehova. Tha kolo kö lai a qaja ka hape, Iehova a madrin la eö a cil kowe la itre itupath me itre jol. Nyidrëti pe a madrin koi eö. Ame la eö a cile hut ngöne la itupath, ke Nyidrëti a kepe eö. Drei la ketre manathith ka tru! (Sal. 5:​12) Mekune jë la tulu i Aberahama, hnei angeic hna cile hut, ame hna kepe angeic hnei Akötresie. Hnei Iehova hna nyisinee i angeic, me jelemeköti angeic. (Gen. 15:6; Roma 4:​13, 22) Ijije fe tro së a hane tui Aberahama. Tha hnene kö laka, tru la itre huliwa hne së hna kuca koi Iehova, nge hetre hnëqa së ngöne la organizasio, matre Nyidrëti a kepe së. Waea! Nyidrëti a kepe së, ke easa cile hut ngöne la itupath. Qatre ju hë së maine jeunes, maine isa aqane mele së pena, me hne së hna atrein, ngo ijiji së asë troa cile hut. Eö kö a cile kowe la ketre itupath enehila? Maine eje hi, madrine catre Iehova kowe la aqane cile huti eö. The thëthëhmine kö laka, ame la easa atre ka hape, Iehova a kepe së, ke kola acatrene la mejiune së. w23.12 11 par. 13-​14

Loi e tro la trejin trahmanyi a inin troa dreng me ithanata amenyiken. Kolo lai a hape, troa atreine dreng me trotrohnine la aqane mekuna i itre xan. (It. Ed. 20:5) Kolo fe a hape, troa atreine trotrohnine la atr jëne la nine i angeic, aqane ujë me aqane enije i angeic. Tro eö a atreine trotrohni itre xan tune kaa, e tro palahi eö a ithanata jëne message, me mail? Eje hi, nyipiewekë troa iqëmekë memine la atr. Haawe, isine jë tro palahi a “ithanata iqëmekë” me itre xan. (2 Ioa. 12) Ame la trejin ka macaj, ke atreine fe angeic thupëne la mele i angeic me fami angeic. (1 Tim. 5:8) Loi e tro la itre nekötrahmanyi a hetre hna atreine kuca, matre öhnyi huliwa elany. (It. Hu. 18:​2, 3; 20:34; Efe. 4:​28) Ame la eö a formasio, ke huliwa hnyawa jë, matre tro la itre atr a öhne ka hape, eö la ketre nekötrahmanyi ka huliwa catr, me nyine troa mejiune kow. Tro hë eö a canga öhnyi huliwa. w23.12 27 par. 12-​13

Kola hapeue la “drai Iehova”? Ame ngöne la Tusi Hmitrötr, kola qaja la ijine tro Iehova a amekötine la itre ithupëjia me amelene la itre hlue i Nyidrë. Nyimu nöje ekö hnei Nyidrëti hna amekötin. (Isa. 13:​1, 6; Ezek. 13:5; Zefa. 1:8) Ame la “drai Iehova” hne së hna lapa treqen, ke kola nyiqane memine la kola apatrenyi Babulona Atraqatr, me nyipune memine la isi Amagedro. Maine aja i easë troa mel, ke loi e tro sa hnëkë enehila. Hnei Iesu hna upi së troa hnëkë kowe la “akötr atraqatr.” Kolo hi lai a hape, loi e tro sa “hnëkë palahi” me hmek. (Mat. 24:21; Luka 12:40) Ame ngöne la pane tusi Paulo kowe la itre keresiano ne Thesalonika, hnei angeic hna huliwane la itre ceitune matre hnëkë angatr kowe la drai ne iameköti Iehova. Atre hi angeic ka hape, tha tro kö la drai cili a canga traqa. (2 Thes. 2:​1-3) Ame pe, hnei angeic hna upi angatr troa hnëkë kösë ka tro hi a traqa elany. Nge thatraqai së fe la eamo cili. w23.06 8 par. 1-2

Ame lo 1978, hna xupe la ketre batima atraqatr ka 60 lao étages e Tokyo (Zapo). Ame e cili, ke hna traqa lapa la itre sa. Matre itre atr a hnying ka hape, tro kö a cile catr lai batima. Hna xupe tune kaa lai batima matre tro ej a cile catr? Hnene la itre ka inamacan hna xupe lai batima cili, matre ame la kola traqa la ketre sa, ke eje hi a enienije ngo tha trotro lapa kö ej. Ceitune hi la itre keresiano memine lai batima cili. Tune kaa? Nyipiewekë tro la keresiano a cile catr, me atreine tulu ewekë. Ame göi troa trongëne la itre wathebo me itre trepene meköt, ke loi e tro angeic a catr. Angeic a ‘canga idrengethenge’ me mele nyipici, ngacama kola icilekeu. Ngo ame itre xaa ijin, loi e tro fe angeic a atreine tulu ewekë. (Iako. 3:​17) Ame la keresiano ka atreine tulu ewekë, ke tha ka pi nyi ka meköti kö, maine kuci mekune pena. Ame ngöne la tane mekune celë, tro sa ce wange la aqane tro sa cile catr. w23.07 14 par. 1-2

