Kola Sa Hnei Tusi Hmitrötr

Nemene La Drai Ne Iameköti?

Ame ekö, hnei Akötresieti hna acile la itre atr troa amekötin me thapa la itre atre i Nyidrë, qa ngöne la thiina ka tha meköti kö. (Angete Amekötine 2:18) Tusi Hmitrötr a qaja ka hape, ame la Drai Ne Iameköti, tre ketre ijin ka nyipi lolo, ke troa thapa hnei Iehova lo Atre amekötine la fen asë, la itre atr qa ngöne la thiina ka tha meköti kö.​—E jë la Salamo 96:12, 13; Isaia 26:9.

Akötresie a upi Iesu matre troa amekötine la itre atr ka mel, memine la itre atr ka mec. (Ite Huliwa 10:42; 17:31) Nyimutre la itre atr ka mec, ngo tha hane ju kö angatr atre la pengö i Akötresie. Ame ngöne la Drai Ne Iameköti, tro Iesu a amelene hmaca la itre atr ka mec, matre tro fe angatr a hane atrepengöi Akötresie me hnimi Nyidrë.​—E jë la Ite Huliwa 24:15.

Pine nemene matre ame La Drai Ne Iameköti, tre, ka caa thauzan lao macatre?

Kola troa amejëne la itre ka mec, ngöne lo ca thauzane macatre ne musi Keriso. (Hna Amamane 20:4, 12) Nyipi ewekë tro angatr elanyi a atre hnyawa, la itre jë i Akötresie me drengethenge Nyidrë. Isapengöne kö la mekuna ne la itre atr memine la Tusi Hmitrötr; ej a qaja ka hape, tro ha amekötine la itre atr thenge la itre ewekë hnei angatr hna kuca, thupene la hna amele angatr hmaca qa hna mec.​—E jë la Roma 6:7.

Qëmekene troa nyiqaane la itre macatre ka caa thauzan, Tusi Hmitrötr a qejepengöne la drai ne iameköti, laka, ej a troa canga traqa. Ame la drai cili, tre, hna hëne fe ka hape, pun, tune la hne së hna ce wange ngöne la zonale celë. Ngöne mina fe la drai cili, tro hë Iehova a apatrene asë la itre atr ka ngazo. (2 Peteru 3:7) Celë hi matre, loi e tro sa amamane enehila la ihnimi së koi Akötresie.​—E jë la 2 Peteru 3:9, 13.