Ijiji Hi Tro Epuni a Eatrëne La Mekuna i Epun Ngöne La Huliwa i Iehova

1. Nemene la ka traqa kowe la itre xan?

EASË asë hi a ajan troa catre nyihlue i Iehova me amadrinë Nyidrë. Celë hi matre easa thele troa eatrëne la itre mekun tune la troa huliwane la ketre thiina i Iehova, maine e Tusi Hmitrötr e nöjei drai, maine troa ithel la easa ini Tusi cas, maine tro pena maca ngöne la hna cainöj. Maine jë, hetre mekune hnei epuni hna thatreine eatrëne ngöne la huliwa i Iehova. Maine eje hi, ke tha epuni casi kö. Aja i Philip troa thithi lapa, nge tro fe a jui la itre thithi angeic, ngo pëkö ijine i angeic troa thith. Ame pena Erika, aja i angeic troa canga traqa ngöne la itre icasikeu koi cainöj, ngo ka traqa hmitre palahi angeic. Nge ame Tomáš, anyimua tupath angeic troa e apexejen la Tusi Hmitrötr. Ngo öni angeic: “Pëkö madrineng la eni a e la Tusi Hmitrötr. Akönia tupathe ni, ngo e traqa mina ni ngöne la tusi Levitiko, ke xele hë ni ma e.”

2. Pine nemene matre tha tro kö sa kucakuca e thatreine kö së eatrëne la mekuna së ngöne la huliwa i Iehova?

² Maine jë easa kucakuca, ke thatreine kö së eatrëne la mekuna së ngöne la huliwa i Iehova. Ngo the kucakuca kö. Ngacama ka co hi la mekune hne së hna pi eatrën, ngo nyipiewekë troa xomi ijin me nue trengecatr. Ame la epuni a isine troa eatrëne la mekuna i epun, ke kolo hi lai a amamane ka hape, epuni a wangatrune la imelekeu i epun me Iehova, me thele troa hamë Nyidrë la ka sisitria. Nge Iehova a madrine kowe la itre trengecatr hnei epuni hna kuca. Eje hi, tha tro kö Nyidrëti lai a upi epun troa kuca la hnei epuni hna thatreine kuca. (Sal. 103:14; Mika 6:8) Haawe, the thele kö troa eatrëne la itre mekun, nge tha ijiji epuni pe. Nemen la aqane tro epuni a eatrëne la mekuna i epun? Hane hi la itre xaa nyine tro epuni a kuca.

NYIPIEWEKË TROA HETRE AJA

3. Pine nemen matre nyipiewekë tro sa hetre aja?

³ Nyipiewekë troa hetre aja matre troa eatrëne la mekuna i epun ngöne la huliwa i Iehova. Ame la atre ka hetre aja, ke angeic a isine troa eatrëne la itre mekuna i angeic. Ijije hi tro sa aceitunëne la aja cili memine la enyi ka ufe la voilier kowe la hna ie. Maine tro palahi a hnahna la eny, ke tro kö la voilier a traqa kowe la hna ie. Nge maine ka catrehnine la eny, ke tro kö eje lai a canga traqa. Ketre tune mina fe, e ka tru la aja së ke, tro së lai a canga eatrëne la itre mekuna së. Öni David, ketre trejin qa Salvador, ka hape: “Maine tru la aja së, ke tro së lai a huliwa catr. Nge pëkö ketre ewekë ka sewe së troa eatrëne la mekuna së.” Nemene la nyine troa kuca matre tro palahi a tru la aja i epun?

