Kola Lepi Së Hnei Hulö

“Easa mekun ka hape, luzi hë së. Hna theng asë la itre ewekë hun hnei trëtr me di.”—Andrew, Sierra Leone.

“Thupene la wene ka tru, hne huni hna bëeke hmaca kowe la hnalapa. Pëkö caa ewekë ka lapa pe. Ase së hë theng. Cile ju pe hi hun! Hnene la neköng jajinyi hna sa iwatingöneca me treij.”—David, Îles Vierges des États-Unis.

MAINE hna hane lepi epuni fe hnei hulö, tro hi epuni lai a trotrohnine la hnei angatr hna melën: kola jol la mekun, me seseu, nge tha meköle hë. Alanyimu la itre ka kucakuca, nge ame koi angatr, tha tro hmaca kö a tune lo mele i angatr ekö.

Hapeu, hna lepi epuni kö hnene la ketre hulö, nge pë hnyawa ewekë i epun? Ame e cili, tro epuni a mekun ka hape, pëhë aliene la mele i epun. Nge, ketre tha nyipiewekë hmaca kö troa mel. Ngo, Tusi Hmitrötr a amamane ka hape, nyipiewekë catre la mel, nge hetre itre kepin matre tro sa mejiune kowe la mel ka lolo elany.

TUSI HMITRÖTR A HAMË MEJIUN

Öni Ate Cainöj 7:8: “Loi la pune la ewekë hune la qan’ ej.” Thupene la hulö, kösë pë hnyawa mejiune së. Ngo, e tro sa catre huliwa, tro ha tro loi la mele së.

Tusi Hmitrötr a thingehnaeane la ijine laka, “tha tro kö a denge hmaca . . . la aqane teije me aqane awe.” (Isaia 65:19) Troa eatr la hna thingehnaeane celë ngöne la ijine musi ne la Baselaia i Akötresie, nge tro ha aparadraisone la fen asë. (Salamo 37:11, 29) Tha tro hmaca kö sa mekun la itre hulö. Troa paatre palua qa ngöne la mekuna së la itre akötr hne së hna melën. Öni Akötresie, Ka Tru Trenge Men, ka hape: “Tha tro hmaca kö a mekune la hnapan, me xulu e kuhu hni at.”—Isaia 65:17.

Pane mekune jë la! Hnene la Atre Xupi së hna hnëkëne “la pune memine la mejiun,” ene la mele ka tingeting fene la musi ne la Baselaia i Akötresie. (Ieremia 29:11) Hapeu, trotrohnine kö epun ka hape, hetre eloine troa xomihnine la akötr? Öni Sally, hna qaja ha e caha ka hape, “Maine tro sa lapa mekun la itre ewekë ka lolo hna troa kuca koi së elanyi hnene la Baselaia i Akötresie, tro lai a xatua së troa lepetrij la itre mekun ka iajolë, me xomihnine la akötr.

Thele jë troa atrepengöne hnyawa la itre hna troa kuca hnene la Baselaia i Akötresie thatraqane la itre atr. Maine tro epuni a kuca lai, tro hë epuni a öhne ka hape, ka nyipiewekë catre la mel, ngacama hna lepi epun hnei hulö. Nge tro epuni a trengeneune la mele ka loi elanyi ngöne la fen laka, pëhë hulö. Ame enehila, Tusi Hmitrötr a hamë eamo matre troa xatua epun xomihnine la itre akötr thupene la hulö. Hanawange la itre xaa hna melën.

Itre Xötr Ne La Tusi Hmitrötr Ka Ixatua

Nyipiewekë troa mano.

“Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.”—Ate Cainöj 4:6.

Önine la itre ka inamacan, “ame la itre atr a cile kowe la itre jol ka tru, angatr a akötr, nge jole catre la mekuna i angatr matre tha meköle hë angatr.” Celë hi matre, nyipiewekë la troa mano hnyawa.

Fe pi la hni epun.

“Ame la hleuhleu e kuhu hni ne la ate, te, ate agenyin ; ngo ate amadinën’ eje la tenge ewekë ka loi.” —Ite Edomë 12:25.

Ithanata jë memine la fami epun, maine sinee i epun. Nge, ame la angatr a drei epun e fe la hni epun, tro hë angatre lai a hamë ithuecatr, me ixatua ka ijij.a

Lapa mekune jë la itre drai ka loi.

“Thenge lo hnei Nyidrëti hna thingehnaean, easa lapa treqen la hnengödrai ka hnyipixe me fen ka hnyipixe, nge e cili, tro pala hi a eje la thiina ka meköt.” —2 Peteru 3:13.

a Maine qea la hnei epuni hna akötr, me xou lapa, ma ka loi troa wai droketre.