Kovasio Ne Distrik 1994, Lo Hna Hape “La crainte pieuse”

¹ Qane lo hneijine i Abela me Noa, nyimu atr lapaun, ka amamane la “qou” i angatr. (Héb. 11:4, 7.) Ame la qou, ke, ene la “troa metrötrëne me atrun, memine la hni ka pexej, la Atre xupi së, nge pëkö troa kuca la ketre ewekë nyine akötrë Nyidrë”. (ad g. 343.) Ame e treu Ogas, ke, tro së a amamane la aqane nyipi atrune së la hmi, ene la tro së a sine la kovasio ne distrik “La crainte pieuse”. Hapeu, tro kö së a sin’asë la kovasio, qaane la nyima ne nyiqaane utihë la thithi ne nyipun?

² E nöjei macatre, ka tru palahi la madrine së troa lapa treqene la kovasio ne distrik. Ame la tro së a sine la itre drai cili, ke, nyipici troa tru la itre ewekë nyine tro së a itön, nge tro së a catr, ke, hetre itre nyine troa kuca, ngo ame pe, ke, tru catre la itre manathithe hne së hna kapa qa ngön. Easë a isa bëeke kowe la itre hnalapa cememine la madrin, nge hna acatrenyi së ngöne la ua. (Goeëne ju 1 Ite joxu 8:66.) Tru catre la ixatua qa ngöne la hna ce lapa memine la itre trejin, nge kola ajuine la ihnimi së koi Akötresie. Ngo tha tro kö së a thëthëhmine laka easë a itrohnyi matre troa atrunyi Iehova. Nyidrëti la ka upi së troa icasikeu, nge nyidrëti la ka ini së troa kapa la itre manathith. — Deut. 31:12, 13; Sal. 122:1.

³ Kovasio ka köni drai: Ame la macatre celë, ke, troa hnene la kovasio e Numea, qaane e drai 26 koi 28 ogas, 1994.

⁴ Troa nyiqaane la kovasio e drai ka tru, e 10 h 20, nge troa nyipune e sabath, e 16 h 15. Ame mecixeni me sabath, ke, troa nyiqaane e 9 h 30. Kola nyiqaane fe la itre qënehlö e 7 h 30 koi nöjei atr. Qëmekene lai hawa cili, tro hmekuje hi a lö lo itre trene hnëqa.

⁵ Hnene la etrune la aqane atrunyi Iehova hne së hna upi së troa hane sin: Hnei Paulo hna eamone la itre keresiano troa “nyi hlue madi Akötesie memine la metöte me qou.” (Héb. 12:28.) Hna hnëkëne la kovasio matre xatua së troa trongëne la itre hna eamone celë. Maine jë troa traqa koi së la itre jole ka troa tupathi së matre thunge jëne la aja së troa hane sine la kovasio. Ngacama, tro la itre itupathi a ceitu me itre wetr, ngo tro la ixatua qa thei Iehova a aijijë së troa hun. (Mata. 17:20). Maine epuni a wange ka hape tha ijiji epuni kö troa xomi drai ne mano matre troa sin’asë la kovasio, qaane e drai ka tru utihë e sabathi e hnëipajö, ke, hapeu, hnei epuni kö hna pane sipo drai ne mano kowe la maseta i epun, me pane thithi fë koi Iehova (Iako. 1:6-8)?

⁶ Loi e tro së a öhnyi loi qa ngöne la itre hne së hna huliwa: Nemene la itre hne së hna huliwa, la hna qaja celë? Ene la traeme me trenge catre hne së hna huliwaane matre ijiji së troa sine la kovasio. Troa gufa la itre hne së hna hnëkë troa sine la kovasio, e tro së a bëeke kowe la hnalapa së e heji ne sabath, nge hne së hna triane la ketre götrane ka tru ne la porogaram. Mekune hnyawa ju ka hape, hapeu, loi kö la troa mejë trije la ketre xeni ka tru matre troa kuca la ketre huliwa kö hne së hna ajan? Maine itre atr së ka macaje ngöne la ua me ka amamane la qoue Akötresie, ejehi laka tha ijiji së kö troa triane la itre ewekë hnei nyidrëti hna hnëkëne koi së. — Wange ju la 1 Korinito 2:9, 10.

