Julai

Ame la itre hnei Iesu hna qaja me kuca, uti fe hë la itre iamamanyikeu, ke itre ej a amamane la itre mekune me itre aliene hni Iehova. (Ioa. 14:9) Nemene la hna ini së hnene la itre iamamanyikeu cili? Tru la ihnimi Iehova me Iesu koi së. Ame lo Iesu e celë fen, hnei nyidrëti hna amamane la ihnimi nyidrë kowe la itre atr. Tune kaa? Hnei nyidrëti hna kuca la itre iamamanyikeu me aupune la itre akötre i angatr. Ame lo ketre drai, hnene la lue timek hna sipo iele nyidrë troa xatua nyidro. (Mat. 20:​30-​34) Öni Tusi Hmitrötr, hnei nyidrëti hna “utipi nyidro” me aloine la meci nyidro. Ame la hnaewekë Qene Geres “utipin” ke, kola qaja la akötr ka ej e kuhu hni Iesu, kösë kola treije la hni nyidrë. Ame la utipin, ke sinetrongene la ihnim. Celë hi lai ka upi nyidrëti fe troa ithuane la itre ka mecijin, me aloine la ketre atr ka lepera. (Mat. 15:32; Mar. 1:​41) Haawe, xecie koi së laka, tru la ihnimi Iehova, Akötresie ka tru trenge utipin, me Iesu koi së. Nge nyidroti a akötr la easa akötr. (Luka 1:​78; 1 Pet. 5:7) Nyidroti pe hi a treqene la ijine troa apatrene la itre akötre së! w23.04 3 par. 4-5

Nyipiewekë tro sa hmekëne la itre ewekë ka troa uku së troa xome la aqane waiewekë i fen. Nyialiene jë la itre mekune së hnene la itre ewekë hne së hna e me inine e hnine la Tusi Hmitrötr. Nge catre jë sine la itre icasikeu me cainöj matre thupëne la itre mekune së. Ketre, tha tro jë kö Iehova lai a nue së kowe la itupath hne së hna thatreine xomihnin. (1 Kor. 10:​12, 13) Loi e tro sa catre thith matre mele nyipici koi Iehova ngöne la hneijine la pun. Iehova a ajan tro sa ‘nenge la itre hni së qëmeke i nyidrë’ ngöne la thith. (Sal. 62:8) Atrunyi Iehova jë nge olene jë kowe la itre ewekë hnei Nyidrëti hna kuca. Sipo Nyidrëti jë fe troa xatua epuni troa catre cainöj. Ketre, sipo ixatua jë koi Nyidrë matre troa atreine cile kowe la itre jol me itre itupath. The nue pi kö la ketre ewekë troa sewe epuni troa thithi lapa koi Nyidrë. w23.05 7 par. 17-​18

Hnauëne la easa sine la itre icasikeu? Ame la pane kepin, ke easa atrunyi Iehova. (Sal. 26:12; 111:1) Ketre, easa sine la itre icasikeu matre troa ithuecatrekeu, ke easa melëne la hneijin ka ngazo. (1 Thes. 5:​11) Ame la easa hamë mekun, easë hi lai a atrunyi Iehova me ithuecatrekeu. Ngo hetre ewekë ka troa ajolë së. Maine jë, easa xou troa hamë mekun, maine pena, easa pi sa, ngo tha hna aijijë së kö troa hamë mekun. Nemene la aqane tro sa elë hune la lue jole celë? Öni Paulo aposetolo ka hape, ka nyipiewekë catr troa “ithuecatrekeu” ngöne la itre ijine icasikeu. Ame la easa trotrohnine ka hape, kola xatuan la itre atrene la icasikeu hnene la itre mekun hne së hna hamën, tro lai a thue aja koi së troa liim. Ngacama tha ase kö aijijë së troa sa, ngo easa madrin kowe la itre mekun hna hamën hnei itre xan.​—1 Pet. 3:8. w23.04 20 par. 1-3

Traqa ha la ithuemacanyi Joxu! Ijine hë tro la angetre Iudra hna othe e Babulona a 70 hë lao macatre, a bëeke hmaca kowe la nöje i angatr e Isaraela. (Eze. 1:​2-4) Iehova hmekuje hi la ka atreine eatrëne lai. Tha majemine kö la angetre Babulona nue hmaca la itre hna oth. (Isa. 14:​4, 17) Pine laka hna ngaa Babulona, matre hnene la joxu hna hnyipi acil hna nue la angetre Isaraela troa bëek kowe la nöje i angatr. Hetre mekune ka tru nyine tro la itre hene ne fami a axeciën, ene la troa tro maine lapa e Babulona. Ame la itre xan thei angatr ke qatre hë, nge nanyi pena la gojeny. Ketre, alanyim la itre hna hnahone e Babulona, nge ka tru e cili. Matre ame koi angatr, tha zi angatre kö e Isaraela, ngo zine pe la itre xötrapane i angatr. Ame la itre xan, ke ka trenamo e Babulona, matre xele angatr ma nue la hnalapa me huliwa i angatr troa tro kowe la ketre nöje trenyiwa. w23.05 14 par. 1-2