4. Nemen la nyine tro sa sipone koi Iehova? (Filipi 2:13) (Wange ju fe la iatr.)

⁴ Sipo Iehova jë troa akökötrene la ‘aja i epun troa kuca.’ Jëne la uati hmitrötr, ijije hi tro Iehova a thue aja koi epun troa eatrëne la mekuna i epun. (E jë la Filipi 2:13.) Ame itre xaa ijin, atre hi së ka hape, nyipiewekë tro sa hetre mekune nyine troa eatrën ngöne la huliwa i Iehova. Ngo pëkö aja së troa eatrëne lai. Celë hi ka traqa koi Norina, ketre trejine föe ne Ouganda. Norina a pi hamë ini kowe la ketre atr, ngo pëkö aja i angeic ke, ame koi angeic tha ijiji angeice kö. Nemene la ka xatua angeic? Öni angeic: “E nöjei drai, eni a sipo Iehova troa akökötrene la ajang troa ini Tus kowe la ketre atr. Hnenge hna thel troa maca ngöne la aqane hamë ini, ke celë hi hnenge hna sipone koi Iehova. Nge thupene la itre treu, tru hë la ajange troa ini Tus me ketre. Ame ju kö lai macatre cili, lue atre hë hnenge hna ini Tusi memin.”

5. Nemen la nyine tro sa lapa mekun matre akökötrene la aja së?

⁵ Lapa mekune jë la hnei Iehova hna kuca koi epun. (Sal. 143:5) Hnei Paulo aposetolo hna lapa mekune la ihnimi gufa i Akötresie, nge celë hi ka uku angeic troa catre huliwa i Nyidrë. (1 Kor. 15:9, 10; 1 Tim. 1:12-14) Ketre tun, maine tro epuni a lapa mekune la hnei Iehova hna kuca koi epun, ke tro lai a uku epun troa eatrëne la mekuna i epun ngöne la huliwa i Nyidrë. (Sal. 116:12) Ketre trejine föe ne Honduras a ajane troa xome la huliwa ne pionie. Nemene la ka xatua angeic troa eatrëne lai? Öni angeic: “Hnenge hna lapa mekune la etrune la ihnimi Iehova koi ni. Hnei Nyidrëti hna ee ni kowe la organizasio i Nyidrë, nge Nyidrëti palahi a hnimi ni me thupë ni. Ame la eni a lapa mekune lai, ke kola acatrene la ihniminge koi Nyidrë me uku ni troa nyihlue i Nyidrë.”

6. Nemen la ketre nyine troa kuca matre akökötrene la aja së?

⁶ Mekune jë la itre thangane ka loi hnei epuni hna troa kapa. Hnei Erika, kolo trejine hne së hna qaja ekula, hna eatrëne la mekuna i angeic, ene la troa canga traqa kowe la hnë icasikeu. Hnei angeic hna tune kaa? Öni angeic: “Hnenge hna öhne laka, tru la itre ewekë hnenge hna trian la eni a traqa hmitr ngöne la itre icasikeu koi cainöj. Ame la eni a canga traqa, ke hetre ijineng troa ibozu me porotrik memine la itre trejin. Ketre, eni fe a drenge la itre xaa aqane cainöj hna hamëne hnene la trejin, ka xatua ni troa maca ngöne la hna cainöj me madrin.” Pine laka hnei Erika hna lapa mekune la itre thangane ka loi hnei angeic hna troa kapa, celë hi ka xatua angeic troa eatrëne la mekuna i angeic. Nemene la itre thangane hnei epuni hna troa kapa e tro epuni a eatrëne la mekuna i epun? Pane mekune jë la aqane troa catre la imelekeu i epun me Iehova, e tro epuni a e la Tusi Hmitrötr me thith e nöjei drai. (Sal. 145:18, 19) Nge the qaja palaha la imelekeu i epun me itre xan, e tro epuni a huliwane la itre thiina i Iehova. (Kol. 3:14) Makëne jë ngöne la ketre pepa, la itre kepin matre epuni a pi eatrëne la itre mekuna i epun. Nge loi e tro goeëne lapan. Öni Tomáš, lo hna qaja ha ekula ka hape: “Maine nyimutre catre la itre kepin ka uku ni troa eatrëne la ketre mekun, ke tro ni lai a isine troa eatrën.”

