TANE MEKUN 25
Itre Qatre Thupe Fe, Xomi Ini Jë Qaathei Gideona
“Tha ijije kö la traem troa qeje Gideona.”—HEB. 11:32.
NYIMA 124 Mele Nyipici Jë Së
MEKUN KA TRUa
1. Thenge la 1 Peteru 5:2, nemene la hnëqa ne la itre qatre thup?
HNËQA ne la itre qatre thup troa thupëne la itre mamoe i Iehova. Ka tru kowe la itre qatre thup troa xatuane la itre trejin, me isine troa “itete thupë mamoe [ka] thu a i angat.” (Iere. 23:4; e jë la 1 Peteru 5:2.) Easa madrine troa hetre trejin ka tui angatr ngöne la itre ekalesia së!
2. Nemene la itre jole hna cile kow hnene la itre xaa qatre thup?
2 Nyimutre la itre jol hna cile kow hnene la itre qatre thup. Ketre huliwa ka tru la troa thupëne la ekalesia. Hnei Tony, ketre qatre thup ne Etazini hna inine troa tuluthe la itre huliwa hnei nyidrëti hna troa kuca. Öni nyidrë: “Ame lo kola nyiqane la COVID-19, tru catre la huliwa hnenge hna kuca matre troa eköthe la itre porogaram ne icasikeu me cainöj. Isine ju hë ni troa kuca asë, ngo hetre huliwa palahi. Ame hë la pun, tha e lapane hë ni la Tusi Hmitrötr, me ini Tusi cas, me thith.” Ame pena Ilir, ketre qatre thup ne Kosovo, ke ketre jole kö la hnei nyidrëti hna cile kow. Ame la kola nyiqane la isi ngöne la nöje i nyidrë, ke jole koi nyidrë troa drengethenge la itre hna amekötine hnei organizasio. Öni nyidrë: “Hna pane tupathe la lapauneng la kola upi ni hnene la filial troa xatuane la itre trejin ngöne la ketre götran gaa ngazo catr. Eni a xou nge ame koi ni, tha ka loi kö la aqane axecië mekune i angatr.” Nge ame Tim, ka mesinare e Asie, jole koi nyidrë troa eatrëne la itre huliwa i nyidrë ngöne la drai. Öni nyidrë: “Ame itre xaa ijin, kucakuca catre ni.” Nemene la ka troa xatuane la itre qatre thup ka cile kowe la itre jole cili?
3. Nemene la ini hne së hna xome qa ngöne la tulu i Gideona?
3 Hetre ini nyine tro la itre qatre thup a xome qa ngöne la tulu i Gideona. (Heb. 6:12; 11:32) Angeic la hna iën troa thupën me elemekene la nöje i Akötresie. (A. ame. 2:16; 1 A. l. ite jo. 17:6) Tui Gideona, hna acile la itre qatre thup matre thupëne la nöje i Akötresie ngöne la hneijine la pun. (Itre hu. 20:28; 2 Tim. 3:1) Hetre ini hne së hna xome qaathei Gideona göne la aqane tro sa ipië me idrengethenge, me tulu ewekë. Ngacama tha ka hmaloi kö la hnëqa i angeic, ngo hnei angeic palahi hna cile catr. Nyipiewekë tro asë hi sa olene me xatuane la itre qatre thupe së ka catre huliwa i Iehova.—Heb. 13:17.
EU LA TROA IPIË ME ATREINE TULU EWEKË?
4. Tune kaa la aqane amamane Gideona laka, ka ipië angeic nge ka atreine tulu ewekë?
4 Ka ipië Gideona, nge ka atreine tulu ewekë.b Ame lo angela a qaja koi Gideona laka, hna ië angeic troa amelene la angetre Isaraela qaathene la angetre Midiana, ke öni angeice sa ka hape: “Ame la lapang ke wene puhnen ne la lapa i Manase, nge ka pë pengöne ni ngöne la hnalapa i kaka.” (A. ame. 6:15, NWT) Ame koi angeic, tha ijiji angeice kö troa kapa la hnëqa cili, ngo tha mekuna i Iehova kö lai. Jëne la ixatua i Nyidrë, hnei Gideona hna eatrëne hnyawane la hnëqa i angeic.