Tusi Hmitrötr a ithuecatre koi së troa atreine cile hut, me hetre utipin, me ihnim. Öni Luka 21:19: “Nge pine la hnei nyipunieti hna cile hut, tro hë nyipunieti a mel.” Kolose 3:​12 a hape: “Hetrëne jë la utipin.” Nge kola qaja ngöne 1 Thesalonika 4:​9, 10: “Akötresie la atre ini nyipunie troa ihnimikeu. . . . Ngo ange trejin, eahuni pe a iele nyipunie troa kuca apexejen.” Hna cinyanyine la itre xötre celë, kowe la itre keresiano ka hetrenyi hë la köni thiina cili. Nge nyipiewekë tro palahi angatr a huliwane itre ej. Ketre tu së fe. Celë hi matre, tro epuni a wange la aqane huliwane la köni thiina cili hnene la itre pane keresiano. Tro fe epuni a wange la aqane tro epuni a nyitipu angatr, me hnëkë kowe la akötr atraqatr. Ame la kola nyiqane la akötr atraqatr, atreine hë epun cile hut, ke hnei epuni palahi hna cile catr ngöne la itre jol enehila. w23.07 3 par. 4, 8

Ngacama hna ië së ju hë troa mele e koho hnengödrai maine e celë fen, ngo loi e tro asë hi së a lapa ngöne la “Gojenyi Ka Hmitrötr.” Eje hi, tro së lai a kapa la itre manathithi qa ngöne la paradraiso ka ketrepengön enehila, me qaathene la Baselaia elany, e tro sa lapa ngöne la gojenyi cili. (Ioa. 10:16) Qane lo 1919, traqa koi itre milio lao trahmany, me föe, me nekönatr ka trotriji Babulona Atraqatr, me nyiqane trongëne la gojenyi cili. Hnei Iehova hna nyidrawane la gojenyi kowe la angetre Iudra ka tro qa Babulona. (Isa. 57:14) Tune kaa pena kowe la “Gojenyi Ka Hmitrötr” enehila? Itre macatre qëmekene la macatre 1919, hnei Iehova hna upe la itre atr ka metrötrë Nyidrë troa nyidrawane la gojenyi kowe la itre atr ka trotriji Babulona Atraqatr. (Wange ju fe la Isaia 40:3.) Kösë hnei angatr hna nyiqane jë la gojeny. Ka nyipiewekë catr la huliwa cili, ke kola aijijëne la itre atr e thupen troa trotrije la hmi ka thoi, me nyihlue i Iehova pena memine la nöje i Nyidrë. w23.05 15-​16 par. 8-9

Aja i Iehova tro sa nyihlue i Nyidrë ce memine la madrin me hni ka pexej. (2 Kor. 9:7) Hapeu, tro kö sa isine troa eatrëne la mekuna së ngacama pëkö aja the së? Öni Paulo aposetolo: “Eni a jenge la ngönetreing, me xomacon ej kösë hlu.” (1 Kor. 9:​25-​27, ithuemacany.) Ngacama tha aja i Paulo kö troa kuca la hnei Iehova hna upi angeic, ngo hnei angeic hna isine troa kuca. Hapeu, madrine kö Iehova kowe la huliwa i Paulo? Öö, ke hnei Nyidrëti hna amanathithine la itre trengecatre i angeic. (2 Tim. 4:​7, 8) Madrine catre Iehova la easa isine troa eatrëne la mekuna së, ngacama tha ajane kö së. Nyidrëti a madrine, ke easa kuca koi Nyidrë. Maine jë tha pi tro kö sa kuca la ketre huliwa, ngo easa kuca ke easa hnimi Nyidrë. Tune la aqane amanathithine Nyidrë la itre trengecatre i Paulo, tro fe Nyidrëti a hane amanathithi së. (Sal. 126:5) Nge ame la easa öhne la aqane amanathithi së, ke kola thue aja koi së troa huliwa catr koi Nyidrë. w23.05 29 par. 9-​10

Hnei Paulo hna aceitunëne la itre atr hna troa apatrene ngöne la drai Iehova memine la itre ka meköl. Pine nemen? Pine laka, tha wangatrehmekune kö angatr la itre ewekë ka traqa ngöne la hneijine së. Tha öhne kö angatr la enyipiewekëne la itre ewekë ka traqa ngöne la fen, matre tha enije kö angatr. Ame enehila, alanyim la itre atr ka pë imelekeu me Akötresie, kösë angatr a meköl. (Roma 11:8) Ame koi angatr, tha easë kö a melëne la “itre drai ne la pun,” nge tha tro kö a traqa la akötr atraqatr. (2 Pet. 3:​3, 4) Ame pe, easa öhne la enyipiewekën tro sa trongëne la eamo i Paulo, ene la troa hmek. (1 Thes. 5:6) Celë hi matre, tha tro kö sa hnehengazo, ngo tro pe sa atreine waiewekë hnyawa. Pine nemen? Ke celë hi lai ka xatua së troa iananyi memine la kuci politik. Pine laka easë easenyi trootro kowe la drai Iehova, tro la itre atr a uku së troa hane lö hnine la kuci politik. Ngo tha tro kö sa seseu göne la aqane tro sa ujë elany. Tro kö la uati hmitrötre i Iehova a xatua së troa catr me axecië mekune ka loi.​—Luka 12:​11, 12. w23.06 10 par. 6-7