7. Nemen la ka xatua Julio me föi nyidrë troa eatrëne la mekuna i nyidro?

⁷ Ce tro jë memine la itre trejin ka troa ithuecatr koi epun. (Ite edomë 13:20) Hnei Julio me föi nyidrë hna eatrëne la mekuna i nyidro, ene la troa catre cainöj. Tune kaa? Öni Julio: “Hnei nyio hna iëne la itre trejin ka xatua nyio troa eatrëne la mekuna i nyio. Hnei nyio hna lapa ce ithanatan me angatr la mekun hnei nyio hna pi eatrën. Alanyim thei angatr la ka eatrëne la itre mekun ka tui nyio, nge hnei angatre fe hna hamë nyio la itre eamo ka lolo. Ketre, angatr palahi a hnyingë pengöne la itre objectifs i nyio, me hamë ithuecatre koi nyio.”

MAINE PËKÖ AJA THEI EPUN

8. Maine tro sa treqene troa hetre aja së matre eatrëne la mekuna së, ke nemene la ka troa traqa? (Wange ju fe la iatr.)

⁸ Nyipici, hna traqa koi së asë la itre ijine laka, pëkö aja së. Kolo kö lai a hape, pëkö nyine tro sa kuca? Waea. Hane hi la ketre ceitun. Ame la kola hnahna la eny, ke canga tro hi la voilier a traqa kowe la hna ie. Ngo ame itre xaa ijin, ke pëkö ca eny. Hapeu, tro hi lai voilier a cil? Waea. Ame la itre xaa voilier, ke ka trene motör maine galu matre ijiji eje palahi troa nyinyap. Ceitune hi la aja së memine la eny. Ame itre xaa ijin, ke pëkö aja së troa eatrëne la mekuna së. Matre e tro sa treqene la itre ijine laka, hetre aja së, ke tha tro kö së lai a eatrëne la mekuna së. Ame la ka xomi voilier, angeic thel la itre xaa aqane troa traqa ngöne la hna ie, ketre tui easë fe, e pëkö aja së, loi e tro sa thel la itre xaa aqane troa eatrëne la mekuna së. Nyipici tha ka hmaloi kö, ngo tru la madrine hne së hna troa kapa elany e eatre hë la mekuna së. Qëmeken tro sa ce wange la aqane tro sa kuca, ke tro sa pane sa la ketre hnying hna amejën hnei itre xan.

9. Hapeu, tro kö sa isine troa eatrëne la mekuna së ngacama pëkö aja the së? Qejepengöne jë.

⁹ Aja i Iehova tro sa nyihlue i Nyidrë ce memine la madrin me hni ka pexej. (Sal. 100:2; 2 Kor. 9:7) Hapeu, tro kö sa isine troa eatrëne la mekuna së ngacama pëkö aja the së? Öni Paulo aposetolo: “Eni a jenge la ngönetreing, me xomacon ej kösë hlu.” (1 Kor. 9:25-27) Ngacama tha aja i Paulo kö troa kuca la hnei Iehova hna upi angeic, ngo hnei angeic hna isine troa kuca. Hapeu, madrine kö Iehova kowe la huliwa i Paulo? Öö, ke hnei Nyidrëti hna amanathithine la itre trengecatre i angeic.​—2 Tim. 4:7, 8.

10. Nemene la thangan, e tro sa isine troa eatrëne la mekuna së ngacama pëkö aja the së?

¹⁰ Madrine catre Iehova la easa isine troa eatrëne la mekuna së, ngacama tha ajane kö së. Nyidrëti a madrine, ke easa kuca koi Nyidrë. Maine jë tha pi tro kö sa kuca la ketre huliwa, ngo easa kuca ke easa hnimi Nyidrë. Tune la aqane amanathithine Nyidrë la itre trengecatre i Paulo, tro fe Nyidrëti a hane amanathithi së. (Sal. 126:5) Nge ame la easa öhne la aqane amanathithi së, ke kola thue aja koi së troa huliwa catr koi Nyidrë. Öni Lucyna, ketre trejine föe qa Pologne ka hape: “Ame itre xaa ijin, xele ni ma tro troa cainöj, nge the qaja palaha la eni a kucakuca. Ngo ame hë la eni a ase cainöj, ke tha fene madrine kö ni.” Tro pena sa ce wange la nyine tro sa kuca e pëkö aja the së.