Hnei Satana hna tupathi Iesu me thel troa thë la aqane imelekeu i nyidrë me Akötresie. (Mat. 4:​1-​11) Hnei Satana hna isine troa akeinyi Iesu matre tha tro kö a hetre thupene mel. Ame lo Iesu a cainöj, ke hnei nyidrëti mina fe hna ixelë memine la itre xaa jol. Hnene la itre ithupëjia hna axösisi nyidrë me thel troa humuthi nyidrë. (Luka 4:​28, 29; 13:31) Hnei nyidrëti fe hna xomihnine la itre tria ne la itretre dreng. (Mar. 9:​33, 34) Qëmekene tro nyidrëti a mec, hnene la itre atr hna hnyimasai nyidrë me axösisi nyidrë. Nge hna humuthi nyidrë tune la ketre atr ka ngazo, nge tru catr la akötre i nyidrë. (Heb. 12:​1-3) Ketre, hnei Iehova hna nue nyidrë troa thue caasine la jole tixenuë i nyidrë. (Mat. 27:46) Tru catr la akötre i Iesu lo nyidrëti a hamëne la thupene mel. Ame la easa lapa mekune la itre hnei Iesu hna kuca koi së, hapeu, tha kolo kö lai a akökötrene la ihnimi së koi nyidrë? w24.01 10-​11 par. 7-9

Maine ka atreine xomihni së, ke tro së lai a atreine ce mel me itre xan. Nge tro fe së lai a drenge hnyawa la angatr a ithanata. (Iako. 1:​19) Ame la atr ka atreine xomihni, ke ka thele tingeting. Matre tha angeice kö a dreng akötrën me sa akökötren, la angeic a hnehengazo. Nge tha angeice kö a canga elëhni, la kola akötrë angeic. Tha angeic kö a itëkeun, ngo angeic pe a ‘xomihni me nue la ngazo.’ (Kol. 3:​12, 13) Maine ka atreine xomihni së, ke tro fe së lai a atreine axecië mekune hnyawa. Tha easë kö a canga axecië mekune menu, ngo easë pe a pane thele me mekune la nyine tro sa kuca. Maine easa thele huliwa, tro kö sa canga kapa la ketre huliwa? Waea. E ka atreine itreqe së, tro së lai a pane mekune la itre ethanyine kowe la fami së, me kowe la imelekeu së me Iehova. Haawe, e tro sa atreine xomihni, ke tha tro kö së lai a axecië mekune menu. w23.08 22 par. 8-9

Maine epuni a kucakuca, ke epuni palahi a isi memine la itre aja ka ngazo, lapa mekune jë lo ijine epuni a nue mel koi Iehova. Celë hi ka troa xatua epun troa cile catr ngöne la itupath. Troa tune kaa? Ame la epuni a nue mel koi Iehova, epuni hi lai a xele epuni kö. Kolo lai a hape, troa nuetrij la itre sipu aja i epun, me itre mekun hnei epun hna thel troa eatrën, nge ka isazikeu memine la aja i Iehova. (Mat. 16:24) Matre ame la epuni a cil kowe la ketre itupath, atre hë epun la nyine troa kuca me tha kuca, matre mele nyipici koi Iehova. Tro epuni lai a isine troa amadrinë Nyidrë. E cili, epuni hi lai a nyitipu Iobu. Ame lo angeic a cile kowe la itre itupath ka tru, öni angeic: “Tha tro kö ni a nuetrije la aqane mele nyipicing!”​—Iobu 27:5. w24.03 9 par. 6-7

