Itre Kovasio Ne Distrik 1999 “Itre Ewekë Hna Thingehnaeane Hnei Akötresie”
1 Ame ngöne la kola troa lö hnei angetre Isaraela ngöne la nöje hna thingehnaean, hnei Mose hna xëwe koi angatre troa kapa la ini qaathei Akötresie. Öni nyidrë koi angatre ka hape: “Tha ewekë ka maloe kö lai koi nyipunie, ke, mele i nyipunie lai.” (Deut. 32:45-47) Hapeu, easë kö a hane amamane la ole së koi Iehova, qa ngöne laka, Nyidrëti a wangatrune la mele së, me eatrongë së pala hi jëne la Wesi Ula i Nyidrë ka lolo? Qa ngöne lai, loi e tro së a canga mekune la köni drai ne asabele ne Distrik “Itre Ewekë Hna Thingehnaeane Hnei Akötresie,” memine la itre hnei Nyidrëti hna hnëkëne koi së.
2 Ame ngöne la macatre celë, hna hnëkëne la köni kovasio ne distrik ngöne la itre götrane hna elemekene hnene la Bethela. Troa pane kuca la hnapane e Luganville, Santo, ngöne la 13 koi 15 Ogas 1999. Troa kuca la Kovasio qene Tas. Ame pena ha e 3-5 me 10-12 Semitrepa, troa kuca la lue kovasio e Nouméa qene faras ngöne la Uma Ne Asabele ne Normandie. Ase hë isa thuemacanyi së la asabele hna hë së troa hane sin.
3 Ase jë hë së hnëkë matre troa hane sine la nöjei drai ne la kovasio, ke, atre hi së laka, Iehova a ajane tro së a hane sine itre ej. Loi e troa xecie e kuhu hni së laka, Nyidrëti a öhne la trenge catre hna kuca hnene la itre trejine memine la aqane hujëne angatre la mele i angatr, matre troa hane sine la kovasio, nge Nyidrëti a wangatrune hnyawa lai. (Heb. 6:10) Easë a amamane koi Iehova laka, easë a wangatrune la trenge ewekë i Nyidrë, ngöne la easë a canga traqa ngöne la nöjei drai ne asabele, matre troa ce nyiqaane itre eje hnene la nyima me nyipune hnene la thith. (Deut. 4:10) Easë mina fe lai a amamane la ole së kowe la itre trejine me easë ka catre huliwa matre troa hnëkëne la kovasio.
4 Ame la troa icasikeune la nöje i Iehova, itre thauzan, jëne la itre kovasio, thaa huliwa ka hmaloi kö; nyipi ewekë troa canga hnëkë hnene la itre atrekë hnëqan, nge loi e troa elemekene hnyawa matre thaa tro kö a isazikeu la itre mekun. Ame la easë a atre la aqane hnëkëne hnyawa ngöne la ihnimi la itre kovasio, haawe, tro fe hë a hane upi së troa hane ce huliwa, ene pe “kuca alolone jë me amekötine la nöjei ewekë asë.” (1 Kor. 14:40) Hna hnëkëne la ithuemacanyi celë memine la itre nyine amekunë së, matre tro së a traqa kowe la hna kovasio, nge hna hnëkë së hnyawa ha troa kapa la xeni ne la ua me ce madrine memine la itre trejine me easë.
Qëmekene La Kovasio
5 Hapeue fe la itre hne së hna ini tusi kow, me itre xaa atr ju kö ka drei së, angatre kö a ajane tro së a xatua angatre troa hane sine la asabele? Nyipi ewekë la hnei angatre hna troa goeëne me dreng, pine laka, kola troa upi angatre troa itretre nyihluei Iehova. (1 Kor. 14:25) Loi e troa mekune hnyawa hnene la itre qatre thupe la itre ka aja ixatua, maine göi uma, maine göi gojenyi pena; troa wange hnyawa la itre atrene la ekalesia ka qatre hë, me thele la aqane troa hamë ixatua koi angatr, cememine la ihnim.—Gal. 6:10.
