Ketre Ewekë Ka Sisitria, Hna Traqa Ngöne La Isitoare Ne La Atr
1 Hnei Iesu hna traqa e celë fen, thenge la hna amekötine hnene la Tretretroti i anganyidrëti, troa anyipicine la nyipici matre thuejë së kowe la mele ka pë pun. (Ioane 18:37) Hnene la lapaune ka catre i nyidrëti hna atruni Iehova, me ahmitrötrene la atresiwa i Akötresie, me nyithupe së. (Ioane 17:4, 6) Ejehi la ewekë ka traqa ngöne la kola meci hnei Iesu, ketre ewekë ka sisitria ngöne la isitoare ne la atr.
2 Qaane lo kola xupi Adamu, ke, lue atr hmekuje hi ka pexej, ka mele e celë fen. Hnëqa i Adamu troa hamëne la itre manathithi ka sheminge me lolo kowe la itre matra i angeic. Ngo hnene la hnei angeice hna icilekeu, hnëjine hë la nöjei atr, troa mele ngöne la akötr, nge meci la pun. Ame lo Iesu a hlepëti e celë fen, ke, hnei Nyidrëti hna amamane laka atr ka nyipici me ka drengethenge Nyidrë, qa ngöne lai, Nyidrë a fe ju kowe la itre atr ka lapaune koi Nyidrë la gojenyi kowe la mele ka tha ase paluakö.—Ioane 3:16; Rom. 5:12.
3 Pëkö nyine troa aceitunëne memine la mele hna hujëne hnei Iesu. Kola saze la isitoare ne la atr. Ketre, celë hi trepene la melehmaca ne la itre atr ka kösau. Kola amë la trepene thatraqane la Baselaia ka troa cile hut, nge ka troa apatrene la ngazo me aparadraisone la fen. Ketre Baselaia la ka troa nuengëtine la fene hnengödrai qa ngöne la iqana angazo me iaxösisi.—Sal. 37:11; Itre Huliwa 24:15; Rom. 8:21, 22.
4 Itre Ewekë lai ka xatua së troa wang’atrune la aliene matre Iesu a inine la itretre drei Nyidrë troa amekunëne palahi la meci Nyidrë, jëne lo Drai ne amekunëne e nöjei macatre. (Luka 22:19) Nyipiewekë tro së a thele troa hane icasikeu memine la itre ekalesia ne la itretre anyipici Iehova ngöne la fene hnengödrai, e treu Eiperem, drai 14 thupene la hna lö la jö. Ngo qëmekene lai ijine cili, loi e tro la itre fami a ce wange hmaca ngöne la Tusi Hmitrötre lo itre drai tixenuë i Iesu e celë fen memine la aqane catrei Nyidrë kowe la nyipici. (Goeëne ju la itre mekene tusi hna cinyihane ngöne lo Calendrier 1995 qaane 9 utihë 14 Eiperem.) Nyidrëti a amë pe la ketre ceitune koi së ngöne la aqane troa hni kowe la ka Atr xupi së. (1 Pet. 2:21) Celë hi matre, kuca asë jë së la hne së hna atreine troa könëne la itre sinee së maine fami së, itre hna inin, me itre atr ka hane ajan, kowe lai ijine katru cili. Pane canga thuemacane ju koi angatre la aliene la itre areto memine fe la itre ka ijije troa xom.—1 Kor. 11:23-26.
5 Troa canga hnëkë hnene la itre qatre thup matre nyihnyawane la uma ne Baselaia ngöne la ijine cili. Hetre ewekë hna hnëkene thatraqane la atr ka troa xome la areto. Nyipiewekë fe troa hnëkë hnyawa hnene la itre ka troa trofë lai areto. Hetre ixatua hna hamëne hnine La Tour de Garde ne 15 Febuare, 1985, götrane 19, göne la aqane tro së a metrötrëne la jidri ne pui ne xeni ne la joxu. Nyipi ewekë fe tro la itre Ekalesia a hnëkë troa catre cainöj, nyimu drai qëmekene lai ijine cili me thupen.
6 Ngöne la macatre hnapan, ke, 12 288 917 la etrune la itre atr ka hane sine ngöne la fene hnengödrai asë, lai drai ka sisitria cili, ene la Drai ne amekunën. Celë hmekujehi la drai ka sisitria lai ngöne la idrai së, qa ngöne lai loi e tro asë hi së a hane traqa ngöne lai ijine cili.