Ngöne La Kovasio Ne Distrik 1995 — Itre Ewekë Nyine Ahmaloeën
1 Lolopi hë me sheminge e troa hane kapa la itre xeni ne la ua hna hamëne o ijine icasikeu ne la Ekalesia, memine fe lo itre ijine icasikeu katru, me itre icasikeu ne caa drai, maine ngöne pena lo itre ijine kovasio ne Distrik! Pine nemene laka sheminge me lolo? Kola akeukawane la angetre nyihlue i Akötresie, nge itre ijine lai tro la itre cainöje hna cile fë a amekunë së la itre ewekë ka nyipi sisitria.
2 Hetre itre thauzane lao atr ka sine lo itre icasikeu ne la hmi së lo itre macatre ka ase hë. Ngöne la itre macatre 1985 koi 1994, kola ketre elë la etrune la itre Ekalesia ngöne la fene hnengödrai asë, qaane 49 716 koi 75 573 a 50 koi 100. Qangöne laka, Iehova a anyimenyimëne la huliwa ne acasinekeun, hawe kola elë fe la etrune la itre Kovasio ne Distrik, memine la itre Icasikeu katru. (Isa. 60:22) Ngöne palahi lai ijine cili, ke, alanyimu catre la itre atr ka hane sine la itre Kovasio ne Distrik e Kaledonia, kola elë qangöne 1 658 koi 3 499. Celë hi matre loi pe e troa hnëkëne la itre ewekë hmekune la aqane manane enehila la itre atrene la itre icasikeu. Pine laka, easë a troa öhnyi manathithine la itre hna hnëkëne thatraqane la ua, hawe ka loi la troa ahmaloeëne la itre ewekë thatraqane la ngönetrei.
3 Loie tro sa kapa la itre hna amekötine ka hnyipixe: Easë a kapa qathei Iehova la manathith, pine laka, kola kökötre trootro la huliwa së koi Nyidrë. Madrine së laka, hnei Iehova hna hamëne kowe la itretre nyihluei Nyidrë la inamacane memine la atrehmekun. Tro së a atre hnyawa laka, jëne la hlue ka nyipici me ka inamacan, Iesu a cilë mekene hnyawa la itre ewekë matre eatrëne hnyawa la itre trepene mekune i Iehova, tune lo aqane thingehnaeane i Nyidrë. (Mata. 24:45-47; Kol. 1:9, 10) Celë hi matre tro hë së a pane tupathe lai itre hna amekötiin, ene la itre ewekë ka hnyipixe nyine ahmaloeën; ngöne la itre icasikeu ne sirikosikiripisio ne treu eiperem, nge kola hane mekune fe göi kovasio ne disitirik e treu ogas 1995. Tha tro hmaca kö a hamë xeni tune lo hna majemin. Tro pëhë së a isa hnëkë nyine xeni me nyine ij. Ejehi laka, tro kö së a öhne la eloine la aqane huliwa cëlë. Ma ajane fe epuni troa atre la thangane hna troa kapa qa ngöne lai. Ketre, loie troa ce wange hmaca lo itre ewekë nyine ahmaloeëne hna kuca ha lo itre macatre ka ase hë, itre ewekë ka troa amamane laka troa hetre thangane koi së la aqane huliwa celë, ene la troa ahmaloeëne palahi la huliwa ngöne la itre icasikeu.