11. Tro Iehova a xatua së tune kaa troa xomihni?

¹¹ Sipo Iehova jë troa xatua epun troa xomihni. Ame la atr ka xomihni ke, ka atreine xomehnöthe la itre aja me itre mekuna i angeic. Nge angeic a tuluthe la aqane huliwa i angeic. Tro la thiina cili, a sewe angeice troa kuca la ngazo. Eje fe a xatua së troa kuca la loi, ngacama tha ka hmaloi kö la huliwa hna upi së troa kuca, maine tha ajane kö së. Ketre, ame la thiina cili ke, ketre igötranene la wene ne la ua. Celë hi matre loi e tro sa sipo Iehova la uati hmitrötre i Nyidrë matre troa huliwane la thiina cili. (Luka 11:13; Gal. 5:22, 23) Aja i David, lo trejin hna qaja ekula, troa ini Tusi cas e nöjei wiik. Hna xatua angeic hnene la thith. Öni angeic: “Hnenge hna sipo Iehova troa xatua ni troa xomihni. Matre e thupen, hnenge hna eköth me eatrëne hnyawa la porogarameng.”

12. Tusi Ate Cainöj 11:4 a xatua së tune kaa troa eatrëne la mekuna së?

¹² The treqene kö la ijine loi. Pine nemen? Ke easa melëne la itre ijine ka ngazo. Maine tro palahi sa treqene la ijine loi, ke aqane lapa i easë pë lai. Tha tro kö së lai a eatrëne la mekuna së. (E jë la Ate Cainöj 11:4.) Öni Dayniel, ketre trejine trahmany ka hape: “The treqene kö la ijine loi, nyiqane huliwa jë pe.” Ame pena Paul, ketre trejine qa Ouganda, nyidrë a qaja la ketre kepin matre tha tro kö sa uthe lapane la nyine tro sa kuca. Öni nyidrë: “Ame la easa isine troa eatrëne la mekuna së ngacama tha ka hmaloi kö, ke easë hi lai a thele manathith thei Iehova.”​—Mal. 3:10.

13. Nemene la eloine la troa iëne la itre mekune hnei easë hna atreine eatrën?

¹³ Iëne jë la itre mekun hnei epuni hna atreine eatrën. Ame itre xaa ijin, pëkö aja së ke, thatreine kö së eatrëne la mekuna së. Maine tha ijiji epuni kö troa eatrëne la mekuna i epun, ke pane nyiqane jë memine la itre mekune ka co hnei epuni hna atreine eatrën. Maine epuni a ajan troa huliwane la ketre thiina i Iehova, ke pane nyiqane amamane jë hnene la itre huliwa ka co. Nge maine epuni a ajan troa e apexejen la Tusi Hmitrötr, ke pane nyiqane e ju hi koi itre hnepe menetr. Ame Tomáš, lo trejin hna qaja ekula, thatreine kö angeic troa e asë la Tusi Hmitrötr ngöne la ca macatre. Öni angeic: “Hnenge hna öhne laka nyimenyime catre palaha la aqane e ni la Tusi Hmitrötr. Matre hnenge hna nyiqane e hmaca qa ngöne la qaan, nge co pe hi la itre xötr hnenge hna e göne la troa lapa mekune e nöjei drai. Nge ame e cili, hetre madrineng hë troa e la Tusi Hmitrötr.” Pine laka tru trootro hë la aja i Tomáš troa e Tusi Hmitrötr matre angeic ha aqeane la itre hawa ne e Tusi Hmitrötr. Nge hnei angeic ju kö hna e asë la Tusi Hmitrötr.b

THE KUCAKUCA KÖ NGÖNE LA IJINE JOL

14. Nemene la ka traqa koi së asë?

¹⁴ Ngacama hetre aja së troa eatrëne la mekuna së, ngo hna traqa koi së asë hi la itre jol. Ame itre xa ijin, traqa xane pi hi la itre jol matre pëhë ijine i easë troa kuca la hne së hna mekun. (Ate cai. 9:11) Tro itre ej lai a akucakucanyi së, nge pëhë madrine së. (Ite edomë 24:10) Nge hnene fe laka, itre atr ka ngazo së, matre tha canga eatrëne kö së la mekuna së. (Rom. 7:23) Maine pena easë hi a kucakuca. (Mat. 26:43) Tro sa elëhune tune kaa la itre jole cili?

