“Itre Aqane Atrunyi Akötresie Ngöne La Madrin,” Taane La Kovasio Ne Distrik 1995
1 Nyimu kepine kepine ka hamë madrine koi së, ijetre? Hna tupathe hë hnene la ala xalaithe troa fejan’itr’eje ngöne ipepa. Ngacama, easë a mele ngöne la fene hnengödrai ka gomegom, nge ka tha catre kö, ngo ame pe, ke, nyimutre lao kepine matre easë a madrin. Hawe, nyine ithuecatre koi së, “Itre aqane atrunyi Akötresie” la taane ne la kovasio ne distrik 1995.
2 Easë a atrunyi Iehova pine laka hnei Nyidrëti hna ini së la nyipici. (Isa. 54:13; Ioane 8:32) Hawe, ngöne la itre drai thupen, ke, loi e tro fe së a hane qaja la nyipici cememine la madrine kowe la nöjei ka thele troa lapa loinöj, me manathith. (Ezek. 9:4; Ite Huliwa 20:35) Ame fe la itre trejine me easë keresiano, ke, angatr’a hane thue madrine së. Kola hamë madrine me manathithi hnene la fami ka ihnimi ngöne la ua. Itre xaa kepine hi la ka hamë madrine koi së, nge ka upi së troa atrunyi Iehova. Tro la itre cainöj, me itre iamacanyi ngöne la ijine kovasio a xatua së troa atrehmekune la itre xaa kepine ka thue madrine së ngöne la itre drai hnapin, ene la itre drai celë ka gomegom.
3 Kovasio Ne Köni Drai: Hnei epuni kö hna ithahnataane memine la maseta i epuni matre, troa mano ngöne la ijine kovasio ne köni drai? Troa kuca la kovasio e Numea, ngöne la ijine kola vakasi hnei uma ne ini, e ogas 1995. Tro la seketere ne la ekalesia a thuemacanyi epuni la itre hna amekötiine kowe la ekalesia i epun.
4 Tro la porogarame a nyiqaane e drai katru e 9 h 40, nge troa nyipune e sabathi e 15 h 50. Ame e mecixeni me sabath, ke, troa nyiqaane la porogarame e 9 h 30. Troa fe la itre qënehlö e 8 h. Tro hmekujehi lo itre ka trene hnëqan’a canga lö.
5 Tro Kö Epuni a Hane Sin?: Kola upi së troa sine asë la köni drai ne la kovasio. Pine nemene? Iehova a ajane tro së a traqa. Hna tupathe la mele së ngöne la ua, memine la lapaune së hnene la itre iajolë ka eje ngöne la itre hnedrai enehila. Hnei Paulo hna eamo ka hape “tha tro kö a tije la icasikeu shë,” ngöne la ijine kola akötrëne la itretre keresiano e Iudra. (Heb. 3:12, 13; 10:25) Kola mele hnene la angetre Filipi “qëmekene ne la xöte ka qaliqali me ka ena.” Ngo ngöne la ijine cili, angatr’a ‘hudume tune la ite lai ne la fen.” (Fil. 2:15) Pine nemene matre isapengöne kö la itretre keresiano cili ngöne lo pane hadredrene macatre? Pine laka angatr’a nue la uati hmitrötre troa eatrongë angatr, celëhi matre kola upi angatre troa ce icasikeu “mate troa aciane la ihnimi me ite huliwa ka loi.”—Heb. 10:24.
6 Ijije tro la fen’a ajojezi së, me ananazijëne la aja së troa icasikeu memine la itre trejine me easë, me troa atrunyi Iehova. Kola upi së troa drengethenge la uati hmitrötr, me kapa madrine la köni drai ne kovasio. Hapeu, easë kö a catrefë la mekune së troa sine la kovasio cememine la fami së asë? Nyipiewekë koi së troa acatrene lapaane la ihnimi së, memine la lapaune së. Hnei Iehova hna hnëkëne koi së la itre kovasio e nöjei macatre göi troa xatua së ngöne la götrane cili.
