Loi e Troa Amë Panëne Pala Hi La Itre Nyipi Ewekë
1 Nemene la itre ewekë ka sisitria catr, nge jëne mele kowe la lapaune me mele ka loi ngöne la götrane la ua? Nyipi ewekë catre troa ketre inine la Tusi Hmitrötr, me troa hane sine la itre icasikeu, me troa catre thith, me troa nyisinene la itre loi thiina, nge tro fe a hane xome fe la huliwa ne cainöj. Thatreine kö tro së a egöcatre ngöne la ua, e thaa hne së kö hna amë panëne pala hi la itre ewekë celë ka sisistria catre thatraqane la mele së.
2 Ketre, easë asë hi a troa isi memine la itre aja ne la ngönetrei së ka ngazo, nge easë a thele jëne troa lepetrije itre ej. (Gal. 5:17) Loi e tro së a thupëne wanga troa hetrenyi the së la mekune lo ka hape, atreine hi troa kapa la itre manathithi e hne së hna nyenyape thele la itre sipu aja së. (Iere. 17:9) Qa ngöne lai, maine easë a ajane troa lolo pala hi la itre hni së, me atreine neëne la itre iamenu ne la fen, haawe, nyipi ewekë catre tro së a isa pane waipengöne pala hi la aqane mele së.—Ite edomë 4:23; 2 Kor. 13:5.
3 Isa Waipengöne Ju La Aliene La Itre Hni Nyipunie: Atreine hi tro sa waipengöne la itre hni së, e tro së a nyipici ngöne la kola isa sipu sa la itre hnyinge celë: Hapeu, atraqatre kö la ajane i eni troa e la Wesi ula i Akötresie? (1 Pet. 2:2) Hapeu eni kö a trotrohnine hnyawa la enyipi ewekëne la troa hane sine la nöjei icasikeu asë ne la ekalesia? (Heb. 10:24, 25) Tuneka, hane kö ni catre thith? (Rom. 12:12) Eni kö a thele troa ce tro me ce madrine memine la itre atr ka metrötrëne la itre ewekë ne la ua? (Rom. 1:11, 12) Hapeu drenge kö ni e kuhu hninge laka, loi e tro ni a hane cainöjëne la maca ka loi? (1 Kor. 9:16) Maine tro epuni a sa hnyawa me kapa madrine la itre hnyinge cili, haawe, tro ha mama laka, hetre ajane i epuni troa amë panëne la itre ewekë ka sisistria catre ngöne la mele i epun.
4 Wange Ju La Hnei Nyipunie Hna Majemine Kuca Ngöne La Drai: Nyipi ewekë tro pala hi nyipunieti a catre waipengöne la aqane huliwane la itre aja ka eje e kuhu hni nyipunie, ene la troa kuca panëne la itre ewekë ka nyipi ewekë catr. Tune la troa e o drai la Tusi Hmitrötr, me itre zonal, La Tour de Garde me Réveillez-vous!, nge thaa tro mina fe kö a thëthëhmine la itre icasikeu. Nyipi ewekë catre fe troa thele ijine troa ce etidi memine la fami asë, me troa ce thith. The tro kö a nue la Televizio me ordinatöre troa xome la traeme i epun. Loi e tro së a catre sine la nöjei icasikeu asë, thaa tro kö la ketre ewekë a ajolëne itre ej. Loi e troa ce axeciëne fe memine la itre atrene la fami, matre tro pala hi a nyigöhnene la huliwa ne cainöje ngöne la wiik.
5 Nyipici laka, maine tro së a amë panëne la itre ewekë ka sisitria catre ngöne la mele së, haawe, tro fe hë së a hane hetrenyi la madrine qa ngöne la aqane ujë cili.