⁷ Nge ketre mina fe, tha tro kö së a mekune troa lö trije la asabele qëmekene la itre pune icasikeu, maine e hmakany, maine e hej. Ngo ame pe, hetre ketre aqane tro së a triane la götrane ka tru ne la icasikeu. Qa ngöne nemen? E tha hne së kö hna hnëkë hnyawa, thatreine kö troa kapa la thangane ka loi qa ngöne la porogaram. Qa ngöne lai, loi e troa canga hlë e hmakanyi troa iji kofi hnyawa, me kuca la itre xaa jole ka nyipiewekë, matre ijiji së troa canga traqa kowe la hna icasikeu, matre e nyiqaane pë hë, ke, easë hë a isa lapa ngöne itre göhne së. Loi mina fe troa canga meköl, matre maca hnyawa la mekune së troa drenge hnyawane la porogarame ne la drai.

⁸ Tro së a öhnyi thangane ka loi ne la icasikeu, e hne së hna xome hnyawa la itre not, ene la troa fejane la itre hnepe mekune ka nyipiewekë. Tha tro kö a kuca hnene la itre thöthi hmekujehi, ngo memine fe la itre thupëtresij. Kola qaja hnene la ketre jajinyi ka cainöje hë ka 16 lao macatre ka hape: “Eni a cinyihane la itre mekene tusi hnenge hna drenge ngöne la kola cainöj. Ixatua ka sisitria koi ni la itre mekene tusi cili matre tro ni a wange hmaca e koilo hnalapa.” Hnene fe la ketre thöthe ka 16 lao macatre hna qaja ka hape: “Eni a cinyihane la itre mekune ka tru matre tro palahi a hlë la mekuneng.” Ame hi la hne së hna troa xome kowe la hna icasikeu, ke, Tusi Hmitrötr, ca nyima, me ca ipepa ne xomi note tha ka tru menu kö, ca peenisel, maine esitilo. Nyipiewekë tro la itre keme me thine trene nekönatr’a hnëkëne thatraqai angatre la ka ijij, ngo tha loi kö e troa ajolë së maine ajolëne la itre xane hnene la itre ewekë hne së hna traqa fë, tune la troa traqafë igalasiere ka tru, me itre xaa ewekë së ju kö.

⁹ Hnene la itre trejine hna xome hnine la itre aparei angatre lo itre cainöj, maine hna videone pena la porogaramene la kovasio matre tro hmaca angatr’a drenge me goeëne e koilo hnalapa i angatr. Loi pe, isa qanyi së kö, ngo hna wangatrehmekune hë laka, ame lo kola bëeke kowe la isa hna huliwa, ke, pë kö ijine troa drenge lo lai itre cainöje hne së hna xom, maine tro pena a wange lo hna videon. Ame fe la ketre ejolen, ke, ngöne la ijine easë a thele troa kiine amekötiine lo aparei, ke, itre traeme ne easë hi lai a triane lo itre mekune ka sisitria hna cainöjën.

¹⁰ Loi e tro së a canga lapa qëmekene la kola nyiqaane la sesio. Ngacama easë a ihmadri memine la itre sine së me itre hne së hna imajemikeu memine ekö, ngo ame la kola cile hnene la perezida me hape kola ha nyiqaan, ke, loi e tro së a metrötrëne la itre trene hnëqa, me metrötrëne la nöjei trejin’asë, ene la troa afenesine la itre porotrike së me troa lapa ngöne la göhnë së.

¹¹ Ame la itre kovasio ne distrik, ke, itre ijine madrine palahi pine laka kola mana la itre manathithi qa thei Iehova, itre ewekë ka loi thatraqane la ua me kowe fe la ngönetrei.