6 Hapeu, ase hë epuni pune axeciëne la itre nyine troa kuca? Maine epuni a troa lapa thene la itre xaa hnepe lapa, haawe, loi e tro epuni kapa la hna amekötine koi epuni hnene la angetrekë hnëqa ne la ithue uma e ijine asabele. Thenge la itre pepa ne sipo uma hna kapa hnene la Kometr ne huliwa ne la ekalesia, haawe, loi e troa iupi fë itre eje hnene la seketere ne la ekalesia kowe la hnalapa ne la atrekë hnëqa ne la troa thele uma göi asabele. Maine ase hë hamë sa i epun, ngo epuni hmaca a ajane troa nue, haawe, loi e troa canga thuemacane la atrekë hnëqa ne la thele uma, matre troa nyi göhnene la itre xan. Nyipi ewekë troa canga iatrene memine la sa i epun, göi ijine troa traqa, me hnë troa itrothei.
7 Troa hetrenyi thene la seketere ne la ekalesia la hna lapa me numero ne telefone ne la atrekë hnëqane troa hamë sa. Maine epuni a aja ithuemacanyi göi kovasio, loi e troa hnyingëne kowe la seketere ne la ekalesia.
8 Loi e troa isa xomi drösinöen, pine laka, hna hnëkëne hmekuje hi la hnë pane inyië ngöne la hnë asabele, thatraqane la itre eatre me meci ka ngazo catre pala ha. Maine hetrenyi epuni maine ketre atr pena hnei epuni hna atre hnyawa, la itre sine mec, tune la meci ne wenethëhmi, me diabète, maine itre xaa meci ka tru ju kö, haawe, loi e tro epuni a isa xometrongëne la itre drösinöe hnei epuni hna majemine xom, maine ngöne la hnalapa, maine ngöne lo epuni a tro kowe la ketre nöj. Ka loi e troa ce tro hnyawa hnene la ketre atrene la hnepe lapa, maine ketre sinee pena ka atrepengöne la meci ne lai atr, matre thaa jole e troa hamë ixatua, e traqa ju la meci kowe lai atr ngöne la ijine icasikeu.
9 Loi e troa thele troa cainöje kowe la itre atr hna iöhnyi memin, ngöne la kola tro kowe la hna kovasio, me ngöne la kola bëeke hmaca. Hapeu, ijije kö tro së a hane hnekë matre troa ce thawa la nyipici memine la itre xaa atr? Qaane ju hi la ka tru uti fe hë la itre nekönatr, loi e tro asë hi së a hane tro fë la itre tarak kowe la itre atr ka huliwa ngöne isaas, me itre xane ju kö hne së hna iöhnyi memine ngöne la hne së hna tro. Troa nyimutre catre la itre ijine troa hamë zonal, me boroshür, maine itre xaa itusi pena kowe la itre ka drei së. Loi e tro së a hnëkë hnyawa matre troa hane ketr lo itre atr, ka paatre pala pe hi ngöne lo easë a lapaa cainöje ngöne itre hnalapa trootro.
Ngöne La Ijine Kovasio
10 Troa fe la itre qëhnelö ne la hna kovasio, e 8 h e hmakany. Troa masua icea hmekuje hi thatraqane la sipu hnepe lapa së, maine itre atr ka ce ti loto me easë. Thatreine kö troa nyi göhnene pe kö ngöne la ketre hnahag, lo itre trene sine mec, maine itre ka ifehehe. Thaa tro kö së a thëthëhmine la itre ewekë së, ngöne la easë a tro trije la hna kovasio.
