Loi e Tro Fe Së a Itretre Ini Ngo Thaa Tro Kö a Itretre Cainöje Hmekuj

¹ Kola öhne enehila laka, “hna haöthe asë hë la fene hnengödrai hnene la maca hna tro fë hnene la itretre Anyipici Iehova.” Hna tuneka matre traqa pi kowe la pune cili? Thaa qa thene kö la trenge catre i atr, maine musi angeice pena, ngo qa thene la uati hmitrötre i Akötresie, atre eatrongëne la itre hlue i Nyidrë; angatre a xome la itre jiane huliwa ka nyimutre matre troa eatrëne la hnëqa hna amekötine koi angatr, ene la troa cainöje me inine la itre atr.​—Zaka. 4:6; Ite Huliwa 1:8.

² Nyipi ewekë catre la itre mekune hna cinyihane ngöne pepa, pine laka, celë hi ketre jëne ka sisitria lai troa eatrëne la huliwa ne cainöje së. Ngöne la itre macatre, itre miliare lao itus, me boroshür, me zonal, me tarak, hna kuca me hamëne hnene la itre Temoë i Iehova, matre troa xatuane la itre atr troa hane atrepengöne la maca ka loi ne la Baselaia. Kola amamane jëne la Annuaire 1997 la itre rapore göi kuci itus, laka, kola elë la etrun. Hna e la 91 milio lao Tusi Hmitrötr, Traduction du monde nouveau. Ame ngöne la caa macatre hna elë la etrune la itre zonale La Tour de Garde me Réveillez-vous!, hna kuca e Etazini; 7,1 koi 100 ka elë. Ame e Alema ke 35 koi 100 ka elë ngöne la etrune la itre zonale hna kuca ngöne la nöje cili. Kola e la caasi ngöne la köni zonale hna kuca e Alema, a hna ujëne qene Russie.

³ Pine nemene matre kola aja itusi catr enehila? Ngöne la fene asë, celë hi aqane sa lo ixatua hna hamëne kowe la itre trejine asë, ene la troa cainöje kowe la nöjei atr asë ngöne la nöjei götran. Pine laka, ala nyimu catre the së la itre ka catre cainöje enehila​—ngöne itre götrane gaa tru atr, ngöne itre gojeny, me ngöne itre götrane gaa tru magazë​—haawe, kola elë nyimenyime la etrune la itre itusi hna amë pe thene la itre atr ka hetre hni ne ajane kowe la maca hna tro fë. Nyimutre catre thei angatr, itre atr ka thaa hane kö ekö drenge la maca ne Baselaia. Qa ngöne lai, hna thele hnene la itre ekalesia troa hamëne la itre itusi ka isa pengön, matre troa huliwane ngöne la nöjei götrane ne la hna cainöj.

⁴ Nemene La Kepine Matre Easë a Hamëne La Itre Itus? Ame la hnëqa së ke thaa ene hmekuje kö la troa hamë itus. Luetre la lue nyine kuca ngöne la easë a troa xatuane la itre atr matre tro angatre a hane itretre drei Iesu, ene la troa cainöje me ini. Ame la hnapan, nyipi ewekë tro së a cainöjëne la maca ka loi ne la Baselaia, matre tro la itre atr a öhne laka, celë hmekuje hi musi lai nyine tro angatre asë a mejiune kow. (Mat. 10:7; 24:14) Mama hnyawa hë enehila, laka, hetre thangane ka lolo hna kapa qa ngöne la itre itusi së ka qeje pengöne la Tusi Hmitrötr, pine laka, itre eje a ahlëne la ajane la itre atr, me hamëne koi angatre la atrehmekune ne la Baselaia.

⁵ Ame la hnaaluen, ke loi e tro së a inine la itre atr la nöjei ewekë asë hna amekötine hnei Iesu, matre tro fe angatre a hane itretre drei nyidrë. (Mat. 11:1; 28:19, 20) Ketre, hetre thangane catre la itusi ngöne la kola troa qeje pengöne la nyipici matre troa ketr la hni ne la itre hna inin, me xatua angatre matre hane fe angatre itretre drei Iesu.

