Ka Lapaune Kö La Itretre Anyipici Iehova Koi Iesu?

NYINE MELE LAI

Ato: Hapeue lai Tim?

Tim: Eje pala hi.

Ato: Eni mina la a pane traqa fë sine itus. Eni a mekune ma tro eö a pi e la lue zonale celë.

Tim: Haawe, nga oleti. Ka loi pe matre traqa pi eö enehila, ke ca hnenge hna pi hnyingëne koi eö.

Ato: Öö, nemen?

Tim: Ame lo ketre drai, ke hnenge hna porotrike memine la ketre sine huliwa i eni. Eni a qaja koi angeice la eloine la itre sine itus i epun. Ngo öni angeic ka hape, tha tro kö ni a e la itre itus i epun, ke tha ka hane kö epuni lapaune koi Iesu. Ngo öninge jë hi koi angeic ka hape, tro ni a pane hnyingëne koi eö, e traqa hmaca pi eö koi ni. Matre, nyipici kö lai?

Ato: Nga eni a pane olene la hnei eö hna fe koi ni la hni eö. Nge eni a madrine laka, eö a hnyingëne mekötine koi ni, ketre Atre Anyipici Iehova. Ke maine easa ajane troa atre la hna lapaune kow hnei ketre, ke loi e tro sa hnyingëne koi angeice kö.

Tim: Nga celë fe hi la mekunange lai.

Ato: Nge eni a pi qaja koi eö, ka hape, ame la Itretre Anyipici Iehova, ke ka lapaun asë hi angatre koi Iesu. Ke ame koi eahun, tre nyine mele lai koi huni la troa lapaune koi Iesu.

Tim: Atre hi ni ka hape, ka lapaune epuni koi nyidrë. Ngo pine laka, tha hnei nyiso kö hna pane ithanatane hnyawan, haawe, öninge jë hi, tro kö ni a pane hnyingëne koi eö.

Ato: Eni a pi amamane koi eö la itre xa xötr qa ngöne la Tusi Hmitrötr hnei eahuni hna lapaa fe koi itre atr, matre troa amamane hnyawa la enyipiewekëne la troa lapaune koi Iesu.

Tim: Haawe, ka loi hö.

Ato: Tro nyiso a pane ce xome la ketre ithanata i Iesu kowe la itre aposetolo i nyidrë, ngöne Ioane 14:6. Kola qaja ka hape: “Iesu a ulatine koi angeic, ka hape, Ini la gojeny, me nyipici, me mel ; pëkö ate a tro koi Tetetro e tha qa kö theng.” Haawe, drei hmekuje hi la jëne troa easenyi koi Tretretro, thenge la xötre celë?

Tim: Iesu.

Ato: Eje hi lai. Nge celë hi lai hna lapaune kow hnene la Itretre Anyipici Iehova. Haawe, matre, eni a pi hnyingëne koi eö ka hape, ame la easa thithi koi Akötresie, ke tro sa jëne drei, thenge la itre hna amekötine hnei Akötresie?

Tim: Tro sa jëne Iesu.

Ato: Eje hi lai. Celë hi kepine matre, ketre ame fe la eni a thithi koi Akötresie, ke eni fe hi lai a hane jëne Iesu. Nge celë hi lai aqane thithi ne la Itretre Anyipici Iehova lai.

Tim: Öö!

Ato: Haawe, tro pena nyiso a pane xome la Ioane 3:16. Ketre xötre la, ka nyipi ewekë catr, ke eje hi lai ka amamane la aliene la traqa Iesu e celë fen, memine la kepine matre nyidrëti a cainöj. Eni a sipo eö, matre tro eö a pane e la xötr.

Tim: Ka loi hö. Kola qaja ka hape: “Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.”

Ato: Oleti. Ma ase hë eö hane e la xötr celë?

Tim: Öö, ase hë ni lapaa drenge e koilo ngöne hna hmi.

Ato: Ala nyimu e easë ka atre la xötr celë. Öhne hi eö cahu hna qaja hnene la xötr? Öni Iesu ka hape, Akötresieti a aijijë së troa mele epine palua e tro sa u?

Tim: E tro sa lapaun.

Ato: Haawe! Nyipi ewekë tro sa lapaune kowe la Nekö i Nyidrëti ka cas, ene Iesu Keriso. Nge eje hi lai mekune hne së hna öhne ngöne la götrane 2 ne lo zonale hnenge hna traqa fë koi eö. Kola qaja e celë ka hape, ame la kepine matre kola kuca la Ita Ne Thup, tre göne matre troa “thuecatre koi së troa lapaune koi Iesu Keriso, atre meci pi së, matre hetrenyi jë së la mele ka tha ase palua kö, nge Joxu ne la Baselaia i Akötresie.”

Tim: Haawe, nga hane hi la ka jelenyipicine ka hape, ka lapaune la Itretre Anyipici Iehova koi Iesu.

Ato: Eje hnyawa hi lai.

Tim: Nga hnauëne kö laka qaja jë la itre atr ka hape, tha lapaune kö epuni koi Iesu?

Ato: Nyimu kepine matre itre atr a qaja tune lai. Ame itre xan, tre angatre pe hi a hane nyitipune la hna qaja koi angatr. Ame pena itre xan, ke ma hnene la itre hene ne hmi angatr, hna lapaa qaja la ithanata cili koi angatr.

Tim: Eni fe a ketre mekune ka hape, ma kolo jë ke hnene lai aqane hëne lai hmi epun, ka hape Itretre Anyipici Iehova, ngo tha Itretre Anyipici Iesu kö.

Ato: Öö, ma hnene jë fe lai.

Tim: A hnauëne kö laka tru kö la hnei epuni hna lapaa qeje Iehova?