4 Itre aqane ahmaloeëne hnapan: Ame e cili lo, ke, traqa koi itre hadredre la etrune la itre trejine ka trene götraneqa qëmekene la itre icasikeu katru, göi troa hnëkë xen, maine troa ami atr ngöne itre hnalapa ne ikep, maine troa saene troa ixatua. Hetrenyi la itre ewekë ka iajolë hna thueenefëne hnene la itre trejine, trahmanyi me föe, memine fe la itre ewekë nyine tro së a isa kuca o drai, ketre mina fe nyimenyime catre la aqane kökötre la organizasio; drei la itre kepine matre, ijije catre hë troa ahmaloeëne la itre huliwa, ka tune la hnëkë xeni ngöne ijine kovasio thenge lo hna majemine ngöne la itre macatre ka ase hë. Ka sisitria la itre aqane huliwa celë, pine laka itr’ej a ahmaloeëne la huliwa, göi troa amë panëne la götrane ne la ua, nge ijije tro lo itre ka saene troa ixatua a sine apexejene la porogarame me kepe thangane hnyawa. (Deut. 31:12) Ame the së itre ka hekö hë ngöne la nyipici, ke, atreine së troa wangatrehmekune hnyawa la eloine la itre hna amekötine ka hnyipixe, nge easë a kapa madrine la aqane ameköti ewekë celë. Ngo nemene mina fe la itre xaa götrane nyine xome trij, matre troa thuejëne la itre trejine trahmanyi me föe troa kepe thangane atrune qangöne la itre xeni ne la ua?
5 Ijiji së troa canga wange la itre ewekë ka hnyipixe: Ame lo itre macatre ne kolo palakö a ithue xen, ke, mamahi laka “casihi la ka nyipi ewekë.” (Goeëne ju la Luka 10:38-42.) Ngacama casihi la ka nyipi ewekë, ngo ame pe qangöne laka mana catre la atr, tru hë la nöjei huliwa nyine troa kuca me nyine troa itöne ka tru thupen. Celë hi matre ame e cili lo, loi e tro palahi a alanyimu la itre ka saene matre, ijije troa iwanakoimëne la nöjei huliwa nyine troa eatrën. Ketre huliwa, la troa thele göhnene gaa loi, la hnë troa xeene lo itre xen.
6 Ketre ewekë ka tru catre lo, aqane eatrëne palahi hnene la itre ka saene la itre götraneqa i angatr, ijije troa olene atraqatre koi angatr. Ngo enehila, jëne la itre hna amekötine ka hnyipixe nyine troa ahmaloeën, ame lo itre trejine trahmanyi me föe laka hna sasaithe la ca hadredr, itre ka majemine saene troa ixatua, göi troa itö, maine troa hnëkë troa ithue xen, ijije tro pena angatre enehila a troa ujë kowe la itre xaa huliwa i Akötresie ka nyipiewekë; ene la troa hane ithuecatre kowe la itre xaa trejine, troa hane ce porotrike memine la itre xaa atrene la icasikeu. Ame lo itre ka majemine saene troa hnëkë xen, ijiji angatre enehila troa cilëne la itre xaa götraneqa, tune la troa kapa la itre ka traqa, maine tro pena a ce huliwa memine la itre ka troa nyihnyawane la uma ne Baselaia. Qangöne laka alanyimu la itre ka ixatua, hmaloi hë la itre götraneqa cili, matre tha tro kö a hmiitre fenesi e hej me canga traqa e hmakany, maine pena hetre nyine kuca e nyipine la icasikeu tune lo itre hna majemine lo itre ijine kolo petre kö a hnëkë xen.
7 Kapa ju la itre hna amekötin: Atraqatre la ole i sasaiatri kowe la itre trejine, trahmanyi me föe, pine la ixatua katru hnei angatre hna hamëne hnene la “hni ka pexej” ngöne lo itre macatre ka ase hë, kowe lo itre hna amekötine göi itre kovasio, tune la hnëkë xen. (1 Aqane lap. 29:9) Ejehi laka, tru hë la nöjei götrane gaa hmaloi. Qangöne lai, ijije hë troa thele la itre uma ka loi me atreine troa nyithupene la nöjei ejolen. Ijije catre la traeme hna nue kowe la itre atr troa hutihut, ene la troa xeni me iji la itre hna isa hnëkën, qëmekene tro hmaca ha xejë la porogarame ne hnaipajö. Ame ekö, kola itö xeni hnene la itre trejine ngöne la hnë icasikeu, hnei angatre hna mekune ka hape, aqane tro lai a ixatua göi itre ejolene la kovasio, nge kösë aqane hamë ahnahna i angatre fe lai koi sasaiatri troa xatuane la huliwa ne cainöje trootro. Hawe, loi e tro së a atre enehila laka, pë hmaca kö itö xen, ngo tro pëhë a nyithupene la itre gufa ne asabele hnene la itre ahnahna hne së hna troa hamën. Qangöne lai, loi e tro së a canga axeciëne la ahnahna nyine tro së a kuën; troa hmekune lo etrune mani hne së hna majemine itö xenin; kolo hne së hna mekune ka hape, ahnahna së fe hë lai. (Voir “Réveillez-vous!” du 22 juillet 1985, p. 25) Tro la itre trejine ka majemine saene me ham, a amamane la ole i angatre qangöne la aqane huliwa i angatr; nge loi e tro palahi a tro tune lai.—Itre Edo. 11:25; Luka 16:9.
