Kola Sa La Itre Hnyinge i Nyipunie

◼ Pine nemene matre loi e tro së a wange hnyawa la aqane heetre së me aqane iseji së, maine easë a mekune troa hane vizitëne la itre hnë huliwa e Brooklyn, me Patterson, me Wallkill, me New York, me ngöne itre xaa Bethela e cailo fen?

Nyipi ewekë tro la itre keresiano a isa thupëne la aqane ujë i angatr. Loi e tro pala hi a mama ngöne la aqane heetre me aqane iseji angatr, laka, hetrenyi la metrötre thei angatr, ene lo thiina ka eje thene la itretre nyihluei Iehova Akötresie. Nge tro kö a mama hnyawa lai, ngöne la angatre a vizitëne la itre hnë huliwa i sasaiatri e New York me ngöne la itre xaa wapicine eje e cailo fen.

Ame ngöne la macatre 1998, kola troa kuca la itre kovasio ne distrik, me itre asabele ne la itre nöje asë. Nyimutre catre la itre trejin, itre thauzane ka troa traqa qa ngöne la itre nöje ka nyimutre, angatre a troa vizitëne la iwahutine la hna huliwa hnei sasaiatri e New York, tune mina fe la itre xaa wapicine eje ngöne la itre xaa nöje ka tru. Ame ngöne la easë a vizitëne la itre hna huliwa cili, nyipi ewekë tro së a ‘amamai së kö ite hlue i Akötresie ngöne la nöjei ewekë asë,’ hnene la aqane heetre së me aqane iseji së; nge loi troa eje fe ngöne la itre xaa ijine ju kö.​—2 Kor. 6:​3, 4.

Kola qaja hnene la itus Organisés pour bien remplir notre ministère, la enyipiewekëne la troa lolo la aqane heetr, me aqane isej; hna cinyihane ka hape, loi e tro së a nyihnyawane la ngönetrei së, me aqane heetre së, me aqane iseji së, ngöne la easë a troa cainöje trootro, me sine la itre icasikeu i keresiano. Thupene lai, ngöne la götrane 131, paragarafe 1, kola qaja ka hape: “Loi e troa tune lai la thiina së, ngöne la easë a vizitëne la Bethela e Brooklyn maine ngöne pena la ketre wapicine ne la sasaiatri ngöne la ketre nöj. Ketre, loi e eje pala hi ngöne la itre mekune së laka, ame la Bethela, kola hape, ‘Uma i Akötresie;’ qa ngöne lai, loi e tro sa heetre me iseji me ujë ceitune me easë a troa sine la itre icasikeu me hmi ngöne la Uma ne Baselaia.” Maine draië la hna amekötine celë, ngo loi e troa hane trongëne fe hnene la itretre cainöjëne la Baselaia ngöne la itre sipu nöje i angatr; nge tune mina fe kowe la itre atr ka traqa qaa gaa nany, troa hane ihamë, me iöhnyi memine la itre atrene la Bethela, me hane vizitëne la itre hnë huliwa.

Troa hetre thangane ka loi la aqane heetre së, ngöne la aqane wange itre xaa atr la nyipi hmi i Iehova. Ngo hna wangatrehmekune hë laka, ngazo menu pala ha la aqane heetre ne la itre xaa trejine föe me trahmany, ngöne la angatre a vizitëne la itre Bethela. Loi e troa hetre hni ne xou ngöne la easë a heetre ne troa vizitëne la nöjei Bethela asë. Ngo eje hi laka, easë a ajane troa mele pala hi thenge la hna amekötine ka draië cili ngöne la nöjei götrane ne la mele së; celë hi ka troa amamane laka, isapengöne kö la nöje i Akötresie, memine la fen, ke, easë a kuca asë la nöjei ewekë nyine atrunyi Akötresie. (Rom. 12:2; 1 Kor. 10:31) Ka loi mina fe troa ce ithahnatane memine la itre ka etid me easë me itre xaa atr ju kö, ka mekune troa vizitëne la Bethela, la enyipiewekëne la troa thupëne hnyawa la aqane troa heetre me aqane tro angatre a isej.

Qa ngöne lai, ame la easë a troa vizitëne la itre Bethela, isa goeëne ju ka hape: ‘Lolo kö la aqane heetre me aqane iseji eni? (Wange ju la Mika 6:8.) Hapeu, celë kö iahnuene la Akötresie hnenge hna hmi kow? Tune ka la aqane goeë ni hnene la itre xaa atr, angatre a thixötre hnene la aqane heetre i eni me aqane iseji eni, maine kolo pena elëhni pin? Hape u eni kö a hamëne la tulu ka lolo kowe la itre xaa atr ka xötrei hane vizitëne la Bethela?’ Epi tro pala hi së a thupëne la aqane heetre së me aqane iseji së, ngöne la easë a “alolone ngöne la nöjei ewekë asëjëihë la Ini i Akötesie Ate amele shë.”​—Tito 2:​10.