15. Ame la easa cile kowe la ketre jol, kolo kö lai a hape, ka luzi hë së? Qejepengöne jë. (Salamo 145:14)

¹⁵ Tha hnene kö laka, epuni a cile kowe la ketre jol matre ka luzi hë epun. Öni Tusi Hmitrötr, troa traqa itrai la itre jole koi easë. Ngo eje fe a qaja ka hape, ijije hi tro sa elë hune la itre jole jëne la ixatua i Iehova. (E jë la Salamo 145:14.) Öni Philip, lo trejin hna qaja ekula ka hape: “Ngacama tha eatrëne kö ni la mekunang, tha celë kö la ka nyipiewekë koi ni. Ngo ene pe la itre trengecatr hnenge hna nu matre kuca la huliwa i Iehova.” Öni David, lo trejin hna qaja ekula ka hape: “Ame la kola traqa koi ni la ketre jol, ke ijine hi lai tro ni a amamane la ihniming koi Iehova.” Nyipici, ame la epuni a elëhune la itre jol, epuni hi lai a amamane ka hape, aja i epun troa amadrinë Iehova. Nge drei jë kö la madrine i Nyidrë la Nyidrëti a öhnyi epuni a nue trengecatr!

16. Nemen la nyine tro sa kuca e tha eatrëne ju kö së la mekuna së?

¹⁶ Maine tha eatrëne ju kö epuni la mekuna i epun, ke xomi ini jë qa ngön. Pane mekune jë la itre kepin matre tha eatrëne ju kö epun la mekuna i epun, nge isa hnyinge jë ka hape, ‘Nemene la nyine tro ni a saze matre troa eatrëne la mekunang?’ (Ite edomë 27:12) Ame itre xaa ijin, thatreine kö së eatrëne la mekuna së, ke tha ka ihmeku kö memine la atreine i easë. Maine celë hi la ka traqa koi epun, ke wange hmaca jë la mekun hnei epuni hna ajan troa eatrën, me goeëne ka hape, ijiji epuni kö troa eatrën.c Tha tro kö Iehova lai a nuaxöji epun ke tha hnei epuni kö hna eatrëne la mekuna i epun, nge ketre tha ijiji epuni kö.​—2 Kor. 8:12.

17. Pine nemen matre tha tro kö sa thëthëhmine la itre mekun hne së hë hna eatrën?

¹⁷ The thëthëhmine kö la itre mekun hnei epuni hna eatrëne hë. Öni Tusi Hmitrötr, “Ka meköti pala hi Akötresie, matre thatreine kö nyidrëti thëthëhmine la itre huliwa së.” (Heb. 6:10) Haawe, ketre tui easë mina fe, tha tro kö sa thëthëhmine la itre hne së hna kuca. Lapa mekune jë la itre hnei epuni hë hna kuca, maine jë la aqane acatrene epun la imelekeu i epun me Iehova, me nyiqane qeje Nyidrë koi itre xan, maine xomi bapataiso pena. Maine ase hë epun eatrëne la itre xaa mekuna i epun ngöne la huliwa i Iehova, ke ijiji epuni hi troa hane eatrëne la mekuna i epuni enehila.​—Fil. 3:16.

18. Maine easa isine troa eatrëne la mekuna së, nemene la nyine tro sa kuca? (Wange ju fe la iatr.)

¹⁸ Jëne la ixatua i Iehova, ijiji epuni hi troa eatrëne la mekuna i epun, tune la ka xomi he a madrine troa traqa kowe la hna ie. Ngo the thëthëhmine kö laka, madrine catre la itre ka xomi he troa thupa la itre hnagejë. Ketre tune mina fe, ame la epuni a isine troa eatrëne la mekuna i epun, xomi ijine jë troa goeëne la aqane xatua epun me amanathithi epuni hnei Iehova. (2 Kor. 4:7) Maine tro epuni a catr, ke tro epuni lai a kapa la itre manathith ka tru hmaca kö.​—Gal. 6:9.