Nemen la ka canga mama koi epun la kola qeje Samasona? Maine jë, tro epuni lai a mekune la ketre trahmany e hnine la Tusi Hmitrötr ka tru trengecatr. Nge eje hi, hna atre Samasona pine la trengecatre i angeic. Ame pe, hnei Samasona fe hna axecië mekun menu, me xeni pun. Ngo hnei Iehova hna wangatrune la aqane mele nyipici angeic, me qaja la hnei angeic hna melën e hnine la Tusi Hmitrötr, matre ini së. Jëne Samasona, hnei Iehova hna kuca la itre huliwa ka tru matre xatuane la nöje i Nyidrë. Itre hadredr lao macatre thupene la kola mec hnei Samasona, hnei Iehova hna upi Paulo aposetolo troa qeje Samasona, la angeic a e wengëne la itre atr ka lapaun. (Heb. 11:​32-​34) Tru la itre ini nyine tro sa xom qaathei Samasona. Hnei angeic hna mejiune koi Iehova ngöne la itre ijine jol. Tro la tulu i Samasona a ithuecatr koi së, me xomi ini qa ngön. w23.09 2 par. 1-2

Ame la ka troa xatua së troa atreine cile hut, ke ene la troa thithi lapa koi Iehova, me qaja koi Nyidrë la itre hne së hna hnehengazon. (1 Thes. 5:​17) Maine jë, tha epuni kö a cile kowe la ketre itupathe ka tru enehila. Ngo hapeu, epuni kö a thith koi Iehova la epuni a hnehengazo, me akötr, maine xou? Maine tro palahi epuni a thithi koi Nyidrë göne la itre jol ka co, ke tha jole hë lai koi epuni elanyi troa thithi koi Nyidrë göne la itre jole ka tru. Xecie hë lai koi epun laka, tro kö Nyidrëti a xatua epun ngöne la nyipi ijin. (Sal. 27:​1, 3) E atreine hi së cile kowe la itre itupath enehila, ke tro hë së lai a cile catr ngöne la ijine akötr atraqatr. (Roma 5:3) Hnauëne laka easa qaja tune lai? Alanyim la itre trejin ka qaja ka hape, ame la angatr a cile kowe la ketre jol, ke celë hi ka xatua angatr troa cile kowe la itre xaa jol e thupen. Jëne la hnei angatr hna cile hut, xecie koi angatr laka, tro kö Iehova a xatua angatr ngöne la itre ijine jol. Nge tro la lapaune i angatr, a xatua angatr troa atreine cile kowe la itre xaa jol.​—Iako. 1:​2-4. w23.07 3 par. 7-8

Ka ipië me ka utipine Iehova, matre Nyidrëti a tulu ewekë. Ame lo Iehova a apatrene la itre atr ne Sodroma, hnei Nyidrëti hna amamane ka hape, ka ipië Nyidrë. Jëne la itre angela, hnei Nyidrë hna upi Lota troa kötr kowe la itre wetr. Ngo xou i Lota troa tro e cili. Matre hnei angeic hna sipo Iehova, tro angeic me fami angeic a kötr a tro Zoara, ketre traon hnei Nyidrëti hna mekune troa apatren. Maine ju tro Iehova a musinë Lota, troa drenge lo itre hnei Nyidrëti hna amekötin. Ngo hnei Nyidrëti hna kapa la sipo i Lota, matre tha apatrenyi Zoara ju kö. (Gen. 19:​18-​22) Itre hadredr lao macatre thupen, hnei Iehova hna utipine la angetre Nineve. Hnei Nyidrëti hna upi Iona troa thuemacanyine la angetre Nineve laka, easenyi hë tro Nyidrëti a apatrenyi angatr me traone i angatr. Ngo ame hë la angatr a ietra, hnei Nyidrëti hna utipi angatr matre tha apatrenyi angatre ju kö.​—Iona 3:​1, 10; 4:​10, 11. w23.07 21 par. 5

Nemene la ini hne së hna xome qa ngöne la hna melëne hnei Ioasa? Ceitu i Ioasa memine la ketre isinöe hna sajuën, ke tha ka jui kö la itre iwaan. Thupene la kola meci hnei Iehoiada, atre “sajuë” angeic, kola traqa la itre ka iamenumenu, matre canga nuetriji Iehova pi hi hnei angeic. Kola amamane hnene la hna melëne celë laka, tha tro kö sa drengethenge Akötresie ke, kola amamai tulu ka loi hnene la itre sinee së me itre trejine ne la ekalesia. Ngo maine aja i easë troa catr la imelekeu së me Akötresie, ke nyipiewekë tro sa acatrene la ihnim me metrötre së koi Nyidrë. Ketre, loi e tro mina fe sa akökötrene the së la xoue Nyidrë, jëne la hna e Tus Hmitrötr, me lapa mekun ej, me thithi lapa. (Iere. 17:​7, 8; Kol. 2:​6, 7) Tha aja i Iehova kö tro sa huliwa mec koi Nyidrë. Ngo ame la aja i Nyidrë ke, tro sa trongëne la hna qaja ngöne Atre Cainöj 12:​13, kola hape: “Qouju e Akötesie, me trongëne la nöjei wathebo i nyidë; ke celë hi qâne la nöjei ate asë.” Tro sa atreine cile kowe la itre jol, e tro sa xoue Akötresie. Nge pëkö ketre ewekë ka troa thë la aqane imelekeu së me Nyidrë. w23.06 19 par. 17-​19