11 Pine laka, easë a troa traqa ala nyimu kowe la hnë kovasio, haawe, nyipi ewekë tro së a metrötrëne la itre wathebo hna acile hnei musi göi gojeny, me itre xaa hna amekötine ju kö matre thaa tro kö a eatre menu. Hna wathebone troa traqa fë la itre nyine uku medrenge ngöne la itre hnë icasikeu ka tru. Hnene la angetrekë hnëqane la sekirite hna wathebone troa amë itre eje nyipine la itre kuloar, me ngöne la itre cane uma trootro, maine akawane pena la itre icea, wanga hetre ka eatre jë qa ngön. Ngo thaa hna wathebone kö la neköi cea i nekönatr, pine laka ijije tro la itre keme me thine a ati nyëne hune icea ezi angatr.
12 Hapeu, epuni a troa hane xome la bapataiso ngöne la ijine kovasio ne distrik? Troa canga masuane hnene la itre trejine ngöne la hmakanyi ne mecixen, la itre pane icea thatraqane la itre ka troa xome la bapataiso, nge tro angatre a ami epuni ngöne la itre göhnë cili. Maine ijij, kola sipone matre tro epuni a canga lapane itre ej, qëmekene la troa nyiqaane la icasikeu. Mekune kö la Tusi Hmitrötre i epun, me nyima, me itrawel, me hna heetre nyine si. Thaa loi kö e troa xötrë sine trauzizi ka xoxopatre menu pala ha, me xetrë inunu hna cinyihan, me itre xaa aqane heetre ju kö ka pëkö hni ne metrötre kowe la ewekë ka hmitrötre hna troa kuca. Loi e troa xecie hnyawa kowe la itre qatre thup, ngöne la angatre a ce wange memine la itre ka thele bapataiso, la itre hnying e hnine la itus, Notre ministère, laka, trotrohnine hnyawa angatre la itre mekune cili. Pine laka, ame la bapataiso, ke, celë hi hatrene la mel hne së hna nue koi Iehova, haawe, thaa loi kö e tro la itre ka bapataiso a ihnaiapë.
13 Thaa hna wathebone kö tro së a xomi foto, me kamera, ikaho kowe la hnë kovasio. Loi e thaa tro kö itre eje a thungi jë së, me sewe së troa goeëne me drenge hnyawa la itre cainöj. Thaa tro kö a huliwane la tirisite me ikaho ne la hna asabele.
14 Hnei Sasaiatri hna hnëkëne la hnepe xeni thatraqane la itre ka sine la kovasio, matre hmaloi nge thaa jole e troa eatrëne la itre hawa ne xeji icasikeu hmaca. Hna qaja aloine hnene la itre trejine la aqane huliwa ka hmaloi celë, ngöne laka, hetre ijine troa pane mano, nge itre hnepe hawa ka ijije troa pane porotrike memine la itre trejine me angatr. Atreine hi tro së a canga xome amë la itre trikitre göi xomi xen, ke hna iupi fë hë itre eje qëmekene la ijine kovasio kowe la itre ekalesia së.
15 Hapeu, ijije fe kö tro epuni a hane ixatua troa nyidrawane la uma ne Baselaia, ngöne la nöjei drai ne umu asabele? Maine pena troa hane saene kowe la itre xaa götrane huliwa thatraqane la kovasio? Tune lo hna kuca lo macatre hnapan, troa hnëkëne hnene la itretre thupe la itre gurupe ngöne la isa ekalesia i angatr, nge troa canga hamëne itre eje kowe la service volontaire, itre drai qëmekene la ijine kovasio. Ngo maine hna thëthëhmine pë hë la ëje i epun, nge epuni a ajane troa ixatua, haawe, loi e troa wange mekötine la service volontaire ngöne la ijine kovasio. Ame koi itre nekönatr ka thaa 16 pala kö lao macatre, loi e tro angatre a ce huliwa memine ketre e nyidro keme maine thin, maine ketre trejine pena, thupëtresiji maine föe. Eje hi laka, hnëqa së asë hi la troa nyihnyawane la uma ne asabele së; qa ngöne lai, loi e tro së a hleme la itre wanamamike ka adrone ej, me aporopene pala hi la hnë tro së a icasikeu.