¹² Hapeu, ijije kö troa qaja aloine la aqane ujë i epun? E nöjei macatre, ke, hnene la Huliwa ne Baselaia hna amexeje hnyawa la itre mekune ka ijije thatraqane la aqane ujë së, ngöne la hna kovasio ne distrik. Ejehi laka, loi e tro palahi së a amamai tulu ka loi qa ngöne la thina së, ngo ngöne la easë a icasikeu memine la ka alanyim, ke, tro la itre atr ne trön’a wai gele së. Angatre lai a troa wai pengö së qa ngöne la aqane ujë së, maine ka loi maine ka ngazo pena, ke, sisitria kö la hna amamane hnene la thina së hune la troa cainöj. Loi e tro palahi la itre trenge ewekë së me itre huliwa së a atrunyi Iehova. — Ite Edo. 27:2; 1 Peteru 2:12.

¹³ Thupene la asabele ne distrik ne lo macatre hnapan, lo hna hape “L’enseignement divin,” ke, hna qaja hnene la ketre ka thupë otel ka hape: “Qea catre hë la hnenge hna tha öhne la emanane thöthe ka mingöming.” Nge, thupene la hna qaja angazone la aqane ujë, memine la aqane thi ewekë ne la itre thöthi e cahu trön, ke, nyidrëti a qeje itre temoë thöthe ka hape: “Ka loi la aqane ujë i angatr; nge hetre madrinenge troa ithahnata me angatr. Maine hna tune ju fe hnene la itre xaa ka icasikeu! ”

¹⁴ Hnene la ketre atr cinyihane hna qaja göne la ketre asabele, kola hape: “Ka lolo la hna heetre hnene la itre föe me jajinyi; nge hna kootre me ami kala hnene la itre trahmany, me itre nekö trahmany. Angatr’a xomi not, me drenge hnyawane la itre ka cilefë cainöje, ngöne lo foa lao drai ne la asabele. Maine nyipici laka, lue ka ce tro la hna nyidrawa memine la thina ka ijiji Akötresi, ke, sisitria catre la aqane amamane hnene la itre temoë i Iehova.” Tha nöjei icasikeu asë kö la hna selëne tune la.

¹⁵ Tha hna lapa hnyawa kö hnene la itre nekönatre ngöne la hna icasikeu, angatr’a nyimejene pine laka pëkö ka tru ka thupë angatr.

¹⁶ Hna wangatrehmekune hë laka tru catre la itre ka tro agö e nyipine la itre icasikeu e hmakanyi maine hnaipajö pena. Alanyimu la itre atr (tru hi la nekönatr) ngöne la itre kuloar, lo mecixeni hnaipajö, nyine amamane lai koi itre keme me thine ka hape nyipiewekë troa hajine hnyawane la itre nekönatre me thupë angatre hnyawa. Tru fe la mejene la itre atr ka majemine cile agö ngöne la itre kuloar, matre kola ajolëne la itre atr troa drenge la itre hna qaja ngöne la icasikeu. Nyipici itretre nyipi jole i itre xan, nge itre ka ijije hi lai troa cile nyipine la icasikeu matre ijiji angatre troa aeatrëne la itre götrane qa i angatr. Ngo ame ju pë hë la munën, ke, hapeu tha angatre kö lo a traqa me lapa ngöne la itre göhne i angatre matre ijije troa drenge hnyawaane la itre hna cainöjën?

¹⁷ Ame la nöjei icasikeu ne la ekalesia, ke, alanyimu la itre keme me thine ka thupëne hnyawaane la itre nekö i angatr. Hawe, hnauëne laka tha xötrethenge kö la tulu cili, ene la troa thupëne matre tha tro kö la itre nekönatr’a nyenyapëne la itre kuloar? Loi e tro palahi la itre nekönatr’a lapa ezi keme me thin. Nyipici, ka tru la uma ne kovasio, kösë ketre uma ne Baselaia atraqatr, ngo tha tro kö së a thëthëhmine laka, easë palahi e hnine la fene i Satana; qa ngöne lai, ame lo itre atr ka ngazo thina, ke, ijije tro fe angatr’a hane lö fë la itre mekune i angatre ka ngazo. NYIPIEWEKË TROA ATRE HNYAWA PALAHI LA HNA TRO KOW HNENE LA ITRE NEKÖNATRE MEMINE LA HNEI ANGATRE HNA KUCA.