Kola nyiqane la xötre 5 ka hape: “Önine la atre lapane la theron.” (Hna Am. 21:5a) Akönia qaja hi la itre hnëewekë celë ngöne la tusi Hna Amaman, nge Iehova la ka ithanata ngöne la hna meköle goeën. Matre tha ketre angela, maine Iesu hna amelene hmaca la ka ithanata, ngo Iehova kö! Haawe, kolo hi lai a anyipicine la hna qaja e thupen. Pine nemene matre easa qaja lai? Ke “Akötresie ka thatreine thoi” Iehova. (Tito 1:2) Matre ame pë hë la hna qaja ngöne Hna Amaman 21:​5, 6 ke, ka nyipici. Tro sa ce wang la hnëewekë “Hanawang!” Anyimua qaja la hnëewekë qene Geres goi “Hanawang!” ngöne la tusi Hna Amaman. Nemene la hna qaja e thupen? Öni Akötresie: “Eni a ahnyipixene la nöjei ewekë asë.” Nyipici, Iehova a qaja la itre ewekë hna tha eatrëne palakö. Ngo pine laka, ka xecie koi Nyidrë ka hape, tro itre ej a eatr, matre Nyidrë a ithanata kösë eatre hë.​—Isa. 46:10. w23.11 3-4 par. 7-8

Hnei Peteru palahi hna tria. Ame lo Iesu a qejepengöne la itre hna perofetane laka, troa akötrëne me humuthi nyidrë, hnei Peteru hna ameköti nyidrë. (Mar. 8:​31-​33) Nge anyimua iwesitrë angeic me itre xaa aposetolo matre troa atre ka hape, drei la ka tru e angatr. (Mar. 9:​33, 34) Ame lo jidr tixenuë i Iesu e celë fen, hnei Peteru hna thupa la hnangenyië ne la ketre trahmany. (Ioa. 18:10) Nge ngöne palahi la jidri cili, hnei angeic hna xoue atr me akönia qaja ka hape, thatre Iesu kö hnei angeic. (Mar. 14:​66-​72) E thupen, hnei angeic hna treije hleuhleu. Tha hnei Iesu kö hna nuetriji Peteru. Thupene la hna amele Iesu hmaca, hnei nyidrë hna aijijë Peteru troa amamane la ihnimi angeic koi nyidrë. Hnei Iesu hna ahnith koi Peteru la ketre hnëqa, ene la troa thupëne hnyawane la itre nekö i mamoe i nyidrë. (Ioa. 21:​15-​17) Hnei Peteru kö hna kapa la hnëqa cili? Öö, ke ame ngöne lo ijine Penetekos, hnei angeice fe hna kapa la uati hmitrötr e Ierusalema. w23.09 22 par. 6-7

Öni Peteru kowe la itre qatre thup ekö ka hape, “Thupëne hnyawa ju la itre mamoe i Akötresie.” (1 Pet. 5:​1-4) Itre qatre thup fe, atre hi eahun laka, hnime catre epun la itre trejin, nge aja i epun troa thupë angatr. Ngo ame itre xaa ijin, epuni a mekun ka hape, tru palaha la itre jole i epun, maine kucakuca catr epuni matre eatrëne la hnëqa cili. Nemene la nyine troa kuca? Fe pi la hni epun koi Iehova. Öni Peteru: “Maine tro ketre a nyihlu, nue angeice pi troa kuca thenge la trengecatr hna hamë angeic hnei Akötresie.” (1 Pet. 4:​11) Ame la itre xaa trejin, angatr a cile kowe la itre jole laka, tro hi a patr ngöne la fen ka hnyipixe. The thëthëhmine kö laka, Iesu Keriso “tane la itretre thup,” la ka ijije troa xatua angatr. Tro kö nyidrëti a xatua angatr enehila me elany ngöne la fen ka hnyipixe. Ame la aja i Iehova, ke tro epuni a hnim me thupëne la itre trejin, me ‘nyi tulu kowe la hnënge mamoe.’ w23.09 29-​30 par. 13-​14

Loi e tha tro kö sa xome la aqane waiewekë ne la itre atre ne fen. Maine tro sa xome la aqane waiewekë i angatr, ke tro së lai a iananyi me Iehova, memine la itre trepene meköti Nyidrë. (1 Kor. 3:​19) “Inamacane i fen” a ukune la itre atr troa keithenge la itre sipu aja i angatr ka ngazo. Hnene la itre xaa keresiano ne Peregamo me Thuataira, hna nyitipune la aqane ujë ne la itre atrene la traone i angatr, ka thili koi idrola me kuci ngazo. Hnei Iesu hna hajin la itre trejin ne la lue ekalesia cili, pine angatr nue la kuci ngazo e hnine la ekalesia. (Hna Am. 2:​14, 20) Enehila mina fe, itre atr a uku së troa hane xome la aqane waiewekë i angatr. Ijije hi tro la fami së, me itre sinee së a iaö së ka hape, itre wathebo i Iehova a xomehnöthe la mele së. Matre angatr a uku së troa wangacon itre ej. Öni angatr ka hape, pëkö engazone la troa kuci ngazo, nge ka hekö hë la itre trepene meköt ne la Tusi Hmitrötr. Ame itre xaa ijin, easa mekune ka hape, tha ka lualai kö la itre hna amekötin hnei Iehova. Matre, tro së lai a thel troa elë hune la itre “hna cinyihan.”​—1 Kor. 4:6. w23.07 16 par. 10-​11