5. Eu la ijin tro la ketre qatre thup a amamane ka hape, ka ipië nyidrë nge ka atreine tulu ewekë?
5 Itre qatre thup a isine troa atreine tulu ewekë me ipië. (Mika 6:8; Itre hu. 20:18, 19) Tha angatre kö a selëne la itre hnei angatr hna atreine kuca, maine mekune atrune palaha la itre tria i angatr. Ngo ame itre xaa ijin, tha ka hmaloi kö kowe la qatre thup troa ipië me tulu ewekë. Maine jë, tro nyidrëti a kapa la itre hnëqa ngo thatreine kö nyidrë troa eatrëne asë. Ijije fe troa qaja aloine maine qajangazone la aqane eatrëne nyidrë la ketre hnëqa. Nemene la ini nyine tro la itre qatre thup a xome qaathei Gideona?
Itre qatre thup a atreine tulu ewekë tui Gideona, ngöne la angatr a sipo ixatua troa eköthe la porogaram göi présentoir (Wange ju la paragarafe 6)
6. Nemene la aqane tro la itre qatre thup a atreine tulu ewekë tui Gideona? (Wange ju fe la iatr.)
6 Sipo ixatua jë. Ame la atr ka atreine tulu ewekë, ke atre hi angeic la itre ewekë hnei angeic hna thatreine kuca. Atreine hi Gideona tulu ewekë, ke hnei angeic hna sipo ixatua koi itre xan. (A. ame. 6:27, 35; 7:24) Celë hi hna kuca hnene la itre xaa qatre thup. Öni Tony, lo hna qaja ekula, ka hape: “Hnene la aqane hetru ni matre hneng palahi hna kapa la itre huliwa ngacama thatreine kö ni kuca asë. Hnenge hna mekune troa ithanatane lai ngöne la ijine hmi ne la fami, me hnyingëne la föeng la mekuna i eahlo. Hnenge fe hna goeëne la video ngöne jw.org hna hape, Comme Jésus, formons les autres, faisons-leur confiance et rendons-les capables.” Ame cili, hnei Tony hna sipo ixatua koi itre xan me hamëne la itre xaa hnëqa i nyidrë koi angatr. Nemene hë la thangane lai? Öni Tony: “Hmaloi hë koi ni, nge hetre ijinenge hë troa acatrene la aqane imelekeung me Iehova.”
7. Tro la itre qatre thup a nyitipu Gideona tune kaa ngöne la kola qajangazo angatr? (Iakobo 3:13)
7 Sa amenyikene ju la kola qajangazo epun. Ketre itupath kowe la itre qatre thup la kola qajangazo angatr. Nge troa xatua angatr hnene la tulu i Gideona. Atre hi Gideona laka, atre ka tha pexeje kö angeic. Matre ame la angetre Eferaima a qajangazo angeic, hnei angeic hna sa amenyikene koi angatr. (A. ame. 8:1-3) Tha hnei Gideona kö hna sa akötrëne koi angatr. Hnei angeice pe hna ipië, me drei angatre hnyawa. Celë hi ka apujene la elëhni angatr me nyinyine la jol. Ame la kola qajangazone la itre qatre thup, angatr a nyitipu Gideona ngöne la angatr a drenge hnyawa me sa amenyiken. (E jë la Iakobo 3:13.) Aqane tro hi angatre lai a acatrene la cas ne la ekalesia.