¹⁸ Aqane heetre me kuci ihe: Hna wangatrehmekune enehila ngöne la itre hnedrai së laka hna kapa la aqane heetre qene hmo, memine la dro itrei. Hna amamane hnene lo hna qejepengöne ngöne lo paragarafe 14 ka hape hetre itre atr ka ajane palakö troa wange la itre ka nyihnyawaane la ngönetrei angatre me aqane heetre ka ijije kowe la atr ka hmi. E tro së a heetre qene hmo maine tro pena a tha nyidrawaane la ngönetrei së, ke, kolo lai a sipu amamai së. Ngacama easë ngöne la itre uma ne kuci elo, ngo e kola hnen e cili la kovasio, ke, troa xome ceitune la göhnë cili, me uma ne Baselaia. Ame itre xan, ke, ka heetre ngöne la tulu thatraqane la kovasio, ngo, e thupene la icasikeu, ke, ketre pengöne hë la aqane heetre i angatr, ase hë sasaithe la aqane heetre i atr ka hmi.

¹⁹ Tro la itre tren’aja kowe la bapataiso a mekune hnyawane laka, ngöne la ijine cili, ke, tha meköti kö troa hetrëne lo itre iheetre ne lapa hnangöni. Loi e troa qahmihmi la aqane heetre i angatr. Drei la ka troa ithuemacanyine lai? Tro la itre qatre thup’a wange hnyawa matre tha tro kö la itre tren’aja koi bapataiso ngöne la ekalesia a kuca la ketre ewekë nyine troa iathixötrë. (2 Kor. 6:3, 4). Tha loi kö troa heetrëne la itre hna heetre ne si ka lailai, maine ka amamai ngönetrei, me itre inunu hna cinyihane la itre mekune ne la fen, maine nyine kuci pibilisite. Loi e tro la itre qatre thup’a ithahnataane la mekune celë memine la itre tren’aja, ngöne la kola ce wange me angatre la itre hnyinge e hnine la itus Notre ministère.

²⁰ Hnalapa: Loi e tro së a imekunekeune la easë a troa lapa thene la itre trejine me easë. Tro palahi së a amamane o’ijine la wene ne la ua. Mekune hnyawan ju së laka troa hetre ixatua së kowe la itre fami hne së hna lapa then, matre tha tro kö a xanadrone la itre hnei angatre hna hnëkëne koi së. Nyipiewekë catre troa pane wai ijine troa xome la itre hnepe traeme ka ijije matre wange hmaca lo hna cinyihane göi ihnimi trehnyiwa, ngöne lo La Tour de Garde ne 15 semitrepa, macatre 1975, götrane 551.

²¹ Göi itre aparei: Tune lo hne së hna ce wange hë, isa qanyi së kö mekune göi troa huliwaane la itre aparei nyine xome lo itre cainöj, maine tro pena videone la porogaramene la kovasio. Maine easë a ajane troa kuca itr’ej, ke, loi e tro së a mekune fe la itre ka lapa ezi së. Ngacama easë a kuca lapaane ngöne isa göhne së, ngo wange ju pe ka hape tha kolo kö lai a ajolëne la itre xan. Tha loi kö tro së a thungejëne la itre xaa atrene la asabele, ngöne la easë a filime la porogaram. Nge, wathebo troa saane la itre aparei së ngöne la itre pirize hna hnëkëne thatraqane kö la kovasio, tune la itre hna hnëkëne thatraqane la sono, ketre tha loi pena kö e troa cile agö akawane lo itre icea, lo itre hnë tro, maine kuloare pena.