Hnei Maria thine i Iesu hna aja ixatua. Tha ka faipoipo pala kö angeic, ngo tro angeic a upune. Ketre, thatreine kö angeic hetru nekönatr, nge kolo pena upi angeic troa hetrune la nekönatr ka troa Mesia epin. Nge tha ka ce meköle palakö Maria me trahmany, matre tro angeic a qejepengöne tune kaa koi Iosefa la ewekë cili? (Luka 1:​26-​33) Nemene la ka xatua Maria? Hnei angeic hna sipo ixatua koi itre xan. Hnei angeic hna pane sipo Gaberiela troa hamën la itre xaa ithuemacanyi göne la hnëqa cili. (Luka 1:​34) Thupene lai, hnei angeic hna “tro kowe la itre wetr” e Iudra matre iöhnyi me Elisabeth, sinee i angeic. Hnei Elisabeth hna pane felisite Maria, nge hnei Iehova hna upi eahlo troa qaja la ketre hna perofetan göne la nekönatr hna upunen. (Luka 1:​39-​45) Öni Maria, “Hnei [Iehova] hna kuca la itre huliwa ka men hnene la ime i nyidrë.” (Luka 1:​46-​51) Jëne la ixatua i Gaberiela me Elisabeth, hnei Iehova hna aegöcatrenyi Maria. w23.10 14-​15 par. 10-​12

Tha alanyimu kö la itretre drei Keriso hna iën hnei uati hmitrötr, nge ketrepengöne kö la aqane imelekeu i angatr me Iehova. Ala 144 000 angatr ka troa atre huuj e hnengödrai me Iesu. (Hna Am. 14:1) Ame la Gaa Hmitrötr, ke kola nyihatrene la pengöne la itre hna iën, ene lo itre hnei Akötresie hna nyi kukun, la angatr palakö e celë fen. (Roma 8:​15-​17) Ame la Gaa Nyipi Hmitrötr, kola nyihatrene la hnengödrai, hnë lapa i Akötresie. Ame la “imaano” akawane la Gaa Hmitrötr memine la Gaa Nyipi Hmitrötr, ke kola nyihatrene la ngönetrei Iesu ka thingijë i nyidrë, lo Atre Huuj Ka Sisitria troa tro hnengödrai. Ame la nyidrëti a huujën la ngönetrei nyidrë thatraqane la itre atr, ke nyidrëti hi lai a fe gojenyi kowe la itre hna iëne matre tro angatr a hane mel e hnengödrai. Tro fe angatr a nuetrij la ngönetrei angatr e celë fen qëmeken troa kapa la edrö i angatr e hnengödrai.​—Heb. 10:​19, 20; 1 Kor. 15:50. w23.10 28 par. 13

Ame la angetre Eferaima a qajangazo Gideona, hnei angeic hna sa amenyikene koi angatr. (Ang. A. 8:​1-3) Tha hnei angeice kö hna sa akötrëne koi angatr. Hnei angeice pe hna ipië, me drei angatre hnyawa. Celë hi ka apujene la elëhni angatr me nyinyine la jol. Ame la kola qajangazone la itre qatre thup, angatr a nyitipu Gideona ngöne la angatr a drenge hnyawa me sa amenyiken. (Iako. 3:​13) Aqane tro hi angatre lai a acatrene la cas ne la ekalesia. Tha hnei Gideona kö hna thele troa selë angeic lo kola ngaa angetre Midiana, ngo hnei angeice pe hna atrunyi Iehova. (Ang. A. 8:​22, 23) Troa nyitipu Gideona tune kaa hnene la itre trejin hna acil? Nyipiewekë tro angatr a atrunyi Iehova, ngöne la kola qaja aloinyi angatr pine la itre huliwa hnei angatr hna kuca. (1 Kor. 4:​6, 7) Maine troa qaja aloine la aqane hamë ini ne la ketre qatr thup, loi e tro nyidrëti a qaja ka hape, hnei Tusi Hmitrötr memine la itre ini hna hamëne hnei organizasio. Nyipiewekë tro la itre qatre thup a isa hnyinge ka hape, angatre kö a hamë ini göne troa atrunyi Iehova maine göne troa atrunyi angatre pena. w23.06 4 par. 7-8