“HNENGE HNA AMAMANE . . . LA ATESIWA I CILIE”

Ato: Ame koi eahun, ke nyipi ewekë troa qaja la nyipi ëje i Akötresie, ene Iehova, tune la aqane hë Nyidrëti hnei Iesu. Tro nyiso a pane ce ithanatane la thithi Iesu ngöne Ioane 17:26. Eni a sipo eö troa e.

Tim: Haawe! Kola hape: “Hnenge hna amamane koi angate la atesiwa i cilie, nge tro kö ni a amaman ; mate eje kö e kuhu ite hni angate la ihnim, tune lo hna hnimi ni hnei cilie, nge ini e kuhu ite hni angat.”

Ato: Oleti. Öni Iesu ka hape hnei nyidrëti hna amamane la ëje i Akötresie. Ngo, ame koi eö, ke hnauëne jë la nyidrëti a kuca la ewekë cili?

Tim: Öö . . . thatre kö ni.

Ato: Nga, ma tro ha xatua nyiso troa atre la kepin, hnene la ketre xötr. Eni a mekun, tro nyiso a ce xome la Ite Huliwa 2:21. Kola qaja e celë ka hape: “Ame la ate hëne la atesiwa i Joxu [Iehova], tro ha amele angeic.” Haawe, pine laka, emele ne la nöjei atr la troa hëne la ëje i Iehova, easa trotrohnine la kepine matre Iesu a trongëne la hna amekötine celë.

Tim: Öö, nyipici!

Ato: Nyipi ewekë fe tro la itretre drei Iesu a atre, me hëne la nyipi ëje i Akötresie. Nge celë hi lai kepine matre tru catre la hne huni hna qeje Iehova. Ame koi eahun, ke nyipi ewekë troa amamane la nyipi ëje i Akötresie, matre tro fe la itre atr a hane hëne la ëje i Nyidrë.

Tim: Öö ngo ame itre xa ijin, ngacama tha itre atr kö a qaja mekötine la ëje i Akötresie, ngo atre hi angatr ka hape, angatre hi a qeje Nyidrë.

Ato: Ma nyipici eö hi lai. Ngo, ame la Akötresieti a amamane koi së la nyipi ëje i Nyidrë, tre göne matre hmaloi hi koi së troa epe koi Nyidrë.

Tim: A kolo lai a hapeue lai?

Ato: Tro nyiso a pane xome la ketre ceitun: pane mekune ju eö ka hape, thatre kö nyiso la nyipi ëje i Mose. Maine ju tro hi sa qaja ka hape, kolo thupëtresiji ka thawa luëne lo Hnagejë Ka Palulu, maine pena kolo trahmanyi hna hamëne kow lo treene lao wathebo. Ka tui Noa. Maine ju, tro hi sa qaja ka hape, kolo trahmanyi ekö ka cane lo aka, matre mele ju kö nyidrë me hnepe lapa i nyidrë, memine lo itre öni. Nge ame Iesu Keriso, ke maine ju tro hi së a qaja ka hape, nyidrëti ekö lo ka uti qa hnengödrai, matre tro nyidrëti a itö së qa ngöne la itre ngazo së.

Tim: Öö.

Ato: Ngo hnei Akötresieti hna kuca matre tro kö sa atre la nyipi ëje ne la itre atr cili. Ke ame la easa atre la nyipi ëje ne la ketre atr, ke, tro së lai a jelenyipicine la hna qaja göi angeic. Ka tui Mose, me Noa, me Iesu; ngacama tha hane kö së öhnyi angatr, ngo kösë lo atre angatre hi hne së.

Tim: Öö! Nga tha hane fe kö ni mekune tune lai ekö!

Ato: Eje hi lai ketre kepine matre tru la hnene la Itretre Anyipici Iehova hna qaja lapaane la nyipi ëje i Akötresie. Eahuni a ajane troa xatuane la itre atr troa lapaune me acatrene la lapaune i angatre koi Iehova Akötresie, matre tro sa epe koi Nyidrë, tune lo aqane epe së kowe la ketre atr hne së hna atre hnyawa. Ngo ame ngöne la ketre götran, tre ka tru Iesu koi eahun, ke nyidrëti la atre iamele. Ma casi pe hi la xötr hnenge hna pi amamane koi eö, göi troa acatrene la mekune celë.

Tim: Öi hö.

Ato: Ame ekula hnei nyiso hna ce e lo Ioane 14:6, lo Iesu a qaja ka hape, nyidrëti “la gojeny, me nyipici, me mel.” Tro pena nyiso a ce e lai hnei nyidrëti hna qaja ngöne Ioane 14:1. Eni a sipone koi eö troa e la pune lai xötr.

Tim: Ka loi. Kola hape: “Nyipunie a lapaune koi Akötesie, lapaunejë fe koi ni.”

Ato: Haawe, oleti. Ame cahu xötr, ke kola upi së troa iëne maine easa troa lapaune koi Iehova, maine lapaune koi Iesu pena?

Tim: Ohea. Öni Iesu, tro sa lapaune koi nyidroti asë.

Ato: Eje hi lai. Ngo eni a mekune laka, tha ijije kö la tro hi a qaja ka hape, ka lapaune së koi Akötresieti me Iesu. Ngo loi e tro pe a mama ngöne la aqane mele së ka hape, ka lapaune së koi nyidro; tune kaa la mekuna i eö?

Tim: Nyipici hi lai hnei eö hna qaja.

Ato: Ngo nemene la aqane tro la atr a amamane ka hape, ka nyipi lapaune angeice koi Akötresie me Iesu? Ma ka loi tro pë hë nyiso a ce ithanatane e ketre ijin.a

Tim: Ka loi hö, oleti.