8. Tune kaa la aqane troa ujë hnene la itre trejin hna acil la kola qaja aloinyi angatr? Qaja jë la ketre ceitun.
8 Atrunyi Iehova jë. Tha hnei Gideona kö hna thele troa selë angeic lo kola ngaa angetre Midiana, ngo hnei angeice pe hna atrunyi Iehova. (A. ame. 8:22, 23) Troa nyitipu Gideona tune kaa hnene la itre trejin hna acil? Nyipiewekë tro angatr a atrunyi Iehova, ngöne la kola qaja aloinyi angatr pine la itre huliwa hnei angatr hna kuca. (1 Kor. 4:6, 7) Maine troa qaja aloine la aqane hamë ini ne la ketre qatr thup, loi e tro nyidrëti a qaja ka hape, hnei Tusi Hmitrötr memine la itre ini hna hamëne hnei organizasio. Nyipiewekë tro la itre qatre thup a isa hnyinge ka hape, angatre kö a hamë ini göne troa atrunyi Iehova maine göne troa atrunyi angatre pena. Tro sa ce wange la ka traqa koi Timothy, ketre qatre thup. Ame lo xötrei, pi tro catre nyidrë a cile fë cainöj. Öni nyidrë: “Ame la eni a cile fë cainöj, hnenge hna majemine eköthe hnyawa la itre pane ithanata ne la cainöjeng memine la itre ceitun. Celë hi matre kola hai ni hnei itre xan. Ngazo pe tru palaha la hna qaja aloinyi ni, nge co pë hë la Tusi Hmitrötr me Iehova.” E thupen, trotrohnine hë Timothy ka hape, loi e tro nyidrëti a saze la aqane hamë ini matre tha tro kö a qaja aloinyi nyidrëti palaha hnei itre xan. (Ite edomë 27:21) Nge nemene hë la thangane lai? Öni nyidrë: “Ame hë enehila, itre trejin a qaja koi ni la aqane xatua angatr hnene la cainöjeng troa cile kowe la itre jol, maine xomihnine la itre itupath, maine easenyi pena koi Iehova. Tru catre kö la madrineng la eni a drenge la itre hnei angatr hna qaja, hune lo kola qaja aloinyi ni ekö.”
EU LA TROA IDRENGETHENGE ME CATR?
Hnei Gideona hna drengethenge Iehova me acone la trongene isi angeic, matre 300 pe hi lao sooce ka lapa (Wange ju la paragarafe 9)
9. Eu la itre ijin laka, nyipiewekë tro Gideona a idrengethenge me catr? (Wange ju la pane iatr.)
9 Thupene la kola acili Gideona troa atre amekötin, nyipiewekë tro angeic a idrengethenge me catr. Hna upi angeic troa thëtrije la ita ne huuj koi Baala hna acil hnene la keme i angeic. (A. ame. 6:25, 26) Thupen la angeic a acasine la itre sooc, hna alua upi angeic troa acone la etrune la trongene isi. (A. ame. 7:2-7) Ketre, hna upi angeic troa ut kowe la ithupëjia ngöne la hnenyipajidr.—A. ame. 7:9-11.
10. Eu la ijin laka, jole kowe la ketre qatre thup troa idrengethenge?
10 Nyipiewekë tro la itre qatre thup a ‘canga idrengethenge.’ (Iako. 3:17) Ame la qatre thup ka idrengethenge, ke ka canga trongëne la hna qaja hnei Tusi Hmitrötr memine la itre hna amekötine hnene la organizasio i Iehova. Aqane tro hi nyidrëti lai a amamai tulu ka lolo koi itre xan. Ngo ame itre xaa ijin, jole koi nyidrë troa trongëne la itre hna amekötin ka hnyipixe. Maine jë, tro nyidrëti a mekune ka hape, ka ngazo la aqane axecië mekun hnei organizasio. Tune la kola upi nyidrë troa kuca la ketre huliwa, ngo ka troa xomi nyidrëti pe koi kalabus. Ame cili, tro la itre qatre thup a nyitipu Gideona tune kaa?
11. Nemene la ka xatuane la itre qatre thup troa idrengethenge?
11 Drenge hnyawane jë nge trongëne jë la itre hna amekötin. Hnei Iehova hna qaja koi Gideona la aqane troa thë la ita ne huuj ne la keme i angeic, me götrane hnë troa acil la ita ne huuj koi Nyidrë, memine la pengöne öni nyine troa huujën. Tha hnei Gideona kö hna hnying, ngo hnei angeic pe hna canga trongëne la itre hna amekötin. Ame enehila, itre qatre thup a kapa la itre hna amekötine qaathene la organizasio jëne la itre tus me itre ithuemacany, matre thupë së. Ka tru koi së la itre qatre thup, ke angatr a trongëne hnyawane la itre hna amekötin. Nge hetre thangane hna kapa hnene la ekalesia.—Sal. 119:112.