Maine tha hamëne kö Iehova la hne së hna sipon, loi e tro sa isa hnying ka hape, ‘Ka nyipiewekë kö la hnenge hna sipon?’ Ame itre xaa ijin, easa mekun ka hape, atre kö së la ka loi koi së. Ngo ame la hne së hna sipon, ke tha ka loi kö koi së elany. Maine jë hetre aqane nyinyine kö la jole cili, nge ka loi ju kö hune lo hne së hna qaja ngöne la thithi së. Nge ame la itre xaa ewekë hne së hna sipon, ke tha ka ihmeku kö memine la aja i Nyidrë. (1 Ioa. 5:​14) Ka tune la keme me thin ka sipone koi Iehova, matre tro kö la nekö i nyidro a lapa ngöne la nyipici. Kösë mekun ka loi la hnei nyidroti hna sipon. Ngo ame pe, tha Iehova kö a musinë së troa nyihlue i Nyidrë. Aja i Nyidrë tro së isa ala cas, me itre nekö së fe, a sipu iëne troa nyihlue i Nyidrë. (Dreut. 10:​12, 13; 30:​19, 20) Haawe, loi pe tro la itre keme thine a sipo Iehova troa xatua angatr troa ketr la hni ne la itre nekö i angatr, matre tro nyudren a hnimi Nyidrë me nyisinee i Nyidrë.​—It. Ed. 22:6; Efe. 6:4. w23.11 21 par. 5; 23 par. 12

Pine nemene matre ame la easa akeukawanyi ketre, ke easë hi lai a amamane la ihnimi së? Önine la ketre itus ka qeje Tusi Hmitrötr ka hape, ame la Paulo a qaja la hnëewekë ‘iakeukawan’ ke, kola qaja la “troa ce lapa memine la ketre atr ka cile kowe la ketre jol me ithuecatr koi angeic.” Matre ame la easa akeukawan la ketre trejin ka akötr, ke easë hi lai a xatua angeic troa catre nyihlue i Iehova. Nge ame la easa akeukawane la ketre trejin, ke easë hi lai a amamane la ihnimi së koi angeic. (2 Kor. 7:​6, 7, 13) Ka ce tro la utipin me iakeukawan. Pine nemen? Ame la atr ka utipin, ke aja i angeic troa akeukawanyi itre xan me xatua angatr. Matre easa pane utipin, nge tro lai a upi së troa akeukawanyi itre xan. Hnei Paulo hna amamane laka, tru la utipine i Iehova kowe la itre atr, matre Nyidrëti a akeukawanyi angatr. Paulo a qeje Iehova ka hape, “Keme ka tru trenge utipin, me Akötresie ne iakeukawany.”​—2 Kor. 1:3. w23.11 9-​10 par. 8-​10

Eje hi, tro asë hi la itretre drei Keriso a cil kowe la itre itupath. Pane mekune jë la hna melën hnei Paulo aposetolo. Öni angeic kowe la itre keresiano ne Thesalonika: “Ame lo ce eahuni me nyipunie, hne huni hna majemine canga thuemacanyi nyipunie ka hape, tro hë së a melëne la itre itupath.” (1 Thes. 3:4) Nge öni angeic kowe la angetre Korinito: “Ange trejin, tha ajane kö huni tro nyipunie a thatre la jole ka traqa koi huni . . . tha nyipi mama kö koi huni ka hape, tro jë kö huni a mel maine mec.” (2 Kor. 1:8; 11:​23-​27) Ame enehila mina fe, itre hlue i Iehova a cil kowe la itre itupath. (2 Tim. 3:​12) Ame la epuni a lapaun koi Iesu, me hane atre drei nyidrë, ke tro la itre sinee i epun, me itre fami epun a icilekeu me epun. Kolo kö a xele ma wai epun ngöne la hnë huliwa, pine epun huliwa nyipici? (Heb. 13:18) Maine pena, kola icilekeu hnei mus pine epun catre cainöj? Öni Paulo, traqa ju hë la nöjei jol, ngo loi e tro sa madrin. w23.12 10-​11 par. 9-​10

Nyimu jol hnei Iakobo hna cile kow. Hnei Simeona me Levi hna adrone la ëje i Iehova memine la fami angatr. Nge hna mecitriji Iakobo hnei Rakela, lo föe hnei nyidrëti hna hnime catrën, lo eahlo a hnahone la hnaaluene nekö i nyidro. Nge ame lo kola catrehnine la jiin, hnei Iakobo hna fek a tro Aigupito, ngacama qatre catre hë nyidrë. (Gen. 35:​16-​19; 37:28; 45:​9-​11, 28) Ngacama traqa ju hë la nöjei pengöne jol, ngo hnei Iakobo palahi hna catre lapaune koi Iehova, me kowe la itre hnei Nyidrëti hna thingehnaean. Nge hnei Iehova fe hna amamane ka hape, ce Nyidrë me angeic. Hnei Nyidrë hna nenge la manathith koi Iakobo. Pane mekune jë la madrine i Iakobo la Iehova a aijijë angeic troa iöhnyi hmaca me Iosefa, lo nekönatr hnei angeic hna treijepin ekö. Imelekeu i angeic me Iehova la ka xatua angeic troa cile kowe la itre jole cili. (Gen. 30:43; 32:​9, 10; 46:​28-​30) Maine tro fe sa acatrene la imelekeu së me Iehova ke, tro së lai a atreine cile kowe la nöjei pengöne jol. w23.04 15 par. 6-7

