Kola Sa La Itre Hnyinge i Nyipunie

◼ Nemene la aqane tro sa heetr ngöne la easa ihamë ngöne la itre iuma i Sasaiatri, tune la Bethela maine itre Uma Ne Baselaia maine itre Uma Ne Asabele me itre xane ju kö?

Ame e cailo fen, hetrenyi la itre Uma Ne Baselaia, me itre Uma Ne Asabele, me itre Bethela, me itre wapicine i Sasaiatri, nge itre hnë lai hna löthe me hnëkëne thatraqane la huliwa i Iehova. Hna nyihnyawan itre ej, nge qahmihmi, me porop, ene pe kola mama la hni ne metrötre ngöne la easa goeën itre ej. Ketre isapengöne catre kö memine la hne së hna goeëne ngöne la fene i Satana. Haawe, loi e tro la itretre ihamë ngöne la itre hnë cili, lo itre ka kuca la aja i Iehova, a trotrohnine laka, itre ewekë i Iehova lai, nge hna hnëkën itre eje thatraqane hi la huliwa i Nyidrë.

Ame easë itre Keresiano, easa “a amamai [së] kö ite hlue i Akötesie” ngöne la nöjei götran, ene fe la aqane heetre me iseji së ka ijij, me hna nyihnyawa së. (2 Kor. 6:3, 4) Ketre, atre hnyawa hi së laka, tro fe sa hetrenyi la aqane ujë ka ijij. Tro pala hi a mama jëne la aqane heetre me iseji së laka, hetre hni ne metrötre së, nge ka atreine së troa ce mel, itre thiina lai hna thele thene la itre hlue i Iehova Akötresie. Ka nyipi ewekë catre la itre thiina cili e easa ihamë ngöne la iwahutine la Itretre Anyipici Iehova e New York, memine fe la itre wapicine ej e cailo fen.

Ame ngöne la kola ithanatane la enyipiewekëne la troa heetre me iseji hnyawa, kola qejepengöne hnene la itus Organisés pour faire la volonté de Jéhovah, laka, nyipi ewekë catre troa nyihnyawane la ngönetrei së, me qahmihmi la aqane heetre së, me iseji hnyawa ngöne la easa cainöje trootro maine sine la itre icasikeu pena. Ame ngöne la götrane 138, paragarafe 3, kola hape: “Thaa tro kö së thëthëhmine laka ame la Bethela, tre, “Uma i Akötresie.” Haawe, caasi hi la itre hna amekötine nyine troa trongën göi isej, me heetr, me aqane ujë, ngöne la easa sine la itre icasikeu thatraqane la hmi e hnine la Uma Ne Baselaia.” Itre trepene meköti lai ka draië nyine troa trongëne hnene la itretre cainöjëne la Baselaia ne la nöj maine itre ka traqa qa gaa nany, e kola ihamë ngöne la Bethela. E troa kuca tune lai, itretre ihamë a amamane la hni ne ole i angatr, memine fe la hni ne metrötre i angatr.—Sal. 29:2.

Troa mama ngöne la aqane heetre së laka, easë la itre atr, “angete thina ka ijiji Akötesie.” (1 Tim. 2:10) Tro la aqane heetre së ka ijij, me aqane iseji së a xatuane la itre xan troa hetre metrötre kowe la hmi i Iehova. Ngo, kola mama laka, ame la kola ihamë ngöne la itre iuma i Sasaiatri hnene la itre xaa trejine trahmanyi me föe ka ala xalaithe hi, tre, angatr a wanga acone maine sasaithi tulu la aqane heetre i angatr, maine amamane pena la itre xaa götrane la ngönetrei. Thaa ka loi kö kowe la itre Keresiano troa heetre tune lai ngöne la nöjei ijin. Ame ngöne la götrane celë, tune fe ngöne la itre xaa götrane la mele së, aja së troa catre fë la itre trepene meköti ka draië nge ka aisapengö së kö nöje i Akötresie qa ngöne la fene celë, nge ka kuca la nöjei ewekë nyine atrunyi Akötresie.—Rom. 12:2; 1 Kor. 10:31.

Haawe, ame la easa ihamë ngöne la iwahutine me itre iuma i Sasaiatri e New York maine itre xaa götran, maine hne së ju hë hna eköthe amë troa ihamë, maine hmekune la itre ijine mano pena ngöne la ketre nöj, loi e tro sa isa hnyinge ka hape: ‘Tune kaa la aqane heetreng, maine isejing, kolo kö a mama laka, hetre hni ne qahmihmi ngön, me hna nyihnyawane kö, me hetre hni ne metrötre kö kowe la hnë hne së hna ihamë ngön? Kolo kö a amamane hnyawan laka, easa atrune la Akötresie hne së hna thili kow? Hapeu, kolo kö a thapa la mekune i itre xan, maine athixötrë angatre pena hnene la aqane heetre së maine iseji së?’ Epi tro pala hi sa “alolone . . . ngöne la nöjei ewekë asëjëihë la ini Akötesie Ate amele shë” hnene la aqane heetre me iseji së!—Tito 2:10.