7 Loi e Tro Së a Traqafë La Trengamo Kowe La Hnalapa Së: Tro së a kapa tuneka la xeni ka lolo catre kö hune la nöjei xeni qa ngöne la kovasio? Ejehi laka, ame la nyipi ewekë, ke, tro së a “atreine troa xomehnöthe la itre mekune së matre troa drenge hnyawaan’asë la itre hna qaja.” Ka jole catre koi së troa trongëne lai ngöne la fene celë, pine laka easë a enije lapa, me canga traqa hi la elëhni. Ma jole catre kowe la itre thöthi ka egöcatre troa xomehnöthe la itre mekune i angatr, ngo tro asë hi së a catre troa cile kowe la ewekë cili, ngöne la easë a sine la kovasio ne distrik. Troa hmaloi koi së troa xomehnöthe la itre mekune së göi troa drenge hnyawaane e hne së hna hnëkëne la mekune së. Pane mekune jë ka hape, ‘Nemene la taane ne la kovasio?’ Nge thele ju la alien’ej! ‘Pine nemene matre eni a sin, nge nemene la hnenge hna troa kuca ngöne la köni drai? Hapeue la itre heji thupene la icasikeu, loi kö troa thele la itre nyine amadrinën, maine troa wange hmaca la itre hna drenge ngöne la icasikeu, me mano hnyawa kowe la drai elany?’
8 Ame hnine La Tour de Garde ne 1 febuare, 1984, ngöne lo hna cinyihane ka hape “Itre nyipi mekun, maine itre mekune menu?,” ke, hna hamëne la itre mekune göne la aqane troa öhnyi loi qahnine la icasikeu, nge hna nyipune tune la: “Ketre götrane ka sisitria la tro së a thupëne la itre mekune së.” Ame ngöne la kola nyiqaane hnene la ka cilefë cainöj, ke, hne së hna majemine troa drenge hnyawaane la xötrei, ngo e qea ha, tha thupëne hë së lo itre mekune së.” Tro së a hnëkë tuneka matre troa neëne lai?
9 Hna hamëne hë ekö la itre mekune nyine ixatua, hna qaja lapaan’itr’ej, pine laka hetre thangane ka loi qa ngön. Loi e troa tupathe troa canga meköle hnyawa e itre jidr. Tro la porogarame hnei epuni hna hnëkëne hnyawaane thatraqane la ijine kovasio a xatua epuni matre pexeje la hnei epuni hna mano.
10 Tro fe a xatua epuni troa xomehnöthe la itre mekune i epun, e hnei epuni hna xomi not. E epuni a tupathe troa fejan’asë la itre mekun, ke, tha tro hë epuni a drenge la itre mekune ka sisitria. Hanawange la ketre aqane hetrenyi la ixatua, xomi note ju tune la epuni a troa qaja hi la itre mekune ka tru ne la porogarame kowe la ketre hnainin, maine pena kowe la ketre atr ka tha hane sin. Ngacama pëkö atr hnei epuni hna mekune kow, ngo loi e troa hetre aliene nyine troa aeatrën, ngöne la epuni a xomi not, nge thupene la hna kovasio, hetre itre ijine ka ijije göi troa qaja la itre mekune ka tru ne la porogarame, maine ngöne la kola cainöje e nöjei ijine ka ijije kowe la itre atrene la fami së. Tha tro kö epuni a canga thëthëhmine la itre mekun, e hnei epuni hna xomi not, me iqajakeune la hnei epuni hna dreng. E tro së a qaja la hne së hna inin, ke, tro la itre hne së hna inin’a lapa aqeanyi ngöne la mekune së.
11 Ngacama tha kolo hmaca kö a hamë xeni ngöne la itre kovasio, ngo ame pe, ke, tru catre la thupene la hnë icasikeu së, memine la itre jiane huliwa tune la itre nyine atrunyi hna ewekë me nöjei sinetrongen, me itre xaa ewekë ju kö. Qa ka la mani nyine nyithupene la itre ewekë celë? Jëne la itre ahnahna hna hamëne qa kuhu hni, hnei mani maine hnei ceke pena thatraqane la asosiasio “Les Témoins de Jéhovah.” Ka ihmeku lai memine la Salamo 96:8, me 2 Aqane Lapa Ite Joxu 31:12.