⁶ Atreine hi troa itretre ‘denge la wesi ula,’ la angetre kapa la itus, ngo thatreine jë kö tro angatre a kuca thenge la hnei angatre hna e, maine pëkö ka xatua angatr. (Iako. 1:22-25) Ame la hane jë fe itretre drei Iesu la itre xaa atr, ke, hnene laka, hetre ixatua hnei angatre hna kapa, nge hna eatrongë angatre hnene la ketre trejin. (Ite Huliwa 8:30, 31) Angatre a ajane tro la ketre atre ini a xatua angatre troa qeje pengöne hnyawa koi angatre la nyipici ka eje hnine la Tusi Hmitrötr. (Ite Huliwa 17:2, 3) Ame la hne së hna ajane ke, ene la troa xatua angatre troa kökötre ngöne la nyipici matre, hane fe angatre hetrenyi la ajane troa nyihluei Akötresie, me xome la bapataiso; ketre, easë a ini angatre troa itre atr ka ijije troa hane inine pena la itre xan.​—2 Tim. 2:2.

⁷ Nyipi Ewekë Catre Troa Tru Pala Hi Hnei Ka Ini: Ame la easë a cainöje trootro, easë hi lai a qaja la maca ka loi kowe la ka ala nyim. Ngo ame la kola troa inine la ketre atr, kolo lai a hape, kola troa hamëne trongëne la atrehmekune i Akötresie koi angeic. Easë a cainöje trootro, matre tro la itre atr a hane trotrohnine hnyawa la maca ne Baselaia; ngo ame la ini hne së hna hamëne koi angatre isa ala caas, ke kola troa xatua angatre troa kapa la maca ka loi me trongëne ej. (Luka 8:15) Thaa kolo hmekuje kö a troa qaja la maca ka loi hnene la ka ini, loi e tro angeice a qeje pengöne hnyawa la aliene la itre mekune hna troa qaja, me itre mekune nyine anyipicin, nge loi e tro fe angeice a thele troa hetre mejiune ne la atr kowe la itre mekune hna hamën.

⁸ Loi e tro së a itre ka ini, thaa itretre cainöje hmekuje kö. (Heb. 5:12a) Eje hi laka, ketre götrane ka sisitria catre ngöne la huliwa së, la troa tro fë itus, ngo troa eatrëne hnyawa la hnaaluene götrane ne la huliwa së, e hne së hna thele troa inine la itre atr. Nyipici laka, troa atraqatre la madrine së ngöne la kola kapa hnene la ketre atr la itusi hne së hna hamën, ngo, maine easë a ajane troa kuca apexejene la huliwa së, haawe, thaa tro kö së a mekune ka hape, tro hi a hamë itus, nge eje hë lai. (2 Tim. 4:5) Ame la tro fë itus, ke celë hi ketre jëne tro lai a fe la qëhnelö matre ijije troa inine la itre atr la nyipici.

⁹ Catre Pi Së Iwai Hmaca Matre Troa Nyiqaane La Itre Etid: Maine jë ala nyimu the së la itre ka hamëne hë la itre itusi ka nyimutre, me itre boroshür, me itre zonal, matre ala nyimu catre la itre atr nyine troa wange hmaca. Loi e tro pala hi së a hnëkë ngöne la nöjei wiik, matre troa bëeke troa akökötrene la ajane la itre atr kowe la nyipici. Ame la ewekë ka tru hne së hna troa kuca ngöne la easë a troa iwai, ke, thaa ene hmekuje kö la troa hamë itus, ngo ene pe la troa xatuane la itre atr troa e itre ej, me thele loi qa ngöne la itre itusi hnei angatre hë hna kapa. Maine pë ju ka bëeke troa wai së ngöne la nöjei ijin, me xatua së lapaa troa hetrenyi la nyipi atrehmekun, hapeu, atreine kö tro së a kökötre ngöne la götrane la ua?​—Ioane 17:3.

¹⁰ Catre pi troa wange hmaca la itre atr ka hetre hni ka ajan, matre troa nyiqaane etidi me angatre ngöne la boroshüre Nemene La Hnei Akötresieti Hna Thele The Së? maine ngöne la itus La connaissance qui mène à la vie éternelle. Lue itusi la ka amamane hnyawa la maca ne Baselaia, nge hna kuca ijije lue eje matre thaa jole e troa trotrohnine la ithuemacany. Kola qatrenge hnene la boroshüre Thele la ketre etidi ka pexeje ngöne la itre trepene ini ne la Tusi Hmitrötr. Kola aijijëne hnene la itus Connaissance, tro la ketre atr a inine la nyipici jëne la itre mekune ka nyimutre, nge thaa jole nge nualai e troa trotrohnin, nge ketre thaa qea menu kö.