²² Göhnë: Loi palahi e troa amamane hnyawane la itre ejolene la ami göhnë. Eahuni hmaca enehila a ajane troa amekunë epuni ka hape: TRO HMEKUJE HI A AMI GÖHNENE LA ITRE ATR NE LA FAMI EPUNI ME ITRE XAA ATR KA CE TRO ME EPUNI HUNE LA LOTO I EPUN. Alanyimu la ka ami göhnë, ngo tha lapaane pena kö ngöne la ijine icasikeu. Ngacama, hna kuca palahi la itre ithuemacany, ngo tha paatre palakö la thina cili. Hapeu, hane fe kö së hane wai pengö së ngöne la götrane cili, me lapa mekune la tulu ne meköti hna cinyihane ngöne Filipi 2:3, 4?

²³ E nöjei asabele, hetre itre göhnë kö hna hnëkëne thatraqane la itre ka hetre kucakuca, tun lo itre qatre me qatre föe me itre sinaatr, ene lo itre ka ti ikaatr. Kola sipo epuni laka tha tro kö a lapaane la itre göhnë hna amë koi angatr. E maine angatr’a traqa cas, ke, loi e tro epuni a canga xatua angatre troa wange la göhnë.

²⁴ Itre itusi me itre ka hnëkë xen: Ame ngöne la hna kovasio ne distrik, ke, hnë tro së a xeni mana thatraqane la ngönetrei, memine fe la ua. Loi e tro së a kapa itr’eje ce memine la ole, nge pëkö hna troa xanadron. (2 A. l. ite jo. 31:10; Ite Edo. 3:10; Ioane 6:12).

²⁵ Troa nyiqaane la pane kovasio ne distrik lo hna hape “La crainte pieuse” e drai 26 ogas 1994. Hapeu, hnëkë hë epuni matre ijiji epuni troa sin’asë la köni drai ne ce madrine memine la itre trejin, me kapa fe la itre xaa ewekë ka loi thatraqane la ua? Eahuni a ajane me thithi fë koi Iehova, tro nyidrëti a amanathithine la itre huliwa hnei epuni hna kuca thatraqane la troa sine la kovasio ne distrik “La crainte pieuse,” me troa kapa la itre xeni ka loi ngöne la laulau i Iehova.

[Hna eköhagen götran 6]

Nyine amekunë së göi Asabele ne distrik

Bapataiso: Tro la itre tren’aja koi bapataiso a lapa ngöne la itre göhnë hna hnëkëne thatraqai angatr, qëmekene la kola nyiqaane la icasikeu e hmakanyi ne mecixen. Hna öhne hë laka, hetre itre ka traqa fë hnaheetre ka tha hmekune kö la ijine cili, qa ngöne lai, kola apuingazone la bapataiso. Celëhi matre, tro la nöjei tren’aja koi bapataiso a xome la itre iheetre ka ijije kowe la drai cili, nge ca itrawel. Thupene la cainöje ne bapataiso, me thith, ke, tro la perezida ne la sesio a qaja la itre hna amekötine kowe la itre ka troa xomi bapataiso, nge easë pë hë a ce nyima jë. Nge ngöne la xötre hna tixenuën, ke, tro la itre ka thupëne la icasikeu a trofë la itre ka thele bapataiso kowe la hnë bapataiso angatr. Ame la bapataiso, hatrene la mele hne së hna isa hamën, isa easë casi kö me Iehova, celëhi matre tha meköti kö troa itrohmaeë me ie i wanakoimë hnei itre ka xomi bapataiso e kuhu hnine la tim.