12. Tro la itre qatre thup a trongëne tune kaa la hna qaja hnei Heberu 13:17 e traqa ju hetre hna amekötine ka hnyipixe?
12 Canga kapa ju la itre hna amekötin ka hnyipixe. Mekune palahi epuni lo, hnei Iehova hna upi Gideona troa abëekëne la itre xaa sooce i angeic. (A. ame. 7:8) Maine ju, tro angeic a hnying ka hape: ‘Hnauëne la kola upi angatr? Tro kö së lai a ngaane la itre ithupëjia?’ Ame pe, hnei Gideona hna idrengethenge. Ame enehila, itre qatre thup a nyitipu Gideona la angatr a kapa la itre hna amekötine ka hnyipixe qaathene la organizasio. (E jë la Heberu 13:17.) Ame lo 2014, hnene la Lapa Ne Xomi Meköt hna saze la aqane troa nyithupen la itre huliwa ne xupi Uma Ne Baselaia, me Uma Ne Asabele. (2 Kor. 8:12-14) Ame ekö, organizasio la ka nyithupen, nge qanyine pë hë la itre ekalesia troa të koi organizasio. Ngo ame hë enehila, organizasio a huliwane la mani hna ithingë hnene la itre ekalesia asë, matre nyithupen la itre huliwa ne xupi Uma ngöne la fen asë, uti fe hë la itre ekalesia ngöne la itre nöj gaa pë mani. Hna luelu hnei José la nyidrëti a drenge lai. Öni nyidrë: ‘Ma pë fe kö Uma Ne Baselaia lai hna troa xup. Tha aqane kuca i eahuni fe kö lai e ce.’ Nemene la ka xatua José troa idrengethenge? Öni nyidrë: “Hnenge hna mekune lo hna qaja ngöne Ite Edomë 3:5, 6 laka, troa mejiune koi Iehova. Thatreine kö ni qaja la itre thangane ka loi! Ame enehila, tru catre hë la itre Uma Ne Baselaia hna xup. Jëne la itre mani hna kuiëne atrun memine la itre ka ixatua, kolo fe a aijijëne la itre ka pë troa hetre Uma Ne Baselaia.”
Ngacama hna wathebone la hmi së, ngo ijije hi tro sa cainöj koi itre xan (Wange ju la paragarafe 13)
13. (a) Nemene la ka xecie koi Gideona? (b) Tro la itre qatre thup a nyitipu angeice tune kaa? (Wange ju fe la iatr.)
13 Catre jë kuca la aja i Iehova. Hnei Gideona hna drengethenge Iehova ngacama angeic a xou göne la mele i angeic. (A. ame. 9:17) Thupene la Iehova a ithuecatre koi angeic, xecie koi Gideona laka, tro kö Nyidrë a xatua angeic troa thupëne la nöje i Nyidrë. Itre qatre thup ka mele ngöne la itre nöj hna wathebone la hmi së, a nyitipu Gideona. Angatr a xomi iujine la itre icasikeu me elemeken la huliwa ne cainöj, ngacama tro ju hë a othi angatr, me lepi angatr hnei polis, maine pë huliwa i angatr.c Ame ngöne la ijine akötr atraqatr, nyipiewekë tro la itre qatre thup a trongëne la itre hna amekötin, ngacama tro lai a jol koi angatr. Maine jë, kolo itre hna amekötine göne la aqane tro fë la maca ne iameköti, maine aqane troa amele së ngöne la isi Gog atre Magog.—Ezek. 38:18; Hna ama. 16:21.
EU LA TROA CILE CATR?
14. Hnei Gideona hna amamane tune kaa la catre i angeic?
14 Ame la atr ka xome la hnëqa ne atre amekötin, ke loi e tro angeic a egöcatr. Ame la angetre Midiana a kötrene la isi ngöne la hnenyipajidr, hnei Gideona hna weje huzu angatr qa ngöne la hnathupe i Iezerela utihë Ioridrano. Nge ame pena la gojenyi cili, ke gaa tiqa hnei neköi sinöe ka lapalapa nge ka ithiny. (A. ame. 7:22) Hnei Gideona kö hna cile ngöne la hneopegejë ne Ioridrano? Waea! Ngacama kucakuca catre angeic memine la ala 300 lao sooce i angeic, ngo hnei angatr hna thupa la hneopegejë me weje huzune la angetre Midiana utihë la kola ea me ngaa angatr.—A. ame. 8:4-12.
15. Pine nemene matre nyipiewekë tro la qatre thup a catr?
15 Ame itre xaa ijin, kucakuca catre la qatre thup ke, tru la huliwa i nyidrë ngöne la ekalesia me ngöne la fami nyidrë. Tune kaa la aqane tro la qatre thup a nyitipu Gideona?