Ame la Salamo 23 ke ketre nyima. Dravita a nyimane ka hape, Iehova a hnimi angeic, nge tro kö Nyidrëti a thupë angeic. Angeic a qaja la aqane imelekeu i angeic me Iehova, lo Atre Thupë Mamoe. Hnei Dravita hna nue Iehova troa eatrongë angeic, matre tha xou i angeic kö, nge ka mejiun angeic koi Nyidrë. Atre hi angeic ka hape, Iehova a amamane e nöjei drai la ihnimi Nyidrëti koi angeic. Pine nemene matre ka xecie koi angeic? Öhne hi Dravita la ihnimi Iehova, ke hnei Nyidrëti palahi hna hamë angeic la itre ka nyipiewekë kowe la mel. Atre fe hi angeic laka, Iehova la sinee i angeic, nge madrine catre Nyidrëti koi angeic. Celë hi matre xecie koi angeic laka, tro kö Iehova a hamë angeic la itre ka nyipiewekë kowe la mel, ngacama traqa ju hë la itre jol. Xecie koi angeic laka, Iehova a hnimi angeic, matre tha seseu menu kö angeic, nge angeic a melëne la hna hetreny me mele madrin.​—Sal. 16:11. w24.01 29 par. 12-​13

Qaane lo Hnaaluene Isi Katru kola tingeting la itre nöj, nge celë hi ka aijijëne la itre hlue i Akötresie troa catre cainöj. Eje hi, kola kökötre lolo la huliwa ne cainöj e cailo fen. Enehila mina fe, Lapa Ne Xomi Meköt a trongëne la itre hna amekötin hnei Keriso. Ame la aja i angatr, ke tro la itre hna amekötin hnei angatr hna hamën, a trothenge palahi la aja i Akötresie. Tro pë hë la itre qatre thup me itretre thupë sirkoskripsio a hamën la itre hna amekötine cili, kowe la itre ekalesia. Ame la itre trejin hna iën, nge ka qatre thup, ke angatr “ngöne la ime maca i [Keriso].” (Hna Am. 2:1) Nyipici laka, tha ka pexeje kö la itre qatre thup, tro fe angatre lai a hane tria. Hnei Mose me Iosua memine la itre aposetolo hna hane tria fe ekö. (Num. 20:12; Ios. 9:​14, 15; Roma 3:​23) Ame pe, Keriso palahi a eatrongëne la hlue ka nyipici me itre qatre thup, nge tro palahi nyidrëti a kuca tun. Haawe, nyipiewekë tro sa mejiune kowe la itre hna amekötin hna hamën hnene la itre trejin ka elemekene la organizasio. w24.02 23-​24 par. 13-​14

Ame enehila, easa amadrinë Iehova la easa qaja koi itre xan la etrune la ihnimi së me hni ne ole së koi Nyidrë. Ame la aja së la easa cainöj, ke troa e la itre atr koi Iehova me xatua angatr troa hnimi Nyidrë, tune la aqane hnimi Nyidrëti hne së. (Iako. 4:8) Ketre madrine ka tru koi së troa amamane koi itre xan la hna qaja hnei Tusi Hmitrötr göi Iehova, tune la ihnim, me meköt, me inamacan me men i Nyidrë, me itre xaa thiina ju kö. Ketre, easa atrunyi Iehova me amadrinë Nyidrë ngöne la easa thele troa nyitipu Nyidrë. Ame ngöne la fene celë ka ngazo, canga mama hi koi itre xan la pengö së, nge angatre a hnyingëne la kepin, matre tha ceitu së kö me angatr. (Mat. 5:​14-​16) Ame la easa iöhnyi me angatr e nöjei drai, ijije hi tro sa qaja koi angatr la kepin, matre easa ujë tune lai. Celë hi ka troa thue aja kowe la itre atr ka thele Iehova troa hane easenyi Nyidrë. Ame la easa atrunyi Iehova tune lai, ke easa amadrinëne la hni Nyidrë.​—1 Tim. 2:​3, 4. w24.02 10 par. 7

Itre trejin trahmanyi ka macaj a huliwa catr kowe la ekalesia, me hnim la itre xan, me thupëne hnyawan la fami angatr. Matre loi e tro angatr a hetre hna atreine kuca. Tune la troa atreine e me cinyanyi hnyawa. Maine easa ajan troa madrin ngöne la mele së, loi e tro sa xomi ijin troa e me lapa mekun la Tusi Hmitrötr. (Sal. 1:​1-3) Maine tro eö a e Tusi Hmitrötr e nöjei drai, tro hë eö a atre la aqane mekune i Iehova, me trongëne la itre eamo i Nyidrë. (It. Ed. 1:​3, 4) Nyipiewekë kowe la ekalesia, troa hetre trejin trahmanyi ka atreine hamë ini, me hamë eamo qa hnine la Tusi Hmitrötr. Maine tro eö a atreine e hnyawa, tro hë eö a maca ngöne la eö a cile fë cainöj, me hamë mekun ngöne la itre icasikeu. Nge e ka atreine cinyanyi hnyawa eö, tro ha hmaloi koi eö troa xomi note nge tro ha catr la lapaune i eö, nge ijije fe tro eö a ce thawa me itre xan la hnei eö hna xomi note. w23.12 26-​27 par. 9-​11