¹¹ Tune la hna qeje pengöne hnine la sine trongene la Huliwa ne Baselaia ne 1996, hna ahmaloeëne la porogarame thatraqane la etid, matre thaa jole e tro la ka ini a hamëne la atrehmekun, nge hmaloi fe kowe la hna inine troa trotrohnin. Xome jë la ketre matre troa wange hmaca lo itre aqane troa etid me itre aqane troa tro xome hnyawa ej; itre aqane huliwa ka hetre thangane catr. Ame la itre xaa mekune hna hamën, ke kola qaja la aqane tro së isa ala caasi a xatuane la hnainine cememine la hni ka ajan, ngöne fe la etrune la mekene hna troa wange ngöne la kola etid, maine ngöne la aqane troa xome la itre hnyinge e tröne la topike hna ithahnatan, ngöne la aqane tro la ka ini memine la hna inine a isa canga hnëkëne hnyawa la etid, memine fe la aqane troa eatrongëne la hnainine kowe la organizasio i Iehova. Maine tro së a xötrethenge la itre ixatua cili, nge kola tune fe hnene la itre ka xötrei cainöj, haawe, tro hë së a atreine troa kuca matre kökötre la itre atr hne së hna etidi memin.

¹² Itre Thangane Ka Lolo Hna Öhne Ngöne La Hna Cainöje Trootro: Kola mama hnyawa laka, lue jiane huliwa ka sisitria catre la boroshüre Thele memine la itus Connaissance, göi troa xatuane la itre atr matre itretre drei Iesu fe angatr. Ame la kola kapa la boroshüre Thele hnene la ketre trejine ne Bolivi, angeice a canga xome jë troa nyiqaane etidi memine la ketre trahmany. Thupene la foa lao treu, kola kovasio ne Distrik, nge e cili kola hane xome la bapataiso hnene la hnainin!

¹³ Nyimutre catre la itre atr ka nue la mele i angatre troa nyihluei Iehova, thupene la hnei angatre hna afenesine la etidi angatre jëne la itus Connaissance. Ngöne la caa ekalesia ne Angola, hna elë la etrune la itre etidi hna kuca hnene la itretre cainöj, 190 koi 260, nge kola alue la etrune la itre atr ka sine la itre icasikeu, 180 koi 360, a foa hi lao treu thupene la kola nyiqaane tro fë la itus Connaissance ngöne la götrane cili. Qa ngöne lai, kolo hë a öhne laka, nyipi ewekë troa acile la ketre ekalesia.

¹⁴ Thupene hnene la ketre trejine hna kuca la pane etidi angeice ngöne la itus, Connaissance, angeice a qaja ka hape, hmaloi troa kuca la etid, e “tro la ka elemekene eje a xome la itre hnying, me e la itre xaa xötre ne la Tusi Hmitrötr ka ijij, nge loi e troa xecie hnyawa laka, trotrohnine hi la hnainine la itre mekune hna hamën.” Ngacama hnei angeice pala hi hna mekune laka, itre trejine ka atreine hmekuje hi la ka ijije troa kuca hnyawa la itre etid, nge thaa ijiji angeice fe kö, angeice hë a atrehmekune laka, ijiji angeice fe; öni angeice ka hape: “Pine laka, ijijinge fe, haawe, ijiji itre xane fe.”

¹⁵ Ame la easë a xome la ketre götrane ne la huliwa ne cainöje së, ene la troa etidi memine la itre atr, haawe, easë hi lai a eatrëne lo hnëqa ka tru, ene la troa xatuane la itre atr matre itretre drenge fe angatr. Tro la itre trejine ka thele troa kökötre ngöne la götrane ne la huliwa ne cainöje celë, a hetrenyi la madrine ka tru, nge troa hetre thangane ka loi la huliwa i angatr. Epi qaja jë hne së ka hape, hne së fe hna hane “cainöjëne la baselaia i Akötesie, me inine la nöjei ewekë göi Joxu Iesu Keriso, hnene la tenge cat, nge tha hna shawa.”​—Ite Huliwa 28:31.