12 Tro Së a Atrunyi Iehova Jëne La Aqane Ujë Ka Meköt: Ame la ketre jole hna öhne lapaane ngöne la itre macatre, ke, nyimutre la itre trejine me easë ka tro agö ngöne la itre kuloar, me e kuhu tröne la hnë icasikeu e nyipine la porogarame ne icasikeu. Ame ngöne la ketre kovasio, lo macatre hnapan, ke, hna öhne la ketre tusi ne la ketre hnainine ngöne la hnë ami mani. Hna cinyihane ka hape: “Eni a sesëkötr, nge tha madrine kö ni hnene la ilu, me tro lapa, me porotrik, me aqane ujë ka tha loi kö ngöne la itre hnaatro e nyipine la itre cainöj . . . Tha temoë petrekö ni, ngo ketre atr hi ka ini, me ka inine troa hetrenyi la xoue Akötresie, me metrötrë Nyidrë.” Ejehi laka, tha ajane kö së troa amamane hnene la aqane ujë së, ka hape tha kapa madrine kö së la itre hna hnëkëne hnei Iehova thatraqa së.
13 E nöjei ijin, ke, loi e tro së a isa hnyinge ka hape: ‘Drei la Atr hne së hna huliwa kow, nge pine nemene matre easë a sine la kovasio?’ Troa mama laka easë a catre ngöne la ua, memine la thiina ka ijiji Akötresie qa ngöne la aqane cainöje së, me aqane ujë së, memine la aqane kapa madrine së la xeni ne ua. (Iak. 3:13; 1 Pet. 2:2, 3, 12) Kola öhne laka, ame la itre trejine ka xomihnine me melëne la itre macatre ne thinge me wathebone la huliwa ne cainöj, ke, angatr’a drenge hnyawa, me hetrenyi la metrötre ngöne la itre ijine kovasio, angatr’a lapa huti ngöne la itre göhnë i angatr, nge kola drenge me nyipiine la itre cainöj, me itre iamacany.
14 Tro La Aqane Heetre i Epun, Me Aqane Ele Ihe i Epun a Amamane La Pengöi Epun: Ame ngöne 1 Samuela 16:7, ke, easë hmaca a mekune laka “ame la atr’a wange la ka mama, ngo Iehova a wange la hni.” Qa ngöne lai, itre atr a waipengöi së hnene la hnei angatre hna öhne the së. Troa goeëne hnyawaane la aqane heetre së, me aqane ele ihe së, ngöne la easë a sine la kovasio göi troa atrunyi Akötresie, me göi troa kapa la ini thatraqane la mele ne la keresiano. E maine ketre thöthi epuni ka ini, maine ketre atr ka huliwa epuni memine la itre ka xötrethenge la itre tulu ne fen, ke, ma tha ka hmaloi kö koi epuni troa xötrethenge la itre tulu ne keresiano ka loi göi aqane heetr.
15 Tha ceitu kö la itre tulu ne aqane heetr, me ele ihe, ngöne la itre götrane la fene hnengödrai. Kola treqene thene la itre keresiano laka troa qahmihmi la aqane heetre i angatr, tro fe a heetre hnyawa. Drei la ka troa axeciëne lai? Troa thupëne hnene la itre keme me thine laka tha hnene kö la itre nekö i angatre thöthi hna heetre tune la itre thöthi ne fene ngöne uma ne ini. Hna hamëne la itre mekune celë matre troa xatua së troa thupëne la aqane ujë së ngöne la götrane cili. Kola upi së troa wange hmaca lo Réveillez-vous! ne 8 Février, 1987, ngöne lo hna cinyihane ka hape “Nemene koi epuni la aliene la itre heetr?” Nemene la hna öhne ngöne la itre xaa kovasio ne lo macatre hnapan?