8 Aqane troa isa hnëkë xen: Qangöne laka, ase hë ahmaloën, tro la itre fami a isa hnëkëne thatraqai angatre kö, la xeni ka ijije göi troa hutihuti e hnaipajö. Ka tru koi së la itre thangane hne së hna troa kapa qangöne la xeni ne la ua. Hawe, tha loi kö e troa mekun’atrune la xeni ne la ngönetrei. Ngöne la götrane cili, loi e “löthi së hnene la itre ewekë ka sisitria catr”. (Fil. 1:9, 10a N.W.) Ame ngöne la itre kovasio katru ne la nöje i Iehova hna hnen e Polona, rusi, me ukeren, me itre xaa götrane ju kö, tha hna hnëkë xeni kö, ngo ame pe ke, loixölene nge loi la aqane trongen. Ame ngöne la itre icasikeu cili, ke, hnene kö la itre atrene hna isa traqa fë kemeji angatr. Tro kö së lai a wangatrehmekune ka hape, maine tha tro kö a tru la hne së hna xen, ke, ijiji së troa drenge hnyawa, nge tru la thangane tro së a kapa qangöne la porogarame ne icasikeu ne hnaipajö. Celë hi matre, the xomi xeni menu kö, ngo traqa fë ju hi la ka ijij. Mekune ju lo tulu i Iesu, hnei Nyidrëti lo hna ithuane la ka alanyimu hnei lue ejene xen; falawa me i. (Mata. 14:16-20; goeëne ju la Luka 10:42a.) Ketre tun, atraqatre la madrine huni troa hamëne la itre mekune ka ijije nyine xötrethenge nge ka ijije göi xen, ke, ka loi göi itre uma ne icasikeu, maine göi traeme ka ijije troa xeni kemej.
9 Qangöne laka, pë hmacakö xeni hna troa hnëkëne ngöne la asabele ne sirkoskripsio, maine kovasio ne disitirik fe, tro la itre atrene a hnëkë hnyawa matre ijije troa ce iji kofi maine tri e hmakanyi hnene la fami asë, ngöne itre hnalapa i angatr. Hawe, loi e tro së a thupëne troa canga meköle e jidr, matre canga hlë e hmakany troa iji kofi me canga tro koi hnë icasikeu troa hane ce porotrike me itre xaa trejin. Hetre itre xaa ewekë ka loi qangöne la itre hna amekötine göi troa ahmaloeën. Tha tro hmaca kö a ilë troa fe qëhnelö me nyiqaane thup, maine canga traqa pena hnene la itre ka saene me itre fami i angatr. Ketre tha nyipi ewekë hmacakö troa ielo göhnë, pine laka, troa hetre göhnene asë la nöjei atr ka troa traqa.