Ce Iehova, “Akötresie ne ihnim” memine la itre hlue i Nyidrë! (2 Kor. 13:11) Nyidrëti a hnimi së isa ala cas. Xecie koi së laka, Nyidrëti a haluthi së “hnene la ihnim” i Nyidrë. (Sal. 32:10) Ame la easa lapa mekune la aqane hnimi së hnei Iehova, ke tro së lai a öhne la iwanakoime i Nyidrë, ngöne la mele së me easenyi catre koi Nyidrë. Catre jë thith koi Nyidrë me qaja ka hape, nyipiewekë la ihnimi Nyidrëti koi së. Qaja asë jë koi Nyidrë la itre hne së hna seseu, ngacama xecie koi së laka, trotrohni së hi hnei Nyidrë nge aja i Nyidrë troa xatua së. (Sal. 145:19) Tune la idreuthine la eë ngöne la ijine hnötr, kola akeukawanyi së hnene la ihnimi Iehova. Ka tru nge ka menyik la ihnimi Iehova. Haawe madrine jë, ke Iehova a hnimi epun. Nge qaja amamane jë ka hape: “Eni a hnimi Iehova”!​—Sal. 116:​1. w24.01 31 par. 19-​20

Tha hnei Iesu hmekuje kö hna qaja kowe la itre atr ka hape, Iehova la ëje i Akötresie. Atre hi la angetre Iudra ka ithanata me Iesu la ëje i Akötresie. Ngo öni Tusi Hmitrötr, Iesu la ka “qejepengöi Nyidrë.” (Ioa. 1:​17, 18) Ase hë qaja hnene la Itre Hna Cinyihane Qene Heberu laka, Iehova la Akötresie ka utipin nge ka itrotrohni. (Eso. 34:​5-7) Jëne la ceitun hnei Iesu hna hamën göne la nekön ka patr me kem, mama hnyawa koi së la itre thiina cili. Kola qaja la ketre kem ka öhne qa “gaa nany” la nekö i nyidrëti ka ietra me canga nyinyap me haluthi angeic me nue la ngazo i angeic. Ame la easa e la ceitune cili, kola ketri së hnene la aqane utipin me itrotrohni Iehova. (Luka 15:​11-​32) Eje hi, hnei Iesu hna qaja hnyawane la pengöi Iehova. w24.02 10 par. 8-9

Iehova a akeukawan me ithuecatr kowe la itre ka akötr. Tune kaa la aqane tro sa utipine me akeukawanyi itre xan, tui Iehova? Ame la ketre aqan, ke ene la troa huliwane la itre thiina ka troa xatua së troa utipin me akeukawanyi itre xan. Nemene la itre thiina cili? Nemene la ka troa xatua së troa acatrene la ihnim, matre tro palahi sa “iakeukawanyikeu” o drai? (1 Thes. 4:​18) Loi e tro sa huliwane la itre thiina tune la ihnimi ka ej thene la itre trejin, me thiina ka loi. (Kol. 3:​12; 1 Pet. 3:8) Troa xatua së tune kaa hnene la itre thiina cili? Ame la easa utipine la itre trejin, nge aja i easë troa xatua angatr, ke celë hi ka uku së troa akeukawanyi angatr, la angatr a akötr. Öni Iesu, “Kola ewekë la që qa kuhu hni. Matre, ame la atre ka loi, tro angeic a axulune la loi, qa ngöne la trengamo i angeice ka loi.” (Mat. 12:​34, 35) Ame la easa akeukawane la itre trejin ka akötr, ke aqane tro hi së lai a amamane la ihnimi së koi angatr. w23.11 10 par. 10-​11

Loi e tro sa sipo ixatua koi Iehova matre troa trotrohnine la itre hna perofetan e hnine la Tusi Hmitrötr. Pane mekune jë ka hape, epuni a ngenu ngöne la ketre götran memine la itre sinee i epun. Epuni a ajan troa tro kowe la ketre götran hnei epuni hna thatre. Ngo eloine pe, atre hnyawa hi la ketre sinee i epun lai götrane cili. Ketre, atre hnyawa hi angeic la hmeku i epun, memine la itre xaa mene gojeny. Tro epuni lai a madrin troa ce tro me angeic! Ceitune hi lai me Iehova, atre hnyawa hi Nyidrë la hneijine së, memine la itre ewekë ka troa traqa elany. Maine easa ajane troa trotrohnine la itre hna perofetan e hnine la Tusi Hmitrötr, ke loi e tro sa sipo ixatua koi Nyidrë. (Dan. 2:​28; 2 Pet. 1:​19, 20) Tune la kem me thin ka ihnim, aja i Iehova tro la itre nekö i Nyidrë a hetre mele ka loi elany. (Iere. 29:11) Ngo ame pe Nyidrë, atreine hi Nyidrë qaja la itre ewekë ka troa traqa elany, nge ka eatr palahi. Hnei Nyidrëti hna amë la itre hna perofetan e hnine la Tusi Hmitrötr, matre tro sa atre la itre ewekë ka tru ka troa traqa elany.​—Isa. 46:10. w23.08 8 par. 3-4