Enehila Hi La Ijine Ka Ijij

¹ Ame la hna cinyihane hnei Paulo aposetolo, ngöne la hnaluene tusi koi angetre Korinito, ke, nyidrëti a amekunë angatre laka ase hë angatre axeciëne e kuhu hni angatre troa hamë ixatua kowe la itre trejine e Ierusalema. Ngo, pexeje hë la ca macatre, nge tha ase kö angatre afenesine la huliwa hna nyiqaane hë. Hawe, nyidrëti a thuecatre koi angatre ka hape: “Umutheju la hna kuca; mate umutheju qa ngöne la hna heteny, tune la hnei nyipunie hna canga ajan.”​—⁠2 Kor. 8:​11.

² Ngöne la nöjei ijin, hetre itre ewekë hne së hna axeciëne e kuhu hni së. Maine jë, hne së hna axeciëne troa atrune la aqane cainöje trotro së, maine troa atre hnyawa la itre trejin, maine pena troa maca kowe la ketre hnëqa, maine troa atreine troa catre qëmekene la ketre kucakuca. Ngacama, hne së hna nyiqaane cememine la itre mekune ka loi, ngo maine jë thatrei­ne kö së troa umuthe la hne së hna saene kow. Qëmekene la troa traqa kow, ke, mai­ne jë hna pane tro la itre wiik, maine itre treu, maine itre macatre pena, nge tha hne së kö hna aeatrën. Nyipici laka, loi e tro së a ketre sipu trongëne la ihaji lo hna hape troa “umuthe” la hne së hna ­nyiqaan?

³ Aeatrëne jë së la itre hne së hna axeciën: Ka hmaloi catre la troa saen, ngo ewekë ka jole catre la troa aeatrëne la hna axeciën. Tro së a triane la ewekë hne së hna axeciëne e tro palahi së a jëjën. Loi e troa xeci e kuhu hni së, nge thupene lai, troa canga trongën. Nyipiewekë catre la troa hetre porogarame së isa alacas. Nge nyipiewekë mina fe, troa wange hnyawaa­ne la traeme ne huliwa i epun, nge wange ju fe la traeme hnei epuni hna sa thatraqane la itre ewekë hnei epuni hë hna axeciën. Loi e troa amë ngöne porogarame la itre hne së hna mekune troa trongën, nge thupene lai, troa eatrën.

⁴ E jole koi së troa aeatrëne la itre mekune së, ke, ijije tro së a mekune ka hape: ‘Tro pë hë ni a ea elanyi.’ Ngo thatre kö së la ka troa xulu ngöne la drai elany. Ite edomë 27:1 a qaja ka hape: “The selëne kö eö la drai elany, ke tha ’te kö eö la ka troa xulu ngöne la drai.” Hnene la atre drei Iesu, ene Iakobo, hna thuemacanyi së göne la engazone la troa mejiune catrëne kowe la drai elany pine laka “tha ’te kö nyipunie la ewekë elany. Ke nemene la mele i nyipunie? . . . Ngazo kowe la ate ate la loi nyine kuca, ngo tha kuca pe.”​—⁠Iako. 4:​13-17.

⁵ Troa ahnuthe la itre mekune hne së hna ajane troa traqa kow hnene la itre ka iajolë, ene la itre ka troa nyijole së. Hawe, loi e tha tro kö la itre nyipi jole së a paatre ngöne la he së. Nge, tro fe a hetre ixatua e tro palahi së a thithi fë la itre mekune cili. Loi fe tro së a sipone kowe la itre trejine hne së hna majemi kow, troa amekunë së, me xatua së. Ka loi fe la troa nyihatrene la idrai së, nyine amekunë së, nge matre tro së a wange trongëne la hne së hë hna kuca. Tro la isa alacasi a mekune catrëne la hnei angeice hna troa “hamëne thenge la hna axeciëne e kuhu hni.”​—⁠2 Kor. 9:⁠7.

⁶ Ketre ijine ka ijije e treu Okotropa, matre troa huliwa thatraqane la itre mekune hne së hna axeciën. Tha tro kö së a xou troa abonene la itre atr koi La Tour de Garde, me Réveillez-vous!, ngöne la easë xötrei iöhnyi me angatr. Ijije kö tro së a axeciëne la itre mekune hne së hna ajane troa traqa kow? Hapeu, ijije kö troa aelëne la etrune la itre zonale hne së hna troa hamën, maine tro pena kuca la casi maine lue abonema? Itre mekune ka ijije kowe la ka alanyimu la troa axeciëne troa atrune la itre iwaihmaca nyine troa kuca, me nyiqaane troa inine la Tusi Hmitrötre kowe la ketre atr.

⁷ Tha loi kö troa amë koi ketre ijine la itre nyipiewekë, pine laka calemi hë lo hna qaja ka hape “kola pate la fene hnengödrai.” (1 Ioane 2:17) Ijije tro së a hane kapa enehila la itre hnëqa ka ketre pengöne me itre manathithi qa ngöne la huliwa i Iehova. Ngo, isa qanyi së kö troa wange la aqane tro së a hane kapa itr’ej.