10 Ngöne la itre icasikeu ka troa xulu, hna ahopatrene la traeme ne mano e hnaipajö, tha tune hmacakö ekö lo. Ame pe ijije hi la traeme ne troa xeni kemeji me porotrike me itre trejine, qëmekene la kola troa nyiqaane hmaca la icasikeu e hnaipajö. Ame göi itre trejine ka mele e Numea me itre götrane ka tha nanyi kö, pëkö ejolene koi angatre troa hnëkë kemeji thatraqane la fami. Mekune ju lo itre nyine kuca kowe la itre nekönatre lo ijine ini; troa xomi sadiwic, wene sinöe, maine trepe gato me nyine ij. Hetre itre atr fe ka xeni tune lai ngöne la hnei angatre hna huliwa.
11 Eje hi laka, troa nango jole koi itre ka traqa qa Mëëke me itre hnapet, loi e tro angatr’a ketre hnëkë kemeji angatre thatraqai hnaipajö. Maine ame koi itre xane ke, ijije ju hi la hnepe sil, maine wene sinöe pena, troa isa traqa fë qa hnalapa maine tro pena itöne ngöne magazë. Loi e tro fe a itö pepa ne kalaim, me ver palastik.
12 Ame la hna kovasio ke, ceitu me uma ne Baselaia. Tha tro kö la thiina së a ceitune me kösë, easë ngöne hnaa pikinik. Nge tune laka tha loi kö e troa xeni ngöne itre ijine icasikeu, ketre tha tro kö a xeni me iji e ase hë nyiqaane la porogaram. Ketre, tha tro kö a lö fë la itre nyine ami kalepanyi katru hnine la uma ne icasikeu. Wanga troa nyi ethane la icasikeu, maine troa acone pena la itre hnë tro, maine tro pena xome la göhnë i itre xane ngöne la itre icea. Hna nue hi troa ami trengene kemeji hnine la itre watrenge palasitik maine pepa, göi xeni e hnaipajö. Nge maine hetre nyine ami kalepanyi ka co catre ka ijije troa amë fene icea, ketre kaloi mina fe, ngazo pe e troa amë hune icea.
13 Wange fe kö la itre trengene nyine ij hna troa traqa fë ngöne la hnë icasikeu. Kaloi e troa traqa fë teremosi göi troa iji ka idreuth. Tha loi kö troa xomi nyine iji ngöne butei ver, wanga kaqa pi nge ixöji jë; loi pe troa xome la itre trengene nyine ij, palasitik maine mook aliminiom.
14 Itre xaa eloin: Easë a trotrohnine laka, wene ne la wangatrehmekune la itre ewekë nyine ahmaloeëne hna troa tupathe e treu Eiperem. Kola aijiji së asë hi troa qëmeke hnyawa kowe la itre ewekë ne la ua hna thawa koi së, jëne la itre cainöje hna troa cile fë; nge drei la sipu kepine matre easë a traqa troa sine la kovasio. Tro së a kepe thangane ka loi qangöne la hna acasi së itre trejine, trahmanyi me föe, me qangöne la porogarame hna hnëkëne thatraqai së. Qangöne lai, tha loi kö la tro së a tro qa ngöne la hnë icasikeu lo ijine mano, troa xeni e trön. Nyipi ewekë la tro së a traqa fë asë la xeni ka ijij. Qangone lai, ijiji troa ce porotrike memine la itre atrene la icasikeu, nge ketre mina, pëkö cainöje hne së hna troa triane e hnaipajö.
15 E heji hë thupene la itre ixatua hna hamëne ngöne la götrane ne la ua jëne lo porogarame ne hnaipajö, hetre madrine i itre xane troa könëne la itre xaa trejine troa ce xeni hej, matre ce ithahnatane hmaca lo itre ewekë ka loi hna ce dreng.
