Atrune Jë La Meci Iesu Meci Ka Troa Hamëne La Mel Epine Palua
1 Tro së a atrune la meci ne la Atre hamëne la mel, thupene la hna lö la jö e drai 6 eiperem 1993. (Ite Hu. 3:15) Loi e tro së a amekunëne me nyipi ewekëne la mel, memine la meci Iesu Keriso, pine laka, ame la lapaune së kowe la mele ka tha ase palua kö, ke hna eköthe hune la madra i Iesu hmekuje hi.
2 Ame la Drai ne Amekunën, ke ketre ijine lai ka sisitria ngöne la ewekë hna thingehnaeane hnei Iehova koi së, ene la meci Keriso. Celë hi matre, loi e troa meci la ketre atr ka pexeje matre thupene mele kowe la itre matra i Adamu, nge matre tro la nöjei atr ka kösau a lapaune me mele epine palua, ngöne la paradaiso e celë fene hnengödrai. — Ioane 3:16.
3 Tro la nöjei atr ka hni kowe la nyipici me ka ajane troa mel, a trotrohnine hnyawa laka, aja i Iesu troa atrune la jidri ne pui ne xeni ne la joxu. (Luka 22:19) Nemene la nyine tro së isa ala casi a kuca, matre amamane laka easë fe a hane wang’atrune lai huliwa hna hnëkëne göne la thupene mele i Keriso? Nyipi ewekë troa hnëkë hnyawa kowe lai ijine cili. Nemene la hne së hna troa kuca me hnëkëne thatraqane lai drai ka sisitria cili?
4 Hnëkë hyawa jë së: Nyipi ewekë tro së a xatuane la itre atrene la hnalapa, matre tro së asë a hane ce sine lai drai cili. Eje mina fe laka, loi e tro së a ce wange me e hnyawa la itre xötre qa hnine la Tusi Hmitrötr, lo hna cinyihane ngöne la Calendrier 1993 qaane eipereme drai 1 utihë ngöne la drai 6. Ketre, nyipi ewekë fe troa hane qeje pengöne la aliene lai Drai ne Amekunëne ngöne la epuni a inine la Tusi Hmitrötre memine la fami, qëmekene la drai 6 eiperem. Loi e troa canga traqa, maine nango lapa aqeanyi pena, thupene la icasikeu ne lai Drai ne Amekunën, matre hetre ijine troa hane atre hnyawa la itre ka xötrei traqa, troa hane sine la drai cili.
5 Ngöne lai itre wiike qëmekene la Drai ne amekunën, ke tro epuni a ithahnata me hëne la itre atr hnei epuni hna atre, matre tro angatr’a hane traqa ngöne lai ijine cili. Hetre itre pepa hna cinyihane me hna hnëkëne kowe lai huliwa cili. Huliwaane jë itr’ej, nge mekune hnyawa kö troa thuemacane la itre atr ka ajane troa traqa, la göhnen, me traeme ne nyiqaan. Hnëkë jë matre nyiqaane iöhnyine memine la itre atr, hnei epuni hna mekune troa hën. Tune ka göi gojeny, pëkö ejolen? Maine pëkö loto i itre xan, ke ce wange ju matre ixatuanekeune ngöne la götrane cili. Maine hetre göhnë thei epun, ke, hnauëne laka tha ce wange kö memine la itretre thupe me thuemacanyi angatre ka hape, ijiji epuni fe troa hane ixom?
6 Ketre loi e tro la itretre thupe a canga hnëkë hnyawa, pine laka, ketre ijine lai ka sisitria ngöne la macatre, nge troa alanyimu la itre atr ka troa traqa (1 Kor. 14:40). Ngöne lai wiike qëmekene la drai 6 eiperem, ke tro la itretre thupe a pane icasikeu memine la itre trejine trene hnëqa ngöne la ijine cili, matre ce wange hmaca me, ce ithahnataane hnyawa la itre huliwa hna isa athip, maine aqane troa trofë la areto. Maine hna ami epuni troa elemekën, maine troa trofë areto pena, ke xötrethenge hnyawa ju la itre hna amekötine hnene la itretre thup, celë hi aqane troa ce huliwa me angatre matre, troa tro loi la itre huliwa. Tro la itretre thupe a ce wange hnyawa la ixatua qa hnine la sine trongene lo Huliwa ne Baselaia ngöne götrane 7, matre, atreine troa canga hnëkëne me athipe la itre götraneqa, göi itre ka troa elemekën, me itre ka troa trofë la areto, me ka troa cilefë la cainöj, memine fe lo göi troa hnëkëne la areto.
7 Easenyi hë matre, ketre pëpi hë kepine troa atrune la pui ne xeni ne la joxu, pine laka ala xalaithe pehi lo itre trejine me Nyidrë, hna iëne ka mele enehila e celë fene hnengödrai, itre ka kapa la areto (1 Kor. 11:25, 26), celë hi matre, loi e tro së a nyipi ewekëne me atrune palahi la meci ka hamëne la mejiun; ene lo troa hetrenyi la mele ka tha ase palua kö.