16 Thuepene la kovasio ne distrik hna hape “Xoue Akötresie,” ke, hne së hna kapa la hna mekune celë: “Hnene la itre trejine hna catre inine troa heetre hnyawa, me ele ihe hnyawa, me thupëne la aqane ujë i angatre ngöne la kovasio ne macatre celë. . . . Ngo, hetrenyi palakö la itre xaa ewekë, me itre hna majemine nyine troa nuetrij.” Thupene la ketre kovasio, ke, hna cinyihane ka hape mama catre laka tha loi kö la aqane heetr. Nge kolo fe a qaja ka hape hna thixötre la itre atr hnene la aqane heetr hnei itre xan. Ame itre ka traqa qa trön, ke, hnei angatre hna öhne hnyawaane la aqane heetre i itre xan, hna fe amamane la itre imano i angatr, ame itre xan, ke, hmelele la ihetre i angatre matre mama hi la ngönetrei i angatr.
17 E maine itre qatre thup’a öhne laka itre xan’a heetre tune lai, ngöne la itre ijine ce elo, ke, ka loi e troa hamëne koi angatre la itre hnepe eamo ka ijij, me ahlëne la mekune qëmekene la ijine kovasio, laka, tha aqane hetre kö lai, pine laka kola troa sine la kovasio ne keresiano. Kola sipo epuni troa ce wange memine la itre ka ini Tusi Hmitrötre me epun, ka troa sine la kovasio, la itre mekune celë göne la aqane ujë, me heetr.
18 Hnalapa: E nöjei macatre, ke, tru la huliwa ne la itre trene hnalapa ne ikep. Troa hetre thangane ka loi kowe la itretre cainöje trootro e tro angatr’a ce wange memine la itre ka ini Tusi Hmitrötre me angatre la sine trongene la Huliwa ne Baselaia ne julai, 1994 göi hnalapa.
19 Kamera, Me Itre Aparei Nyine Arezistere: Ka ihmeku troa hamëne hmaca la itre mekune göi kamera, me itre aparei nyine arezistere. Kola sipo epuni troa mekune hmaca lo itre ithuemacany, e epuni a mekune troa xupi atr hnene la kamera, me itre aparei sine trongen, ke, loi e troa mekune la itre atr ka lapa ezi epun. E maine epuni a enije lapa e nyipine la icasikeu, maine epuni pena a arezistere qa ngöne la hnei epuni hna lapa, ke, tro lai a ajolëne la itre xane troa drenge hnywaane la itre hna qaja ngöne la ijine icasikeu. Hna wathebone troa saane la itre aparei ngöne la itre pirize hna hnëkëne thatraqane kö la kovasio, tune la itre hna hnëkëne thatraqane la sono, ketre tha loi pena kö tro la itre aparei a thungejëne la itre xaa atrene la asabele, ngöne la akawane lo itre icea, me ngöne la itre hnë tro. Isa qanyi së kö mekune troa huliwaane la itre aparei, ene la xomi foto, maine filime pena la ketre götrane la prorogaram, maine arezistere pena lo itre cainöj. Tro la itre foto, maine itre hna arezistere a amekunë së hmaca lo itre mekune ka tru, ngöne la easë a goeëne thupen. Loi e troa hmekëne la aqane huliwaan’itr’ej, ene laka tha tro kö a ajolëne la itre xan, maine tro pena a ajolë epuni troa öhnyi loi ne la porogaram. Thupene la epuni a bëeke koi hnalapa, ke, tro kö a hetre traeme i epuni troa wange hmaca la hnei epuni hna arezistere? Ma tro epuni a mekune laka tro hi epuni a xomi not.
20 Göhnë: Ngöne lo ijine kovasio ne distrik, 1994, lo hna hape “Xoue Akötresie,” hapeu, hna trongëne kö lo itre ithuemacanyi göne la troa canga ami göhnë? Hnei itre xane hna trongëne lai, ngo loi e tro palahi së a mekune la ithuemacanyi cili: TRO HMEKUJE HI A AMI GÖHNENE LA ITRE ATR NE LA FAMI EPUNI ME ITRE XAA ATR KA CE TRO ME EPUNI HUNE LA LOTO I EPUN. Easë a traqa ngöne la kovasio kösë hna könë së hnei Sasaiatri. Hna nyithupene la hnë kovasio hnene la itre ahnahna hna hamëne qa kuhu hni ne la itre trejin. Hawe, easë kö lai a amamane la ihnimi së, me imekunekeun, e easë a canga ami göhnë, nge tha mama kö koi së ka hape drei la ka troa lapaan?