16 Nyipici laka, atraqatre la madrine së e troa sine la itre puinexeni ngöne la götrane ne la ua, ene lo itre asabele, me itre kovasio; itre ijine easë a kapa la itre itusi ka hnyipixe, itre ini ka sisitria, me itre ihaji nyine trongën. Itre manathithi lai tha tro kö së a thëthëhmin. Önine la tusi Itre Edomë 10:22 ka hape: “Ame la manathithi qathei Iehova, te, kola atrenamone nge tha hnei Nyidrëti hna akötre fë.” Celë hi ewekë hne së hna kapa angetre nyihluei Iehova, pine laka tha easë kö a sine la itre kovasio matre thele la ewekë ne ngönetrei, maine ajane troa mele xetietë. Ame la sipu aliene, ke, ene la troa kapa la loi qangöne la itre götrane ne la ua, nge qangöne la thiina ka loi ka mama the së, Iehova a ehnith, me amanathithin.—1 Tim. 6:6-8; Heb. 11:6.
17 Ame la itre kovasio, ke, itre ijine easë a kapa la itre ixatua ka amekunë së la ijine menuu ngöne la ua. (Ioane 4:35, 36) Hna nyiqaane la tusi Isaia mekene 54, hnene la kola könëne la organizasio i Iehova hna aceitunëne memine la föe, kola könëne matre hnëkëne troa mele madrine ngöne la ijine mana me hatr. Tune la aqane perofetaane hnei Isaia, tro hmaca kö nyidroti a mana catre me hatr, nge troa kapa hmaca la trengecatre hna ahnyipixen: “Atrune pi la hne ne la uma ne mano i’ö, nge sheluthe pi la mano ne la hnalapa i’ö, the xom’acon; ahoeanejë la itre eno i’ö, nge acatrene ju la itre fao i’ö, ke tro eö a kekë ngöne la götrane mi.” Hnene la aqane kökötrene la nyipi hmi enehila, hna amamane laka, eatre hnyawa ha la itre hna perofetaane ka tru aliene ngöne la hnedrai së.—Isa. 54:1-4.
18 Nyipici, ame la nyine ahmaloeëne ka hnyipixe, ke, hatrene la aqane wai ewekë ka loi. Tro la itre atrene la icasikeu a kepe thangane la itre ewekë ne la ua, lo itre hna hnëkëne troa hamëne lo itre ijine kovasio, qangöne laka, xalaithe hë la itre ewekë ka troa ajolën. Eje hi laka, tro Iehova a amanathithine la itre hna amekötine celë, pine laka ka ihmeku memine la mana me hatr. E tro së a mekune hmekuje hi la itre ewekë ka ijij, tro hë së a kepe thangane hnyawa qangöne la itre drai ka loi, hna pane aijijë së troa acaasi së me itre trejine me easë, nge mana fe hë the së la itre mo ne la ua. Epi tro Iehova a amanathithine la itre aja së, göi tro palahi a icasikeu ngöne la laulau i Nyidrë, hnë tro së a kapa la nyipi xen.—Goeëne ju la Deuteronomi 16:14, 15.
[Hna eköhagen götran 6]
Itre eloine qangöne laka pëhë hnëkë xen
◼ co hi la huliwa; qëmekene kovasio, ijine kovasio, me thupene kovasio, kola thue ijine së troa ce porotrike me itre trejine me easë, trahmanyi me föe
◼ Pëkö materiele ne hnëkë xeni nyine nyidrawan
◼ Tro la itre atren’asë a kepe thangane ka loi qangöne la itre xeni ne la ua hna thawa ngöne ijine icasikeu
◼ Tru la itre ka saene troa ixatua kowe la itre hnepe götraneqa ka lapa pe
◼ Hetre ijine së troa hneheene la itre mekune ngöne la itre xaa götrane ne la huliwa i Akötresie
Kemeji ka ijije troa traqa fë e hnaipajö
◼ Xeni ka hmaloi, tha jole e troa hnëkën, ka ijije thatraqane la ngönetrei
◼ Falawa, itre wene sinöe
◼ Trengene ikalepanyi kaco, maine ijij
◼ Itre nyine ij ka loi, zane wene sinöe, timi hnine itre trengene ka tha kaqa kaqa kö
THA TRO KÖ a traqa fë e hnine la uma ne kovasio
◼ Gorok
◼ Itre trengene tim ver
◼ Itre trengene kalepanyi katru, lo hna hape galasier