16 Hne së hë lo hna kapa la itre eamo ka lolo, göi aqane troa heetre ka loi ngöne la ijine kovasio. Celë hi matre easë a kapa la itre mekune nyine ixatua ngöne la götrane cili, jëne la sinecetrone la Huliwa ne Baselaia, nge hnine la itre itus, hetrenyi fe la itre iatr, me itre foto, nge nyipi ewekë koi së, trenge ewekë i Iehova hnine la Tusi Hmitrötr. (Rom. 12:2; 1 Tim. 2:9, 10) Atre hi la itre atr la kepine matre easë a traqa itronyi ngöne la traone i angatr. Qa ngöne lai, loi e troa qaja aloine hnei angatre la aqane heetre së me iseji së. Nyimutre catre la itretre anyipici Iehova ka amamai tulu ka loi ngöne la götrane cili. Ngo hne së fe hna wangatrehmekune ngöne la itre xaa ijin, la itre ethane la ua ne la fen, kola mama ngöne la aqane heetre me iseji ne la itre xaa ka sine la kovasio. Kola ketre amamane la pengöne la atr ngöne la götrane la ua, hnene la aqane heetre i angeic. Easë a madrine la atr ka loi aqane heetr me ka nyihnyawa ngönetrei, ngo thaa ka pi amamai hnaheetre menu kö. Qa ngöne lai, loi e troa thupëne hnyawa hnene la itre keme me thin, la hnaheetre hna mekune troa xetrëne hnene la itre atrene la hnepe lapa. Thaa ene hmekuje kö ngöne la hnë kovasio, ngo e kuhu fe e trön. Loi e tro pala hi së a athipe lo itre badges së, qëmekene la itre ijine icasikeu, me e thupene mina fe, matre troa atrehmekunyi së pala hi itretre anyipici Iehova, ceitune me itre atrene la nöje i Nyidrë ka wië.—Wange ju la Mareko 8:38.
17 Hna cinyihane hnei Solomona joxu jëne la uati hmitrötr, ka hape, “hna atuthe la qene hmo hnine la nekönat” me “ame la nekönate hna nue, te, troa ahmahmane la thine i nyën.” (Ite edomë 22:15; 29:15) Ame ngöne la itre ijine asabele, hetrenyi la itre nekö së itre trejine ka isa kuci mekunen, matre kola ajolëne la itre ka sine la icasikeu troa drenge hnyawa la itre cainöj. Pine laka, itre keme me thine a troa isa qeje thiinane koi Iehova, pine la aqane ujë ne la itre nekö i angatr, haawe, loi e tro la keme maine thine a thupëne maine itre nekö i nyidro a lapa ezi nyidro matre xeci e kuhu hni i nyidro laka kola drenge la ini qaathei Iehova; ketre, thaa loi kö e troa isa hnë lapa kö me hanekönatr. Ame ngöne la ijine icasikeu, thaa loi kö e troa nue caasine la itre nekönatre troa tro caas koi kabine. Ame lo macatre hnapan, hetrenyi la itre thöthi ka tro kowe la itre kabine nge angatre a thupa ju la tim; ame itre xane ke, angatre a cinyanyine la itre ëje i angatre ngöne la itre ngöne uma. Triane kö itre xane la itre xaa cainöj, ke angatre pe kö a porotrike e tröne la uma ne asabele, maine ngöne la hna acili loto. Loi e troa tro hnene la itre ka thupe ngöne la ijine asabele, troa wange la itre ka huliwa tune lai, me sewe angatre troa ujë tune lai, me amekunë angatre cememine la hni ka menyik, troa hane sine hnyawa la asabele.