21 E nöjei kovasio, hetre itre hna hnëkëne kö thatraqane la itre qatr, me itre sinatr. Kola sipo epun, tha tro kö a lapaane la itre icea hna hnëkëne thatraqai angatr, e itre ka egöcatre hi epun. Hawe, loi e tro epuni a hmek, e öhne hi epuni la kola aja ixatua hnene la ketre atr ka tuun, nge pëkö ka ce traqa memin, ke, xatua nyidrëti jë troa thele göhnë.
22 Hnëkëne Ju göi Xeni Kowe La Ijne Kovasio: Atre hë epuni jëne lo Huliwa ne Baselaia ne maac, 1995, ngöne lo sine trongen, laka hna qaja la kepine matre hna hamëne la itre hna amekötin, me hamëne la itre mekune göi aqane tro la nöjei atr a hnëkë nyine xen, me nyine iji koi kovasio. Loi e troa isa wange hmaca lo sine trongen, me ithahnataane memine la itre hnainine ngöne la angatr’a hnëkë troa sine la kovasio. Nyipiewekë catre troa ithuemacanyine la itre hnainine ka hape am’asë hi la itre ka sin, ke, tro angatr’a isa traqafë xen, me nyine iji ngöne la ijine kovasio.
23 E mekune hi së la itre xaa mekun, ke, hanawange la nyine troa traqafë ka ijije göi xen: itre nyine xeni ka loi kowe la ngönetrei, nge ka tha jole kö. Nge, ijije fe troa traqafë nyine ij, ene la kofi, maine nyine ij, tune la kokakola, maine iji zane wene sinö, maine tim, troa nenge koi teremos, maine koi ketre trengene ka tha kaqakaqa kö. E maine troa traqafë la galasiere ka co, ke, loi e ijije troa liin’eje e kuhu fene itre icea. Ngo, tha tro kö a traqa fë e hnine la uma ne kovasio, la itre galasiere ka tru thatraqai fami ka tru, me gorok, me trengene ka lepanyi ka tru. Tha tro kö a xeni ngöne la porogarame ne la kovasio. Kolo lai a amamane laka pëkö metrötre së kowe la xeni ne la ua hna hamëne koi së.
24 Loi e tro së a mekune hnyawaane laka hna nue koi së la hnepe hawa nyine tro së a xen, me porotrike me imadri memine la itre trejine me easë. Ame së, nöje i Iehova, ke, easë a wangatrehmekune laka ame la ka sisitria koi së, ke, ene la xeni ne la ua ngöne la kovasio, ngo tha ene kö la itre ewekë ne ngönetrei, nge loi e tro së a hnëkë thatraqane lai.
25 Kola nyiqaane la kovasio ne distrik “Itre aqane atrunyi Akötresie ngöne la madrin” e treu ogas, 1995. Ase hnyawa kö epuni hnëkë, nge xecie kö koi epuni troa sine la köni drai ne troa ce madrine me itre trejine me epun, me troa kapa la itre ewekë ka loi ne la ua? Eahuni a thithi koi Iehova matre troa amanathithine la itre aqane catre i epuni matre troa sine la kovasio celë, cememine la itre trejine me epun, me drenge hnyawaane la aqane troa atrunyi Iehova ngöne la madrin.
[Hna eköhagen götran 6]
Nyine Amekunë Së Göi Kovasio Ne Distrik
Bapataiso: Tro la itre tren’aja koi bapataiso a lapa ngöne la itre göhnë hna hnëkëne thatraqai angatr, qëmekene la kola nyiqaane la icasikeu e hmakanyi ne mecixen. Hna öhne hë, laka hetre itre ka traqa fë hnaheetre ka tha hmekune kö la ijine cili, qa ngöne lai, kola apuingazone la bapataiso. Celëhi matre, tro la nöjei tren’aja koi bapataiso a xome la itre iheetre ka ijije kowe la drai cili, me hnëkë itrawel. Thupene la cainöje ne bapataiso, me thith, ke, tro la perezida ne la sisio a qaja la itre hna amekötine kowe la itre ka troa xomi bapataiso, nge easë pë hë a ce nyima jë. Nge ngöne la xötre hna tixenuën, ke, tro la itre ka thupëne la icasikeu a trofë la itre ka thele bapataiso kowe la hnë bapataiso angatr. Ame la bapataiso, hatre ne la mele hne së hna isa hamën, isa easë casi kö me Iehova, celëhi matre tha meköti kö troa itrohmaeë me ie i wanakoimë hnei itre ka xomi bapataiso e kuhu hnine la tim.