Baj: Kola sipone matre troa isa athipe ngöne ihetre la itre baji hna hnëkëne koi macatre 1994, ngöne la ijine kovasio, me ngöne la easë a tro maine kola bëek, celëhi ka troa nyijë së e itre xaa ijine troa qaja la maca ka loi e cahu gojeny. Tro epuni a isa xomi baji ngöne la itre ekalesia i epun, pine laka pëkö baji hna troa hamëne e ijine kovasio. The thëthëhmine fe kö troa tro xome lo karte lo hna hape “Instruc­tions médicales”. Tro fe la itre atrene la fami ne Bethel, memine la itre pionie a hetrenyi thei angatre lo itre karte nyine qeje pengöi angatr.

Hnalapa: Eahuni hmaca a sipo epuni troa hetre ixatua kowe la atrekë qane la troa ami atr ngöne itre hnalapa. MAINE HETRE EWEKË KA JOLE KOI EPUN, ke, loi e tro epuni a canga thuemacane la atre thupëne la hulliwa ne ami atr ngöne hnalapa ngöne la ijine kovasio, matre xatua epuni troa canga seijolen. Tro la itre seketere ne la itre ekalesia a akötrehnine troa canga iupifë lo itre pepa ne sipo hnalapa, me thue hnalapa, ngöne lai aderesi ne lai kovasio. Maine hetre ka troa thipëne hmaca la hnalapa hna hamëne hnene la atrekë qane la hamë hnalapa, ke, canga thuemacanyine jë matre troa nue pena la hnalapa koi itre xan.

Itre nyine uku medreng: Hna wathebone troa traqafë la itre nyine uku medreng, ngöne la itre hna icasikeu ka tru. Hnei itretre atrekë hnëqane la sekirite hna wathebone troa amë itr’eje nyipine la itre kuloar, itre cane uma trootro, maine akawane la hnënge icea. Ejehi laka, e troa epepetrenyi la ka alanyim, ke, troa eatre hnene la itre nyine uku medreng, tha koi itre medrenge casi kö, ngo kowe fe la ketre atr troa kei hnen. Hawe, kola sipo epuni matre tha tro kö a traqafë ngöne la hnë kovasio. Ngo, tha hna wathebone kö lo nekö i cea i nekönatr, pine laka ijije tro la itre keme me thin’a ati nyëne hune icea ezi angatr. Kola olene la hnei epuni hna ixatuanekeun.

Serevis voloter: Hetre hnepe ijine i epuni kö troa ixatua ngöne la ketre serevis, e ijine kovasio? Loi e tro së a thue ixatua, nge ijije troa hetre madrine së qa ngön, e hne së hna huliwa kowe la itre trejin, ngacama itre hnepe hawa ka co hi la hne së hna atreine hamën. Maine epuni a ajane troa ixatua, ke, kola sipo epuni troa thuemacane la serevis voloter, ngöne hna kovasio. Ijije tro fe la itre nekönatre ka tha 16 petrekö lao macatre a hane ixatua, ngo tro pe nyudreni a ce huliwa me ketre atrene kö la fami, maine keme maine thin, maine ketre ka nyipi atr hë.

Itre nyine troa hmekën: E tro së a canga hmekëne la itre jole qëmekene tro itr’ej’a traqa, ke, easë hë lai a neën, wanga thaxöji së hnene itr’ej. Ame itre xaa ijin, hna ënö la itre ewekë ne lo itre atr ka tha majemine kö mel, ngöne la itre götrane hna jilapaane hnei itre ka majemine huliwa menu. Celëhi matre kola thuemacanyi nyipunie göi itre loto; tro palahi a kiine la itre qëhnelö ne loto, nge tha tro pi kö a amë amamane la ketre ewekë hna piine hnei atr. Ame ngöne la nöjei icasikeu ka tru, ke, kolo hi lo ijine hnene lo itre ka iwanakoime menu hna iëne troa kuca la itre mekune i angatr. Ketre tha tro kö a amë menune la itre mo ka tru thupene hune la itre icea. Pine laka, ame la itre ka lapa ezi së, ke, tha itre hne së asë kö hna atre, ame itre xan, tha itre keresiano kö angatr. ISA THUPË NEKÖNE PALAHI.