18 Pine laka, easë la ka kapa la itre atr ngöne la hne së hna kovasio, haawe, loi e tro së a thupëne hnyawa la itre nekö së memine la itre ewekë së. Ame la itre nekönatr, ke, celë hi itre ahnahna lai ka sisitra qaathei Iehova. Ngo atre hi së laka, kola mama jëne la fene celë la thiina i Satana, laka, kola thele tha. Qa ngöne lai, loi e thaa tro pi kö së a isa tro memine la itre nekö së. Ketre, loi e tro pala hi së a xome the së la kamera së, me trengene manie, me itre xaa ewekë ju kö ka tru thupen, thaa tro pi kö a amë pe itre eje hune la icea së. Loi e troa kiine hnyawa la loto së, me amë juetrëne la itre ewekë së e hnine la pune la loto, maine xometrongëne pena, wanga troa piine hnene la ketre atr, ene pe thë ju angeice la loto, me atrekënö lai itre trenge nyi së.
19 Atreine hi troa hamë ixatua koi së hnene la itre atrekë hnëqane la ithue uma, e traqa ju hetre jole ka traqa koi së. Loi e troa thuemacanyi angatre la itre jole ka eje thei epun, nge epuni petre kö ngöne la hnë kovasio. Hetre madrine ne la itre trejine troa xatua epuni troa thele nyin la jole ka eje thei epun, matre atreine tro epuni a sine la kovasio me kepe thangane ka loi pala hi qa ngön.
20 Ketre madrine ka tru la troa goeëne la itre trejine trahmanyi me föe, a xomi not ngöne la ijine icasikeu. Itre hnepe mekune lai hna xom, ka troa xatua së troa drenge hnyawa, me hnehene la itre mekune ka tru. Ce wange hmaca jë memine la itre atrene la hnepe lapa, maine itre enehmu pena, thupene la hna icasikeu, la itre mekune ka tru hna fejan; nyipi ewekë troa pane mekune hnyawa hmaca la itre ini ka tru, matre thaa tro kö a thëthëhmine itre ej.
21 Hnene pala hi la itretre nyihluei Iehova hna ham, ngöne la kola troa kuca la itre huliwa i Akötresie. (Eso. 36:5-7; 2 A. l. ite jo. 31:10; Rom. 15:26, 27) Hna xome la itre ahnahna hne së hna hamëne thatraqane la huliwa ne cainöje e cailo fen, göi troa nyi thupene la itre ewekë hna ajane thatraqane la itre hnë kovasio, me nyihnyawane itre ej, me itre xaa ewekë ju kö.
22 Tune la hna cinyihane ngöne Amosa 3:7, hna qaja hnei Iehova ka hape, “tha tro kö Nyidrëti a kuca la kete ewekë, maine tha hnapane amamane la hanengë i nyidë kowe la ite perofeta ite hlue i nyidë.” Pine laka, Iehova la “ate amamane la ite ewekë ka sihngöd,” haawe, hnei Nyidrëti hna hamëne jëne la Tusi Hmitrötr, la itre ewekë hna perofetan, itre hadredre la etrun, a ka eatre hnyawa ha. (Dan. 2:28, 47) Hetrenyi pala kö la itre xaa hna thingehnaeane ka thaa eatre petre kö. Haawe, kola troa acatrene la lapaune së ngöne la itre hna thingehnaeane cili, hnene la itre Kovasio ne Distrik 1999, hna hape, “Itre Ewekë Hna Perofetane Hnei Akötresie.” Qatixenyëne ju la trenge ewekë i Iehova koi nyipunie. Trongëne jë la itre hnei nyipunieti hna troa öhne me dreng—ngöne la hna cainöje trootro, hnine la ekalesia, me ngöne la sipu mele i epun. Easë a thithi koi Iehova matre tro Nyidrëti a amanathithine la nöjei ewekë hne së hna hnëkëne matre troa hane sine lo nöjei drai ne la pui ne xeni ne la ua ka sisitria cili!
[Iatr ne la götran 3]
Canga hnëkë jë matre troa hane sine la drai ka pexeje ne Drai Katru, Mecixen, me Sabath!