Itre qatre thup a ithuecatr kowe la itre trejin ka aja ixatua (Wange ju la paragarafe 16-17)
16-17. Nemene la ka xatua Gideona troa catr, nge nemene la ka xecie kowe la itre qatre thup? (Isaia 40:28-31) (Wange ju fe la iatr.)
16 Mejiune jë laka, tro kö Iehova a hamë epuni la catr. Xecie koi Gideona laka, tro kö Iehova a hamë trengecatre i angeic, nge celë hi hnei Nyidrëti hna kuca. (A. ame. 6:14, 34) Ame lo ketre ijin, hnei Gideona me itre sooce i angeic hna weje la lue joxu ne Midiana, ngacama nyidro a ti kamela. (A. ame. 8:12, 21) Nge jëne la ixatua i Akötresie, hune ju kö la angetre Isaraela. Ketre tun, nyipiewekë tro la itre qatre thup a mejiun koi Iehova, Akötresie ‘ka tha hane kö kucakuca.’ Tro kö Nyidrëti a hamë angatr la trengecatr ka ijij.—E jë la Isaia 40:28-31.
17 Tro sa ce wange la hna melën hnei Matthew, ketre qatre thup ka sine la Komite Ka Ixatua Göi Itre Ejolene e Pital (CLH). Nemene la ka xatua nyidrë troa catr? Öni Matthew: “Hnenge hna hane melëne la hna qaja ngöne Filipi 4:13. Ame itre xaa ijin, kucakuca catre ni matre eni a thithi iele koi Iehova troa hamë ni la trengecatr göne troa xatuane la itre trejin. Ame ngöne la itre ijine cili, uati hmitrötre a aegöcatrenyi ni me hamë ni la catr.” Ngacama tha hmaloi kö kowe la itre qatre thup, ngo angatr a tui Gideona me huliwa catr matre thupëne la itre mamoe i Iehova. Ame pe, loi e tro angatr a atreine tulu ewekë me trotrohnine laka, tha ijiji angatre kö troa xome asë la itre hnëqa. Ngo tro kö Iehova a drenge la itre sipo i angatr me aegöcatrenyi angatr.—Sal. 116:1; Fil. 2:13.
18. Haawe, tune kaa la aqane tro la itre qatre thup a nyitipu Gideona?
18 Tru la itre ini nyine tro la itre qatre thup a xome qaathei Gideona. Nyipiewekë tro la itre qatre thup a tuluthe la itre hnëqa hnei angatr hna kapa me ipië ngöne la kola qaja aloin maine qajangazo angatr pena. Pine laka easenyi hë la pune la fene celë, nyipiewekë tro la itre qatre thup a idrengethenge me catr. Nge loi e xecie koi angatr laka, traqa ju hë la nöjei jol, tro kö Iehova a aegöcatrenyi angatr. Eje hi, ka tru koi easë la itre qatre thup, matre ‘tha mano kö së hnimi’ angatr.—Fil. 2:29.
NYIMA 120 Nyitipune Jë La Thiina Ka Menyike i Keriso
a Hna acili Gideona hnei Iehova troa elemeken me thupëne la nöje i Nyidrë ngöne lo ijine kola qanangazo angatr. Hnei Gideona hna eatrëne hnyawane la hnëqa i angeic ngöne la 40 lao macatre. Ngo tru la itre jol ka traqa koi angeic. Tro sa ce wange la aqane tro la tulu i angeic a xatuane la itre qatre thup ka cile kowe la itre jol enehila.
b Maine atreine hi së tulu ewekë, tha tro kö së lai a wangatrunyi së palaha, nge atre hi së ka hape, hetre ewekë hne së hna thatreine kuca. Nge maine ka ipië së, easa metrötrë itre xan, me mekune ka hape, sisitria kö angatr hui easë. (Fil. 2:3) Matre, ame la itre atr ka atreine tulu ewekë, ke itre ka ipië.
c Wange ju la hna hape, “Loi e Troa Catre Nyihlue i Iehova Ngacama Hna Wathebo Së” ngöne la Ita Ne Thup ne Julai 2019, g. 10-11, par. 10-13.