Baj: Kola sipone matre troa isa athipe ngöne ihetre la itre baji hna hnëkëne koi macatre 1995, ngöne la ijine kovasio, me ngöne la easë a tro maine kola bëek. Celëhi ka troa nyijë së e itre xaa ijine troa qaja la maca ka loi e cahu gojeny. The thëthëhmine kö troa tro xome lo karte lo hna hape “Instructions médicales.” Tro fe la itre atrene la fami ne Bethela, memine la itre pionie a hetrenyi thei angatre lo itre karte nyine qejepengöi angatr.
Hnalapa: Tro la itre seketere ne la itre ekalesia a akötrehnine troa canga iupifë lo itre pepa ne sipo hnalapa, me thue hnalapa, ngöne lai aderesi ne lai kovasio. E maine hetre ka troa thipëne hmaca la hnalapa hna hamëne hnene la atrekë qane la hamë hnalapa, ke, canga thuemacanyine jë matre troa nue pena la hnalapa koi itre xan.
Itre Nyine Uku Medreng, Me Itre Icea Nyine Sa: Hna wathebone troa traqafë la itre nyine uku medrenge ngöne la itre hnë icasikeu ka tru. Hnene la angetrekë hnëqane la sekirite hna wathebone troa amë itr’eje nyipine la itre kuloar, itre cane uma trootro, maine akawane la hnënge icea. Ejehi laka, e troa ipepetrenyi la ka alanyim, ke, troa eatre hnene la itre nyine uku medreng, tha koi itre medrenge casi kö, ngo kowe fe la ketre atr troa kei hnen. Hawe, kola sipo epuni matre tha tro kö a traqafë itr’ej ngöne la hnë kovasio. Ngo, tha hna wathebone kö lo nekö i cea i nekönatr, pine laka ijije tro la itre keme me thin’a ati nyëne hune icea ezi angatr. Kolo fe a sipo epuni laka, tha tro kö a traqafë lo itre icea nyine sa. Troa eatre hnen’ej, nge troa ipepetrenyi la itre atr. Kola olene la hnei epuni hna ixatuanekeun.
Serevis Voloter: Hetre hnepe ijine i epuni kö troa ixatua ngöne la ketre serevis, e ijine kovasio? E hne së hna huliwa kowe la itre trejin, ngacama itre hnepe hawa ka co hi la hne së hna atreine hamën, ke, ijije troa hetre madrine së qa ngön. E maine epuni a ajane troa ixatua, ke, kola sipo epuni troa thuemacane la serevis voloter, ngöne hna kovasio. Ijije tro fe la itre nekönatre ka tha 16 petrekö lao macatre a hane ixatua, ngo tro pe nyudreni a ce huliwa me ketre atrene kö la fami, maine keme me thin, maine ketre ka nyipi atr hë.
Itre Nyine Troa Hmekën: E tro së a hmekëne la itre jole qëmekene tro itr’ej’a traqa, ke, easë hë lai a neëne itr’ej. Ame itre xaa ijin, hna ënö la itre ewekë ne lo itre atr ka tha majemine kö mele ngöne la itre götrane hna jilapaane hnei itre ka huliwa menu. Celëhi matre kola thuemacanyi nyipunie göi itre loto; tro palahi a kiine la itre qëhnelö ne loto, nge tha tro pi kö a amë amamane la ketre ewekë hna piine hnei atr. Ame ngöne la nöjei icasikeu ka tru, ke, kolo hi lo ijine hnene lo itre ka iwanakoime menu hna iëne troa kuca la itre mekune i angatr. Ketre, tha loi kö troa amë menune la itre mo ka tru thupene hune la itre icea. Pine laka ame la itre ka lapa ezi së, ke, tha itre hne së kö hna atre, ame itre xan, tha itre keresiano kö angatr.