Ame la epuni a xou ke, lapa mekune jë la itre hnei Iehova hna troa kuca elany. Mekune jë la pengöi epun elanyi e patre hë Satana memine la itre atre ka ngazo. Nge itre hlue i Iehova pe hi e celë fen, nge easë fe a nyiqane pexeje trootro. Ame lo ijine asabele katru ne 2014, hna kuca la ketre iamacany ka amamane la aqane tro sa lapa mekune la mejiune së. Ketre kem a qaja la aqane troa ujëne la tusi 2 Timoteo 3:​1-5, e kolo pe a qejepengöne la mele së elany ngöne la paradraiso. Tro ej a hape: “Ngöne la paradraiso, tro ha traqa la itre ijine madrine atraqatr. Ke tro la itre atr a hnime la itre xan, me hnine la itre ini qaathei Akötresie, me atre la itre ifego i angatr, me ipië, me atrunyi Akötresie, me drei kem me thin, me hetre hni ne ole, me mele nyipici, me hnime la fami, me hnime la itre xan, me qaja aloinyi itre xan, me atreine xomihni, me menyik, me hnime la loi, me itre atr hna mejiune kow, me loi thiina, me tha catre që, me hnimi Akötresie hune la itre nyine iamadrinë, me metrötrë Akötresie. Haawe, ce tro jë memine la itre atre cili.” Hnei epuni kö hna hane ce porotrikëne memine la fami maine itre sinee i epun, la pengöne la mele elany ngöne la fen ka hnyipixe? w24.01 6 par. 13-​14

Easa madrine la easa atre ka hape, Iehova a kapa la nöje i Nyidrëti asë! Öni Tusi Hmitrötr: “Iehova a madine la nöjei ate i nyidë.” (Sal. 149:4) Ngo tha loi kö itre xan, matre angatr a hnying ka hape, ‘Ka madrine kö Iehova koi ni?’ Hna traqa tune fe lai kowe la itre hlue i Iehova ekö. (1 Sam. 1:​6-​10; Iobu 29:​2, 4; Sal. 51:11) Tusi Hmitrötr a amamane ka hape, ngacama tha ka pexeje kö së, ngo ijije hi tro sa amadrinë Iehova. Tro sa tune kaa? Loi e tro sa lapaune koi Iesu Keriso me bapataiso. (Ioa. 3:​16) Jëne la bapataiso, easa amamane koi itre xan ka hape, ase hë së ietrane la itre ngazo së matre kuca la aja i Nyidrë. (It. Hu. 2:​38; 3:​19) Madrine catre Iehova la easa trongëne la itre ewekë cili matre nyisinee i Nyidrë. Maine tro sa isine troa kuca la aja i Iehova, tro kö Nyidrëti a madrine koi së me nyisinee së.​—Sal. 25:14. w24.03 26 par. 1-2

Maine tro la itre mus a wathebo epun troa cainöje trootro, nyitipune jë la itre pane keresiano ekö. Ijije tro sa mejiun laka, tro Iehova a xatua së troa catre cainöj. Loi e tro sa sipo Iehova la catr me inamacan, me ixatua qaathei Nyidrë ngöne la kola traqa la itre jol. Alanyim the së la itre ka wezipo, me dépression, me ka meci sineen. Ame itre xan, ka hetre iwesitrë ngöne la fami, maine hna qanangazon, maine ka melëne pena la itre jol. Nge the qaja palaha ngöne la kola lepi easë hnene la itre mec ka ixötrekeu maine hnene pena la itre isi. Nemene la nyine troa kuca? Qaja jë koi Iehova la itre aliene ne hni epun. Ewekë jë koi Nyidrë tune la epuni a ithanata kowe la ketre sinee i epun. Nge tro kö Nyidëti a xatua epun. (Sal. 37:​3, 5) Maine tro sa thithi lapa, ke tro hë sa ‘cile huti hnine la itupath.’​—Sal. 145:​18, 19. w23.05 5-6 par. 12-​15

Qëmekene troa xome la ketre mekune ka tru, nyipiewekë tro sa “trotrohnine la aja i Iehova” me trongën ej. (Efe. 5:17) Ame la easa thele la itre trepene meköti Iehova göne la jole hne së hna cile kow, ke easë hi lai a thel la mekuna i Nyidrë. Nge, ame la easa trongëne la itre trepene meköt cili, tro hë së lai a axecië mekun hnyawa. Aja i Satana lo “atre ka ngazo,” tro sa catre huliwa kowe la fen, matre troa pë ijine së koi Iehova. (1 Ioa. 5:​19) Tro hë lai a jole kowe la ketre keresiano troa thele la itre aqane tro angeic a huliwa i Iehova, ke angeice pena ha thele mani, me ini maine huliwa. Aqane ujë lai ka amamane ka hape, angeic ha nyiqane mekun tune la itre atre ne fen. Nyipici, tha ka ngazo kö la itre ewekë cili, ngo ame pe, tha tro kö itre ej a tro pa ngöne la mele së. w24.03 24 par. 16-​17